Batumelebi

ხელვაჩაურში, შარაბიძებისა და ზანაქიძების უბანში დაახლოებით 900 აბონენტს ბუნებრივი აირი არ მიეწოდება, კომპანია „სოკარის“ წარმომადგენლის თქმით, მიზეზი ავარიაა,  რომელიც გზის ინფრასტრუქტურაზე მომუშავე კომპანიამ გამოიწვია:

„დაზიანდა მილი, რომელიც უკვე აღვადგინეთ. ხვალ დილიდან ბუნებრივი აირის მიწოდების აღდგენა დაიწყება“ – გვითხრეს კომპანიაში.

ორგანიზაცია „მე მიყვარს ბათუმის“  ერთ-ერთი ხელმძღვანელი ალექსანდრე მილორავა აჭარის ტელევიზიის წინ შიმშილობს. მისი მოთხოვნაა საზოგადოებრივი მაუწყებლის აჭარის ტელევიზიისა და რადიოს დირექტორის, გიორგი კოხრეიძის გადადგომა. მილორავა ამბობს, რომ საკითხი დღის წესრიგში აჭარის ტელევიზიისა და რადიოს მრჩეველთა საბჭომ უნდა დააყენოს.

ალექსანდრე მილორავას თქმით, გიორგი კოხრეიძემ ტელევიზიას ჩამოაშორა კრიტიკული და თავისუფალი სიტყვის დამცველი ჟურნალისტები, ამიტომაც იგი და მისი ორგანიზაცია ითხოვს ტელევიზიის დირექტორის გადადგომას.

აქტივისტს ტელევიზიის წინ კარავი აქვს გაშლილი და ღამის გათენებას ამ კარავში გეგმავს. ამ დროისთვის მასთან ერთად არიან ორგანიზაციის სხვა წევრებიც.

ამ დრომდე მილორავას აჭარის ტელევიზიის მრჩეველთა საბჭოს წევრებიდან მხოლოდ თამილა დოლიძე გაესაუბრა და გაეცნო მის მოთხოვნებს.

ალექსანდრე მილორავა ამბობს, რომ პროტესტის ამ უკიდურეს ფორმას გამოიყენებს მანამ, ვიდრე მის მოთხოვნას მრჩეველთა საბჭო დღის წესრიგში არ დააყენებს და გიორგი კოხრეიძეს არ გადააყენებენ.

ავსტრიაში მცხოვრები ქართველი სტუდენტების დიდი ნაწილი კორონავირუსის პანდემიისას უმუშევარი დარჩა. სტუდენტების ნაწილი საქართველოში დაბრუნდა, ნაწილი კი ავსტრიაში დარჩა.

„ავსტრიაში მცხოვრებმა ქართველებმა და მათ შორის ქართველმა სტუდენტებმა, რომლებმაც შეინარჩუნეს სამსახური, უმუშევრად დარჩენილებისთვის რამდენიმე დღეში შეაგროვეს 1945 ევრო. იყვნენ ისეთებიც, ვინც თავადაც დაკარგეს სამსახური, მაგრამ დანაზოგი გაუნაწილეს სხვებს და ასე გამოხატეს სოლიდარობა ერთმანეთის მიმართ.

იყვნენ ისეთი სტუდენტებიც პანდემიის დასაწყისშივე რომ დაბრუნდნენ საქართველოში და კარანტინიდან  გვირიცხავდნენ თანხას ავსტრიაში დარჩენილებისთვის. სოლიდარობის განცდას თანხის რაოდენობა არ განსაზღვრავს, აქ მცხოვრებმა ქართველმა სტუდენტებმა ერთმანეთი არ დატოვეს, ეს  ჩემთვის ძალიან სასიხარულო იყო“, – ამბობს ავსტრიის ქართველ სტუდენტთა ასოციაციის ხელმძღვანელი სალომე სალაძე, რომელიც უმუშევრად დარჩენილი სტუდენტების დახმარების ინიციატორი იყო, სალომე თავადაც ვენის ერთ-ერთი უნივერსიტეტის სტუდენტია. შეგროვილი თანხით ვენაში, ზალცბურგში, გრაცსა და ლინცში მცხოვრებ 31 სტუდენტს დაეხმარნენ.

სტუდენტებმა 22 სტუდენტს გადაურიცხეს თანხა პროდუქტისთვის, 8 მათგანს სტუდენტური დაზღვევის გადახდა სჭირდებოდა, რადგან ამის გარეშე ჯანმრთელობის მცირე პრობლემის შემთხვევაშიც კი ისინი ექიმთან ვიზიტს ვერ შეძლებდნენ. ერთ განსაკუთრებული საჭიროების მქონე სტუდენტს ბინის ქირის ნაწილი გადაუხადეს.

„საქართველოს მთავრობის და ქართული „სპარის” მოლაპარაკების შედეგად, საქართველოდან საელჩოში გამოგზავნეს „სპარის” 30-ევროიანი ბარათები და მსურველმა სტუდენტებმა საელჩოდან აიღეს ეს შეთავაზება. ქართველი სტუდენტების უმრავლესობამ ავსტრიაში სამსახური დაკარგა და თუნდაც ასეთ აქციებს დიდი მნიშვნელობა აქვს“, – ამბობს სალომე.

ავსტრიაში მოქმედი კანონის მიხედვით, დასაქმებულს სამსახურის დაკარგვის შემთხვევაში ყოველთვიურად ხელფასის 60%-ს უხდიან, თუმცა ამისთვის საჭიროა ერთსა და იმავე ადგილზე სულ მცირე ნახევარი წელი მაინც მუშაობდეთ. ქართველი სტუდენტები კი იშვიათად მუშაობენ ხანგრძლივად ერთ სამსახურში, ნაწილი არალეგალურადაა დასაქმებული და, შესაბამისად, სახელმწიფოს ფულადი კომპენსაცია უმუშევრობისთვის მათ არ შეხებიათ.

როგორც სალომე სალაძე გვეუბნება, პანდემიის პირობებში უსახსროდ დარჩენილ სტუდენტებს ავსტრიაში უნივერსიტეტებმა შესთავაზეს ერთჯერადი დახმარება – 750 ევრო, თანხით ეხმარებოდა უმუშევრად დარჩენილებს, ასევე, „წითელი ჯვარიც“.

სალომე სალაძის თქმით, უცხოელმა სტუდენტებმა შეიტანეს განაცხადი ავსტრიის განათლების სამინისტროში წელს სწავლის გადასახადის გაუქმების თხოვნით, რაც არ დაკმაყოფილდა, თუმცა უნივერსიტეტებმა სტუდენტებს ე.წ. მესამე მსოფლიოს ქვეყნებიდან, სწავლის გადასახადი 30 აპრილიდან 30 ივნისამდე გადაუვადეს.

„ჩემი დაკვირვებით, აქ დაზარალებული ქართველი სტუდენტები ავსტრიის სხვადასხვა ორგანიზაციიდან უფრო იღებდნენ დახმარებას, ვიდრე საქართველოსგან. უცხოეთში უსახსროდ დარჩენილი სტუდენტებისთვის, როგორც ვიცი, ფულადი დახმარება საქართველოს სახელმწიფოს არ შეუთავაზებია.

გასაგებია, რომ ყველანი უცებ აღმოვჩნდით პანდემიის გაურკვეველ პირობებში და დახმარება ყველას ვერ გაწვდებოდა: ადგილზევე, საქართველოშიც ვერ იღებს ყველა ამ ტიპის კომპენსაციას, თუმცა კონსტიტუციაში არსებობს ჩანაწერი, რომ სახელმწიფომ უნდა იზრუნოს თანამემამულეებზე, თუნდაც ისინი სხვა ქვეყნის ტერიტორიაზე ცხოვრობდნენ. „თანამემამულის“ ცნება, რომელიც 2017 წელს გაჩნდა კონსტიტუციაში, სწორედ ამას გულისხმობს, რომ არ აქვს მნიშვნელობა, სად ცხოვრობს შენი მოქალაქე, მასზე სახელმწიფომ უნდა იზრუნოს.

რომელი ქვეყნის მოქალაქეც ხარ, ის უფრო პასუხისმგებელია შენზე, ვიდრე მიმღები ქვეყანა, მაგრამ პანდემიამ ყველაფერი არია. ქართული სახელმწიფო ფინანსურად არ დახმარებია ქართველ სტუდენტებს, მაგრამ ავსტრიაში საქართველოს საელჩოს თანამშრომლები მორალურად და ფინანსურადაც ბევრ სტუდენტს დაეხმარნენ საკუთარი, პირადი სახსრებით, 24 საათის განმავლობაში მზად იყვნენ ცხელ ხაზზე მათთვის ინფორმაცია მიეწოდებინათ“- ამბობს ავსტრიაში მცხოვრები ქართველი სტუდენტი.

მთავარ ფოტოზე: ავსტრიაში მცხოვრები ქართველი სტუდენტები/ფოტო: ავსტრიის ქართველ სტუდენტთა ასოციაციის ფეისბუქგვერდიდან

„არ ამოიღო ბატონო სულიკო ამბასადორი“, – წერია SMS-ში, რომელიც საკრებულოს თავმჯდომარემ დღეს, 29 მაისს, სხდომის მიმდინარეობის დროს მიიღო. კადრებში ნათლად ჩანს, რომ SMS ბათუმის მერს, ლაშა კომახიძეს ეკუთვნის. საქმე იმაშია, რომ კომპანია „ამბასადორი ბათუმს“ ბათუმის ბულვარში 4-სართულიან მშენებლობის უფლება უკვე აქვს, თუმცა ამ შენობის საძირკველი მოაწყო უფრო მასშტაბური შენობის ასაშენებლად და გასული წლის ბოლოს ბულვარში 15 სართულის აშენების უფლება მოითხოვა. მას ამ სიმაღლის შენობის აშენებაზე, ჯერჯერობით, აჭარაში სააგენტოს ძეგლების საბჭომ უარი უთხრა, თუმცა კომპანიამ კულტურული მემკვიდრეობის დაცვის ეროვნულ სააგენტოს უკვე მიმართა და ითხოვს, რომ ბათუმის ბულვარის ცენტრი [ტერიტორია, სადაც ის აშენებს], ბათუმის ბულვარის საზღვრებიდან ამოიღონ.

დღეს სწორედ ამ კომპანიას აღნაგობის უფლებით მისცეს დამატებით მიწის ნაკვეთი ბათუმის ბულვარში. შესაბამისად, ბათუმის მერის სმს და საკრებულოს თავმჯდომარის, სულიკო თებიძის დასტური – „ოკ“, ბევრ კითხვას აჩენს.

რას ნიშნავს მერის შეტყობინება და საკრებულოს თავმჯდომარის პასუხი? – ეს ბათუმის მერს, ლაშა კომახიძეს ვკითხეთ. ინტერვიუს სტილის დაცვით გთავაზობთ.

• ბატონო ლაშა, რას ნიშნავდა ეს მესიჯი თქვენი მხრიდან. იმას ხომ არა, რომ მერი ხშირად ერევა და გავლენა აქვს საკრებულოს გადაწყვეტილებებზე? 

პირველ რიგში იმას ვიტყვი, რომ მესმის სურვილი მედიასაშუალებების, რომ არსებული სიტუაციიდან შექმნან რაღაც სკანდალი, მაგრამ ეს არის ჩვეულებრივი საკონსულტაციო მესიჯი, იმასთან დაკავშირებით… კი ბატონო  ვადასტურებ, რომ მივწერე, ვინაიდან არ ვესწრებოდი სხდომას. რომ ვყოფილიყავი სხდომაზე მე ვიტყოდი, ბატონებო არ ამოიღოთ ეს საკითხი-მეთქი, იგივეს ვიტყოდი და თავმჯდომარესაც მივმართავდი და ამაზე მეტი მაქ არაფერი არ წერია. ვინაიდან, მერია აყენებდა საკითხს, რომ თუკი არ გრძელდება იჯარა, ამ შემთხვევაში ორი მესამედის ღირებულების, აღნაგობის თანახმად, უნდა მოხდეს დაფარვა და შემდეგ დაუყონებლივ გადმოვიდეს ქონება მერიის საკუთრებაში. ამ ობიექტზე მილიონზე მეტი არის დახარჯული, უნდა გადაიხადოს მერიამ და ამის შემდეგ მერიის საკუთრებაში გადმოვიდოდა ეს ობიექტი. ან იყო მეორე არჩევანი, რომელიც კომპანიის შემოთავაზება იყო და რომელსაც ეყარა კენჭი, რომ მიგვეცა უფლება 15 წლიანი იჯარით, რის შემდეგადაც საჩუქრად გადმოსდიოდა ქალაქს ეს ობიექტი და გადმოუვა. ამ გადაწყვეტილების შედეგად დაიზოგება ორი მესამედი ღირებულების, რომელსაც მერია აღარ გადაიხდის.

ასე, რომ მაქ საუბარი არის იმაზე, რომ ჩემი sms ეს არის საკონსულტაციო, ვინაიდან დადგა საკითხი მათ შორის უმრავლესობის წევრის მხრიდან მისი დღის წესრიგიდან ამოღებაზე. ჩემი პოზიცია იყო, რომ არ ამოეღო „ამბასადორი“ ამ საკითხებიდან.

• საკრებულოს თავმჯდომარეს და მთლიანად საკრებულოს საკითხი ისედაც უნდა ჰქონოდა შესასწავლი და გაანალიზებული, რადგან გაიარა კომისიები, ბიურო და საკითხი სხდომაზე გავიდა. ამ ფონზე თქვენი sms დირექტივასავით არ ჟღერდა? მით უმეტეს, რომ საკრებულოს თავმჯდომარის პასუხი იყო – „ოკ“?

ვერანაირად ვერ დავადასტურებ მაგას, თქვენ თუ იცნობთ სულიკო თებიძეს და მის განვლილ გზას, მასზე ზეგავლენის მოხდენას ასეთი sms -ით მით უმეტეს, ამისათვის სხვა ფორმებიც არსებობს, სისულელე არის მსგავსი რაღაცის გაფიქრება. მიმდინარე საკრებულოს სხდომაზე sms – ის საშუალებით სულიკოს მე მივწერე ჩემი პოზიცია, მაგრამ ამით როგორ შეიძლებოდა დეპუტატებზე გავლენის მოხდენა? – უბრალოდ, ეს იყო საკუნსულტაციო sms და ასეთი კონსულტაციები ჩვენ მუდმივად გვაქვს. ალბათ გახსოვთ და იცით, რომ ერთი პარტიის წევრები ვართ, ერთი გუნდის წევრები და უმრავლესობის ფორმატში ერთიანად გამოვდივართ, მაგრამ ჩემთვისაც სიურპრიზი იყო ის, რომ უმრავლესობის წევრმა დააყენა საკითხი ამოღებაზე, ჩემი საკონსულტაციო sms იყო ჩემი პოზიცია, რომელსაც კიდევ ერთხელ ხაზს ვუსმევ მე რომ ვყოფილიყავი საკრებულოს სხდომაზე მე ვიტყოდი იგივე ფრაზას ხმამაღლა. რადგანაც sms – ის სახით იყო, ეს უნდა ახლა ვიღაცას…  მე რომ სხდომაზე ვყოფილიყავი, იგივე ფაზას ვეტყოდი ხმამაღლა სულიკოსაც და ნებისმიერ დეპუტატსაც.  მესმის, რომ კარგი ლუკმა ჩაუვარდა დასატრიალებლად ზოგიერთ მედიას, მაგრამ თუ უფრო ჩაუღრმავდებით და შეეცდებით შინაარსობრივად დაინახოთ, თავის პლუს-მინუსით, დაინახავთ, რომ ამაში არაფერი სკანდალური არ არის.

• გამორიცხავთ, რომ ეს თქვენი იმპიჩმენტის დაწყების საფუძველი გახდეს? 

ჩემთვის ეს სასაცილოა ახლა რასაც ლაპარაკობთ, სერიოზულად არ აღვიქვამ. ასე რომ, ვფიქრობ საზოგადოება ბრმა არ არის, ძალიან ადვილი მისახვედრია, ამის უკან კონკრეტული საკითხი, რომლითაც დავიწყე განმარტება და შედარება, ამოღება არამოღების საკითხებს შორის, თვითონ sms-ის ფორმაზე გითხარით საკონსულტაციოა. ახლა ნაციონალური მოძრაობის წევრები იმპიჩმენტის მოწყობის შეთავაზებით, უკვე აღარც მახსოვს რა საკითხზე იყვნენ, ანუ არცერთ მცდელობას ხელიდან არ უშვებენ და ახლა ესეც, რომ მოინდომონ, ეჭვიც არ შემეპარება, რომ მოინდომებენ ამის გაკეთებას, მაგრამ ჩემთვის ძალიან დიდი მნიშვნელობა აქვს საზოგადოების აზრს, იმიტომ, რომ საზოგადოებას ვერ მოატყუებ.

• სწორედ საზოგადოებას ჰქონდა დღეს პრეტენზია, რომ არ ჩართეთ ამ საკითხის განხილვის პროცესში, ვგულისხმობ…

ამ თემაზე აღარ ვაპირებ მეტ სიღრმეში შესვლას, მგონი ყველა კითხვაზე გიპასუხეთ.

____

ამავე თემაზე:

საზოგადოებრივი მაუწყებლის აჭარის ტელევიზიისა და რადიოს შენობის წინ საზოგადოებრივი მოძრაობის, „მე მიყვარს ბათუმის“ აქტივისტმა, ალექსანდრე მილორავამ კარავი გაშალა და განაცხადა, რომ შიმშილობას იწყებს.

„მოვითხოვთ, ბორდმა [აჭარის ტელევიზიისა და რადიოს მრჩეველთა საბჭომ] დააყენოს დირექტორის იმპიჩმენტის საკითხი, გადააყენოს ის და სამსახურში დააბრუნონ მისი დირექტორობის პერიოდში გათავისუფლებული ჟურნალისტები“ – განაცხადა ალექსანდრე მილორავამ „ბათუმელებთან“. მან აღნიშნა, რომ იგი ამ მოთხოვნით შიმშილობას იწყებს.

აჭარის ტელევიზიის შენობასთან ამჟამად საპატრულო პოლიციაც იმყოფება.

„ბათუმელების“ პირდაპირი ჩართვა აქციიდან:

საზოგადოებრივმა მოძრაობამ – „მე მიყვარს ბათუმი“, აქცია აჭარის ტელევიზიისა და რადიოს შენობის წინ 26 მაისსაც გამართა ტელევიზიასთან დირექტორის, გიორგი კოხრეიძის გადადგომის მოთხოვნით. 

ამავე თემაზე: 

აჭარის მთავრობაში აცხადებენ, რომ კოვიდ 19-ის პანდემიამდე თურქეთში დასაქმებულ საქართველოს მოქალაქეებს, რომლებიც საზღვრის ჩაკეტვის გამო უმუშევრად დარჩნენ, ფინანსურად არ დაეხმარებიან.

„ფულად კომპენსაციებზე მუშაობს ცენტრალური მთავრობა და, როგორც ვიცით, 1200-ლარიანი კომპენსაციები გაიცემა მოქალაქეებზე, ვინც სამუშაო დაკარგა“, – ამბობს აჭარის ფინანსთა და ეკონომიკის მინისტრი ჯაბა ფუტკარაძე.

საქართველოს მთავრობის აღნიშნული ინიციატივა არ ეხება თურქეთში დასაქმებულ საქართველოს მოქალაქეებს, რადგან მთავრობა 6 თვით 200-ლარიან ფინანსურ კომპენსაციას მხოლოდ იმ ადამიანებს აძლევს, ვინც დამსაქმებლისგან ოფიციალურ დოკუმენტს წარადგენს, რომ ის ნამდვილად მუშაობდა პანდემიამდე.

თურქეთში დასაქმებულ საქართველოს მოქალაქეებს კი მსგავსი დოკუმენტის წარდგენა არ შეუძლიათ. შესაბამისად, მათზე ეს ინიციატივა ვერ გავრცელდება.

იმის გათვალისწინებით, რომ თურქეთში სამუშაოდ ყველაზე ბევრი ადამიანი ბათუმიდან გადადის, „ბათუმელებმა“ მინისტრს ჰკითხა, ხომ არ გაითვალისწინებს აჭარის მთავრობა ამ გარემოებას და შეიმუშავებს თუ არა ამ კონკრეტული სეგმენტისთვის დახმარების პროგრამას? ჯაბა ფუტკარაძე ამბობს: „აჭარაში არსებულ სხვადასხვა კომპანიებს ჩვენ 6 თვით გადავუვადეთ პირგასამტეხლოების გადახდა, ასევე საიჯარო და სხვა გადასახადები სწორედ იმიტომ, რომ მათ დამატებით შექმნან სამუშაო ადგილები.

ეს ადამიანები შეიძლება დასაქმდნენ ტურიზმის და უძრავი ქონების სექტორში, კერძოდ სამშენებლო სფეროში, ასევე ივნისიდან აჭარა მზადაა მიიღოს როგორც შიდა, ასევე უცხოელი ტურისტები და შესაძლოა დასაქმდნენ ტურიზმის სფეროშიც“, – ამბობს ის. თუმცა, კითხვაზე, რა პროცენტი შეიძლება დასაქმდეს ამ სეგმენტიდან ტურისტულ თუ სამშენებლო ბიზნესში, მინისტრს ამაზე კონკრეტულად არ უპასუხია.

თურქეთთან საზღვრის ჩაკეტვის გამო უმუშევრად დარჩენილ ასობით მოქალაქის დახმარებას არც ბათუმის მერია აპირებს. პრესსამსახურის განმარტებით, მერიას არ აქვს შესაბამისი პროგრამა, რომელიც უმუშევრად დარჩენილი ადამიანებისთვის კომპენსაციის გადახდას ითვალისწინებს.

მერიის წინ უმუშევრად დარჩენილმა მოქალაქეებმა საპროტესტო აქცია  გამართეს. აქციის მონაწილეები ქალები იყვნენ, რომლებიც ამბობენ, რომ ისინი რამდენიმე წელია თურქეთში მუშაობენ და ასე არჩენენ ოჯახს, თუმცა პანდემიის გამო სამუშაო დაკარგეს.

მათი თქმით, მთავრობა ვალდებულია მათზეც იზრუნოს და როგორც თვითდასაქმებული პირებისთვის აპირებს 200-ლარიანი კომპენსაციის გაცემას ექვსი თვის განმავლობაში, მსგავსი პროგრამის ფარგლებში, მათაც გადაუხადონ უმუშევრობის კომპენსაცია.

თურქეთ-საქართველოს საზღვრის ჩაკეტვამდე, სარფის საბაჟოს დღეში ასობით ადამიანი კვეთდა, მათი უმრავლესობა ქალია. ისინი ძირითადად საზღვართან ახლოს მდებარე კაფე-ბარებსა და მაღაზიებში მუშაობდნენ.

ამავე თემაზე:

საქართველოს სისხლის სამართლის კოდექსში შეტანილი ცვლილებით, კოდექსს დაემატა ახალი 343^​1 მუხლი, რომლის მიხედვითაც,

„საქართველოს ტერიტორიული მთლიანობის პრინციპის დარღვევის ამსახველი ელექტრონული რუკის ან მისი ბეჭდური გამოცემის, აგრეთვე ასეთი გამოსახულების შემცველი სხვა საგნის დამზადება, წარმოება, რეკლამირება, გამოყენება, საქართველოში შემოტანა, გადაზიდვა, საქართველოდან გატანა ან რეალიზაცია საქართველოს ტერიტორიული მთლიანობის შესახებ არასწორი ინფორმაციის გავრცელების მიზნით ისჯება ჯარიმით ან თავისუფლების აღკვეთით ვადით ორ წლამდე“.

აღნიშნული ცვლილება სისხლის სამართლის კოდექსში 2020 წლის 22 მაისს შევიდა და ის 2020 წლის 2 ივლისიდან ამოქმედდება.

ცვლილების მიხედვით:

[checklist]

• აღნიშნული მუხლით გათვალისწინებული დანაშაულის ჩადენისათვის სისხლისსამართლებრივი პასუხისმგებლობისაგან თავისუფლდება პირი, რომელიც ნებაყოფლობით ჩააბარებს ამ მუხლით გათვალისწინებულ საგანს, თუ მის ქმედებაში არ არის სხვა დანაშაულის ნიშნები.
• ამ მუხლის მიზნებისათვის ამ მუხლით გათვალისწინებული საგნის ნებაყოფლობით ჩაბარებად მიიჩნევა მხოლოდ ისეთი ქმედება, როდესაც პირი გამოძიების დაწყებამდე წერილობით ან კომუნიკაციის ნებისმიერი ტექნიკური საშუალებით განაცხადებს აღნიშნული საგნის წარდგენის თაობაზე და აქტიური ქმედებით შეუწყობს ხელს მის ამოღებას.
• ამ მუხლით გათვალისწინებული ქმედებისათვის იურიდიული პირი ისჯება ჯარიმით, საქმიანობის უფლების ჩამორთმევით ან ლიკვიდაციითა და ჯარიმით.

[/checklist]

სისხლის სამართლის კოდექსით, ფიზიკური პირისთვის „ჯარიმის მინიმალური ოდენობაა 2000 ლარი. თუ ამ კოდექსის განსაკუთრებული ნაწილის შესაბამისი მუხლის სანქცია სასჯელის სახით ითვალისწინებს თავისუფლების აღკვეთას სამ წლამდე ვადით, ჯარიმის მინიმალური ოდენობა არ უნდა იყოს 500 ლარზე ნაკლები“.

იურიდიული პირისათვის კი „ჯარიმის მინიმალური ოდენობა შეესაბამება ფიზიკური პირისათვის გათვალისწინებული ჯარიმის ორმოცდაათმაგ ოდენობას“.

ამასთან, „ჯარიმა შეიძლება დაინიშნოს როგორც ძირითად, ისე დამატებით სასჯელად“.

ამ თემაზე:

https://netgazeti.ge/news/310130/

კომპანია „ბათუმის წყლის“ ინფორმაციით, გეგმიური ტექნიკური სამუშაოების გამო, 30 მაისს ღამის 00:00 საათიდან 30 მაისის დილის 08:00 საათამდე წყალმოამრაგება შეუწყდება:

• ჯავახიშვილის ქუჩას და ლერმონტოვის ქუჩას ბაგრატიონის ქუჩიდან ორბელიანის ქუჩამდე;
• ორბელიანის ქუჩას, გენერალ ასლან აბაშიძის ქუჩიდან ლერმონტოვის ქუჩამდე.

„ბათუმის წყალი“ აბონენტებს აფრთხილებს, რომ „წყალმომარაგების მიწოდების აღდგენის შემდეგ, შესაძლოა სარემონტო სამუშაოების გამო, წყალი იყოს მცირედით ამღვრეული, რაც გამოწვეულია მილზე არსებული ჯანმრთელობისათვის უსაფრთხო მინერალების ჩამორეცხვით. გთხოვთ, წყლის მიწოდების აღდენის შემდეგ, ონკანი გააღეთ და წყალი ადინეთ რამდენიმე წუთით, შესაძლო ამღვრეული წყლის გამოშვების მიზნით“.

დღეს, 28 მაისს, ბათუმის საკრებულოში ბიუროს „10-წამიანი სხდომა“ გაიმართა. სხდომაზე, სადაც ბათუმის ბულვარში „ამბასადორ ბათუმისთვის“ მიწის გადაცემის საკითხი უნდა განხილულიყო, ბიუროზე არც საკრებულოს წევრებმა იმსჯელეს და არც მოქალაქეებს მისცეს კითხვების დასმის უფლება. „საკრებულოს თავმჯდომარე შემოვიდა, იკითხა, – შეკითხვა ხომ არ გაქვთო. მაშინვე ადგა, ჩაიდო ჯიბეში გასაღები თუ ტელეფონი და დარბაზიც დაიშალა. აშკარაა, რომ წინასწარ იყვნენ შეთანხმებული და უბრალოდ, გაგვექცნენ“, – ამბობს შოთა გუჯაბიძე, საზოგადოება „ბათომის“ დამფუძნებელი.

შოთა გუჯაბიძე „ბათუმელებთან“ ამბობს, რომ საკრებულოს თავმჯდომარის მიერ 10-წამიანი ბიუროს სხდომის გამართვის და დარბაზიდან გაქცევის პროცესი ვიდეოზეც აქვს გადაღებული. „როცა კითხვა დასვა, „შეკითხვა ხომ არ  გაქვთო“, ბუნებრივია, ვიფიქრეთ, რომ საკრებულოს წევრებს მიმართავდა.

ჯერ მინდოდა მომესმინა, რა ხდებოდა ბიუროზე, იმსჯელებდნენ თუ არა მიწის გადაცემის საკითხზე და შემდეგ მეთქვა საკრებულოს წევრებისა და თავმჯდომარისთვის, რომ არ შეიძლება ამ საკითხის განხილვა, რადგან მზადდება ბულვარის კონსერვაციის პროექტი, რომელშიც საკმაოდ დიდი ფული იხარჯება ბიუჯეტიდან და, შესაბამისად, „ამბასადორ ბათუმისთვის“ ბულვარში მიწის გადაცემა იმ გეგმაში ვერანაირად ვერ მოთავსდება, რადგან ერთმანეთთან წინააღმდეგობაში მოდის. თუმცა, ამის თქმის საშუალება ბიუროზე არ მომეცა“, – ამბობს შოთა გუჯაბიძე.

მისი თქმით, „ამბასადორ ბათუმისთვის“ ბულვარში მიწის გადაცემა დანაშაულის ნიშნებს შეიცავს. „თან იმ გარემოში და ინსტიტუციაში, რომელიც ბევრჯერ გვყავს შემჩნეული, თუ რა მავნებლურ პოლიტიკას ატარებს ჩვენი ქალაქის წინააღმდეგ“, – ამბობს გუჯაბიძე.

საკრებულოში ბიუროს სხდომას საზოგადოება „ბათომიდან“ ირმა ზოიძეც ესწრებოდა, რომელიც ბათუმის საკრებულოს მრჩეველთა საბჭოს წევრცაა. თუმცა ბიუროზე კითხვის დასმის უფლება, თავმჯდომარემ არც მას მისცა. „დასწრება იმიტომ გადავწყვიტეთ, რომ ვიფიქრეთ, უფრო გაფართოებულად იმსჯელებდა საკრებულო ბიუროზე. ჩვენი მიზანი იყო, დღის წესრიგში არ შეეტანათ მიწის გადაცემის საკითხი, თუმცა დემონსტრაციულად არ მოგვცეს ბიუროზე კითხვის დასმის უფლება. მიუხედავად იმისა, რომ ჩვენ წინასწარ განცხადებაც გვქონდა შეტანილი და იცოდნენ, რომ კითხვების დასმას ვაპირებდით“, – ამბობს ირმა ზოიძე.

„შვიდი ადამიანი რომ ზის ბიუროზე, კითხვა ხომ უნდა გაგიჩნდეს, რატომ ზის. ხომ შეიძლება ეკითხათ, რატომ ვიყავით. ეს არის დემონსტრაციული იგნორირება იმ ადამიანების მხრიდან, რომლებსაც ჩვენ ვარჩენთ, ჩვენი, საზოგადოების დაქირავებულები არიან და ჩვენი ინტერესების გათვალისწინებით უნდა მოქმედებდნენ“, – გვითხრა შოთა გუჯაბიძემ.

მის პოზიციას ირმა ზოიძეც იზიარებს: „დღეს მოხდა იმის დეკლარირება, რომ  საკრებულოს საზოგადოებრივი აზრი არ აინტერესებს. ამიტომ საკრებულოს სხდომაზე მისვლას აზრი აღარ აქვს. ჩვენ გავაკეთებთ განცხადებას – საზოგადოებამ უნდა იცოდეს, რომ თვითმმართველობის ინსტიტუტი მოშლილია.

თვითმმარველობის არსი არის საზოგადოების ჩართულობა მისთვის აქტუალურ საკითხებში, დღეს კი თვითმმართველობამ უარი თქვა არათუ შინაარსის განხილვაზე, საერთოდ, საზოგადოებასთან დიალოგზე“, – ამბობს ირმა ზოიძე.

საზოგადოება „ბათომი“ ხვალ საკრებულოს სხდომამდე ან მის პარალელურად აპირებს სწორედ ამ განცხადების გაკეთებას. ხვალ ბათუმის საკრებულო კენჭს უყრის ბულვარში მიწის ნაკვეთის გადაცემას „ამბასადორისთვის“. დღეს საკრებულოს თავმჯდომარემ, სულიკო თებიძემ თქვა, რომ ის ამ გადაწყვეტილებას მხარს დაუჭერს.

შოთა გუჯაბიძის თქმით, დიდია იმის ალბათობა, რომ ხელისუფლება გარიგებულია „ამბასადორ ბათუმთან“.

„ხელისუფლებას არ აინტერსებს იმ ხალხის აზრი, ვისაც უნდა ემსახუროს. ეჭვი გვაქვს, რომ არცთუ ისე კარგი მიზნით აპირებს მიწის გადაცემას, რადგან თუ იმ მიწაზე რაიმე აშენდება, ეს ყველა ვარიანტში წინააღმდეგობაში მოვა ბათუმის ბულვარის განაშენიანების გეგმასთან, რომელიც ოქტომბერში უნდა დაიდოს. ბულვარის კონსერვაციის გეგმა აუცილებლად იტყვის, რომ არ შეიძლებოდა იქ მშენებლობა, შემდეგ კი უნდა დადგეს აღსრულების საკითხი ხომ? გამოდის, ხელისუფლება პირდაპირ მიდის დანაშაულზე“, – ამბობს შოთა გუჯაბიძე.

შპს „ამბასადორ ბათუმი“, რომელიც ბათუმის ბულვარში ოთხსართულიან გამაჯანსაღებელ ცენტრს აშენებს და ამავე სამშენებლო პროექტის 15 სართულამდე გაზრდაც სურს, მერიისგან დამატებით ითხოვს 341 კვადრატულ მეტრ მიწის ფართობსაც, თუმცა უცნობია, რის მოწყობას აპირებს ამ მიწაზე.

თანხმობის შემთხვევაში კი, კომპანია ამ ტერიტორიას 15 წლის ვადით, უზურფრუქტის წესით ითხოვს. ის მერიას ჰპირდება, რომ 700 000 აშშ დოლარის ინვესტიციას განახორციელებს.

ბათუმის ბულვარი კულტურული მემკვიდრეობის ძეგლია.

ამავე თემაზე:

მთავარი ფოტო: აჭარის ტელევიზიის კადრი

საგანგებო მდგომარეობის დროს გამოწერილი ჯარიმების გასაჩივრება ჯერ კიდევ შესაძლებელია. ჯარიმების გასაჩივრების ვადის ათვლა 23 მაისს დაიწყო, როცა საგანგებო მდგომარეობა გაუქმდა და 10 დღეს გრძელდება უქმე და დასვენების დღეების ჩათვლით. შესაბამისად, ამ ჯარიმების გასაჩივრება შეიძლება 2 ივნისამდე.

საგანგებო მდგომარეობის პერიოდში ანუ 21 მარტიდან 22 მაისის პერიოდში ფიზიკური და იურიდიული პირები არ იყვნენ ვალდებული ჯარიმა გადაეხადათ. დაჯარიმებულებს, საგანგებო მდგომარეობის გაუქმებიდან ერთი თვე აქვთ იმისთვის, რომ ჯარიმა გადაიხადონ. გასაჩივრება შეუძლიათ იმ ადამიანებსაც, რომლებსაც ჯარიმა უკვე გადახდილი აქვთ.

დაჯარიმებულების ნაწილი საგანგებო მდგომარეობის დროს გამოწერილ ჯარიმებს ასაჩივრებს, თუმცა ჯერ უცნობია, რამდენი ასაჩივრებს საგანგებოს დროს გამოწერილ ჯარიმებს. 22 მაისის მონაცემებით, 23,9 მილიონ ლარს გადააჭარბა საგანგებო რეჟიმის დროს გამოწერილი ჯარიმების რაოდენობამ.

„რამდენიმე აბსურდული შემთხვევა იყო, რაზეც ჩვენ მოქალაქეებს სარჩელი შევუდგინეთ,“ – გვიყვება ახალგაზრდა იურისტთა ასოციაციის იურისტი, შორენა ლოლაძე. – „მაგალითად, ძმების დაჯარიმება საკარანტინო სივრცეში იმის გამო, რომ პოლიციელებს თანხმობის წერილზე არ მოუწერეს ხელი. მათ სურვილი ჰქონდათ და საშუალებაც, რომ ყოფილიყვნენ იზოლაციაში. მოითხოვეს იზოლაციაში გადაყვანა, მაგრამ მაინც დატოვეს საკარანტინო სივრცეში, სადაც სპეციალურ ფორმას ავსებენ ადამიანები, რომ თანახმა არიან დაიცვან კარანტინის პირობები. ძმებმა ამ ფორმას არ მოაწერეს ხელი და პოლიციამ ისნი 3 – 3 ათასი ლარით დააჯარიმა,“ – იხსენებს იურისტი.

საია-ს იურისტის, შორენა ლოლაძის თქმით, ამ დროისთვის დაახლოებით 10-მდე სარჩელია მომზადებული თბილისში, მათ შორის, იმ შემთხვევაზე, როცა მეზობლის ყვირილზე მეზობელმა სასწრაფო სამედიცინო სამსახური გამოიძახა.

„სასწრაფოს პოლიციაც მოჰყვა, რომელმაც ქუჩაში სასწრაფოს დასახვედრად გამოსული მეზობელი დააჯარიმა… ასევე დააჯარიმეს 3 ათასი ლარით კაცი, რომელსაც კომენდანტის საათის დროს დედასთან მიჰქონდა მედიკამენტები. მას აქვს მტკიცებულება, რომ რეკავდა 144-ზე, ასევე 112-ზე, მაგრამ დაკავშირება ვერ შეძლო. დააჯარიმეს მეუღლეებიც, რომლებიც ავტომანქანაში გვერდიგვერდ ისხდნენ,“ – უთხრა „ბათუმელებს“ საია-ს იურისტმა, შორენა ლოლაძემ.

ოცამდე სარჩელი მოუმზადეს მოქალაქეებს საია-ს აჭარის ფილიალშიც. ფილიალის ხელმძღვანელი, პაატა დიასამიძე ამბობს, რომ ჯარიმები ძირითადად ეხებოდა კომენდანტის საათის დარღვევას, ასევე, ავტომანქანით გადაადგილების წესებს საგანგებო მდგომარეობის დროს, 3-ზე მეტი პირის შეკრებას.

_____

ქვეყნის პრემიერ-მინისტრმა გიორგი გახარიამ განაცხადა, რომ მთავრობა საგანგებო მდგომარეობის დარღვევისთვის მოქალაქეებისთვის დაკისრებული ჯარიმების გაუქმებისაკენ ვერავის მოუწოდებს.

“ქართული ოცნების” ერთ-ერთი ლიდერი მამუკა მდინარაძე აცხადებს, რომ ამ ჯარიმების ჩამოწერა შეიძლება დამღუპველი იყოს.

თეთრი სახლის განცხადებით, დონალდ ტრამპი სოციალური ქსელებისთვის სპეციალურ განკარგულებას მოაწერს ხელს. გადაწყვეტილება ტრამპმა მას შემდეგ მიიღო, რაც მან სოციალური ქსელები კონსერვატორთა ხმების ჩახშობაში დაადანაშაულა.

სოციალურ ქსელებსა და ტრამპს შორის გაუგებრობამ თავი მას შემდეგ იჩინა, რაც ტვიტერმა საკუთარ გვერდს ფაქტების გადამოწმების ფუნქცია – fact-check-ი დაამატა.

განკარგულების დეტალები უცნობია და ჯერ არ დაკონკრეტებულა, რეგულირების რა წესებს შეიმუშავებს აშშ-ის პრეზიდენტი სოციალური ქსელებისთვის. თეთრ სახლს მედიისთვის ჯერ არ მიუწოდებია ინფორმაცია, თუ რა დარეგულირდება პრეზიდენტის ახალი განკარგულებით, რომელიც მომდევნო კვირის ხუთშაბათს უნდა გაფორმდეს.

ტრამპმა ტვიტერზე დაწერა, რომ ელექტრონული ფოსტით საარჩევნო ბიულეტენების დაგზავნა იქნება მხოლოდ თაღლითობა და მეტი არაფერი, რის შემდეგაც პრეზიდენტის პოსტს ტვიტერმა ახალი ფუნქციის, ფაქტ-ჩექის საშუალებით ავტომატურად მიანიჭა დაუსაბუთებელი ინფორმაციის სტატუსი.

ამის შემდეგ, ოთხშაბათს, 27 მაისს ამერიკის პრეზიდენტი სოციალურ ქსელებს „მკაცრი რეგულაციებით“ ან „დახურვით“ დაემუქრა.

ტრამპმა ტვიტერის საშუალებით სოცქსელში საკუთარ 80 მილიონ გამომწერს აცნობა, რომ სოცქსელების პლატფორმზე მიჩქმალულია „კონსერვატორების“ ხმა, რასაც ის არ დაუშვებს, მომდევნო ტვიტში კი აღნიშნა, რომ ტვიტერი სრულად ახშობს სიტყვის თავისუფლებას.

ტვიტერის დირექტორი, ჯეკ დორსი პრეზიდენტის კრიტიკას პასუხობს და ამბობს, რომ მისი პლატფორმა მთელ მსოფლიოში მიანიჭებს არჩევნების შესახებ პოსტებს არასწორი ან სადაო შინაარსის მქონე ინფორმაციის სტატუსს.

გუშინ, 27 მაისს Fox News-ისთვის მიცემულ ინტერვიუში ფეისბუქის აღმასრულებელმა დირექტორმა, მარკ ცუკერბერგმა განაცხადა, რომ ხელისუფლების მხრიდან სოციალური ქსელების ცენზურა არასწორი იქნება.

ფონდის „გლობალური ინიციატივა ფსიქიატრიაში – თბილისი“, ილიას სახელმწიფო უნივერსიტეტის, ლონდონის ტროპიკული მედიცინის სკოლის და დაავადებათა კონტროლისა და საზოგადოებრივი ჯანმრთელობის ეროვნული ცენტრის წარმომადგენლები იწყებენ კვლევას COVID19-ის პანდემიის სტრესის ზეგავლენის შესახებ მოსახლეობის ფსიქიკურ ჯანმრთელობაზე.

კვლევაში მონაწილეობა შეუძლიათ 18 წლის და უფროსი ასაკის ადამიანებს. კვლევა ტარდება ონლაინ და გამოკითხვის ხანგრძლივობა 15 წუთია.

ფონდის დირექტორი, ნინო მახაშვილი „ბათუმელებთან“ ამბობს, რომ მსგავს ფორმატში კვლევა პირველად ტარდება საქართველოში, ამიტომ  მასში მონაწილეობა ძალიან მნიშვნელოვანია იმ თვალსაზრისით, რომ მიღებული მონაცემების მიხედვით დაიგეგმება შესაბამისი ღონისძიებები მოსახლეობის ფსიქიკური კეთილდღეობის გასაუმჯობესებლად.

„ვიცით, რომ COVID19-თან დაკავშირებული კრიზისი მაღალი რისკია ფსიქიკური ჯანმრთელობის თვალსაზრისით. ამ მიმართულებით უკვე არსებობს ჩინური კვლევები, სინგაპურსა და იტალიაში დაიდო უკვე და სხვა ქვეყნებშიც მიმდინარეობს კვლევა საზოგადოების სხვადასხვა ჯგუფში.

მაგალითად, იკვლევენ სამედიცინო პერსონალს, კარანტინში მყოფი ადამიანების ფსიქიკურ ჯანმრთელობას და ა.შ. ვიცით, რომ საკმაოდ დიდია პანდემიის ტვირთი, რის გამოც გაზრდილია დეპრესია, შფოთვა, პოსტრავმატული სტრესული აშლილობა და ა.შ. ეს იქნება ზოგადი პოპულაციის კვლევა ონლაინფორმატში, ფაქტობრივად უნიკალური კვლევაა, პირველია და ვნახოთ როგორ წარიმართება,“ – ამბობს ნინო მახაშვილი.

მისი თქმით, კვლევის ფოკუსი მთელი მოსახლეობაა, თუმცა აქცენტი კეთდება მოწყვლად ჯგუფებზე. მაგალითად, მოხუცები, ფსიქიკური აშლილობის მქონე ადამიანები, ასევე ის პირები, ვინც პანდემიის დროს წინა ხაზზე მუშაობდნენ.

ნინო მახაშვილის თქმით, ამ ადამიანებთან წვდომის სტრატეგია არის სხვადასხვა.

„რეალურად, ეს იქნება ორრაუნდიანი კვლევა, პირველი რაუნდი დაიწყება მაისის ბოლოს და ივნისის ბოლომდე გაგრძელდება, მეორე კი, სექტემბრის ბოლოს და ოქტომბერში დამთავრდება. პირველი რაუნდია საჭიროა იმისთვის, რომ გავიგოთ, როგორი სიტუაცია ქვეყანაში ფსიქიკური ჯანმრთელობის მხრივ და როგორი ვითარდება დინამიკაში“ – ამბობს ნინო მახაშვილი.

კითხვაზე, როგორ აპირებენ, ვთქვათ, მოხუცების ან იმ მოწყვლადი ჯგუფების გამოკითხვას, რომლებსაც არ აქვთ წვდომა ინტერნეტზე, ნინო მახაშვილი ამბობს, რომ ამ შემთხვევაში ისინი გამოიყენებენ იმ აქტივისტების რესურსს,  რომლებიც ფსიქიკური ჯანმრთელობის სფეროში მუშაობენ და ამავე სფეროში მომუშავე ადამიანის უფლებათა დამცველ ორგანიზაციებს, რომლებსაც წვდომა აქვთ მოწყვლად ჯგუფებთან.

ნინო მახაშვილის თქმით, საქართველო ამ კვლევით ერთვება პანევროპულ კვლევაში, რომელიც ახლა მიმდინარეობს ევროპის რამდენიმე ქვეყანაში (გერმანია, ხორვატია, ნიდერლანდები, დიდი ბრიტანეთი). „კვლევის გარკვეული ნაწილები ემთხვევა ერთმანეთს, რომ შემდეგ, სხვა ქვეყნების მონაცემებთან შედარების საშუალება გვქონდეს,“- ამბობს ნინო  მახაშვილი.

კვლევაში მონაწილეობისთვის გადადით ბმულზე.

ახალგაზრდა იურისტთა ასოციაციის თავმჯდომარემ, სულხან სალაძემ საკონსტიტუციო სასამართლოს შესახებ ორგანულ კანონში ცვლილებების შესახებ პარლამენტში საკანონმდებლო წინადადება შეიტანა.

წინადადების მიხედვით: საკონსტიუციო სასამართლოს მოსამართლის კანდიდატურა უზენაესი სასამართლოს პლენუმს უნდა წარედგინოს კენჭსყრამდე 10 დღით ადრე. კანდიდატის დასახელების უფლება უნდა მიენიჭოს უზენაესი სასამართლოს პლენუმის ყველა წევრს (ეს უფლება ახლა მხოლოდ უზენაესი სასამართლოს თავმჯდომარეს აქვს). საკონსტიტუციო სასამართლოს მოსამართლის არჩევისთვის საჭირო ხმების რაოდენობა დამსწრეთა 2/3-იდან სიით შემადგენლობის 2/3-მდე უნდა გაიზარდოს. 

___________

ფოტო: ახალგაზრდა იურისტთა ასოციაცია

რამდენიმე არასამთავრობო ორგანიზაციამ ბათუმის საკრებულოს თავმჯდომარეს, სულიკო თებიძეს მიმართა მოთხოვნით, სხდომაზე განსახილველი საკითხების დღის წესრიგიდან ამოიღოს  შპს „ამბასადორისთვის“ ბულვარის გარკვეული ტერიტორიის მართვაში გადაცემის საკითხი.

შპს „ამბასადორ ბათუმი“, რომელიც ბათუმის ბულვარში ოთხსართულიან გამაჯანსაღებელ ცენტრს აშენებს და ამავე სამშენებლო პროექტის 15 სართულამდე გაზრდას ითხოვს, ბულვარში კიდევ გაფართოებას აპირებს, კომპანია მერიისგან კიდევ 341 კვადრატულ მეტრზე მეტ ფართობს და მასზე დამაგრებულ შენობას ითხოვს.

„მოგეხსენებათ, აღნიშნული უძრავი ქონება მდებარეობს ბათუმის ბულვარის ტერიტორიაზე, სსიპ „ბათუმის ბულვარი“ კი მუშაობს ბათუმის ბულვარის განაშენიანების გეგმაზე, რომელიც უნდა დასრულდეს ამა წლის ოქტომბერში. აღნიშნული გეგმით განისაზღვრება ბათუმის ბულვარის მომავალი განვითარება, მისი ტერიტორიის გამოყენება და დაშვებული სახეობები. არამიზნობრივად და საფრთხის შემცვლელად მიგვაჩნია ბათუმის ბულვარის ტერიტორიაზე არსებული მიწის ნაკვეთის და მასზე მიმაგრებული ქონების მრავალწლიან სარგებლობაში გადაცემა ინვესტიციის განხორციელების პირობით, რადგან ნაკვეთის განვითარების საინვესტიციო ინტერესი შესაძლოა წინააღმდეგობაში მოვიდეს გენგეგმასთან

ბათუმის ბულვარში წლების განმავლობაში ხდებოდა ღია და საზოგადოებრივი სივრცეების შეზღუდვა და მიტაცება. ბოლო წლებში განვითარებულმა პროცესმა აჩვენა, რომ საზოგადოებისთვის ბულვარი წარმოადგენს მნიშვნელოვან და ღირებულს ზღვისპირა პარკს, რომლის დასაცავად არაერთი მოქალაქე გამოვიდა. სწორედ აღნიშნულ პროცესს მოყვა ბათუმის ბულვარის განაშენიანების გეგმაზე მუშაობის დაწყება, რომლისთვისაც ნახევარ მილიონამდე ლარი არის გამოყოფილი აჭარის არ ბიუჯეტიდან. მოგიწოდებთ,  აღნიშნული საკითხი ამოიღოთ დღის წესრიგიდან“ – ნათქვამია განცხადებაში.

მიმართვაში საუბარია, ასევე, შპს „რივიერას“ მიერ წარდგენილ მოთხოვნაზე, რაც გენგეგმაში ცვლილებას ითვალისწინებს. მოთხოვნა დაგეგმილი ხუთი თაუერის ფუნქციის ცვლილებას ითვალისწინებს. კომპანია საცხოვრებელი სახლების ნაცვლად სასტუმროებს ააშენებს.

არსებული შეთანხმების თანახმად კომპანიას ხუთი თაუერი უნდა აეშენებინა. ორ თაუერში სასტუმრო უნდა განთავსებულიყო, ხოლო სამი თაუერის ფუნქცია საცხოვრებელი იქნებოდა. ცვლილების დამტკიცების შემთხვევაში ხუთივე თაუერს სასტუმროს ფუნქცია ექნება.

„აქვე გვსურს დავაფიქსიროთ საზოგადოების მაღალი ინტერესი დღის წესრიგით გათვალისწინებული მე-4 საკითხისადმი – ,,ქალაქ ბათუმის გარკვეული ტერიტორიისათვის განაშენიანების რეგულირების  გეგმის დამტკიცების თაობაზე’’ ქალაქ ბათუმის მუნიციპალიტეტის საკრებულოს  2019 წლის 22 აგვისტოს №20 დადგენილებაში ცვლილების შეტანის შესახებ. „ბათუმის რივიერას“ განაშენიანების რეგულირების გეგმის დამტკიცება გასაჩივრებულია სასამართლოში და დღემდე გრძელდება საზოგადოების პროტესტი აღნიშნული პროექტის განხორციელების წინააღმდეგ. ყოველივე ზემოთ აღნიშნულიდან გამომდინარე, გთხოვთ უზრუნველყოთ საკრებულოს კომისიების, ბიუროს და სხდომის ღიაობა და ხელმისაწვდომობა, დაინტერესებული პირების ჩართულობა და გადაწყვეტილების მიღებაში მონაწილეობა“ – ვკითხულობთ მიმართვაში.

მიმართვას ხელს აწერენ ნათია აფხაზავა – სამოქალაქო საზოგადოების ინსტიტუტის ბათუმის ორგანიზაციის ხელმძღვანელი, აზზა გაბუნია, გიორგი ბოლქვაძე  და დავით ხილაძე – ორგანიზაცია „მწვანე მომავლის“ წარმომადგენლები, შოთა გუჯაბიძე – „ბათომის“ წარმომადგენელი, თეონა დიასამიძე – ბათუმის საკრებულოს მრჩეველთა საბჭოს თავმჯდომარე, ნინო ინაიშვილი – „ბათომის“ თავმჯდომარე,  ნინო ჩხაიძე – „ცვლილებები თანაბარი უფლებებისთვის“ და სალომე ცეცხლაძე – საინიციატივო ჯგუფი „დაიცავი ბათუმი“.

საკრებულოს სხდომა ხვალ, 29 მაისს უნდა გაიმართოს.