Batumelebi | თერმომეტრიანი გიდები და მძღოლები – ჯანდაცვის სამინისტროს რეკომენდაციები ტუროპერატორებს თერმომეტრიანი გიდები და მძღოლები – ჯანდაცვის სამინისტროს რეკომენდაციები ტუროპერატორებს – Batumelebi

თერმომეტრიანი გიდები და მძღოლები – ჯანდაცვის სამინისტროს რეკომენდაციები ტუროპერატორებს

ჯანდაცვის სამინისტრომ ტურისტული ოპერატორებისა და გიდებისთვის კორონავირუსის პირობებში მოქმედების რამდენიმე პუნქტიანი რეკომენდაციები  გამოსცა.

რეკომენდაციები ეხებათ: ტურისტულ კომპანიებს, ყველა ტიპის ტურის ორგანიზატორებს, გიდებსა და მძღოლებს.

რეკომენდაციების მიხედვით:

  • ტურში წასვლამდე გიდს, მძღოლსა და ტურისტებს უნდა ჩაუტარდეთ თერმოსქრინინგი, ანუ გაიზომონ სიცხე, რისი მონაცემებიც უნდა ჩაიწეროს შემდგომი მონიტორინგისთვის. თერმოსკრინინგი უნდა განხორციელდეს ყოველდღიურად;
  • ტურისტული ჯგუფი (მათ შორის გიდი და მძღოლი) უზრუნველყოფილი უნდა იყოს ინდივიდუალური დაცვის საშუალებებით. დახურულ სივრცეში ნიღაბი წარმოადგენს აუცილებლობას, ხოლო ხელთათმანი, პირბადე და დამცავი ფარი/სათვალე, გამოიყენოს საჭიროების შესაბამისად;
  • სატრანსპორტო საშუალება უზრუნველყოფილი უნდა იყოს სულ მცირე 70% ალკოჰოლის შემცველი ხელის გამწმენდი სითხით;
  • ოფისებსა და ავტოსატრანსპორტო საშუალებებში განხორციელდეს ხშირად შეხებადი ზედაპირებისა (მათ შორის კლავიატურის, ღილაკების, კარების სახელურების, ჩამრთველ/გამომრთველი ღილაკების, ტელეფონების და სხვა ხშირად შეხებადი ზედაპირებისა და საგნების) დამუშავება რამდენჯერმე დღეში (2 საათიანი ინტერვალებით) შესაბამისი კონცენტრაციის სადეზინფექციო ხსნარით;
  • გამოყენებული ერთჯერადი ხელსახოცებისა თუ სხვა ჰიგიენური საშუალებების მოსაცილებლად, ავტოსატრანსპორტო საშუალებები უზრუნველყოფილი უნდა იყოს დახურული კონტეინერით;
  • მძღოლის კაბინასთან, მგზავრებისგან დისტანცირების უზრუნველსაყოფად უნდა მოეწყოს დამცავი გამჭვირვალე ბარიერი;
  • ტურისტების ყოველი გადაყვანის შემდგომ უზრუნველყოფილი უნდა იყოს ავტოსატრანსპორტო საშუალებების შიდა და გარე სახელურების დეზინფექცია/სანიტარული დამუშავება; ავტოტრანსპორტის დასუფთავებისას განსაკუთრებული ყურადღებით დამუშავდეს სავარძლების თავის საყრდენი მოწყობილობა და სავარძლების სამკლავური (ხელის დასასვენებელი ადგილი);
  • რეგულარულად უნდა განიავდეს სამგზავრო სალონი ღია ფანჯრებით;
  • ტურის მსვლელობისას მძღოლს თან ჰქონდეს ორგანიზატორის მიერ მიწოდებული ინდივიდუალური ტემპერატურის საზომი, თერმოსკრინინგი უნდა განხორციელდეს ყოველდღიურად და მონაცემები ჩაიწეროს შემდგომი მონიტორინგისთვის;
  • ყველა ტიპის ტურის ორგანიზატორი და თვითდასაქმებული გიდი ვალდებულია დაიცვას წინამდებარე რეკომენდაციებით განსაზღვრული მოთხოვნები.

გიდის ვალდებულებები:

  • გიდს ტურისტებთან უშუალოდ შეხვედრისას უნდა ეკეთოთ ნიღაბი;
  • ტურის მსვლელობისას გიდმა სტუმრებთან უნდა დაიცვას დისტანცია;
  • ტურის მსვლელობისას გიდს თან უნდა ჰქონდეს ინდივიდუალური თერმომეტრი, ტემპერატურის მონიტორინგისთვის.
  • თერმოსკრინინგი უნდა განხორციელდეს ყოველდღიურად, ტურის დაწყების წინ;
  • დახურულ სივრცეებში ნიღბის ტარება სავალდებულოა;
  • თუ ჯგუფის წევრს აღმოაჩნდა ვირუს Covid 19-ისთვის დამახასიათებელი სიმპტომები: ხველა, ყელის სიმშრალე, ტემპერატურა, სახსრების ტკივილი და ა.შ. გიდი ვალდებულია იმოქმედოს შესაბამისი პროტოკოლის დაცვით.

შენიშვნა: თუკი გიდი/ტურის ორგანიზატორი იყენებს აუდიო აპარატურას, გამოყენებული უნდა იქნეს ერთჯერადი ყურსასმენები.
გამონაკლისი: 12 წლამდე ასაკის მოზარდის მოთავსება ავტოსატრანსპორტო საშუალებაში
დასაშვებია დადგენილზე მცირე მანძილზე.

ახალგაცემული რეკომენდციებით განისაზღრა ასევე სხვადასხვა ტიპის ტურისტულ ავტოსატრანსპორტო საშუალებაში ადამიანების სხვადასხვა რაოდენობა და განთავსების თავისებურებები.

ნეტგაზეთის მასალების სხვა გამოცემებში გადაბეჭდვის წესი
ავტორი
თამარ ნერგაძე არის "ბათუმელების" რეპორტიორი 2017 წლის ოქტომბრიდან. ტელ.: 568 81 41 75 / E-mail.: tamarnergadze123@gmail.com