საქართველოს საზღვაო ტრანსპორტის სააგენტო უარყოფს რუსული სააგენტოების მიერ გავრცელებულ ინფორმაციას, რომლის თანახმადაც რუსული საკრუიზო ლაინერი „პეტრე დიდი“ საქართველოს ნავსადგურებში შემოვა.
სააგენტო სოვა 22 აპრილს გამოქვეყნებულ სტატიაში წერს, რომ რუსეთში 2023 წლიდან ოპერირებას დაიწყებს ახალი ტურისტული საკრუიზო ლაინერი „პეტრე დიდი“. საკრუიზო გემი თავის პირველ მოგზაურობაში მიმდინარე წლის აგვისტოში წავა.
გამოცემა Vestnik Kavkaza-ს ცნობით კი, შავ ზღვაში საკრუიზო ლაინერი შევა ნოვოროსიისკის, სოჭის, ბათუმისა და სტამბოლის პორტებში.
რუსული საინფორმაციო სააგენტოების მიერ გავრცელებულ ინფორმაციას უარყოფს საზღვაო ტრანსპორტის სააგენტო და მას აბსოლუტურ სიცრუეს უწოდებს.
„ზოგიერთი მედიასაშუალებით გავრცელებულ ინფორმაციასთან დაკავშირებით, რომელიც შეეხება საქართველოსა და რუსეთის ფედერაციას შორის საზღვაო-სამგზავრო მიმოსვლის დაწყებას, საქართველოს ეკონომიკის სამინისტროს საზღვაო ტრანსპორტის სააგენტო ერთმნიშვნელოვნად აცხადებს, რომ საქართველოს რუსეთის საზღვაო ნავსადგურებთან არ აქვს საზღვაო-სამგზავრო ან საკრუიზო მიმოსვლა.
გამოცემა VESTIKAVKAZA-ს მიერ გავრცელებული ინფორმაცია, რუსული საკრუიზო საზღვაო ლაინერის „პეტრე დიდის“ საქართველოს ნავსადგურებში 2023 წელს შესაძლო შემოსვლასთან დაკავშირებით, აბსოლუტური სიცრუეა,“ – ნათქვამია სააგენტოს განცხადებაში.
საკრუიზო ლაინერი „პეტრე დიდი“ რუსეთში აშენდა და სერვისი, რომლის მიღებაც ლაინერზეა შესაძლებელი, ხუთვარსკვლავიანი სასტუმროს სერვისის მსგავსია. გემს ერთდროულად 300 მგზავრის გადაყვანა შეუძლია. საკრუიზო ლაინერზე განთავსებულია რესტორანი, კაიუტები, საცურაო აუზი და თეატრი.
