კულტურული მემკვიდრეობის სააგენტოს ინფორმაციით, შპს „ სახლი ბარათაშვილზე“ ბათუმში ბარათაშვილის #30 -ში მდებარე ისტორიული შენობის დემონტაჟს არ გეგმავს და მხოლოდ დაშენების უფლებას ითხოვს. რვასართულიანი შენობის აგებას პროექტი გორგასლის ქუჩის მხრიდან ითვალისწინებს, აქ არსებულ სახლსა და სხვა დამხმარე შენობებს კი ნებართვის მიღების შემთხვევაში დაანგრევენ.
რეესტრის მონაცემებით, საპროექტო ტერიტორია სულ რვა შენობა-ნაგებობას აერთიანებს, თუმცა მათ შორის, როგორც ხელოვნებათმცოდნის დასკვნაშიცაა მითითებული, რომელიც კულტურული მემკვიდრეობის სააგენტოს მშენებლობის მსურველმა კომპანიამ წარუდგინა, მთავარი შენობა აქ ბარათაშვილის #30-ში მდებარე საოჯახო მედიცინის ცენტრია, სხვა შენობები კი, ხელოვნებათმცოდნე გია ჭანიშვილის შეფასებით, მარტივი, რიგითი შენობებია და მხატვრულ-არქიტექტურულად არ გამოირჩევა რაიმე ღირებულებით.
„საოჯახო მედიცინის ცენტრი“ სახელმწიფოს საკუთრებაშია და ამ დროისთვის არ გვაქვს ინფორმაცია, მოელაპარაკა თუ არა მშენებლობის მსურველი კომპანია ქონების მეპატრონეს, აჭარის ფინანსთა და ეკონომიკის სამინიტროს. შენობა „საოჯახო მედიცინის ცენტრს“ იჯარით აქვს აღებული.
ხელოვნებათმცოდნის დასკვნაში მითითებული ინფორმაციით, ბარათაშვილის ქუჩაზე გამომავალი ორსართულიანი ნაგებობა, სადაც ახლა „საოჯახო მედიცინის ცენტრია“, 1937 წელს აუშენებიათ:
„იგი წარმოადგენდა იმ ხანებში დამკვიდრებული „სტალინური“ არქიტექტურის საფასადო სახის შენობას, რომელშიც გახსნილი იყო საბავშვო პოლიკლინიკა. ამ ნაგებობაში ასახულია XX საუკუნის პირველი ნახევრის ბათუმის ზოგადი მხატვრული ესთეტიკა. ამასთან, ნაგებობის სტრუქტურისა და ფასადის ამგვარი გადაწყვეტა მისადაგებულია უბნის ზოგად არქიტექტურულ გარემოსთან. შენობას ამ ეტაპზე არ აქვს მინიჭებული კულტურული მემკვიდრეობის უძრავი ძეგლის სტატუსი, თუმცა, ნაგებობა ფონური ღირებულებისაა და წარმოადგენს კულტურული მემკვიდრეობის თვალსაზრისით ღირებულ ობიექტს. XXს-ის განმავლობაში ამ ნაგებობაში მოხდა გარკვეული სტრუქტურულ-გეგმარებითი ცვლილება. რამდენჯერმე ჩანს ჩატარებული ინტერიერის და ფასადების რემონტი“ – წერს გია ჭანიშვილი.
რაც შეეხება დაშენებას, ხელოვნებათმცოდნე დაშენებას დასაშვებად მიიჩნევს „ზღვრული დოზით“ და წერს, რომ დაშენებული მოცულობა არ უნდა იყოს არსებულზე მოზრდილი და არ უნდა დათრგუნოს შენობის არქიტექტურული სახე. შესაძლებელია დაშენება დასრულდეს მანსარდული მოცულობით, „ოღონდ მანსარდის სტრუქტურა და მხატვრული სახე მსგავსი უნდა იყოს ბათუმური მანსარდების ესთეტიკისა და მას არ უნდა ჰქონდეს ზედმეტად ბუტაფორიული, კიჩური სახე.“
დასკვნა საკმაოდ მოცულობითია და მასში საუბარია იმაზეც, რომ აუცილებელია შენობის კონსტრუქციული გამაგრება, დაზიანებული ნაწილების შეკეთება და გამაგრება დაშენებამდე.
გაითვალისწინებს თუ არა ამ მოთხოვნებს მშენებელი ნებართვის მიღების შემთხვევაში, ამის შესახებ წინასწარ საუბარი შეუძლებელია. უცნობია ისიც, თუ რა გადაწყვეტილება მიიღო ზონალურმა საბჭომ, რომელმაც პროექტი სხდომაზე ერთხელ უკვე განიხილა. ეს საბჭო უფლებამოსილია რეკომენდაცია მისცეს ნებართვის გამცემ ორგანოს, ბათუმის მერიას, გასცეს ან არ გასცეს ნებართვა მშენებლობაზე ძეგლის დაცვის ზონაში.
ბარათაშვილის #30
