Batumelebi | 18 655 ლარი ელისო ბოლქვაძისა და მისი თანმხლები ჯგუფის ბელგიაში ვიზიტისთვის 18 655 ლარი ელისო ბოლქვაძისა და მისი თანმხლები ჯგუფის ბელგიაში ვიზიტისთვის – Batumelebi
ნეტგაზეთი • RU

18 655 ლარი ელისო ბოლქვაძისა და მისი თანმხლები ჯგუფის ბელგიაში ვიზიტისთვის

ბელგიაში ელისო ბოლქვაძის და მისი თანმხლები პირების ვიზიტისთვის ბიუჯეტიდან 18 655 ლარი დაიხარჯა. საჯარო ინფორმაცია „ბათუმელებს“ პარლამენტიდან მოაწოდეს.

პარლამენტის კულტურის კომიტეტის თავმჯდომარე, ელისო ბოლქვაძე და მისი მოადგილე ირაკლი მეზურნიშვილს სამუშაო შეხვედრები ბელგიაში, ბრიუსელში 4 ნოემბერს ჰქონდათ. საჯარო ინფორმაციაში არ მოგვაწოდეს დეტალური ინფორმაცია, კიდევ ვინ ახლდა ელისო ბოლქვაძეს ბრიუსელში და რამდენ დღეს გაგრძელდა ვიზიტი.

ელისო ბოლქვაძეს ბრიუსელიდან ფოტოები 2-5 ნოემბერს აქვს გამოქვეყნებული.

პარლამენტიდან მოწოდებული საჯარო ინფორმაციის მიხედვით, კონკრეტულად ელისო ბოლქვაძის მივლინებისთვის 7073.73 ლარი დაიხარჯა, ხოლო ირაკლი მეზურნიშვილისთვის – 5811.09 ლარი.

საჯარო ინფორმაციაში აღნიშნულია ისიც, რომ შესაძლოა უფრო მეტიც დაიხარჯა ბიუჯეტიდან ელისო ბოლქვაძის ბრიუსელში ვიზიტისთვის.

„კოვიდტესტების, ან/და კოვიდდაზღვევის მოთხოვნის გათვალისწინებით შესაძლებელია მოხდეს მივლინების თანხების კორექტირება მივლინების დამადასტურებელი დოკუმენტაციის საფუძველზე, რაც გამოიწვევს მივლინების ხარჯების ცვლილებას [ზრდას, ან კლებას]“, – მოგვწერეს პარლამენტის აპარატიდან.

პარლამენტი არ განმარტავს, რატომ მოგვაწოდეს ინფორმაცია 18 ნოემბერს 8 ნოემბრის მდგომარეობით.

ბრიუსელიდან დაბრუნებულმა ელისო ბოლქვაძემ დღეს, 19 ნოემბერს პარლამენტში განაცხადა, რომ ევროპული პრესა „დიდ დარტყმას აყენებს საქართველოს იმიჯს“ და  საჭიროა ბერკეტების შექმნა ამ საკითხის მოსაგვარებლად.

ნეტგაზეთის მასალების სხვა გამოცემებში გადაბეჭდვის წესი
ავტორი