მიუხედავად იმისა, რომ არასამთავრობო ორგანიზაციების წარმომადგენლები დაჟინებით ითხოვდნენ საკითხის გადადებას, იმ მიზნით, რომ მომავალში მის განხილვაში თავადაც ჩაერთვებოდნენ, ბათუმის საკრებულომ საკითხი მაინც კომპანიის სასარგებლოდ გადაწყვიტა. ბათუმის საკრებულოს დღევანდელ სხდომაზე დაზუსტდა ისიც, რომ ნაკვეთზე, რომელსაც კომპანია ითხოვს, მას უკვე აშენებული აქვს ორსართულიანი კაფე, მსუბუქი კონსტრუქცია, რომელიც შუშითაა შეფუთული. „ამბასადორი ბათუმმა“ ეს კონსტრუქცია ყოფილ მოიჯარესთან შეთანხმებით, კულტურული მემკვიდრეობის სააგენტოს ძეგლების საბჭოს თანხმობით ააშენა.
კომპანია მერიას ჰპირდება, რომ ამ ტერიტორიაზე 700 000 აშშ დოლარს კიდევ დახარჯავს. შესაბამისად, სხდომაზე მისულ აქტივისტებს აინტერესებდათ, მაშინ, როცა კონსტრუქცია უკვე აშენებულია, რაში აპირებს კომპანია ამ თანხის დახარჯვას. ამ კითხვაზე დაზუსტებული პასუხი დღეს ვერც აქტივისტებმა მოისმინეს და ვერც საკრებულოს ოპოზიციამ, მიუხედავად იმისა, რომ ამ კითხვამ ბევრჯერ გაიჟღერა.
„შენობა არ არის დასრულებული და უნდა დასრულდეს“ – ასეთი იყო მერიის წარმომადგენლის, დავით კოპინაძის პასუხი, რომელმაც დღეს საკითხი სხდომაზე დასამტკიცებლად წარადგინა.
მსგავს გადაწყვეტილებებს საკრებულოს „ოცნების“ უმრავლესობის სრული მხარდაჭერით იღებს. დღეს კი უმრავლესობის წევრი დიმიტრი ჭეიშვილი აღმოჩნდა მათ შორის, ვინც განხილვის გადადება მოითხოვა.
„საზოგადოების ნაწილი ამბობს, რომ სურს ჩართვა განხილვაში და ამის საშუალება არ მიეცათ, ამიტომაც იქნებ გადავდოთ საკითხი და მივცეთ საშუალება ჩაერთონ“, – ასეთი იყო მისი პოზიცია. იგივე აზრი ჰქონდა მმართველი გუნდიდან ნატალია ძიძიგურსაც, თუმცა მან კენჭისყრაში მონაწილეობა არ მიიღო, როცა საკითხის დღის წესრიგიდან ამოღება კენჭისყრაზე დააყენეს.
საბოლოოდ საკრებულოს უმრავლესობამ „ამბასადორი ბათუმისთვის“ ბულვარის ცენტრში მიწის ნაკვეთის გადაცემაზე მერს თანხმობა მისცა – 11 ხმით 5-ის წინააღმდეგ. ნაკვეთის გადაცემის შემდეგ შპს „ამბასადორი ბათუმი“, რომელიც ბათუმის ბულვარში ოთხსართულიან გამაჯანსაღებელ ცენტრს აშენებს და ამავე სამშენებლო პროექტის 15 სართულამდე გაზრდას ითხოვს, ბულვარში კიდევ უფრო გაფართოვდება.
კომპანიამ დღეს ბათუმის მერიისგან 341 კვადრატულ მეტრზე მეტ ფართობი და მასზე დამაგრებულ შენობა მიიღო უზურფრუქტის წესით. ეს იმას ნიშნავს, რომ ქონება ბათუმის მერიის საკუთრებაში დარჩება, კომპანიას კი მისი მართვის უფლება ექნება ხელშეკრულებით გათვალისწინებული ვადით. კომპანიამ სასურველ ვადად 15 წელი დაასახელა.
გარდა ამისა, კომპანია იტოვებს უფლებას ვადის დასრულებისას მოითხოვოს სარგებლობის ხელშეკრულების გაგრძელება არანაკლებ შვიდი წლით, მოთხოვნის დროისათვის არსებული საიჯარო ღირებულების [სარგებლობის საფასურის] გათვალისწინებით.
