Batumelebi | ბათუმის მერის SMS-ი საკრებულოს თავმჯდომარეს – „არ ამოიღო ამბასადორი“ ბათუმის მერის SMS-ი საკრებულოს თავმჯდომარეს – „არ ამოიღო ამბასადორი“ – Batumelebi
RU | GE  

ბათუმის მერის SMS-ი საკრებულოს თავმჯდომარეს – „არ ამოიღო ამბასადორი“

დღეს, 29 მაისს, ბათუმის საკრებულომ შპს „ამბასადორი ბათუმს“ ბულვარის ცენტრში მიწა გადასცა, არასამთავრობო ორგანიზაციების წარმომადგენლების პროტესტის მიუხედავად. დღევანდელ სხდომაზე ტელეკომპანია TV 25-მა გადაიღო კადრი, როგორ მიიღო ბათუმის საკრებულოს თავმჯდომარემ, სულიკო თებიძემ SMS შეტყობინებით მითითება ბათუმის მერისგან, ლაშა კომახიძისგან „ამბასადორი ბათუმის“ შესახებ.

„არ ამოიღო ბატონო სულიკო ამბასადორი“ – წერია SMS-ში, რომელიც საკრებულოს თავმჯდომარემ მიიღო. კადრებში ნათლად ჩანს, რომ SMS ბათუმის მერის, ლაშა კომახიძისგანაა შემოსული.

სულიკო თებიძემ მერს იქვე მისწერა – „ოკ“.

შპს „ამბასადორი ბათუმი“, რომელიც ბათუმის ბულვარში ოთხსართულიან გამაჯანსაღებელ ცენტრს აშენებს და ამავე სამშენებლო პროექტის 15 სართულამდე გაზრდას ითხოვს, ბულვარში ბათუმის მერიისგან კიდევ 341 კვადრატულ მეტრზე მეტ ფართობს და მასზე დამაგრებულ შენობას ითხოვდა. კომპანიის მოთხოვნას არასამთავრობო ორგანიზაციების პროტესტი და მიმართვა მოჰყვა. ორგანიზაციებმა მიმართეს საკრებულოს თავმჯდომარეს, ამოეღო აღნიშნული საკითხი დღის წესრიგიდან, სანამ მიმდინარეობს მუშაობა ბულვარის განაშენიანების გეგმაზე, რადგან ბათუმის ბულვარში მიწის ნაკვეთის და მასზე მიმაგრებული ქონების მრავალწლიან სარგებლობაში გადაცემა ინვესტიციის განხორციელების პირობით შესაძლოა წინააღმდეგობაში მოვიდეს გენგეგმასთან.

მიუხედავად მიმართვისა, საკრებულოს უმრავლესობამ „ამბასადორი ბათუმისთვის“ ბულვარის ცენტრში მიწის ნაკვეთის გადაცემაზე მერს თანხმობა მისცა – 11 ხმით 5-ის წინააღმდეგ. ნაკვეთის გადაცემის შემდეგ შპს „ამბასადორი ბათუმი“ ბულვარში კიდევ უფრო გაფართოვდება.

ნეტგაზეთის მასალების სხვა გამოცემებში გადაბეჭდვის წესი
ავტორი
ნანა კვაჭაძე, ჟურნალისტი ელფოსტა: kvachadze.n@gmail.com