„იაფი სახლის“, იგივე „ხელმისაწვდომი საცხოვრისით“ სარგებლობის მსურველთა შერჩევის კრიტერიუმები ბათუმის მერიამ 2016 წელს „სოციალური კვლევებისა და ანალიზის ინსტიტუტის“ დახმარებით შეიმუშავა და დღეს გაასაჯაროვა.
მერიის განმარტებით, „ხელმისაწვდომი საცხოვრისი [Affordable Housing] არის იზოლირებული, კეთილმოწყობილი ბინა მრავალსართულიან კორპუსში, რომელსაც მუნიციპალიტეტი გადასცემს აპლიკანტ ოჯახს, განსაზღვრულ პერიოდში ბინის თვითღირებულების ქირის სახით დაფარვის და ბინის საბოლოო გამოსყიდვის უფლებით.
შემუშავებული დოკუმენტით პროგრამის სამიზნე ჯგუფი არის საზოგადოების ის ფენა, რომელმაც სიღარიბეს თავი დააღწია, მაგრამ ვერ ჩამოყალიბდა სტაბილურ საშუალო ფენად, რათა საკუთარი ძალისხმევის საფუძველზე, სახელმწიფოს ჩარევის გარეშე, შეძლოს ისეთი მოთხოვნების დაკმაყოფილება, როგორიცაა ადეკვატური საცხოვრებლით სარგებლობა.
ოჯახის შემადგენლობაში არ გაითვალისწინება:
ა) პირ(ებ)ი, რომლებიც ოჯახთან ერთად ფაქტობრივად არ ცხოვრობენ,
დასაქმების ან სხვა რაიმე მიზეზთა გამო;
ბ) სასჯელაღსრულების დაწესებულებაში მყოფი პირი;
გ) ქვეყნის ფარგლებს გარეთ 12 თვეზე მეტი ხნით მყოფი პირი;
დ) სასამართლოს მიერ უგზო-უკვლოდ დაკარგულად ან გარდაცვლილად გამოცხადებული პირი
ეკონომიკური, კერძოდ, შემოსავლების ნიშნით, პროგრამის სამიზნე ოჯახები, მათი სტრუქტურის მიხედვით, ასე შეიძლება აღიწეროს: ერთსულიანი ოჯახებისთვის თვეში შემოსავლების მინიმალური და მაქსიმალური ზღვარი მერყეობს დაახლოებით 400-1200 ლარით, ორსულიანი ოჯახებისთვის – 400-1800; სამსულიანისთვის – 600-2400, ხოლო 4 და მეტსულიანისთვის – 800-3000 ლარის ფარგლებში.
შემუშავებული კრიტერიუმების მიხედვით, პროგრამაში მონაწილეობას შეძლებს ბათუმში დამკვიდრებული მრავალსულიანი ოჯახი, რომელსაც აქვს ძლიერი საჭიროება, თუმცა, არ გააჩნია საკუთარი საცხოვრებელი, არც სხვა უძრავი ქონება – არასასოფლო სამეურნეო დანიშნულების მიწა ან კომერციული ფართობი.
ოჯახის წევრების სტაბილური სამსახურის, შესაბამისად, სტაბილური, თუმცა საშუალო შემოსავლის წყალობით ზომიერ ფასად შეუძლია იქირაოს საცხოვრებელი, შეუფერხებლად გადაიხადოს ქირა, კომუნალური და სხვა გადასახადები, არ გააჩნია საბანკო დავალიანება და ოჯახში ჰყავს სპეციალური სტატუსის მქონე პირი ან პირები [შშმპ, ახალდაქორწინებული, მარჩენალდაკარგული, ომის ვეტერანი და სხვა] ამასთან, ოჯახისთვის მისაღებია “ხელმისაწვდომი საცხოვრისით” გათვალისწინებული პირობები.
დოკუმენტში ხაზგასმითაა ნათქვამი, რომ “ხელმისაწვდომი საცხოვრისის” პროგრამის ბენეფიციარები არ არიან სოციალურად დაუცველი (ე.წ. “მოწყვლადი”) ჯგუფები, რომელთა მიმართაც სახელმწიფო იღებს ძირითადი დონორის ვალდებულებას.
ამავე თემაზე: ვის შეხვდება იაფი სახლი – კრიტერიუმები საიდუმლოა, ბინების რაოდენობა – უცნობი: მერიის ტენდერი
“იაფი სახლის” მშენებელი კომპანია, რომელსაც მერიამ ორ მილიონამდე ლარი გადაუხადა, გაუჩინარდა
