ქობულეთის მუნიციპალიტეტის 29 საბავშვო ბაღში ბავშვების მენიუში 2020 წლის 20 იანვრიდან დღემდე რძე და რძის პროდუქტები არ შედის. ბაღების გაერთიანების ინფორმაციით, აღსაზრდელებს საკვები სპეციალისტების მიერ კორექტირებული მენიუს ფარგლებში მიეწოდათ. გაერთიანება სახელმწიფო შესყიდვების სააგენტოს სთხოვს თანხმობას, გადაუდებელი აუცილებლობიდან გამომდინარე, რძის პროდუქტები [რძე, კარაქი, ყველი, მაწონი – ერთი თვის მარაგი] შეისყიდონ მიმდინარე ტენდერზე ხელშეკრულების გაფორმებამდე.
ქობულეთის ბაღების გაერთიანების მიერ გამოცხადებული ტენდერი ერთ-ერთმა კომპანიამ დავების საბჭოში გაასაჩივრა. შესაბამისად, დავის დასრულებამდე სატენდერო პროცედურები შეჩერდა. რძისა და რძის პროდუქტების შეძენაზე ტენდერი 281 880 ლარით იყო გამოცხადებული. შპს „მთის ხარისხი“ კი გაერთიანებას 2020 წლის განმავლობაში მოთხოვნილი პროდუქტების მიწოდებას 247 999 ლარად სთავაზობდა.
ხელშეკრულების მომზადების ეტაპზე ტენდერი გაასაჩივრა შპს „ჯი აი სი ჯორჯიამ“. მომჩივანი მიიჩნევს, რომ „მთის ხარისხის“ მიერ შეთავაზებული პროდუქტების [რძის] მონაცემები არ შეესაბამება ტენდერის ტექნიკურ მოთხოვნებს.
„ვითხოვთ, გაუქმდეს ა(ა) იპ ქობულეთის მუნიციპალიტეტის საბავშვო ბაღების სატენდერო კომისიის სხდომის ოქმი… სატენდერო კომისიამ მიიღოს კანონშესაბამისი გადაწყვეტილება და მოახდინოს შპს „მთის ხარისხის “ დისკვალიფიკაცია და ამის შემდგომ გააგრძელოს შემდგომი პრეტენდენტების შერჩევა- შეფასების პროცედურები“, – მოითხოვს მომჩივანი კომპანია.
„ჩვენ მიერ 2019 წლის 31 დეკემბერს რძის პროდუქტების შესყიდვის მიზნით გამოცხადებულ ტენდერში გამარჯვებულად გამოვლენილი იქნა შპს „მთის ხარისხი“, რომელსაც სატენდერო კომისიის 2020 წლის 22 იანვრის ოქმით ეთხოვა საბანკო გარანტიის წარმოდგენა და ხელშეკრულების გაფორმება. შპს ,,ჯი აი სი ჯორჯიას” მიერ გასაჩივრებული იქნა სატენდერო კომისიის გადაწყვეტილება, რამაც განაპირობა მიმდინარე ტენდერის შეჩერება სადავო საკითხის გადაწყვეტამდე. ორგანიზაციის მიერ დამტკიცებული მენიუს ფარგლებში შესყიდულია ყველა სხვა დასახელების კვების პროდუქტები, სასწავლო-სააღმზრდელო პროცესი საბავშვო ბაღებში დაწყებულია 20 იანვრიდან, ვინაიდან გამარჯვებულ პრეტენდენტთან ხელშეკრულება უნდა გაფორმებულიყო 28 იანვარს, 20 იანვრიდან 28 იანვრის ჩათვლით აღსაზრდელებს მიეწოდათ საკვები, სპეციალისტების მიერ კორექტირებული მენიუს ფარგლებში“, – აღნიშნულია ქობულეთის ბაღების გაერთიანების განაცხადში.
ბაღების გაერთიანებაში აცხადებენ, რომ საჩივარი განიხილება 4 თებერვალს: „რა გადაწყვეტილება იქნება მიღებული და რა თანმიმდევრობით გაგრძელდება ტენდერთან დაკავშირებული პროცედურები, წინასწარ უცნობია. აღნიშნულიდან გამომდინარე, ვინაიდან სპეციალისტების მიერ მიზანშეუწონლად ჩაითვალა აღსაზრდელებისათვის კვების გაგრძელება რძის პროდუქტების გამორიცხვით [ერთ კვირაზე მეტი რძის პროდუქტების ამორიცხვა ეწინააღმდეგება კვების ტექნიკურ რეგლამენტს], ვითხოვთ გადაუდებელი აუცილებლობიდან გამომდინარე რძის პროდუქტების შესყიდვას მიმდინარე ტენდერზე ხელშეკრულების გაფორმებამდე“.
ბაღების გაერთიანება 2020 წლის 28 თებერვლამდე ჯამში 35 464 ლარის რძისა და რძის პროდუქტების შესყიდვას გეგმავს. გაერთიანებაში „ბათუმელებს“ უთხრეს, რომ ხელშეკრულება შესყიდვების სააგენტოდან თანხმობის მიღებიდან ერთ დღეში გაფორმდება. გაერთიანებაში აცხადებენ ასევე, რომ 20 იანვრიდან დღემდე სხვა პროდუქტების მხრივ ბაღებში პრობლემა არ ყოფილა.
შესყიდვების სააგენტოში ქობულეთის ბაღების გაერთიანების განაცხადის განხილვის საბოლოო თარიღად 3 თებერვალია ჩანიშნული.
