ქობულეთი-ბათუმის ხაზზე მოძრავი კერძო მიკროავტობუსები მუშაობას 8 ივნისიდან განაახლებენ, რაც შეეხება მუნიციპალურ ავტობუსებს, ქობულეთის მერიის ინფორმაციით, ეს ავტობუსები როგორც ქალაქში, ასევე სოფლების მიმართულებით, 29 მაისიდან იმოძრავებს.
„29 მაისიდან ქობულეთის მუნიციპალურ ავტობუსებშიც [შემდეგ უკვე კერძო კომპანიების მიკროავტობუსებშიც] აკრძალული იქნება პირბადის გარეშე ასვლა, ტრანსპორტში გამორთული უნდა იყოს კონდიციონერი, არავინ უნდა იჯდეს მძღოლის გვერდით და დაცული უნდა იყოს ყველა რეკომენდაცია, რაც ახალი კორონავირუსის პრევენციის მიზნით არის გაცემული. მუნიციპალურ ავტობუსებში დამონტაჟებულია ხელის სადეზინფექციო დისპენსერები“, – გვითხრეს ქობულეთის მერიაში.
29 მაისიდან ბათუმში, როგორც მუნიციპალური ავტობუსების, ასევე სამარშრუტო მიკროავტობუსების მოძრაობა აღდგება. ბათუმის მერიის ინფორმაციით, მუნიციპალურ ტრანსპორტში სამედიცინო პირბადის ტარება სავალდებულო იქნება. აკრძალულია კონდიციონერების გამოყენება და ავტობუსების ფანჯრები ღია უნდა უნდა იყოს მოძრაობის დროს, რათა მოხდეს ვენტილაცია და განიავება.
მთავრობის გადაწყვეტილებით, ყველა სახის საქალაქთაშორისო ტრანსპორტის მოძრაობა ქვეყანაში 8 ივნისიდან აღდგება.
შესაბამისად, 8 ივნისიდან განაახლებენ მოძრაობას მიკროავტობუსები ბათუმსა და აჭარის დანარჩენ მუნიციპალიტეტებს შორის.
