ბათუმში, ცენტრალურ ქუჩებზე ქვაფენილს აყრიან და ისევ ასფალტს დააგებენ. ბათუმის მერია გეგმავს, რომ მომავალი წლისთვის დააგოს ასფალტის საფარი ფარნავაზ მეფის, ასევე ვახტანგ გორგასლის ქუჩებზე, ბარათაშვილის ქუჩიდან გრიბოედოვამდე მონაკვეთში, ასევე ამ ქუჩების დაერთებებზე გორგილაძის ქუჩამდე.
ამ სამუშაოებისთვის მერია ბიუჯეტიდან დაახლოებით 8 მილიონ ლარს დახარჯავს. მერიის პრესცენტრის ინფორმაციით, ამის შესახებ ბათუმის ბუჯეტის პროექტში წერია.
ბათუმის მერიაში თვლიან, რომ ასფალტ-ბეტონის საფარით ქვაფენილის ჩანაცვლება მოაგვარებს საცობების პრობლემას. ეს არგუმენტი მაგალითად, გუშინ ბათუმის საქალაქო ინფრასტრუქტურის და კეთილმოწყობის სამმართველოს უფროსის მოადგილემ, აკაკი ბერიძემ დაასახელა 2022 წლის ბათუმის ბიუჯეტის პროექტის საჯარო განხილვის დროს.
„უფრო მეტი საპარკინგე სივრცე იქნება და უფრო ადვილი იქნება გადაადგილება. მოწესრიგდება სანიაღვრე ქსელი,“ – აღნიშნა მოსახლეობასთან შეხვედრის დროს აკაკი ბერიძემ.
ნიშნავს თუ არა საპარკინგე სივრცის გაზრდა ტროტუარების ისევ შევიწროებას და რატომ ჩათვალა ბათუმის მერიამ, რომ ეს სჭირდება ქალაქს? – კითხვებით ბათუმის მერიის კეთილმოწყობის სამმართველოს მივმართეთ.
აქ გვითხრეს, რომ პასუხისმგებელ პირებს კომენტარისთვის ჯერ არ სცალიათ. ისინი დღის განმავლობაში ბიუჯეტის პროექტის საჯარო განხილვებს ესწრებოდნენ.
ინფრასტრუქტურის და კეთილმოწყობის სამმართველოს პრესცენტრის ინფორმაციით, დასახელებულ ქუჩებზე ქვაფენილის ნაცვლად ასფალტის საფარის დასაგებად მერია 8 მილიონი ლარის დახარჯვას აპირებს.
