Batumelebi | „ბათუმის მერს შესაძლოა აქვს კორუფციული ინტერესი“ – საია ლაშა კომახიძის SMS-ზე „ბათუმის მერს შესაძლოა აქვს კორუფციული ინტერესი“ – საია ლაშა კომახიძის SMS-ზე – Batumelebi

„ბათუმის მერს შესაძლოა აქვს კორუფციული ინტერესი“ – საია ლაშა კომახიძის SMS-ზე

„ეს შემთხვევა გაცილებით უფრო მეტია, ვიდრე უნდობლობის გამოცხადების საფუძველი. ბათუმის მერს შესაძლოა აქვს კორუფციული ინტერესი…“ –  ამბობს სულხან სალაძე, „ახალგაზრდა იურისტთა ასოციაციის“ ხელმძღვანელი. მისი შეფასებით, შესასწავლია, რის გამო მისწერა ბათუმის საკრებულოს დღევანდელ სხდომაზე საკრებულოს თავმჯდომარეს, სულიკო თებიძეს, ბათუმის მერმა: „არ ამოიღო ბატონო სულიკო ამბასადორი“.

დღეს, 29 მაისს, ბათუმის საკრებულოს უმრავლესობა დათანხმდა ბათუმის ბულვარის ცენტრში „ამბასადორი ბათუმისთვის“ მიწის ნაკვეთის გადაცემას, რომლითაც მიმდინარე მშენებლობა კიდევ უფრო გაფართოვდება – კომპანია აქ ოთხსართულიან გამაჯანსაღებელ ცენტრს აშენებს და პროექტის მიხედვით მის 15 სართულამდე გაზრდას ითხოვს. სწორედ ამ კომპანიისთვის ბულვარის ცენტრში მიწის ნაკვეთის გადაცემის საკითხს განიხილავდა დღეს ბათუმის საკრებულო, როდესაც ბათუმის მერმა მისწერა საკრებულოს თავმჯდომარეს, – „არ ამოიღოთ“.

სულხან სალაძე განმარტავს, რომ კანონში უნდობლობის გამოცხადების საფუძველი დაკონკრეტებული არ არის, პროცედურის დაწყება კი იმ შემთხვევაშია შესაძლებელი, თუკი მას საკრებულოს საერთო შემადგენლობის ნახევარზე მეტი მხარს დაუჭერს, ან ბათუმში რეგისტრირებული ამომრჩევლის 20 პროცენტი მოითხოვს ამას. მერისთვის უნდობლობა გამოცხადებულად ჩაითვლება, თუ ინიციატივას მხარს დაუჭერს საკრებულოს სიითი შემადგენლობის არანაკლებ 2/3. მერისთვის უნდობლობის გამოცხადება იწვევს მისი უფლებამოსილების შეწყვეტას.

„ჩემი აზრით, არსებობს უნდობლობის გამოცხადების საფუძველი და ეს პროცედურა უნდა დაიწყოს… შესაძლოა, ეს იყოს მერის პირადი ინტერესი და უკავშირდებოდეს კორუფციას, ან სხვა არაფორმალურ შეთანხმებას, რომ კომპანია აუცილებლად მიიღებს ნებართვას… შესაძლოა, ეს ყოფილიყო, ასე ვთქვათ, „ჯიგრულ პონტში“, როგორც ბოლო დღეებში ამას ეძახიან და გამოდის, რომ საკრებულო აქ არაფერს წარმოადგენდეს და არის ორგანო, რომელსაც ნებისმიერ დროს შესაძლოა მერმა მიწეროს, დაავალოს და უთხრას ის, რის გაკეთებაც მას სურს. აქ რა ტიპის ინტერესია, ეს უნდა გაირკვეს აუცილებლად“, – ამბობს საია-ს ხელმძღვანელი, სულხან სალაძე.

ვინ უნდა შეისწავლოს, რა ინტერესის გამო მისწერა sms ბათუმის მერმა საკრებულოს თავმჯდომარეს და რატომ არ გააპროტესტა საკრებულოს საქმიანობაში ჩარევა სულიკო თებიძემ, როცა მან მერს მხოლოდ ეს უპასუხა: „ოკ“? – სულხან სალაძე თვლის, რომ უნდა დაიწყოს გამოძიება.

„ასევე საკრებულოს წევრებმა უნდა მიმართონ კითხვებით მერს და საკრებულოს თავმჯდომარეს იმის გასაგებად, თუ რა მოხდა, სხვა დროსაც ყოფილა თუ არა და ასე შემდეგ… თუ ამ შესწავლის შედეგად გამოიკვეთება დანაშაულის ნიშნები, უნდა დაიწყოს გამოძიება,“ – მიიჩნევს სულხან სალაძე.

„ბათუმელებთან“ ლაშა კომახიძემ ამ შემთხვევის შემდეგ თქვა, რომ მან კონსულტაციის გამო მისწერა sms საკრებულოს თავმჯდომარეს.

„მერის საქმე არ არის ეს, რომ რჩევები მისცეს საკრებულოს თავმჯდომარეს: რა იქნება დღის წესრიგში და რა – არა, ეს აბსურდია. თუ საკრებულოს სჭირდება რჩევა, რომელი საკითხები იყოს, რომელი არ უნდა იყოს, საკრებულოს თავად შეუძლია მასთან კონსულტაცია გაიაროს. სხდომამდე უამრავი პროცედურაა, როცა თანხმდება საკითხები, საკრებულო ხომ ხელაღებით ნებისმიერ საკითხს არ იხილავს სხდომაზე?“ – კითხულობს საია-ს ხელმძღვანელი.

ის, რაც დღეს ბათუმის საკრებულოში მოხდა, სულხან სალაძისთვის აჩვენებს იმას, რომ თვითმმართველობა ამ ქვეყანაში მოჩვენებითია.

„მოჩვენებითია ბათუმის შემთხვევაშიც კი… მე ვფიქრობ, არც ლაშა კომახიძის დონეზე წყდება მსგავსი საკითხები და უფრო ზევით წყდება და ისინი ჩართულები არიან ამ პროცესში, თორემ შეუძლებელია ასე მარტივად პასუხობდეს მსგავს შეტყობინებას საკრებულოს თავმჯდომარე – „ოკ“ და დამთავრდა,“ – დასძინა „ბათუმელებთან“ სულხან სალაძემ.

ნეტგაზეთის მასალების სხვა გამოცემებში გადაბეჭდვის წესი
ავტორი