ორშაბათს, 22 ნოემბერს, ავსტრიაში ლოქდაუნი იწყება კორონავირუსის ახალი შემთხვევების გაზრდის გამო.
ქვეყანაში 10 დღით დაიკეტება მაღაზიების უმრავლესობა, გაუქმდება კულტურული ღონისძიებები. 12 წელს ზემოთ ასაკის, არავაქცინირებულ ადამიანებს ეკრძალებათ გარეთ გასვლა, გარდა იმ შემთხვევებისა, როცა ისინი მიდიან სამსახურში, სკოლაში და აუცილებელ საყიდლებზე.
10 დღის შემდეგ ქვეყნის მთავრობა სიტუაციას შეაფასებს და თუ კი ეპიდსიტუაცია არ შეიცვლება უკეთესობისკენ, ლოკდაუნი კიდევ 10 დღით გაგრძელდება.
„ევრონიუსის“ ცნობით, ბოლო დღეებში ავსტრიაში კოვიდით ინფიცირებულთა რიცხვი მკვეთრად გაიზარდა. გუშინ, 18 ნოემბერს, ქვეყანაში 15 000 ახალი შემთხვევა დადასტურდა. ეს 2021 წელს ავსტრიაში კოვიდით ინფიცირების დღიური ყველაზე მაღალი მაჩვენებელია.
ასევე დღეს, 19 ნოემბერს, ცნობილი გახდა, რომ ავსტრიაში პირველი თებერვლიდან იწყება სავალდებულო ვაქცინაცია კოვიდზე. „ევრონიუსის“ ცნობით, ავსტრიის მოსახლეობის დაახლოებით 64 პროცენტია აცრილი კოვიდზე, რაც ერთ-ერთი ყველაზე დაბალი მაჩვენებელია დასავლეთ ევროპაში.
