„არ სცადოთ აშშ-ში არალეგალურად შემოსვლა. ეს ძალიან სახიფათოა,“ – ამბობს კელი დეგნანი, აშშ-ს ელჩი საქართველოში. მას ვკითხეთ, გადახედავს თუ არა აშშ საქართველოსთან სავიზო პოლიტიკას და ხომ არ ამოქმედდება უვიზო რეჟიმი, თუ ევროკავშირი შემოდგომაზე კანდიდატის სტატუსს მოგვანიჭებს?
„ეს განსხვავებული საკითხებია, ძალიან განსხვავებული გადაწყვეტილებები და პროცესები, თუმცა ვიცი, რომ არის სხვადასხვა გზა, რომლითაც ქართველებს აშშ-ს შეუძლიათ ეწვიონ. გვაქვს გაცვლითი პროგრამები. ვფიქრობ, ახლა აშშ-ში ათასამდე ქართველია სხვადასხვა პროგრამით და ვიზის სხვადასხვა კატეგორიით. არ მგონია, რომ ამ ორ მოვლენას შორის დიდი კავშირი იყოს.
ყოველთვის გვიხარია ქართველების ჩამოსვლა აშშ-ში. გვაქვს ჩვენი მოთხოვნები აშშ-ში შემომსვლელთათვის. ყოველთვის მივესალმებით ქართველების მონაწილეობას ჩვენს გაცვლით პროგრამებში. ბევრი მათგანი განათლებასთანაა დაკავშირებული, ზოგი ეხება კონკრეტულ თემას – გარემოს დაცვა, კლიმატის ცვლილება, ბიზნესის განვითარება. ბევრი გზაა, ქართველებისთვის, აშშ-ს ეწვიონ,“ – უთხრა კელი დეგნანმა „ბათუმელებს“.
ელჩს ასევე ვკითხეთ, რას ეტყოდა საქართველოს მოქალაქეებს, რომლებიც ამერიკაში არალეგალურად მიემგზავრებიან.
„ვეტყოდი, რომ ძალიან გთხოვთ, ეს არ გააკეთოთ, არ სცადოთ აშშ-ში არალეგალურად შემოსვლა. ეს ძალიან სახიფათოა, ძვირია, სიცოცხლეს რისკის ქვეშ აყენებს ბევრ შემთხვევაში, ეს ცუდი იდეაა. თუ დაგიჭერენ, მომავალში ვეღარ შეხვალთ აშშ-ში, ანუ უარს ამბობთ შესაძლებლობაზე აშშ-ს ეწვიოთ ლეგალურად.
დიახ, ვიზის მიღებას ბევრი ნაბიჯი სჭირდება,და ვცდილობთ მაქსიმალურად გავამარტივოთ. ვიცი, ზოგი ადამიანისთვის ეს რთულია, მაგრამ ძალიან გთხოვთ, დაიცვათ წესები, მივესალმებით თქვენს ლეგალურად ჩამოსვლას, მაგრამ ნუ ჩამოხვალთ არალეგალურად, ეს ძალზედ სახიფათოა,“- განაცხადა კელი დეგნანმა.
რა უნდა გააკეთოს ამ ტენდენციის შესაჩერებლად საქართველოს მთავრობამ? – ვკითხეთ აშშ-ს ელჩს საქართველოში, კელი დეგნანს.
„მთავრობამ უნდა განაგრძოს [იმაზე ზრუნვა], რომ აქ დარჩენა ხალხისთვის მიმზიდველი იყოს. არის რამდენიმე პროგრამა, რომლებიც, თუ არ ვცდები, ამაზეა მიმართული.
შეხვედრა მქონდა გუშინ ქართველ ანტერპრენერებთან, GITA-ს დახმარებით, ბათუმში. ასეთი სააგენტოები, რომლებიც ეხმარებიან ქართველებს ოცნებების ახდენაში, ბიზნესის დაწყებასა და გაზრდაში აქ, საქართველოში – სწორედ ამას ეძებენ ქართველები. უმრავლესობას, ვისაც შევხვედრივარ, საქართველოს დატოვება არ სურს და საქართველო უყვარს. ვხედავ, რატომაც – ბრწყინვალე ქვეყანაა.
სხვა ქვეყნებში სტუმრობა და მოგზაურობა, მათი გამოცდილებიდან იდეების ჩამოტანა, ძალიან კარგია, მაგრამ მგონია, რომ ქართველებს დარჩენა, ოჯახის გაზრდა და ბიზნესის წარმოება თავიანთ ქვეყანაში სურთ,“ – გვითხრა კელი დეგნანმა.
