ბრიტანეთის დაზვერვის დღევანდელი მონაცემებით, რუსეთის თავდაცვის სამინისტრომ იმისათვის, რომ უკრაინის ფრონტზე წასასვლელად „მოხალისეები“ მიიტყუოს, ახალი მასშტაბური საინფორმაციო კამპანია წამოიწყო.
შესაბამისი რეკლამები გამოჩნდა რუსულ სოციალურ ქსელებში, ბილბორდებსა და ტელევიზიებში. დაზვერვის ცნობით, ამ შემთხვევაშიც პროპაგანდა იყენებს რუსების გონებაზე ზემოქმედების ტრადიციულ მეთოდებს. ამის შესახებ ბრიტანეთის თავდაცვის დაზვერვა Twitter-ის საკუთარ გვერდზე წერს.
დაზვერვის შეფასებით, რუსეთი ცდილობს „ითამაშოს“ კაცურ სიამაყეზე და „ნამდვილ მამაკაცებს“ ომშიც შესაბამისი ენის გამოყენებით იწვევს. აქვე მითითებულია ფინანსურ სარგებელზე, რომელსაც უკრაინის წინააღმდეგ ომში მონაწილეობის შემთხვევაში რუსები მიიღებენ.
ახლა რუსი კაცების მობილიზაციაზე კონკურენცია გაჩაღებულია რუსეთის თავდაცვის სამინისტროსა და კერძო სამხედრო დაჯგუფება „ვაგნერს“ შორის. მას შემდეგ, რაც დაჯგუფებამ დაკარგა წვდომა პატიმრების რეკრუტირებაზე, მისი სამიზნე გახდა ომისთვის შესაფერის რუსი კაცები, რომელთაც სამხედრო ასაკი აქვთ.
თუმცა, დაზვერვას სათუოდ მიაჩნია, რომ რუსეთი ისევ შეძლებს ომისთვის 400 000 „მოხალისის“ მობილიზებას. ამ ციფრს ადრე რუსეთის ფედერაციის თავდაცვის სამინისტრო ასახელებდა.
„ხელისუფლება, დიდი ალბათობით, შეეცდება, რაც შეიძლება დიდხანს აირიდოს თავიდან რაიმე სიახლე სავალდებულო მობილიზაციაზე, რათა მინიმუმამდე შეამციროს საზოგადოებაში შიდა უთანხმოება“, – წერს ბრიტანეთის დაზვერვა.
