„ძალიან არაკომფორტული უნდა იყოს ქართველებისთვის ზახაროვას, რუსეთის საგარეო უწყების ან დუმის სპიკერის მოსკოვში ნათქვამის თბილისში გამეორება… მე ამით გაკვირვებული ვარ. ვიცით, რომ ასეთი პროპაგანდის მიზანი ქართველების გაყოფაა, ერთმანეთში ბრძოლა, საზოგადოების დაბნევა, რადგან ხალხი არ იყოს დარწმუნებული – რა ხდება,“ – გვითხრა კელი დეგნანმა ინტერვიუს დროს, როცა მას ვკითხეთ: რამდენად იზრდება საფრთხე, როცა კრემლის რუპორი საქართველოში არამხოლოდ ცალკეული ჯგუფი, არამედ უშუალოდ მთავრობაა?
აშშ-ის ელჩი საქართველოში ამჯერად თავის შთაბეჭდილებებზეც გვესაუბრა: რას ფიქრობს კელი დეგნანი საქართველოზე? რა არის ქართული პოლიტიკის სუსტი მხარე? რა უნდა მოვუხერხოთ ოლიგარქის ჩრდილოვან მმართველობას?
„…ყველაფერი, რასაც აშშ-ში ვაკეთებთ, მხარს უჭერს იმას, რასაც საქართველოს მოქალაქეები ამბობენ, რომ სურთ: ძლიერი და უსაფრთხო ქვეყანა, კეთილდღეობა, ძლიერი, დივერსიფიცირებული ეკონომიკა, რა თქმა უნდა, ძლიერი, დემოკრატიული ინსტიტუტები,“ – ქართველ და ამერიკელ ხალხებს შორის მსგავსებაზე საკუთარ დაკვირვებას გვიზიარებს აშშ-ის ელჩი საქართველოში.
„ბათუმელებმა“ აშშ-ის ელჩთან საქართველოში, კელი დეგნანთან, ინტერვიუ ჩაწერა.
- ქალბატონო კელი, პირველ რიგში, საგამოძიებო კომისიის შესახებ მინდა გკითხოთ, რომლის შექმნას „ქართულმა ოცნებამ“ უკვე მესამედ შეუშალა ხელი პარლამენტში. ამ კომისიამ უნდა შეისწავლის სასამართლო სისტემაში კორუფცია. თქვენ აღნიშნეთ მოსამართლეების სანქცირებასთან დაკავშირებით, რომ „არავითარ შეცდომას არ აქვს ადგილი, აშშ აბსოლუტურად დარწმუნებულია იმაში, რაც დაედო საფუძვლად ამ ოთხი ინდივიდისთვის სანქციის დაწესებას.“ გამოდის, რომ საქართველოს ხელისუფლება ხელს უწყობს კორუფციას?
მიხარია ბათუმში ყოფნა და „ბათუმელებთან“ ყოფნა. ეს მნიშვნელოვანი კითხვაა. დავიწყებ იმით, რომ საქმე მარტივადაა და არა რთულად, პოლიტიკური დრამის საჭიროება არ არსებობს. აშშ-ში, როდესაც გვაქვს საკმარისი და სანდო ინფორმაცია კორუფციის შესახებ, კანონი გვავალდებულებს, დავაწესოთ სავიზო შეზღუდვები/სანქციები. ინფორმაციის შემოწმების პროცესი ძალიან საგულდაგულოა. შემდეგ ინფორმაცია გადაეცემა სახელმწიფო მდივანს, ის თავის შეფასებას აკეთებს და მწვანე შუქს უნთებს სანქციებს. ასეთია კანონმდებლობით გათვალისწინებული პროცესი აშშ-ში.
ბოლომდე ვართ დარწმუნებული ამ ინფორმაციაში, რომ ეს 4 პირი ჩართული იყო მნიშვნელოვან კორუფციულ ქმედებებში, რომლებმაც ძირი გამოუთხარეს საქართველოს მართლმსაჯულებას და დაბლოკეს საქართველოში ჭეშმარიტად დამოუკიდებელი მართლმსაჯულების შექმნა.
თუ საქართველოს ხელისუფლებას ამ ბრალდებების საკუთარი გამოძიება სურს, საკუთარი მეთოდებით, პარლამენტიდან თუ პროკურატურიდან, ეს, რა თქმა უნდა, საქართველოს ხელისუფლების გადასაწყვეტია.
ჩვენ დარწმუნებული ვართ, რომ ნებისმიერი სანდო და დამოუკიდებელი გამოძიება ამავე დასკვნამდე მივა. არ აქვს მნიშვნელობა, ქართულ ენაში რომელ სიტყვას გამოვიყენებთ – აშშ-ის კანონმდებლობით შედეგი ერთია – ამ ოთხ პირს არ აქვს უფლება აშშ-ში შევიდეს, კორუფციულ აქტებში მონაწილეობის გამო. ამ პროცესს მოითხოვს აშშ-ის კანონმდებლობა.
რას მოითხოვს საქართველოს კანონმდებლობა, ამას საქართველოს ხელისუფლება ადგენს. პარლამენტს აქვს ინსტრუმენტი ამ ბრალდებების, კორუფციის გამოსაძიებლად. ინფორმაციის დიდი ნაწილი ხელმისაწვდომია საჯაროდ, ბრალდებების საფუძველი უკვე წლებია ფართოდაა ცნობილი.
ვფიქრობ, უკეთესი კითხვაა: რატომ არ იყო გამოძიება ამ ბრალდებებზე. ეს მნიშვნელოვანია, ვინაიდან საქართველო იმსახურებს ჭეშმარიტად დამოუკიდებელ მართლმსაჯულებას. ათწლეულებია ამაზე მუშაობთ – ჭეშმარიტად დამოუკიდებელი მართლმსაჯულების შექმნაზე, რომელიც ესოდენ მნიშვნელოვანია ჯანსაღი დემოკრატიის ფუნქციონირებისთვის. ესაა შესაძლებლობა, მნიშვნელოვანი შესაძლებლობა – საქართველომ აჩვენოს კორუფციასთან ბრძოლისადმი და დამოუკიდებელი მართლმსაჯულების შექმნისადმი ერთგულება. ამას იმსახურებთ.
იმედი მაქვს, ხელისუფლება გამოიყენებს ამ შესაძლებლობას, გამოიყენებს ხელმისაწვდომ ინსტრუმენტებს, პარლამენტს თუ სხვა ინსტიტუტებს, კორუფციის ბრალდებებს გამოიძიებს და გადადგამს შემდეგ ნაბიჯს იმის ჩვენებისკენ, რომ საქართველო მართლაც ერთგულია კორუფციასთან ბრძოლის.
- რას აჩვენებს თქვენთვის პარლამენტის მოქმედება ამ შემთხვევაში, როცა დემონსტრაციულად ხელს უშლიან საგამოძიებო კომისიის შექმნას?
გულდასაწყვეტია პარლამენტის ბოიკოტის მორიგ ჯერზე ნახვა და მისი გამოყენება იმისთვის, რომ დეპუტატებს არ ჰქონდეთ საშუალება, თავიანთი საქმე აკეთონ. ისინი აირჩიეს არა პარლამენტის გარეთ ყოფნისთვის, არამედ მუშაობისთვის, ხალხის ინტერესების წარმოდგენისთვის.
ეს არ ნიშნავს, რომ არ იქნება რთული სამუშაო, არ იქნება უთანხმოებები და კამათი, ეს ყველა პარლამენტში ასეა. მნიშვნელოვანია, რომ მოქალაქეების მიერ არჩეულმა დეპუტატებმა გამოიყენონ პარლამენტი და საპარლამენტო ინსტრუმენტები, როგორიცაა საგამოძიებო კომისია, რათა შეასრულონ თავიანთი სამუშაო ხალხის სახელით, პასუხი მოსთხოვონ ჩინოვნიკებს, გამჭვირვალედ აჩვენონ ქართველ ხალხს, რა ხდება სხვადასხვა ინსტიტუტში, მათ შორის, მართლმსაჯულებაში. ეს არ არის დახურული ინსტიტუტი – ჯანსაღი დემოკრატია გამჭვირვალე და ღიაა. ამას იმსახურებს ქართველი ხალხი.
- რა იყო ყველაზე მნიშვნელოვანი მიღწევა თქვენთვის, როგორც ელჩისთვის, საქართველოში მუშაობის დროს და რა რჩება გამოწვევად?
საქართველომ სრულიად გადააჭარბა ჩემს მოლოდინს. ქართული სტუმართმოყვარეობა აქ [საქართველოში ელჩობამდე] ჩამოსვლამდეც განვიცადე: ერთხელ ანკარაში ქართველ დიპლომატთან ახალი წლის ბრწყინვალე აღნიშვნა მქონდა, როცა იქ ვმუშაობდი. ის ახლა ელჩია. მაშინ მე პირველად გავეცანი ქართულ სტუმართმოყვარეობას და მეგონა, რომ ასე ეს დიპლომატი და მისი ოჯახი იყვნენ, არც ვიცოდი, რომ მთელი ქვეყანა ასეთი თბილი, გულუხვი და სტუმართმოყვარეა.
ჩემთვის ძალიან კარგი გამოცდილება იყო აქ ჩამოსვლა, ამ ქვეყანაში მოგზაურობა, ამდენ შთამაგონებელ ქართველთან შეხვედრა, რომლებიც ბიზნესს ქმნიან, ან ეხმარებიან ქვეყანას დემოკრატიის აშენებაში, საქმიანობენ სხვადასხვა სფეროში, რაც საქართველოს აძლიერებს და აახლოებს ევროპულ მომავალთან.
ყველაფერი, რასაც აშშ-ში ვაკეთებთ, მხარს უჭერს იმას, რასაც საქართველოს მოქალაქეები ამბობენ, რომ სურთ: ძლიერი და უსაფრთხო ქვეყანა, კეთილდღეობა, ძლიერი, დივერსიფიცირებული ეკონომიკა, და რა თქმა უნდა, ძლიერი, დემოკრატიული ინსტიტუტები. რასაც აშშ ბოლო 20-30 წლის განმავლობაში აკეთებს, არის იმისთვის, რომ მხარი დაუჭიროს ქართველების სურვილს: ააშენონ ძლიერი, მდიდარი, დემოკრატიული ქვეყანა, რომელიც ევროპის გზაზეა.
რაც შევძელი ელჩობის 3.5-წლიანი პერიოდისას გამეკეთებინა ამის მხარდასაჭერად, ეს ჩემს უდიდეს მიღწევად მიმაჩნია. ყოველთვის დავაფასებ წვლილს, რომელიც ჩემმა გუნდმა, მე და საელჩომ შევიტანეთ. დიდი ჯილდოა, საშუალება გქონდეს, დაეხმარო ქართველებს მათი მიზნების მიღწევაში.
ზოგ შემთხვევაში ესენი იყვნენ ფერმერები, რომლებმაც შეძლეს სარძევე ფერმების გაზრდა, მეტი კენკრის, ჟოლოს და მოცვის დათესვა. ზოგ შემთხვევაში: დავეხმარეთ თხილის ფერმერებს ფაროსანას მოშორებაში. ეს დიდი პრობლემა იყო მაშინ, როცა მე ჩამოვედი საქართველოში.
ეს იყო მოსწავლეებისა და მასწავლებლების დახმარება სწავლების მეთოდების მოდერნიზებაში, განათლების სისტემის გაუმჯობესებაში. რა თქმა უნდა, იყო ბევრი მეწარმე და მათი კრეატიული იდეები, იქნება ეს მცირე ბიზნესის გაზრდა ან სტარტაპის იდეის ისეთ რამედ გადაქცევა, რასაც წვლილი შეაქვს საქართველოს ეკონომიკაში.
- თქვენი აზრით, რა უნდა გაითვალისწინოს ახალმა ელჩმა საქართველოში? დაახლოებით როდის იგეგმება მისი ჩამოსვლა?
დანიშნული ელჩი – დენიგანი მალე ჩამოვა, ალბათ გვიან ზაფხულს ან შემოდგომაზე. იგი ძალიან გამოცდილია და ერთ-ერთი საუკეთესო დიპლომატი, გამოცდილება აქვს ამ რეგიონში და ენერგეტიკაში, რაც ძალზე გამოსადეგი იქნება, ვინაიდან საქართველო განახლებადი ენერგიის და შუა კორიდორის განვითარებაზე მუშაობს.
ჩემი რჩევა იქნება, მან მოიაროს მთელი საქართველო. იმის ნახვა, რაც თბილისს გარეთაა, ძალიან ღირებულია – აჭარაში ჩამოსვლა, რაჭაში, იმერეთში, ყველა რეგიონში. მე ძალიან გამიმართლა, რომ წინა წელს მოვახერხე ყველა რეგიონში ვიზიტი ჩვენი დიპლომატიური ურთიერთობების 30 წლის იუბილეს აღსანიშნად. მომეწონა, რომ ამან აჩვენა, რა მრავალფეროვანია ეს ქვეყანა, ეს ასე კარგად არ ჩანს თბილისში.
რეგიონებში ხედავ სხვადასხვა ტრადიციას, ისტორიას, მათ გავლენას ქვეყნის სხვადასხვა ნაწილზე, მაშინ ხვდები, რა გასაოცარია და რთულია ქვეყანა. არის რაღაცები, რაც ყველა რეგიონს აერთიანებს – ესაა გასაოცარი სტუმართმოყვარეობა და თავისუფლებისა და დამოუკიდებლობის სიყვარული, ადამიანის უფლებების პატივისცემა, რაც თქვენი კულტურის ნაწილია. ჩემი რჩევა იქნება [ახალი ელჩის მიმართ], იმოგზაუროს რაც შეიძლება ხშირად და ესაუბროს რაც შეიძლება მეტ ქართველს.
- თუ ევროკავშირი ამ შემოდგომაზე კანდიდატის სტატუსს მოგვანიჭებს, ამის შემდეგ ხომ არ გადახედავს აშშ საქართველოსთან მიმართებაში სავიზო პოლიტიკას – უვიზო რეჟიმს ხომ არ დაუწესებს?
ეს განსხვავებული საკითხებია, ძალიან განსხვავებული გადაწყვეტილებები და პროცესები, თუმცა ვიცი, რომ არის სხვადასხვა გზა, რომლითაც ქართველებს აშშ-ს შეუძლიათ ეწვიონ. გვაქვს გაცვლითი პროგრამები. ვფიქრობ, ახლა აშშ-ში ათასამდე ქართველია სხვადასხვა პროგრამით და ვიზის სხვადასხვა კატეგორიით. არ მგონია, რომ ამ ორ მოვლენას შორის დიდი კავშირი იყოს.
ყოველთვის გვიხარია ქართველების ჩამოსვლა აშშ-ში. გვაქვს ჩვენი მოთხოვნები აშშ-ში შემომსვლელთათვის. ყოველთვის მივესალმებით ქართველების მონაწილეობას გაცვლით პროგრამებში. ბევრი მათგანი განათლებასთანაა დაკავშირებული, ზოგი ეხება კონკრეტულ თემას – გარემოს დაცვა, კლიმატის ცვლილება, ბიზნესის განვითარება. ბევრი გზაა, ქართველებისთვის, აშშ-ს ეწვიონ.
- რას ეტყოდით საქართველოს მოქალაქეებს, რომლებიც ამერიკაში მიემგზავრებიან არალეგალურად, მათ შორის, ძალიან საშიში გზებით? რა უნდა გააკეთოს საქართველოს ხელისუფლებამ მიგრაციის შესაჩერებლად?
ვეტყოდი, რომ ძალიან გთხოვთ, ეს არ გააკეთოთ, არ სცადოთ აშშ-ში არალეგალურად შემოსვლა. ეს ძალიან სახიფათოა, ძვირია, სიცოცხლეს რისკის ქვეშ აყენებს ბევრ შემთხვევაში, ეს ცუდი იდეაა. თუ დაგიჭერენ, მომავალში ვეღარ შეხვალთ აშშ-ში, ანუ უარს ამბობთ შესაძლებლობაზე, აშშ-ს ეწვიოთ ლეგალურად.
დიახ, ვიზის მიღებას ბევრი ნაბიჯი სჭირდება. ვცდილობთ მაქსიმალურად გავამარტივოთ. ვიცი, ზოგი ადამიანისთვის ეს რთულია, მაგრამ ძალიან გთხოვთ, დაიცვათ წესები, მივესალმებით თქვენს ლეგალურად ჩამოსვლას, მაგრამ ნუ ჩამოხვალთ არალეგალურად, ეს ძალზე სახიფათოა.
- რა უნდა გააკეთოს ამ ტენდენციის შესაჩერებლად საქართველოს მთავრობამ?
მთავრობამ უნდა განაგრძოს [იმაზე ზრუნვა], რომ აქ დარჩენა ხალხისთვის მიმზიდველი იყოს. არის რამდენიმე პროგრამა, რაც, ვფიქრობ, ამას ემსახურება.
გუშინ შეხვედრა მქონდა ქართველ ანტერპრენერებთან, GITA-ს, საქართველოს ინოვაციებისა და ტექნოლოგიების სააგენტოს დახმარებით. ბათუმში არის ტექნოლოგიური პარკი. ასეთი სააგენტოები ეხმარებიან ქართველებს ოცნებების ახდენაში, ბიზნესის დაწყებასა და გაზრდაში აქ, საქართველოში – სწორედ ამას ეძებენ ქართველები. უმრავლესობას, ვისაც შევხვედრივარ, საქართველოს დატოვება არ სურს და საქართველო უყვარს. ვხედავ, რატომაც – ბრწყინვალე ქვეყანაა.
სხვა ქვეყნებში სტუმრობა და მოგზაურობა, მათი გამოცდილებიდან იდეების ჩამოტანა ძალიან კარგია, მაგრამ მიმაჩნია, რომ ქართველებს აქ დარჩენა, ოჯახის გაზრდა და ბიზნესის წარმოება თავიანთ ქვეყანაში სურთ.
- თქვენი დაკვირვება გაგვიზიარეთ: ქართული პოლიტიკის სისუსტე რა არის – რა უნდა გააკეთოს საზოგადოებამ, რომ ხელისუფლებამ 12-პუნქტიანი ვალდებულება შეასრულოს და რა უნდა მოუხერხოს ოლიგარქის ჩრდილოვან მმართველობას?
ვფიქრობ, წინააღმდეგობრივი შეხედულება არსებობს ისეთი პარლამენტის შესახებ, სადაც არის სხვადასხვა ხედვა, სადაც შეიძლება დებატი ცივილიზებულად და პატივისცემით წარიმართოს. პარლამენტს გარეთაც, როცა არსებულ პოლიტიკურ გარემოს ხალხის ყურადღება გადააქვს ნამდვილი პრობლემებისგან, რომლებზეც უნდა იყოს ქვეყნის ფოკუსი, ეს ხალხს არ ემსახურება.
დეპუტატები არიან არჩეული ხალხის მიერ მათ წარმოსადგენად პარლამენტში. ვფიქრობ, ხალხს არ სურს უყუროს, თუ როგორ ჩხუბობენ და კამათობენ ისინი პარლამენტში. ხალხს სურს უყუროს, როგორ დებატობენ დეპუტატები საკითხების შესახებ და იღებენ კანონმდებლობას ქვეყნის წინსვლისთვის.
კანონმდებლობას ისეთ მნიშვნელოვან საკითხებზე, როგორიცაა: ეკონომიკა, ჯანდაცვა და განათლება, რეფორმები, მაგალითად, მართლმსაჯულების რეფორმა და სხვა რეფორმები, რომლებიცაა ნაწილი ძლიერი დემოკრატიული ინსტიტუტების განვითარების და ძლიერი ეკონომიკის შექმნის, რომელსაც ძალუძს მედეგობა რუსული აგრესიის წინაშე. ესაა მნიშვნელოვანი სამუშაო პოლიტიკური ლიდერებისთვის.
იმედი მაქვს, რომ პარლამენტის შენებაში და პროცედურული წესების შექმნაში ამდენი ენერგიის ჩადების შემდეგ, ლიდერები გამოიყენებენ პარლამენტს, როგორც იმ ადგილს, სადაც მიდის დებატი საკითხებზე და იღებენ კანონმდებლობას, რომელიც ქვეყანას გააძლიერებს.
- რა ეტაპზეა საქართველოსა და აშშ-ს პარტნიორობა ახლა? „ნეტგაზეთთან“ ინტერვიუში თქვენ თქვით, რომ აშშ საქართველოს ზურგს არ შეაქცევს. იმედია, არც საქართველოს პოლიტიკური ლიდერები შეგვაქცევენ ზურგსო. რა იქნება თქვენთვის იმის ნიშანი, ინდიკატორი, რომ საქართველოს მთავრობამ, პოლიტიკურმა ლიდერებმა ზურგი შეაქციეს სტრატეგიულ პარტნიორს-აშშ-ს?
იმედია, ამას არასდროს ვნახავთ. ვიტყვი, რომ ურთიერთობები ძლიერია და ხანგრძლივ ვადაზეა გათვლილი. ბუნებრივია, გვექნება უთანხმოებები, მეგობრობაში ეს გარდაუვალია. მათი განხილვა პატივისცემით და ცივილიზებულად ასევე მნიშვნელოვანია. ასე მივალთ მოგვარებამდე, ერთმანეთის პოზიციის უკეთ გაგებამდე. ამის გაკეთებას ყოველთვის ვცდილობთ და ამის ერთმანეთს შორის, კერძო შეხვედრების დროს დახურულად გაკეთება გვირჩევნია, რადგან დიპლომატები ვართ. ზოგჯერ საჯაროდაც. ეს იმიტომ, რომ ვზრუნავთ საქართველოს წარმატებაზე.
ამდენი წლის განმავლობაში პარტნიორები ვართ და ვიცით, რომ ქართველი ხალხი ერთგულია ევროპული მომავლის, რომელიც დაფუძნებულია კანონის უზენაესობაზე, დემოკრატიაზე, თავისუფლებაზე, ადამიანის უფლებებზე. სწორედ ამ ელემენტებით, პრინციპებით, ცხოვრობს ნატოს და ევროკავშირის თითოეული წევრი. გვინდა, საქართველოც შეუერთდეს ამ ერთა ოჯახს.
ეს ნიშნავს, რომ საქართველომ უნდა გაატაროს რეფორმები და რთული სამუშაო გასწიოს, რომელიც გააძლიერებს კანონის უზენაესობას, დემოკრატიულ ინსტიტუტებს და ამავდროულად უზრუნველყოფს ძლიერ ეკონომიკას და თავდაცვას.
დარწმუნებული ვართ, რომ საუკეთესო დაცვა და მეზობლის აგრესიის შემაკავებელი არის ძლიერი დემოკრატია და ეკონომიკა. ამიტომაც, ყველაფერი, რასაც ვაკეთებთ, მხარს უჭერს თქვენს მცდელობებს: აშენდეს ძლიერი საქართველო.
ვფიქრობ, ქვეყანას გასაოცარი პროგრესი ჰქონდა ბოლო 20-25 წელი. შეხედეთ თავდაცვის ძალებს, სანაპირო დაცვას, მესაზღვრეებს – ესენი ბევრად ძლიერი და შესაძლებლობების მქონე ინსტიტუტებია საზღვრის დაცვის, სტაბილურობისა და უსაფრთხოების უზრუნველყოფის თვალსაზრისით, რომელიც ქართველებს სჭირდებათ და უნდათ.
იგივეა ეკონომიკაშიც – იგი დივერსიფიცირდა და ასე ძალიან აღარაა დამოკიდებული რუსეთზე, არცაა საჭირო, რომ იყოს. ბაზრების ბევრი ალტერნატივაა. ბევრი ქართული ბიზნესი და ფერმერი რუსეთს შორდება და გადადის უფრო სანდო ბაზრებზე. რთულია რეფორმების გატარება, რომლებიც საჭიროა დემოკრატიის აშენებისთვის, საბჭოთა მოდელიდან ისეთზე გადასვლა, რომელიც ქართველების სასურველ უსაფრთხოებას და სტაბილურობას უზრუნველყოფს.
ევროპისკენ გზაზე, ევროკავშირისა და ნატოსკენ გზაზე, 100%-ით გვინდა მხარი დაგიჭიროთ. საბოლოო ჯამში კი, ხელისუფლების, ხალხისა და პოლიტიკური ლიდერების გასაკეთებელია სამუშაო. ჩვენ მხარდაჭერა შეგვიძლია. მაგრამ როგორც ვთქვი, აშშ ზურგს არ შეაქცევს საქართველოს და იმედი გვაქვს, არც საქართველოს პოლიტიკური ლიდერები შეაქცევენ ზურგს აშშ-ს. ახლა კარგი პარტნიორობა გვაქვს, ერთად ვმუშაობთ სხვადასხვა საკითხზე. დარწმუნებული ვარ, პარტნიორობა მხოლოდ გაძლიერდება. ძალიან ბევრი გვაქვს საკეთებელი.
- რუსულ პროპაგანდაზე მინდა გკითხოთ: რუსეთ-უკრაინის ომის დროს რუსულ პროპაგანდას ხშირად ემთხვევა საქართველოს ხელისუფლების გზავნილები. თქვენი აზრით, რამდენად იზრდება საფრთხე, როცა კრემლის რუპორი არიან არამხოლოდ ცალკეული ჯგუფები, არამედ უშუალოდ მთავრობა?
ძალიან არაკომფორტული უნდა იყოს ქართველებისთვის ზახაროვას, რუსეთის საგარეო უწყების, რუსეთის საგარეო მინისტრის ან დუმის სპიკერის მოსკოვში ნათქვამის თბილისში გამეორება. მე ამით გაკვირვებული ვარ. ვიცით, რომ ასეთი პროპაგანდის მიზანი ქართველების გაყოფაა, ყურადღების გადატანა და ერთმანეთში ბრძოლაა, და საზოგადოების დაბნევაა, რადგან ხალხი არ იყოს დარწმუნებული, რა ხდება.
ეს ძალზე მნიშვნელოვანი დროა. ამ ტაქტიკას რუსეთი დიდი ხანია იყენებს. ქართველებს ეს საბჭოთა პერიოდიდან, უფრო ადრინდელი პერიოდიდანაც კი, ეცოდინებათ. მნიშვნელოვანია, ფხიზლად ვიყოთ ასეთი პროპაგანდის მიმართ, რომელიც ცდილობს, შეარყიოს საქართველოს ერთგულება ევროპული მომავლის მიმართ; საქართველოს მეგობრობა და პარტნიორობა აშშ-სთან და ევროკავშირის წევრებთან. ესაა პროპაგანდის მიზანი – საქართველო ევროპული გზიდან გადაიყვანოს.
რაც ბოლო დროს ვნახეთ – ასი ათასამდე ადამიანი გამოვიდა მთელს ქვეყანაში იმის სათქმელად, რომ ევროპა სურს. საქმე ეხებოდა არა პოლიტიკას, პარტიებს, პოლიტიკოსებს, არამედ ხალხმა მშვიდობიანად გამოხატა ერთგულება ევროპული მომავლის მიმართ. ამ გზავნილის იგნორირება არავის შეუძლია და არცერთმა მთავრობამ არ უნდა უგულებელყოს ის.
ახლა დროა, ყველა ქართველმა, განსაკუთრებით პოლიტიკურმა ლიდერმა, შეწყვიტოს დაპირისპირება, გაერთიანდეს საქმის კეთებაზე, რათა აჩვენოთ ევროკავშირს საქართველოს სრული ერთგულება ევროკავშირისა და ნატოს წევრობისთვის საჭირო რეფორმებისადმი.
იმუშავეთ, რათა დეკემბერში ყველამ ვიზეიმოთ კანდიდატის სტატუსის მიღება. ეს მარტო მაშინ მოხდება, თუ საქართველო შეასრულებს ამისთვის საჭირო რთულ სამუშაოს.
