ფსიქოლოგიური აგრესია, როგორიცაა ყვირილი და ბავშვისთვის დამამცირებელი სახელების წოდება, დაფიქსირდა ბავშვების 29 პროცენტის შემთხვევაში, ხოლო ბავშვების 5 პროცენტი დაექვემდებარა ფიზიკურ დასჯას, როგორიცაა ცემა, სილის გაწნა, ყურის აწევა ან დარტყმა.
სასტიკი ფიზიკური დასჯა, მაგალითად – მთელი ძალით ცემა, შეეხო ბავშვების ერთ პროცენტზე ნაკლებს. ამის შესახებ UNICEF-ისა და საქსტატის მიერ ერთობლივად ჩატარებულ უახლეს კვლევაში წერია.
ბავშვების აღზრდისას ფიზიკური და ფსიქოლოგიური დასჯის გამოყენება დიდი ხანია საქართველოში სერიოზულ პრობლემად მიიჩნევა. 2018 წელს ჩატარებულმა MICS კვლევამ გამოავლინა, რომ აღზრდის მეთოდი არაძალადობრივი იყო 1-14 წლის ბავშვების 28 პროცენტში. ბავშვების 66 პროცენტის მშობლებმა/ოჯახის წევრებმა აღიარეს ფსიქოლოგიური აგრესიის გამოყენება, ხოლო ფიზიკური დასჯა ბავშვების 31 პროცენტს შეეხო.
„ყველაზე შემაშფოთებელი ისაა, რომ ბავშვების თითქმის 5 პროცენტმა გამოსცადა სასტიკი დასჯა, როგორიცაა: სახეში, თავსა ან ყურებზე გარტყმა და/ან მთელი ძალით ცემა“, – წერია კვლევაში.
UNICEF-ისა და საქსტატის მიერ ერთობლივად ჩატარებული „ბავშვთა კეთილდღეობის გამოკვლევის“ მონაცემების მიხედვით, მდგომარეობა ამ მხრივ გაუმჯობესებულია, თუმცა:
ბავშვების 29.4 პროცენტის მშობლებმა/ოჯახის წევრებმა აღიარეს ფსიქოლოგიური აგრესიის გამოყენება, ხოლო ფიზიკური დასჯა ბავშვების 4.8 პროცენტს შეეხო.
არაძალადობრივი მეთოდები გამოყენებული იყო 2-17 წლის ბავშვების 62.5 პროცენტის მიმართ.
სასტიკი ფიზიკური დასჯის მეთოდების გამოყენება ნახსენები იყო ბავშვების 0.1 პროცენტის მიმართ.
დასჯის ფსიქოლოგიურ და ფიზიკურ მეთოდებს იყენებდნენ უფრო ხშირად ფუნქციური სირთულეების მქონე ბავშვების მიმართ, ვიდრე სხვა ბავშვებში. ფუნქციური სირთულეების მქონე ბავშვების 12.4 პროცენტს შეეხო ოჯახის წევრის მხრიდან ფიზიკური დასჯა და 37.3 პროცენტის მიმართ გამოყენებული იყო ფსიქოლოგიური აგრესია.
შესაბამისი მაჩვენებლები ფუნქციური სირთულეების არმქონე ბავშვებში არის 4.4% და 29.8%.
ასევე, დასჯის ძალადობრივი მეთოდების გამოყენება უფრო ხშირად ხდება ქალაქში მცხოვრებ ბავშვებზე (33.3%), ვიდრე სოფლად მცხოვრები ბავშვების მიმართ. აღზრდის ძალადობრივი მეთოდების გამოყენების ალბათობა ბიჭებში 46%-ით მაღალია.
2018 წელს MICS-ის რესპონდენტების 8.1% ფიქრობდა, რომ ძალადობრივი მეთოდების გამოყენება საჭიროა ბავშვის აღზრდის და/ან მისი სათანადო განათლებისთვის. „ბავშვთა კეთილდღეობის გამოკვლევის“ თანახმად, ეს წილი 2022 წელს 1.6 პროცენტამდე არის დაკლებული.
