Batumelebi | ჩემზე მარტო მამაჩემი ახდენდა გავლენას – სულიკო თებიძე ბათუმის მერისგან მიღებულ SMS-ზე ჩემზე მარტო მამაჩემი ახდენდა გავლენას – სულიკო თებიძე ბათუმის მერისგან მიღებულ SMS-ზე – Batumelebi

ჩემზე მარტო მამაჩემი ახდენდა გავლენას – სულიკო თებიძე ბათუმის მერისგან მიღებულ SMS-ზე

„ბათუმის მერის SMS, მისი აქტიურობა – „არ მოიღო ამბასადორი“, თქვენ, როგორც მაკონტროლებელი ორგანოს ხელმძღვანელს, არ გიჩენთ კითხვებს, რომ  შესაძლოა მერი გარიგებული იყოს კომპანიასთან, ლობირებდეს მის ინტერესებს რაღაცის სანაცვლოდ?“ – ეს კითხვა ბათუმის საკრებულოს თავმჯდომარეს, სულიკო თებიძეს მას შემდეგ დავუსვით, როცა გავრცელდა კადრი, სადაც ბათუმის მერი, ლაშა კომახიძე  საკრებულოს თავმჯდომარეს სხდომაზე წერს, არ ამოიღოს „ამბასადორი ბათუმისთვის“ ნაკვეთის გადაცემის საკითხი დღის წესრიგიდან.

საკრებულოს თავმჯდომარე ამბობს, რომ ეს ჭორებია და ჭორებზე ვერ ილაპარაკებს. შესაძლო გარიგებასა და კორუფციაზე მერისთვისაც გვინდოდა გვეკითხა, თუმცა მან გვითხრა, რომ „ამ საკითხზე მეტ სიღრმეებში არ შევა“.

  • ბატონო სულიკო, „ამბასადორი ბათუმი“ ფინანსურად ძლიერი, გავლენიანი კომპანიაა. ამ კომპანიამ მიიღო ოთხი სართულის მშენებლობის ნებართვა ბულვარში, მაგრამ საძირკველი 15 სართულისთვის მოამზადა. ამჯერად მერმა მოითხოვა, მისთვის ბულვარში მიწის ნაკვეთის გადაცემის საკითხი არ ამოგეღოთ დღის წესრიგიდან. ხომ არ აჩენს ეს კითხვებს კომპანიასთან შესაძლო გარიგებაზე?

ეჭვების ნიადაგზე კომენტარს ვერ გავაკეთებ, ეს ეჭვებია უკვე და რა დასკვნები უნდა დავაფიქსირო, რა ვიცი, ვის რა ეჭვები აქვს. მე რამდენადაც ვიცი, მაქვს გადაწყვეტილება მიღებულია და ობიექტზე არაა ლაპარაკი, საუბარია მის გვერდით მდებარე ნაკვეთზე. მეტს ვერ გეტყვით ვერაფერს, გადაწყვეტილება მიღებულია უკვე.

  • ბატონო სულიკო, მერი ხშირად ცდილობს გავლენა მოახდინოს საკრებულოს გადაწყვეტილებებზე?

თქვენ იცით, როგორ მიცხოვრია მთელი ცხოვრება, მიცნობთ? – ჩემზე მარტო ცხონებული მამაჩემი ახდენდა ზეგავლენას, სხვა არავინ. მერე რაა რომ მომწერა, მერი და საკრებულოს თავმჯდომარე კონსულტაციას მუდმივად გავდივართ.

  • თქვენ ხომ საკითხი უკვე განხილული, პოზიცია ჩამოყალიბებული გქონდათ, დაამტკიცებდით ამ საკითხს თუ არა. რატომ მოგწერათ მერმა არ ამოგეღოთ საკითხი?

მერი როცა სხდომაზეა და საკითხი ისმება კონკრეტული საკითხის დღის წესრიგიდან ამოღებაზე, მერი მის პოზიციას ასაბუთებს, ამიტომ და ამიტომ არ ამოიღოთო. ეს პოზიცია თუ დააფიქსირა კიდევ ერთხელ, მაგაში რას ხედავთ ცუდს. ეს ერთი გუნდია. თქვენ შეგეშალათ, ჩემზე ზეგავლენას ვერავინ მოახდენს. ყოფილა შემთხვევა, რომ საკითხი ამოგვიღია და მერიის პოზიციას არ დავთანხმებულვართ. ჯერ ერთი, ეს პირადი ინფორმაციის გამჟღავნებაა, სასამართლოში რომ წავიდე რა უნდა ქნათ. მერე რაა რომ სხდომაა, შეიძლება მეუღლემ უნდა მომწეროს რამე, ამიტომ უნდა გამისაჯაროვოთ?

  • მაგრამ ეს არ იყო მეუღლის, ეს იყო საჯარო პირის, ბათუმის მერის შეტყობინება.

გაიარეთ აბა კონსულტაცია იურისტებთან, არაა სწორი. მე აქ მაქვს ჩემი პირადი ბლოკნოტი, მოდით მაშინ ხვალ და წაგაკითხებთ. ეს იგივეა.

  • ბატონო სულიკო, საკრებულო მაკონტროლებელი ორგანოა და დიდი ხანია არის პრეტენზია მის მიმართ, რომ მხოლოდ ეთანხმება მერიის გადაწყვეტილებებს და ნოტარიუსის ფუნქციას ასრულებს.

არ ვარ ნოტარიუსი.

_____

„არ ამოიღო ბატონო სულიკო ამბასადორი“, – წერია SMS-ში, რომელიც საკრებულოს თავმჯდომარემ დღეს, 29 მაისს, სხდომის მიმდინარეობის დროს მიიღო. კადრებში ნათლად ჩანს, რომ SMS ბათუმის მერს, ლაშა კომახიძეს ეკუთვნის. საქმე იმაშია, რომ კომპანია „ამბასადორი ბათუმს“ ბათუმის ბულვარში 4-სართულიან მშენებლობის უფლება უკვე აქვს, თუმცა ამ შენობის საძირკველი მოაწყო უფრო მასშტაბური შენობის ასაშენებლად და გასული წლის ბოლოს ბულვარში 15 სართულის აშენების უფლება მოითხოვა. მას ამ სიმაღლის შენობის აშენებაზე, ჯერჯერობით, აჭარაში სააგენტოს ძეგლების საბჭომ უარი უთხრა, თუმცა კომპანიამ კულტურული მემკვიდრეობის დაცვის ეროვნულ სააგენტოს უკვე მიმართა და ითხოვს, რომ ბათუმის ბულვარის ცენტრი [ტერიტორია, სადაც ის აშენებს], ბათუმის ბულვარის საზღვრებიდან ამოიღონ.

 

„ბათუმის მერს შესაძლოა აქვს კორუფციული ინტერესი“ – საია ლაშა კომახიძის SMS-ზე

 

ნეტგაზეთის მასალების სხვა გამოცემებში გადაბეჭდვის წესი
ავტორი