Batumelebi

წუხელ, 19 ნოემბერს, სოფელ დეკანაშვილებში მომხდარი ავარიის შედეგად დაშავებული 2 მოზარდის ჯანმრთელობის მდგომარეობა სტაბილურია. ეს მოზარდები ხულოში, კლინიკაში არიან მოთავსებულები.

მძიმეა, მაგრამ სტაბილური გოგონას ჯანმრთელობის მდგომარეობა, რომელიც შემთხვევის შემდეგ ბათუმში, კლინიკაში გადაიყვანეს. ამის შესახებ ინფორმაცია „ბათუმელებს“ ხულოს მერმა, ვახტანგ ბერიძემ დაუდასტურა.

მსუბუქი ავტომანქანა, რომელშიც 15-17 წლის ოთხი მოზარდი იმყოფებოდა, წუხელ ხევში გადავარდა. ავარიის შედეგად ერთი მოზარდი ადგილზე დაიღუპა.

შს სამინისტროს ინფორმაციით, დაწყებულია გამოძიება.

ბოლო 24 საათში საქართველოში კორონავირუსით ინფიცირების 4 318 ახალი დადასტურებული შემთხვევა გამოვლინდა, გარდაიცვალა 70 ადამიანი, გამოჯანმრთელდა 2 457 პირი.

Stopcov.ge-ზე გამოქვეყნებული ინფორმაციის თანახმად, ინტენსიური ტესტირების ფარგლებში, ბოლო 24 საათში ქვეყნის მასშტაბით ჩატარდა 52 962 კვლევა ტესტით, მათ შორის 32 513 კვლევა ანტიგენის ტესტით და 20 449 PCR ტესტით.

19 ნოემბრის მდგომარეობით, დადებითობის დღიური მაჩვენებელი არის 8.15%, ბოლო 14 დღის მანძილზე – 9.39% ხოლო 7 დღის მანძილზე – 9.00%.

20 ნოემბერს გამოვლენილი ინფიცირების 4 318 ახალი შემთხვევიდან: თბილისში გამოვლენილია 1 663 შემთხვევა, აჭარა – 159, იმერეთი – 809, ქვემო ქართლი – 279, შიდა ქართლი – 360, გურია – 98, სამეგრელო – ზემო სვანეთი -295, კახეთი – 303, მცხეთა-მთიანეთი – 113, სამცხე-ჯავახეთი – 184, რაჭა-ლეჩხუმი და ქვემო სვანეთი – 55.

საქართველოში კოვიდ-19-ის პანდემიის გავრცელებიდან დღემდე გამოვლენილი დადასტურებული შემთხვევების საერთო რაოდენობა შეადგენს 808 889-ს.

საქართველოს მესამე პრეზიდენტის, მიხეილ სააკაშვილის 50 დღიანი შიმშილობა სრულდება. უახლესი ინფორმაციით, სააკაშვილი გლდანის ციხის საავადმყოფოდან გორის სამხედრო ჰოსპიტალში გადაყვანას დასთანხმდა.

„ბათუმელები“ გთავაზობთ გასული 50 დღის ქრონიკას – რა ხდებოდა უკანასკნელი 50 დღე საქართველოში და რა ხდებოდა მიხეილ სააკაშვილის თავს.

6 სექტემბერი

6 სექტემბერს საქართველოს მესამე პრეზიდენტმა საკუთარ ფეისბუქ გვერდზე ვიდეომიმართვა გაავრცელა და თქვა, რომ 2021 წლის თვითმმართველობის არჩევნებისთვის საქართველოში ჩამოვიდოდა.

27 სექტემბერი

27 სექტემბერს მიხეილ სააკაშვილმა ფეისბუქზე 2 ოქტომბრისთვის დაჯავშნილი კიევი-თბილისის რეისის ბილეთის ფოტო გამოაქვეყნა.

1-ელი ოქტომბერი

• 1-ელ ოქტომბერს მიხეილ სააკაშვილმა საკუთარ ფეისბუქ გვერდზე პოსტი გამოაქვეყნა და დაწერა „დილა მშვიდობისა საქართველო. უკვე საქართველოდან 8 წლის შემდეგ“.
• მოგვიანებით ფეისბუქ გვერდზე კიდევ ორი ვიდეო გამოაქვეყნა. ორივე ვიდეო ბათუმში იყო გადაღებული.
• 1-ელ ოქტომბერს მთელი დღის განმავლობაში „ქართული ოცნების“ დეპუტატები ამტკიცებდნენ, რომ სააკაშვილი იტყუებოდა და ის არ იყო საქართველოში. მაგალითად, ქართული ოცნების“ ერთ-ერთი ლიდერი მამუკა მდინარაძე აცხადებდა, რომ მიხეილ სააკაშვილი ცრუობდა და სინამდვილეში არა ბათუმში, არამედ უკრაინის კურორტზე, ქალაქ ტრუსკავეცში იყო.
• თბილისის მერის კახა კალაძის თქმით, კი სააკაშვილის ბათუმში ყოფნის შესახებ ინფორმაცია საზოგადოების შეცდომაში შეყვანას ემსახურებოდა.
• საღამოს საქართველოს პრემიერ-მინისტრმა ირაკლი ღარიბაშვილმა საგანგებო ბრიფინგი გამართა და განაცხადა, რომ საქართველოს მესამე პრეზიდენტი მიხეილ სააკაშვილი საქართველოს ტერიტორიაზე დააკავეს.
• მალევე, საგანგებო განცხადება გააკეთა მეხუთე პრეზიდენტმა, სალომე ზურაბიშვილმა და თქვა, რომ არასდროს შეიწყალებს მიხეილ სააკაშვილს.

 2 ოქტომბერი

• 2 ოქტომბერს საქართველოში ადგილობრივი თვითმმართველობის არჩევნები გაიმართა.
• სახალხო დამცველმა ნინო ლომჯარიამ რუსთავის მე-12 პენიტენციურ დაწესებულებაში მოინახულა მიხეილ სააკაშვილი. დაწესებულებიდან გამოსულმა სახალხო დამცველმა ჟურნალისტებს უთხრა, სააკაშვილი თავს მიიჩნევდა პოლიტიკურ პატიმრად, აცხადებდა შიმშილობას და, როგორც უკრაინის მოქალაქე, ითხოვდა უკრაინის კონსულთან შეხვედრას.
• საქართველოში ამერიკის ელჩმა, კელი დეგნანმა განაცხადა, რომ მიხეილ სააკაშვილის საქმე იქნება ქართული მართლმსაჯულებისთვის ერთგვარი გამოცდა.

3 ოქტომბერი

• უკრაინის პრეზიდენტმა ვოლოდიმირ ზელენსკიმ თქვა, რომ უკრაინის ხელისუფლება იმუშავებს დაკავებული მიხეილ სააკაშვილის უკრაინაში დასაბრუნებლად.
• საქართველოს პრემიერ-მინისტრმა ირაკლი ღარიბაშვილმა თქვა, რომ არავის თხოვნას არ გაითვალისწინებდა და საქართველოს მესამე პრეზიდენტი მხოლოდ სასჯელის სრულად მოხდის შემდეგ შეძლებს უკრაინაში დაბრუნებას. პრემიერი ციხეში მყოფ სააკაშვილს დაემუქრა – “წესიერად მოიქცეს, თორემ დავუმატებთ კიდევ სხვა მუხლებს და სხვებსაც მივაყოლებთ”.
• დააკავეს ელგუჯა ცომაია. პროკურატურის განმარტებით, ცომაიამ ძებნილი მიხეილ სააკაშვილი შეიფარა და არ შეატყობინა საგამოძიებო უწყებას.

4 ოქტომბერი

• 4 ოქტომბერს მიხეილ სააკაშვილმა ციხიდან წერილი გაავრცელა და განაცხადა: „შიმშილობა იქნება ჩემი სიცოცხლის დასრულებამდე“.
• მიხეილ სააკაშვილის საქართველოში შემოყვანის საქმეზე კიდევ ორი პირი დააკავეს.
• რუსთავის მე-12 პენიტენციურ დაწესებულებასთან, სადაც დაკავებული მიხეილ სააკაშვილი იყო მოთავსებული, მისმა მხარდამჭერებმა აქცია გამართეს.

5 ოქტომბერი

სახელმწიფო დეპარტამენტის პრესსპიკერმა ნედ პრაისმა განაცხადა, რომ აშშ ყურადღებით აკვირდება საქართველოს ყოფილი პრეზიდენტის, მიხეილ სააკაშვილის გარშემო მიმდინარე მოვლენებს.

6 ოქტომბერი

• პრემიერ-მინისტრმა ირაკლი ღარიბაშვილმა მიხეილ სააკაშვილის ჩამოსვლის მისეულ ვერსიებზე ისაუბრა და თქვა, რომ შესაძლოა მიზეზი სახელმწიფო გადატრიალება ყოფილიყო.
• ევროპის სახალხო პარტიამ (EPP) განცხადება გაავრცელა, სადაც წერდა, რომ მიხეილ სააკაშვილის დაკავება და პოლიტიკური დევნა კიდევ უფრო ზრდიდა ქვეყანაში დაძაბულობასა და პოლიტიკურ პოლარიზაციას.

7 ოქტომბერი

• პატრიარქის მდივანმა მიქაელ ბოტკოველმა საქართველოს ყოფილი პრეზიდენტი მიხეილ სააკაშვილი რუსთავის ციხეში მოინახულა.
• „ერთიანმა ნაციონალურმა მოძრაობამ“ მიხეილ სააკაშვილის გათავისუფლების მოთხოვნით აქცია დააანონსა.

8 ოქტომბერი

ლიეტუველი ევროპარლამენტარები, ანდრიუს კუბილიუსი და რასა იუკნევიჩიანე, პრემიერ-მინისტრ ირაკლი ღარიბაშვილის მუქარას მიხეილ სააკაშვილის მიმართ გამოეხმაურნენ და განაცხადეს, რომ „ევროკავშირის ნებისმიერ ქვეყანაში მთავრობის წარმომადგენლის მხრიდან მსგავს განცხადებას დაუყოვნებლივი გადადგომა მოჰყვებოდა“.

9 ოქტომბერი

სპეციალური პენიტენციური სამსახურის ხელმძღვანელმა, ნიკა ცხვარაშვილმა განაცხადა, რომ მოშიმშილე მიხეილ სააკაშვილმა ციხეში თაფლის და ნატურალური წვენის მიღება დაიწყო.

10 ოქტომბერი

მიხეილ სააკაშვილის პირადმა ექიმმა, ნიკოლოზ ყიფშიძემ თქვა, რომ ექსპრეზიდენტის მდგომარეობა გაუარესდა. ექიმმა თქვა, რომ სააკაშვილს აქვს სისხლის დაავადება, თალასემია. შიმშილობა ამ დაავადების დროს კი ადამიანის მდგომარეობას მკვეთრად აუარესებს.

11 ოქტომბერი

• სპეციალურმა პენიტენციურმა სამსახურმა განცხადება გამოაქვეყნა და განმარტა, რომ სააკაშვილის ჯანმრთელობა არ გაუარესებულა.
• პრემიერმა ირაკლი ღარიბაშვილი მიხეილ სააკაშვილის შიმშილობას გამოეხმაურა და თქვა: „როდესაც ადამიანი აცხადებს, რომ შიმშილობს, ნახევარ კილოგრამ თაფლს არ უნდა ჭამდეს“.
• 11 ოქტომბერს სააკაშვილი მოინახულა „ნაციონალური მოძრაობის“ წევრმა, პარლამენტარმა ეკა ხერხეულიძემ. მისი თქმით, სააკაშვილმა თაფლის 5 ქილიდან 4 გაუხსნელად ჩააბარა ადმინისტრაციას.

12 ოქტომბერი

• ოთხმა ორგანიზაციამ („ღია საზოგადოების ფონდი“, „საქართველოს დემოკრატიული ინიციატივა – GDI“, „მმართველობის მონიტორინგის ცენტრი“, „ადამიანის უფლებების ცენტრი -HRC“) განაცხადა, რომ მიხეილ სააკაშვილის მიმართ პოლიტიკურად მოტივირებული მართლმსაჯულება იკვეთება.
• იუსტიციის სამინისტრომ სააკაშვილისთვის ექიმების მულტიფუნქციური ჯგუფის გამოყოფა მოითხოვა.

14 ოქტომბერი

თბილისში, თავისუფლების მოედანზე მიხეილ სააკაშვილის მხარდამჭერი აქცია გაიმართა. აქციაზე დასასწრებად მოქალაქეები თბილისიდან და საქართველოს რეგიონებიდან შეიკრიბნენ. აქციაში მინიმუმ 38’500 იყო, მაქსიმუმ კი — 57’600 ადამიანი მონაწილეობდა.

15 ოქტომბერი

პოლონელმა დეპუტატებმა სააკაშვილის გასათავისუფლებლად ევროსაბჭოს და ევროკავშირის წარმომადგენლებს მიმართეს.

16 ოქტომბერი

მე-12 პენიტენციურ დაწესებულებასთან, სადაც მიხეილ სააკაშვილი იყო მოთავსებული, საპროტესტო აქცია გაიმართა სააკაშვილის წინააღმდეგ.

17 ოქტომბერი

შეერთებული შტატების წარმომადგენელთა პალატის დაზვერვის კომიტეტის თავმჯდომარემ ადამ შიფმა საქართველოს მთავრობას რეფორმების გატარებისკენ და კანონის უზენაესობის გაძლიერებისკენ მოუწოდა.

18 ოქტომბერი

• 18 ოქტომბერს 70-მდე ევროპელი პოლიტიკოსის ხელმოწერით გავრცელდა განცხადება,  რომლის თანახმადაც მიხეილ სააკაშვილის პატიმრობა „უნდა შეწყდეს მანამ, სანამ ის არ წარდგება სამართლიანი სასამართლო პროცესის წინაშე“.
• პარლამენტის იურიდიულ საკითხთა კომიტეტის თავმჯდომარემ, ანრი ოხანაშვილმა ევროპარლამენტარებს მოუწოდა, რომ „საქართველოში მოქმედ კანონებს პატივი სცენ“. ოხანაშვილის თქმით, ეს განცხადება ევროკავშირის პოზიციას არ გამოხატავს და განცხადებაზე ხელმომწერები შეცდომაში არიან შეყვანილი.

19 ოქტომბერი

• 19 ოქტომბერს საქართველოს პრემიერ-მინისტრმა ირაკლი ღარიბაშვილმა განაცხადა, რომ არჩევნების შემდეგ ის და მისი თანაგუნდელები სააკაშვილთან დაკავშირებით კომენტარს აღარ გააკეთებენ.
• ღარიბაშვილმა სააკაშვილზე თქვა: „ის არის სიმულანტი, პროფესიონალი აფერისტი კაცი, რომელიც ჯერ გამოდის, ვითომ შიმშილობს, მეორე მხრივ, უნდა ჩვენ ყველამ ვილაპარაკოთ მის დიეტაზე თუ შიმშილობაზე. სამარცხვინო სიტუაციაა, დავამთავროთ არჩევნები და გადავიდეთ საქმის კეთებაზე“.
• მიხეილ სააკაშვილის ჯანმრთელობის მდგომარეობაზე დაკვირვების მიზნით შექმნილი ექიმთა კონსილიუმის წევრმა, ზურაბ ფაღავამ იუსტიციის სამინისტროში ვიზიტისას თქვა, რომ ექიმებმა ექსპრეზიდენტის ჰოსპიტალიზების რეკომენდაცია გასცეს.
• საქართველოს იუსტიციის მინისტრი, რატი ბრეგაძე 19 ოქტომბერს ამბობს, რომ თუ მიხეილ სააკაშვილი თანახმა იქნება, ექიმთა კონსილიუმის გაცემული ყველა რეკომენდაცია შესრულდება.

20 ოქტომბერი

• პრემიერ-მინისტრი ირაკლი ღარიბაშვილი გამოეხმაურა ევროპარლამენტარების განცხადებას იმის შესახებ, რომ მიხეილ სააკაშვილი უნდა გათავისუფლდეს მანამ, სანამ ევროპული სასამართლო მისი საქმის განხილვას არ დაასრულებს. მან თქვა – „ყველამ თავის ქვეყანას მიხედოს“.
• 20 ოქტომბერს მიხეილ სააკაშვილს საქართველოს სახელმწიფო საზღვრის უკანონო კვეთის ფაქტზე ბრალი წარედგინა საქართველოს სისხლის სამართლის კოდექსის 344-ე მუხლის პირველი ნაწილით.

21 ოქტომბერი

• იუსტიციის მინისტრმა რატი ბრეგაძემ განაცხადა, რომ საჭიროების შემთხვევაში მსჯავრდებულ მიხეილ სააკაშვილს სპეციალური პენიტენციური სამსახურის მე-18 სამკურნალო დაწესებულებაში გადაიყვანდნენ.
• პრემიერ-მინისტრმა ირაკლი ღარიბაშვილმა განაცხადა, რომ საჭიროების შემთხვევაში მიხეილ სააკაშვილს ციხის საავადმყოფოში გადაიყვანდნენ და სხვა დაწესებულება გამორიცხული იყო.
• 21 ოქტომბერს რუსთავის მე-12 ციხის ფანჯრიდან გარეთ შეკრებილ მოქალაქეებს ხელი დაუქნია. დაპატიმრების შემდეგ ეს იყო ექსპრეზიდენტის პირველი გამოჩენა.

24 ოქტომბერი

• საქართველოს სახალხო დამცველმა მიხეილ სააკაშვილის მიღებისთვის N18 სამკურნალო დაწესებულების მზადყოფნის ხარისხი შეამოწმა. დაადგინა, რომ დაწესებულებაში არსებული ვითარება, სამედიცინო უზრუნველყოფის კუთხით, სრულფასოვნად არ შეესაბამება ექიმთა მულტიფუნქციური ჯგუფის მიერ გაცემულ 2021 წლის 23 ოქტომბრის დასკვნასა და რეკომენდაციებს. ომბუდსმენის შეფასებით, არსებობს გარკვეული რისკები უსაფრთხოების თვალსაზრისითაც.
• საქართველოს ჯანდაცვის მინისტრის მოადგილემ განაცხადა, რომ №18 სამკურნალო დაწესებულების კლინიკას ჰქონდა სრული აღჭურვილობა და შეეძლო როგორც გადაუდებელი, ისე ინტენსიური თერაპიის და რეანიმაციის მიმართულებით დახმარება.

25 ოქტომბერი

• მიხეილ სააკაშვილის ადვოკატის, დიმიტრი საძაგლიშვილის განცხადებით, 24 ოქტომბრის ღამეს ექსპრეზიდენტის ანალიზებში “ერთ-ერთი სასიცოცხლო მაჩვენებელი კრიტიკულ ზღვრამდე დაეცა. საჭირო გახდა რეანიმატოლოგთა ჩარევა, რის შემდეგაც დასტაბილურდა მაჩვენებელი“.
• მიხეილ სააკაშვილის ჯანმრთელობის მდგომარეობის მონიტორინგის მიზნით შექმნილი კონსილიუმი კარდიოლოგმა ზურაბ ფაღავამ დატოვა. მიზეზად პირადი ჯანმრთელობის მდგომარეობა დაასახელა.

26 ოქტომბერი

• საქართველოს მესამე პრეზიდენტმა მიხეილ სააკაშვილმა გლდანის ციხის საავადმყოფოში გადაყვანაზე ნებისმიერ სიტუაციაში უარი განაცხადა.
• სამედიცინო სფეროს წარმომადგენლებმა ბრიფინგი გამართეს და ხელისუფლებას მიხეილ სააკაშვილის მრავალპროფილურ კლინიკაში გადაყვანისკენ მოუწოდეს.

27 ოქტომბერი

• მიხელ სააკაშვილის უკრაინელი ადვოკატი ევგენ გრუშოვეცი საქართველოში არ შემოუშვეს.
• მიხეილ სააკაშვილის მოსანახულებლად და მისი უფლებრივი მდგომარეობის შესასწავლად საქართველოში უკრაინის სახალხო დამცველი ჩამოვიდა.
• ევროპის სახალხო პარტიამ (EPP) საქართველოს ხელისუფლებას მოუწოდა მიხეილ სააკაშვილი სასწრაფოდ გადაიყვანონ სამოქალაქო საავადმყოფოში.
• უკრაინელი ჟურნალისტი დიმიტრი გორდონი თბილისში არ შემოუშვეს.
• სააკაშვილის ადვოკატ დიმიტრი საძაგლიშვილის ინფორმაციით, რუსთავის ციხეში, შეხვედრების ოთახში რემონტი ჩაატარეს და მიხეილ სააკაშვილთან დაცული კომუნიკაციის საშუალება, ფაქტობრივად, შეზღუდეს.

28 ოქტომბერი

„ქართული ოცნების“ ერთ-ერთმა ლიდერმა, ირაკლი კობახიძემ განაცხადა, რომ მიხეილ სააკაშვილი „არ შიმშილობს და ეს არის შიმშილობის იმიტირება“.

29 ოქტომბერი

პრემიერ-მინისტრმა ირაკლი ღარიბაშვილმა პატიმრობაში მყოფი მიხეილ სააკაშვილის შიმშილობაზე თქვა, რომ კანონის თანახმად, ადამიანს თავის მოკვლის უფლება აქვს. მომდევნო დღეს ღარიბაშვილმა თავისი ნათქვამი გაასწორა და თქვა „უნდა მეთქვა შიმშილობა და არა თვითმკვლელობა“.

30 ოქტომბერი

• საქართველოში გაიმართა ადგილობრივი თვითმმართველობის არჩევნების მეორე ტური.
• საქართველოში ამერიკის შეერთებული შტატების ელჩის კელი დეგნანის განცხადებით, მიხეილ სააკაშვილის სამოქალაქო კლინიკაში გადაყვანის საკითხი დამოკიდებული უნდა იყოს კონკრეტულ სამედიცინო დახმარების საჭიროებაზე და ეს სამედიცინო პროფესიონალებმა სამართლიანად და მიუკერძოებლად უნდა გადაწყვიტონ.
• თბილისის მერობის კანდიდატმა ენმ-დან ნიკა მელიამ საქართველოს ყოფილ პრეზიდენტ მიხეილ სააკაშვილს შიმშილობის შეწყვეტისკენ მოუწოდა.

1-ელი ნოემბერი

პატიმრობაში მყოფი მიხეილ სააკაშვილმა ციხიდან წერილი გაავრცელა. წერდა, რომ ხელისუფლებამ არჩევნები გააყალბა და გამოსავალი მხოლოდ ვადამდელი არჩევნებით ხელისუფლების შეცვლაა.

2 ნოემბერი

• „ერთიანი ნაციონალური მოძრაობის“ თავმჯდომარემ, ნიკა მელიამ რუსთავის ციხესთან პერმანენტული აქციები დააანონსა.
• მიხეილ სააკაშვილმა ხალხს აქციებისკენ მოუწოდა. სააკაშვილის განცხადება მისმა ადვოკატმა, დიმიტრი საძაგლიშვილმა  2 ნოემბერს წაიკითხა. სააკაშვილი წერდა, რომ მისი ციხიდან დახსნის პირობებში “მაქსიმუმ 10 დღეში” მიაღწევდა რიგგარეშე არჩევნებს.
• „ქართული ოცნების“ ერთ-ერთმა ლიდერმა, ირაკლი კობახიძემ ისევ განაცხადა, რომ „სააკაშვილის შიმშილობა იმიტირებულია“.

3 ნოემბერი

• 3 ნოემბერს საქართველოს პრეზიდენტმა სალომე ზურაბიშვილმა კიდევ ერთხელ თქვა, რომ ექს-პრეზიდენტს არ შეიწყალებს. ამასთან, ის ამბობს, რომ სააკაშვილი მიჩნეულ უნდა იქნას განსაკუთრებულ პატიმრად და ხელისუფლებამ ყველა ზომა მიიღოს მისი ჯანმრთელობის უზრუნველსაყოფად.
• პარტია “დროას” ლიდერი ელენე ხოშტარიამ ექს-პრეზიდენტ მიხეილ სააკაშვილის სამოქალაქო საავადმყოფოში გადაყვანის მოთხოვნით პარლამენტში შიმშილობა დაიწყო.

4 ნოემბერი

საქართველოს მართლმადიდებელი ეკლესიის პატრიარქის მდივანი დეკანოზი მიქაელ ბოტკოველი რუსთავის მე-12 პენიტენციურ დაწესებულებაში მიხეილ სააკაშვილთან შესახვედრად მივიდა. მას თან ჰქონდა ილია II-ის წერილი, რომელშიც პატრიარქი სააკაშვილს სთხოვდა შიმშილობა შეეწყვიტა.

5 ნოემბერი

• საქართველოს იუსტიციის მინისტრმა, რატი ბრეგაძემ თქვა, რომ უწყების მკაცრი რეკომენდაციაა, სააკაშვილის სასამართლო პროცესი რუსთავის მე-12 პენიტენციურ დაწესებულებაში ჩატარდეს.
• იუსტიციის მინისტრმა რატი ბრეგაძემ განაცხადა, რომ მიხეილ სააკაშვილი რუსთავის მე-12 პენიტენციურ დაწესებულებაში სხვადასხვა ტიპის ფაფებს და ნატურალურ წვენებს იღებდა.

6 ნოემბერი

• სახელმწიფო უსაფრთხოების სამსახურის ცნობით, ექს-პრეზიდენტ მიხეილ სააკაშვილის მხარდამჭერი აქციების ორგანიზატორები განიხილავენ ერთ-ერთი ოპოზიციური ლიდერის ლიკვიდაციის შესაძლებლობას.
• მიხეილ სააკაშვილმა თქვა, რომ არანაირ საკვებს არ იღებდა, ხოლო სპეკულაციების თავიდან ასაცილებლად 6 ნოემბრის დილიდან უარი თქვა მინერალებზე და ვიტამინებზეც.
• პენიტენციური სამსახურის უფროსმა, ნიკა ცხვარაშვილმა განაცხადა, რომ პატიმარმა მიხეილ სააკაშვილმა „გარკვეული პერიოდია, დაიწყო საკვები დანამატების მიღება, მათ შორის თხევადი და არათხევადი სახით“.
• პენიტენციურმა სამსახურმა  სააკაშვილის კადრები გაასაჯაროვა, რომელიც ციხეში, ექიმების კაბინეტში იყო გადაღებული.

7 ნოემბერი

სააკაშვილმა პენიტენციური სამსახურის მიერ კადრების გავრცელების შემდეგ სახალხო დამცველთან შეხვედრა მოითხოვა, რომელსაც უთხრა, რომ ექიმების რეკომენდაცია იყო მედიკამენტის ჩანაცვლება საკვები დანამატით. 

8 ნოემბერი

• საქართველოს მართლმადიდებელი ეკლესიის საპატრიარქოს ახალქალაქის, კუმურდოსა და კარის მიტროპოლიტმა ნიკოლოზ ფაჩუაშვილმა განაცხადა, რომ რუსთავის მე-12 პენიტენციურ დაწესებულებაში მიხეილ სააკაშვილი აზიარა.
• მიხეილ სააკაშვილმა განაცხადა, რომ სიკვდილამდე აპირებდა შიმშილობას. მოითხოვა, მისი ჯანმრთელობის თემა არ ქცეულიყო დღის წესრიგის მთავარ საკითხად, რადგან მიზანი “მოპარული არჩევნების და ხელისუფლების დაბრუნება“ იყო.
• 8 ნოემბერს ცნობილი გახდა, რომ მიხეილ სააკაშვილი რუსთავის ციხიდან გლდანის ციხის საავადმყოფოში გადაიყვანეს.
• სააკაშვილის გადაყვანის შემდეგ გლდანის ციხის საავადმყოფოში კომპიუტერული ტომოგრაფიის მოწყობილობები შეიტანეს.
• სპეციალურმა პენიტენციურმა სამსახურმა მიხეილ სააკაშვილის საკანში გადაღებული ვიდეო გაასაჯაროვა, სადაც ჩანს, როგორ ალაგებს სააკაშვილი საკუთარ ნივთებს.

9 ნოემბერი

• მიხეილ სააკაშვილმა თქვა, რომ სასჯელაღსრულების დეპარტამენტმა ის მოატყუა, რადგან უთხრეს, რომ სამოქალაქო კლინიკაში გადაჰყავდათ, თუმცა საბოლოოდ, გლდანის ციხის საავადმყოფოში მიიყვანეს. ეს ინფორმაცია საზოგადოებისთვის სახალხო დამცველის საშუალებით გახდა ცნობილი.
• მიხეილ სააკაშვილმა თქვა, რომ მას შემდეგ, რაც რუსთავის მე-12 საპყრობილიდან მოტყუებით წაიყვანეს გლდანის ციხის საავადმყოფოში, ადგილზე მისულს ფიზიკურად გაუსწორდნენ.
• ჯანდაცვის მინისტრის მოადგილემ, თამარ გაბუნიამ განაცხადა, რომ გლდანის მე-18 სამკურნალო დაწესებულება, სადაც მიხეილ სააკაშვილი გადაიყვანეს,  მაღალტექნოლოგიური შესაძლებლობებით აღჭურვილი არ არის და „შესაძლებელია, დახმარება დასჭირდეთ“.
• ევროკავშირის ელჩმა კარლ ჰარცელმა განაცხადა, რომ მიხეილ სააკაშვილის უფლებების დაცვა საქართველოს ხელისუფლების სრული პასუხისმგებლობაა.
• საერთაშორისო ორგანიზაცია Amnesty International-მა მიხეილ სააკაშვილის პატიმრობასთან დაკავშირებით განცხადება გაავრცელა, სადაც ნათქვამი იყო, რომ ექსპრეზიდენტის ციხის საავადმყოფოში ძალადობრივად გადაყვანა, არა მხოლოდ შერჩევითი სამართალი, არამედ აშკარა პოლიტიკური შურისძიება იყო.

10 ნოემბერი

• 10 ნოემბერს თბილისის საქალაქო სასამართლოში გაიმართა მიხეილ სააკაშვილის პროცესი. სააკაშვილის სასამართლოში არ გადაიყვანეს.
• პოლონეთის საზოგადოებრივმა რადიომ საკუთარ წყაროზე დაყრდნობით გაავრცელა ინფორმაცია, რომ საქართველოსა და პოლონეთის პრეზიდენტების, სალომე ზურაბიშვილისა და ანჯეი დუდას შორის გამართული სატელეფონო საუბროს დროს, დუდამ განაცხადა, რომ „მიხეილ სააკაშვილის დაკავება აზიანებს ქვეყნის იმიჯს“.
• ადამიანის უფლებათა ევროპულმა სასამართლომ დროებითი ღონისძიების შესახებ მოთხოვნაზე, სახელწოდებით „სააკაშვილი საქართველოს წინააღმდეგ“, გადაწყვეტილება გამოაქვეყნა.

11 ნოემბერი

• საქართველოს პრემიერ-მინისტრმა ირაკლი ღარიბაშვილმა თქვა, რომ მიხეილ სააკაშვილთან დაკავშირებით კომენტარების გაკეთება დაასრულა.
• იუსტიციის სამინისტრომ სააკაშვილის გლდანის ციხის საავადმყოფოში გადაყვანის კადრები გამოაქვეყნა, სადაც ჩანს, რომ სააკაშვილი დაწესებულებაში ძალით შეჰყავთ.
• მიხეილ სააკაშვილის ადვოკატმა ბექა ბასილაიამ სააკაშვილის ციხის საავადმყოფოში გადაყვანის ამსახველი კადრების გამოქვეყნების შემდეგ თქვა, რომ სააკაშვილი მოატყუეს, გაიტაცეს, მასზე იძალადეს და ეს კადრებით დასტურდება.
• იუსტიციის სამინისტრომ, სახელმწიფო ინსპექტორის სამსახურის მოწოდების მიუხედავად, მიხეილ სააკაშვილის მორიგი ვიდეო გამოაქვეყნა.
• „წამების მსხვერპლთა რეაბილიტაციის საერთაშორისო ცენტრმა“ (IRCT) მიხეილ სააკაშვილის შესახებ განცხადება გაავრცელა  და ყოფილი პრეზიდენტის მიმართ არასათანადო მოპყრობა დაგმო.
• მიხეილ სააკაშვილმა ადვოკატის, ნიკა გვარამიას საშუალებით ციხიდან მორიგი წერილი გაავრცელა, სადაც წერდა, რომ ითვალისწინებს სტრასბურგის სასამართლოს მოწოდებას და წყვეტს შიმშილობას, ოღონდ იმ პირობით თუ რეაბილიტაციას სამოქალაქო ტიპის სამკურნალო დაწესებულებაში გააგრძელებს.
• საქართველოს იუსტიციის მინისტრმა, რატი ბრეგაძემ განაცხადა, რომ სახელმწიფო მოხარული იქნება, თუკი პატიმრობაში მყოფი მიხეილ სააკაშვილი შიმშილობას “ყოველგვარი დათქმების”გარეშე შეწყვეტს.

12 ნოემბერი

• ევროპარლამენტარი ვიოლა ფონ კრამონმა ტვიტერზე დაწერა, შეძრწუნებულია ციხეში ექსპრეზიდენტ სააკაშვილისადმი არასათანადო მოპყრობით.
• საქართველოში ევროპარლამენტარი ანა ფოტიგა ჩამოვიდა.
• მიხეილ სააკაშვილი ციხის საავადმყოფოში მოინახულა მისმა ამერიკელმა ადვოკატმა ჯონ სენდვიჯმა. ციხის საავადმყოფოდან გამოსულმა ადვოკატმა თქვა, რომ მე-18 სამედიცინო დაწესებულება, სადაც სააკაშვილი იმყოფება, არ არის შესაფერისი დაწესებულება ჯანმრთელობის მდგომარეობს შესაძლო გაუარესების შემთხვევისთვის.
• საქართველოში მოქმედმა არასამთავრობო ორგანიზაციებმა ევროპის საბჭოს წამების პრევენციის კომიტეტს მიმართეს და ორგანიზაციის წარმომადგენლებს მოუწოდეს, განახორციელონ ვიზიტი საქართველოს პენიტენციურ სისტემაში მიხეილ სააკაშვილის უფლებრივი მდგომარეობის მონიტორინგის მიზნით.

13 ნოემბერი

• ევროპარლამენტარი ანა ფოტიგა არ შეუშვეს მიხეილ სააკაშვილის მოსანახულებლად გლდანის მე-18 სამედიცინო დაწესებულებაში.
• ოპოზიციის წარმომადგენლები ევროპელი პოლიტიკოსების, მათ შორის ევროპარლამენტარ ანა ფოტიგას სააკაშვილთან ციხეში არშეშვება გამოეხმაურნენ და თქვეს, რომ ამით ხელისუფლებამ საკუთარ ანტიდასავლური პოლიტიკური კურსი აჩვენა.
• ირაკლი კობახიძემ წერილი გამოაქვეყნა და კრიმინალების მფარველი უწოდა ევროპარლამენტარს, რომელმაც მისი ინფორმაციით მესამე პრეზიდენტი მიხეილ სააკაშვილი პოლიტიკურ პატიმრად მოიხსენია.
• იუსტიციის სამინისტრომ გამოაქვეყნა მინისტრი რატი ბრეგაძის პასუხი ევროპარლამენტარ ანა ფოტიგას წერილზე, საიდანაც ჩანს, რომ მინისტრი გააღიზიანა  ევროპარლამენტარის წერილში “პოლიტიკური პატიმრის” ხსენებამ და მას სააკაშვილის მონახულებაზე უარი უთხრა.
• მიხეილ სააკაშვილის ექიმმა, ნიკოლოზ ყიფშიძემ თქვა, რომ 13 ნოემბერი იყო პირველი დღე,  როდესაც სააკაშვილი ლოგინიდან არ ამდგარა.

14 ნოემბერი

• საქართველოს პარლამენტში 9 პარლამენტარმა შიმშილობა დაიწყო. მათი მთავარი მოთხოვნა მიხეილ სააკაშვილის სამოქალაქო კლინიკაში გადაყვანა იყო.
• საქართველოს პარლამენტთან გაიმართა მოძრაობა „სირცხვილიას“ ორგანიზებული საპროტესტო აქცია. აქციის მოთხოვნა ვადამდელი საპარლამენტო არჩევნების ჩატარება სრულად პროპორციული საარჩევნო სისტემით და საქართველოს ყოფილი პრეზიდენტის მიხეილ სააკაშვილის მრავალპროფილურ საავადმყოფოში გადაყვანა იყო.
• სპეციალურმა პენიტენციურმა სამსახურმა გაავრცელა ვიდეო – N18 სამკურნალო დაწესებულების მთავარი ექიმი, მანანა ელეფტეროვა ამბობს, რომ ექსპრეზიდენტის სიცოცხლეს საფრთხე არ ემუქრება.
• სამედიცინო ასოციაციების გაერთიანებამ განცხადება გაავრცელა და მიხეილ სააკაშვილის პოლიპროფილურ კლინიკაში გადაყვანა მოითხოვა.

15 ნოემბერი

• საქართველოს ყოფილმა პრემიერ-მინისტრმა გიორგი კვირიკაშვილმა განცხადება გაავრცელა. წერდა, რომ მიხეილ სააკაშვილი სახელმწიფომ უნდა უზრუნველყოს იმ სტანდარტის სამედიცინო მომსახურებით, რომელსაც მისი მკურნალი ექიმები ითხოვენ.
• ექს-პრეზიდენტის შვილმა, ედუარდ სააკაშვილმა ვიდეომიმართვა გაავრცელა, რომელშიც ოჯახის სახელით ხელისუფლებას სთხოვა სააკაშვილის სამოქალაქო კლინიკაში გადაყვანა.
• „ერთიანი ნაციონალური მოძრაობამ“ 15 ნოემბერს სააკაშვილის სამოქალაქო მრავალპროფილურ საავადმყოფოში გადაყვანის მოთხოვნით კიდევ ერთი საპროტესტო აქცია გამართა.
• მიხეილ სააკაშვილმა ციხიდან წერილი გაავრცელა, სადაც წერდა, რომ 3 დღე თითქმის არ ამდგარა საწოლიდან. აქციის შემხედვარეს კი ენერგია მიეცა.

16 ნოემბერი

• უკრაინის სახალხო დამცველი ლიუდმილა დენისოვა მიხეილ სააკაშვილთან არ შეუშვეს.
• იუსტიციის მინისტრმა, რატი ბრეგაძემ განაცხადა, რომ გლდანში, ციხის მე-18 სამკურნალო დაწესებულებაში, უკრაინის სახალხო დამცველი ლუდმილა დენისოვა მიხეილ სააკაშვილის მოსანახულებლად თავად სააკაშვილის ჯანმრთელობაზე ზრუნვის მოტივით არ შეუშვეს.
• სახალხო დამცველმა ექსპრეზიდენტ მიხეილ სააკაშვილისთვის სპეციალური პენიტენციური სამსახურის მიერ მიწოდებული სამედიცინო მომსახურების ადეკვატურობისა და დროულობის მონიტორინგის მიზნით მულტიპროფილური სამედიცინო ექსპერტთა ჯგუფი მოიწვია.
• სახალხო დამცველი ნინო ლომჯარია გლდანის მე-18 სამკურნალო დაწესებულებაში ექიმებთან ერთად მივიდა. ლომჯარიას თქმით, ექიმებს მისი რწმუნება აქვთ. შესაბამისად, ისინი პატიმრობაში მყოფი მიხეილ სააკაშვილის მონახულებას ნებისმიერ დროს შეძლებენ.

17 ნოემბერი

• ექიმებმა საქართველოში ევროკავშირის წარმომადგენლობას წერილით მიმართეს და ყოფილი პრეზიდენტის სამოქალაქო საავადმყოფოში გადაყვანაში დახმარება სთხოვეს.
• „ქართული ოცნების” თავმჯდომარემ, ირაკლი კობახიძემ განაცხადა, რომ უნდობლობას უცხადებს სახალხო დამცველის ეგიდით შექმნილ მულტიპროფილურ სამედიცინო ჯგუფს.
• საპატრიარქოს საზოგადოებასთან ურთიერთობის სამსახურის უფროსმა, დეკანოზმა ანდრია ჯაღმაიძემ განაცხადა, რომ ექსპრეზიდენტ მიხეილ სააკაშვილის სამოქალაქო კლინიკაში გადაყვანის საკითხი საპატრიარქოს კომპეტენცია არ არის და ამ თემაზე პატრიარქთან არ უმსჯელიათ.
• გლდანის ციხესთან ექს-პრეზიდენტ მიხეილ სააკაშვილის სამოქალაქო საავადმყოფოში გადაყვანის მოთხოვნით ქალების აქცია გაიმართა სლოგანით – „არ მოგაკვლევინებთ“.
• სახალხო დამცველის მიერ შექმნილმა მულტიპროფილურ ექსპერტთა ჯგუფმა ყოფილი პრეზიდენტის ჯანმრთელობის მდგომარეობის შესახებ დასკვნა კონსენსუსის საფუძველზე მოამზადა და სააკაშვილის მულტიპროფილურ კლინიკაში გადაყვანის რეკომენდაცია გასცა.

 18 ნოემბერი

• „ქართული ოცნების“ თავმჯდომარემ ირაკლი კობახიძემ განაცხადა,  რომ ომბუდსმენს მიხეილ სააკაშვილის „გამოხსნა“ სურს და იცის, რომ გლდანის მე-18 დაწესებულებიდან ამას ვერ შეძლებს. კობახიძის შეფასებით, ნინო ლომჯარიასთვის მიხეილ სააკაშვილი ნესტან-დარეჯანია.
• მიხეილ სააკაშვილის ადვოკატმა ბექა ბასილაიამ, რომელიც მსჯავრდადებულ ექსპრეზიდენტთან ციხეში იმყოფებოდა, განაცხადა, რომ მიხეილ სააკაშვილი წაიქცა და საკაცით აიყვანეს.

 19 ნოემბერი

• აშშ-ის სახელმწიფო დეპარტამენტმა გაავრცელა განცხადება და საქართველოს მთავრობას მოუწოდა, გაითვალისწინოს სახალხო დამცველის რეკომენდაცია ყოფილი პრეზიდენტის მკურნალობასთან დაკავშირებით, ასევე, უზრუნველყოს მიხეილ სააკაშვილის დასწრება სასამართლო სხდომებზე.
• მიხეილ სააკაშვილი დღეს გორის სამხედრო ჰოსპიტალში უნდა გადაიყვანონ.

ბელგიაში ელისო ბოლქვაძის და მისი თანმხლები პირების ვიზიტისთვის ბიუჯეტიდან 18 655 ლარი დაიხარჯა. საჯარო ინფორმაცია „ბათუმელებს“ პარლამენტიდან მოაწოდეს.

პარლამენტის კულტურის კომიტეტის თავმჯდომარე, ელისო ბოლქვაძე და მისი მოადგილე ირაკლი მეზურნიშვილს სამუშაო შეხვედრები ბელგიაში, ბრიუსელში 4 ნოემბერს ჰქონდათ. საჯარო ინფორმაციაში არ მოგვაწოდეს დეტალური ინფორმაცია, კიდევ ვინ ახლდა ელისო ბოლქვაძეს ბრიუსელში და რამდენ დღეს გაგრძელდა ვიზიტი.

ელისო ბოლქვაძეს ბრიუსელიდან ფოტოები 2-5 ნოემბერს აქვს გამოქვეყნებული.

პარლამენტიდან მოწოდებული საჯარო ინფორმაციის მიხედვით, კონკრეტულად ელისო ბოლქვაძის მივლინებისთვის 7073.73 ლარი დაიხარჯა, ხოლო ირაკლი მეზურნიშვილისთვის – 5811.09 ლარი.

საჯარო ინფორმაციაში აღნიშნულია ისიც, რომ შესაძლოა უფრო მეტიც დაიხარჯა ბიუჯეტიდან ელისო ბოლქვაძის ბრიუსელში ვიზიტისთვის.

„კოვიდტესტების, ან/და კოვიდდაზღვევის მოთხოვნის გათვალისწინებით შესაძლებელია მოხდეს მივლინების თანხების კორექტირება მივლინების დამადასტურებელი დოკუმენტაციის საფუძველზე, რაც გამოიწვევს მივლინების ხარჯების ცვლილებას [ზრდას, ან კლებას]“, – მოგვწერეს პარლამენტის აპარატიდან.

პარლამენტი არ განმარტავს, რატომ მოგვაწოდეს ინფორმაცია 18 ნოემბერს 8 ნოემბრის მდგომარეობით.

ბრიუსელიდან დაბრუნებულმა ელისო ბოლქვაძემ დღეს, 19 ნოემბერს პარლამენტში განაცხადა, რომ ევროპული პრესა „დიდ დარტყმას აყენებს საქართველოს იმიჯს“ და  საჭიროა ბერკეტების შექმნა ამ საკითხის მოსაგვარებლად.

მოსამართლე ირმა ტოგონიძემ გაამართლა თამარ კურატიშვილი, რომელიც ბათუმში, სუსის შენობასთან დააკავეს 13 ნოემბერს მაშინ, როცა ის ვიდეოს იღებდა.

მოსამართლემ “სირცხვილიას” ბათუმის ორგანიზაციის ხელმძღვანელი გაამართლა როგორც წვრილმანი ხულიგნობის, ასევე პოლიციელების კანონიერი მოთხოვნის დაუმორჩილებლობის ნაწილში.

მოსამართლემ ხაზი გაუსვა ვიდეომტკიცებულებას, სადაც ჩანს, რომ თამარ კურატიშვილი გზის სავალი ნაწილიდან ტროტუარზე გადადის და ამ დროს მას პოლიციელები ეუბნებიან, რომ ვიდეო არ გადაიღოს.

“არ გამიგია შეურაცხყოფა და ცუდი სიტყვა,” – აღნიშნა მოსამართლემ სამართალდარღვევის ოქმის ჩანაწერის პასუხად – პოლიციელების მტკიცებით, მათ თამარ კურატიშვილმა “დაგეშილი ძაღლები” უწოდა.

“ალბათ, გაასაჩივრებთ,” – მიმართა მოსამართლემ პოლიციელს, რეზო ხარაზს, ვიდრე ის სასამართლო სხდომის დარბაზს დატოვებდა.

____

ამ თემაზე:

იუსტიციის მინისტრის, რატი ბრეგაძის განცხადებით, იუსტიციის სამინისტრო მიხეილ სააკაშვილის გიორგი აბრამიშვილის სახელობის სამხედრო ჰოსპიტალში გადაყვანას სთავაზობს.

ამის შესახებ ბრეგაძემ დღეს, 19 ნოემბერს, განაცხადა იუსტიციის სამინისტროში გამართულ ბრიფინგზე.

„ვთავაზობთ, რომ გადავიყვანოთ გიორგი აბრამიშვილის სახელობის თავდაცვის სამინისტროს სამხედრო ჰოსპიტალში.

ეს არის ადგილი, სადაც მისი ჯანმრთელობა და უსაფრთხოებამ სახელმწიფოს მხრიდან მაქსიმალურად იქნება დაცული. ამ გადაწყვეტილებით ჩვენ ვიცავთ არა მხოლოდ მიხეილ სააკაშვილის, არამედ სხვა ადამიანების ჯანმრთელობას და სიცოცხლეს, რომლებიც ახლა შიმშილობენ.

მკურნალობის კურსის დასრულების შემდეგ მას გადაიყვანენ რუსთავის #12 დაწესებულებაში”, – განაცხადა ბრეგაძემ.

საქართველოს ყოფილი პრეზიდენტი, მიხეილ სააკაშვილი, 50 დღეა შიმშილობს.

გუშინ, 18 ნოემბერს, ცნობილი გახდა, რომ ჯანმრთელობის მდგომარეობის გაუარესების გამო ის გლდანის ციხის რეანიმაციულ განყოფილებაში გადაიყვანეს, მან გონება დაკარგა.

სააკაშვილი ამბობდა, რომ შიმშილობას შეწყვეტდა სამოქალაქო საავადმყოფოში გადაყვანის შემთხვევაში.

საქართველოს სახალხო დამცველი მესამე პრეზიდენტის, მიხეილ სააკაშვილის ჯანმრთელობის მდგომარეობაზე კიდევ ერთ განცხადებას აკეთებს, მე-18 დაწესებულებაში ექსპერტთა ჯგუფის დამატებითი ვიზიტის შემდეგ.

„სახალხო დამცველის მიერ შექმნილ სპეციალისტთა/ექსპერტთა ჯგუფის მიერ მიხეილ სააკაშვილთან დაკავშირებით პროგნოზირებად ერთ-ერთ კლინიკურ დამძიმებას გუშინ უკვე ჰქონდა ადგილი. გართულებული მდგომარეობის ადგილზე გაცნობის შემდეგ, ექსპერტთა ჯგუფის წევრებმა კიდევ ერთხელ დაადასტურეს, რომ აუცილებელია დაუყოვნებლივ მოხდეს მიხეილ სააკაშვილის გადაყვანა პოლიპროფილურ, მაღალტექნოლოგიურ ჰოსპიტალში.

მიუხედავად იმისა, რომ სახალხო დამცველის მიერ შექმნილ სპეციალისტთა/ექსპერტთა ჯგუფმა 17 ნოემბრის დასკვნით, პაციენტის მდგომარეობა შეაფასა როგორც კრიტიკული და მძიმე გართულებების პროგნოზი გააკეთა, რეკომენდაციების გაუთვალისწინებლობის შედეგად, მიხეილ სააკაშვილს განუვითარდა ერთ-ერთი ყველაზე მძიმე გართულება – ვერნიკეს ენცეფალოპატიით გამოწვეული გულყრა.

ამ პერიოდში თავის ტვინში მიმდინარე კეროვანი პროცესების სრულფასოვანი შეფასებისთვის საჭიროა თავის მრტ/მრა კვლევა, მრ ვენოგრაფის ჩათვლით. რეკომენდებულია ასევე ეეგ კვლევა. ექსპერტთა სხვა დეტალური რეკომენდაციები უშუალოდ მიეწოდა დაწესებულების მთავარ ექიმს.

მდგომარეობის კრიტიკულობიდან და მოსალოდნელი გართულებების გათვალისწინებით, სახალხო დამცველი და ექსპერტთა ჯგუფი კიდევ ერთხელ მოუწოდებს იუსტიციის მინისტრს/სპეციალურ პენიტენციურ სამსახურს, დაუყოვნებლივ მოხდეს მიხეილ სააკაშვილის გადაყვანა შესაბამის ფუნქციურად გამართულ და დიდი გამოცდილების მქონე პოლიპროფილურ ჰოსპიტალში, რადგანაც სახეზეა უფრო საშიში გართულების – ვერნიკეს ენცეფალოპათიით გამოწვეული ეპილეფსიური სტატუსის ან კომის განვითარების მაღალი ალბათობა, რაც შესაძლოა ლეტალური შედეგით დასრულდეს“ – ნათქვამია სახალხო დამცველის მიერ გავრცელებულ განცხადებაში.

გუშინ, 18 ნოემბერს, მოშიმშილე მიხეილ სააკაშვილმა ადვოკატებთან შეხვედრის დროს რამდენიმე წუთით გონება დაკარგა.

ხელისუფლებას საზოგადოების ნაწილი, პოლიტიკოსები, დასავლელი პარტნიორები მოუწოდებენ, რომ სააკაშვილი დროულად გადაიყვანონ შესაბამის კლინიკაში, თუმცა ხელისუფლება უარზეა.

ამერიკის შეერთებული შტატების ელჩს საქართველოში, კელი დეგნანს, ჟურნალისტებმა ჰკითხეს, რას ეტყვის ის ელენე ხოშტარიას დედას, რომელმაც დღეს დიპლომატიური კორპუსის წარმომადგენლებს მიმართა. „ყველა საერთაშორისო ორგანიზაციას და ყველა საელჩოს მივმართავ, სასწრაფოდ მიიღეთ ზომები… დღეს ჩემი შვილის, ელენე ხოშტარიას სიცოცხლე საფრთხეშია“, – განაცხადა დღეს ელენე ხოშტარიას დედამ.

„რა თქმა უნდა, ჩვენ ძალიან გვაღელვებს ქალბატონი ელენეს [ხოშტარია] ჯანმრთელობის მდგომარეობა. ვიცით, რომ უკვე ორი კვირაა შიმშილობს და მას მიაჩნია, რომ თავისი ქმედებით ხელს შეუწყობს ქვეყნის გრძელვადიან სტაბილურობას. ის იმედოვნებს, რომ შეძლებს ხალხის დაახლოებას და იმ ძალიან ღრმა პოლარიზაციის გადალახვას, რაც ასე უშლის ქვეყანას, აფერხებს ქვეყნის განვითარებას. აი, ამისათვის მიმართავს უკიდურეს ზომას.

თუმცა ასევე ძალიან მნიშვნელოვანია, რომ მან და ასევე ყველა მოშიმშილემ იზრუნოს საკუთარი ჯანმრთელობის მდგომარეობაზე, უარი არ თქვან წამლების მიღებაზე.

გვესმის, რომ ეს ყველაფერი განპირობებულია საკუთარი მოსაზრებით, რწმენით… თუმცა უარი არ უნდა თქვან სამედიცინო მომსახურებაზე.

როგორც დიპლომატიურ კორპუსის წარმომადგენელი გეტყვით, რომ ჩვენი მხრივ, ვაკეთებთ ყველაფერს იმისათვის, რომ ეს პრობლემები, საკითხები მალე გადაიჭრას. შეიძლება ჩვენი საქმიანობის დიდი ნაწილი არ ჩანდეს, საზოგადოებისთვის არ იყოს ცნობილი, თუმცა ჩვენ ძალისხმევას არ ვიშურებთ იმისათვის, რომ ეს საკითხები გადაიჭრას“.

___

ელენე ხოშტარია მე-16 დღეა შიმშილობს. მან დღეს განაცხადა, რომ „აჩერებს მედიკამენტოზურ მკურნალობას“. ელენე ხოშტარია სააკაშვილის მარვალპროფილურ კლინიკაში გადაყვანას ითხოვს. ექსპრეზიდენტი მიხეილ სააკაშვილი 50 დღეა შიმშილობს.

სახალხო დამცველი და ექსპერტთა ჯგუფი კიდევ ერთხელ მოუწოდებს იუსტიციის მინისტრს და სპეციალურ პენიტენციურ სამსახურს, დაუყოვნებლივ გადაიყვანონ მიხეილ სააკაშვილი შესაბამის ფუნქციურად გამართულ და დიდი გამოცდილების მქონე პოლიპროფილურ ჰოსპიტალში, რადგანაც სახეზეა უფრო საშიში გართულების – ვერნიკეს ენცეფალოპათიით გამოწვეული ეპილეფსიური სტატუსის ან კომის განვითარების მაღალი ალბათობა. ეს, შესაძლოა, ლეტალური შედეგით დასრულდეს.

19 ნოემბრის მონაცემებით, გასულ 24 საათში აჭარაში კორონავირუსის 155 ახალი შემთხვევა დადასტურდა.

დღეის მონაცემებით, აჭარის კოვიდკლინიკებშია 540 პაციენტი, კოვიდსასტუმროში იმყოფება 230 ინფიცირებული.

19 ნოემბრის მონაცემებით, საქართველოში კოვიდის 4278 ახალი შემთხვევა დადასტურდა, 63 პაციენტი გარდაიცვალა.

19 ნოემბრის მონაცემებით, საქართველოში დადასტურდა კოვიდის 4 278 ახალი შემთხვევა. ჩატარდა 51 298 ტესტი კორონავირუსზე.

გასულ 24 საათში 63 პაციენტი გარდაიცვალა კოვიდით.

19 ნოემბრის მონაცემებით, დადებითობის დღიური მაჩვენებელია 8,34%, ბოლო 14 დღის – 9,52, ბოლო 7 დღის – 8,99%.

დღეს ქვეყანაში გამოვლენილი ინფიცირების 4 278 ახალი შემთხვევიდან თბილისში გამოვლენილია 1 749 შემთხვევა, აჭარაში – 155, იმერეთში – 715, ქვემო ქართლში – 273, შიდა ქართლში – 412, გურიაში – 109, სამეგრელო – ზემო სვანეთში -334, კახეთში – 267, მცხეთა-მთიანეთში – 110, სამცხე-ჯავახეთში – 114, რაჭა-ლეჩხუმსა და ქვემო სვანეთში – 40.

დღეის მონაცემებით, კოვიდკლინიკებში იმყოფება 6 490 ინფიცირებული.

დღეს, 18 ნოემბერს, ბათუმში ახალი საკრებულოს ოპოზიციურმა წევრებმა ერთობლივი განცხადება გააკეთეს. ისინი ამბობენ, რომ უფლებას არ მისცემენ ძველი მოწვევის საკრებულოს 2022 წლის ბიუჯეტი დაამტკიცოს. ბრიფინგზე არ იმყოფებოდნენ „გახარია საქართველოსთვის“ დეპუტატები, თუმცა „ბათუმელებთან“ აკაკი გვიანიძემ განაცხადა, რომ იზიარებენ პოზიციას სხდომის ჩანიშვნის ხელოვნურად გაჭიანურების შესახებ.

„ბათუმში მიმდინარეობს უპრეცედენტო დანაშაულებრივი მოქმედებები „ქართული ოცნების“ მხრიდან. ეს გამოიხატება იმაში, რომ არალეგიტიმური, ძველი მოწვევის საკრებულო ცდილობს რიგგარეშე სხდომებზე დაამტკიცოს ახალი წლის ბიუჯეტი. ბათუმის ათეულობით ქონება გადასცა უკვე აჭარის მთავრობას – ცდილობენ გაძარცვონ ქალაქის ბიუჯეტი.

არც ერთი მუნიციპალური არჩევნების შემდეგ თვე-ნახევარი არ დასჭირვებია იმას, რომ ახალი მოწვევის საკრებულოს პირველი სხდომა გამართულიყო. ახლა ვხედავთ, რომ არალეგიტიმური მუნიციპალური საკრებულო იღებს გადაწყვეტილებებს, რაზეც შემდეგ პოლიტიკურ პასუხისმგებლობას გადმოაბარებენ ოპოზიციას, რომელიც წარმოდგენილია 60 პროცენტზე მეტი მხარდაჭერით ბათუმის საკრებულოში.

ჩვენ ვდგავართ ცენტრალურ საარჩევნო კომისიასთან, რადგან სწორედ მათ ვაკისრებთ პოლიტიკურ და სამართლებრივ პასუხისმგებლობას არსებულ რეალობაზე და ვამბობთ, რომ სასწრაფოდ, მყისიერად ჩაინიშნოს საკრებულოს ახალი მოწვევის პირველი სხდომა და მიანიჭოს უფლებამოსილება იმ ადამიანების, ვისაც ნდობა გამოუცხადა ბათუმის 60 პროცენტზე მეტმა.

ფიზიკურად, პოლიტიკურად, სამართლებრივად ჩვენ ამას მივაღწევთ. გამორიცხულია, სულიკო თებიძის საკრებულო ვერ დაამტკიცებს 2022 წლის ბიუჯეტს“, – ამბობს ირაკლი კუპრაძე, „ლელოს“ წარმომადგენელი აჭარაში. ის ბათუმის ახალი საკრებულოს წევრია.

ირაკლი კუპრაძის თქმით, სხდომის ჩანიშვნის გაჭიანურება რამდენიმე პროცესს უკავშირდება:

„პირველი ეს არის ბიუჯეტის გაფლანგვა, რადგან ცდილობენ ბათუმის ქონება გადასცენ აჭარის მთავრობას და შემდეგ კერძო კომპანიებს. ეს არის დანაშაული და მათ მოუწევთ ამაზე პასუხისგება. ეს არის ბიუჯეტი, რომელიც ახალმა მოწვევამ უნდა დაამტკიცოს. შესაბამისად, პოლიტიკური და სამართლებრივი პასუხისმგებლობაც უნდა აიღოს ახალი მოწვევის საკრებულომ.

მეორეა ის, რომ „ქართულ ოცნებას“ სჭირდება დამატებითი დრო მოისყიდოს, დაემუქროს და დააშანტაჟოს ოპოზიციის წევრები – ვიღაც გადაიბირონ უმრავლესობის შესაქმნელად. ამიტომ ძლიერდება ზეწოლა და მოსყიდვის მცდელობა ოპოზიციური წევრების მიმართ“, – ამბობს კუპრაძე.

„ნაციონალური მოძრაობის“ წევრი ნოდარ დუმბაძეც მიიჩნევს, რომ ძველ საკრებულოს მომდევნო წლის ბიუჯეტის დამტკიცების შესაძლებლობა არ უნდა მიეცეს.

ბათუმის 2022 წლის ბიუჯეტს მოქმედი საკრებულო განიხილავს – რატომ?

„კანონში წერია მარტივად, რომ თუ ახალი მოწვევის საკრებულო სამჯერ ჩააგდებს ბიუჯეტს და არ დაამტკიცებს, მაშინ დაინიშნება ვადამდელი არჩევნები. ამიტომ „ქართული ოცნება“ ცდილობს ბიუჯეტი ძველ საკრებულოს დაამტკიცებინოს, რომ მერის რიგგარეშე არჩევნები არ დაინიშნოს.

ჩვენ მოვუწოდებთ ცესკოს, ხელისუფლებას, დროულად ჩაინიშნოს სხდომა, რადგან შევძლოთ საკრებულოს ახალმა წევრებმა ვიმსჯელოთ 2022 წლის ბიუჯეტზე და არა ძველმა, რომელსაც უკვე გაუვიდა ვადა“, – ამბობს ნოდარ დუმბაძე.

მისი თქმით, თუ ახალი საკრებულოს სხდომა დროულად არ დაინიშნა, ოპოზიცია ყველაფერს გააკეთებს, რომ ძველი მოწვევის საკრებულომ ბიუჯეტი ვერ დაამტკიცოს.

„ჩემი დაჭერაც რომ მოუხდეთ, ამის უფლებას მაინც არ მივცემ“, – ამბობს ნოდარ დუმბაძე.

ბათუმის საოლქო საარჩევნო კომისიასთან გაკეთებულ განცხადებას უერთდება „ლელო“, „სტრატეგია აღმაშენებელი“, „ნაციონალური მოძრაობა“, „გირჩი მეტი თავისუფლება“ და „დროა“.

იგივე პოზიცია აქვთ „გახარია საქართველოს“ წარმომადგენლებსაც.

ცესკომ ადგილობრივი თვითმმართველობის არჩევნების შემაჯამებელი ოქმი 12 ნოემბერს გამოაქვეყნა. კანონის თანახმად, ცესკოს აქვს უფლება საკრებულოს პირველი სხდომა 12 დეკემბრამდე დანიშნოს.

___________________________________

მთავარი ფოტო: ბათუმის ახალი მოწვევის საკრებულოს ოპოზიციონერი წევრები

„ამბასადორი ბათუმმა“ ბულვარში მშენებარე პროექტის მეჩვიდმეტე, უკანონო სართულზე კოლონები ჩამოასხა და ხიმინჯები ამოიყვანა. ეს იმას ნიშნავს, რომ ამ სართულსაც გადახურავს – ანუ მეთვრამეტეს. არადა, როცა უკანონოდ ააშენეს მე-17 სართული, კომპანიის წარმომადგენელი გვარწმუნებდა, ეს ბოლოა, ვჩერდებით და ესეც სახურავზე ვერტმფრენის დასაჯდომად დაგვჭირდაო.

არავინ იცის სინამდვილეში რამდენი სართულის მშენებლობას გეგმავს ბათუმის ძველ ბულვარში რუსეთის მოქალაქეების კომპანია, მიუხედავად იმისა, რომ მშენებლობა ძეგლის ტერიტორიაზე მიმდინარეობს და ამ ძეგლს ბევრი ოფიციალური პატრონი ჰყავს.

ბულვარის, როგორც ძეგლის დაცვა, პირველ რიგში, აჭარის კულტურული მემკვიდრეობის სააგენტოს ევალება, რომელმაც ძეგლის ტერიტორიაზე 16-სართულიანი კომპლექსის მშენებლობის ნებართვა გასცა და თანაც ამას მშენებლობა კი არა, რესტავრაცია-რეაბილიტაციის პროექტი დაარქვა.

ბულვარზე პასუხისმგებელია აჭარის მთავრობა, კერძოდ კი, ფინანსთა და ეკონომიკის სამინისტრო, ასევე ბულვარის ადმინისტრაცია, რომელიც სამინისტროს დაქვემდებარებაში მუშაობს.

ბულვარის ადმინისტრაციას უფლება არ აქვს შეაჩეროს მშენებლობა, თუმცა მინიმუმ უნდა ხედავდეს კანონდარღვევას საკუთარ ტერიტორიაზე და როგორც სახელმწიფოს ერთ-ერთი უწყება, რომელსაც ძეგლი აბარია, ვალდებულია უფლებამოსილ უწყებას აცნობოს გადაცდომის შემთხვევაში, თუნდაც სავარაუდო დარღვევის შესახებ.

ბულვარის მოვლა-პატრონობაზე პასუხისმგებელია ბათუმის მერია, როგორც ქონების მესაკუთრე და საკრებულო, როგორც მერიის მაკონტროლებელი, არჩეული ორგანო. თუმცა ამდენ უწყებას ერთად, როგორც ჩანს, არ შეუძლია დიდი ფულის მფლობელის შეჩერება – ისინი ვერ/არ იცავენ ბულვარს უხეში ჩარევისგან, მინიმუმ უკანონო მშენებლობისგან.

წინა გადაცდომის დაფიქსირებისას, როცა შენობას უკანონო, მეჩვიდმეტე სართული დაადგეს, სააგენტომ კომპანია 10 000 ლარით დააჯარიმა და სასამართლოში იჩივლა. სასამართლომ ეს მოთხოვნა დააკმაყოფილა. სააგენტომ სასამართლოში არ მოითხოვა, კომპანიას მშენებარე ობიექტი პროექტის შესაბამისობაში მოეყვანა. კომპანია ამის თაობაზე „გააფრთხილეს“, ოფიციალური წერილით.

„ამის უფლება არ გვაქვს, მაგრამ შეგვიძლია უნებართვო სამუშაოების გაგრძელების შემთხვევაში, ყოველ ექვს თვეში ჯარიმა გავასამმაგოთო“, – გვითხრეს მაშინ სააგენტოში.

სააგენტოში განგვიმარტეს ისიც, რომ კომპანია იძულებული იქნება თავად მოშალოს უკანონო სართული, რადგან შენობას ექსპლუატაციაში ვერ მიიღებენ. თუმცა არსებობს მეორე გზაც, კომპანია პროექტის ცვლილებით მიმართავს ნებართვის გამცემს. ამ დრომდე არსებული პრაქტიკის გათვალისწინებით, მას თანხმობის მიღება არ გაუჭირდება.

გასულ კვირას კომპანიის წარმომადგენელს, გოჩა კამკიას ვკითხეთ, ხომ არ აპირებს „ამბასადორი“ ჯარიმის დაკისრების თაობაზე გადაწყვეტილების გასაჩივრებას. მან გვითხრა, რომ კომპანია ჯარიმას გადაიხდის, რაც შეეხება გადაცდომებს და უკანონო სართულს – ამაზე არ გვიპასუხა.

აშკარაა, რომ კომპანიამ სტრატეგია შეცვალა – ექვს თვეში, ვიდრე ჯარიმის გასამმაგების დრო არ მოვა, კიდევ რამდენიმე სართულის აშენებას შეძლებს [არავინ იცის, რამდენი სართულის აშენებას გეგმავს], შემდეგ კი მიმართავს სააგენტოს პროექტის ცვლილებით.

თუმცა, ისეთი მაღალბიუჯეტიანი კომპანიისთვის, როგორიც „ამბასადორი ბათუმია“,  არც გასამმაგებული და არც გაათმაგებული ჯარიმის გადახდა იქნება პრობლემა.

,,ამბასადორმა” ბულვარში უკანონო მშენებლობა თვითმმართველობის არჩევნების მოახლოებისთანავე შეაჩერა და არჩევნების დასრულებისთანავე განაახლა.

ბულვარში 16-სართულიანი მშენებლობის ნებართვის გაცემას ბათუმში მოქალაქეები აქციებით აპროტესტებდნენ, თუმცა

უშედეგოდ.

გარემოსდაცვითი ზედამხედველობის დეპარტამენტის ცნობით, სენაკში მიწის ნაყოფიერი ფენის მოხსნის ფაქტი გამოავლინეს.

„სენაკის მუნიციპალიტეტის სოფელ ახალსოფელში, მოქალაქე მიწის ნაყოფიერი ფენის მოხსნასა და გადაადგილებას ახორციელებდა. შედგა შესაბამისი აქტი“ – წერს დეპარტამენტი.

ნიადაგის ნაყოფიერი ფენის მოხსნის შემთხვევაში, სუბიექტი ვალდებულია, საქართველოს გარემოსა და ბუნებრივი რესურსების დაცვის სამინისტროში შესათანხმებლად წარმოადგინოს რეკულტივაციის გეგმა/პროექტი ან ინფორმაცია კონსერვაციის შესახებ ადგილმდებარეობისა და ნიადაგის მოცულობის მითითებით.

მიწის ნაყოფიერი ფენის მოხსნა ნებართვის გარეშე ადმინისტრაციულ სამართალდარღვევათა კოდექსის მიხედვით ჯარიმდება.

რეჟისორების – კირა კოვალენკოსა და ალექსანდრა როდნიანსკის გადაღებულმა ფილმმა “მუშტების გაშლა” კანის კინოფესტივალის პრიზი მიიღო და „ოსკარზეა“ ნომინირებული.

ფილმი ოჯახზეა, რომლის დესპოტი მამაც სამ თითქმის ზრდასრულ შვილს აკონტროლებს. მამა შვილებს სახლის გასაღებსაც კი არ აძლევს და პასპორტს უმალავს გოგოს, ქალაქში წასვლა და ოპერაციის გაკეთება რომ ვერ შეძლოს.

ფილმის მთავარი გმირი სწორედ ეს შვილია – ადა, რომელსაც ოპერაცია წარსულის ტრავმების გამო აუცილებლად სჭირდება.

მას ისე სურს გაექცეს მამის ზედმეტ „მზრუნველობას“, რომ სთავაზობს ძმებს დატოვონ ის მარტო მაშინაც კი, როცა ცუდადაა. ადას მიაჩნია, რომ თუ მამა მოკვდება, პრობლემა თავად მოგვარდება.

ჩრდილოეთ ოსეთსა და დე ფაქტო სამხრეთ ოსეთში კრიტიკოსთა ნაწილი ფიქრობს, რომ ოსკარზე ნომინირებული ფილმი ოსეთს „გააშავებს“.

კრიტიკოსთა ნაწილმა და ოსურმა მედიამ ნამუშევარი წარმოაჩინა სურათად, რომელიც რუსეთის საპატრიარქოს – „ჩრდილოეთ კავკასიის გულს“ ესხმის თავს. როგორც ამას, მაგალითად ოსი ბლოგერი ანტონ დოლინა უწოდებს რუსეთის საპატრიარქოს.

ფილმის პრემიერა ვლადიკავკაზში შედგა.

ჩრდილოეთ ოსეთში ფილმის მიმართ ურთიერთსაწინააღმდეგო დამოკიდებულება აქვთ. პროტესტის ნიშნად ხალხის ნაწილი ფილმის სანახავად არ მიდის, ვინც ნახა – მოსწონს.

ძირითად პრეტენზიად ფილმს უყენებენ იმას, რომ გამიზნულადაა გამოყენებული კავკასიური პატრიარქატის თემა კავკასიის, როგორც თითქმის ველური გარემოს წარმოსაჩენად.

კრიტიკოსთა მეორე ნაწილის მოსაზრებით ეს ზედაპირული შეფასებაა და სინამდვილეში ფილმი სულ სხვა პრობლემას ეხება.

წამოცდენილი სიტყვების მეშვეობით ფილმის დასასრულს კვანძი იხსნება და მაყურებელი მამის დესპოტიზმის მიზეზს იგებს.

მისი გადაჭარბებული მზრუნველობა, შვილების გამოკეტვა სახლში და ბევრი სხვა მსგავსი რამ ბესლანის ტერაქტის შედეგია. ცოლი ამ კაცმა ტრაგედიის დღეს დაკარგა. შვილი, ადა კი ამავე დღეს დაზიანდა. მამის დესპოტიზმამდე მისული ძალისხმევის მიზეზი შვილების სიცოცხლის გადაჭარბებული შიშია.

მამა ფიქრობს, რომ შვილებისთვის ერთადერთი უსაფრთხო ადგილი, ბესლანის ტრაგედიის შემდეგ, სახლია. გარესამყარო კი, რომელმაც მისი ოჯახი დააზიანა, სახიფათო და საშიშია, მეტიც – არც კი სურს იქ მისმა შვილებმა ფეხი გადგან, ასე შეიძლება კიდევ უფრო დიდ უბედურებას ემსხვერპლონ.

„მუშტების გაშლა“ – ახალგაზრდა, დამწყები ოსი რეჟისორების ფილმია, რომლებმაც კინოსარეჟისორო ფაკულტეტი ახლახან დაამთავრეს.

ფილმში მთავარ როლებს ასრულებენ მსახიობები: მალინა აგუზაროვა, ალიკ კარაევი, სოსლან ხუგაევი, ხეტაგ ბიბილოვი, არსენ ხეთაგუროვი და მალინა პაგიევა.

დღეს, 18 ნოემბერს, ბათუმის რუსთაველის სახელობის სახელმწიფო უნივერსიტეტის პროფესორებმა საპროტესტო აქცია გამართეს და  განაცხადეს, რომ ისინი შეშფოთებული არიან ქვეყანაში შექმნილი პოლიტიკური დაძაბულობით, ასევე მესამე პრეზიდენტის, მიხეილ სააკაშვილის ჯანმრთელობის მდგომარეობით. პროფესორები მოითხოვენ, რომ ხელისუფლებამ დროულად გადაიყვანოს მოშიმშილე მიხეილ სააკაშვილი მაღალტექნოლოგიურ, სამოქალაქო კლინიკაში.

„ამ ქვეყანაში დაცული უნდა იყოს ადამიანის სიცოცხლის და ჯანმრთელობის უფლება. ეს არის სახელმწიფოს პოზიტიური ვალდებულება, ეს ყველა სახელმწიფომ უნდა უზრუნველყოს, მათ შორის საქართველოს მთავრობამ.

სახალხო დამცველის მიერ შექმნილი ექიმთა კონსილიუმის დასკვნით, ცნობილი გახდა, რომ მესამე პრეზიდენტის ჯანმრთელობის მდგომარეობა არის კრიტიკული. მათი რეკომენდაციაა, რომ გადაიყვანონ ის შესაბამის კლინიკაში. ამიტომ ჩვენც მოვითხოვთ იმავეს, გადაიყვანონ სააკაშვილი დაუყოვნებლივ“, – ამბობს მალხაზ ნაკაშიძე.

ამავე უნივერსიტეტის კიდევ ერთი პროფესორი კახა სურგულაძე მიიჩნევს, რომ დღევანდელი ქმედებებით ხელისუფლება ემსგავსება პუტინისა და ლუკაშენკოს მთავრობას.

„ერთხელ და სამუდამოდ უნდა შეწყდეს საქართველოში გამოცხადებული სიკვდილის პროპაგანდა. თუ ჩვენ გვინდა ვიყოთ ევროპა, მაშინ სხვა გზით უნდა წავიდეთ და არა პუტინის რუსეთის და ლუკაშენკოს ბელორუსიის გზით. ჩვენ ამ ქმედებით, რასაც ახლა ვაკეთებთ ყოფილი პრეზიდენტის მიმართ, ევროპას უარს ვეუბნებით. მე არ მინდა ჩვენს შვილებს ჰქონდეთ ისეთი ქვეყანა, როგორიც არის რუსეთი ან ბელორუსი“.

აჭარის უმაღლესი საბჭოს ყოფილი თავმჯდომარე და უნივერსიტეტის პროფესორი მიხეილ მახარაძეც მიიჩნევს, რომ სააკაშვილის ჯანმრთელობა და სიცოცხლე უნდა იყოს დაცული.

„აქ არ არის მხოლოდ სააკაშვილის საავადმყოფოში გადაყვანაზე საუბარი, ქვეყანა არის ძალიან მძიმე მდგომარეობაში და სააკაშვილის საკითხმა კიდევ უფრო მეტად გამოააშკარავა ეს. სამი დღის წინ 75 წლის გავხდი და მსგავსი რამ არც ფაშისტების დროს წამიკითხავს. მთელი ერი უნდა ადგეს ფეხზე და მოითხოვოს სააკაშვილის ჯანმრთელობის უსაფრთხოება“, – ამბობს ის.

ოთარ ცეცხლაძის თქმით, სოციალურ ქსელში შექმნილია პეტიციის ტექსტი და ვისაც სურს, რომ დაცული იყოს მესამე პრეზიდენტის ჯანმრთელობა და გადაიყვანონ ის შესაბამის კლინიკაში, შეუძლია ელექტრონულად მოაწეროს ხელი.

მათივე თქმით, პეტიციაზე ხელის მოწერა შეუძლიათ როგორც უნივერსიტეტში დასაქმებულ პირებს, ასევე სტუდენტებსაც – ელექტრონულად და ასევე ბეჭდური სახით.

„როდესაც ქვეყანა ასეთ მდგომარეობაშია და მესამე პრეზიდენტის სიცოცხლე ეგზისტენციალური საფრთხის წინაშეა, როდესაც შეიქმნა კონსილიუმი და თითქმის ყველა ამბობს, რომ გლდანის მე-18 დაწესებულებაში არ არის არც სამედიცინო პერსონალის კვალიფიციური გუნდი, არც ლაბორატორიული კვლევის საშუალებები, სააკაშვილის სიცოცხლე არის საფრთხეში. ამიტომ ჩვენ მოვითხოვთ დაუყოვნებლივ გადაიყვანონ სააკაშვილი მულტიპროფილურ კლინიკაში, სადაც შესაძლებელი იქნება მისი გამოჯანმრთელება და რეაბილიტაცია“, – ამბობს ოთარ ცეცხლაძე.

ოთარ ცეცხლაძის თქმით, თუ ეს ასე არ მოხდება, შესაძლოა მივიღოთ ფატალური შედეგი და არავინ იცის ქვეყანა კიდევ რა გამოწვევის წინაშე დადგება: „ის დაპირისპირება, რაც არის პოლიტიკურ პარტიებს შორის, პიროვნებებსა და საზოგადოებას შორის, კიდევ უფრო გამწვავდება და შესაძლოა ქვეყანა მიიყვანოს სრულ კოლაფსამდე“.

____

ამავე თემაზე: