Batumelebi

ახალშობილი, რომელიც დედამ კლინიკა „მედინას“ საპირფარეშოში მარტომ გააჩინა, ისევ რეანიმაციაშია.

როგორც კლინიკაში „ბათუმელებს“ უთხრეს, დღეს ჩაატარეს კონსილიუმი სპეციალისტებთან თბილისში და დაგეგმილია რამდენიმე ოპერაციის ჩატარება.

„უმძიმესი მდგომარეობაა. ახლა გვქონდა ჩართვა თბილისში წამყვან სპეციალისტებთან, რამდენიმე სპეციალისტი ჩამოვა, მაგრამ მდგომარეობა არის ძალიან მძიმე, თერმოდინამიკას წამლებით ვიჭერთ“ – თქვა კლინიკა „მედინას“ დირექტორმა, ჯუმბერ უნგიაძემ „ბათუმელებთან“.

მისი თქმით, ახალშობილს რამდენიმე ოპერაცია უნდა ჩაუტარდეს, ეტაპობრივად.

„ახლა გვქონდა კონსილიუმი საქართველოს ჯანდაცვის სამინისტროსთან და ვცდილობთ, გამოვნახოთ ყველა გზა, რომ ახალშობილი გამოვიყვანოთ ამ მდგომარეობიდან“ – ამბობს ჯუმბერ უნგიაძე.

მისი თქმით, ახალშობილის დედაც კლინიკაში რჩება და მისი ჯანმრთელობის მდგომარეობა დამაკმაყოფილებელია.

ბათუმში, კლინიკა „მედინას“ თანამშრომელმა ფარულად იმშობიარა ტუალეტში და ახალშობილს, სავარაუდოდ, დაზიანებები მიაყენა.

შემთხვევის შესახებ გუშინ, 22 თებერვალს გახდა ცნობილი.

ჯუმბერ უნგიაძის თქმით, ბავშვის დედა რეანიმაციის განყოფილებაში, სანიტრის პოზიციაზე მუშაობდა.

შს სამინისტროს ცნობით, მომხდარ ფაქტზე გამოძიება დაწყებულია სისხლის სამართლის კოდექსის 11 პრიმა 19-109-ე მუხლის თანახმად, რაც ახალშობილის განზრახ მკვლელობის მცდელობას გულისხმობს.

დღეს, 23 თებერვალს, ბათუმში 4028 აბონენტს ბუნებრივი გაზი არ მიეწოდება.

როგორც კომპანია „სოკარში“ გვითხრეს, ბუნებრივი აირის მიწოდება საგზაო სამუშაოების გამო შეწყდა.

„ავარიული დაზიანების გამო ბუნებრივი გაზი არ მიეწოდება 26 მაისის, მემედ აბაშიძის, ვაჟა-ფშაველას, კოტე მარჯანიშვილის, დავით კლდიაშვილის, რუსთაველის, ნინოშვილის ქუჩაზე მცხოვრებ აბონენტებს.

ბუნებრივი აირის მიწოდება აღდგება ეტაპობრივად 23 თებერვალს 13:00 საათიდან და დასრულდება დღის ბოლომდე“ – განაცხადეს „სოკარში“.

კომპანია აფრთხილებს აბონენტებს, რომ დაკეტილ მდგომარეობაში იქონიონ გაზის ონკანები.

აჭარის „ოცნების“ მთავრობის თავმჯდომარის, სულხან თამაზაშვილის სახელი მედიაში ნიკო კვარაცხელიას მკვლელობის საქმესთან კავშირში გაჟღერდა.

22 წლის ნიკო კვარაცხელია 2021 წელს მოკლეს თბილისში. ამ დროს სულხან თამაზაშვილი თბილისის პოლიციის უფროსი იყო.

ახალგაზრდა კაცის მკვლელობიდან ერთ თვეში დააკავეს ორი პირი, რომელთაც უკვე პატიმრობა აქვთ მისჯილი, მაგრამ ნიკო კვარაცხელიას მკვლელობის საქმე 2026 წლის თებერვალში ისევ აქტუალური გახდა და საქმეში გამოჩნდა მოწმე, რომელიც ამბობს, რომ მაშინდელი თბილისის პოლიციის უფროსი, სულხან თამაზაშვილი იმ მაღალჩინოსნებს შორის იყო, რომელთაც მოისმინეს ნიკო კვარაცხელიას მკვლელის აღიარებითი ჩვენება, რომელშიც დასახელებული იყო მკვლელობის დამკვეთიც, თუმცა საქმეში მკვლელობის დამკვეთების ვინაობა მიჩქმალეს.

• ვინ არის მოწმე, რომელიც თამაზაშვილს ასახელებს

მოწმე, რომელმაც სულხან თამაზაშვილი დაასახელა, როგორც პირი, რომელსაც ინფორმაცია ჰქონდა, თუ ვინ იყო ნიკო კვარაცხელიას მკვლელობის დამკვეთი, ყოფილი პოლიციელი,  წყნეთის პოლიციის ყოფილი უფროსი, დიმიტრი ქვაჭრელიშვილია.

სწორედ დიმიტრი ქვაჭრელიშვილმა დააკავა 2021 წელს აკო ჭელიძე და გიორგი კავილაძე, რომლებსაც ნიკო კვარაცხელიას მკვლელობისთვის 17 და 16 წლით პატიმრობა აქვთ მისჯილი.

დიმიტრი ქვაჭრელიშვილი ამჟამად პატიმარია. იგი 2024 წელს დააკავეს უფლებამოსილების გადამეტებისა და ქრთამის აღების ბრალდებით და 15-წლიანი პატიმრობა აქვს მისჯილი. ამჟამად მისი საქმის განხილვა სააპელაციო სასამართლოში მიმდინარეობს.

ნიკო კვარაცხელიას საქმე მისი მკვლელობიდან 5 წლის შემდეგ, 2026 წლის თებერვალში ისევ გააქტიურდა. კერძოდ, პროკურატურამ განაცხადა, რომ ნიკო კვარაცხელიას მკვლელობის შემკვეთები ე.წ. კანონიერი ქურდის შვილები, ძმები კაკულიები და ბუსა ჟვანია [ყოფილი პრემიერის, ზურაბ ჟვანიას შვილი] იყვნენ.

პროკურატურის ამ განცხადების შემდეგ დიმიტრი ქვაჭრელიშვილმა თქვა, რომ მზად იყო, გამოძიებისთვის მიეწოდებინა მის ხელთ არსებული ინფორმაცია ნიკო კვარაცხელიას მკვლელობის საქმეზე.

• რას ჰყვება წყნეთის ყოფილი პოლიციის უფროსი 

დიმიტრი ქვაჭრელიშვილმა 19 თებერვალს მისცა ჩვენება. 21 თებერვალს ტელეკომპანიებმა: „ფორმულამ“ და „პირველმა“ მოამზადეს ვრცელი სიუჟეტები ამ ჩვენების შესახებ.

ამ სიუჟეტების თანახმად, ყოფილმა პოლიციელი გამოძიებას დეტალურად უამბო, რა ხდებოდა ნიკო კვარაცხელიას მკვლელობაში ბრალდებულების, აკო ჭელიძისა და გიორგი კავილაძის დაკავების ღამეს წყნეთის პოლიციის განყოფილებაში, 2021 წელს.

კერძოდ, დიმიტრი ქვაჭრელიშვილის ადვოკატმა, თორნიკე მიგინეიშვილმა „ტვ პირველს“ უთხრა, რომ როგორც მისი დაცვის ქვეშ მყოფი ჰყვება, მკვლელობაში ბრალდებულების, ჭელიძისა და კავილაძის დაკავების დროს პოლიციის განყოფილებაში იმყოფებოდნენ და ბრალდებულების აღიარებითი ჩვენება პირადად მოისმინეს: სულხან თამაზაშვილმა – თბილისის პოლიციის მაშინდელმა უფროსმა; კახა მურადაშვილმა – თბილისის პოლიციის დეპარტამენტის უფროსის მოადგილემ; კახაბერ სირაძემ – თბილისის მკვლელობების მთავარი სამმართველოს უფროსმა და გელა ქურდაძემ – თბილისის პოლიციის დეპარტამენტის ძველი თბილისის სამმართველოს უფროსმა.

ადვოკატის თქმით, ქვაჭრელიშვილს, ნიკო კვარაცხელიას მკვლელობაში ბრალდებულებმა, დაკავების ღამეს, წყნეთის პოლიციაში, სამართალდამცავებს დეტალურად უთხრეს, რატომ მოკლეს ნიკო კვარაცხელია, სად იმალებოდნენ, რა იყო მათი ფინანსური სარგებელი და ა.შ. ადვოკატის თქმით, წყნეთის პოლიციის ყოფილი უფროსი ამბობს, რომ მის მიერ დაკავებულმა აკო ჭელიძემ და გიორგი კავილაძემ თავიდანვე დაასახელეს ძმები კაკულიები და ბუსა ჟვანია და ეს მოისმინა სულხან თამაზაშვილმაც და მეტიც, მან აღიარებითი ჩვენების ვიდეოც გადაიღო. 

ასევე, დიმიტრი ქვაჭრელიშვილი ამბობს, რომ მას შემდეგ, რაც სულხან თამაზაშვილმა დაკავებულების აღიარებითი ჩვენება მოისმინა, ის სატელეფონო კავშირზე იყო ვინმე „ანზორიჩთან“.

ყოფილი პოლიციელი ვერ აკონკრეტებს „ანზორიჩის“ ვინაობას, თუმცა „შაბათის ფორმულა“ ვარაუდობს, რომ შესაძლოა საუბარია „ოცნების“ ყოფილ მთავარ პროკურორზე, ოთარ ფარცხალაძეზე, რომელსაც ამჟამად ეძებენ.

თუ ყოფილი პოლიციელის ჩვენება დადასტურდება, ეს ნიშნავს, რომ სულხან თამაზაშვილი ჯერ კიდევ 5 წლის წინ იყო ინფორმირებული, ვინ იყვნენ ნიკო კვარაცხელიას მკვლელობის დამკვეთები და ეს მიჩქმალა, პოლიციის სხვა მაღალჩინოსნებთან ერთად. 

• რა უპასუხა სულხან თამაზაშვილმა ბრალდებას 

21 თებერვალს, მას შემდეგ, რაც ქვაჭრელიშვილის ჩვენების შესახებ სიუჟეტების ანონსები ეთერში გავიდა, სხვა დროს სიტყვაძუნწმა სულხან თამაზაშვილმა საკმაოდ ვრცელი კომენტარი მისცა ჟურნალისტებს ამ თემაზე.

თამაზაშვილი კატეგორიულად უარყოფს, რომ კავშირი ჰქონდა ფარცხალაძესთან, ამბობს, რომ მას საერთოდ არ იცნობს, ხოლო წყნეთის პოლიციის ყოფილ უფროსს ცრუ მოწმეს უწოდებს. იგი მიიჩნევს, რომ „საკითხი ამოწურულია“.

„ჩვენებაში არის საუბარი, მე ვესაუბრე ოთარ ფარცხალაძეს. სრული პასუხისმგებლობით მინდა დავაფიქსირო, რომ მე ამ ადამიანს არ ვიცნობ, მეტიც, არასდროს არ შევხვედრივარ, არასდროს მქონია კომუნიკაცია ცხოვრებაში, არც სატელეფონო და არც პირადი.

ასევე, ზოგადად ამ მოვლენის მიმართ ჩვენების და მისი ავტორის, ეგრეთ წოდებულ ცრუ მოწმის მიმართ მაქვს ამბივალენტური დამოკიდებულება. მე მახსოვს ეს ადამიანი, იყო მართლაც წყნეთის პოლიციის უფროსი. ის, სამწუხაროდ, დააკავეს ქრთამის აღებისა და უფლებამოსილების გადამეტების ფაქტზე. ერთი მხრივ, მის მიმართ მხოლოდ სიბრალულის ემოცია მაქვს, ხოლო მეორე მხრივ, ეს ცრუ ჩვენება გარდაცვლილის დედის მდგომარეობას ალბათ უფრო დაამძიმებდა, რასაც რეალურად განვიცდი.

შევეხები ზოგადად ამ სისხლის სამართლის საქმეს. კარგად მახსოვს, რა თქმა უნდა, ძალიან შემზარავი და მძიმე ფაქტი იყო, თუმცა დანაშაული მყისიერად გაიხსნა, დანაშაულის ჩადენის დღეს, იმ დღესვე დანაშაულის ჩამდენი პირები იყვნენ იდენტიფიცირებულები. მოგვიანებით, დაახლოებით ორი დღის შემდეგ ისინი მიეცნენ პასუხისგებაში და დაახლოებით ერთი თვის შემდეგ ისინი უკვე ძებნის სტატუსით იქნენ დაკავებულები.

მათმა ინტერესების დამცველმა, ადვოკატმა დუმილის უფლება გამოაყენებინა, შესაბამისად გამოძიებასთან არ ითანამშრომლეს, თუმცა გამოძიება აქტიურად მუშაობდა დანაშაულის ორგანიზატორების გამოვლენის და მხილების მიზნით და საკმარისი, შესაბამისი მტკიცებულებები შექმნილი იყო იმ ეტაპზეც.

ასევე, მინდა გითხრათ, რომ ის პირები, ვისაც წარედგინათ ბრალი ამ დანაშაულის ჩადენის ორგანიზებისთვის [გულისხმობს ძმებ კაკულიებს], დაკავებული იყო სწორედ ჩემი ხელმძღვანელობის, ქალაქის პოლიციის ხელმძღვანელობის პერიოდში, სხვა დანაშაულის ჩადენისთვის. მკვლელობიდან დაახლოებით 7-8 თვის შემდეგ.

აქედან გამომდინარე, აქ დანაშაულის „ჩაფარცხვაზე“ და რაღაც „დახმარებაზე“ ლაპარაკი მე მგონი არასერიოზულია და ეს საკითხი მე ვთვლი, რომ ამოწურულია“, – თქვა სულხან თამაზაშვილმა.

• რას ამბობს საქმის პროკურორი 

ნიკო კვარაცხელიას მკვლელობის საქმის პროკურორი, გია შაიშმელაშვილი „შაბათის ფორმულასთან“ ამბობს, რომ ბუსა ჟვანიას შესახებ ჩანაწერები საქმეში ჯერ კიდევ 5 წლის წინ იყო, თუმცა საქმისთვის კლასიფიკაციის მიცემას – შეკვეთილი განზრახ მკვლელობა, დრო დასჭირდა.

მისივე თქმით, ბუსა ჟვანიას, რომელზეც ძებნა გამოცხადდა, ოფიციალურად საქართველოს საზღვარი არ გადაუკვეთია.

პროკურორის განმარტებით, ჟვანიაზეა ჯერ შიდა ძებნაა გამოცხადებული, ხოლო თუ დარწმუნდებიან, რომ უცხოეთში იმყოფება, საერთაშორისო ძებნასაც გამოაცხადებენ.

„ჩვენი ინფორმაციით, მას საქართველოს საზღვარი დატოვებული არ აქვს, მაგრამ ყველა მიმართულებით მიმდინარეობს ოპერატიული საგამოძიებო მოქმედებები მისი ადგილსამყოფლის დადგენის თაობაზე.

მას შემდეგ… თუ გამოიკვეთება, რომ იგი არ იმყოფება საქართველოში და მიმალულია ქვეყნის ფარგლებს გარეთ, მიღებული იქნება გადაწყვეტილება მის მიმართ საერთაშორისო ძებნის გამოცხადების თაობაზე”, – აცხადებს პროკურორი.

ბუსა ჟვანიას პატიმრობა დაუსწრებლად შეუფარდეს 18 თებერვალს.

რაც შეეხება ნიკო კვარაცხელიას მკვლელობის ორგანიზებაში ბრალდებულ ძმებ კაკულიებს – ისინი სხვა დანაშაულის გამო პატიმრობაში არიან, მათ 9 წელი აქვთ მისჯილი. ძმები კაკულიები ნიკო კვარაცხელიას საქმეზე წარდგენილ ბრალს არ ეთანხმებიან.

• რატომ განახლდა ნიკო კვარაცხელიას მკვლელობის საქმე 5 წლის შემდეგ 

ნიკო კვარაცხელიას მკვლელობის საქმე გააქტიურდა 2026 წლის თებერვალში, მას შემდეგ, რაც მოკლული ახალგაზრდის დედამ, იზა ომაძემ, საჯაროდ განაცხადა, რომ ქუჩაში გამოდის სამართლის საძიებლად, რადგან მისი შვილის მკვლელობის ორგანიზატორები არ არიან დაკავებული.

მოკლული ახალგაზრდის დედის განცხადებიდან რამდენიმე დღეში პროკურატურამ ნიკო კვარაცხელიას მკვლელობის საქმეზე ბრალი წარუდგინა ძმებს, დავით და გურამ კაკულიებს და ბესარიონ (ბუსა) ჟვანიას.

ნიკო კვარაცხელიას მკვლელობა ბოლო წლების ერთ-ერთი ყველაზე გახმაურებული საქმეა საქართველოში. ნიკო კვარაცხელია იყო 22 წლის ტექნოლოგიური მეწარმე, პირველი ქართული სოციალური პლატფორმის, Feedc-ის დამფუძნებელი. მას დიდ მომავალს უწინასწარმეტყველებდნენ ტექნოლოგიების სფეროში.

მკვლელობა მოხდა 2021 წლის 15 სექტემბერს, თბილისში, ვერაზე, ანჯაფარიძის ქუჩაზე. ნიკო კვარაცხელიას საკუთარ ავტომობილთან ახლოს, დაახლოებით 10-ჯერ ესროლეს. სათვალთვალო კამერების ჩანაწერებში ჩანდა, როგორ ელოდებოდა მკვლელი მსხვერპლს და როგორ დაცხრილა ის დღისით, ხალხმრავალ ადგილას. ნიკო კვარაცხელია საავადმყოფოში მიყვანის შემდეგ გარდაიცვალა.

აჭარის არალეგიტიმური მთავრობის თავმჯდომარე, სულხან თამაზაშვილი ამბობს, რომ არ იცნობს ქვეყნის ყოფილ გენერალურ პროკურორს, ოთარ ფარცხალაძეს, რომელიც მკვლელობის ორგანიზების ბრალდებით და ქოლცენტრების საქმეზე იძებნება ამჟამად.

საქმე ეხება 2021 წელს ნიკო კვარაცხელიას მკვლელობას, რომელზეც ჩვენება მისცა ამჟამად პატიმრობაში მყოფმა ყოფილმა პოლიციელმა, დიმიტრი ქვაჭრელიშვილმა. ქვაჭრელიშვილი 2021 წელს, კვარაცხელიას მკვლელობის დროს, წყნეთის პოლიციის უფროსი იყო და სწორედ მან დააკავა აკო ჭელიძე და გიორგი კავილაძე – ადამიანები, რომლებსაც კვარაცხელიას მკვლელობისთვის 17 და 16 წლით პატიმრობა აქვთ მისჯილი.

„შაბათის ფორმულას“ ქვაჭრელიშვილმა ციხიდან მისწერა, რომ სულხან თამაზაშვილმა, რომელიც მაშინ თბილისის პოლიციის უფროსი იყო, ოთარ ფარცხალაძეს „ანგარიში ჩააბარა“ – ამის შესახებ „შაბათის ფორმულას“ ანონსშია ნათქვამი. გადაცემა დღეს, 21 თებერვალს გავა ეთერში. 

დღეს, 21 თებერვალს, ჟურნალისტებთან ამ თემაზე სულხან თამაზაშვილმა ისაუბრა. მან კატეგორიულად უარყო, რომ ფარცხალაძეს იცნობს, ხოლო წყნეთის ყოფილ პოლიციის უფროსს, რომელმაც ნიკო კვარაცხელიას საქმეში ბრალდებული დააკავა, ცრუ მოწმე უწოდა.

„ჩვენებაში არის საუბარი, მე ვესაუბრე ოთარ ფარცხალაძეს. სრული პასუხისმგებლობით მინდა დავაფიქსირო, რომ მე ამ ადამიანს არ ვიცნობ, მეტიც, არასდროს არ შევხვედრილვარ, არასდროს მქონია კომუნიკაცია ცხოვრებაში, არც სატელეფონო და არც პირადი.

ასევე, ზოგადად ამ მოვლენის მიმართ ჩვენების და მისი ავტორის, ეგრეთ წოდებულ ცრუ მოწმის მიმართ მაქვს ამბივალენტური დამოკიდებულება. მე მახსოვს ეს ადამიანი, იყო მართლაც წყნეთის პოლიციის უფროსი, ის, სამწუხაროდ, დააკავეს ქრთამის აღებისა და უფლებამოსილების გადამეტების ფაქტზე. ერთი მხრივ მის მიმართ მხოლოდ სიბრალულის ემოცია მაქვს, ხოლო მეორე მხრივ, ეს ცრუ ჩვენება ალბათ გარდაცვლილის დედის მდგომარეობას უფრო დაამძიმებდა, რასაც რეალურად განვიცდი.

შევეხები ზოგადად ამ სისხლის სამართლის საქმეს. კარგად მახსოვს, რა თქმა უნდა, ძალიან შემზარავი და მძიმე ფაქტი იყო, თუმცა დანაშაული მყისიერად გაიხსნა, დანაშაულის ჩადენის დღეს, იმ დღესვე დანაშაულის ჩამდენი პირები იყვნენ იდენტიფიცირებულები, მოგვიანებით, დაახლოებით ორი დღის შემდეგ, ისინი მიეცნენ პასუხისგებაში და დაახლოებით ერთი თვის შემდეგ ისინი უკვე ძებნის სტატუსით იქნენ დაკავებულები.

მათმა ინტერესების დამცველმა, ადვოკატმა დუმილის უფლება გამოაყენებინა, შესაბამისად გამოძიებასთან არ ითანამშრომლეს, თუმცა გამოძიება აქტიურად მუშაობდა დანაშაულის ორგანიზატორების გამოვლენის და მხილების მიზნით და საკმარისი, შესაბამისი მტკიცებულებები შექმნილი იყო იმ ეტაპზეც.

ასევე, მინდა გითხრათ, რომ იმ პირებს, ვისაც წარედგინათ ბრალი, ამ დანაშაულის ჩადენის ორგანიზებისთვის, დაკავებული იყო სწორედ ჩემი ხელმძღვანელობის, ქალაქის პოლიციის ხელმძღვანელობის პერიოდში, სხვა დანაშაულის ჩადენისთვის. მკვლელობიდან დაახლოებით 7-8 თვის შემდეგ. აქედან გამომდინარე, აქ დანაშაულის „ჩაფარცხვაზე“ და რაღაც „დახმარებაზე“ ლაპარაკი მე მგონი არასერიოზულია და  ეს საკითხი მე მიმაჩნია, რომ ამოწურულია“ – თქვა სულხან თამაზაშვილმა.

• რა ხდება?

ნიკო კვარაცხელიას მკვლელობა ბოლო წლების ერთ-ერთი ყველაზე რეზონანსული შემთხვევაა საქართველოში. ნიკო კვარაცხელია იყო 22 წლის ტექნოლოგიური მეწარმე, პირველი ქართული სოციალური პლატფორმის, Feedc-ის დამფუძნებელი. მას დიდ მომავალს უწინასწარმეტყველებდნენ ტექნოლოგიების სფეროში.

მკვლელობა მოხდა 2021 წლის 15 სექტემბერს, თბილისში, ვერაზე, ანჯაფარიძის ქუჩაზე. ნიკოს საკუთარ ავტომობილთან ახლოს დაახლოებით 10-ჯერ ესროლეს. სათვალთვალო კამერების ჩანაწერებში ჩანდა, როგორ ელოდებოდა მკვლელი მსხვერპლს და როგორ დაცხრილა ის დღისით, ხალხმრავალ ადგილას. ნიკო კვარაცხელია საავადმყოფოში მიყვანის შემდეგ გარდაიცვალა.

მკვლელობის შემდეგ სამართალდამცავებმა დაადგინეს ორი ეჭვმიტანილის ვინაობა: აკო ჭელიძე და გიორგი კავილაძე. ისინი შემთხვევის ადგილიდან ნაქირავები მანქანით მიიმალნენ. რამდენიმეკვირიანი ძებნის შემდეგ, პოლიციამ ისინი წყნეთში დააკავა.

ნიკო კვარაცხელიას მკვლელობის საქმე გააქტიურდა 2026 წლის თებერვალში, მას შემდეგ, რაც მოკლული ახალგაზრდის დედამ, იზა ომაძემ, საჯაროდ განაცხადა, რომ ქუჩაში გამოდის სამართლის საძიებლად, რადგან მისი შვილის მკვლელობის ორგანიზატორები არ არიან დაკავებული. ამ განცხადებიდან რამდენიმე დღეში პროკურატურამ ნიკო კვარაცხელიას მკვლელობის საქმეზე ბრალი წარუდგინა ძმებს, დავით და გურამ კაკულიებს, ასევე, გარდაცვლილი პრემიერ-მინისტრის, ზურაბ ჟვანიას ვაჟს, ბესარიონ (ბუსა) ჟვანიას.

ამავე თემაზე: 

სახელმწიფო სერვისების განვითარების სააგენტო განცხადებას ავრცელებს ახალ პასპორტებთან დაკავშირებით.

კერძოდ, ბოლო დღეებია მოქალაქეები აცხადებენ, რომ ახალი პასპორტის აღების შემდეგ მათ იუსტიციის სახლიდან დაუკავშირდნენ და უთხრეს, რომ დოკუმენტი ხარვეზიანია და უნდა გამოცვალონ.

„გავრცელებულ ინფორმაციას, თითქოს ახალ პასპორტებში არსებული ხარვეზის გამო ათობით საქართველოს მოქალაქე საზღვრიდან მოაბრუნეს. ხაზგასმით ვაცხადებთ, რომ აღნიშნული სიმართლეს არ შეესაბამება, მსგავსი რისკები პასპორტების ხარისხთან დაკავშირებით არ არსებობს და მოქალაქეებს ამ მიზეზით გადაადგილების პრობლემები არ შეექმნებათ.

გავრცელებულ კონკრეტულ ერთეულ შემთხვევებს სააგენტო სხვა უწყებებთან ერთად იკვლევს და საჭიროების შემთხვევაში, იღებს შესაბამის ზომებს.

სახელმწიფო სერვისების განვითარების სააგენტო სამუშაო პროცესის ფარგლებში, მუდმივად ახორციელებს მის მიერ გაცემული დოკუმენტების მონიტორინგს. იმ შემთხვევაში, თუ პროცესში, ან შემდგომ ეტაპზე გამოიკვეთება რაიმე სახის საჭიროება, სააგენტო ინდივიდუალურად უკავშირდება თითოეულ მოქალაქეს, რათა უზრუნველყოფილი იქნეს როგორც დოკუმენტების სიზუსტე და უსაფრთხოება, ისე მოქალაქეთა ინტერესების დაცვა.

მონიტორინგისა და პრევენციული ღონისძიებების ფარგლებში, გამოვლენილი საჭიროების შესაბამისად, სააგენტო ინდივიდუალურად დაუკავშირდა მოქალაქეებს ინფორმაციის დაზუსტების მიზნით და შესთავაზა იმავე დღეს, სრულიად უსასყიდლოდ დოკუმენტების ჩანაცვლება.

აღნიშნული პრაქტიკა სრულად შეესაბამება დოკუმენტების მართვისა და უსაფრთხოების დამკვიდრებულ საერთაშორისო სტანდარტებს და წარმოადგენს ხარისხის უზრუნველყოფის პროცესის შემადგენელ ნაწილს. მოცემული მიდგომა მიზნად ისახავს სერვისის მიწოდების ხარისხის მუდმივ გაუმჯობესებასა და მოქალაქეებისთვის სანდო, მაღალი სტანდარტის მომსახურების გაწევას“ – იუწყება სააგენტო.

ამავე თემაზე:

„ოცნების“ პრემიერმა, ირაკლი კობახიძემ პარლამენტში გამოსვლის დროს თქვა, რომ საქართველოში შობადობის კატასტროფული კლების მიზეზი ეკონომიკური და სოციალური პრობლემების კი არა,„მსოფლმხედველობრივი მიზეზია“.

რას ამბობენ მოქალაქეები, მათი აზრით, რა ფაქტორების გამო იკლებს შობადობა? – ნახეთ „ბათუმელების“ ქუჩის გამოკითხვა.

„ნაციონალური მოძრაობის“ წევრი მიშა ბოლქვაძე ამბობს, რომ ორი დღეა შენიშნა, როგორ უთვალთვალებენ მის საცხოვრებელ სახლს უცხო ავტომანქანებიდან. ერთ-ერთი „შკოდას“ მარკის ავტომობილია სანომრე ნიშნით – 403. „მეორეს ნომერი არ მახსოვს“ – ამბობს მიშა ბოლქვაძე „ბათუმელებთან“.

მან თვალთვალის ვიდეოები ფეისბუქზეც გამოაქვეყნა და დაწერა: „ვერც თვალთვალით, ვერც მუქარით, ვერც დაშინებით ვერ გამტეხთ.

როგორც მიშა ბოლქვაძე „ბათუმელებთან“ ამბობს, მის სახლთან არაერთხელ შეუნიშნავს მოთვალთვალეები, თუმცა ეს ძირითადად არჩევნების დროს ან დიდი საპროტესტო აქციების პერიოდში ხდებოდა.

„საარჩევნო პერიოდშიც ყოველთვის დამყვებოდნენ კუდში და ბოლოს, როცა უმაღლეს საბჭოსთან დაკავშირებით ვაკეთებდი განცხადებებს, რომ არ ვაპირებდი შესვლას, მაშინ იყვნენ გააქტიურებულები.

შემდეგ მსგავსი რამ აღარ შემიმჩნევია. თუმცა, გუშინ დილით შევამჩნიე „შკოდა“ ჩემი სახლის წინ, როცა ბავშვები წავიყვანე სკოლაში. სამი შვილი მყავს“, – ამბობს მიშა ბოლქვაძე „ბათუმელებთან“.

მისი თქმით, სახლის წინ უცხო ავტომანქანა შენიშნა მისმა მეუღლემაც და დაუკავშირდა.

„ერთი საათის შემდეგ ისევ განმეორდა, ახლა უკვე სხვა მანქანა იყო მოსული, მაგრამ 5-6 წუთი გაჩერდა მხოლოდ და მერე წავიდა. მერე კიდევ მოვიდა „შკოდა“, მეზობლის მხარეს გადააყენა ავტომანქანა, სახლს უყურებდა და იღებდა რაღაცას“, – ამბობს მიშა ბოლქვაძე.

რას უკავშირებთ ამ თვალთვალს? – ვკითხეთ მას. მიშა ბოლქვაძის აზრით, შესაძლოა ეს უკავშირდებოდეს იმ პროტესტს, რომელიც ქვეყანაშია.

„ყველამ იცის, რომ 11 წელია ბრძოლაში ვარ ოლიგარქის წინააღმდეგ და ახლაც, ყველა ვართ მოლოდინის რეჟიმში, რომ ეს საპროტესტო მოძრაობა განახლდეს და ბოლომდე მივიყვანოთ დაწყებული საქმე. ოპოზიციაც იცით, რომ უკვე აწარმოებს მოლაპარაკებებს ერთმანეთთან და როგორც ადრე, ახლაც ისე ვიქნები პოლიტიკურ პროცესებში ჩართული, თუკი გააქტიურდება“.

მიშა ბოლქვაძე ამბობს, რომ უცხო მანქანებიდან თვალთვალის გამო პოლიციისთვის არ მიუმართავს.

„მე ახალშენის ცენტრალურ ქუჩაზე ვცხოვრობ და არჩევნების დროს ჩემს სახლში მქონდა საარჩევნო შტაბი. მაშინ პოლიციამ ვიდეოკამერები ზუსტად სახლის წინ დამიყენა, ჭიშკრებს უყურებს. წინა შემთხვევებზე არაერთხელ მივმართე პოლიციას, თუმცა რეაქცია არ ჰქონიათ. ამიტომ არ მივმართე ახლა.

ღამის საათებში არ დავკვირვებივარ, მაგრამ დღის საათებში რამდენჯერმე შევნიშნეთ ეს მანქანები. 6 ვიდეო მაქვს უკვე გადაღებული“, – ამბობს მიშა ბოლქვაძე.

მისი თქმით, მას შემდეგ, რაც „ქართულმა ოცნებამ“ არჩევნები გააყალბა და ოპოზიცია პარლამენტში არ შევიდა და არც აჭარის უმაღლეს საბჭოში, იყო მინიშნებები, რომ ქვეყანა დაეტოვებინა.

„მოვისმინე ასეთი „შინაურული“ საუბრები, რომ „ხომ არ ჯობდა შესულიყავი უმაღლეს საბჭოში“, „ახლა ჯობია წახვიდე ქვეყნიდან“, – მეუბნებოდნენ და დარწმუნებული ვარ, ეს ადამიანებიც მოგზავნილები იყვნენ.

არ უნდათ, რომ აქტიური იყო და პატრიოტული სულისკვეთების. თუ არ მიეყიდე, არ მოსწონთ“, – გვითხრა მიშა ბოლქვაძემ.

რა შეიძლება მოიმოქმედონ თქვენ წინააღმდეგ? – ვკითხეთ მას.

„კონფლიქტი არავისთან მქონია, არც ვსვამ და არც რაიმე საშუალებებს ვიყენებ. ზოგადად, პატიოსანი ცხოვრებით ვცხოვრობ და რა ვიცი.

უმაღლეს საბჭოში როცა არ შევედი, „ლეო გრანდში,“ კაზინოში ვმუშაობდი დაცვაში, მაგრამ იქიდანაც გამომიშვეს, არადა, 9 წელი ვიმუშავე ამ ადგილზე. პირდაპირ მითხრა მეპატრონემ, ხელისუფლებასთან პრობლემები არ გვინდაო. სადაც მივდივარ, ყველგან მეუბნებიან, რომ დაბლოკილი ვარ და უარს მეუბნებიან დასაქმებაზე.

რთულია, როცა სამი შვილით უმუშევარს გტოვებენ, ულუკმაპუროდ, მაგრამ მაინც არსად არ ვაპირებ წასვლას.

მამა შშმ პირია, პენსიონერი, ორივე ფეხი მოჭრილი აქვს და მე ვუვლი. მეხმარება სამეგობრო, საძმაკაცო, ხომ იცით, ჩვენთან როგორც ხდება. მეუღლე ბავშვთა საავადმყოფოში მუშაობს ექთანია და რაღაცნაირად გაგვაქვს თავი“, – ამბობს მიშა ბოლქვაძე.

მიშა ბოლქვაძე ხელვაჩაურის მერობის კანდიდატი იყო ოპოზიციური ერთობიდან, უფრო ადრე კი, ხელვაჩაურის საკრებულოს წევრი იყო „ნაციონალური მოძრაობიდან“.

„რუსი სამხედროს და იტარ-ტასის ჟურნალისტის [პროპაგანდისტის] შეურაცხყოფისათვის ვკრძალავთ პარტიასო… „ნაციონალურ მოძრაობას“ რუსი სამხედროს და პროპაგანდისტის შეურაცხყოფის გამო კრძალავენ. ეს ჩემი აზრი არა, უფრო ფაქტზე დაკვირვებაა,“ – ოპოზიციური პარტიების აკრძალვაზე „ოცნების“ სარჩელს ფეისბუქსტატუსით ეხმაურება კონსტიტუციონალისტი გიორგი გოცირიძე. ის ხშირად წარმოადგენს სხვადასხვა მოსარჩელის ინტერესს საკონსტიტუციო სასამართლოში.

„ქართული ოცნება“ ოპოზიციური პოლიტიკური პარტიების აკრძალვას ითხოვს. სარჩელი პარტიების აკრძალვაზე არსებითად განსახილველად ჯერ არ მიუღია საკონსტიტუციო სასამართლოს. ეს სარჩელი 2025 წლის 31 ოქტომბერს დარეგისტრირდა. ამ საქმის განსახილველად სასამართლოს 9-თვიანი ვადა აქვს.

მნიშვნელოვანია, რომ სარჩელს ოპოზიციის აკრძალვაზე განიხილავს მოსამართლე ვასილ როინიშვილიც, რომელიც ენმ-ს ხელისუფლებაში ყოფნის დროს პროკურორი იყო.

გიორგი გოცირიძე ყურადღებას ამახვილებს ვრცელი სარჩელის მხოლოდ ერთ მონაკვეთზე – „ოცნების“ ერთ-ერთ არგუმენტზე, თუ რატომ უნდა აიკრძალოს „ნაციონალური მოძრაობა“:

„2006 წლის ივლისში, ქალაქ სანქტ-პეტერბურგში დაგეგმილი „დიდი რვიანის“ სამიტის გამართვამდე ცოტა ხნით ადრე, საქართველოს იმჟამინდელი თავდაცვის მინისტრის ბრძანებით გაჩერებულ იქნა დიპლომატიური დანიშნულების ავტომობილი, რომელში მყოფ რუსეთის სახმელეთო ძალების მეთაურის მოადგილისა და საქართველოში „იტარ-ტასის“ სპეციალური კორესპონდენტის მიმართ სიტყვიერი და ფიზიკური შეურაცხყოფა განხორციელდა…,“ – აღნიშნულია სარჩელში.

„პოლიტიკურია სარჩელი თავიდან ბოლომდე, სამართლებრივი არგუმენტი ნულია. პოლიტიკურ ნაწილშიც საუბარი რუსი სამხედროს ან „იტარ ტასის“ ჟურნალისტის შეურაცხყოფაზე პარტიის აკრძალვის საფუძველი რატომ უნდა გახდეს?“ – კითხულობს გიორგი გოცირიძე.

სარჩელში „ოცნების“ მიერ ჩაწერილი ეს არგუმენტი ე.წ. წულუკიანის კომისიის დასკვნას ეყრდნობა. წულუკიანის კომისია კი, პირდაპირ და ობიექტურ მტკიცებულებას კი არა ეყრდნობა, გოგა ხაინდრავას მოუყოლია ეს ამბავი:

„არაერთ სხვა მაგალითთან ერთად, გოგა ხაინდრავამ მოიყვანა სახელმწიფო ინტერესის დამაზიანებელი ერთ-ერთი ყველაზე თვალსაჩინო შემთხვევა. 2006 წლის 15 ივლისს, სანქტ-პეტერბურგში დაგეგმილი „დიდი რვიანის“ შეხვედრის წინ, თავდაცვის მინისტრის, ირაკლი ოქრუაშვილის ბრძანებით, საქართველოს ცენტრალური ხელისუფლების მიერ კონტროლირებად ტერიტორიაზე გააჩერეს დიპლომატიური მანქანა, რომელშიც რუსეთის სახმელეთო ჯარების მეთაურის მოადგილე, სამშვიდობო ოპერაციების კურატორი, გენერალი ევნევიჩი, სამშვიდობო ძალების სარდალი რუსეთის მხრიდან, ეუთოს წარმომადგენელი და საინფორმაციო სააგენტოს, იტარ-ტასის სპეციალური კორესპონდენტი საქართველოში ნატაშა რატიანი იმყოფებოდნენ. მანქანას ალყა შემოარტყეს და მასში მყოფ ადამიანებს სიტყვიერი და ფიზიკური შეურაცხყოფა მიაყენეს, რაც საერთაშორისო სამართლის ნორმების უხეშ დარღვევას წარმოადგენდა.

ჟურნალისტმა აქტიურად გააშუქა ინციდენტი, რასაც საერთაშორისო სკანდალი მოჰყვა. მომხდარი ფაქტის გამო, საქართველოს საკითხი „დიდი რვიანის“ ფარგლებში, ბუში-პუტინის შეხვედრის ოფიციალური დღის წესრიგიდან მოიხსნა და საქართველოს შესახებ საუბარი მხოლოდ ცხინვალის რეგიონში შექმნილი დაძაბულობის კონტექსტში გაიმართა,“ – წერია „წულუკიანის კომისიის“ დასკვნაში.

ამ თემაზე:

„აქ იყო ივანიშვილის სურვილი და ამიტომაც უცებ გაუფორმეს საპროცესო საზღვრის კვეთაზე, ფინანსურ დანაშაულზეც, უცებ ჩატარდა სხდომაც, მაშინ, როცა ეს თვეობით იწელება… ივანიშვილმა საკუთარი სახლის სხვენად გადააქცია სასამართლო სისტემა. ეს უკვე კლანური მართვაც აღარ არის,“ – მიიჩნევს პოლიტიკოსი ხატია დეკანოიძე. მას გიორგი ბაჩიაშვილის საქმეზე ვესაუბრეთ.

„თანაინვესტირების ფონდის“ ყოფილი ხელმძღვანელი, გიორგი ბაჩიაშვილი საპროცესო შეთანხმების საფუძველზე გუშინ, 18 თებერვალს გაათავისუფლეს.

„ბიძინა ივანიშვილის ეს მოქმედება მენტალურად რუსულ-ქურდული „კოზა ნოსტრას“ სინდიკატს არათუ წააგავს, არამედ ერთი-ერთშია,“ – ხატია დეკანოიძე ინტერვიუში გვიყვება, რასთან შეიძლება გვქონდეს საქმე.

• ქალბატონო ხატია, რა გამოჩნდა თქვენთვის გიორგი ბაჩიაშვილთან სისხლის სამართლის სამივე საქმეზე ერთდროულად გაფორმებული საპროცესო შეთანხმებით? მას ივანიშვილი ედავებოდა და საუბარი იყო მილიონობით აშშ დოლარის ღირებულების ბიტკოინების მითვისებაზე. 

ჩემთვის ეს არის ტერორის კიდევ ერთი გამოვლინება, რომელსაც ბიძინა ივანიშვილი უწყობს ყველა იმ ადამიანს, რომელიც მის წინააღმდეგ, განსაკუთრებით კი, ფინანსურ კონტექსტში, გაბედავს წასვლას.

განსაკუთრებით ეს ეხება მის ყოფილ მომხრეებსა და გულშემატკივრებს.

მეორე, რაც გამოჩნდა, ეს არის შემზარავი ფაქტი: სასამართლოს და კრიმინალური იუსტიციის პრაქტიკულად ყველა რგოლის უმძიმესი და კატასტროფული მდგომარეობა. არ უნდა დაგვავიწყდეს ბაჩიაშვილის საქმესთან დაკავშირებული დეტალები: როდესაც ეს ადამიანი განუდგა ბიძინა ივანიშვილს – არ ვიცი, რა ფული ვერ გაიყვეს კონკრეტულად – მოიტაცეს ეს კაცი, რასაც ჰქვია. გვახსოვს ასევე ძალიან კარგად, როგორ ჩართო ამაში ივანიშვილმა სახელმწიფო რესურსი, სუს-ს მისცა დავალება და მოიტაცეს ეს ადამიანი, ჩამოიყვანეს უშუალოდ ოხანაშვილის [სუსის მაშინდელი უფროსი] ჩართულობით. გვითხრეს, რომ ვითომ მწვანე ზოლზე დააკავეს და ეს იყო ტყუილი.

შემდეგ ციხეში ჩასვეს და იძალადეს ამ ადამიანზე იმისთვის, რომ ივანიშვილს მიეღო ფული.

• პროკურატურის ვერსიით, გაითამაშა გიორგი ბაჩიაშვილმა მასზე ძალადობა და ამაში ციხის ადმინისტრაცია იყო ჩართული. 

დიახ, მაგრამ ციხის დირექტორმა მოიკლა თავი ამის შემდეგ. ესეც ძალიან მძიმე ტერორის გამოხატულებაა.

სასამართლო სისტემაში ყოველთვის ძალიან მძიმე მდგომარეობა იყო. ვამბობთ, რომ წინა ხელისუფლების დროსაც სასამართლო სისტემის დამოუკიდებლობა იყო დიდი პრობლემა, მაგრამ ივანიშვილმა საკუთარი სახლის სხვენად გადააქცია სასამართლო სისტემა. ეს უკვე კლანური მართვაც აღარ არის. ეს არის პირდაპირ დამორჩილებული, დამონებული, დამოუკიდებელი აზროვნების უნარიც წაართვა ამ ადამიანებს.

ეს არის უმძიმესი პრობლემა, რომელიც პრაქტიკულად ყველა ადამიანს, რა თქმა უნდა, დაეწევა.

ეს არის ბიძინა ივანიშვილის პარანოიდალური, ავადმყოფური სწრაფვა საკუთარი ფინანსური კეთილდღეობისთვის, რაც არის ძალიან დიდი გამოწვევა ქვეყნისთვის.

ბაჩიაშვილის სიცოცხლე რომ საფრთხეში იყო, ფაქტია. ახლა მან გადაწყვიტა, რომ ეს ფული უკან დაუბრუნოს ივანიშვილს. არ ვიცი, რა როგორ დაბრუნდა, მაგრამ ფაქტია, რომ ამას წინ არ უძღოდა შესაბამისი მოქმედებები. ივანიშვილმა დარეკა და კრიპტოვალუტების კოდები ალბათ მისცა ბაჩიაშვილმა. მანამდე კი, მას სრული ტერორი მოუწყო. ოჯახის წევრებზეც კი მოუწყო ტერორი, ყველაფერი დაუყადაღა, სპეციალურად მისთვის მიიღეს ახალი კანონები…

• გულისხმობთ კანონს, რომლის მიხედვითაც ფინანსური დანაშაულისთვის ნასამართლევ პირებს 16 წლით ეკრძალებათ ქვეყნის დატოვება, თუ ზარალს არ აანაზღაურებენ? სუსის მოქმედმა უფროსმა და „ოცნების“ ყოფილმა დეპუტატმა – მამუკა მდინარაძემ ამ საკანონმდებლო პაკეტის წარდგენის დროს დაადასტურა, რომ ცვლილებების ერთ-ერთი ინსპირატორი გიორგი ბაჩიაშვილი იყო. 

დიახ, ქვეყნის დატოვების აკრძალვის გარდა, ფინანსური ზარალი შეიძლება აენაზღაურებინა არა მხოლოდ იმ ადამიანს, რომელსაც ადანაშაულებდნენ, არამედ იმას, ვინც ამ ადამიანთან ფინანსურად კავშირში იყო. ამიტომაც, ეს ძალიან ბუნდოვანი ჩანაწერია.

პრაქტიკულად, გიორგი ბაჩიაშვილი და მისი ოჯახი იყო განადგურების პირას.

ბიძინა ივანიშვილის ეს მოქმედება მენტალურად რუსულ-ქურდული „კოზა ნოსტრას“ სინდიკატს არათუ წააგავს, არამედ ერთი-ერთშია.

• დაცულია, თქვენი აზრით, გიორგი ბაჩიაშვილის უსაფრთხოება დღეს? როგორც მისი ადვოკატი ლევან მახარაშვილი ამბობს, ის არ აპირებს ქვეყნის დატოვებას. გიორგი ბაჩიაშვილი კიდევ 3 თვე პირობითი მსჯავრის ქვეშ არის, მაგრამ სახელმწიფოსგან თანხმობის შემთხვევაში, მას შეუძლია დატოვოს ქვეყანა. 

როგორც ჩანს, როდესაც ივანიშვილის ფულს შეეხები, ის პარანოიდალურად არის შეპყრობილი საკუთარი კეთილდღეობით და უსაფრთხოებით. გვახსოვს 2 მილიარდის ამბავი, რომელსაც ივანიშვილი ედავება გაკოტრებულ შვეიცარიულ ბანკს და მერე ამ მილიარდზე ტრამპს როგორი წერილი მისწერა? აქ ხომ ბაჩიაშვილზე არ არის საუბარი – პრეზიდენტ ტრამპზეა საუბარი. გამოვიდა ელჩი დანიგანი და თქვა, ასეთი წერილი არასდროს არ მინახავსო, არა მხოლოდ დიპლომატიურ არხებზე, არამედ, ზოგადად, წერილიო.

დიდი ხანია ვიცნობ ივანიშვილის მმართველობის სტილს – მის ოპოზიციაში ვარ პრაქტიკულად 14 წელი, მაგრამ ეს ადამიანი თავისი პარანოიდალური აკვიატებებით არის ძალიან საშიში არამხოლოდ ბაჩიაშვილისთვის, არამედ მთელი ქვეყნისთვის.

ფაქტია, რომ ბიძინა ივანიშვილმა და გიორგი ბაჩიაშვილმა ფინანსური კაპიტალი ერთად დააგროვეს. შემდეგ არ ვიცი, რა პროცენტს სთხოვდა ივანიშვილი, მაგრამ ფაქტია, რომ რაღაც პროცენტს სთხოვდა, თანაც, ივანიშვილს როგორი „კანონიერი ქურდის“ მიდგომები აქვს. როდესაც ვლაპარაკობთ, რომ ქვეყანაში კრიმინალია გაზრდილი და ბანდები მართავენ ქვეყანას, უნდა გვესმოდეს, რომ „კანონიერი ქურდის“ მენტალობით ადამიანი ქვეყანას აზის თავზე და მას ქვეყანა აქვს მიტაცებული.

ანუ დამონებულია იუსტიცია და პრაქტიკულად დამონებულია სასამართლო, სადაც ერთეული მოსამართლეებიც კი აღარ არსებობენ, რომლებიც ამაზე ხმას ამოიღებენ და ასე ღამე გადაწყვიტეს საქმე – უცებ რაღაც კოდები გაიგო ივანიშვილმა და მერე გამოაშვებინა ბაჩიაშვილი. ეს არის თავიდან ბოლომდე უკანონობა და კანონის გარეშე მოქმედება, თარეში იმ ადამიანებისა, ვინც ბიძინა ივანიშვილის კაპრიზებსა და სურვილებს ასრულებს.

ბაჩიაშვილი როდესაც დააკავეს, მოიტაცეს და აქ ჩამოიყვანეს, მაშინაც ვთქვი, რომ ამ ადამიანის სიცოცხლე არ არის დაცული. შეუვარდა ვიღაც კრიმინალი საკანში და სცემა კიდევაც, ხომ? მას კოდებს სთხოვდნენ. ნებისმიერი ადამიანი, რომელიც მისი პირადი სურვილით არის პატიმრობაში, ამ ადამიანის სიცოცხლე დაცული არ არის. მას აქვს პარანოიდული, კონსპირაციული თეორიები მასონთა ლოჟებზე, დიპსტეიტებზე და ასე შემდეგ. იგი არ აზროვნებს კანონის უზენაესობის კონტექსტში. ის აზროვნებს, როგორც „კოზა ნოსტრა“, ჩვეულებრივი, მაფიოზი ადამიანი.

• რა ფაქტორები აჩვენებს კონკრეტულად, რომ ივანიშვილის დაკვეთით მოქმედებს პროკურატურა, ან სასამართლო? პროკურატურას უფლება აქვს, გააფორმოს საპროცესო შეთანხმება, თან დანაშაულიც აღიარებულია და ზიანიც ანაზღაურებულიაო. 

ივანიშვილი სთხოვდა ამ ფულს ბაჩიაშვილს და მას ჰქონდა პრეტენზია 40 მილიონი დოლარის ღირებულების ბიტკოინზე. ივანიშვილი იყო ის ადამიანი, რომელმაც უშუალოდ ჩართო სუსი ამ საქმეში. ამის გამო აუცილებლად ყველა ის ადამიანი პასუხს აგებს, როდესაც საქართველოში ობიექტური მართლმსაჯულება იქნება. როგორ შეიძლება სხვა სახელმწიფოდან მოიტაცო ადამიანი და უკანონოდ გადმოალახვინო საზღვარი თავზე ტომარაჩამოცმულს? ყველაზე უფრო დიდ ავტოკრატიებშიც ძალიან იშვიათად ხდება მსგავსი რამ.

აქ იყო ივანიშვილის სურვილი და ამიტომაც უცებ გაუფორმეს საპროცესო საზღვრის კვეთაზე, ფინანსურ დანაშაულზეც, უცებ ჩატარდა სხდომაც, მაშინ, როცა ეს თვეობით იწელება. 2012 წელს დაწყებული საქმეები ამ დრომდე არაა დამთავრებული და გამოძიებულიც კი…

ეს აჩვენებს კატასტროფულ ვითარებას, როგორც ჯანგველაძე-მიქაძეების კლანის დაპირისპირება სასამართლოში, ხელჩართული ბრძოლა ან ფარცხალაძის  ქოლცენტრები. ეს ყველაფერი არის კრიმინალური სამყაროს ინფილტრაცია სახელმწიფოში.

ჩემი აზრით, უმძიმესი შედეგების მოწმეები ვიქნებით ძალიან მალე – 90-იანი წლების დაბრუნება, როდესაც მართლაც ორგანიზებული დანაშაული მართავს ყველა ფინანსური ნაკადის დინებას. ათასობით ახალგაზრდა ჩართულია ამ ორგანიზებულ, დანაშაულებრივ სქემაში, რაც აწყობს „ქართულ ოცნებას“. ეს საკითხი, რაც რეალურად ბაჩიაშვილს უკავშირდება და არა მხოლოდ მას, არის  საქართველოს მართლმსაჯულების სისტემის უმძიმესი მდგომარეობის გამოხატულება.

• რას ნიშნავს მოქალაქისთვის ეს ამბავი, მას როგორ შეეხება პრაქტიკულად? 

ეს ნიშნავს იმას, რომ მოქალაქეებს, ჩვენ, წაგვერთვას მოქალაქეობის მთავარი ფორმულის განხორციელების შესაძლებლობა – ჩვენ არ გვაქვს უფლება, დავიცვათ ჩვენი თავი, ჩვენი უფლებები. ეს ნიშნავს იმას, რომ ნებისმიერი ადამიანი შეიძლება მოიტაცოს კრიმინალურმა ავტორიტეტმა, გამოსასყიდი მოითხოვოს, კრიმინალური ბანდების თარეში იყოს, შეკვეთილი მკვლელობები იყოს, როდესაც კანონიერი ქურდები უპირისპირდებიან მეორე კრიმინალურ ბანდას.

ვფიქრობ, ეს არის მოქალაქისთვის ქაოსი და ძალადობა. მინდა ხაზი გავუსვა – ეს არ არის მშვიდობა. ეს არის მოქალაქეზე ძალადობა. კრიმინალური ინფილტრაცია ორგანიზებული დანაშაულის და თვითონ სახელმწიფოს მიტაცების კონტექსტში – ეს არის ჰიბრიდული ომის ერთ-ერთი ნაწილი, რომელსაც რუსეთი ძალიან აქტიურად იყენებს.

ყველამ ვიცოდით ყველაფერი, მაგრამ უფრო თვალსაჩინოდ დადასტურდა, რომ შესაძლებელია ბიძინა ივანიშვილის სხვენში გადაწყდეს მართლმსაჯულების ნებისმიერი ინსტანციის გადაწყვეტილება. ივანიშვილის სახლში დაშენებული სხვენია ეს. ამაზრზენია ეს ყველაფერი, რაც აქამდე შეიძლებოდა გვეგრძნო.

შეიძლება ივანიშვილის ზარით გადაწყდეს ნებისმიერი საკითხი, ნებისმიერი ადამიანის დაემუქრონ მოკვლით, სიცოცხლის მოსპობით ან ვთქვათ ფულის წართმევით ან გათავისუფლებით. მიუხედავად იმისა, რომ აქამდე ძალიან კარგად ვიცოდი ეს ყველაფერი, მაინც შემზარავი იყო. ეს განსაკუთრებულად ივანიშვილის პიროვნებას უსვამს ხაზს.

ეს სტატია საქართველოს სამი მოქალაქის შესახებაა, რომლებიც ქართულმა სასამართლომ 2026 წლის 23 იანვარს გაასამართლა და თბილისში, რუსთაველის ქუჩაზე, ტროტუარზე დგომის გამო ადმინისტრაციული პატიმრობა შეუფარდა.

25 წლის გრაფიკული დიზაინერი ზაქარია (ლუკა) ნაგლიაშვილი და 38 წლის იურისტი მიხეილ ზაქარეიშვილი 5-5 დღით დააპატიმრეს, 42 წლის ინფორმატიკის სპეციალისტი დიმიტრი ჯამბურია კი 4 დღით.

მათ მიერ ჩადენილი „სამართალდარღვევაა“ – რუსთაველის გამზირზე, ტროტუარზე დგომა.

• რომელი კანონი დაარღვიეს პატიმრობამისჯილებმა?

შინაგან საქმეთა სამინისტროს თანახმად, 2025 წლის 17 დეკემბერს, თბილისში, რუსთაველის გამზირზე, საქართველოს პარლამენტის მიმდებარედ გამართულ საპროტესტო აქციაზე ზაქარია ნაგლიაშვილმა, დიმიტრი ჯამბურიამ და მიხეილ ზაქარეიშვილმა „შეუქმნეს დაბრკოლება და შეაფერხეს ხალხის გადაადგილება, რაც წარმოადგენს „შეკრებებისა და მანიფესტაციების შესახებ“ საქართველოს კანონის, კერძოდ, მე-11 მუხლის მე-2 პუნქტის „ე“ ქვეპუნქტის მოთხოვნების დარღვევას“.

შსს-მ ადმინისტრაციულ სამართალდარღვევათა კოდექსის 174-ე პრიმა მუხლის მე-10 ნაწილის საფუძველზე, სამივე მათგანს შეუდგინა ადმინისტრაციული სამართალდარღვევის ოქმი და მიმართა სასამართლოს.

ლუკა ნაგლიაშვილსა და დიმიტრი ჯამბურიას ერთმა მოსამართლემ გაასამართლა – დავით მაკარაძემ, ხოლო მიხეილ ზაქარეიშვილის მოსამართლე ზვიად ცეკვავა იყო.

მიუხედავად იმისა, რომ საქმეები სხვადასხვა მოსამართლემ განიხილეს, სამივე პირის მიმართ გამოტანილი დადგენილების შინაარსი თითქმის იდენტურია.

„ცნობილ იქნეს სამართალდამრღვევად, საქართველოს ადმინისტრაციულ სამართალდარღვევათა კოდექსის 174-ე პრიმა მუხლის მე-10 ნაწილით გათვალისწინებულ ქმედების ჩადენაში და ადმინისტრაციული სახდელის სახით შეეფარდოს ადმინისტრაციული პატიმრობა“, – ეს არის ტექსტი, რომელშიც მოსამართლეები მხოლოდ „სამართალდამრღვევების“ ვინაობა და მათთვის განსაზღვრული პატიმრობის დღეების რაოდენობა შეცვალეს.

• რა სახის სამართალდარღვევას გულისხმობს ასკ-ს 174-ე პრიმა მუხლის მე-10 ნაწილი?

ეს არის რეპრესიული საკანონმდებლო ცვლილება, რომელიც არალეგიტიმურ პარლამენტში 2025 წლის 3 დეკემბერს დაინიციირდა, პარლამენტმა დაჩქარებული წესით განიხილა და 10 დეკემბერს მესამე მოსმენით მიიღო.

შესაბამისად, სავალდებულო გახდა „ხალხის ან ტრანსპორტის სავალ ადგილას“ აქციის გამართვისთვის პოლიციის 5 დღით ადრე გაფრთხილება.

„ქართული ოცნების“ პრეზიდენტმა, მიხეილ ყაველაშვილმა ხელი კანონს 12 დეკემბერს მოაწერა და სწორედ ამ დღიდან შევიდა ძალაში.

• მიხეილ ზაქარეიშვილის საქმე

იურისტმა მიხეილ ზაქარეიშვილმა კანონი ზედმიწევნით დაიცვა. 2025 წლის 12 დეკემბერს შსს-ში განცხადება შეიტანა აქციის გამართვის შესახებ.

მიუხედავად ამისა, 5 დღის შემდეგ, 17 დეკემბერს, შსს-მ ზაქარეიშვილს სამართალდარღვევის ოქმი შეუდგინა და კანონის დარღვევაში დაადანაშაულა.

„შსს სასამართლო სხდომების დროს აცხადებდა, რომ აქციის ჩატარებასთან დაკავშირებით კანონით გათვალისწინებული გაფრთხილება შსს-ში შესული არ იყო. სასამართლომ ეს პოზიცია არ გაიზიარა და დაადასტურა, რომ 12 დეკემბერს ჩემ მიერ შეტანილი გაფრთხილება კანონიერი იყო და 17 დეკემბერს გამართული აქციაც კანონიერი იყო.

ეს რეალურად ნიშნავდა იმას, რომ პარლამენტის წინ დგომის უფლება გვქონდა იმ შემთხვევაშიც კი, თუ ვინმეს დაბრკოლებას შევუქმნიდით (არა განზრახ). ამის მიუხედავად, ზვიად ცეკვავამ მაინც 5 დღე მომისაჯა,“ – უთხრა მიხეილ ზაქარეიშვილმა „ბათუმელებს“.

მიხეილ ზაქარეიშვილმა „ბათუმელებს“ მოაწოდა შინაგან საქმეთა სამინისტროს მიერ სასამართლო პროცესზე წარდგენილი ე.წ. სამართალდარღვევის ამსახველი კადრები.

ერთ ვიდეოში ჩანს, რომ 2025 წლის 17 დეკემბერს მიხეილ ზაქარეიშვილი ნამდვილად დგას რუსთაველის გამზირზე.

ტროტუარის ერთ ნაწილზე ხალხია შეგროვილი, თუმცა მოქალაქეს, რომელიც რუსთაველის გამზირზე იმ დროს გაივლიდა, შსს-ს კადრების მიხედვითვე ჰქონდა არჩევანი – გვერდი აევლო აქციის მონაწილეებისათვის და ისე გაეგრძელებინა გზა.

„2025 წლის 17 დეკემბერს, თბილისში, შოთა რუსთაველის გამზირზე, პარლამენტის მიმდებარე ტერიტორიაზე გამართულ საპროტესტო აქციაზე მოქალაქე მიხეილ ზაქარეიშვილმა შეუქმნა დაბრკოლება/შეფერხება ხალხის გადაადგილებას, რითაც დაირღვა „შეკრებებისა და მანიფესტაციების შესახებ“ საქართველოს კანონის მე-11 მუხლის მე-2 პუნქტის „ე“ ქვეპუნქტის მოთხოვნები,“ – ეს არის ტექსტი ოფიციალური დოკუმენტიდან, სადაც აღწერილია შსს-ს მიერ გამოვლენილი სამართალდარღვევა, რის საფუძველზეც შსს-მ მიხეილ ზაქარეიშვილს ადმინისტრაციული სამართალდარღვევის ოქმი შეუდგინა და სასამართლოში მისი პატიმრობა მოითხოვა.

საქმე მოსამართლე ზვიად ცეკვავამ 2 პროცესზე განიხილა. შსს-ს ბუბა ნაჭყებია წარმოადგენდა.

მოსამართლემ სრულად გაიზიარა შსს-ს მიერ ე.წ. მტკიცებულებად წარდგენილი ვიდეოები და მიხეილ ზაქარეიშვილი 5 დღით დააპატიმრა.

„ჩემ პირველ სასამართლოზე შსს-მ დაადასტურა, რომ არ არსებობს ადამიანი, რომელსაც დაბრკოლება შევუქმენი და შსს-ს წარმომადგენელმა, ბუბა ნაჭყებიამ ასევე განაცხადა, რომ არც არის აუცილებელი ასეთი ადამიანის არსებობა იმისათვის, რომ მე სამართალდამრღვევი ვიყო.

მეორე სხდომაზე შსს-მ მოიტანა ვიდეო, სადაც ჩანს, რომ აქციის მიმდინარეობის დროს რამდენიმე ადამიანი ბასლაინზე გადადის. შსს-ს წარმომადგენელმა განაცხადა, რომ ამის მიზეზი ისაა, რომ მათ ტროტუარზე ვერ გაიარეს. არადა იმავე ვიდეოში ჩანს, რომ მინიმუმ 10 მეტრის სიგანის ტროტუარი ამ დროს ცარიელია“, – უთხრა მიხეილ ზაქარეიშვილმა „ბათუმელებს“.

მიხეილ ზაქარეიშვილის თქმით, სასამართლოზე შინაგან საქმეთა სამინისტროს წარმომადგენლები ამტკიცებდნენ, რომ პარლამენტის წინ არსებული ტერიტორია იყოფა ორ ნაწილად – ქვეითთა ბილიკად და პარლამენტის მიმდებარე ტერიტორიად.

შსს-ს მტკიცებით, აქციის მონაწილეებს ქვეითთა ბილიკზე დგომის უფლება არ აქვთ და უნდა დადგნენ პარლამენტის მიმდებარე ტერიტორიაზე.

„სასამართლომ გაიზიარა შსს-ს ეს პოზიცია. მე მივიტანე სასამართლოში თბილისის მერიისა და მუნიციპალური სერვისების განვითარების სააგენტოს საიტებიდან ამოღებული ინფორმაცია, სადაც ჩანს, რომ ორივე ეს ტერიტორია იდენტურია. ორივეს იდენტური სტატუსი აქვს მინიჭებული და მათ შორის არანაირი განსხვავება არაა. ამ მტკიცებუელებებზე საბოლოო დადგენილებაში არაფერია ნახსენები.

ასევე მივიტანე მტკიცებულებები, საიდანაც ირკვევა, რომ პარლამენტის მიმდებარე ტერიტორიაზე ვიდეო გადაღება მიმდინარეობს საქართველოს კანონმდებლობის დარღვევით. ადმინისტრაციული კანონმდებლობის თანახმად, თუ მტკიცებულება კანონის დარღვევითაა მოპოვებული, მას იურიდიული ძალა არ გააჩნია. მოსამართლემ ეს მკტიცებულებები საქმეს დაურთო, მაგრამ გადაწყვეტილების მიღების დროს არ გაითვალისწინა და  არც დადგენილებაში ახსენა, სამაგიეროდ გაითვალისწინა კანონის დარღვევით მოპოვებული ვიდეო მტკიცებულებები,“ – უთხრა მიხეილ ზაქარეიშვილმა „ბათუმელებს“.

მან 5-დღიანი პატიმრობის ვადა, რომელიც ტროტუარზე დგომის გამო მიუსაჯეს, ზესტაფონის იზოლატორში მოიხადა.

• დიმიტრი ჯამბურიას საქმე

42 წლის დიმიტრი ჯამბურია 20 წელი მუშაობდა გამოცდებისა და შეფასებისა ეროვნულ ცენტრში, საიდანაც ის გასული წლის 26 დეკემბერს პოლიტიკური შეხედულებების გამო გაათავისუფლეს. მან მუშაობა კერძო სექტორში დაიწყო.

23 იანვარს, ახლადდაწყებული სამსახურიდან უხელფასო შვებულება აიღო, რადგან იცოდა, რომ დააპატიმრებდნენ.

მისი საქმე მოსამართლე დავით მაკარაძემ განიხილა. შსს-ს თეკლა კობახიძე და თინათინ კაჭკაჭიშვილი წარმოადგენდნენ.

შსს ამტკიცებდა, რომ დიმიტრი ჯამბურიამ 17 დეკემბერს რუსთაველის გამზირზე გამართულ საპროტესტო აქციაზე „შექმნა დაბრკოლება და შეაფერხა ხალხის გადაადგილება“.

საქმეში დევს ორი ვიდეო. ერთზე ჩანს დიმიტრი ჯამბურია, რომელიც ზურგით დგას კამერისკენ, შემდეგ კი ტრიალდება. მეორე კადრში ჩანს, როგორ დგას დიმიტრი ჯამბურია რუსთაველის ქუჩაზე, აქციაზე და აქციის სხვა მონაწილეს ესაუბრება. მათ ირგვლივ ხალხი დაუბრკოლებლად მოძრაობს.

არცერთ კადრში არ ჩანს, რომ დიმიტრი ჯამბურიას ტროტუარზე დგომა ვინმეს აბრკოლებს. ამის მიუხედავად, მოსამართლე დავით მაკარაძემ მას 5-დღიანი პატიმრობა შეუფარდა.

„დაზარალებული არავინაა არამარტო ჩემს საქმეში, არამედ სხვა საქმეებშიც არავინ დაზარალებულა. რის მიხედვით ამარჩიეს ვერ გეტყვით. თითქმის ყოველდღე რუსთაველზე ვდგავარ და გაჩერებას არ ვაპირებ.

ადვოკატმა გაასაჩივრა სააპელაციო სასამართლოში, სასამართლომ სარჩელი არ განიხილა. ახლა ვემზადები სტრასბურგისათვის,“ – უთხრა „ბათუმელებს“ დიმიტრი ჯამბურიამ.

თუმცა ის, რომ საქმეს დაზარალებული არ ჰყავდა, სასამართლოსთვის მნიშვნელოვანი არ აღმოჩნდა.

„ადმინისტრაციული სამართალდარღვევის ოქმში მითითებული სამართალდარღვევის დასადასტურებლად, ოქმის შემდგენი ორგანოს მიერ საქმეზე წარმოდგენილია ნეიტრალური მტკიცებულებები ვიდეოჩანაწერების სახით, რომლითაც უტყუარად დგინდება, რომ 2025 წლის 17 დეკემბერს, თბილისში, საქართველოს პარლამენტის შენობის მიმდებარედ, რუსთაველის გამზირზე დიმიტრი ჯამბურიამ საპროტესტო აქციის სხვა მონაწილეებთან ერთად, განზრახ შექმნა დაბრკოლება ხალხის გაადაგილებისთვის, რის გამოც მოქალაქეებს მოუწიათ ტრუტუარისთვის გვერდის ავლა და ტრანსპორტის სავალ ნაწილზე, ე.წ. ბასლაინზე გადაადგილება, რაც წარმოადგენს მოქალაქეთა თავისუფალი გადაადგილებისათვის დაბრკოლების განზრახ შექმნის კლასიკურ შემთხვევას.

ხოლო ის ნარატივი, რომ ზოგიერთმა ქვეითმა შეფერხებით შეძლო თავად აქციის მონაწილეთა შორის გავლა, ეს საერთო სურათს ვერ შეცვლის, ვინაიდან კანონის თანახმად, როგორც სრული, ისე ნაწილობრივ დაბრკოლების შექმნა ხალხის ან ტრანსპორტის სავალ ნაწილზე ქმედების კონკრეტული მუხლით კვალიფიკაციისთვის სავსებით საკმარისია. თუმცა, აღნიშნული საკითხი, გათვალისწინებული იქნება სამართალდამრღვევისათვის სახდელის ზომის განსაზღვრის ნაწილში,“ – დაწერა დადგენილებაში მოსამართლე დავით მაკარაძემ და დიმიტრი ჯამბურია 4 დღით დააპატიმრა.

• ზაქარია (ლუკა) ნაგლიაშვილის საქმე

17 დეკემბერს, ტროტუარზე დგომის გამო 5 დღით დააპატიმრეს ლუკა ნაგლიაშვილი. მისი მოსამართლეც დავით მაკარაძე იყო.

შსს-ს თეკლა კობახიძე წარმოადგენდა.

ლუკა ნაგლიაშვილის ბრალი სხვა მოქალაქეების მიმართ წაყენებული ბრალის იდენტურია – შსს მასაც „ხალხის გადაადგილებისათვის დაბრკოლების შექმნას“ ედავება.

შსს-ს მტკიცებით, ლუკა ნაგლიაშვილი რუსთაველზე საპროტესტო აქციის სხვა მონაწილეებთან ერთად აბრკოლებდა ხალხის გადაადგილებას და არ დაემორჩილა პოლიციის მითითებას დაეტოვებინა ადგილი.

„რაც დასტურდება საქმეზე წარმოდგენილი არაერთი ვიდეო ჩანაწერით, რომლებზეც ასახულია კადრები, სადაც არაერთ მოქალაქეს უწევს საავტომობილო გზის სავალ ნაწილზე, ეგრეთ წოდებულ „ბასლაინზე“ გადასვლა და ამგვარად გადაადგილება დანიშნულების ადგილამდე,“ – ნათქვამია დადგენილებაში.

ლუკა ნაგლიაშვილის საქმეზე სამი სასამართლო სხდომა გაიმართა. პირველი პროცესი 2025 წლის 25 დეკემბერს იყო. ლუკა ამბობს, რომ არცერთი მტკიცებულება, რომელიც დაადასტურებდა, რომ მან რაიმე სახის სამართალდარღვევა ჩაიდინა, შსს-ს არ წარმოუდგენია.

მის საქმეში არ არსებობს არც ე.წ. დაზარალებული, ვინც დააბრკოლა და შეაფერხა.

მოსამართლე დავით მაკარაძეს გადაწყვეტილების გამოსატანად სამი სხდომა დასჭირდა. საბოლოოდ, 23 იანვარს, ლუკა ნაგლიაშვილი 4 დღით დააპატიმრა.

„როდესაც სასამართლოს და შინაგან საქმეთა სამინისტროს იყენებენ, ასე ვთქვათ, არასასურველი ხმების ჩასახშობად, ეს ნიშნავს, რომ კანონი გამოიყენება არა წესრიგის დასაცავად, არამედ იმ ადამიანების დასაშინებლად, ვინც ხმამაღლა გამოხატავს მისაზრებას და აქტიურად არის პროტესტში ჩართული. ასეთ შემთხვევაში სამართალი ხდება ზეწოლის ინსტრუმენტი, ხოლო მშვიდობიანი პროტესტი – დასჯის მიზეზი,“ – უთხრა ლუკა ნაგლიაშვილმა „ბათუმელებს“.

ავტორიტარული რეჟიმები ხშირად მიმართავენ პოპულისტურ რიტორიკას ფასების ზრდასთან დაკავშირებით: ხელისუფლება საზოგადოებას აჩვენებს, რომ იცავს მათ ინტერესებს, ხოლო ფასების ზრდის მიზეზად ხშირად „ხარბ“ ბიზნესმენებს ასახელებს.

მაგალითები მოწმობს, რომ მსგავსი ინიციატივები საზოგადოებრივი უკმაყოფილების განმუხტვას ისახავს მიზნად და უფრო მოკლევადიან ეფექტზეა ორიენტირებული, ვიდრე რეალურ და სისტემურ ცვლილებებზე.

პროდუქტების მაღალი ფასები საქართველოში დიდი ხნის გამოწვევაა, თუმცა პოლიტიკოსების დღის წესრიგის ერთ-ერთ მთავარ თემად, სულ ახლახან იქცა.

პოსტსაბჭოთა სივრცეში არაერთი მაგალითი არსებობს, სადაც ხელისუფლებები წლების განმავლობაში სწორედ ასეთ პოპულისტურ რიტორიკას იყენებდნენ.

ერთ-ერთი თვალსაჩინო მაგალითი ბელარუსია და მისი პრეზიდენტი, ალექსანდრე ლუკაშენკო, რომელიც წლებია ბელარუსში „სამართლიანი“ ფასების ფორმულის შემუშავების აუცილებლობაზე ლაპარაკობს. 

ლუკაშენკოს საჯარო განცხადებები ბელარუსში მაღალი ფასების პრობლემებზე, 2011 წლიდან იძებნება, მისი უახლესი განცხადება ამავე საკითხზე 2026 წლის 17 თებერვლით – ლუკაშენკომ ტრადიციული მკაცრი ტონით მიმართა მინისტრებს და თქვა, რომ გასულ წელს ძირითად პროდუქტებზე ფასები მნიშვნელოვნად გაიზარდა და ეს იმ პირობებში, როცა ზოგიერთმა ფერმერმა, არ იცოდა ბოსტნეული სად წაეღო.

„ყველაზე საგანგაშო და აღმაშფოთებელი ის არის, რომ ფასების ეს ზრდა, მოგეხსენებათ, ვიღაცის ჯიბეში მიდის“, – მიანიშნა მან ბიზნესმენებზე.

ლუკაშენკომ ყველაზე მასშტაბური „ომი მაღალ ფასებთან“ 2022 წელს გამოაცხადა, როცა ლუკაშენკოს ინიციატივით, მაღაზიებსა და სავაჭრო ქსელებს აეკრძალათ პროდუქტებზე ფასების ზრდა. იმავე წელს, ინფლაციის შეკავების საბაბით, ბელარუსში გამოიცა მთავრობის ახალი დადგენილება, რომლითაც ამოქმედდა ფასების რეგულირების სისტემა.

ლუკაშენკო: „რა მოხდა? ერთი მხრივ – სანქციები და ე.წ. იმპორტირებული ინფლაცია… მაშ, რატომ გაიზარდა ბელორუსული საქონლის ფასები? თავდაპირველად, სპეკულანტები ადვილად სარგებლობდნენ მყიდველებისგან მოგებით. ზოგიერთმა ვალუტის კურსის რყევების შემდეგ ფასები გაზარდა, მაგრამ როდესაც რუბლი გამყარდა, მათ დაავიწყდათ ფასის დაწევა. სხვები არ ყოყმანობდნენ საქონლის 300%-იანი ფასნამატით გაყიდვას“.

ამ დროს საცალო სავაჭრო ობიექტებს სამართალდამცავი ორგანოები ამოწმებდნენ და რეგულაციის დამრღვევებს აპატიმრებდნენ კიდეც. 

2025 წლის არჩევნების შემდეგ, როცა ლუკაშენკო მეშვიდედ გახდა პრეზიდენტი, მან კვლავ მკაცრად გაკიცხა ჩინოვნიკები იმის გამო, რომ პროდუქტის ფასები ქვეყანაში ისევ მაღალია:

„ჩვენ გვიყურებს ხალხი, ჩვენ მხარს გვიჭერენ, ჩვენ აღფრთოვანებულები ვიყავით, რომ ჩვენ მოგვცეს ხმა ბოლო არჩევნებზე, ხალხმა დაგვიჯერა, ჩვენ კიდევ რა ვქენით? ჩვენ კიდევ როგორც საზიზღარი ტარაკნები – არჩევნებმა ჩაიარა და აბა მიდით! …გაფრთხილებთ, არავის ექნება უფლება ხალხი გაასულელოს. მე, პირადად, პირველი ავიღებ ამაზე პასუხისმგებლობას, შემდეგ მთავრობის წევრები და გუბერნატორები“, – თქვა მან.

ბელარუსში მაღაზიებში პროდუქტების ფასებს დღემდე პერიოდული რეიდებით კონტროლდება, დამრღვევებს კი ჯარიმებითა და ვაჭრობის უფლების აკრძალვით სჯიან.

ამავდროულად, საერთაშორისო კვლევები და საგამოძიებო მასალები მიუთითებს, რომ ბელარუსში ეკონომიკის მნიშვნელოვანი ნაწილი  სახელმწიფო აკონტროლებს და მსხვილი ბიზნესის ნაწილი პირდაპირ არის დაკავშირებული ხელისუფლებასთან. „კორუფციისა და ორგანიზებული დანაშაულის კვლევის ცენტრის“ (OCCRP) ანგარიშის თანახმად, ლუკაშენკო ბიუჯეტის ფულს, საკუთარ ოჯახთან დაკავშირებული ოლიგარქების წრისკენ მიმართავს.

„ჩვენ დავიჭერთ და მკაცრად დავსჯით მათ, ვინც საკვებ პროდუქტებზე ფასებს ზრდის“ – ეს ყაზახეთის ყოფილი პრეზიდენტის, ნურსულთან ნაზარბაევის სიტყვებია, რომელიც 1991 წლიდან 2019 წლამდე, ანუ 28 წელი იკავებდა პრეზიდენტის თანამდებობას. 

„ჩვენ გავაფრთხილეთ ყველა, ფასები არ უნდა გაიზარდოს, განსაკუთრებით სოციალურად მნიშვნელოვან საქონელზე, ყაზახეთში წარმოებულ საკვებ პროდუქტებზე. მოგების მიზნით ფასები არ უნდა გაიზარდოს. ჩვენ დავიჭერთ და მკაცრად დავსჯით ასეთ ადამიანებს. მთავრობა ამას გააკონტროლებს“, – თქვა მან 2016 წელს ბიზნესის წარმომადგენლებთან შეხვედრაზე. 

ამავდროულად ცნობილი იყო, რომ ყაზახეთი ეკონომიკას, პრეზიდენტ ნაზარბაევთან დაკავშირებული კლანების ქსელი აკონტროლებდა, მთავრობასთან დაკავშირებული ნებისმიერი შეთანხმება, მათ შორის ენერგეტიკის სფეროში, ქრთამს მოითხოვდა. თავად ნაზარბაევის აქტივების ღირებულება კი მინიმუმ 8 მილიარდ დოლარს შეადგენს.

ყაზახეთში დღემდე გრძელდება მკაცრი რიტორიკა „ოლიგოპოლიების“ წინააღმდეგ.  პრეზიდენტი ყასიმ-ჟომართ თოყაევი, რომელიც 2022 წელს ვადამდელი არჩევნების შედეგად მეორედ გახდა პრეზიდენტი 7 წლის ვადით,  საკვებ პროდუქტებზე ფასების ზრდის ერთ-ერთ მიზეზად ამ სექტორში არსებულ კორუფციას მიიჩნევს. 

წლებია „ხელოვნურად მომატებულ ფასებზე“ ლაპარაკობს აზერბაიჯანის პრეზიდენტი ილჰამ ალიევიც. მიუხედავად იმისა, რომ ქვეყნის ეკონომიკას თითქმის სრულად აკონტროლებენ ხელისუფლებასთან დაახლოებული პირები, რიტორიკა მუდამ „ხარბი ბიზნესმენების“ დასჯაზეა ორიენტირებული. ალიევი შესაძლო კარტელურ გარიგებებზეც საუბრობს.

„მიუხედავად იმისა, რომ ქვეყანაში ინფლაციის მაჩვენებელი დაბალია, ზოგიერთ შემთხვევაში, ფასების ხელოვნური ზრდა შეინიშნება. შესაბამისმა ორგანოებმა სერიოზულად უნდა მიხედონ ამ საკითხს“, – აცხადებდა ალიევი 2019 წელს, მთავრობის ერთ-ერთ მორიგ შეხვედრაზე. 

ალიევი: „მუდმივი ზედამხედველობა უნდა იყოს სამომხმარებლო ბაზარზე, რადგან არ არის გამორიცხული კარტელური გარიგებები. რა თქმა უნდა, ჩვენ ვერ დავუშვებთ ფასების ხელოვნურად აწევას. უნდა არსებობდეს ძალიან სერიოზული ზედამხედველობის მექანიზმი. ეს სფერო მუდმივად უნდა იყოს ყურადღების ცენტრში“.

ალიევი, 2016 წელს: „აზერბაიჯანში წარმოებული საქონლის ფასების ზრდა შეუძლებელია და არ უნდა მოხდეს… ვიცი, რომ ზოგიერთ უსინდისო ადამიანს, მოვაჭრეს სურს [მანათის] კურსის საკითხის ბოროტად გამოყენება. ეს უნდა დასრულდეს. ფასების ხელოვნური ზრდა უნდა შეწყდეს… პროკურატურა სერიოზულად უნდა ჩაერთოს ამ საქმეში. ძალიან მკაცრი სასჯელები უნდა იქნას გამოყენებული მათთვის, ვისაც სურს სიტუაციის საკუთარი სარგებლისთვის გამოყენება“.

სანამ ალიევი კარტელურ გარიგებებზე საუბრობს, საერთაშორისო საგამოძიებო მასალები მიუთითებს, რომ ქვეყნის ეკონომიკის დიდი ნაწილი სწორედ მმართველ ელიტასთან არის გადაჯაჭვული. მაგალითად, Panama Papers-ის დოკუმენტები აღწერს ალიევის ოჯახის ოფშორულ აქტივებსა და კომპანიებს, „კორუფციისა და ორგანიზებული დანაშაულის კვლევის ცენტრის“ (OCCRP) ერთ-ერთი გამოძიება აჩვენებს, რომ მსხვილი კონგლომერატები, მათ შორის AtaHolding და Pasha Holding, მჭიდროდ არიან დაკავშირებული პრეზიდენტის ოჯახის წევრებთან და ხელისუფლების მაღალჩინოსნებთან.

პროკურატურის ინფორმაციით, შპს „სანდასუფთავების“ კომერციული შემოსავლების და ეკონომიკური მართვის სამსახურის უფროსს ბრალი წარუდგინეს.

„სახელმწიფო უსაფრთხოების სამსახურის მიერ ჩატარებული გამოძიებით დადგინდა, რომ ქალაქ ბათუმის მერიის 100%-იანი წილობრივი მონაწილეობით დაფუძნებული შპს „სანდასუფთავების“ კომერციული შემოსავლების და ეკონომიკური მართვის სამსახურის უფროსმა, კომპანიის ბალანსზე არსებული სატვირთო ავტომანქანების სისტემატურად, არაოფიციალურად გამოყენების სანაცვლოდ ქრთამის სახით აიღო ფულადი თანხა“ – ნათქვამია პროკურატურის განცხადებაში.

მათივე ინფორმაციით, ბრალი წარუდგინეს ლაგოდეხის მერის წარმომადგენელსაც.

„ლაგოდეხის მუნიციპალიტეტის მერის წარმომადგენელმა, რომელსაც მსჯავრდებულის განაჩენით დადგენილი საზოგადოებრივი შრომის უზრუნველყოფა და კონტროლი ევალებოდა, სასჯელისთვის თავის არიდებისათვის მსჯავრდებულისგან ქრთამის სახით 1000 ლარი აიღო“.

დაკავებულებს ბრალდება წარედგინათ საქართველოს სისხლის სამართლის კოდექსის 338-ე მუხლის პირველი ნაწილით [ქრთამის აღება], რაც სასჯელის სახედ და ზომად ექვსიდან ცხრა წლამდე თავისუფლების აღკვეთას ითვალისწინებს.

მთავარი ფოტო: „სანდასუფთავება“

საქსტატის თანახმად, 2026 წლის იანვარში ადგილობრივი ექსპორტი გაიზარდა, რაც ნავთობისა და ნავთობპროდუქტების ექსპორტის რეკორდული მატებითაა განპირობებული.

სტატისტიკის ეროვნული სამსახურის [საქსტატის] მიხედვით, წინა წლის იანვრის თვესთან შედარებით მიმდინარე წლის იანვრის თვეში საქართველოდან ნავთობპროდუქტების ადგილობრივი ექსპორტი 3 224 %-ით გაიზარდა.

კერძოდ, 2025 წლის იანვარში საქართველოდან 1 689 900 აშშ დოლარის ღირებულების ნავთობი და ნავთობპროდუქტები გავიდა ექსპორტზე, რაც ადგილობრივ ექსპორტში 0.9 % იყო.

2026 ის იანვარში კი საქართველომ 56 180 200 აშშ დოლარის ღირებულების ნავთობი და ნავთობპროდუქტები გაიტანა ექსპორტზე, რაც ადგილობრივი ექსპორტის 18 %-ს შეადგენს.

მეორე ადგილზეა ძვირფასი ლითონების მადნები და კონცენტრატები, 51.0 მლნ. აშშ დოლარით (მთლიანი ადგილობრივი ექსპორტის 16.3 პროცენტი), ხოლო მესამე ადგილს იკავებს სპილენძის მადნები და კონცენტრატები 24.0 მლნ. აშშ დოლარით (მთლიანი ადგილობრივი ექსპორტის 7.7 პროცენტი).

სტატისტიკის სამსახურის ინფორმაციით, 2026 წლის იანვარში საქართველოდან განხორციელებული საქონლის ექსპორტის მოცულობამ (არადეკლარირებული ექსპორტის გარეშე) 480.4 მლნ. აშშ დოლარი შეადგინა, რაც 19.0 პროცენტით მეტია გასული წლის შესაბამისი პერიოდის მაჩვენებელზე.

ადგილობრივი ექსპორტი (ექსპორტი რეექსპორტის გარეშე), მთლიანი ექსპორტის 65.1 პროცენტს შეადგენს.

აღნიშნული მაჩვენებელი წინა წლის შესაბამის პერიოდთან შედარებით 68.1 პროცენტით გაიზარდა და 312.8 მლნ. აშშ დოლარს გაუტოლდა.

აქ ასევე აღსანიშნავია, რომ 2026 წლის იანვარში, წინა წლის იმავე თვესთან შედარებით, შემცირებულია ყურძნის ნატურალური ღვინოების, მინერალური და მტკნარი წყლების ექსპორტი.

2026 წლის იანვარში ათი უმსხვილესი ქვეყნის წილმა საქართველოს მთლიან ადგილობრივ ექსპორტში 74.5 პროცენტი შეადგინა. ამ მხრივ, უმსხვილესი საექსპორტო პარტნიორებია:

ჩინეთი (64.2 მლნ. აშშ დოლარი), თურქეთი (49.3 მლნ. აშშ დოლარი) და რუსეთი (34.8 მლნ. აშშ დოლარი).

18 თებერვალს, გვიან ღამით, ჩაქვში, დაუსახლებელ ტერიტორიაზე ხანძარი გაჩნდა. ცეცხლი ეკალ-ბარდებს მოედო, ძლიერმა ქარმა კი გავრცელებას შეუწყო ხელი.

ხანძარი გავრცელდა ქობულეთის შემოვლითი გზის მიმდებარედაც.

საგანგებო სიტუაციების სამსახურის ინფორმაციით, ხანძრის შედეგად არავინ დაშავებულა, მხოლოდ ეკალ-ბარდი დაიწვა.