ბათუმში, საპროტესტო აქციაზე ადმინისტრაციული წესით დაკავებული 26 პირი 1000-1000 ლარით დააჯარიმეს, მათ შორის არიან ერთ-ერთი ბრალდებულის – რეზო წულუკიძის და, მამა და ძმა.
30 პირი გუშინ, 27 მაისს, ბათუმში დააკავეს ადმინისტრაციული წესით საპროტესტო აქციაზე. ისინი ხულიგნობის ბრალდებით 7 მაისს დაკავებული ახლობლების – რეზო წულუკიძისა და ელდარ ანთაძის გათავისუფლებას ითხოვდნენ. დაკავებულთაგან 9 წუხელვე გაათავისუფლეს ხელწერილით.
მოსამართლე როინ კახაძემ რამდენიმე დღით გადადო ბრალდებულ რეზო წულუკიძის მამის საქმის განხილვა. მოსამართლემ მხოლოდ ერთ შემთხვევაში – ირაკლი ჭელიძის მიმართ გამოიყენა სიტყვიერი შენიშვნა.
„გადაწყვეტილი აქვთ, ფინანსურად შეგვზღუდონ. ჩვენ ჯარიმებით ვერ შეგვაშინებენ, გავაგრძელებთ მაქსიმალურად მშვიდობიანად პროტესტს,“ – უთხრა ჟურნალისტებს სასამართლო განხილვის შემდეგ ფირუზ წულუკიძემ. ის ბრალდებულ რეზო წულუკიძის ძმაა. მისივე თქმით, ადმინისტრაციული წესით დაკავების დროს პოლიციელებმა მათ სიტყვიერი და ფიზიკური შეურაცხყოფა მიაყენეს. ჯერ უცნობია, როდის ან რა ფორმით გაგრძელდება საპროტესტო აქცია.
ბრალდებულების ახლობლები მიიჩნევენ, ისინი უკანონოდ დააკავეს, რადგან, მათივე თქმით, 7 მაისს, ჩხუბის დროს დაკავებული 2 პირი მხოლოდ თავს იცავდა, ხოლო ვინც მათ სცემა და დანით დაჭრა, დაკავებულები არ არიან.
ჟურნალისტებმა ფირუზ წულუკიძეს ჰკითხეს პოლიტიკურ კავშირებზე, მაგალითად, „ნაციონალური მოძრაობასთან“. ფირუზ წულუკიძეს კონკრეტული არაფერი უთქვამს, თუმცა აღნიშნა, რომ ხელისუფლებას უპირისპირდება და დეტალებს სპეციალურად მოწყობილ ბრიფინგზე მოჰყვება.
„…გვქონდა მცდელობა, რომ ჩვენს ხალხზე გამოგვეცხადებინა მხარდაჭერა, მათ არ აწყობდათ, რომ ჩვენ ეს სახელი მოგვეხვეჭა… ამ ხელისუფლებას სჭირდება დაჩაჩანაკებული, გაჭირვებული საზოგადოება… ყველაფერს გავაკეთებთ, რომ ეს ხელისუფლება არ იყოს ამ ქვეყანაში“ , – აღნიშნა ფირუზ წულუკიძემ.
