Batumelebi | ბათუმში საახალწლო ღონისძიებები არ გაიმართება ბათუმში საახალწლო ღონისძიებები არ გაიმართება – Batumelebi
RU | GE  

ბათუმში საახალწლო ღონისძიებები არ გაიმართება

ბათუმის მერიის ინფორმაციით, ბათუმში ტრადიციული საახალწლო ღონისძიებები არც 31 დეკემბრის ღამეს გაიმართება და არც შემდეგ დღეებში. დაიდგმება მხოლოდ ნაძვის ხე და განათდება რამდენიმე ქუჩა, რისთვისაც ბიუჯეტში 503 ათასი ლარია გათვალისწინებული. აქედან 60 ათასი ლარი ქუჩების განათებისთვის არის გამოყოფილი.

„503 ათას ლარში შედის როგორც ნაძვის ხის მონტაჟი-დემონტაჟი, ასევე განათებები. ვცვლით მხოლოდ იმ განათებებს, რაც შარშან დაზიანდა. წელს გავანათებთ მხოლოდ ნინოშვილის და რუსთაველის ქუჩას, ასევე განათდება ცენტრალური მაგისტრალი თამარის დასახლებაში. ჭავჭავაძისა და პუშკინის ქუჩას წელს ვეღარ გავანათებთ“, – ამბობს ბათუმის მერიის კეთილმოწყობის სამმართველოს ხელმძღვანელი, სულხან ევგენიძე.

რაც შეეხება კულტურულ ნაწილს, როგორც მერიაში აცხადებენ, კულტურული ღონისძიებები არ ჩატარდება. წელს, პანდემიიდან გამომდინარე, არც საახალწლო ბაზრობები მოეწყობა. ქალაქის მთავარი ნაძვის ხე ამჯერადაც ბულვარში, შადრევნების წინ დაიდგმება.

„ამ დროისთვის ზუსტად არ ვიცით რა თანხა გამოთავისუფლდება ბიუჯეტში. თუმცა, ეს თანხები მიმართული იქნება სოციალურ პროგრამებზე“, – აცხადებენ ბათუმის მერიაში.

___

ნახევარი მილიონი ბათუმის საახალწლოდ განათებაში, როცა ღამით გადაადგილება აკრძალულია

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com