„იაფ სახლთან“ დაკავშირებით განაცხადების მიღება-გადარჩევის პროცესი განახლდება, პროგრამა კოვიდ 19-ის გამო იყო შეჩერებული. შემდეგი კვირის დასაწყისში მერია ამ საკითხთან დაკავშირებით რამდენიმე ახალ ინფორმაციას გააჟღერებს, ამის შესახებ ლაშა კომახიძემ „ბათუმელებთან“ საუბრისას განაცხადა.
ოჯახები, რომლებიც წინასწარ დამტკიცებულ კრიტერიუმებს დააკმაყოფილებენ, პროგრამის ფარგლებში მერიამ ხელმისაწვდომი საცხოვრისით უნდა უზრუნველყოს.
პროგრამა ბინების გადაცემას 15 წლის ვადით, გამოსყიდვის უფლებას ითვალისწინებს. გამოსყიდვის ფასი კი გადაცემული ფართობის თვითღირებულება იქნება.
„იაფი სახლის“ პროექტის ფარგლებში ბათუმის მერიამ ორი ხუთსართულიანი კორპუსი უკვე ააშენა. ორივე სახლში 20-20 ბინაა. კორპუსების აშენებაზე 2,3 მილიონზე მეტი ლარი დაიხარჯა.
„იაფი სახლის“ ფარგლებში კიდევ ორი კორპუსის აშენება იგეგმება.
