შინაგან საქმეთა სამინისტროს სხვადასხვა სტრუქტურულ ერთეულში 2021 წელს თანამშრომლებზე გაცემული, 23 მილიონ 344 ათას 352 ლარის ფულადი ჯილდო, სახელფასო დანამატი და ერთჯერადი სოციალური დახმარებები დაუსაბუთებელია.
ეს აღნიშნულია იმ სარეკომენდაციო წერილში, რომლითაც სახელმწიფო აუდიტის სამსახურმა შინაგან საქმეთა სამინისტროს ხელმძღვანელობას გაუგზავნა.
„ბატონო ვახტანგ, სახელმწიფო აუდიტის სამსახურმა განახორციელა საქართველოს შინაგან საქმეთა სამინისტროს 2021 წლის 31 დეკემბრით დასრულებული პერიოდისთვის მომზადებული კონსოლიდირებული ფინანსური ანგარიშგების აუდიტი, შედეგად გაიცა უარყოფითი დასკვნა.“ – წერს შს მინისტრ ვახტანგ გომელაურს გენერალური აუდიტორი.
აუდიტის დოკუმენტში აღნიშნულია, რომ 2021 წლის მარტში 5 360 თანამშრომელზე გაცემულია 696 540 ლარის ფულადი ჯილდო, ხოლო, დეკემბერში 27 886 თანამშრომელზე – 8 285 400 ლარი.
„კანონის მიხედვით, ფულადი ჯილდო წარმოადგენს საჯარო დაწესებულებაში დასაქმებული პირის (გარდა მოხელისა) მიერ მისთვის დაკისრებული ფუნქციების ზედმიწევნით და სანიმუშოდ შესრულებისათვის, ხანგრძლივი და კეთილსინდისიერი სამსახურისათვის ან/და მის მიერ განსაკუთრებული სირთულის ან მნიშვნელობის დავალების შესრულებისთვის გათვალისწინებულ წახალისების საშუალებას.
2021 წლის მარტსა და დეკემბერში სამინისტროს სტრუქტურულ ერთეულებში გაცემული ფულადი ჯილდო კი არ არის საკმარისად დასაბუთებული, ვინაიდან არ არის სათანადოდ დოკუმენტირებული ბრძანების საფუძველი და ფულადი ჯილდოს გაცემის მოტივი“, – აცხადებს აუდიტი.
რაც შეეხება სახელფასო დანამატს, აუდიტი ხაზს უსვამს, რომ ეს დანამატი კანონით წარმოადგენს საჯარო დაწესებულებაში დასაქმებული პირის მიერ ზეგანაკვეთური სამუშაოს ან/და დამატებითი ფუნქციების შესრულებისათვის, მათ შორის, ღამის საათებში, დასვენების/უქმე დღეს და ჯანმრთელობისათვის რისკის შემცველ სამუშაო პირობებში საქმიანობისათვის განსაზღვრულ თანხას.
შს სამინისტროს სტრუქტურულ ერთეულებში დასაქმებულ ზოგიერთ თანამშრომელს კი, შინაგან საქმეთა მინისტრის ბრძანებებით, 2021 წლის 1-ლი იანვრიდან წინასწარ, მთელი წლის განმავლობაში დაენიშნათ ყოველთვიური დანამატი.
აუდიტის მიხედვით, შსს-ში წინასწარ დანიშნულმა და შემდეგ გაცემულმა თანხამ, მთელი წლის განმავლობაში ჯამში 10 475 464 ლარი შეადგინა. ეს თანხა სამინისტროში სხვადასხვა სტრუქტურული ერთეულების 7 184 თანამშრომელზე გადანაწილდა.
„ზეგანაკვეთური სამუშაო რეჟიმი დამახასიათებელია სამინისტროს სისტემისთვის, თუმცა დანამატის გაცემა არ იყო სათანადოდ დასაბუთებული.“ – აცხადებს აუდიტი.
აუდიტი ასევე თვლის, რომ „2021 წლის დეკემბერში ამავე სამინისტროს სტრუქტურებში, შს მინისტრის ბრძანებით გაცემული ერთჯერადი სოციალური დახმარებებიც არ არის საკმარისად დასაბუთებული, ვინაიდან არ არის სათანადოდ დოკუმენტირებული ბრძანების საფუძველი და დახმარების გაცემის მოტივი.“
აუდიტის დოკუმენტის მიხედვით, 2021 წელს, შს სამინისტროს სხვადასხვა სტრუქტურულ ერთეულებში 5 504 თანამშრომელზე ჯამში 3 886 948 ლარის სოციალური დახმარება გაიცა.
„სოციალური დახმარების თანხების გამჭვირვალობის უზრუნველსაყოფად, მნიშვნელოვანია, სამინისტრომ უზრუნველყოს ერთჯერადი დახმარებების გაცემა შესაბამისი დოკუმენტური დასაბუთების საფუძველზე“, – წერს აუდიტი ვახტანგ გომელაურს.
