Batumelebi | ბათუმის საკრებულომ სხდომა 25 ნოემბერს ჩანიშნა ბათუმის საკრებულომ სხდომა 25 ნოემბერს ჩანიშნა – Batumelebi
ნეტგაზეთი • RU

ბათუმის საკრებულომ სხდომა 25 ნოემბერს ჩანიშნა

25 ნოემბერს ბათუმის საკრებულომ სხდომა ჩანიშნა, თუმცა საკრებულოში ამ დროისთვის არ აზუსტებენ, განხილული იქნება თუ არა სხდომაზე 2022 წლის ბიუჯეტის პროექტი.

როგორც საკრებულოში ამბობენ, პროექტი ჯერ ისევ კომისიებში განიხილება. დღეს, 19 ნოემბერს, ქალაქის მთავარ ფინანსურ დოკუმენტს საფინანსო-საბიუჯეტო კომისია განიხილავს,  საბოლოო დასკვნას პროექტის ვიზირებაზე სწორედ ეს კომისია ამზადებს.

„ეს იქნება შემაჯამებელი განხილვა, ყველა შენიშვნა აქ მოიყრის თავს და შემდეგ მერიაში გადავაგზავნით,“ – განმარტა ზურა ნაკაიძემ, ბათუმის საკრებულოს საფინანსო-საბიუჯეტო კომისიის თავმჯდომარემ.

კითხვაზე, შესაძლოა თუ არა ბიუჯეტი 25 ნოემბერს ჩანიშნულ სხდომაზე დასამტკიცებლად გაიტანონ, ზურა ნაკაიძე პასუხობს, რომ ჯერ არ იცის:

„თუ დამტკიცდება, მე გამიხარდება, ქალაქის ინტერესებიდან გამომდინარე. ვნახოთ, რა მოხდება, რამდენად ბევრია შენიშვნა“. იგი ბიუჯეტის პროექტით კმაყოფილია: „წელს ძალიან მაღალი ბიუჯეტი შემოვიდა“.

მომავალ, უკვე არჩეულ საკრებულოს 2022 წლის ბათუმის ბიუჯეტი, სავარაუდოდ, დამტკიცებული დახვდება. ამ საკითხს ბათუმში ბოლო დღეებში აქტიურად განხილავენ, საზოგადოების ერთი ნაწილი დარწმუნებულია, რომ მერია ჩქარობს, რათა ბიუჯეტი მოქმედ საკრებულოს დაამტკიცებინოს და არა ახალარჩეულს, რადგან ახალ საკრებულოში „ოცნება“ უმრავლესობაში არ არის.

ამავე თემაზე: 

ბათუმის 2022 წლის ბიუჯეტს მოქმედი საკრებულო განიხილავს – რატომ?

 

ნეტგაზეთის მასალების სხვა გამოცემებში გადაბეჭდვის წესი
ავტორი