Batumelebi

გუშინ ბათუმში 31 წლის რუსუდან კოკობინაძე გარდაიცვალა. ექიმის თქმით, ის „უსიმპტომო“ იყო, თუმცა კორონავირუსმა მაინც იმსხვერპლა. გარდაცვლილის დას, მირანდა კოკობინაძეს მიაჩნია, რომ რუსუდანის მდგომარეობა სამედიცინო პერსონალის გულგრილობით დამძიმდა. რატომ აქვს ქალის ოჯახს ეს განწყობა, როგორ დამძიმდა 31 წლის ქალის მდგომარეობა, ამის შესახებ „ბათუმელებმა“ რამდენიმე კითხვა გარდაცვლილის დას დაუსვა.

„გვირეკავდა, გვწერდა, რომ თრომბის ნემსს არ უკეთებდნენ ოპერაციის [საკეისრო კვეთა] შემდეგ. როცა ექიმებს ეუბნებოდა, რომ „დამეხმარეთ, სუნთქვა მიჭირსო“, ხმამაღლა უყვიროდნენ – „მე შენ თავზე ვერ დაგადგები, მე შენი თავი არ მაქვს, მე სხვა პაციენტები მყავს და შენ თავს შენ თვითონ უნდა დაეხმაროო“. გვესმის, რომ ექიმებიც გადაღლილები არიან, მაგრამ როცა შეიძლება ადამიანი გადარჩეს ერთი ნემსით ან აუცილებელი ჩარევით, ხომ შეიძლება ეს გაუკეთო“, – ამბობს მირანდა კოკობინაძე.

მისი თქმით, რუსუდან კოკობინაძეს საკეისრო ოპერაცია ბათუმის სამშობიარო სახლში 25 ნოემბერს გაუკეთეს, თუმცა ოპერაციამდე მშობიარე ქალის ფილტვების მდგომარეობა არ შეუმოწმებიათ, რენტგენი არ გადაუღიათ.

„მხოლოდ გარედან მოუსმინეს. სხვა ანალიზებიც ნორმაში აქვსო, გვეუბნებოდნენ. „მედინაში“ 27 ნოემბერს გადაიყვანეს დილის 6 საათზე, თუმცა CT [კატე] იქაც მხოლოდ საღამოს გადაუღეს, რადგან გაფუჭებული იყო [დანადგარი] და არემონტებდნენ.

გადაღების შემდეგ დაზიანება შეაფასეს 23 ქულით. ეს იმას ნიშნავდა, რომ ფილტვების 90 პროცენტი დაზიანებული იყო“, – ამბობს მირანდა.

მირანდა კოკობინაძის თქმით, ოჯახმა მიმართა თბილისში მყოფ ექიმ ლევან რატიანსაც, რომელმაც პაციენტს ანტიბიოტიკი დაუნიშნა. გარდაცვლილის და ამბობს, რომ კლინიკაში არც ეს დანიშნულება შეასრულეს – ანტიბიოტიკი არ გაუკეთეს.

„ექიმები ჩემს დაზე გვეუბნებოდნენ, რომ ფსიქიკურად შეიშალა და სწორ ინფორმაციას ვერ გვაწვდიდა. არ მოუსმინოთო. მაშინ როცა, ფილტვები ფაქტობრივად განადგურებული ჰქონდა, სათანადო მკურნალობას არ უტარებდნენ“, – ამბობს გარდაცვლილის და.

მირანდა კოკობინაძე ამბობს, რომ ოჯახი მისი დის გარდაცვალების თაობაზე სამედიცინო რეგულირების სააგენტოსაც მიმართავს.

რუსუდანს ერთი კვირის შვილი დარჩა.

„ქართული ოცნების“ ერთ-ერთმა ლიდერმა, მამუკა მდინარაძემ დღეს, 4 დეკემბერს, ბრიფინგზე განაცხადა, რომ პანდემიის დროს საქართველოს ჯანდაცვის მინისტრისა და სისტემის „მიზანმიმართული და ორკესტრირებული შეტევა მიუღებელია“. ბოლო ორი დღის განმავლობაში კორონავირუსით ახალგაზრდა ადამიანების დაღუპვის შესახებ ინფორმაციების გავრცელების შემდეგ, სოციალურ ქსელში ბევრი ითქვა და დაიწერა ჯანდაცვის გაუმართავ სისტემაზე.

„ამ სიტუაციაში ჯანდაცვის სისტემაზე, მის პირველ პირზე თავდასხმა არის ის, საომარი სიტუაციის დროს თავდაცვის მინისტრს რომ დაესხა თავს“, – აცხადებს მდინარაძე.

მისი აზრით, ჯანდაცვის სისტემას მედია, გარკვეული პოლიტიკური ჯგუფები და ორგანიზაციები აკრიტიკებენ.

„მთელი მსოფლიო ებრძვის პანდემიას და ჩვენზე ბევრად მდიდარ ქვეყნებსაც უჭირთ კოვიდ 19-ის შედეგებთან გამკლავება. ამ მძიმე ვითარებაში ჯანდაცვის სისტემაზე და ექიმებზე ორკესტრირებული შეტევა სრულიად გაუმართლებელია.

დღეს ამ საკითხში არა ერთმანეთთან ბრძოლის თუ შეცდომების, ხარვეზებზე ჩასაფრების, არამედ გაერთიანების და ერთად დგომის დროა. ასეთ დროს კრიტიკა არა მარტო სისტემის დისკრედიტაციაა, არამედ მომაკვდინებელი ვირუსის მხარეს დგომაა“, – ამბობს მამუკა მდინარაძე.

___

გუშინ ბათუმში კორონავირუსით დაიღუპა 31 წლის ქალი, რომელსაც რამდენიმე დღის წინ ბათუმის სამშობიაროში საკეისრო კვეთა ჩაუტარეს. დღესვე ოჯახმა გაავრცელა დაღუპული ქალის მიერ გაგზავნილი სმს შეტყობინებების სქრინები, რომლის მიხედვითაც ქალს კლინიკაში 24 საათში ერთხელ აკითხავდნენ.

საქართველოში ბოლო 24 საათში კორონავირუსის 5068 ახალი შემთხვევა გამოვლინდა, გარდაიცვალა კიდევ 38 ადამიანი. ამავე პერიოდში გამოჯანმრთელდა 2 336 ადამიანი.

________________________________

ამავე თემაზე:

ბოლო 24 საათში აჭარაში კორონავირუსით 11 ადამიანი გარდაიცვალა. ამის შესახებ დაავადებათა კონტროლის ეროვნული ცენტრის ხელმძღვანელმა, ამირან გამყრელიძემ განაცხადა დღეს, 4 დეკემბერს ბრიფინგზე.

ქვეყნის მასშტაბით გარდაცვალების 38 შემთხვევაა დღეს. აქედან 20 შემთხვევა თბილისშია. ბოლო რამდენიმე დღეა, რეგიონების მიხედვით გარდაცვლილების მონაცემებს ჯანდაცვის სამინისტრო აღარ ავრცელებს.

გამყრელიძის თქმით, სპეციალური კომიტეტი ინტენსიურად მუშაობს ვაქცინის მიღების მოსამზადებელ გეგმაზე და წინასწარი მონახაზი მომდევნო კვირაში უნდა იყოს.

„გარდა კოვაქსპლატფორმისა, რომლიდანაც საქართველოს უკვე გარანტირებული აქვს დაახლოებით მილიონ 400 ათასი დოზის მიღება, რომელიც დაახლოებით მარტი-აპრილის თვეში იქნება, თუმცა მანამდე, ქვეყანა პარალელური გზებით  ცდილობს გარკვეული რაოდენობის ვაქცინის დოზების მიღებას, რომ ხელმისაწვდომი იყოს მოსახლეობისთვის და რისკის ჯგუფებისთვის“, – ამბობს გამყრელიძე.

მისი თქმით, ქვეყანაში ბოლო მონაცემებით კორონავირუსის 24 349 აქტიური შემთხვევაა, გამოჯანმრთელებულთა რაოდენობა კი 80 პროცენტია.

„მისი ოჯახის წევრებს, დას, მეუღლეს ჰქონდათ კომუნიკაცია სამშობიაროს დირექტორთან, ერთხელაც არ გაუჟღერებიათ, რომ ყურადღებას არ აქცევენ, იჩაგრება ჩემი და, ან მსგავსი რამ… იმ პალატაში მარტო ხომ არ იყო, სხვასთან მიდიოდა ექიმი და მასთან არა?“ – ამბობს „ბათუმელებთან“ ბათუმის სამშობიარო სახლის“ იურისტი სიმონ ასათიანი 31 წლის რუსუდან კოკობინაძის სმს მიმოწერის შესახებ, რომელიც დღეს გავრცელდა.

კოვიდინფიცირებული ქალი, რომელსაც სამშობიარო სახლში 25 ნოემბერს საკეისრო კვეთა გაუკეთეს, გუშინ, 3 დეკემბერს გარდაიცვალა.

დღეს, 4 დეკემბერს, რუსუდან კოკობინაძის ოჯახის წევრებმა სმს მიმოწერა გაასაჯაროვეს, სადაც 31 წლის ქალი წერს, რომ ექიმები 24 საათში ერთხელ შედიან, ყურადღებას არ აქცევენ და როცა დახმარებას ითხოვს, ექიმი უყვირის. „გაგუდული დაგვხდები“ – წერდა ახლობლებს ქალი, რომელიც დაიღუპა.

„ეს ქალბატონი იყო კოვიდდადასტურებული, მას სჭირდებოდა ჟანგბადი… ამ სირთულის მიუხედავად მეანობის კუთხით მდგომარეობა განვითარდა ისე, როგორც იყო საჭირო, მას გართულება არ ჰქონია. ბავშვი წაიყვანეს ოჯახის ახლობლებმა და ის კარგად გრძნობს თავს… პაციენტის მდგომარეობა დამძიმდა კოვიდინფექციის კუთხით და საჭირო გახდა მისი რეანიმაციაში მოთავსება, რომელიც ჩვენ არ გვაქვს,“ – გვითხრა სიმონ ასათიანმა.

რუსუდან კოკობინაძე ჯანმრთელობის მდგომარეობის დამძიმების შემდეგ 27 ნოემბერს „მედინას“ რეანიმაციულ განყოფილებაში გადაიყვანეს.

როგორ დამძიმდა 31 წლის ქალის ჯანმრთელობის მდგომარეობა ისე, რომ მისი გადარჩენა ვერ მოხერხდა? – სამშობიარო სახლის იურისტმა გვითხრა, რომ ზუსტი მიზეზი მისთვის უცნობია და მოგვიანებით ექიმს გაგვასაუბრებს.

„ბათუმელების“ სატელეფონო ზარს სამშობიარო სახლის დირექტორმა, ნუგზარ პაპავამ არ უპასუხა.

დღეს, 4 დეკემბერს, საკოორდინაციო საბჭოს სხდომის შემდეგ ჯანდაცვის მინისტრის მოადგილემ თამარ გაბუნიამ, ბათუმში 31 წლის ქალის გარდაცვალებასთან დაკავშირებით კომენტარი გააკეთა. მისი თქმით, შემთხვევას აუდიტის ჯგუფი და რეგულირების სააგენტო შეისწავლის. მისი თქმით, შეისწავლიან იმ მიმოწერას, რომელიც პაციენტს ოჯახის წევრებთან ჰქონდა გარდაცვალებამდე.

„ძალიან სამწუხაროა, როდესაც ასეთ მდგომარეობაში ხდება გარდაცვალება, ორსულობა მაქვს მხედველობაში და ყველა დედის დანაკარგი არის დიდი ტრაგედია. გარდაცვალების ყველა შემთხვევას რეგულირების სააგენტო და აუდიტის ჯგუფი შეისწავლის, მათ შორის ამ კონკრეტულ შემთხვევასაც.

ის ინფორმაცია, რომელიც დღეს ჩვენ კლინიკიდან გვაქვს, მიუთითებს იმაზე, რომ ეტაპები, რომელიც გაიარა პაციენტმა არის ის ეტაპები, რომელიც პროტოკოლით არის გათვალისწინებული. ჩაღრმავებულ ანალიზს, რა თქმა უნდა, გავაკეთებთ. გარდაცვალება უკავშირდება ფილტვის მძიმე დაზიანებას. რადგან თანმხლები დაავადებები რასაც შესაძლოა გამოეწვია გარდაცვალება, არ ფიქსირდება, ამ შემთხვევის ღრმა ანალიზიც ჩატარდება“, – ამბობს თამარ გაბუნია.

დღეს დილიდან TV პირველი ავრცელებს გარდაცვლილი ქალის მიერ ოჯახის წევრებისთვის გაგზავნილი სმს-ებს, სადაც გარდაცვლილი წერს, რომ მას ყურადღებას არ აქცევენ და „არ შემოდიან, მხოლოდ 24 საათში ერთხელ“, რომ „უყვირიან“.

თამარ გაბუნიას თქმით, ინფორმაციას სჭირდება დადასტურება და გადამოწმება.

„ამ შემთხვევაში ჯანდაცვის სამინისტრო არის იმისთვის, რომ პრევენციულად სრულიად გამორიცხულია ასეთი ტიპის, შეუფერებელი დამოკიდებულება პაციენტთან და ძალიან ბევრი, სხვადასხვა ტიპის მონიტორინგი ტარდება საავადმყოფოებში იმისთვის, რომ მსგავსი შემთხვევები არ იყოს. რა თქმა უნდა, ამ ინფორმაციას რაც ვრცელდება, სჭირდება გადამოწმება და ამაზეც სამინისტროს აქვს რეაგირების მექანიზმი“, – ამბობს გაბუნია.

31 წლის ქალი ბათუმში გუშინ გარდაიცვალა. მას რამდენიმე დღის წინ საკეისრო ოპერაცია გაუკეთეს. ბავშვი ჯანმრთელი დაიბადა.

___

მთავარ ფოტოზე: გარდაცვლილი ქალი და smsის სქრინი, რომელიც ტვ პირველმა გაავრცელა. 

ამავე თემაზე:

„112“-ის და „144“-ის გამართულად მუშაობისთვის საზოგადოებრივი უსაფრთხოების მართვის ცენტრი 2 580 000 ლარის ინვენტარისა და კომპიუტერული ტექნიკის შეძენას ტენდერის გარეშე გეგმავს. „112“-მა შესყიდვების სააგენტოს შესაბამისი თანხმობისთვის უკვე მიმართა.

„112“-ის ადამიანური რესურსების სრული მობილიზების მიუხედავად, ეპიდსიტუაციის გამწვავების პარალელურად, საგრძნობლად გაზრდილია მომართვიანობა. შექმნილი ვითარების განმუხტვის მიზნით, მოხდა ადამიანური რესურსების სარეზერვო ჯგუფების მაქსიმალური მობილიზება, საქართველოს მთავრობის განკარგულების საფუძველზე განხორციელდა შტატგარეშე მოსამსახურეთა რაოდენობის ზრდა, ახალი სამუშაო განრიგის შემუშავებისა და ცვლების გადანაწილების შემდგომ, გამოიკვეთა „112“-თვის და „144“-თვის, დამატებითი კომპიუტერული ტექნიკის შესყიდვის საჭიროება“, – აღნიშნულია საზოგადოებრივი უსაფრთხოების მართვის ცენტრ „112“-ის განაცხადში.

აღნიშნული ტექნიკის გარეშე, ცენტრის ინფორმაციით, „ვერ მოხერხდება ერთიანი სამთავრობო ცხელი ხაზის – 144-ის სრულყოფილი ფუნქციონირება და საქართველოში ახალი კორონავირუსის გავრცელების შედეგად გამოწვეულ მოქალაქეთა პრობლემებთან დაკავშირებულ საკითხებზე ოპერატიული რეაგირება“.

ცენტრი ტექნიკის შესყიდვას საკუთარი შემოსულობებითა და StopCoV ფონდიდან გამოყოფილი სახსრებით გეგმავს.

4 დეკემბრის მონაცემებით, აჭარაში კორონავირუსის 483 ახალი შემთხვევა დადასტურდა, გამოჯანმრთელდა 515 პაციენტი.

მთავრობის ცნობით, აჭარაში 1025 პაციენტი მკურნალობს კოვიდკლინიკებში, მათ შორის 155 მძიმე პაციენტია, ხოლო 44  ადამიანი ხელოვნური სუნთქვის აპარატზე იმყოფება. 

ბოლო 24 საათში საქართველოში 38 პაციენტი გარდაიცვალა, თუმცა რამდენი პაციენტი გარდაიცვალა კოვიდის დიაგნოზით აჭარაში, ამას უკვე რამდენიმე დღეა არც საკოორდინაციო საბჭო და არც აჭარის ჯანდაცვის სამინისტრო არ აკონკრეტებს.

2022 ადამიანია აჭარაში დღეისათვის კოვიდსასტუმროში, ხოლო 448 – საკარანტინო სივრცეში.

აჭარაში თვითიზოლაციაში იმყოფება 12071 პირი.

კლინიკა „მედინას“ დირექტორი, ჯუმბერ უნგიაძე ადასტურებს ინფორმაციას კლინიკაში 31 წლის ქალის გარდაცვალების შესახებ. სოფელ ერგეში მცხოვრები რუსუდან კოკობინაძე დღეს, 3 დეკემბერს გარდაიცვალა. უნგიაძის ინფორმაციით ქალი კოვიდინფიცირებული იყო და მას საკეისრო კვეთა ბათუმის სამშობიარო სახლში 25 ნოემბერს ჩაუტარეს. 27 ნოემბერს კი ის გართულებებით კლინიკა „მედინაში“ გადაიყვანეს.

ჯუმბერ უნგიაძის ინფორმაციით, მას თანმდევი დაავადებები არ აღენიშნებოდა, ჰქონდა სუნთქვის ძლიერი უკმარისობა, შესაბამისი კვლევების ჩატარების შემდეგ კი დადგინდა, რომ რუსუდან კოკობინაძეს ჰქონდა ფილტვების მძიმე დაზიანება.

„ფაქტობრივად ფილტვი აღარ იყო“, – გვითხრა ექიმმა. მისივე ინფორმაციით პაციენტის მდგომარეობა 1-ელ, 2 დეკემბერს გაუმჯობესდა, თუმცა დღეს ისევ დამძიმდა და ის თრომბოემბოლიით გარდაიცვალა.

რაც შეეხება ახალშობილს, ექიმის თქმით, ბავშვი ჯანმრთელია და ის სახლშია.

300-ლარიანი კომპენსაციის მისაღებად ელექტრონული განაცხადების მიღება დღეს, 3 დეკემბერს დაიწყო და 24 დეკემბერს დასრულდება.

მთავრობის 2 დეკემბრის დადგენილებით კომპენსაციას, 300 ლარს, მიიღებს:

• დაქირავებული – რომელიც 2020 წლის 27 ნოემბრის მდგომარეობით, დაქირავებით საქმიანობას ეწეოდა იმ დამქირავებლის სასარგებლოდ, რომელსაც 2020 წლის 28 ნოემბრიდან დაწესებული შეზღუდვების გამო შეუჩერდა საქმიანობა. დაქირავებული პირების შესახებ ელექტრონულად განაცხადს წარადგენს დამქირავებელი. ანუ დაქირავებული, დასაქმებული თავად არ გადის რეგისტრაციას.
• ინდივიდუალური მეწარმე, მცირე ბიზნესის სტატუსის მქონე მეწარმე ფიზიკური პირი, ფიქსირებული გადასახადის გადამხდელი ფიზიკური პირი და მიკრობიზნესის სტატუსის მქონე ფიზიკური პირი – რომლებიც 2020 წლის მეოთხე კვარტალში [ოქტომბერ-ნოემბერში] ეწეოდნენ ეკონომიკურ საქმიანობას და 2020 წლის 28 ნოემბრიდან დაწესებული შეზღუდვების გამო შეჩერებული აქვთ საქმიანობა და რომლებიც არ იღებენ დაფინანსებას ბიუჯეტიდან. სწორედ ეს პირები ითვლებიან რეგისტრირებულ თვითდასაქმებულებად და მათ თავად უნდა წარადგინონ ელექტრონული განაცხადი შემოსავლების სამსახურში, ანუ, კომპენსაციის მისაღებად თავად უნდა გაიარონ რეგისტრაცია.
• თვითდასაქმებული – რომელიც ფაქტობრივად ეწეოდა ეკონომიკურ საქმიანობას საქართველოში გადასახადის გადამხდელად რეგისტრირებული იმ პირის ობიექტზე, რომელსაც 2020 წლის 28 ნოემბრიდან დაწესებული შეზღუდვების გამო შეუჩერდა საქმიანობა.

ანუ, თუ პირი არ იყო ოფიციალურად დასაქმებული და მუშაობდა მაგალითად, ბაზრობაზე, მაგრამ 28 ნოემბრიდან ეს ბაზრობა დროებით დაიხურა, მაშინ ეს პირი, როგორც თვითდასაქმებული, მიიღებს კომპენსაციას.

შემოსავლების სამსახურის განმარტებით ასეთი პირი ითვლება, როგორც არარეგისტრირებული თვითდასაქმებული და მის შესახებ მონაცემებს ელექტრონულად შემოსავლების სამსახურს აწვდის ობიექტის მფლობელი/დამსაქმებელი [მაგალითად ბაზრობის მესაკუთრე].

შესაბამისად, თვითდასაქმებულს ელექტრონული რეგისტრაცია არ სჭირდება. ამას აკეთებს ობიექტის მფლობელი, რომელიც შესაბამის გრაფაში მიუთითებს – არარეგისტრირებული თვითდასაქმებული.

მთავრობის დადგენილებიდან გამომდინარე 300-ლარიან კომპენსაციას ვერ მიიღებენ, მაგალითად თურქეთში სეზონურად, თუ სხვა ფორმით დასაქმებული პირები, რომელთაც დაკარგეს შემოსავალი.

[highlight color=”red”]შენიშვნა: [/highlight]მთავრობამ 18 დეკემბერს გამოსცა ახალი დადგენილება, რომლის მიხედვითაც დაქირავებით დასაქმებული პირები, ვინც მუშაობდა ისეთ ობიექტზე, რომლის საქმიანობაც 28 ნოემბრიდან მთავრობის გადაწყვეტილებით შეჩერდა და ვისაც სამსახურში ხელფასის ჩარიცხვა ბოლოს 4 დეკემბრის ჩათვლით უფიქსირდება, დეკემბრის თვეში ერთჯერად 300-ლარიან კომპენსაციას მიიღებენ. ამის შესახებ  ვრცლად ნახეთ ბმულზე:  ცვლილება 300-ლარიანი კომპენსაციების წესში, რომელიც დაქირავებით დასაქმებულებს ეხებათ

რეგისტრაციის გასავლელად გადადით ამ ბმულზე:

საქართველოს პრემიერ-მინისტრის, გიორგი გახარიას განცხადებით, შექმნილია სპეციალური უწყებათაშორისი ჯგუფი, რომელიც იზრუნებს კორონავირუსის ვაქცინაციის გეგმის მომზადებაზე, ისევე, როგორც ვაქცინების შესყიდვაზე.

ამის შესახებ გახარიამ დღეს, 3 დეკემბერს, განაცხადა მთავრობის სხდომაზე.

მან აღნიშნა, რომ საქართველომ თანხა უკვე გადაიხადა ვაქცინის დროულად შემოტანისთვის.

„შეიქმნა უწყებათაშორისი კომისია, რომელიც იზრუნებს ვაქცინაციის გეგმის მომზადებაზე, ისევე, როგორც ვაქცინების შესყიდვაზე.

ჩვენ უკვე გარკვეული თანხები გადავიხადეთ საქართველოში ვაქცინის დროულად შემოტანისთვის.

ამ უწყებათაშორისმა კომისიამ უნდა უზრუნველყოს როგორც ვაქცინის დროული შემოტანა, ასევე მოსამზადებელი ტექნიკური სამუშაოების ჩატარება, რომელიც აუცილებელია დროული და ეფექტური ვაქცინაციის დასაწყებად“, – განაცხადა გიორგი გახარიამ.

დაავადებათა კონტროლის ცენტრის ხელმძღვანელის, ამირან გამრელიძის თქმით, მას შემდეგ, რაც ახალი კორონავირუსის საწინააღმდეგო ვაქცინა დამტკიცდება, საქართველო დაახლოებით 600-700 ათას დოზას მიიღებს.  გამყრელიძე ვარაუდობს, რომ ეს მიმდინარე წლის ბოლოს ან მომდევნოს დასაწყისში მოხდება.

გუშინ, 2 დეკემბერს, დიდი ბრიტანეთი გახდა პირველი ქვეყანა მსოფლიოში, რომელმაც დაამტკიცა Pfizer/ BioNTech-ის კორონავირუსის ვაქცინა  ფართო გამოყენებისათვის.

დიდ ბრიტანეთში იმუნიზაცია სავარაუდოდ  რამდენიმე დღეში დაიწყება მაღალი პრიორიტეტის მქონე ჯგუფებისთვის.

3 დეკემბრის მონაცემებით, აჭარაში კორონავირუსის 525 ახალი შემთხვევა დადასტურდა, გამოჯანმრთელდა 551 პაციენტი.

მთავრობის ცნობით, აჭარაში 1043 პაციენტი მკურნალობს კოვიდკლინიკებში, მათ შორის 152 მძიმე პაციენტია, ხოლო 45 ადამიანი ხელოვნური სუნთქვის აპარატზე იმყოფება. 

ბოლო 24 საათში საქართველოში 45 პაციენტი გარდაიცვალა, თუმცა რამდენი პაციენტი გარდაიცვალა კოვიდის დიაგნოზით აჭარაში, ამას უკვე რამდენიმე დღეა არც საკოორდინაციო საბჭო და არც აჭარის ჯანდაცვის სამინისტრო არ აკონკრეტებს.

1997 ადამიანია აჭარაში დღეისათვის კოვიდსასტუმროებში, ხოლო 970 – საკარანტინო სივრცეში.

აჭარაში თვითიზოლაციაში იმყოფება 11775 პირი.

3 დეკემბრის მონაცემებით, ბოლო 24 საათის განმავლობაში საქართველოში კორონავირუსით ინფიცირების 4260 ახალი შემთხვევა დადასტურდა.

ბოლო 24 საათში გამოჯანმრთელდა 2 947 პირი, ხოლო ჯამში ქვეყანაში კოვიდისგან გამოჯანმრთელებულთა რაოდენობა გაიზარდა 124 568-მდე.

24 საათის განმავლობაში საქართველოში დაფიქსირდა კორონავირუსით გარდაცვალების 45 ახალი შემთხვევა.

დღეს გამოვლენილი ინფიცირების მაჩვენებლები რეგიონების მიხედვით ასე გამოიყურება:

• თბილისი – 1 676 შემთხვევა
• აჭარა -525
• იმერეთი – 591
• ქვემო ქართლი – 351
• შიდა ქართლი – 294
• გურია – 131
• სამეგრელო-ზემო სვანეთი – 274
• კახეთი – 166
• მცხეთა-მთიანეთი – 134
• სამცხე-ჯავახეთი – 88
• რაჭა-ლეჩხუმი და ქვემო სვანეთი – 30

ამ ეტაპზე საქართველოში 1 027 მძიმე პაციენტია, მათ შორის, ხელოვნური სუნთქვის აპარატზე იმყოფება 390 პირი.

3867 ადამიანი მოთავსებულია კოვიდ-სასტუმროში, 11 227 პირი მკურნალობის კურსს გადის საცხოვრებელ ბინაზე.

მთავრობის ცნობით, ამ ეტაპზე თვითიზოლაციაში იმყოფება 50 544 ადამიანი, მათ შორის თბილისში – 18 675 პირი, აჭარაში – 11 775, იმერეთში – 5 080.