„თუ 90-95%-ზე ავიყვანთ პირბადის ტარების მაჩვენებელს, პირველ იანვრამდე შეიძლება 200 ადამიანის სიცოცხლე გადავარჩინოთ.
იგივე, თუ ყველა ავიცრებით და აცრის მაჩვენებელს გავზრდით, სერიოზულად შევამცირებთ და შევაკავებთ ეპიდემიის შემდგომ გავრცელებას. ყოველი 500 სრულად აცრილი ადამიანი არის 1 გადარჩენილი სიცოცხლე” – ამბობს დაავადებათა კონტროლისა და საზოგადოებრივი ჯანმრთელობის ეროვნული ცენტრის (NCDC) ხელმძღვანელი ამირან გამყრელიძე სპეციალურ ვიდეომიმართვაში.
მისივე თქმით, რეგულაციებში ყველაზე მნიშვნელოვანი პირბადის ტარება რჩება ყველგან – დახურულ და ღია სივრცეებში. ამ დროისთვის პირბადის ტარების მაჩვენებელი 37%-ზეა ჩამოსულია.
ამირან გამყრელიძის განცხადებით, განსაკუთრებული მნიშვნელობა აქვს 60 წელზე ზემოთ მოსახლეობის აცრას, რადგან სიკვდილიანობის 85% ასაკოვან მოსახლეობაში ფიქსირდება.
მისივე თქმით, ბოლო დღეებში ოდნავ გაზრდილია აცრების ყოველდღიური რაოდენობა.
„პირველად აცრილებში მომატებულია 60 წელზე მეტი ასაკის მოსახლეობის წილი. ანუ ეს მონეტარული [ფულადი] წახალისება, რომელიც დაწესდა სახელმწიფოს მიერ, გარკვეულად მუშაობს, მაგრამ უფრო აქტიურადაა საჭირო ამ ადამიანების ჩართვა აცრებში.
დღეს ქვეყანაში დაახლოებით 790 000 ამ ასაკის ადამიანი ცხოვრობს, აქედან აცრილია მხოლოდ 300 000 მდე, სრულად აცრილი ცოტა კიდევ უფრო ნაკლები. ამიტომ საჭიროა დამატებით კიდევ 400-დან 500 ათასამდე ამ ასაკის ადამიანის აცრა. თუ გვექნა ამ ასაკში 80-90%-იანი მოცვა, მაშინ სერიოზულად შევამცირებთ ქვეყანაში კოვიდით სიკვდილიანობას და შესაბამისად გავრცელებას” – ამბობს ამირან გამყრელიძე.
