„საქართველოს მომავალი დიდწილად მოსამართლეების ხელშია,“ – უთხრა დღეს, 20 აპრილს, აშშ-ის ელჩმა საქართველოში, კელი დეგნანმა საკონსტიტუციო სასამართლოს მოსამართლეებს.
„ეს ძალიან საპატიო და მნიშვნელოვანი პასუხისმგებლობაა. საქართველოში ყოფნისას ელჩი დეგნანი ძალიან ბევრ სასამართლოს ესტუმრა, გაიცნო და ესაუბრა უამრავ მოსამართლეს მათი საქმიანობისა და გამოწვევების შესახებ.
საქართველოს საკონსტიტუციო სასამართლოში ვიზიტისას ელჩმა განსაკუთრებით აღნიშნა ამ სასამართლოს მნიშვნელობა საქართველოს დემოკრატიზაციის გზაზე და იმედი გამოთქვა, რომ სასამართლოს მიერ მიღებული გადაწყვეტილებები ყოველთვის იქნება ნაკარნახევი საქართველოს საუკეთესო ინტერესებიდან გამომდინარე. შეერთებული შტატები ამ მიზნისთვის საქართველოსთან თანამშრომლობის ერთგული რჩება,“ – აღნიშნულია საქართველოში აშშ-ის საელჩოს მიერ გავრცელებულ განცხადებაში.
აშშ-ს ელჩი საქართველოში საკონსტიტუციო სასამართლოს მოსამართლეებს შეხვდა. ფოტოები საკონსტიტუციო სასამართლოს ოფიციალური გვერდიდან
საკონსტიტუციო სასამართლოს მიერ გავრცელებული ინფორმაციის თანახმად, „შეხვედრა ინტერაქციულ ფორმატში წარიმართა, რა დროსაც საკონსტიტუციო სასამართლოს მოსამართლეებსა და აპარატის თანამშრომლებს ჰქონდათ ელჩთან კითხვების დასმის შესაძლებლობა საქართველოსა და ამერიკის შეერთებულ შტატებს შორის სამართლებრივ სფეროში თანამშრომლობის მიმართულების სხვადასხვა საკითხზე“.
მთავარი ფოტო: საკონსტიტუციო სასამართლოს მოსამართლეები და კელი დეგნანი – აშშ-ს სრულუფლებიანი ელჩი საქართველოში. ფოტო აშშ-ს საელჩოს ფეისბუქგვერდიდან.
