ბათუმში, ნინოშვილის ქუჩაზე, #1-ში მდებარე მიწის ნაკვეთს და შენობას ბათუმის მერია ელექტრონულ აუქციონზე საიჯარო წესით გასასხვისებლად გაიტანს. ბოლო წლების განმავლობაში აქ კაფე „ნეოკა“ ფუნქციონირებდა.
საჯარო რეესტრის ამონაწერის მიხედვით, ყოფილ მოიჯარეს შპს „აჭარა ბათუმს“ საიჯარო ხელშეკრულების ვადა 2025 წლის ივლისამდე ჰქონდა.
ბათუმის მერიის ინფორმაციით, ნინოშვილის ქუჩის #1 ში მდებარე ქონებას აუქციონზე ამ ქონების საბაზრო ღირებულების 5 პროცენტის ფასად გაიტანს.
საერთო ჯამში 990 კვ.მეტრ ტერიტორიას და შენობას საიჯარო წესით გასასხვისებლად აუქციონზე 361 600 ლარად გაიტანენ, ამას დაემატება ბიჯის ოდენობაც.
ამ დრომდე ნინოშვილის ქუჩაზე, #1-ში მდებარე მუნიციპალური ქონებით სარგებლობაზე მერიასთან ხელშეკრულება ჰქონდა გაფორმებული შპს „აჭარა ბათუმს“. კომპანია 2011 წელს არის დაფუძნებული და მისი მესაკუთრე თურქეთის მოქალაქე ერჩიმ ტოსიალია.
აუქციონზე გასატანად მომზადებულ მიწის ნაკვეთთან ახლოს გაყიდვების ოფისი აქვს სამშენებლო კომპანია „გუმბათს“. ადრე აქ კაფე „გარდენსი“ ფუნქციონირებდა. ამ შემთხვევაში მოიჯარე შპს „აჭარგანათებაა“, მერიის ექსკლუზიური კონტრაქტორი ქალაქის განათებისა და სადღესასწაულოდ მორთვის სამუშაოების მიმართულებით. „გუმბათი“ ქვემოიჯარედ ფიქსირდება.
ადგილი, სადაც „გუმბათის“ ოფისია განთავსებული, აჭარის მთავრობას ეკუთვნის, შესაბამის უწყებასთან „აჭარგანათებას“ 2018 წელს 10 -წლიანი საიჯარო ხელშეკრულება აქვს გაფორმებული.
„ივანიშვილი ბორგავს“ – მიიჩნევს ივანიშვილის ჯგუფის ყოფილი წევრი მურმან დუმბაძე საკადრო ცვლილებებზე, რაც გუშინ, 21 აპრილს, ბრიფინგზე ირაკლი კობახიძემ გაგვაცნო.
ამ საკადრო ცვლილებების მიხედვით, მაგალითად, ბრიტანეთისგან დასანქცირებული სულხან თამაზაშვილი შს მინისტრი გახდება.
„ბათუმელები“ რამდენიმე პოლიტიკოსს ესაუბრა ბოლო საკადრო ცვლილებებზე „ოცნებაში“ და იმაზე, თუ რა იყო მნიშვნელოვანი იმ ამბავში, რომ სულხან თამაზაშვილი 2025 წლის აპრილიდან აჭარის მთავრობის თავმჯდომარე იყო?
რას აჩვენებს ივანიშვილის ბოლო საკადრო ცვლილებები, მათ შორის, ბრიტანეთის მიერ სანქცირებული თამაზაშვილის შს მინისტრად დანიშვნა?
„ეს საკადრო ცვლილებები გამოხატავს იმას, რომ ბიძინა ივანიშვილი ბორგავს. ბიძინა ივანიშვილი შფოთავს, ბიძინა ივანიშვილმა ვერ დაალაგა ქვეყანა,“ – ამბობს მურმან დუმბაძე, პოლიტიკოსი, „ქართული ოცნების“ ერთ-ერთი ყოფილი ლიდერი.
რის მიღწევას ცდილობს ამ სვლით ივანიშვილი? – ვკითხეთ ივანიშვილის გუნდის ყოფილ წევრს და თავისი დაკვირვების გაზიარება ვთხოვეთ:
„როცა დანიშნეს სულხან თამაზაშვილი, მაშინ ვთქვი, რომ ეს იქნებოდა მოკლევადიანი. სულხან თამაზაშვილი პოლიტიკოსი არ არის, ეს არის ძალოვანი სტრუქტურების წარმომადგენელი… უნდა ვივარაუდოთ, რომ ვინც იქნება ახალი, ისიც ძალიან მოკლევადიანი იქნება.
510 დღეა ბათუმსა თუ თბილისში იკრიბებიან იდეალისტი ადამიანები და აპროტესტებენ იმას, რაც ხდება ქვეყანაში. ეს არის საერთო ზოგადი განწყობა საქართველოს მოქალაქეებისა… თუ არჩევნებს გადახედავთ, 2025 წელს პრაქტიკულად ხალხი არ მივიდა. ასეთი დაბალი დასწრება არჩევნებზე საქართველოს ისტორიას დამოუკიდებლობის დღიდან არ ჰქონია. ეს იმას ნიშნავს, რომ მოქალაქე მიმდინარე ხელისუფლებას დე იურედ არ ცნობს.
ივანიშვილს კი, ასეთი გადაწყვეტილებებით დრო გაჰყავს: წარმოიდგინეთ, ჩვენ ახლა ვსაუბრობთ თემაზე, რომელიც 137-ე თემაა საქართველოს მოქალაქისთვის. მთავარი თემა არის ტერიტორიების საკითხი, ეკონომიკა, ევროპასთან ინტეგრაცია… ივანიშვილი ფიქრობს, რომ ასეთი მიდგომებით უფრო გაახანგრძლივებს თავის ხელისუფლებას და ეს რაღაცნაირად გამოსდის კიდეც – 14 წელია ხელისუფლებაშია.
საქართველოში დამოუკიდებლობის დღიდან დღემდე ვერცერთმა ხელისუფლებამ ეს ვერ შეძლო, მაგრამ პოლიტიკაში მოვლენები ძალიან სწრაფად შეიძლება განვითარდეს. მთავარია, რომ პროტესტი არსებობს, დასავლეთმა არ ცნო არჩევნების შედეგები საქართველოში და სანქცირებულია მთელი პოლიტიკური ლიდერშიპი, მათ შორის თამაზაშვილი, ბრიტანეთის მიერ.
როგორ შეიძლება შინაგან საქმეთა მინისტრი, ან სუსის უფროსი იყოს კაცი, რომელიც დასანქცირებულია?“ – კითხულობს მურმან დუმბაძე.
მურმან დუმბაძე
„ივანიშვილისთვის სულხან თამაზაშვილი არის კარგი პოლიციელი, ამიტომაც არის იგი დასანქცირებული,“ – ამბობს მიშა ბოლქვაძე „ერთიანი ნაციონალური მოძრაობის“ ერთ-ერთი ლიდერი. მისი აზრით, თამაზაშვილი „პოლიციური სისტემით მართავდა“ აჭარას და „კარგად შეასრულა ივანიშვილის დავალებები“.
„სამწუხაროდ ე.წ. მთავრობაში არიან ადამიანები, რომლებიც არ ემსახურებიან ხალხს, ისინი ემსახურებიან ერთ ადამიანს, ეს არის რუსი ოლიგარქი ბიძინა ივანიშვილი, რომლის მონობაშიც არიან ეს ადამიანები. ჩვენ გვახსოვს თამაზაშვილი, როგორ იჯდა ჩაკეტილი კაბინეტში, არაერთი აქცია გამართულა ეგრეთ წოდებულ მთავრობის სახლთან და არ გვინახავს, გამოსულიყო და ვინმეს დალაპარაკებოდა,“ – გვიყვება მიშა ბოლქვაძე.
მიშა ბოლქვაძე
„ქართული ოცნებისთვის“ საკადრო პოლიტიკა ფაქტობრივად არ არსებობს, ახალი სახეები არ არსებობს, ერთსა და იმავე წრეზე ბრუნავენ ის ადამიანები, ვინც განსაკუთრებული ნდობით სარგებლობენ ბიძინა ივანიშვილის მხრიდან და ეს გადათამაშებები, რა თქმა უნდა, მეტყველებს იმაზე, რომ საკადრო დეფიციტია „ქართულ ოცნებაში“, – მიიჩნევს ვაჟა დარჩია, პარტია „ლელოს“ ერთ-ერთი ლიდერი.
ვაჟა დარჩია
„პირველი არ არის ეგ, როცა ბიძინა ასე იქცევა. მერე რა, რომ დასანქცირდა სულხან თამაზაშვილი? რასაც მინდა, იმას ვაკეთებ – ივანიშვილი ისევ ამის დემონსტრირებას ახდენს. ივანიშვილი ამბობს, რომ რუსია და სულ არ აინტერესებს, დასავლეთში როგორ უყურებენ. საერთოდ, რუსებს ესმით მხოლოდ ძალის ენა.
მიუხედავად ქოცობისა, მდინარაძე მართლაც კარგი სპიკერია. მდინარაძე რომ გადავიდა სუს-ში, რეალურად სპიკერები შემოაკლდათ, ირაკლი ზარქუას და ბოჟაძის იმედად დარჩნენ… ბოლოს რაღაც თანამდებობა უშოვეს ისეთი, რომ კომენტარების გაკეთება შეეძლოს,“ – ამბობს თემურ გორგაძე, „გირჩი – მეტი თავისუფლების“ ერთ-ერთი ლიდერი.
თემურ გორგაძე
რა იყო მნიშვნელოვანი სულხან თამაზაშვილის თავმჯდომარეობის დროს?
სულხან თამაზაშვილზე საუბრისას პოლიტიკოსებს ძირითადად ბათუმის ბულვარი ახსენდებათ, სადაც ბოლო რამდენიმე თვეში შენობები დაანგრიეს – უკანონოაო, თუმცა უკანონოდ აშენებული შენობების ნაწილი ისევ ბულვარშია. ოპოზიცია ყურადღებას ამახვილებს შერჩევით სამართალზე და ეჭვობს, რომ ბათუმის ბულვარშიც „გავლენების ახალი გადანაწილებაა“.
„თითქოს ბულვარის გენერალური გეგმის აღსრულება ხდებოდა, რაც რეალურად 2022-ში დამტკიცდა და 2026-ში გახდა რატომღაც მნიშვნელოვანი. ამ დროს ხდება გავლენების ახალი გადანაწილება,“ – გვესაუბრება ვაჟა დარჩია. – „ბულვარის ადმინისტრაციის უფროსი გახდა მეექვსე განყოფილების უფროსი პოლიციელი, რომელიც ძალიან კარგად ახსოვს საზოგადოებას, მათ შორის, როგორც „მზია ამაღლობელის საქმის“ ერთ-ერთი გამორჩეული ცრუმოწმე, ასევე, აქციების დარბევების ერთ-ერთი აქტიური მონაწილე.
თამაზაშვილს დავალების შესრულება გამოუვიდა კარგად: ჩამოვიდა ბათუმში, გადაუნაწილა „ქართული ოცნების“ შემწირველებს და დაახლოებულ ადამიანებს ქალაქი… კონკრეტული მტკიცებულება არის ის, რომ ბულვარის გენგეგმა არ სრულდება – უკანონო შენობების ნაწილი დარჩა კი არა, შენობები, რომლებიც შეუსაბამოდ იყო მოხსენიებული ბულვარის გენერალურ გეგმაში, დარჩა მხოლოდ და მხოლოდ იმიტომ, რომ იყო დაკავშირებული იმ ადამიანების ჯგუფთან, ვისაც კონკრეტული სიკეთეები აქვთ გაკეთებული „ქართული ოცნებისთვის“: ვგულისხმობ, იგივე „სანრემოს“ – გენგეგმის მიხედვით, ფუნდამენტური ნაგებობები არ შეიძლება იყოს სანაპირო ზოლზე, პლაჟზე.
ასევე, „ამბასადორი“ ვერ დაინგრეოდა, რადგან ქებურია, ვიცით, როგორც არის გადახლართული „ქართულ ოცნებასთან“. მას ბულვარის გარდა, ულიცენზიოდ მისცეს ხელოვნური კუნძულისთვის 300 ათასი კუბური მეტრი ქვა-ღორღი. ეს არის სასათბურე პირობების შექმნა იმ ადამიანებისთვის, რომლებიც დაახლოებულნი არიან „ოცნებასთან“.
ამ დროს ყოველდღიურად იმართებოდა აქციები თამაზაშვილთან – იმ ადამიანების აქცია, რომლებმაც ყოველდღიური შემოსავალი დაკარგეს. მათ გადაუგრიხეს ხელი და შემოსავლის გარეშე დატოვეს,“ – ამბობს ვაჟა დარჩია.
„ფიზიკურად თამაზაშვილის ქუჩაში ხალხთან თუ მედიასთან აქტიური კომუნიკაცია არ ჰქონია, რომ ადამიანზე შეიქმნა შთაბეჭდილება…“ – პირველ რიგში, თორნიკე რიჟვაძის კადრების ჩამოშორებასა და ახალი კლანის ჩამოყალიბებაზე გვესაუბრება თემურ გორგაძე, „გირჩის“ ერთ-ერთი ლიდერი – „თამაზაშვილმა მოიყვანა, ასე ვთქვათ, ქობულეთის კლანი, ცოტნე ანანიძის მაგალითიც ამას აჩვენებს…
მაგალითად, ბათუმის ბულვარში ადმინისტრაციის უფროსადაც პოლიციელი მოიყვანეს. სადაც კი რამე თანამდებობა არსებობდა, ყველგან პოლიციელები დანიშნეს, რაღაც ძალისმიერი რეჟიმი შემოიღო. ჩეჩნეთშიც ეგრე დაიწყეს და მივიდნენ იქ, სადაც მივიდნენ. ჩვენ ჩეჩნეთის დასაწყისში ვართ ახლა. პოლიციური, შიშზე დანერგილი მმართველობითი სისტემა ააწყო თამაზაშვილმა აჭარაში, “ – ამბობს თემურ გორგაძე.
„მანქანების სეირნობა ბულვარში მე ასლან აბაშიძის დროსაც კი არ მახსოვს… ის პროექტები, რომლებსაც ვაპროტესტებდით ბულვარში, ისევ არ არის დანგრეული, თუ რეფორმას აკეთებ, ის უნდა მიიყვანო ბოლომდე,“ – მურმან დუმბაძესაც არ სჯერა, რომ სულხან თამაზაშვილი და „ოცნების“ მთავრობა ბათუმის ბულვარში მოქალაქეების ინტერესების და საზოგადოებრივი ინტერესების დაცვას ცდილობდა.
„რა იცვლება ბულვარში, ეს ყველაზე თვალსაჩინოდ ჩანს იმით, რომ ცენტრალურ ნაწილში ისევ არის მრავალბინიანი საცხოვრებელი კორპუსი. ადამიანები კი, რომლებიც გაჭირვებაში ცხოვრობენ და ზრუნვა სჭირდებათ, გამოყარეს ბულვარიდან. ეს ყველაფერი შერჩევითია.
სულხან თამაზაშვილის სახელს არაფერი კარგი არ უკავშირდება. ის იყო ჩაკეტილი კაბინეტში და ისე მართავდა პროცესებს,“ – გვითხრა მიშა ბოლქვაძემ „ნაციონალური“ მოძრაობიდან.
„ჯიხურები ვისაც დაუნგრიეს ბულვარში, მათი დიდი ნაწილი ხომ „ქოცი“ იყო და ამაზე თვითონაც საუბრობდნენ. ესენი გაწმინდეს უბრალოდ, რადგან დიდი ალბათობით ფულის შოვნაზე არიან გადასული და საარჩევნოდ ეს ხმები აღარ დასჭირდებათ. ჩეჩნური მეთოდი ამიტომაც ვახსენე.
აპირებენ ფულის შემომტანი ახალი კლანების გაჩენას. აგერ, ხელვაჩაურში ხომ რამდენიმე დღის წინ 80-მდე ადამიანი დააკავეს, მათი დიდი ნაწილი ასევე „ოცნების“ მხარდამჭერი იყო. ეს ის დაჯგუფებაა, რომელიც საარჩევნოდ მუშაობდა ხალხზე. ახლა სურთ სრულიად ახალი კლანი, რომელიც გაინაწილებს ფულს ჩეჩნურად“ – აღნიშნა „ბათუმელებთან“ თემურ გორგაძემ, პარტიიდან „გირჩი მეტი თავისუფლება“.
ვინ შეიძლება გახდეს აჭარის მთავრობის ახალი თავმჯდომარე?
სხვადასხვა წყარო კობახიძის ბრიფინგამდეც რამდენიმე კანდიდატს განიხილავდა აჭარის მთავრობის თავმჯდომარის პოსტზე. ყველაზე ხშირად ახსენებენ 4 კანდიდატს: ზურაბ პატარაძე [საქართველოს ელჩი აზერბაიჯანში], ლევან დიასამიძე [საქართველოს ელჩი ყაზახეთში], ცოტნე ანანიძე [„ოცნების“ უმაღლესი საბჭოს თავმჯდომარე] და თორნიკე ფაღავა [„ოცნების“ პარლამენტის წევრი].
„სურვილი ბევრს ექნება, მაგრამ ერთადერთი ადამიანი იღებს გადაწყვეტილებას – ბიძინა ივანიშვილი, რომელსაც, როგორც ჩანს, ჯერჯერობით არ აქვს გადაწყვეტილი, ვინ იქნება შემდეგი.
მოვიდა გაზაფხული, გააქტიურდა პოლიტიკური პროცესები და ივანიშვილს სჭირდება ის კადრები, რომლებიც კარგად ასრულებენ დავალებებს,“ – მიიჩნევს მიშა ბოლქვაძე, ენმ-ს წევრი.
მურმან დუმბაძე: „სისტემაა არეული და უნიათო, ვერ უძლებს სტაბილიზაციას საკადრო პოლიტიკაში. დილას რომ ეფრეიტორი ხარ და საღამოს გენერალი გახდები, უნდა იცოდე, რომ ერთ დღეს ისევ არაფერი იქნები. მაგალითად, მამუკა მდინარაძე დღეს არის რიგითი მოქალაქე, არადა გუშინ იყო ეფრეიტორი, საღამოს გახდა გენერალი.“
თემურ გორგაძე კი ამბობს, რომ თვალში მოხვდა აჭარის ტელევიზიის დამოკიდებულება თორნიკე ფაღავას მიმართ.
„აჭარის საზმაუს ჰქონდა პიარკამპანია აწყობილი თორნიკე ფაღავაზე. ეს მაფიქრებინებს, რომ ვარაუდის დონეზე შეიძლება ეს იყოს თორნიკე ფაღავა, როგორც კი რაღაცას დაწერდა თორნიკე ფაღავა, აჭარის ტელევიზია მაშინვე ქარდავდა. ეს უბრალოდ ვარაუდია, არ ვიცი,“ – გვითხრა თემურ გორგაძემ.
„ვინც დასახელდა, არცერთი მათგანი არ გამოირჩევა დამოუკიდებლობით. ისინი არ არიან პოლიტიკური ფიგურები. არცერთი მათგანი არ არის იმ მასშტაბის ფიგურა, რომ დამოუკიდებელი ხაზი გაუჩნდეთ. კრიტერიუმი იქნება სავარაუდოდ ის, რომ რაც შეიძლება მეტად დაემორჩილოს წამოსულ ბრძანებებს და ეს იქნება ერთადერთი ხაზი,“ – უთხრა ვაჟა დარჩიამ „ბათუმელებს“.
რამდენიმე დღის წინ საქართველოში დენის ტარიფი 33% – ით გაძვირდა. ერთ-ერთი მთავარი მიზეზი, რის გამოც დენი გაძვირდა და რაც ყველა სხვა პროდუქტს გააძვირებს, ელექტროენერგიის ხარჯვის გაზრდაა.
თუ გადაავლებთ თვალს კომპანიებს, რომლებიც ყველაზე მეტ ელექტროენერგიას ხარჯავენ, ნახავთ, რომ დენი ძალიან ბევრი სჭირდებათ და თან ელექტროენერგიას დღგ-ს გარეშე იღებენ ის ბიზნესკომპანიები, რომლებიც მაინინგის ბიზნესით არიან დაკავებული.
რა სარგებელი აქვს კრიპტოვალუტის გამომუშავების ბიზნესით ქვეყანას? – მაინინგის მწარმოებელი კომპანიები ელექტროენერგიის ერთ-ერთი ყველაზე მსხვილი მომხმარებლები არიან. თავად ეს კომპანიები დენში დღგ-ს საფასურს არ იხდიან. ეს კომპანიები არ იხდიან არც გადასახადებს და თავისუფალი ინდუსტრიული ზონის შეღავათებით სარგებლობენ.
კრიპტოვალუტა და ბიტკოინები რომ ამ ქვეყანაში ყველაზე გავლენიანი და ფულიანი კაცის – ბიძინა ივანიშვილის ინტერესის სფეროა, ამას მისი ყოფილ ბიზნესპარტნიორთან, გიორგი ბაჩიაშვილთან სასამართლო დავაც ადასტურებს: ივანიშვილი ბაჩიაშვილს 9 ათასამდე ბიტკოინის მითვისებას [მითვისების მომენტში ბიტკოინის ეს რაოდენობა 39 215 820 აშშ დოლარი იყო] ედავებოდა. ამ საქმეზე საბოლოოდ საპროცესო შეთანხმება შედგა.
სხვათა შორის, ბიძინა ივანიშვილი გიორგი ბაჩიაშვილს სწორედ „ბიტფურის“ მიერ გამომუშავებულ ბიტკოინებს ედავებოდა. ეს ბიტკოინების მწარმოებელი ყველაზე მსხვილი კომპანია იყო საქართველოში, რომელმაც 2014 წელს 10 მილიონი აშშ დოლარის სესხი მიიღო ივანიშვილის ინიციატივით შექმნილი თანაინვესტირების ფონდიდან და გორში მონაცემთა ცენტრი ააშენა.
2015 წლის ზაფხულში კომპანიამ ეკონომიკის სამინისტროსგან სიმბოლურ ფასად, 1 ლარად იყიდა გლდანში, მერვე საპყრობილესთან ახლოს 18 ჰექტარი მიწა, რომლის საბაზრო ღირებულება იმ დროს 1 850 000 ლარი იყო. იმ პერიოდისთვის, რომელსაც ივანიშვილის დავა ეხება – 2015 წელი, ბიტფიური მსოფლიოში სულ მონაცემთა 3 ცენტრს ფლობდა, სადაც მაინინგი ხორციელდებოდა, აქედან ორი მდებარეობდა საქართველოში [გლდანში 40 მგვტ და გორში 20 მგვტ], ხოლო ერთი – ისლანდიაში [20 მგვტ].
„ბიტფურიმ“ [იგივე „ბი ეფ დი სი ჯორჯია“], როგორც ელექტროენერგიის ერთ-ერთმა პირდაპირმა მომხმარებელმა – ელექტროენერგეტიკული ბაზრის ოპერატორის [ესკო] მონაცემებით, 2019 წელს 534.2 მილიონი კვტ/სთ ელექტროენერგია მოიხმარა, 2020 წელს კი გაცილებით ნაკლები – 131.7 მილიონი კვტ/სთ.
ივანიშვილის სახელთან დაკავშირებული „ბიტფური“ [იგივე „ბი ეფ დი სი ჯორჯია“], რომელმაც სახელმწიფოსგან ამდენი შეღავათი მიიღო, 2025 წლიდან ელექტროენერგიის პირდაპირი მომხმარებლების ჩამონათვალში აღარ არის.
„ბათუმელები“ დაინტერესდა, რა წილი აქვს მაინინგის ბიზნესს ელექტროენერგიის ხარჯვაში? რა ბედი ეწია მაინინგის ბიზნესს საქართველოში?
რა ირკვევა საჯარო მონაცემებით?
საჯარო მონაცემების მიხედვით, მაინინგის ბიზნესი ისევ უმთავრესი ფაქტორია ელექტროენერგიის ბაზარზე, რის გამოც დენის ტარიფი გაძვირდა. ამას მოწმობს სემეკის ბოლო, 2025 წლის ანგარიშიც:
„2025 წელს წინა წელთან შედარებით პირდაპირი მომხმარებლების მიერ ელექტროენერგიის მოხმარების ზრდა ძირითადად განპირობებულია გარკვეული კატეგორიის [მრეწველობის, ლითონის მადნების მოპოვება, მაინინგი და სხვა] პირდაპირი მომხმარებლების ელექტროენერგიის მოხმარების ზრდით,“ – აღნიშნულია სემეკის მიერ მომზადებულ ელექტროენერგიის ბაზრის მიმოხილვის დოკუმენტში.
ესკოს მონაცემებით, 2025-26 წლებში ელექტროენერგიის 10 ყველაზე მსხვილ პირდაპირ მომხმარებელს შორის მინიმუმ 3 კომპანიაა, რომელიც კრიპტო-სექტორს უკავშირდება. მათგან ორი უშუალოდ მაინინგ-ოპერატორია, მესამე კომპანია კი კრიპტო-ბიზნესის სხვა მიმართულებას წარმოადგენს.
კომპანია „ეიაიტექ სოლუშენსი“ 2025 წელს და ელექტროენერგიის ყველაზე დიდ მხარჯველების ათეულს შორის ახლაც მეორე ადგილზეა. ამ კომპანიას 2025 წელს 450.2 მლნ კვტ საათი დაუხარჯავს, 2026 წლის იანვარ-თებერვალში-მარტში – 61.5 მლნ კვტ საათი [შედარებისთვის, საქართველოს რკინიგზამ 2025 წელს 170, ხოლო მიმდინარე წლის სამ თვეში 40,3 მილიონი კილოვატსაათი ელექტროენერგია მოიხმარა].
კრიპტო ბიზნესთან არის დაკავშირებული ასევე კომპანია „ტექსპრინტ კორპორეიშენი“ – ისიც ელექტროენერგიის ყველაზე დიდ მხარჯველ კომპანიებს შორისაა. 2025 წელს ამ კომპანიამ 143.3 მლნ. კვტ. საათი დახარჯა, 2026 წლის იანვარ-თებერვალ-მარტში – 22.2 მლნ. კვტ საათი.
ამ ორ მსხვილ კომპანიას [„ტექსპრინტ კორპორეიშენი“ და „ეიაიტექ სოლუშენსი“] ერთი და იგივე მესაკუთრე ჰყავს – ეთერ მთვრალაშვილი. „ბათუმელების“ სატელეფონო ზარს მან არ უპასუხა.
ელექტროენერგიის პირდაპირი და ყველაზე მსხვილი მომხმარებელი კომპანიების დასახლება ვთხოვეთ სემეკს, თუმცა სემეკმა ეს ინფორმაცია არ მოგვაწოდა. „ელექტროენერგიის პირდაპირი მომხმარებლების ეკონომიკური საქმიანობების შესახებ ინფორმაციას, შეგიძლიათ მოიძიოთ საქართველოს სტატისტიკის ეროვნული სამსახურის ბიზნეს რეესტრში,“ – მოგვწერა სემეკმა საჯარო ინფორმაციის მოთხოვნის პასუხად.
საქსტატის ბიზნეს რეგისტრის მიხედვით კი, ორივე კომპანიის საქმიანობის სფეროა – „საინფორმაციო ტექნოლოგიების და კომპიუტერული მომსახურების სხვა საქმიანობები“.
საჯარო რეესტრის დოკუმენტებით არ დგინდება, არიან თუ არა ეს კომპანიები – „ტექსპრინტ კორპორეიშენი“ და „ეიაიტექ სოლუშენსი“ დაკავშირებული შპს „ბი ეფ დი სი ჯორჯიასთან“, რომელიც 2023 წლამდე იყო ელექტროენერგიის ყველაზე მეტად მხარჯველი კომპანიების ათეულში.
კომპანია „ბი ეფ დი სი ჯორჯიას“ მესაკუთრე ნიდერლანდებში დაფუძნებული კომპანიაა „ბითფური ჰოლდინგ ბი ვი“. „ბი ეფ დი სი ჯორჯიას“ დირექტორი ვლადიმერ შეყრილაძეა.
კომპანია „ბი ეფ დი სი ჯორჯია“, იგივე „ბიტფურს“ და კომპანია „ეიაიტექ სოლუშენს“ ერთი და იგივე მისამართი აქვთ:
„ბი ეფ დი სი ჯორჯია“: თბილისი, გლდანის რაიონი, ომარ ხიზანიშვილის ქ., №264ა [თბილისის ტექნოლოგიური პარკის თავისუფალი ინდუსტრიული ზონა]
„ეიაიტექ სოლუშენს“: თბილისი, გლდანის რაიონი, ქუჩა ომარ ხიზანიშვილი, N 264 [თბილისის ტექნოლოგიური პარკის თავისუფალი ინდუსტრიული ზონა]
კომპანია „ტექსპრინტ კორპორეიშენი“ კი, რომელიც დღესაც ელექტროენერგიის ყველაზე მსხვილი მომხმარებლების ათეულშია, სხვა მისამართზეა, თუმცა ისიც თავისუფალ ინდუსტრიულ ზონაში: საქართველო, ქალაქი ქუთაისი, ავტომშენებლის ქუჩა, N 88, [ქუთაისის ჰუალინგის თავისუფალი ინდუსტრიული ზონა].
ამ ბაზარზე 2023 წლამდე ყველაზე მსხვილი კომპანია იყო „ბი ეფ დი სი ჯორჯია“, იგივე „ბიტფური“, 2024 წელს რამდენიმე წვრილი კომპანია ჩნდება, 2025 წლიდან კი, ყველაზე მსხვილი მოთამაშე ხდებიან: „ეიაიტექ სოლუშენს“ და „ტექსპრინტ კორპორეიშენი“.
კრიპტო-ბიზნესის მიმართულებას წარმოადგენს ასევე „თი ეფ ზი სერვისი“ [საქმიანობა – ელექტროტექნიკური და სამონტაჟო სამუშაოები, თბილისის ტექნოლოგიური პარკის თავისუფალ ინდუსტრიულ ზონაში], რომელმაც 2025 წელს 104.4 მილიონი კილოვატ საათი ელექტროენერგია მოიხმარა.
კრიპტო-ბიზნესთან დაკავშირებულმა კიდევ ერთმა კომპანიამ „პროტექ კორპორეიშენ“ [საინფორმაციო ტექნოლოგიების და კომპიუტერული მომსახურების სხვა საქმიანობები, ქუთაისის ჰუალინგის თავისუფალ ინდუსტრიულ ზონაში], 2024 წელს 107,3 მილიონი კილოვატ საათი ელექტროენერგია მოიხმარა.
საყოველთაოდ ცნობილია, რომ მაინინგს განსაკუთრებულად დიდი ელექტროენერგია სჭირდება და ეს სფერო გაუმჭვირვალე ბიზნესია, ამიტომაც, მაინინგის ბიზნესმა ფეხი ვერ მოიკიდა ევროპის ქვეყნებში.
სამაგიეროდ, აყვავდა საქართველოში.
საქართველოს ეროვნული ბანკი დღეს ზედამხედველობას უწევს მხოლოდ ვირტუალური აქტივების მომსახურების პროვაიდერებს [VASP – კრიპტო-ბირჟები, ციფრული საფულეები].
ნებისმიერი კომპანია, რომელიც კრიპტო-აქტივებთან დაკავშირებულ მომსახურებას ახორციელებს, ვალდებულია გაიაროს რეგისტრაცია და დააკმაყოფილოს ფულის გათეთრების საწინააღმდეგო და მომხმარებლის იდენტიფიკაციის სტანდარტები.
ვირტუალური აქტივის მომსახურების პროვაიდერების [VASP] რეესტრში დღევანდელი მონაცემებით 35 კომპანიაა [ისინი ძირითადად თბილისსა და აჭარაში არიან რეგისტრირებულები. ანუ, ესაა კომპანიები, რომლებიც არ არიან მაინერები, მაგრამ მართავენ კრიპტო-აქტივებს სხვისთვის, ცვლიან ან ინახავენ. 2026 წელს ასეთი ოთხი კომპანია დარეგისტრირდა].
კიდევ უფრო მნიშვნელოვანი ისაა, რომ მაინინგი შესაძლოა ცალკეულ პირებს ისე ჰქონდეთ, რომ არ ჰქონდეთ დაფუძნებული მაინინგის კომპანიები და გამოიმუშავებდნენ კრიპტოვალუტას, მაგალითად, სვანეთში, ან აფხაზეთში – სადაც საერთოდ არ იხდიან ელექტროენერგიის გადასახადს.
განსაკუთრებით სვანეთში ელექტროენერგიის მოხმარება რომ ისევ „კატასტროფულად დიდია“, ეს ამჯერადაც დაგვიდასტურეს „ენერგო პრო-ჯორჯიაში“.
იმიტომ, რომ ზუსტი მონაცემები არ არსებობს და ეს ბიზნესი გამჭვირვალე არ არის, შეუძლებელია მკაფიოდ იმის დანახვა: რა წილი უჭირავს ელექტროენერგიის ბაზარზე მაინინგს?
რა მოგება აქვს სახელმწიფოს მაინინგით?
„ეს არის პარაზიტი ენერგოვამპირი, რომელსაც საქართველოსთვის არაფერი მოაქვს. პარაზიტი კრიპტოვალუტის ქარხნები რომ დაიხუროს, არც დენი გაძვირდებოდა და არც მისი იმპორტი დაგვჭირდებოდა. ეს ქარხანა იმაზე მეტ ელექტროენერგიას მოიხმარს, ვიდრე მთელი კახეთი ერთად აღებული და ვიდრე „საქართველოს რკინიგზა“, ვიდრე „თბილისის მეტროპოლიტენი“.
ამ დროს ბიუჯეტში მისი შენატანი უფრო ნაკლებია, ვიდრე „მაკდონალდსის“ რომელიმე ერთი რესტორნის. ის იხდის უბრალოდ იქ დასაქმებული ადამიანების საშემოსავლო გადასახადს. სულ ესაა,“ – მკაფიო პოზიცია აქვს მაინინგის ბიზნესზე პოლიტიკოსს და პარლამენტის ყოფილ წევრს, ეკონომისტ რომან გოცირიძეს.
რომან გოცირიძე
რომან გოცირიძის მოსაზრებით, არცერთ შემთხვევაში და არანაირი ლოგიკით მაინინგი თავისუფალ ინდუსტრიულ ზონაში არ უნდა იყოს და შეღავათებით არ უნდა სარგებლობდეს.
„ეს ზონებიც უნდა დაიხუროს. ყველაფერი საბაზრო ფასებში უნდა იყოს და კი ბატონო, არ არის პრობლემა. თუ ადამიანი ელექტროენერგიას მოიხმარს წისქვილ-კომბინატში, ფქვავს და შემოსავალს იღებს, რა პრობლემაა? ოღონდ მან უნდა გადაიხადოს ყველაფერში ფული, მათ შორის დენში.
დღეს კრიპტოვალუტის მოპოვება მთლიანად პარაზიტულია და არანაირ შემოსავალს ჩვენ არ გვაძლევს. პირიქით, ხშირად არალეგალურია, როგორც სვანეთში, ან ლეგალურია, როგორც გორში, ქუთაისში და გლდანში, ოღონდ ჩვენი ელექტროენერგიის გაძარცვის ხარჯზე.
საერთოდ კატასტროფა ხდება აფხაზეთში. რუსეთის სამხედრო ბაზებზე, ოჯახებში, საამქროებში, სარდაფებში, ვისაც და სადაც მოესურვება, დენი აქვს… აფხაზეთი მოიხმარს იმდენს, რამდენსაც ხარჯავს 1.5 მილიონი მოსახლეობის მქონე თბილისი,“ – ამბობს რომან გოცირიძე.
უკავშირდება ეს ბიზნესი ბიძინა ივანიშვილს?
„უზარმაზარი როლი შეაქვს დენის ტარიფების ზრდაში იმ პარაზიტ ორგანიზაციას, რომელიც დააფუძნა გლდანსა და გორში ივანიშვილმა და რომელსაც ჰქვია კრიპტოვალუტის მოპოვება… ივანიშვილთან დაკავშირებული ადამიანები ამბობენ, რომ ივანიშვილმა გაყიდა ეს ქარხანა, ვიღაც კანადელს მიყიდაო, მაგრამ არ ვიცი, რეალურად რა მაქინაციები ჩაატარა. ჩემი ინფორმაციით, „ბიტფური“ ჩაანაცვლა „ეიაიტექ სოლუშენსმა“ და ისევ იგივე საქმეს აკეთებს. ეს ბიზნესი ისევ არ იხდის არავითარ გადასახადს საშემოსავლოს გარდა.
ორი წლის წინ ითქვა: გაყიდა ივანიშვილმა „მტკვარი ჰესიო“ და ახლა გაირკვა, რომ გაყიდული „მტკვარი ჰესის“ მშენებლობას აგრძელებს. სინამდვილეში ეს კი არ გაუყიდია, არამედ რაღაც მანიპულაციები ჩაატარა ქონების გადამალვის, ან გადასახადებისგან არიდების გამო,“ – გვიყვება რომან გოცირიძე.
ეკონომისტი ყურადღებას ამახვილებს იმაზეც, რომ ელექტროენერგია, რომელიც ახლა უკვე 33%-ით გაგვიძვირდა, არის, მათ შორის, იმპორტირებულიც, ან ვყიდულობთ გაზს რუსეთში და ვამუშავებთ, მაგალითად, თბოსადგურს გარდაბანში.
„ასე ხდება ზამთარში, პიკურ თვეებში ელექტროენერგიის მიწოდება, ელექტროენერგია ძვირდება იმპორტის გამოც და იმპორტირებული გაზიდან ელექტროენერგიის გამომუშავების გამო. ამიტომაცაა, რომ მაინინგის ქარხანა დამონტაჟებულია ძირითადად ისეთ ქვეყნებში, სადაც ელექტროენერგიას ჭარბად აწარმოებენ, ან ცივი ქვეყანაა – სერვერების ამ სისტემას სჭირდება მუდმივი გაგრილება და ამაში იხარჯება ელექტროენერგიის დიდი რესურსი…
რომ არა შეღავათები, რაც ივანიშვილმა მიიღო, ეს ბიზნესი არ იქნებოდა საქართველოში“, – განმარტავს რომან გოცირიძე.
ისევ აწარმოებენ სვანეთში კრიპტოვალუტას? – „2026 წელს ელ.ენერგიის მოხმარება სვანეთში ისევ კატასტროფულად დიდია“
იმის მიუხედავად, რომ 5 წლის წინ, 2021 წელს სვანეთში ხატზე დაიფიცეს, მაინერებს ყველა გამოვრთავთო, „ენერგო პრო-ჯორჯიას“ მონაცემებით, სვანეთში ელექტროენერგიის მოხმარება „ისევ კატასტროფულად დიდია“.
ანალიტიკოსები მიიჩნევენ, რომ სვანეთში ისევ აქტიურად არიან დაკავებული არალეგალური მაინინგით, რადგან სვანეთში დენი უფასოა.
„მესტიაში, განსაკუთრებით ბოლო ერთ წელიწადში, კატასტროფულად გაზრდილია ელექტროენერგიის მოხმარება. ამის მიზეზი არის ადგილზე გახსნილი კრიპტოვალუტის მწარმოებელი პუნქტები, რომლებიც იტაცებენ დიდი რაოდენობით ელექტროენერგიას“, – განაცხადაკომპანია „ენერგო-პრო ჯორჯიამ“ 2020 წელს.
რა შეიცვალა სვანეთში? – ვკითხეთ „ენერგო პრო-ჯორჯიას“ პრესცენტრს.
„2026 წელს ელ.ენერგიის მოხმარება სვანეთში ისევ კატასტროფულად დიდია,“ – მოგვწერეს „ენერგო პრო-ჯორჯიადან“, სადაც ასევე გაგვიზიარეს ოფიციალური სტატისტიკა. სვანეთში ელ.ენერგიის მოხმარების ზრდა ბოლო 5 წლის განმავლობაში „ენერგო პრო-ჯორჯიას“ მონაცემების მიხედვით ასე გამოიყურება:
2020 წელი – 91 117 245 კვტ.სთ;
2021 წელი – 101 568 155 კვტ.სთ;
2022 წელი – 121 739 191 კვტ.სთ;
2023 წელი – 120 275 154 კვტ.სთ
2024 წელი – 124 692 913 კვტ.სთ
2025 წელი – 132 952 736 კვტ.სთ
მაგალითად, 2025 წელს მოსახლეობისთვის მოქმედი ყველაზე დაბალი ტარიფი [14,7 თეთრი] რომ ავიღოთ, ამავე წელს სვანეთში დახარჯული დენის გადასახადი ჯამში მინიმუმ 19 544 052 ლარი იქნებოდა.
„სოციალისტური სიმახინჯის მაგალითია სვანეთის მომარაგება უფასო ელექტროენერგიით. ამან გამოიწვია მისი უყაირათო მოხმარება, განსაკუთრებით კი, კრიპტოვალუტის კუსტარული მოპოვება, რასაც მოჰყვა ელექტროენერგიის დეფიციტი და ადგილობრივი ენერგოსისტემის დაზიანება ზედმეტი დატვირთვის გამო.
რა უნდა გაეკეთებინა მთავრობას? მას უნდა მოეხდინა მომსახურების მონეტიზაცია, ანუ ფულის მიცემა განსაზღვრული მოცულობის ელექტროენერგიის შესაძენად. დახარჯავდა ამ ფულს არაყში? – ეს მისი ნება იქნებოდა, გადაჰკრავ არაყს, გაგეთიშება შუქი.
ნაცვლად იმისა, რომ კონკრეტული მომხმარებლისთვის შეეწყვიტათ დენის მიწოდება, ჩააბნელეს მთელი სვანეთი, დააწესეს გრაფიკი. ამით დაზარალდა წესიერი გადამხდელი. ახლა დაიწყება კრიპტოვალუტის მომპოვებლების წინააღმდეგ ომი. არა და რაში არიან ისინი დამნაშავეები: არის იაფი დენი, დადგეს სერვერი. ეს სულაც არაა უკანონო საქმიანობა. დააწესე ელექტროენერგიის საბაზრო ფასი და მორჩება ყველაფერი.
კრიპტოვალუტის მოპოვება კი არ არის დანაშაული, არამედ დანაშაულია დენის მოპარვა. სვანეთის შემთხვევაში არც უკანონო მაინინგთან გვაქვს საქმე და არც ქურდობასთან, უბრალოდ, დენია უფასო, ანუ მთავრობაა უტვინო,“ – აღნიშნა რომან გოცირიძემ „ბათუმელებთან“.
და ბოლოს:
პირველი აპრილიდან დენში უკვე 33 %-ით ძვირს გადავიხდით, ვიდრე მანამდე ვიხდიდით. ეს ნიშნავს იმას, რომ თუ აქამდე თვეში 10 ლარის ელექტროენერგიას ხარჯავდით, ახლა იგივე რაოდენობით ელექტროენერგიის მოხმარების დროს გადაიხდით 13.32 ლარს.
30 ლარს თუ იხდიდით – 38.94 ლარს გადაიხდით
50 ლარს თუ იხდიდით – 64.18 ლარს გადაიხდით
100 ლარს თუ იხდიდით – 124.97 ლარს გადაიხდით.
საქართველოში ელექტროენერგიის დეფიციტი დროში იმ პერიოდს ემთხვევა, როცა ქვეყანაში კრიპტოვალუტის წარმოება დაიწყო.
2014 წლამდეანუიმდრომდე, ვიდრექვეყანაშიარავინარაფერიიცოდაბიტკოინებზე, საქართველოსტაბილურადმოიხმარდამაქსიმუმ 6 მილიარდკვტ/სთელექტროენერგიას. 2020 წელს 12.1 მლრდ კვტ/საათამდე გაიზარდა. 2025 წელს – 14.614 მლრდ კვტ/საათი.
ამ დროს ერთიბიტკოინისფასი [რომელიცსაკმაოდცვალებადია], მაგალითად, 2021 წელს coinmarketcap–ისმონაცემებით, 58.5 ათასიაშშდოლარია, 2026 წელს – 66 ათასი დოლარი.
2025 წელს ელექტროენერგიის მოხმარებამ შეადგინა 14,614 მლნ კვტ.სთ, რაც 2024 წელთან შედარებით გაზრდილია 3.2%-ით.
2025 წელს ბიტკოინის გამომუშავებაზე საქართველოს ელექტროენერგიის 5% დაიხარჯა. სემეკისთვის წარდგენილი სტატისტიკის თანახმად, ამ საქმიანობით დაკავებული კომპანიების გამომუშავება სამჯერ გაიზარდა და 752 მილიონი კილოვატ საათი შეადგინა. რაც შეეხება 2026 წლის მონაცემებს, სემეკის ინფორმაციით, წელს იანვარ-თებერვალში ამ კომპანიების ჯამური მოხმარება 86.7 მილიონი კილოვატ საათი იყო, რაც საქართველოს ელექტრომოხმარების 3%-ია.
სამოქალაქო აქტივისტი თამარ იარაჯული აცხადებს, რომ სახელმწიფოს მოთხოვნით „თიბისი“ ბანკმა პირადი ანგარიში გაუუქმა. პირდაპირ ჩართვაში, რომელიც თამარ იარაჯულმა მთავრობის კანცელარიიდან გააკეთა, ამბობს, რომ მას ქველმოქმედების მიზნით ჩარიცხული თანხების ქვითრებს სთხოვს უსაფრთხოების სამსახური.
„თიბისი“ ბანკმა გამიუქმა პირადი ანგარიში. როცა მოვითხოვე განმარტება, არაოფიციალურად მითხრეს, რომ სახელმწიფო უსაფრთხოება ითხოვს ჩემს პირად ანგარიშზე დარიცხული საქველმოქმედო თანხების შესახებ ინფორმაციას. ანუ, ტერორიზმის და ფულის გათეთრების მუხლი მომიყენეს, წარმოგიდგენიათ ხომ?
მე მყავს აუტისტური სპექტრის მქონე შვილი, რომელსაც რამდენიმე მძიმე ოპერაცია გავუკეთე საზღვარგარეთ. ასევე, ჩემს მეორე შვილს სჭირდება ძვირადღირებული მკურნალობა უცხოეთში და რადგან სახელმწიფო არ გვაფინანსებს, საზოგადოების მიერ შემოწირული თანხებით წავიყვანე შვილი უცხოეთში.
ახლა კი, როგორც გავიგე, ამ თანხების შესახებ ითხოვს სახელმწიფო ინფორმაციას. ქვითრები უნდა წარმოადგინოო, რაც შეუძლებელია. ვინ ინახავს დღეს ქვითარს. ანუ საკვები რომ ვუყიდე ჩემ შვილს და წამალი ამის ქვითრები უნდა შემენახა?“ – ამბობს თამარ იარაჯული „ბათუმელებთან“.
მისი თქმით, წლებია სახელმწიფოს თავისი შვილების მკურნალობაზე დახმარებას სთხოვს, ახლა კი ხალხის მიერ დარიცხული შემოწირულობების გამო, ფულის გათეთრებას ედავებიან.
„ოთხი წელია ლამის მათხოვრად ვიქეცი, რომ ჩემი შვილები გადავარჩინო. სამი წელია ვეხვეწები სახელმწიფოს, რომ აქ შეგვიქმნას იმ დაავადების მკურნალობის პროტოკოლი, რომელიც ჩემს შვილს სჭირდება და უცხოეთში წასვლა არ დაგვჭირდება, მაგრამ ეს პროტოკოლი არ შექმნეს. ახლა, როცა სამ-ოთხ თვეში, ხან ერთი შვილი და ხან მეორე, ხალხის დახმარებით მიმყავს სამკურნალოდ, ამის ქვითრები უნდა შემენახა თურმე.
მე რა დოკუმეტებიც მქონდა ხელთ, ყველაფერი გადავუგზავნე ბანკს და დღეს, დღის ბოლომდეც არ დამაცადეს, გამიუქმეს ანგარიში. ფაქტობრივად, დამასანქცირა სახელმწიფომ. ჩემი შვილების ჯანმრთელობის მძიმე მდგომარეობის გამო დიდი ხანია არ გამოვსულვარ გარეთ, მაგრამ გუშინ, დიუშენის კუნთოვანი დისტროფიის მქონე ბავშვების მშობლების აქციაზე ვიყავი, მხარდაჭერის მიზნით, რადგან ეს ადამიანები წამალს ითხოვენ თავიანთი შვილებისთვის. სავარაუდოდ, ჩემი აქტიურობა არ მოეწონათ“, – ამბობს თამარ იარაჯული.
მისი თქმით, ის დღეს, 22 აპრილს მივიდა „თიბისი“ ბანკში და ითხოვდა იმ ოქმის ასლს, რომელიც მის ანგარიშებთან დაკავშირებით შედგა.
„მეორე ის, რომ რაზეც სახელმწიფო უნდა იღებდეს პასუხისმგებლობას, იმაზე მე ნუ მთხოვს პასუხს. ამ ანგარიშების გაუქმებით ჩემი შვილი ვეღარ წავა იმ გამოკველვებზე, რომელსაც თავად ჯანდაცვის სამინისტრო მიწერს კონსილიუმების საფუძველზე. ჟანგბადსაც ვერ აწვდიან ჩემს შვილს, როცა მდგომარეობა მწვავდება და სახალხო დამცველთანაც დევს ამის შესახებ მოკვლევაზე ჩემი მოთხოვნა. ფაქტობრივად გაწირეს ჩემი ოჯახი“, – ამბობს თამარ იარაჯული.
თამარ იარაჯული ამბობს, რომ ის სახელმწიფო კანცელარიასთან შიმშილობას იწყებს. „იქამდე ვიშიმშილებ, სანამ აღარ დამჭირდება მათხოვრობა ფეისბუქით და ჩემ შვილს პენსია გაუხდება 1500 ლარი, რადგან რეალურად, ეს თანხაც კი არ ჰყოფნის ჩემი შვილის საჭიროებებს. ძალიან ხშირად, ქცევა ირღვევა და ცუდად ხდება და ამის გამო ექიმები დიაზეპამინს ჩრიან პირში. მე არ ვაპირებ შევცვალო ჩემი შვილის საჭიროებები.
სანამ არ შემუშავდება პროტოკოლი იმ დაავადებების, რომელიც ჩემ შვილს აქვს და სანამ არ აიღებს სახელმწიფო პასუხისმგებლობას უცხოეთში მკურნალობაზე, ბილეთების, სასტუმროს და სხვა ხარჯებზე.
სახელმწიფო რასაც გვიფინანსებს, ერთი იმდენზე მეტი, გზას, სასტუმროს და კვებას სჭირდება. აქედან გამომდინარე, სანამ ჩემი ყველა ეს მოთხოვნა არ იქნება შესრულებული, არ ვაპირებ შიმშილობის შეწყვეტას, თუნდაც ჩემი სიცოცხლე დავტოვო აქ. მაგრამ შევეცდები დავრჩე ცოცხალი და ისე გავიმარჯვო იმ უსამართლობაზე, რაც დღეს გააკეთეს.
არც ქოლგა მინდა, არც „პუფი“, არც კარავი – სიკვდილი მინდა ამ შენობასთან, რომ სამაგალითოდ მაინც დარჩეს ეს ამბავი. თქვენს შვილებს აჭამეთ 420 ლარი და თქვენი ხარჯები გამოითხოვეთ ბანკიდან“, – ამბობს თამარ იარაჯული.
თამარ იარაჯული დღეს კანცელარიაში, შესაბამის პირებთან იტხოვდა შეხვედრას, თუმცა მას შენობაში გაჩერების უფლება არ მისცეს. „შეხვდნენ ირაკლი კობახიძეს და გადმომცენ ოქმი, ირღვევა თუ არა ჩემი და ჩემი შვილების უფლებები.
მე ვარ დედა, მხარდამჭერი და ჩემი ანგარიშები გაუქმდა, დედა, რომელსაც ყოველ სამ თვეში დაჰყავს შვილი საზღვარგარეთ და სიცოცხლეს უნარჩუნებს“, – ამბობს თამარ იარაჯული.
„ბათუმელები“ ესაუბრა თამარ იარაჯულის ერთ-ერთ შვილს, გიორგი ნიშნიანიძესაც, რომელიც ადასტურებს მისი მშობლის საბანკო ანგარიშების გაუქმებას. მისი თქმით, ბანკი პირადი გადარიცხვების შესახებაც ითხოვს ინფორმაციას.
„იყო ასეთი მესიჯიც, რომ თამარ იარაჯულს სთხოვენ მისი მეუღლის, ანუ მამაჩემისგან, ავთანდილ ნიშნიაძისგან ჩარიცხული თანხების ამონაწერებს. რა მიზნით ურიცხავთ ერთმანეთს და სად მიგაქვთ ეს თანხებიო. „ქეშად“, რომ გამოგაქვთ, ის თანხები სად მიგაქვთო და ასე შემდეგ.
როცა ბანკს განმარტება მოვთხოვეთ, თუ რის საფუძველზე ითხოვდა ამ ინფორმაციას, მოგვწერეს 21-ე პრიმა მუხლი, საქართველოს კერძო ბანკების შესახებ კანონის მიხედვითო. როგორც იურისტებმა აგვიხსნეს, ეს არის ტერორიზმის და ფულის გათეთრების მუხლი“, – ამბობს გიორგი ნიშნიანიძე.
„ბათუმელები“ დაუკავშირდა თიბისი ბანკსაც და მომხდართან დაკავშირებით კომენტარი სთხოვა. ბანკში გვითხრეს, რომ გაერკვევიან სიტუაციაში და შემდეგ გვიპასუხებენ.
თიბისი წლებია 22 აპრილს, დედამიწის დღეს, ახალი გარემოსდაცვითი ინიციატივით აღნიშნავს.
„გააცოცხლე“ ახალი პროექტია, რომელიც ტექსტილის ნარჩენების შეგროვებისა და გადამუშავების კამპანიას გულისხმობს. იდეა თიბისის ESG ელჩების მიერ არის შემუშავებული. გარემოში მოხვედრილი ტექსტილი შესაძლოა, ათწლეულების განმავლობაში არ დაიშალოს. ამ პერიოდში ისინი ნიადაგსა და წყალს აბინძურებენ, რაც ადამიანის ჯანმრთელობაზე აისახება. ამიტომ, ESG ელჩებმა მათი პროექტით მიზნად დაისახეს გარემოში ტექსტილის ნარჩენების შემცირების ხელშეწყობა და მათი ხელახალი გამოყენება.
ESG ელჩები თიბისის თანამშრომლები არიან, რომლებიც გარემოსდაცვითი, სოციალური და მმართველობითი მიმართულებით პროექტების დაგეგმვასა და განხორციელებაში მონაწილეობენ. ESG ელჩების პროგრამა თიბისიში 2021 წლიდან არსებობს, რადგან მდგრადობის საკითხებზე ზრუნვა და მუშაობა თიბისის კულტურის ნაწილია.
პროექტი „გააცოცხლე“-ს ფარგლებში ორ მწვანე საწარმოსთან დავიწყეთ პარტნიორობა: თიბისის ბიზნეს დაჯილდოების გამარჯვებული მწვანე კატეგორიაში „ვინტილატორი“ და სოციალური საწარმო „7R“.
თიბისელების მიერ შეგროვებული ტექსტილის ნარჩენები დასამუშავებლად „ვინტილატორსა“ და “7R”-ს გადაეცემათ. დახარისხებული მასალებისგან დამზადდება უნიკალური აქსესუარები, რომლებიც პროექტში ჩართულ თიბისელებს გადაეცემათ. ის ტექსტილი კი, რომლის ხელახალი გამოყენება ვერ მოხერხდება, სპეციალური ტექნოლოგიით დამუშავდება გარემოზე უარყოფითი ზემოქმედების გარეშე. პროექტის შედეგად ტექსტილის ნარჩენები „ახალ სიცოცხლეს“ შეიძენს და ფერადი აქსესუარების სახით „გაცოცხლდება“.
ინიციატივის პირველი ეტაპი უკვე დაიწყო. ტექსტილის შესაგროვებელი ურნები განთავსდა თიბისის რამდენიმე ფილიალსა და სათავო ოფისში.
თიბისი წლებია თანმიმდევრულად ავითარებს ნარჩენების მართვის სისტემას. სხვადასხვა პარტნიორი კომპანიის ჩართულობით, 2015 წლიდან გადაამუშავებს ქაღალდს, 2023 წლიდან პლასტმასას, 2025 წლიდან ელემენტებსა და ელექტრონულ ნარჩენებს, ხოლო 2026 წელს პროექტი „გააცოცხლეს“-ს დაწყება კიდევ ერთი გამორჩეული ნაბიჯია გარემოში ტექსტილის ნარჩენების შემცირების კუთხით.
ადამიანებსა და გარემოზე ზრუნვა თიბისის კულტურისა და სტრატეგიის ნაწილია. სხვადასხვა ESG და მარკეტინგული კამპანიის ფარგლებში, თიბისიმ არაერთი ინოვაციური გარემოსდაცვითი პროექტი განახორციელა. მათ შორის, საქართველოში პირველად დაიწყო სარეკლამო ბანერების გადამუშავება და მათი ფუნქციურ ნივთებად გარდაქმნა. ასევე, თიბისის ინიციატივით, კომპანიამ „ტენე“ გამოუყენებელი პლასტმასისგან ეკომეგობრული აქსესუარები შექმნა.
პროექტი „გააცოცხლე“ კიდევ ერთი ნათელი მაგალითია იმისა, თუ როგორ აერთიანებს თიბისი ინოვაციასა და პასუხისმგებლობას გარემოს დასაცავად და მდგრადი მომავლის შესაქმნელად.
23 აპრილს, დღის 3 საათზე, ბათუმის საქალაქო სასამართლოში ისევ განიხილავენ ჟურნალისტის და სახაროვის პრემიის ლაურეატის, მზია ამაღლობელის საქმეს.
საქმე ეხება სტიკერის გაკვრას აჭარის პოლიციის დეპარტამენტის შენობის ღობეზე – კონსტიტუციით გარანტირებული გამოხატვის თავისუფლებით სარგებლობისთვის ჟურნალისტი მზია ამაღლობელი ორჯერ გაასამართლეს. ამ შემთხვევაში დავის საგანი იქნება არა ის – ჩაიდინა თუ არა სამართალდარღვევა მზია ამაღლობელმა ღობეზე სტიკერის გაკვრით, არამედ ის, თუ რამდენად კანონიერად დააკავეს მზია ამაღლობელი.
სამართალდარღვევის ჩადენის მიუხედავად, იყო თუ არა საჭირო, პოლიციელებს დაეკავებინათ ქალი, რომელმაც შენობის ღობეზე სტიკერი გააკრა?
მზია ამაღლობელი გამოცემების – „ბათუმელებისა“ და „ნეტგაზეთის“ დამფუძნებელი და თანადირექტორია. ის უკვე 1 წელი და 3 თვე უკანონო პატიმრობაშია. 2025 წლის 16 დეკემბერს პატიმრობაში მყოფ ჟურნალისტსა და მედიამენეჯერს, მზია ამაღლობელს, სტრასბურგში, ევროპარლამენტში, ევროკავშირის ადამიანის უფლებათა უმაღლესი ჯილდო, სახაროვის პრემია გადასცეს. მზია ამაღლობელის საჩივრების განხილვა უკვე დაიწყო სტრასბურგის სასამართლომ.
„მზია ამაღლობელის დაკავების კანონიერების საქმის“ წარმოებაში მიღებაზე უარი უთქვამს ბათუმის საქალაქო სასამართლოში მოსამართლე ალექსანდრე გოგუაძეს 2025 წლის დეკემბერში. მოსამართლე ალექსანდრე გოგუაძის ეს გადაწყვეტილება უზენაესი სასამართლოს მიერ დადგენილ პრაქტიკას ეწინააღმდეგება. ქუთაისის სააპელაციო სასამართლომ მოსამართლე ალექსანდრე გოგუაძეს საქმე დაუბრუნა და მისი განხილვა დაავალდებულა. ამ საქმის განხილვა დაიწყება ხვალ, 23 აპრილს.
თუ დადგინდება, რომ მზია ამაღლობელი უკანონოდ დააკავეს, ეს იქნება მნიშვნელოვანი არგუმენტი სტრასბურგის სასამართლოში, სადაც უკვე განიხილება მზია ამაღლობელის ადმინისტრაციული საქმე გაყალბებული ოქმებით, ასევე, სისხლის სამართლის საქმე პოლიციის ცრუ მოწმეებით.
მნიშვნელოვანი ისაა, რომ სწორედ ადმინისტრაციულ სამართალდარღვევას და დაკავებას ეყრდნობოდა მზია ამაღლობელის წინასწარი პატიმრობა სისხლის სამართლის საქმეზე. პროკურატურა ბათუმის საქალაქო სასამართლოში აღკვეთი ღონისძიების შეფარდებისას აცხადებდა და სასამართლომაც გაიზიარა პოზიცია, რომ „დანაშაულებრივი ქმედების გაგრძელების“ რისკი არსებობს, ვინაიდან მზია ამაღლობელი ადმინისტრაციული წესით იყო დაკავებული და გათავისუფლების შემდეგ გააწნა სილა პოლიციელს.
„დაკავების კანონიერებაზე ადმინისტრაციული ორგანოს [შსს] უარის მიღების შემდეგ, სასამართლოს მივმართეთ,“ – მზია ამაღლობელის ადმინისტრაციული დაკავების კანონიერებაზე შედგენილი საჩივრის ქრონოლოგიას გვაცნობს ნინო ხუციშვილი, საიას იურისტი და მზია ამაღლობელის ინტერესების დამცველი ერთ-ერთი ადვოკატი.
„ბათუმის სასამართლომ განმარტა, რომ მოცემულობაში, როდესაც სამართალდამრღვევად იყო პირი ცნობილი, დაკავების კანონიერებაზე ვეღარ იმსჯელებდა, რადგან თავისი შინაარსით ეს ნიშნავდა, რომ დაკავებაც კანონიერი იყო. ეს განმარტება ეწინააღმდეგება როგორც კანონმდებლობას, ასევე საქართველოს უზენაესი სასამართლოს დადგენილ პრაქტიკას.
ჩვენ ეს კერძო საჩივრით სააპელაციო სასამართლოში გავასაჩივრეთ. არსებობს ამ კუთხით ძალიან კარგი პრაქტიკა უზენაესი სასამართლოსი და სააპელაციო სასამართლომ ამას გვერდი ვერ აუარა. სააპელაციო სასამართლო იძულებული იყო, დაებრუნებინა დავა ისევ პირველ ინსტანციაში, რადგან პირველმა ინსტანციამ საერთოდ არ იმსჯელა ამ საქმეზე…“, – განმარტავს იურისტი ნინო ხუციშვილი.
კანონმდებლობით სამართალდარღვევის საქმის განხილვის მოსამართლე არ არის უფლებამოსილი, იმავდროულად იმსჯელოს ამ სამართალდარღვევის ფარგლებში დაკავების კანონიერებაზე. უფლებადამცველები მიიჩნევენ, რომ ეს საკანონმდებლო ხარვეზია. ევროსასამართლომ რამდენიმე საქმეში საქართველოს წინააღმდეგ განაცხადა, რომ ეს არ არის სწორი მიდგომა და არ არის ეფექტური.
„ევროსასამართლოს ამ გადაწყვეტილების მიუხედავად, დღესაც იგივე რეალობა გვაქვს. სამართალდარღვევის საქმეს ერთი წელი დასჭირდა – 2025 წლის 11 იანვარს მომხდარი დაკავების კანონიერებაზე ჯერ კიდევ არავის უმსჯელია…
1 წლის განმავლობაში პრაქტიკულად გაყინული იყო ეს საქმე ზემდგომში [შსს], ველოდებით სამართალდარღვევის საქმის დასრულებასო. სამართალდარღვევის საქმე დასრულდა და მერე ისევ ჩვენი ძალისხმევით მოვითხოვეთ გადაწყვეტილების მიღება – გვიპასუხეს, რომ არ დააკმაყოფილეს ჩვენი საჩივარი და მზია ამაღლობელის დაკავება კანონიერად ცნეს.
ეს იყო 2025 წლის დეკემბერში, ამის შემდეგ წავიღეთ საქმე სასამართლოში, მაგრამ მოსამართლე ალექსანდრე გოგუაძემ არათუ არ დაგვიკმაყოფილა საჩივარი, საერთოდ წარმოებაში მიღებაზე უარი თქვა, მსჯელობაზე უარი თქვა. შემდეგ მივმართეთ ქუთაისის სააპელაციო სასამართლოს.
ქუთაისის სააპელაციო სასამართლომ მიიღო ეს განჩინება და უკან დააბრუნა საქმე, დაავალა მოსამართლე გოგუაძეს, რომ განხორციელებულიყო მსჯელობა აღნიშნულთან დაკავშირებით, იმიტომ, რომ ეს უზენაესი სასამართლოს დადგენილ პრაქტიკას ეწინააღმდეგება. ამასთან, ეროვნული კანონმდებლობაც ისე არეგულირებს, რომ დაკავების კანონიერებაზე დავა სამართალდარღვევიდან დამოუკიდებლად არის შესაძლებელი.
მოსამართლის [ალექსანდრე გოგუაძის] განმარტება არის წინააღმდეგობრივი: თუ სამართალდარღვევა არსებობს, ცალკე საკითხია ამ სამართალდარღვევის ფარგლებში რამდენად არსებობდა ის წინაპირობები, რომ აუცილებელი იყო პირისთვის დაკავების ღონისძიების, როგორც უზრუნველყოფის ფორმის გამოყენება, ხოლო თუ არ არსებობდა სამართალდარღვევა, ამ შემთხვევაში ცალსახად თავიდანვე უკანონოა დაკავებაც. შესაბამისად, არასწორად განმარტა სასამართლომ ეს ნაწილი,“ – გვითხრა ნინო ხუციშვილმა.
რადგან ეს საქმე ისევ მოსამართლე ალექსანდრე გოგუაძემ უნდა განიხილოს, შეუძლია მას იგივე გადაწყვეტილება მიიღოს? – ვკითხეთ იურისტს.
„წარმოებაში მიღებაზე უარი არ შეუძლია, რადგან ამაზე უკვე იმსჯელა ზემდგომმა ინსტანციამ, თუმცა შეუძლია, რომ საჩივარი არ დააკმაყოფილოს. მოსამართლემ უნდა დაასაბუთოს, რატომ იყო კანონიერება დაკავება,“ – აღნიშნა მზია ამაღლობელის ინტერესების დამცველმა ადვოკატმა, ნინო ხუციშვილმა.
რა შეიცვლება, თუ მოსამართლე იტყვის, რომ მზია ამაღლობელი ადმინისტრაციულ საქმეზე უკანონოდ დააკავეს?
„ჩვენს კანონმდებლობაში არსებული ხარვეზიდან გამომდინარე, იმიტომ, რომ ერთდროულად არ განიხილება სამართალდარღვევის საქმე და დაკავების კანონიერება, დღევანდელი მდგომარეობით, მზია ამაღლობელისთვის ეს გარემო პრაქტიკულად არაფერს არ შეცვლის. დღეს უკვე სამართალდარღვევის საქმე დასრულებულია, კანონიერ ძალაშია შესული და კანონიერად იყო თუ არა დაკავებული, ეგ ნიშნავს წარმატებას იმ კუთხით, რომ დადგინდება ფორმალურად, რომ დაკავება იყო არაკანონიერი.
სტრასბურგის სასამართლო განიხილავს მზია ამაღლობელის ადმინისტრაციულ საქმეს – ეს იქნება კარგი მაგალითი სტრასბურგის სასამართლოსთვის,“ – მიიჩნევს საიას ადვოკატი ნინო ხუციშვილი.
როგორ გაასამართლეს მზია ამაღლობელი სტიკერის გაკვრისთვის ორჯერ?
2025 წლის 11 იანვრის საპროტესტო აქციაზე მზია ამაღლობელმა შსს-ს პოლიციის დეპარტამენტის შესასვლელთან მდებარე დამხმარე ნაგებობაზე სტიკერი გააკრა, რომელზეც ეწერა – „იფიცება საქართველო“. მზია ამაღლობელი დააკავეს, თუმცა სტიკერის გაკვრის გამო პოლიციელებს მოქალაქის დაკავების უფლება არ აქვთ, ამიტომაც, პოლიციელებმა თქვეს, რომ მზია ამაღლობელი თითქოს მათ შეურაცხყოფდა და აგინებდა.
კიდევ ერთი დადასტურებული სიყალბე ამ საქმეში ისაა, რომ აქციაზე გადაღებული უწყვეტი ვიდეოკადრების მიხედვით, მზია ამაღლობელს გრიგოლ ბესელია აკავებს – აჭარის პოლიციის დეპარტამენტის უფროსი [გრიგოლ ბესელია 2026 წლის მარტიდან შსს-ში აღარ მუშაობს]. დაკავების ოქმში კი, პოლიციელებმა ჩაწერეს, რომ მზია ამაღლობელი გრიგოლ ბესელიამ კი არა, ბათუმის პოლიციის უფროსის, ირაკლი დგებუაძის მოადგილემ, გოჩა ვანაძემ დააკავა.
გაყალბებული საქმის მიუხედავად, 2025 წლის 18 მარტს მოსამართლე სალიხ შაინიძემ სამართალდამრღვევად ცნო და პატიმრობაში მყოფი მზია ამაღლობელი 2 ათასი ლარით დააჯარიმა.
2025 წლის 28 აპრილს გამართულ მზია ამაღლობელის სასამართლო სხდომაზე [სისხლის სამართლის საქმის განხილვა] სასამართლომ აჭარის პოლიციის დეპარტამენტის უკვე ყოფილი უფროსის, გრიგოლ ბესელიას ჩვენება მოისმინა. სხვა პოლიციელების მსგავსად, გრიგოლ ბესელიაც ამხილეს სიცრუეში მზია ამაღლობელის ადვოკატებმა. მაგალითად, გრიგოლ ბესელიამ დაკითხვის დროს თქვა, რომ მზია ამაღლობელის მიმართ შედგენილია ადმინისტრაციული სამართალდარღვევის ოქმი 150-ე მუხლითაც [სტიკერის გაკვრისთვის]. სინამდვილეში, ჩვენების მიცემის დროს, 2025 წლის 28 აპრილს, მსგავსი ოქმი საერთოდ არ არსებობდა.
გრიგოლ ბესელიას ამ ჩვენებიდან 2 დღის შემდეგ – 2025 წლის 30 აპრილს, პოლიციელმა ნოდარ ზენაიშვილმა [მან ცრუ ჩვენება ერთხელ უკვე მისცა მზია ამაღლობელის იმ ადმინისტრაციულ საქმეზე, რომელიც გაყალბებულია] შეადგინა ახალი სამართალდარღვევის ოქმი მზია ამაღლობელის წინააღმდეგ.
2025 წლის 18 ივნისს ბათუმის საქალაქო სასამართლოში მზია ამაღლობელი სტიკერის გაკვრისთვის ხელახლა გაასამართლეს. პატიმრობაში მყოფი ჟურნალისტი მოსამართლე მარიანა ფომაევამ 1000 ლარით დააჯარიმა.
მარიანა ფომაევას მიერ გამოტანილი გადაწყვეტილება მზია ამაღლობელმა და მისმა ადვოკატებმა ქუთაისის სააპელაციო სასამართლოში გაასაჩივრეს, თუმცა სააპელაციომ დაცვის მხარის არგუმენტები არ მოისმინა, არ გაიზიარა და პირველი ინსტანციის სასამართლოს გადაწყვეტილება 2025 წლის სექტემბერში ძალაში დატოვა.
ევროპის ადამიანის უფლებათა დაცვის სასამართლომ მზია ამაღლობელის ადმინისტრაციული საქმის საჩივარი წარმოებაში უკვე მიიღო.
სახალხო დამცველის სპეციალური ანგარიშის მიხედვით, რომელიც დღეს, 22 აპრილს გამოქვეყნდა, 2025 წელს 60+ ასაკის 766 ქალი გახდა ძალადობის მსხვერპლი, 314 კი – კაცი.
ამავე ანგარიშის მიხედვით, ხანდაზმულებზე ძალადობის მაჩვენებელი გაცილებით მაღალი იყო 2024 წელს, როცა 860 ხანდაზმული ქალი გახდა ძალადობის მსხვერპლი. კაცების შემთხვევაში კი ეს რიცხვი 298 იყო.
როგორც ანგარიშში ვკითხულობთ, საინტერესოა ის ფაქტი, რომ ძალადობის მსხვერპლ ქალთა რაოდენობა წლების განმავლობაში მნიშვნელოვნად აღემატება მამაკაცთა რაოდენობას, „რაც იმაზე მიუთითებს, რომ ხანდაზმული ქალები ძალადობის განსაკუთრებულად მაღალი რისკის ჯგუფს მიეკუთვნებიან“.
ამავე წყაროს მონაცემებით, მაგალითად, 2021 წელს, ქალებშიც და მამაკაცებშიც, ოჯახში ძალადობის ფაქტებზე გამოცემული შემაკავებელი ორდერების ყველაზე მაღალი მაჩვენებელი იკვეთება.
„ხოლო ბოლო წლებში გაზრდილია ოჯახში ძალადობის ფაქტებზე ქალ მსხვერპლებზე გამოცემული შემაკავებელი ორდერების რაოდენობა. ყველაზე ხშირია ოჯახში ძალადობის ფსიქოლოგიური და ფიზიკური სახეები“ – წერს ომბუდსმენი.
ამავე ანგარიშში წერია, რომ ოჯახში ძალადობის სახეების სტატისტიკა ასაკის მიხედვით არ არის ჩაშლილი, შესაბამისად, სრული სურათის დანახვა რთულია.
ხანდაზმულ ადამიანებზე ძალადობის სტატისტიკა წლების მიხედვით. წყარო: ომბუდსმენის ანგარიში.
„სტატისტიკური მონაცემების სიღრმისეული ანალიზი შესაძლებელს გახდიდა დაგვენახა ხანდაზმულ პირებზე ძალადობის მახასიათებლები, ხოლო პასუხისმგებელ უწყებებს დაეხმარებოდა უფრო ეფექტიანი და სპეციალურად ხანდაზმულ პირებზე მორგებული პრევენციისა და დაცვის და დახმარების ღონისძიებების დაგეგმვაში“- ნათქვამია ომბუდსმენის ანგარიშში.
ანგარიშში ასევე წერია, რომ ხანდაზმულებისათვის, რომლებიც არ არიან მოთავსებულები მსხვერპლთა დროებით საცხოვრებელში, მაგრამ სჭირდებათ ძალადობისგან დაცვა, ფსიქოლოგიური, სოციალური რეაბილიტაცია და იურიდიული და სამედიცინო დახმარება, მომსახურება ხორციელდება „სოციალური რეაბილიტაციისა და ბავშვზე ზრუნვის სახელმწიფო პროგრამის“ ფარგლებში, რომლის ერთ-ერთი კომპონენტია ხანდაზმულთა და შშმ პირთა სათემო მომსახურებით უზრუნველყოფის ქვეპროგრამა.
ქვეპროგრამის მიზანია ხანდაზმულთა და შშმ პირთა დამოუკიდებელი ცხოვრების ხელშეწყობა, მათი სოციალური ინტეგრაცია, ალტერნატიული მომსახურებების განვითარება. ხანდაზმული იღებს შემდეგ სერვისებს – საცხოვრებელი და საკვები, სამედიცინო მომსახურება, სოციალური რეაბილიტაცია.
ასევე, ხანდაზმული, დადგენილი სტანდარტების მიხედვით, დაცულია დაწესებულებაში ძალადობისაგან. თუმცა სერვისი არ უზრუნველყოფს ძალადობის ან/და ოჯახში ძალადობის ხანდაზმულ მსხვერპლთა/დაზარალებულთა, ასევე სავარაუდო მსხვერპლთა დაცვას/დახმარებაზე მორგებულ დამოუკიდებელ და მიზნობრივ პროგრამას.
ანგარიშის მიხედვით, 2025 წლის მონიტორინგის შედეგების მიხედვით, ძალადობის მსხვერპლთა თავშესაფრებში ხანდაზმული ბენეფიციარების რაოდენობა, ზოგადად, დაბალია, თუმცა, „მიუხედავად ამისა, გამოვლინდა რიგი პრობლემები, რომლებმაც, შესაძლოა, წარმოქმნას ხანდაზმულ პირთა განსაკუთრებულ საჭიროებებთან დაკავშირებული სისტემური გამოწვევები“.
განსაკუთრებულ პრობლემას წარმოადგენს თავშესაფრებში ისეთი ხანდაზმულების განთავსების საკითხი, რომლებსაც შეზღუდული აქვთ თვითმოვლის შესაძლებლობები.
კერძოდ, თავშესაფრებში არ არის გათვალისწინებული შესაბამისი სერვისები და საკმარისი რაოდენობის სპეციალიზებული პერსონალი, რომელიც უზრუნველყოფდა თვითმოვლის შესაძლებლობის არმქონე ბენეფიციარებზე ყოველდღიურ ზრუნვას.
„შედეგად, მნიშვნელოვნად იზრდება მედდის სამუშაო დატვირთვა, რაც უარყოფითად აისახება როგორც მომსახურების ხარისხზე, ისე პერსონალის პროფესიულ რესურსებზე“- წერია ანგარიშში.
ამავე წყაროს ცნობით, ზრუნვის სააგენტოდან გამოთხოვილი ინფორმაციის თანახმად, სახელმწიფო ზრუნვისა და ტრეფიკინგის მსხვერპლთა, დაზარალებულთა დახმარების სააგენტოს სტრუქტურულ ერთეულებში – თავშესაფრის მომსახურებით 2024 წლის განმავლობაში თვითმოვლის შესაძლებლობის არმქონე ექვსმა ხანდაზმულმა ისარგებლა.
„სააგენტოს მიერ მოწოდებული ინფორმაციით, ბენეფიციართა უმეტესობას აღენიშნებოდა მოძრაობის ფუნქციური შეზღუდვები და სჭირდებოდა დამხმარე მომსახურება სანიტარიულ-ჰიგიენური ნორმების დაცვის პროცესში, რასაც ძირითადად უზრუნველყოფდა სამედიცინო პერსონალი (მედდა).
ბენეფიციართა თავშესაფრებში ყოფნის ვადა მერყეობდა 5-დან 10 თვემდე. ასევე, აპარატისთვის მოწოდებული ინფორმაციით, სააგენტოს სტრუქტურულ ერთეულებში (თავშესაფრები) დასაქმებულ სამედიცინო პერსონალს (მედდა) არ გააჩნია სპეციალიზებული კვალიფიკაცია გერიატრიული მოვლის მიმართულებით.
მონიტორინგის შედეგად გამოვლინდა, რომ თავშესაფრების ნაწილი უარს აცხადებს იმ ბენეფიციართა მიღებაზე, რომელთაც შეზღუდული აქვთ თვითმოვლის შესაძლებლობები, რაც პრაქტიკაში ზღუდავს ამ ჯგუფის ხელმისაწვდომობას შესაბამის სერვისებზე.
ამავე დროს, ცხელი ხაზის ოპერატორებისგან მიღებული ინფორმაციით, თავშესაფრის სერვისით სარგებლობა ფორმალურად ხელმისაწვდომია ნებისმიერი პირისთვის; თუმცა თვითმოვლის შესაძლებლობების არმქონე ბენეფიციართა შემთხვევაში, პრაქტიკაში უპირატესობა ენიჭება მათ გადამისამართებას სპეციალიზებულ დაწესებულებაში.
დამატებითი პრობლემაა დემენციის მქონე ბენეფიციარების ძალადობის მსხვერპლთა თავშესაფრებში განთავსება. ერთ-ერთი თავშესაფრის ხელმძღვანელის თქმით, დემენციის მქონე ძალადობის მსხვერპლი პირებისათვის ფსიქოსოციალური რეაბილიტაცია რთულია და მათი გაძლიერება წარმოშობს გარკვეულ დაბრკოლებებს.
ფაქტობრივად, ამ სახის სერვისები დემენციის მქონე ბენეფიციარებისთვის ნაკლებად ეფექტიანია და შესაძლოა არ იძლეოდეს მათი მდგომარეობის გაუმჯობესების ან რეალური მხარდაჭერის შესაძლებლობას.
ეს ყოველივე აჩენს შესაბამისი ალტერნატიული სერვისების ან არსებული სერვისის ფარგლებში სპეციალიზებული ზრუნვის საჭიროებას“.
ანგარიშის მიხედვით, ხანდაზმულ ბენეფიციარზე პერსონალის მხრიდან განხორციელებული ძალადობისა და არასათანადო მოპყრობის, ან ერთმანეთის მიმართ ეკონომიკური, ფსიქოლოგიური და ფიზიკური ძალადობის შემთხვევები ხშირი არ ყოფილა, „თუმცა დაწესებულებებში ხანდაზმულთა ზრუნვის, ძალადობის პრევენციის, პროტოკოლირებისა და მართვის, ფსიქიატრიული შემთხვევის შეცნობისა და მართვის, ასევე, ხანდაზმულთა ფსიქოსოციალური რეაბილიტაციის საკითხების მცოდნე თანამშრომელი არ ჰყოლიათ.
დაწესებულებებში დანერგილი არ ყოფილა რთული ქცევის, ძალადობის ან სტრესის მართვის ტექნიკები, ხანდაზმული ბენეფიციარების ზრუნვის სისტემა არ იცნობდა ძალადობისა და დისკრიმინაციისაგან დაცვის სახელმწიფო სტანდარტების მოთხოვნებს.
მომსახურებაში შემუშავებული არ ჰქონიათ ძალადობისა და არასათანადო მოპყრობისაგან დაცვის შიდა რეგულაციები, „ადმინისტრაცია და პერსონალი უარყოფდა ძალადობის შემთხვევების არსებობას და „ძალადობის შემთხვევების რეგისტრირების ჟურნალები’’ არ იწარმოებოდა“- ვკითხულობთ ანგარიშში.
საქართველოს სისხლის სამართლის კოდექსში 2012 წელს შესული ცვლილების მიხედვით, ოჯახში ძალადობა სისხლის სამართლის დანაშაულად მიიჩნევა, თუმცა ხანდაზმულ პირთა მიმართ ძალადობა ცალკე არ არის გამოყოფილი.
ზემოაღნიშნულიდან გამომდინარე, კანონმდებლობაში ხანდაზმული ადამიანები, როგორც ძალადობის მსხვერპლები, ცალკე მოხსენიებულები არ არიან.
მნიშვნელოვანია, რომ „საქართველოს ადამიანის უფლებათა დაცვის ეროვნულ სტრატეგიაში“ (2022−2030 წლებისთვის) პირველად გაჩნდა ჩანაწერი ხანდაზმულ პირთა უფლებების დაცვის და საზოგადოებრივ ცხოვრებაში მონაწილეობის გაძლიერების შესახებ და გაიწერა შესაბამისი მიზნები და ამოცანები.
მათ შორის, ერთ-ერთი ამოცანაა ხანდაზმულთა დაცვა მათზე ძალადობის ეფექტიანი გამოვლენის, რეაგირებისა და პრევენციის გზით“- ნათქვამია სახალხო დამცველის სპეციალურ ანგარიშში.
საყოველთაო აღწერის დაზუსტებული მონაცემებით აჭარაში 402 929 ადამიანი ცხოვრობს, აქედან ნახევარზე მეტი – 235 668 ადამიანი ცხოვრობს ბათუმში. ანუ აჭარის მთლიანი მოსახლეობის 58,4 პროცენტი.
რაც შეეხება სხვა მუნიციპალიტეტებს, საქსტატის მიერ დაზუსტებული მონაცემები ასეთია:
ქედის მუნიციპალიტეტი – 14 697 ადამიანი
ქობულეთის მუნიციპალიტეტი – 74 027
შუახევის მუნიციპალიტეტი – 11 104
ხელვაჩაურის მუნიციპალიტეტი – 51 091
ხულოს მუნიციპალიტეტი – 16 342
ამავე დაზუსტებული მონაცემებით, 2024 წლის 14 ნოემბრის მდგომარეობით, საქართველოს მოსახლეობის რიცხოვნობამ 3 929 581 კაცი შეადგინა, რაც 0,4 პროცენტით [15 581-ით] მეტია 2025 წლის ივნისში გამოქვეყნებულ [3 914 000 კაცი] წინასწარ მონაცემთან შედარებით. აქვე აღსანიშნავია, რომ საქსტატის მიერ გამოქვეყნებული მონაცემებით 2025 წლის 1-ლი იანვრის მდგომარეობით მოსახლეობის რიცხოვნობა იყო 3 704 500.
აღწერის დაზუსტებული მონაცემების მიხედვით საქართველოს მოსახლეობის 52 პროცენტი [2 048 577 კაცი] ქალია, ხოლო 48 პროცენტი [1 881 004 კაცი] – კაცი. ქალების წილი შედარებით მაღალია თბილისსა და ქუთაისში და შეადგენს 54 პროცენტს, ხოლო შედარებით დაბალია ქედის, ხელვაჩაურის, ხარაგაულის, საგარეჯოს, მარნეულის მუნიციპალიტეტებში და შეადგენს 49 პროცენტს.
აღწერის დაზუსტებული მონაცემების მიხედვით აჭარაში 402 929 ადამიანიდან 196 771 კაცი და 206 158 ქალი ცხოვრობს. წინასწარი შედეგებით კი, რომელიც 2025 წლის ივნისის ბოლოს გამოქვეყნდა, აჭარაში 401 100 ადამიანიდან 193 700 კაცი, ხოლო 207 300 ქალი იყო.
„საქართველოში მოსახლეობის და სასოფლო-სამეურნეო აღწერა ჩატარდა 2024 წლის 14 ნოემბრიდან 31 დეკემბრის პერიოდში. აღწერამ მოიცვა ქვეყნის მთელი ტერიტორია, ოკუპირებული ტერიტორიების გარდა.
საერთაშორისო მეთოდოლოგიის მიხედვით, აღწერას დაექვემდებარა ქვეყანაში მუდმივად მცხოვრები საქართველოს ყველა მოქალაქე, ასევე ქვეყნის ტერიტორიაზე მყოფი უცხო ქვეყნის მოქალაქეები და მოქალაქეობის არმქონე პირები“ – წერს საქსტატი.
საქსტატის ინფორმაციით, საქართველოს 2024 წლის მოსახლეობის და სასოფლო სამეურნეო აღწერის საბოლოო, დეტალური შედეგები [მათ შორის ეროვნებისა და მოქალაქეობის მიხედვით] გამოქვეყნდება 2026 წლის ივნისის ბოლოს.
საქართველოს მოსახლეობა რეგიონების მიხედვით – 2024 წლის საყოველთაო აღწერის დაზუსტებული მონაცემები / წყარო: საქსტატი
გარემოს ეროვნული სააგენტოს აჭარის რეგიონული ჰიდრომეტეოროლოგიური ობსერვატორიის ინფორმაციით, 22 აპრილის 21 საათიდან 23 აპრილის 21 საათამდე ბათუმსა და მთლიანად აჭარაში მოსალოდნელია ღრუბლიანი ამინდი, უმეტესად წვიმა.
იქროლებს ცვალებადი მიმართულების ქარი 12-17 მეტრი წამში.
უკრაინის შეიარაღებული ძალების გენერალური შტაბის დღევანდელი მონაცემებით, ომის დაწყებიდან 2026 წლის 22 აპრილამდე პერიოდში, რუსეთის არმიის საბრძოლო დანაკარგი არის:
ცოცხალი ძალა – დაახლოებით 1 321 450 ადამიანი [გასულ დღე-ღამეში +1 140. ამ მონაცემებში შედის როგორც დაღუპულები, ასევე დაჭრილები]
ტანკი – 11 885 ერთეული [+1]
ჯავშანტექნიკა – 24 436 ერთეული [+7]
საარტილერიო სისტემა – 40 516 ერთეული [+38]
MLRS – 1 749 ერთეული [+0]
საზენიტო საბრძოლო სისტემა – 1 350 ერთეული [+0]
თვითმფრინავი – 435 ერთეული [+0]
ვერტმფრენი – 350 ერთეული [+0]
უპილოტო საფრენი აპარატის ოპერატიულ-ტაქტიკური დონე – 251 489 ერთეული [+1 026]
ფრთოსანი რაკეტა [ჩამოაგდეს] – 4 549 ერთეული [+0]
გემი/ნავი – 33 ერთეული [+0]
წყალქვეშა ნავი – 2 ერთეული [+0]
მანქანები და საწვავის ავზები – 90 925 ერთეული [+162]
სპეცტექნიკა – 4 132 ერთეული [+0]
უკრაინის გენერალური შტაბის განცხადებით, საომარი მოქმედებების მაღალი ინტენსივობის გამო მონაცემები იცვლება.
უკრაინის სამხედრო დანაკარგებზე სტატისტიკური ინფორმაცია 2026 წლის 25 თებერვლის შემდეგ აღარ განუახლებია რუსეთს.
რუსეთის თავდაცვის სამინისტროს მიერ ტელეგრამ არხზე ბოლოს გავრცელებული მონაცემებით, ომის დაწყებიდან 2026 წლის 25 თებერვლამდე პერიოდში სულ განადგურებულია უკრაინის:
670 თვითმფრინავი
283 ვერტმფრენი
117 299 უპილოტო საფრენი აპარატი
651 საზენიტო სარაკეტო სისტემა
27 873 ტანკი და სხვა ჯავშანტექნიკა
1 674 მრავალჯერადი სარაკეტო გამშვები
33 474 საველე არტილერია და ნაღმმტყორცნი
55 252 სპეციალური სამხედრო მანქანა
ეს ის მონაცემებია, რომელსაც უკრაინა და რუსეთი ოფიციალურად ავრცელებენ, თუმცა ომის პირობებში შეუძლებელია ზუსტად გადამოწმება, რამდენად შეესაბამება მხარეების მიერ გავრცელებული ინფორმაცია დანაკარგების შესახებ რეალურ რიცხვებს.
ამასთან, აღნიშნულ მონაცემებთან ერთად რუსეთის თავდაცვა, უკრაინის და რუსეთის არმიის ცოცხალი ძალის საერთო დანაკარგების შესახებ სტატისტიკას არ აქვეყნებს. უკრაინის არმიის ცოცხალი ძალის დანაკარგების შესახებ მონაცემებს არ აქვეყნებს არც უკრაინა.
ბათუმის ბულვარში 20 ავტომანქანით შესვლის ამბის გახმაურების შემდეგ, აჭარის მთავრობამ გამოაქვეყნა კლიპი, სადაც მოქალაქეებს უამბობენ, თუ რა სამუშაო გასწიეს ქალაქის მთავარი სარეკრეაციო სივრცის იერ-სახის მოსაწესრიგებლად. ამავე კლიპის მიხედვით, ბულვარში ამ დროისთვის ასამდე კომერციული ობიექტი დაანგრიეს: მათ შორის მცირე კომერციული ობიექტი, გასართობი სივრცეები, რესტორნები და ე.წ. ბრენდირებული სანაპიროები.
დღემდე ფუნქციონირებს რესტორანი G17, მიუხედავად იმისა, რომ ისიც უკანონოა. ეს რესტორანი ახალი ბულვარის სანაპიროზე, ხიმშიაშვილის ქუჩის #13-ის მიმდებარედაა.
როგორ აგრძელებს რესტორანი G17 მუშაობას სანაპიროზე ვადაგასული საიჯარო ხელშეკრულებით, მაშინ, როცა იმავე მიზეზით ბათუმის მუნიციპალურმა ინსპექციამ ბულვარში 50-მდე კომერციული ობიექტი დაანგრია? – მერიაში ამ კითხვას დუმილით უპასუხეს.
რესტორნის მფლობელ კომპანიას საიჯარო ხელშეკრულების ვადა 2024 წელს გაუვიდა, თუმცა ის დღემდე შეუფერხებლად მუშაობს. დაზუსტებით არც ის ვიცით, შეესაბამება თუ არა შენობა და პირსი სანაპიროზე ბათუმის მერიის ქალაქმშენებლობის სამსახურის მიერ დამტკიცებულ სანებართვო პირობებს.
რესტორნის შესასვლელი
როგორ ახერხებს რესტორნის მფლობელი კომპანიის, შპს „გთემ ჰოსფითალითი გრუპის“ მფლობელი ბიზნესმენი, ედნარ პაპუნაიშვილი ბულვარში უკანონოდ მუშაობას. ამ საკითხზე მერიისა და მისი ქვემდებარე სტრუქტურების დუმილი აჩენს კითხვებს დიდი ფულის ძალასა და კორუფციაზე.
ვისაც ბერკეტი აქვს, აგვარებს – დაახლოებით ასე ახსნა ბათუმის მერიის ქალაქმშენელობისა და ურბანული პოლიტიკის სამსახურის უფროსმა საკრებულოს ერთ-ერთ სხდომაზე ედნარ პაპუნაიშვილის სხვა ობიექტთან დაკავშირებული ცვლილება ბულვარის გენგეგმაში. ვისაც „ბერკეტი“ არ ჰქონდა, დაანგრიეს.
ჩვენს კითხვებს არც რესტორნის მფლობელი კომპანიის დირექტორმა უპასუხა, დაგვპირდა: „ახლა არ მცალია და დაგირეკავთ“ , თუმცა უშედეგოდ.
ამის პარალელურად, ამ დრომდე არც ერთი უწყებიდან, რომლებსაც ბულვარის, როგორც სარეკრეაციო სივრცის დაცვა ევალებათ, არ მოგვისმენია რაიმე სახის განცხადება შესაბამისი პირების პასუხისმგებლობაზე, ვისაც ბულვარში ავტომანქანების შესვლა არ უნდა დაეშვა.
ამ ამბავს საჯაროდ არც მერიის მაკონტროლებელი ორგანოდან, საკრებულოდან გამოხმაურებია ვინმე.
როგორ მოხდა, რომ ბულვარში 20 ავტომანქანა შევიდა ისე, რომ ადმინისტრაციამ კანონდარღვევა ვერ აღკვეთა, ასე იცავს ბულვარს ახალი პოლიციელი ხელმძღვანელი?
ვიდეო, სადაც ჩანს, როგორ გადაადგილდებიან მიკროავტობუსი და მსუბუქი ავტომობილები ბულვარში, 19 აპრილს, დაახლოებით 02:00 საათზე, მოქალაქემ გადაიღო და გაავრცელა. ამ ვიდეოს მიხედვით ირკვევა, რომ ავტომანქანებით ბულვარში რესტორან G17-ის სტუმრები გადაადგილდებიან.
ვიდეოს სოციალურ ქსელში დიდი გამოხმაურება მოჰყვა. მოქალაქეები წერდნენ, რომ ბულვარში რიგითი ადამიანი ავტომანქანით შესვლას ვერ შეძლებს და ამის გაკეთება მხოლოდ „დიდი ფულისა და გავლენის მქონეს შეუძლია“.
ბულვარში ავტომანქანების ესკორტის შესახებ განცხადება ბულვარის ადმინისტრაციამ 20 აპრილს გაავრცელა. ამ განცხადებაში განმარტეს, რომ „ბულვარის ტერიტორიაზე ავტომობილების გადაადგილების ფაქტთან დაკავშირებით შესაბამისი სამსახურის მიერ მოხდა სამართალდარღვევის დაფიქსირება. ინფორმაცია შს სამინისტროს გადაეგზავნა და დამრღვევი პირების მიმართ გატარდა კანონით გათვალისწინებული ღონისძიებები – ყველა პირი ადმინისტრაციულად დაჯარიმდა.“
როგორც „ბათუმელებს“ შს სამინისტროში უთხრეს, მძღოლები 100-100 ლარით დააჯარიმეს. ამ განცხადებაში განმარტებული არ არის, როდის დააფიქსირეს დარღვევა, მას შემდეგ, რაც ის მოქალაქემ გადაიღო და მედიით გავრცელდა, თუ მანამდე?
რა მოხდება იმ შემთხვევაში, თუ ბულვარში ავტომანქანით შესვლას რიგითი მოქალაქე გადაწყვეტს, უფლებამოსილი პირი მხოლოდ დააფიქსირებს ამას და გადასცემს შს სამინისტროს რეაგირებისთვის? – აქ გასათვალისწინებელია ისიც, რომ იქვე საპატრულო ეკიპაჟიც იმყოფებოდა. კადრში კარგად ჩანს, რომ პოლიცია ადგილზეა და არ რეაგირებს. პირიქით, რჩება შთაბეჭდილება, რომ ისინი ავტომანქანებში მყოფების უსაფრთხოებას იცავენ.
ბულვარში სასწრაფო დახმარების მანქანის შესვლასაც კი ყოველთვის აკონტროლებს პოლიცია, რა მოხდა ამ შემთხვევაში? – ამაზე პასუხი არავის გაუცია.
რესტორანი G17 ბულვარის სანაპიროზე მათ შორისაა, რომლის იერ-სახე და მასშტაბი ბათუმის ბულვარის გენგეგმას არ შეესაბამება. თუმცა კითხვაზე – არის თუ არა რაიმე სახის ადმინისტრაციული წარმოება მერიაში ამ რესტორანთან დაკავშირებით, ბათუმის მუნიციპალურ ინსპექციაში არ გვიპასუხეს.
კანონიერია თუ არა ამ რესტორნის შენობა სანაპიროზე, მოქმედია თუ არა საიჯარო ხელშეკრულება, რომელიც კომპანიას მერიასთან აქვს გაფორმებული? – ვერც ამ კითხვაზე მივიღეთ პასუხი ბათუმის მერიაში.
„ბათუმელების“ ინფორმაციით, კომპანიას ამ კონკრეტულ ნაკვეთზე მოქმედი საიჯარო ხელშეკრულება არ აქვს. ამას ადასტურებს დოკუმენტებიც. ჩვენთვის ცნობილია, რომ 2024 წელს ბათუმის მერიამ იჯარის შეწყვეტის რეგისტრაციის მოთხოვნით მიმართა საჯარო რეესტრს, თუმცა პროცედურის დასრულება ვერ შეძლო.
გადაწყვეტილების დასაბუთებაში ვკითხულობთ, რომ განცხადებას, რომლითაც მერიამ რეესტრს მიმართა, თან ახლდა იჯარის შეწყვეტის დამადასტურებელი დოკუმენტი. ეს დოკუმენტი რეესტრმა ერთი მიზეზით დაიწუნა: ელექტრონულად არის ხელმოწერილი და მისი გადამოწმება ვერ ხერხდებაო.
იმავე დოკუმენტში რეესტრი განმარტავს:
„მარეგისტრირებელი ორგანოს მიერ მიღებულ იქნა გადაწყვეტილება სარეგისტრაციო წარმოების შეჩერების შესახებ, ვინაიდან განცხადებას თანდართული დოკუმენტი/ინფორმაცია არ არის წარმოდგენილი საქართველოს კანონმდებლობით დადგენილი ფორმითა და წესით, დაინტერესებული პირის განცხადება ან/და თანდართული დოკუმენტი ან ინფორმაცია არ იძლევა უძრავი ნივთის იდენტიფიკაციის საშუალებას ან არსებობს საქართველოს კანონმდებლობით გათვალისწინებული სხვა საფუძვლები“.
ზემოთ ნახსენები წუნის გამოსწორება მერიას უმოკლეს ვადაში შეეძლო, თუმცა აღარ უცდია – ადმინისტრაციული წარმოება აღარ განაახლა. მერიამ რეესტრს აღარ მიმართა.
ადგილი, სადაც ახლა რესტორანი G17 მდებარეობს, ბათუმის მერიამ რესტორნის მფლობელ კომპანიას შპს „გთმ ჰოსპიტალითი ჯგუფს“ საიჯარო წესით 2019 წელს ხუთი წლის ვადით გადასცა. 2024 წლის ივლისში, როცა მერიამ რეესტრს მიწის ნაკვეთის საიჯარო შეთანხმებიდან გათავისუფლება მოსთხოვა, ეს ვადა გასული იყო.
რესტორანი G17
თუ კომპანიას ხელშეკრულებას გაუგრძელებდნენ, ეს რეესტრში უნდა აესახათ, თუმცა 2024 წლის მცდელობის შემდეგ ამონაწერი განახლებული არ არის.
G17-ის მფლობელი კომპანია შპს „გთემ ჰოსფითალითი გრუპია“. ეს კომპანია მილიონერ ბიზნესმენს, ედნარ პაპუნაიშვილს ეკუთვნის. მასვე ეკუთვნის ასევე შპს „ხიდი 2006“, რომელიც ფლობს კაფე „სანრემოს“ ბულვარის სანაპიროზე.
„სანრემოს“ შენობა პირსის ჩათვლით [1416,7 კვ.მ] და მიმდებარე ტერიტორია [11 138 კვ.მ] ბათუმის მუნიციპალიტეტის საკუთრებაა – ეს ქონება 2067 წლამდე იჯარით აქვს აღებული კომპანია „ხიდი 2006“-ს. ამ კომპანიის 100% წილი ბიზნესმენმა ედნარ პაპუნაიშვილმა 2017 წელს შეისყიდა და კომპანიას დღემდე თავად ფლობს. ბათუმის მუნიციპალიტეტმა კომპანიას ქონება 49-წლიანი იჯარით 2018 წლის მაისში გადასცა.
30 მარტს საკრებულომ „სანრემო“ ბათუმის ბულვარის გენგეგმაში ასახა, როგორც არსებული ობიექტი, თუმცა შენობა ჯერ დასრულებული არ არის.
სახელმწიფო შესყიდვების სააგენტოს მონაცემებით, უკანონო რესტორანთან – G17-თან მომსახურების ხელშეკრულებებს აფორმებდნენ სახელმწიფო უწყებები და მასთან დაკავშირებული ორგანიზაციები.
„მისთვის აუცილებელი ფსიქოტროპულ მედიკამენტის დანიშვნას მსჯავრდებული თვეზე მეტია ითხოვს… ადმინისტრაციის მხრიდან გულგრილი მოპყრობის გამო, მსჯავრდებული ერთ კვირაზე მეტია შიმშილობს პროტესტის ნიშნად,“ – ამბობს ადვოკატი ნესტან ანანიძე. იგი ერთ-ერთი პატიმრის ინტერესებს იცავს, რომელიც ლაითურის პირველ დაწესებულებაშია მძიმე ფსიქოლოგიური და მენტალური ჯანმრთელობის მდგომარეობით.
ადვოკატი განმარტავს, რომ პენიტენციური დაწესებულების ადმინისტრაცია პატიმარს საჭირო დოზით მედიკამენტებს არ უნიშნავს, პატიმარს აქვს დანიშნული კონკრეტული მედიკამენტები, რომელსაც არასაკმარისი რაოდენობით აძლევენ. ის იღებს მხოლოდ დილის დოზას, თუმცა მას ესაჭიროება ასევე საღამოს იგივე ოდენობით წამლის მიღება. პატიმარი სწორედ ამ გრაფიკით იღებდა მედიკამენტებს ქუთაისის N2 პენიტენციურ დაწესებულებაში, ვიდრე გადმოიყვანდნენ ლაითურის N1 პენიტენციურ დაწესებულებაში.
პრობლემის მოგვარების თხოვნით ადვოკატს 2026 წლის 8 აპრილს მიუმართავს სპეციალური პენიტენციური სამსახურისთვის, მაგრამ ადვოკატს პასუხი ჯერ კიდევ არ მიუღია. 16 აპრილს ციხეში მისულ ადვოკატისთვის კიდევ უფრო მეტად დაუძლურებულ პატიმარს უთქვამს, რომ მან თვითმკვლელობაც სცადა.
„… მითხრა, რომ ჩაამსხვრია სარკე და თავის დაზიანებას აპირებდა, რა დროსაც საკანში შევიდნენ პენიტენციური სამსახურის თანამშრომლები. ამის მიზეზი არის ლაითურის N1 პენიტენციური დაწესებულების ადმინისტრაციის მხრიდან მსჯავრდებულის მიმართ გამოხატული გულგრილობა და სათანადო სამედიცინო მომსახურების გაწევაზე უარის თქმა.
მას კვლავ აღენიშნება შფოთვა და უძილობა, ღამის განმავლობაში სძინავს მხოლოდ ოთხი საათის განმავლობაში. აქვს ნევროზი და ფსიქოლოგიურად აღგზნებულია, რაც მათ შორის პენიტენციური სამსახურის თანამშრომლების მიმართ აგრესიაშიც გამოიხატება. მისი ამ მდგომარეობიდან გამომდინარე, არაერთხელ ითხოვა წამლის დოზის გაზრდა, დილით და საღამოს ერთი და იგივე დოზის მიღება, რაზეც უარი უთხრეს.
ამის ნაცვლად სამედიცინო პერსონალი მსჯავრდებულს სთავაზობს სხვა წამლის მიღებას, რომელიც იწვევს კუნთების მოდუნებას და არა რეალურად ფსიქოლოგიური მდგომარეობის გაუმჯობესებას.
ასევე, მენტალური ჯანმრთელობის გაუმჯობესებაში ეხმარებოდა კვირაში ორჯერ სავარჯიშო დარბაზში ვიზიტი, რაზეც უკვე აღარ რთავენ ნებას და შესაბამისად შეზღუდული აქვს სოციალური აქტივობებით დაკავების შესაძლებლობაც. პატიმრის ფსიქოლოგიური მდგომარეობა დაამძიმა შემთხვევამ, როდესაც მას ოჯახის წევრების მიერ მიწოდებული ტანსაცმელი შეუტანეს აშკარად განზრახ დაზიანებულ მდგომარეობაში. ტანსაცმლის გამოყენება ფაქტობრივად შეუძლებელი იყო.
ადმინისტრაციის მხრიდან გულგრილი მოპყრობის გამო, მსჯავრდებულმა ერთ კვირაზე მეტია დაიწყო შიმშილობა პროტესტის ნიშნად, იგი იღებს მხოლოდ წყალს, უარს აცხადებს ექიმების მომსახურებაზე. უკვე უჭირს მეტყველება, მოძრაობა, ფეხზე დგომა, აქვს თავბრუსხვევა და საერთო სისუსტე.
ასევე, მსჯავრდებული გადაიყვანეს სპეციალურ საკანში მარტო.
იგი ითხოვს სათანადო მოპყრობას ადმინისტრაციის მხრიდან, მედიკამენტების დანიშვნას ფსიქიატრის მხრიდან შესაბამისი დოზით და იუსტიციის სამინისტროსა და ჯანდაცვის სამინისტროს მხრიდან N1 პენიტენციური დაწესებულების ფსიქიატრის მიმართ მის მიერ განხორციელებული გადაცდომების თაობაზე სათანადო რეაგირებას,“ – აღნიშნულია წერილში, რომელიც 20 აპრილს მიუწერია ადვოკატს სახალხო დამცველისთვის.
ომბუდსმენისთვის ადვოკატისგან გაგზავნილი წერილში ვკითხულობთ იმასაც, რომ პატიმარი ფსიქიატრს მოთხოვნიდან ერთი კვირის შემდეგ შეახვედრეს, ასევე ის, რომ ექიმი პატიმარს არ უთმობს საკმარის დროს.
ადვოკატის თქმით, ფსიქიატრმა მსჯავრდებულს დაუდასტურა, რომ მას ნამდვილად სჭირდება დამატებით დოზა.
„თუმცა ჯანდაცვის სამინისტრო არ აწვდის მათ წამლებს, რათა დაუნიშნოს პაციენტს ისე, როგორც ქუთაისის მე-2 პენიტენციურ დაწესებულებაში იღებდა. მოცემული გარემოებები მსჯავრდებულის ფსიქოლოგიურ და მენტალურ ჯანმრთელობას კიდევ უფრო ამძიმებს და აუარესებს, იმატებს შფოთვის დონეც, რაც ადვოკატისთვისაც გარეგნული შეფასებით თვალხილულია.
მსჯავრდებულს აშკარად და ნამდვილად ესაჭიროება მედიკამენტების დოზის გაზრდა თუმცა ფსიქიატრისა თუ სამინისტროს მხრიდან არ ხდება სათანადო რეაგირების,“ – აღნიშნულია წერილში.
პატიმარს ადვოკატისთვის მოუყოლია თანამესაკნის ისტორიაც, რომელიც ასევე ითხოვდა წამლების დანიშვნას, მოთხოვნა არ დაუკმაყოფილეს და თავის დაწვა სცადაო.
„ნათელია, რომ იგნორირებულია მსჯავრდებულის რეალური საჭიროებები და ეს გრძელდება ერთი თვის განმავლობაში, მაშინ, როდესაც ფსიქიკური აშლილობის მქონე ადამიანების მიმართ რეაგირება უნდა იყოს დაუყოვნებლივი და სასწრაფო, რათა კიდევ უფრო არ დამძიმდეს მდგომარეობა,“ – აცხადებს პატიმრის ადვოკატი, ნესტან ანანიძე.
„წასასვლელი არსად მაქვს, ღია ცის ქვეშ ვარ, არ ვიცი, სად წავიდე“ – ამბობს მზია მეგრელიშვილი. ის უსახლკარო ქალია და მარტოხელა დედა, ნაქირავებში ცხოვრობს მცირეწლოვან შვილთან ერთად და „ოცნების“ მთავრობისგან ბინით დაკმაყოფილებას უშედეგოდ ითხოვს.
გუშინ, 20 აპრილს, მას შემდეგ, რაც მზია მეგრელიშვილი ისევ მივიდა აჭარის მთავრობის ადმინისტრაციულ შენობასთან, აჭარის მთავრობის პრესცენტრში ჟურნალისტებს უთხრეს, რომ „მზია მეგრელიშვილს აჭარის მთავრობის სარეზერვო ფონდიდან 2023-2026 წლებში მიღებული აქვს, ჯამში, 13 800 ლარი.“
მაშინ, როცა აჭარის მთავრობის თავმჯდომარის ხელფასი მარტო 1 თვეში 13 600 ლარია.
„როცა ამდენი უსახლკაროა და უსახლკარო ქალს უთვლი, რომ თურმე იმდენით დაეხმარა სახელმწიფო 2023-2026 წლებში ჯამურად, რა ხელფასსაც შენ მარტო 1 თვეში იღებ, ეს არის უზნეობა, რადგან შენ ხარ პასუხისმგებელი ადამიანების, ამ ქვეყნის მოქალაქეების სოციალურ მდგომარეობაზე.
…ერთეული ადამიანები გამდიდრდნენ კორუფციული გზებით. ეს მივიღეთ ნაცვლად იმისა, რომ ბათუმის მერიის საბინაო ფონდი გაიზარდა და ქალაქს შეეძლო უსახლკაროების პრობლემები გადაეწყვიტა,“ – ამბობს გიორგი კირთაძე, პარტია „ახლის“ ერთ-ერთი ლიდერი. მასთან „ბათუმელებმა“ ინტერვიუ ჩაწერა:
ბატონო გიორგი, რას აჩვენებს თქვენთვის აჭარის მთავრობის განცხადება, რომ „აჭარის მთავრობის სარეზერვო ფონდიდან 2023-2026 წლებში მიღებული აქვს ჯამში 13 800 ლარი“ უსახლკარო ქალს და მარტოხელა დედას? ამ დროს აჭარის მთავრობის თავმჯდომარის 1 თვის ხელფასი 13 600 ლარია.
ეს არის უზნეო განცხადება. აჭარის მთავრობის თავმჯდომარის თუ საქართველოს პარლამენტის დეპუტატების ხელფასები დავაჯამოთ: რა აქვთ ჯამში აღებული და ვნახავთ, რამხელა იქნება სხვაობა. ვიღაცები წელიწადში 100 000 ლარზე მეტს იღებენ და სოციალურად დაუცველ, გაჭირვებულ ქალს, რომელსაც ბინა არ აქვს, სამი წლის განმავლობაში რა შემწეობაც კი მიუღია სახელმწიფოს სხვადასხვა სტრუქტურიდან, ამ თანხებს უთვლიან.
ამ ყველაფერს ვუყურებთ და ამ დროს ივანიშვილი და მისი გარემოცვა გვეუბნება, რომ ქვეყანაში თურმე ეკონომიკური ბუმია, ორნიშნა ეკონომიკურ ზრდაზე საუბრობენ და ამდენი უსახლკარო გვყავს ქვეყანაში. გაზრდილია სოციალურად დაუცველების რაოდენობა, შრომისუნარიანი ადამიანები უბრალოდ გარბიან ქვეყნიდან, რომ ოჯახები არჩინონ.
ამით ჩანს, რომ თუკი რამე ეკონომიკური აქტივობა არსებობს, ერთეულების ჯიბეში მიდის. ეს აისახება ქვეყნის მასშტაბით რამდენიმე ათეულ და მაქსიმუმ ასეულ ოჯახზე. სოციალური უთანასწორობა ჩვენს ქვეყანაში უფრო და უფრო ღრმავდება.
გიორგი კირთაძე
რაც შეეხება საბინაო პრობლემებს, ამ მიმართულებით ჯერ კიდევ მაშინ, როცა ამ ქალაქში შუქი და წყალი არ იყო, თავის დროზე ბათუმის მერიას, აჭარის მთავრობას საბინაო ფონდი ჰქონოდა და ამით, პირველ რიგში, ასეთ მოწყვლად ადამიანებს ეხმარებოდა.
მაგრამ დღეს ყველა კარგად ვხედავთ, რომ პრობლემების მოგვარების ნაცვლად, როგორ არის შესული კორუფციულ გარიგებებში „ქართული ოცნების“ სხვადასხვა თანამდებობის პირი.
რამდენიმე დღის წინ ვნახეთ, როგორ მოძრაობდნენ ბათუმის ბულვარის პრომენადზე ავტომანქანები. თქვენი აზრით, ეს შემთხვევაც აჩენს კითხვას კორუფციაზე?
ეს შემთხვევა, მათ შორის და კიდევ ბევრი სხვა შემთხვევა აჩვენებს იმას, თუ როგორ უყურებს ბიძინა ივანიშვილის გარემოცვა ამ ქვეყანაში საკუთარ როლს. მათ მიაჩნიათ, რომ ისინი არიან ადამიანები, რომლებიც საერთოდ სხვანაირად უნდა ცხოვრობდნენ, სხვანაირად უნდა ეტყობოდეთ ფინანსური შესაძლებლობები, ხოლო დანარჩენი საზოგადოება მათ უნდა ემსახურებოდეს.
სხვაობა მეტი რა შეიძლება: როცა ბულვარში ღამის 3 საათზე მივიდნენ და ბარები დაუმსხვრიეს ხალხს ისე, რომ არც კი შეეკითხნენ, მეორე მხრივ, იმავე ბულვარში ავტომანქანებით კაზინოდან მილიარდერები მიჰყავთ…
თავგასულობას და უტიფრობას, ყველაფერს ერთად აჩვენებს ეს ფაქტი, რაც ბულვარში ვნახეთ.
კორუფციის რისკები ბათუმში ყოველი ფეხის გადადგმაზე გვაქვს: ხან ავტომანქანა ჩავარდება უხარისხოდ დაგებულ გზაზე, ხან ადამიანი აივანზე გამოდის და უცებ ხვდება ამოშენებული ყრუ კედელი. ასეთი გადაწყვეტილების და მავნებლობის უკან წარმოუდგენელია არ იდგეს კორუფცია.
თქვენ ახსენეთ სოციალური უთანასწორობა. უთანასწორობაა, როცა ხელფასი გაქვს თვეში 13 600 ლარი, როგორც აჭარის მთავრობის თავმჯდომარეს და ამ დროს შესაბამისი პროგრამების შემუშავების ნაცვლად, უსახლკარო ქალს უჯამებ, 4 წელიწადში სულ 13 800 ლარი მოგეცითო?
რა თქმა უნდა. მნიშვნელოვანია, რამხელაა სხვაობა ელიტას და დანარჩენს საზოგადოებას შორის.
მაღალი ხელფასი საჯარო სამსახურში კარგია და მისასალმებელი, მაგრამ ეს ყველაფერი ხომ უნდა ჯდებოდეს გონივრულ ფარგლებში? ევროპის ქვეყნებშიც მაღალია თანამდებობის პირის ხელფასი, მაგრამ იქ არის შესაბამისი სოციალური პროგრამები. ევროპის ქვეყნებში წარმოუდგენელია ამხელა სხვაობა საზოგადოებას და არჩეულ, თუ დანიშნულ საჯარო მოხელეს შორის.
როცა ქვეყანაში იქნება ღირსეული პენსია, როცა სოციალური მდგომარეობა იქნება იმგვარი, რომ შესაძლებელი იქნება ასეთი მაღალი ხელფასების არსებობა, მაშინ ბუნებრივია კარგი ანაზღაურება თანამდებობის პირისთვის.მაგრამ როცა ამდენი უსახლკაროა და უსახლკარო ქალს უთვლი, როგორ დაეხმარა სახელმწიფო და თურმე იმდენით დაეხმარა 2023-2026 წლებში ჯამურად, რა ხელფასსაც შენ 1 თვეში იღებ, ეს არის უზნეობა, რადგან შენ ხარ პასუხისმგებელი ადამიანების, ამ ქვეყნის მოქალაქეების სოციალურ მდგომარეობაზე.
აჭარის მთავრობა ვალდებულია შესაბამის სტრუქტურებთან ერთად, სამინისტროები იქნება ეს თუ საქვეუწყებო დაწესებულებები, შეიმუშაოს იმგვარი პროგრამები, რომელიც ასეთი პრობლემების გადაწყვეტას შეუწყობს ხელს. „იაფი სახლის“ პროგრამა იყო და უბედურება დაემართათ, საბინაო ფონდზე თუ ვილაპარაკებთ, ერთი მხრივ, ჩაგვიბეტონეს ქალაქი და დაამახინჯეს საუკუნოდ, რადგან ამის გამოსწორება უძნელესი ამბავი იქნება, მეორე მხრივ, ამ ყველაფრის შედეგია ის, რომ ერთეული ადამიანები გამდიდრდნენ კორუფციული გზებით.
ეს მივიღეთ ნაცვლად იმისა, რომ ბათუმის მერიის საბინაო ფონდი გაიზარდა და ქალაქს შეეძლო უსახლკაროების პრობლემები გადაეწყვიტა.
„ოცნება“ განიხილავს, რომ ოზთურქისთვის საპროცესო შეთანხმების შედეგად ჩამორთმეული კორპუსები გადასცეს უსახლკაროებს, თუმცა უცნობია, შეხვდება თუ არა ბინა სოცდაუცველ ადამიანებს, მარტოხელა დედებს… რამდენიმე უსახლკარომ გვითხრა, რომ 2028 წელს აპირებს „ოცნება“ ბინების დარიგებას, ანუ საარჩევნო წელს.
ისე, როგორც ეს ვნახეთ „ოცნების ქალაქში“ – ჩვენი ფულით აშენებული სახლების გადაცემას სპეციალურად არჩევნებს ამთხვევდნენ. დარწმუნებული ვარ, ამ შემთხვევაშიც იმავეს გააკეთებენ.
ვიდრე ოზთურქს დალაგებული ჰქონდა საქმე „ოცნებასთან“, ყველას გვახსოვს, რომ არაფერი ხდებოდა – არ შეუჩერებიათ უკანონო მშენებლობა ქალაქში. მთელ ქალაქში იყო პროტესტი და ამის მიუხედავად მშენებლობა გრძელდებოდა.
თქვენ რომ იყოთ მთავრობაში, რას გააკეთებდით და რა ფინანსური შესაძლებლობებით?
გამოსავალი არის საბინაო ფონდი, რაც ახლა აქვს მერიას, რომელსაც სჭირდება სწორად გამოყენება. სწორად გაწერილი კრიტერიუმებით შესაძლებელია ამ ადამიანების დაკმაყოფილება, რომლებიც ახლა უკიდურესად რთულ მდგომარეობაში არიან.
მთავრობის ეფექტური მუშაობით ეს პრობლემები დაძლევადია. ვერ ვიტყვით, რომ ამის შესაძლებლობა არ აქვს ქალაქს და რეგიონს. ყველა კარგად ვხედავთ, რა მასშტაბის მშენებლობებია ქალაქში. თუ ამ ყველაფერს გამოვაკლებთ კორუფციულ ინტერესებს და შემუშავებული იქნება შესაბამისი პროგრამები, ამ ადამიანების დახმარება შესაძლებელია.
მამუკა მდინარაძე სუსის უფროსი აღარ იქნება. მას ამ თანამდებობაზე გეკა გელაძე ჩაანაცვლებს – შს უკვე ყოფილი მინისტრი.
საკადრო ცვლილებების შესახებ დღეს, 21 აპრილს, განაცხადა ირაკლი კობახიძემ.
„სამართალდამცავი ორგანოების კოორდინაციის საკითხებში სახელმწიფო მინისტრის თანამდებობას დაიკავებს მამუკა მდინარაძე,“ – განაცხადა დღევანდელ ბრიფინგზე ირაკლი კობახიძემ.
მამუკა მდინარაძე ასევე იქნება ვიცე-პრემიერი.
„სახელმწიფო მინისტრის თანამდებობის შემოღება საჭიროებს საკანონმდებლო ცვლილებას, შესაბამის კანონპროექტს საქართველოს მთავრობა ხვალამდე წარუდგენს საქართველოს პარლამენტს. გვინდა ვთხოვოთ საქართველოს პარლამენტს, კანონპროექტი მიიღოს მომავალ სასესიო კვირაში დაჩქარებული წესით,“ – აღნიშნა ირაკლი კობახიძემ.
„რა თქმა უნდა, ვგმობ ძალადობას და ჩემი აზრით, ეს არ უნდა მომხდარიყო“ – განაცხადა ბიძინა ივანიშვილის უმცროსმა შვილმა, ცოტნე ივანიშვილმა, 18 აპრილს „ოცნების“ მხარდამჭერებთან შეხვედრისას. მისი თქმით, პოლარიზაციიდან გამოსავალი დიალოგი, „ერთმანეთის განსხვავებული აზრის მოსმენაა“.
თუმცა, ამ განცხადების პარალელურად, არ შეცვლილა „ქართული ოცნების“ მაღალჩინოსანთა რიტორიკა განსხვავებული აზრის დევნაზე.
რის მიღწევას ცდილობს ივანიშვილი? – ამ თემაზე „ბათუმელები“ ესაუბრა სამოქალაქო აქტივისტს და პროპაგანდის მკვლევარს, შმაგი სამხარაძეს.
ბატონო შმაგი, ივანიშვილის უმცროს შვილს, ცოტნეს, ახალგაზრდებთან შეხვედრა მოუწყვეს, სადაც მან თქვა, რომ გმობს ძალადობას და ახსენა დიალოგი დაპირისპირებულ მხარეებს შორის. რაზე მეტყველებს ეს ფაქტი და რის მიღწევას ცდილობს ივანიშვილი, თქვენი აზრით?
ჩვენ ვნახეთ, რა ფონზეც გააკეთა ცოტნე ივანიშვილმა ეს განცხადება, როცა მის გვერდით ისხდნენ ის ადამიანები, რომლებიც უშუალოდ მონაწილეობდნენ ძალადობრივ ქმედებებში და ამ ძალადობას სჩადის „ქართული ოცნების“ ე.წ ხელისუფლება. ივანიშვილის შვილი კი ამ ყველაფერს ხედავს და რას აკეთებს? თითქოს გმობს ძალადობას, მაგრამ საზოგადოებისგან ეს ვერ იქნება სერიოზულად აღქმული.
საზოგადოებისგან მართლაც მოდის მოთხოვნა, რომ ახალგაზრდები ჩაერთონ პოლიტიკაში და ახლა, როგორც ჩანს, ივანიშვილი ტესტავს, რამდენად იქნება მისაღები ახალგაზრდებისთვის ამ პროცესებში მისი შვილის ჩართვა. ალბათ ჩათვალეს, რომ ყველაზე დიდი ფიგურა, ვინც ამ მესიჯს გაავრცელებდა, ივანიშვილის ვაჟია.
ჩვენ ვიცნობთ სხვა მმართველებსაც, რომლებიც დიდხანს არიან ხელისუფლებაში და გვერდით იყენებენ საკუთარ შვილებს. ლუკაშენკოსთანაც ვხედავდით მის ვაჟს, თუმცა ბოლო დროს გვერდზე გასწია. რაღაც ამის მცდელობაა, ასე დავინახე მე ეს.
გულწრფელია ცოტნე ივანიშვილი, როცა ამბობს, რომ ძალადობას გმობს?
ადამიანების უმრავლესობას ეჭვი ეპარება მის გულწრფელობაში. თუმცა, ზოგადად, ნებისმიერი ახალგაზრდა, რომელიც იტყვის, რომ ძალადობას გმობს, ეს საზოგადოებაში აღიქმება დადებითად. მით უმეტეს, ჩვენს ქვეყანაში, როცა ვიხილეთ, რა სისასტიკე და ძალადობა ხდებოდა ამ ორი წლის განმავლობაში ქუჩებში.
ბერა ალბათ იმიტომ არ გამოიყვანეს, რომ ყველას ახსოვს ღარიბაშვილთან საუბრის ის ჩანაწერი, როცა მის თანატოლთან ანგარიშსწორებას სთხოვდა. ამიტომ, ჩათვალეს, რომ ცოტნე, რომელიც აქამდე არსად ჩანდა, გამოადგებათ ამ პროცესში. ისიც ვნახეთ, როგორ აიტაცეს „ოცნების“ პროპაგანდისტებმა, რომ აი, რა კარგია, რომ ივანიშვილის შვილი საუბრობს ამ ყველაფერზეო.
თუმცა, როცა კითხვა დაუსვეს, თუ რა ფორმით დაგმო ძალადობა, მან თავი აარიდა პასუხს.
დიახ, რა თქმა უნდა. მის გულწრფელობას მაშინ დავიჯერებდით, ამ ყველაფერს რომ მოჰყოლოდა, მაგალითად, სინდისის პატიმრების გათავისუფლება. თუმცა ვხედავთ, რომ დიალოგის შემოთავაზების პარალელურად კვლავ აგრძელებენ პარტიების აკრძალვაზე საუბარს და ანტიდასავლურ რიტორიკას.
რომ გადაეხედათ რეპრესიული კანონები და მოჰყოლოდა ამ განცხადებებს რაიმე არსებითი ნაბიჯი, შეიძლება დაგვეჯერებინა, რომ უნდათ პოლარიზაციის შემცირება. მაგრამ ვხედავთ, მხოლოდ რიტორიკის დონეზე საუბრობენ, რომ არ უნდა ვეძახოთ ერთმანეთს „ნაცი“, ქოცი“, „რუსი აგენტი“ და ასე შემდეგ. ამიტომ, პოპულისტური, უშინაარსო და არაგულწრფელია მისი ეს განცხადება.
ის მაინც რომ ეთქვა, ბევრი ახალგაზრდაა ნაცემი და ეს ჩემთვის მიუღებელია ან ამდენი ახალგაზრდა რომ ზის ციხეში, სიძულვილის ენა რომ დომინირებს, ეს არ უნდა ხდებოდესო, ცოტათი მაინც დატოვებდა იმის შესაძლებლობას, რომ რაიმეს ჩავჭიდებოდით.
ოდნავ გულწრფელი რომ ყოფილიყო მისი ნაბიჯი, შეეძლო ეთქვა, რომ პოლიტპატიმრების გათავისუფლების მომხრეა, საარჩევნო სისტემის მიმართ ნდობის აღდგენა და სასამართლო რეფორმაა საჭირო, რეპრესიული კანონების უკან წაღება და მაშინ ალბათ დავიჯერებდით, რომ გულწრფელია.
როცა სინდისის პატიმრები უხსენეს, ცოტნე ივანიშვილმა თქვა, რომ „ყველაფერს განაპირობებს სასამართლო და შესაბამისი სტრუქტურები“. არც ის გაიზიარა, რომ „ქართული ოცნება“ რუსულ პოლიტიკას ატარებს და თქვა, რომ ეს სასაცილოა. ასეთ შემთხვევაში, რამდენად რეალურია, რომ ივანიშვილს უნდოდეს დემოკრატიის სასარგებლოდ ცვლილებები ქვეყანაში?
დარწმუნებული ვარ, ამ ქვეყანაში უამრავი ახალგაზრდაა, ვინც ნორმალურ გარემოში ისურვებდა დისკუსიაში შესვლას. ოღონდ არა პროპაგანდისტული, დასანქცირებული არხების ფორმატში, არამედ თავისუფალ მედიაში რომ ყოფილიყო მსგავსი დისკუსიების შესაძლებლობა. სხვა შემთხვევაში, ეს უფრო ემსახურება „ქართული ოცნების“ ლეგიტიმაციას და არა პრობლემების მოგვარებას და საზოგადოებისთვის სიმართლის მიწოდებას.
„ქართულ ოცნებას“ აქვს მცდელობა, დაანახოს საზოგადოებას, დასავლეთს, რომ თითქოსდა ის კონსტრუქციული ძალაა, რომ დემოკრატიული პროცესი მიმდინარეობს ქვეყანაში და ამ ფორმით ცდილობს 2028 წლის არჩევნებისთვის მოიპოვოს ლეგიტიმაცია. ცოტნე ივანიშვილის ამ პროცესში ჩართვაც, ემსახურება „ქართული ოცნების“ ლეგიტიმაციის აღიარებას და სხვას არაფერს.
არსებობს youtube-ზე არხები, სადაც შეუძლია ცოტნე ივანიშვილს მოვიდეს და ამ ფორმატში გვქონდეს დისკუსია ამ რეპრესიულ კანონებზე, ძალადობაზე, დაპატიმრებებზე, ქვეყანაში არსებულ უსამართლობაზე და ეს გააჩენს საზოგადოებაში განცდას, რომ ვთქვათ ხელისუფლება არის დიალოგის მომხრე და დაიწყო პროცესის გაჯანსაღება.
მაგრამ თუ ჩვენ დავინახავთ, რომ მათ „დიალოგი“ უნდათ მათთვის კომფორტულ ზონაში, რომ ფასადისთვის გააკეთონ ეს ყველაფერი, ამას შედეგი არ ექნება.
მე, პირადად, ყოველთვის მივესალმები ნებისმიერ ვითარებაში სამართლიან დისკუსიას. ომი მიდის ამერიკას და ირანს შორის და ისინიც კი, რაღაც ეტაპზე მიდიან მოლაპარაკებებზე ხომ? მოლაპარაკება შეიძლება ჩაიშალოს ან შედგეს, მაგრამ ყველას აქვს თავისი შეხედულება და სიმართლე.
რა თქმა უნდა, ახლა გაბრაზებულები ვართ, ვეწინააღმდეგებით რეჟიმს, ბრძოლაში ვართ, მაგრამ როგორც ქვეყანა, დავზარალდით. ამიტომ, თუ მეორე მხარეს, რომელსაც დიდ აუდიტორიაზე აქვს წვდომა და პროპაგანდას ახვევს ამ ადამიანებს, შეიძლება ვესაუბროთ ნეიტრალურ ტერიტორიაზე, რომ საზოგადოება ჩვენს სიმართლეში დავარწმუნოთ.
მაინც ექნება ცოტნესთან დიალოგს აზრი, თუკი მისი რიტორიკაც ისეთივე იქნება, როგორიც არის, მაგალითად, კობახიძისა და პაპუაშვილის, რომ თურმე სუვერენიტეტს იცავენ დასავლეთის ლანძღვით, რომ მურუსიძის სასამართლოში შეგიძლია იპოვო „სამართალი“ და ასე შემდეგ?
უფრო იმის გამო დავჯდებოდი ამ დიალოგზე, რომ მე მაქვს ჩემი არგუმენტები და როცა „ოცნება“ საუბრობს სუვერენიტეტზე, მე ვეკითხები მათ, ვისი ხელისუფლების დროს წავიდა ყველაზე მეტი ოჯახი ემიგრაციაში და დაინგრა ყველაზე მეტი ოჯახი? შობადობა, ისტორიულად რომელი ხელისუფლების დროს შემცირდა, როდის დაიწყო დემოგრაფიული კრიზისი, როდის გაღარიბდა მოსახლეობა, 700%-ით რომ გაიზარდა რუსული ნავთობის ექსპორტი საქართველოდან, რატომ იზრდება ბენზინის ფასი. გამოდის, რომ თვითონ მდიდრდებიან და მოსახლეობა ღარიბდება.
ყველაფერს რუსეთთან დათმობის პოლიტიკით რომ ამართლებენ, თუკი მაინც ვუთმობთ რუსეთს და აზერბაიჯანს, მაშინ რატომ გვაქვს მაღალი ფასი ბენზინსა და ფქვილზე.
ფაქტია, რომ არავითარ სუვერენიტეტს და არავითარ ოჯახის სიწმინდეს ესენი არ იცავენ და ყველაზე მეტად სწორედ მათი მმართველობის დროს დაზარალდა ქართული ოჯახები და მთელი ქვეყანა.
შმაგი სამხარაძე
ქუთაისში ვარ ახლა და ვხედავ, როგორ განახევრდა ეს ქალაქი. ადამიანები რაღაც იდეოლოგიის გამო კი არ მიდიან ქვეყნიდან, როგორც კობახიძე ამბობს, იმიტომ მიდიან, რომ სრულიად დანგრეულია ქვეყანაში სოციალური პოლიტიკა.
ყველამ ვნახეთ, როგორ ეგდო ქართული პასპორტი საფრანგეთის სანაპიროზე. აი, ეს პასპორტია იმის სიმბოლო, რომ აღარ მიმდინარეობს საქართველოში ჯანსაღი პროცესები. რკინის ფარდაც რომ ჩამოუშვა, მაინც გაექცევიან ადამიანები უსამართლო სისტემას. როცა მოსახლეობა მოისმენს მსგავს არგუმენტებს, დაინახავს, რომ სიმართლე ჩვენს მხარესაა.
ეს ყველაფერი გასაგებია, მაგრამ რამდენად შესაძლებელია დიქტატორს დემოკრატიაზე ელაპარაკო?
მე არ ვამბობ, რომ მაგათგან რაიმე სახის დათმობას უნდა ველოდეთ, მე ვსაუბრობ სიმართლეზე, რომელიც უნდა მივიდეს აუდიტორიამდე. უნდა ვაღიაროთ, რომ მოსახლეობის გარკვეულ ნაწილზე პროპაგანდა გავლენას ახდენს. არ ვეთანხმები იმ აზრს, რომ უნგრეთი სხვაა და საქართველო სხვა. იქაც მიტაცებული ჰქონდა ორბანს ხელისუფლება, მედია, სახელმწიფო ბანკი შექმნა და მხოლოდ მის მხარდამჭერ ბიზნესს აძლევდა კრედიტებს, პოლიტიკური ველი გათიშული იყო და ოპოზიციამ 14 წელი ვერაფერი მოუხერხა ორბანს.
თუმცა მან ვერ შეძლო არჩევნების ტოტალური გაყალბება, ასე არ არის?
ვერ გააყალბა იმიტომ, რომ საარჩევნო ყუთთან მივიდა მოსახლეობის 80%. საქართველოში არ მივიდა საკმარისი რაოდენობა არჩევნებზე, რადგან ვერ დაარწმუნეს მოსახლეობა, ვერ იმუშავეს კარგად რეგიონებში.
თუკი გამოჩნდებიან ახალი ადამიანები, რომლებსაც ვერ გააშავებს რეჟიმი მარტივად, იქნებიან სუფთა ხელებით, გულწრფელად დაელაპარაკებიან ადამიანებს რეგიონებში, დარწმუნებული ვარ, ჩვენც შევძლებთ მეტი ადამიანის მოყვანას არჩევნებზე.
აუდიტორიაზე გასვლა ცოტნე ივანიშვილთან დისკუსიის გარეშე არ შეუძლია ოპოზიციურად განწყობილ საზოგადოებას?
ივანიშვილის ოლიგარქიული რეჟიმი ყოველდღე წამლავს ჩვენს საზოგადოებას. არიან სხვა ჯგუფებიც – რუსეთში მცხოვრები ადამიანები, მამუკა ფიფია და სხვა გარუსებული ბიზნესმენები, რომლებიც ყოველდღე მუშაობენ, თარგმნიან რუსულიდან ნარატივებს და კვირაში ერთ ნარატივს მაინც უდებენ თავში მოსახლეობას. ამიტომ არის მნიშვნელოვანი, რომ გავიდეთ დიდ აუდიტორიაზე.
ადამიანებს თავიანთ პრობლემებზე უნდა ვესაუბროთ. აგერ ქუთაისში ყოველდღიური პროტესტი მიმდინარეობს. ამ ხალხს გეოპოლიტიკაზე კი არ უნდა ველაპარაკოთ, რატომ მიდის ხალხი ქუთაისიდან, ის უნდა გავიგოთ. მათ სჭირდებათ კონკრეტულ პრობლემებზე საუბარი.
თუ ადამიანებზე ამბობ, რომ რუსები არიან, ქოცები და ბნელები, მაშინ ვისი იმედი გვაქვს. ჩვენი ამოცანაა, ველაპარაკოთ ხალხს და გავარღვიოთ პროპაგანდისტული მანქანა. მოსახლეობის უმრავლესობას სძულს ეს რეჟიმი და ივანიშვილი. 80%-ზე მეტს უკვე ყელში ამოუვიდა, განსაკუთრებით კორუფციული სკანდალების მერე და ადამიანებს სჭირდებათ სწორი მიდგომა, სწორი პოლიტიკა, რაღაცების გადააზრება და რაღაცების ცდა.
ერთი მასწავლებელი მეუბნებოდა, ყველა მასწავლებელს სთხოვდნენ ათი პირადობის მოწმობის მიტანას. რომ ვამხილოთ ეს ყველაფერი, ვინ დაგვიცავს? გვითხარით რა გავაკეთოთ. ქუჩაშიც ველაპარაკე ადამიანებს, ეკლესიაშიც. ყველა ამბობდა – რა გავაკეთოთ? ამიტომ მგონია, რომ ხალხმა უნდა დაინახოს, როგორ იყენებს ბიძინა ივანიშვილი მათ, როგორ აღარიბებს საქართველოს, როგორ აშიმშილებს ოჯახებს.
ადამიანებს სჭირდებათ მხარდაჭერა და მათ ენაზე საუბარი. გლანდების ოპერაციის გამო მოკვდა ბავშვი ქუთაისში. გაგიგიათ, გაჟღერებულა ეს ინფორმაცია სადმე? აი, ასეთი თემები აწუხებთ ადამიანებს და ეს არის მოსახლეობის ხმა. როცა შენ არ ელაპარაკები, მერე იყენებს მათ პროპაგანდა.
იმის ნაცვლად, რომ დაიცვან უმცირესობები, ოჯახის სიწმინდეს ვიცავთო – იძახიან. ამ დროს, შენ უნდა უთხრა პროპაგანდისტებს, რომ თქვენი შვილები საერთოდ არ იბადებიან საქართველოში, ევროპაში აჩენთ, არც ერთი არ მსახურობს ჯარში და არ სწავლობენ ქართულ სკოლებში. სხვის შვილებს კი წამალს არ აძლევთ. გვაღარიბებენ, ქვეყნიდან წასვლას გვაიძულებენ, „აგენტს“ და აკაცუკს გვეძახიან.
მადიარმაც იგივე გააკეთა უნგრეთში. ხალხს დაელაპარაკა მათთვის გასაგებ ენაზე. უთხრა, რომ ხალხო, ესენი მე კი არ მაგინებენ, გაგინებენ თქვენ, რადგან მე ვსაუბრობ ჯანდაცვაზე, განათლებაზე, ინფლაციაზე, კორუფციაზე და იმაზე, რომ არ განადგურდეს ჩვენი ქვეყანა.
ამიტომ, ჩემი ამოცანა იქნებოდა, ვიცოდე რას ფიქრობს მოწინააღმდეგე მხარე და სადაც მივა ცოტნე ივანიშვილი, იქ მივალ მეც და ვკითხავ ხალხის თანდასწრებით – რატომ არ აძლევს მისი ხელისუფლება წამალს ბავშვებს? რატომ გარბიან ოჯახები ქვეყნიდან, რატომ წავიდნენ სკოლის ასაკის ბავშვები უცხოეთში, ემიგრაციაში, თავად რატომ არ მიდის ჯარში, რატომ არ სწავლობს საქართველოში და მერე ვეღარ მოახდენს გავლენას ამ ადამიანებზე ტყუილებით.
ჩემს სოფელში რომ ცოტნე ივანიშვილი მოვიდეს, იმას როგორ ამოვაღებინებ ხმას. პირველი მე დავდგები და სათქმელს პირში მივახლი.
აგერ, ნოქალაქევში რუსებმა იყიდეს გეიზერები და რუსულ აუდიტორიას ეპატიჟებიან ინსტაგრამით და ფეისბუქით. ამაზე უნდა ველაპარაკოთ ადამიანებს, როგორ ყიდიან ჩვენს ბუნებრივ რესურსებს რუსებზე და რა კორუფციული სქემები და გარიგებები აქვთ.
მე თუ გავაქირავე სახლი თბილისში და გადმოვედი ქუთაისში, რომ ველაპარაკო ამ ადამიანებს, ეს პარტიები რას აკეთებენ? მათ არ ევალებათ, რომ ჩამოვიდნენ და იმუშაონ ადამიანებთან, თუ ცოტნე ივანიშვილს უნდა დაუტოვონ რეგიონები პოპულიზმისთვის.
„ჩვენ გავაგრძელებთ ბაზრის ცვლილებებზე ოპერატიულ რეაგირებას. თუ საწვავის ფასების ზრდა გაგრძელდება, კომპანია მზადაა განიხილოს ჩვენი ტარიფების გადახედვა,“ – უთხრეს „ბათუმელებს“ კომპანია „მაქსიმში“ ტაქსის მძღოლების საპროტესტო აქციასთან დაკავშირებით.
დღეს, 21 აპრილს, ბათუმში, ტაქსის მძღოლებმა კიდევ ერთი საპროტესტო აქცია გამართეს და ტაქსის კომპანიებისგან მგზავრობის ტარიფის გაზრდა მოითხოვეს.
„გაიზარდოს მგზავრობის ტარიფი და შემცირდეს საკომისიო,“ – ასეთია ტაქსის მძღოლების მოთხოვნა ტაქსის ოპერატორი კომპანიების მიმართ. აქციაზე უკვე მეორე დღეა იკრიბებიან, როგორც „ბოლტის“, ისე „მაქსიმისა“ და „იანდექსის“ აპლიკაციით დასაქმებული მძღოლები. მათი მოთხოვნა საერთოა.
„ბათუმელებმა“ კომენტარისთვის მიმართა კომპანიებს: „მაქსიმსა“ და „ბოლტს“. ამ ეტაპზე წერილობითი პასუხი „მაქსიმისგან“ მივიღეთ:
„პროტესტის მონაწილეთა უმრავლესობა სხვა სერვისების პარტნიორები იყვნენ. მაქსიმის პარტნიორ მძღოლებს არ გამოუთქვამთ უკმაყოფილება და არ დაკავშირებიან ოფისს ასეთი საკითხებით, რადგან თანამშრომლობის ამჟამინდელი პირობები მათთვის გამჭვირვალე და სტაბილურია.
ჩვენ მუდმივად ვაკვირდებით საწვავის ფასებს. მაქსიმი ინარჩუნებს ბაზარზე ერთ-ერთ ყველაზე დაბალ საკომისიოს – 10%-ს – რაც მძღოლებს საშუალებას აძლევს, შეინარჩუნონ შემოსავლის რაც შეიძლება დიდი ნაწილი საწვავის ფასების ცვალებადობის მიუხედავად.
მაქსიმის აპლიკაციის თანამედროვე ტექნოლოგია პირდაპირ გავლენას ახდენს მომგებიანობაზე: ავტომატური დანიშვნის ფუნქცია ირჩევს შეკვეთებს ახლომდებარე რადიუსში, რაც პრაქტიკულად გამორიცხავს თავისუფალ გარბენს. ნავიგაციის სისტემასთან ერთად, რომელიც ადგენს უმოკლეს და ოპტიმალურ მარშრუტებს, ეს მნიშვნელოვნად ამცირებს საწვავის მოხმარებას და შეკვეთის შესრულების დროს.
მგზავრობის ღირებულება განისაზღვრება მრავალი ფაქტორით: არა მხოლოდ საწვავის ფასით, არამედ მსყიდველობითი უნარით, კონკურენციით, მოთხოვნით და ამინდის პირობებით. ჩვენი მიზანია შევინარჩუნოთ დელიკატური ბალანსი: ფასები უნდა დარჩეს ხელმისაწვდომი მგზავრებისთვის, რათა უზრუნველყოფილი იყოს მძღოლებისთვის შეკვეთების სტაბილური ნაკადი და ამავდროულად ეკონომიკურად მომგებიანი იყოს ჩვენი პარტნიორებისთვის,“ – აღნიშნულია „მაქსიმის“ წერილობით პასუხში.
ბათუმში რამდენიმე სამარშრუტო ხაზით მგზავრობა 10 თეთრით გაძვირდა.
დღეს, 21 აპრილს, მგზავრებს 70 თეთრის ნაცვლად 80 თეთრის გადახდა მოუხდათ.
ამ ეტაპზე გაძვირებულია #25, #46 და #28 სამარშრუტო ხაზებით მგზავრობა.
„გაძვირება უკავშირდება საწვავის გაზრდილ ფასს და სხვა ხარჯებიც მომატებულია. დიდი ხანია თავს ვიკავებთ გაძვირებაზე, მაგრამ ბოლოს მივიღეთ ასეთი გადაწყვეტილება. გაუჭირდა ხაზებს მუშაობა,“ – უთხრა „ბათუმელებს“ ნუგზარ ფარტენაძემ, შპს „სონაგოს“ დირექტორმა. მისი კომპანია ორ სამარშრუტო ხაზს – 25 და 46 ნომრებს ფლობს.
ვიდრე კერძო სამარშრუტო ხაზებით მგზავრობა გაძვირდებოდა , მიმდინარე წლის იანვარში ბათუმის საკრებულომ გააძვირა მუნიციპალური ავტობუსით მგზავრობა და 30 თეთრის ნაცვლად 70-თეთრიანი ტარიფი დაადგინა.
ბოლნისის სიონში, რომელიც კულტურული მემკვიდრეობის ძეგლია, სამუშაოები მიმდინარეობს. კადრები, რომელიც გუშინ, 20 აპრილს გავრცელდა ფეისბუქში, ჩანს, რომ V საუკუნის ქართული სასულიერო არქიტექტურის საეტაპო ძეგლში აყრილია იატაკი.
კულტურული მემკვიდრეობის დაცვის სააგენტომ განცხადება, თუ რა სამუშაოები მიმდინარეობს ძეგლზე, მხოლოდ მას შემდეგ გაავრცელა, როცა ადამიანებმა კითხვები დასვეს სოციალურ ქსელებში.
დღეს, 21 აპრილს, კულტურული მემკვიდრეობის სააგენტომ განაცხადა, რომ ბოლნისის სიონის სარეაბილიტაციო სამუშაოები ტარდება სააგენტოს დაკვეთით და „კანონმდებლობით დადგენილი წესით“, გაცემული შესაბამისი ნებართვის საფუძველზე.
„მიმდინარე სამუშაოები მოიცავს, მათ შორის, ტაძრის ინტერიერში 1970-იან წლებში მოწყობილი ბაზალტის იატაკის დემონტაჟს, რომელიც განთავსებულია ბეტონის დუღაბზე. ჩატარებული კვლევითი სამუშაოების ფარგლებში, ინტერიერში განხორციელებული შურფირების შედეგად, სამხრეთი კედლის პილასტრის ძირში და სამხრეთი მინაშენის დასავლეთ ნაწილში გამოვლინდა ადრინდელი პერიოდის იატაკი, აგრეთვე პილასტრის ბაზა სრულყოფილი სახით.
აღნიშნულიდან გამომდინარე, პროექტი ითვალისწინებს 1970-იან წლებში მოწყობილი იატაკის დემონტაჟს არქეოლოგიური ზედამხედველობის პირობებში და ახალი, ღია ფერის ქვით იატაკის მოწყობას ტრადიციული ქართული წყობის გამოყენებით. ამასთან, არსებული იატაკის ნიშნული დაიწევა რამდენიმე სანტიმეტრით, რაც უზრუნველყოფს გამოვლენილი სვეტებისა და პილასტრების პროპორციების სრულფასოვან აღქმას.
გვიანდელი ბეტონისა და ბაზალტის ფენების მოხსნის პროცესში, ტექნოლოგიური აუცილებლობიდან გამომდინარე, გარკვეულ, ძნელად მოსახსნელ ადგილებში, გამოყენებულია შესაბამისი მექანიკური საბურღ-სატეხი საშუალება, რაც დასაშვებია პროფესიული პრაქტიკის ფარგლებში, რომელიც არ უქმნის საფრთხეს ძეგლის კონსტრუქციულ მდგრადობასა და არ იწვევს მის დაზიანებას.
სამუშაოები მიმდინარეობს არქეოლოგისა და დარგის შესაბამისი სპეციალისტების მუდმივი ზედამხედველობის ქვეშ, პროცესის თითოეული ეტაპის დოკუმენტირებითა და კონტროლით“, – ნათქვამია განცხადებაში.
სააგენტოს არ გაუსაჯაროებია პროექტი, თუ რა სახეს მიიღებს სამუშაოების დასრულების შემდეგ ძეგლი. როგორც სპეციალისტები წერენ ფეისბუქში, არც ეს საკითხი განუხილავთ წინასწარ, სამუშაოების დაწყებამდე.
______________
მთავარი ფოტო: ბოლნისის სიონში იატაკის აყრის სამუშაოები მიმდინარეობს.
დღეს, 21 აპრილს, ბათუმში, ტაქსის მძღოლებმა კიდევ ერთი საპროტესტო აქცია გამართეს და ტაქსის კომპანიებისგან მგზავრობის ტარიფის გაზრდა მოითხოვეს.
„გაიზარდოს მგზავრობის ტარიფი და შემცირდეს საკომისიო,“- ასეთია ტაქსის მძღოლების მოთხოვნა ტაქსის ოპერატორი კომპანიების მიმართ.
აქციაზე შეკრებილი იყვნენ როგორც „ბოლტის“, ისე „მაქსიმისა“ და „იანდექსის“ აპლიკაციით დასაქმებული მძღოლები.
მათი მოთხოვნა საერთოა – გაძვირდა ფასები საწვავზე, პროდუქტზე, მათი შემოსავალი კი არ გაზრდილა.
„70 თეთრი ღირს მარშუტკა. 3 ლარზე რომ ხუთი კაცი ჩაგიჯდება, მარშუტკაზე იაფად დავდივართ ჩვენ. 4-ლარიან ბენზინს რომ ჩაასხამ და სამლარიან კლიენტს მიიყვან, რაღა უნდა დაგრჩეს?
მთელი დღე რომ იმუშაო, სუფთად არ დაგრჩება 50 ლარი. ცალკე მანქანის ნაწილების ცვეთას თავი დაანებე,“ – ამბობს ტაქსის მძღოლი რუსლან რესულიძე „ბათუმელებთან“ საუბრისას.
გარდა ტარიფის მომატებისა, დღეს გამართულ აქციაზე მძღოლებმა ისაუბრეს გაზრდილ ჯარიმებზეც.
საქმე იმაშია, რომ „ქართულმა ოცნებამ“ პარლამენტში მიიღო კანონი, რომლის თანახმადაც გაიზარდა ჯარიმები.
ბათუმში არ არის საკმარისი ადგილები პარკირებისათვის და მძღოლებს, რომლებიც მგზავრის ასაყვანად ყოვნდებიან სხვადასხვა ადგილას, აჯარიმებენ.
„არასამართლიანი დამოკიდებულება აქვთ. მგზავრი რომ გიძახებს, 2 წუთი ხომ უნდა დაელოდო? 3-ლარიან გამოძახებაზე 100 ლარს რომ მიწერ, სად არის სამართალი? ყველა მძღოლს აქვს ჯარიმა.
აქ ყველა გამოსული ვართ იმისთვის, რომ ჩვენი გულისტკივილი მიიტანონ სახელმწიფო იქნება, კომპანიის უფროსი იქნება თუ ვინც იქნება. სამართალი ვერ ვნახეთ, ვეძებთ აგერ, გამოსული ვართ, რაღაცის იმედად ვართ და შედეგი ნული,“ – თქვა აქციაზე ტაქსის ერთ-ერთმა მძღოლმა.
ბათუმელი ტაქსის მძღოლები მასშტაბური აქციის მოწყობას გეგმავენ პირველ მაისს, შრომის საერთაშორისო დღეს.
ავტოსაგზაო შემთხვევა მოხდა დღეს, 21 აპრილს ბათუმში, ფრიდონ ხალვაშის გამზირზე.
ერთმანეთს ორი ავტომობილი შეეჯახა, რის შედეგადაც ორი ადამიანი დაშავდა. ადგილზე იმყოფებოდნენ საპატრულო და სასწრაფოს ეკიპაჟები.
შინაგან საქმეთა სამინისტროს ინფორმაციით, მომხდართან დაკავშირებით გამოძიება სისხლის სამართლის კოდექსის 276-ე მუხლით დაიწყო, რაც ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს.
ფრიდონ ხალვაშის გამზირზე ავარიის შედეგად 2 ადამიანი დაშავდა / 21.04.2026
17-19 აპრილს “ექსპო ჯორჯიამ” სამშენებლო მასალების საერთაშორისო გამოფენას, Caucasus Build 2026-ს უმასპინძლა. ყოველწლიურმა ღონისძიებამ 200-მდე კომპანია გააერთიანა საქართველოდან და რეგიონის ქვეყნებიდან. Caucasus Build-ი საგამოფენო ცენტრ “ექსპო ჯორჯიას” ორგანიზებით ჩატარდა და სხვადასხვა ფორმატს მოიცავდა.
თიბისის მხარდაჭერით, ღონისძიებაზე პანელური დისკუსია გაიმართა – „როგორ შენდება მსხვილი პროექტები საქართველოში – შესყიდვები და გადაწყვეტილებები“. კონფერენციაზე მსხვილმა სამშენებლო კომპანიებმა საკუთარი გამოცდილების შესახებ ისაუბრეს და მცირე და საშუალო მწარმოებლებს რეკომენდაციები გაუზიარეს, რაც მათ ბიზნესის გაფართოებაში დაეხმარებათ.
„თიბისი, როგორც ბიზნესის N1 პარტნიორი, მხარს უჭერს სამშენებლო მასალების საერთაშორისო გამოფენას, რომელიც აერთიანებს კომპანიებს საქართველოდან და რეგიონის ქვეყნებიდან. მშენებლობასა და უძრავ ქონებასთან დაკავშირებული საქმიანობები საქართველოს ეკონომიკის მსხვილი და სწრაფად მზარდი მიმართულებაა. გასულ წელს ქვეყნის მშპ-ს 17% სწორედ ამ სექტორზე მოდიოდა, თიბისის წილი კი ამ ბაზარზე 45%-მდეა და ლიდერის პოზიცია გვიჭირავს. ბოლო წლებში სწრაფად გაფართოვდა სამშენებლო და სარემონტო მასალების ბაზარიც – გაორმაგდა თიბისის დაფინანსებაც და ბანკის პორტფელმა 730 მილიონ ლარს მიაღწია. თუმცა, ჩვენი მიზანი არ შემოიფარგლება მხოლოდ ფინანსური მხარდაჭერით: Caucasus Build-ის პლატფორმით ვაძლიერებთ ბიზნესკავშირებს, ვაზიარებთ გამოცდილებას და ვქმნით რეალურ შესაძლებლობებს კომპანიებისთვის. ამით ხელს ვუწყობთ სექტორის ზრდას და ეკონომიკის გრძელვადიან განვითარებას”, – გიორგი დარჩიაშვილი, თიბისის მსხვილი და საშუალო კორპორატიული კლიენტების მომსახურების დეპარტამენტის დირექტორი.
„Caucasus Build არის პლატფორმა, რომელიც ყოველწლიურად აერთიანებს სამშენებლო სექტორის მთავარ მოთამაშეებს და ქმნის სივრცეს ახალი პარტნიორობებისა და რეალური ბიზნეს შესაძლებლობებისთვის. წელს განსაკუთრებით მნიშვნელოვანია ის მრავალფეროვნება და მასშტაბი, რასაც გამოფენა სთავაზობს როგორც პროფესიონალებს, ასევე იმ ადამიანებს, ვინც საკუთარ სამშენებლო თუ სარემონტო პროექტებს გეგმავს. ჩვენთვის მნიშვნელოვანია, რომ ექსპო ჯორჯია იყოს ადგილი, სადაც ყალიბდება თანამშრომლობა კომპანიებს შორის და იწყება ახალი პროექტები”,- რესან ქიქავა, “ექსპო ჯორჯიას” აღმასრულებელი დირექტორი.
ჯანდაცვის ყოფილი მინისტრი, სანდრო ურუშაძე ფეისბუქზე ეხმიანება მშობლების მიერ ბავშვებისთვის დიუშენის კუნთოვანი დისტროფიის სამკურნალო წამლების მოთხოვნას და აღნიშნავს, რომ ამ ბავშვების მკურნალობის დაფინანსება არა ფინანსური, არამედ პრიორიტეტის საკითხია.
ყოფილი მინისტრი წერს ის პრეპარატებზე, რომლითაც აღნიშნულ დაავადებას მკურნალობენ და ფასსზე, რაც შეიძლება სახელმწიფოს ამ წამლების შეძენა დაუჯდეს.
„ძნელია გულგრილი დარჩე იმ ოჯახების და ბავშვების მიმართ, რომლებიც დიუშენის კუნთოვანი დისტროფიის მკურნალობისთვის წამლის დაფინანსებას ითხოვენ.
რა პასუხი უნდა ჰქონდეს ჯანდაცვის სამინისტროს? ჩემი აზრით, ამ ბავშვების მკურნალობის დაფინანსება საქართველოსთვის არა ფინანსური, არამედ პრიორიტეტების საკითხია. ბიუჯეტის 1%-ზე მცირედით მეტი დანახარჯით სახელმწიფოს შეუძლია ათეულობით ბავშვს სიცოცხლე შეუნარჩუნოს და აარიდოს ისინი მძიმე ინვალიდიზაციას. ამის თქმის საფუძველს მაძლევს ის ინფორმაცია, რაც ჩემთვის არის ხელმისაწვდომი და თქვენც გაგიზიარებთ.
დიუშენის კუნთოვანი დისტროფია (DMD) არის მძიმე გენეტიკური დაავადება, რომელიც იწვევს კუნთების პროგრესულ განლევას. დაავადება ძირითადად ბიჭებში ვლინდება. ცილა „დისტროფინის“ ნაკლებობის გამო, კუნთები თანდათან კარგავს ფუნქციას, რაც საბოლოოდ იწვევს გადაადგილების უნარის დაკარგვას და სუნთქვისა თუ გულის უკმარისობას. საქართველოში ამ დიაგნოზით დაახლოებით 60-80 პირი ცხოვრობს.
გათვლები იმის შესახებ, რომ წამალი დაახლოებით 60-დან 80 პაციენტს ჭირდება ეყრდნობა სამ ძირითად წყაროს:
1. პრევალენტობის (გავრცელების)საერთაშორისო სტატისტიკა. დიუშენის სინდრომი იშვიათი დაავადებაა, თუმცა მისი გავრცელების სიხშირე მსოფლიოში საკმაოდ სტაბილურია. სტატისტიკურად, ეს დაავადება გვხვდება ყოველ 3,500 – 5,000 ცოცხლად დაბადებულ ბიჭში ერთხელ.
საქართველოში ბოლო წლებში ბიჭების შობადობის საშუალო მაჩვენებელი წელიწადში დაახლოებით 20,000-ია. თუ ავიღებთ ამ გავრცელების კოეფიციენტს და გადავამრავლებთ პოტენციური პაციენტების ასაკობრივ ჯგუფზე (0-დან 20 წლამდე), მათემატიკურად საქართველოში დიდი ალბათობით 60-დან 80-მდე პაციენტი უნდა ფიქსირდებოდეს.
2. საქართველოში მოქმედებს პაციენტთა ორგანიზაცია („ფონდი დიუშენი“), რომლებიც აწარმოებს შიდა რეესტრს. ამ ორგანიზაციებში გაერთიანებული არიან მშობლები, რომელთა შვილებსაც უკვე აქვთ დადასტურებული გენეტიკური დიაგნოზი. ამ დროისთვის, მათ ბაზებში რეგისტრირებული პაციენტების რაოდენობა სწორედ ამ დიაპაზონშია (დაახლოებით 60-მდე აქტიური პირი, პლუს ის პაციენტები, რომლებიც შესაძლოა ჯერ არ არიან გაწევრიანებულები ორგანიზაციაში).
3. საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტრო ფლობს მონაცემებს იმ პაციენტების შესახებ, რომლებიც სარგებლობენ იშვიათი დაავადებების მართვის სახელმწიფო პროგრამით. პაციენტების ნაწილი ჩართულია სარეაბილიტაციო თუ დამხმარე სახელმწიფო ქვეპროგრამებში. ეს მონაცემები მიუთითებს პაციენტთა ამ რაოდენობაზე.
რატომ არის ეს ციფრი მნიშვნელოვანი? ამ რაოდენობის ცოდნა სახელმწიფოს აძლევს საშუალებას, დაგეგმოს ბიუჯეტი. 80 პაციენტი არის ის „ზედა ზღვარი“, რომლის მიხედვითაც ხდება მაქსიმალური ხარჯის გათვლა, რათა არცერთი ბავშვი არ დარჩეს მკურნალობის გარეშე (ამ კითხვაზე ზუსტი პასუხისთვის სამინისტროს უნდა ჰქონდეს ამ პაციენტების ერთიანი ელექტრონული რეესტრი).
რაც შეეხება მკურნალობას. აშშ-ის (FDA) და ევროპის (EMA) მარეგულირებლებმა ბოლო პერიოდში რამდენიმე რევოლუციური გადაწყვეტილება მიიღეს:
გივინოსტატი (Givinostat (Duvyzat): ახალი პრეპარატია, რომელიც აშშ-მა ის სურსათისა და წამლების სააგენტომ (FDA) 2024 წლის მარტში დაამტკიცა, ხოლო ევროპის წამლის სააგენტომ ავტორიზაცია 2025 წლის ივნისში გასცა. ეს არის პირველი არასტეროიდული პრეპარატი, რომელიც მიემართება ყველა ტიპის მუტაციის მქონე პაციენტს 6 წლის ასაკიდან.
ვამოროლონი (Vamorolone (Agamree): აშშ-მა 2023 წლის ოქტომბერში, ხოლო ევროპამ იმავე წლის ბოლოს დაამტკიცა. ეს არის სტეროიდების უახლესი ალტერნატივა, რომელიც მაქსიმალურად ამცირებს ისეთ მძიმე გვერდით მოვლენებს, როგორიცაა ზრდის შეფერხება და ძვლების დასუსტება.
ელევიდისი (Elevidys (გენური თერაპია): აშშ-ში 2023-2024 წლებში მიიღო დასტური. ეს არის ერთჯერადი ინიექცია, რომელიც ორგანიზმს აწვდის გენს კუნთების ფუნქციონირების შესანარჩუნებლად (ფინანსდება მხოლოდ აშშ ში).
როგორ აფინანსებს ევროპა მკურნალობას? ევროპული ქვეყნებიდან გივინოსტატით მკურნალობის დაფინანსების გადაწყვეტილება უკვე მიიღეს იტალიამ, ესპანეთმა და შოტლანდიამ, განხილვის პროცესშია დიდ ბრიტანეთში, ირლანდიაში, გერმანიაში.
მაგალითად, პოლონეთი გივინოსტატის ცენტრალური და აღმოსავლეთ ევროპის დისტრიბუციის შეთანხმების ნაწილია, ისევე როგორც რუმინეთი, ჩეხეთის რესპუბლიკა, უნგრეთი, ბულგარეთი, სლოვაკეთი, ბალტიის ქვეყნები, ხორვატია, სლოვენია. ეს შეთანხმება საფუძველია სამომავლო ხელმისაწვდომობის და გამოცხადებულზე დაბალი ფასის შესყიდვისას, მაგრამ ჯერ არ ნიშნავს დაფინანსებას.
რაც შეეხება ვამოროლონს, უმეტეს ქვეყანაში ან უკვე ფინანსდება (გერმანია, ავსტრია, დიდი ბრიტანეთი), ან განხილვის ბოლო ეტაპზეა.
ბევრ ქვეყანაში საყოველთაო დაფინანსებამდე იყენებენ ინდივიდუალური/კონკრეტული პაციენტისთვის დაფინანსების მოდელსაც.
საყურადღებოა, რომ ევროპის ქვეყნები იყენებენ სხვადასხვა სტრატეგიას, რათა მედიკამენტები ხელმისაწვდომი გახადონ. მაგალითად, იტალია მსოფლიოში ცნობილია „შედეგზე ორიენტირებული გადახდის“ მოდელით — სახელმწიფო მწარმოებელს უხდის მხოლოდ იმ შემთხვევაში, თუ კონკრეტულ პაციენტზე წამალი ეფექტურად მუშაობს.
საბიუჯეტო გათვლები საქართველოსთვის: საქართველოში 80 პაციენტის მკურნალობა წელიწადში დაახლოებით 30-35 მილიონ ლარს შეადგენს.
ეს ციფრი არ არის მხოლოდ თეორიული დაშვება, ზუსტი გათვლა უნდა ითვალისწინებდეს პაციენტთა საშუალო წონასა და დოზირებას (დაახლოებით 75-80 ფლაკონი წელიწადში ერთ პაციენტზე). თუმცა, მნიშვნელოვანია, რომ სახელმწიფო, როგორც წესი, არ იხდის წამლის გაცხადებულ“ ფასს და გათვლაში რეალურია ფასდაკლების გათვალისწინებაც (დაახლოებით 35-40%), რომელსაც მწარმოებლები საქართველოს მსგავსი ქვეყნებისთვის აწესებენ. ამ გათვლებით, ერთი პაციენტის წლიური ხარჯი საშუალოდ 420,000 ლარამდე ჩამოდის, რაც 80 პაციენტის შემთხვევაში 33.6 მილიონ ლარს უტოლდება. (ამ ციფრების დაზუსტება სამინისტროსა და ამ დარგის სპეციალისტების თანამშრომლობით უნდა მოხდეს).
გავლენა ბიუჯეტზე: სამედიცინო პროგრამების ბიუჯეტში (2.22 მლრდ): ეს თანხა ბიუჯეტის მხოლოდ 1.58%-ს შეადგენს. ქვეყნის მთლიან ხარჯებთან მიმართებით: წილი 0.11%-მდეა.
ჯანდაცვის სამედიცინო ბიუჯეტი 2026 წელს 200 მილიონით გაიზარდა. ამ ნამატის მხოლოდ 17.5% საკმარისია ყველა დიუშენის პაციენტის სრული მკურნალობისთვის.
ეს ხარჯი შესაძლოა კიდევ უფრო შემცირდება, თუ შევძლებთ რეგიონალური შესყიდვების მიღწევას. მეზობელ ქვეყნებთან გაერთიანება და ერთიანი მოცულობით შესყიდვა მწარმოებელს აიძულებს ფასის კიდევ უფრო კლებას. ასევე, „შედეგზე ორიენტირებული გადახდის“ დანერგვა დააზღვევს სახელმწიფოს არაეფექტური ხარჯვისგან.
ამას ყველაფერს ჭირდება თანამშრომლობა, საზოგადოების ინფორმირება და რაც მთავარია იმ ოჯახების პატივისცემა და მხარდაჭერა ვისთვისაც ამ პრობლემის მოგვარება სასიცოცხლოდ აუცილებელია“ – წერს სანდრო ურუშაძე.
უკრაინის შეიარაღებული ძალების გენერალური შტაბის დღევანდელი მონაცემებით, ომის დაწყებიდან 2026 წლის 21 აპრილამდე პერიოდში, რუსეთის არმიის საბრძოლო დანაკარგი არის:
ცოცხალი ძალა – დაახლოებით 1 320 310 ადამიანი [გასულ დღე-ღამეში +1 040. ამ მონაცემებში შედის როგორც დაღუპულები, ასევე დაჭრილები]
ტანკი – 11 884 ერთეული [+0]
ჯავშანტექნიკა – 24 429 ერთეული [+7]
საარტილერიო სისტემა – 40 478 ერთეული [+82]
MLRS – 1 749 ერთეული [+1]
საზენიტო საბრძოლო სისტემა – 1 350 ერთეული [+0]
თვითმფრინავი – 435 ერთეული [+0]
ვერტმფრენი – 350 ერთეული [+0]
უპილოტო საფრენი აპარატის ოპერატიულ-ტაქტიკური დონე – 250 463 ერთეული [+1 905]
ფრთოსანი რაკეტა [ჩამოაგდეს] – 4 549 ერთეული [+0]
გემი/ნავი – 33 ერთეული [+0]
წყალქვეშა ნავი – 2 ერთეული [+0]
მანქანები და საწვავის ავზები – 90 763 ერთეული [+192]
სპეცტექნიკა – 4 132 ერთეული [+0]
უკრაინის გენერალური შტაბის განცხადებით, საომარი მოქმედებების მაღალი ინტენსივობის გამო მონაცემები იცვლება.
უკრაინის სამხედრო დანაკარგებზე სტატისტიკური ინფორმაცია 2026 წლის 25 თებერვლის შემდეგ აღარ განუახლებია რუსეთს.
რუსეთის თავდაცვის სამინისტროს მიერ ტელეგრამ არხზე ბოლოს გავრცელებული მონაცემებით, ომის დაწყებიდან 2026 წლის 25 თებერვლამდე პერიოდში სულ განადგურებულია უკრაინის:
670 თვითმფრინავი
283 ვერტმფრენი
117 299 უპილოტო საფრენი აპარატი
651 საზენიტო სარაკეტო სისტემა
27 873 ტანკი და სხვა ჯავშანტექნიკა
1 674 მრავალჯერადი სარაკეტო გამშვები
33 474 საველე არტილერია და ნაღმმტყორცნი
55 252 სპეციალური სამხედრო მანქანა
ეს ის მონაცემებია, რომელსაც უკრაინა და რუსეთი ოფიციალურად ავრცელებენ, თუმცა ომის პირობებში შეუძლებელია ზუსტად გადამოწმება, რამდენად შეესაბამება მხარეების მიერ გავრცელებული ინფორმაცია დანაკარგების შესახებ რეალურ რიცხვებს.
ამასთან, აღნიშნულ მონაცემებთან ერთად რუსეთის თავდაცვა, უკრაინის და რუსეთის არმიის ცოცხალი ძალის საერთო დანაკარგების შესახებ სტატისტიკას არ აქვეყნებს. უკრაინის არმიის ცოცხალი ძალის დანაკარგების შესახებ მონაცემებს არ აქვეყნებს არც უკრაინა.
„აქ ცხოვრება უკვე გაუსაძლისია: გუბეები, ტალახი, მზეში კიდევ საშინელი მტვერია… მთავრობა ყურადღებას არ გვაქცევს, მარტო არჩევნების დროს ვახსენდებით,“ – ამბობს ქეთევან წამებულის ქუჩაზე მცხოვრები მანანა ბერიძე.
ბათუმში, ქეთევან წამებულის ქუჩასა და მიმდებარე ჩიხებში კარგი გზა და მოწესრიგებული სანიაღვრე სისტემა წლებია არ აქვთ. ამ ქუჩაზე გვითხრეს, რომ მდგომარეობა კიდევ უფრო დამძიმდა მას შემდეგ, როცა ამ ქუჩაზე რამდენიმე თვის წინ სარეაბილიტაციო სამუშაოები დაიწყო.
მოსახლეობას ამ ქუჩებზე გადაადგილება ტალახის და გუბეების გამო განსაკუთრებით წვიმიან ამინდში უჭირს. ქეთევან წამებულის ქუჩაზე მცხოვრებ მოსახლეობას უთხრეს, რომ სამუშაოები 2026 წლის მაისში დასრულდება, თუმცა რამდენიმე დღის წინ აქ მძიმე ტექნიკას სამუშაოები შეუჩერებია. ადგილზე მძიმე ტექნიკა „ბათუმელებსაც“ გაჩერებული დახვდა.
ქეთევან წამებულის ქუჩა, ბათუმიმანანა ბერიძე
„ბავშვთან ერთად გადაადგილება კიდევ უფრო დიდი პრობლემაა,“ – გვიყვება მანანა ბერიძე, – „ხელში აყვანილი მიმყავს… ბავშვები ეზოში ვერ თამაშობენ. სიცხეში გაუსაძლისი მტვერია. ტალახიანი ფეხსაცმლით მივდივართ სახლში. გვითხრეს, რომ აქ ეს სამუშაოები დასრულდა უკვეო, მაგრამ როდემდე უნდა ვიყოთ ასე?“ – ამბობს მანანა ბერიძე და გუბეებითა და ტალახით სავსე ქუჩას გაჰყურებს.
„ეს ვისი საქმეა და მთავრობის, უნდა მოვიდნენ და გაგვიკეთონ,“ – მანანა ბერიძეს არ ერიდება ღიად თქვას სათქმელი მაშინ, როცა მისი მეზობლების ნაწილი გაუსაძლისი ცხოვრების და ყოველდღიურად ტალახში სიარულის მიუხედავად, დუმილს არჩევს.
„ხალხი ვინმეს არ აინტერესებს და მაგია. სახელმწიფო ზრუნავს მისთვის, მისი კომფორტისთვის, ხალხისთვის არა. ხალხისთვის რომ ზრუნავდეს, ამ დღეში არ იქნებოდა ქვეყანა,“ – ქეთევან წამებულის ქუჩაზე კიდევ ერთ მოქალაქეს ვაჩერებთ, მერაბ მჟავანაძეს.
მერაბ მჟავანაძე
მოქალაქეებისთვის არავის აუხსნია, რატომ გართულდა ამ ქუჩაზე მდგომარეობა მას შემდეგ, რაც აქ სარეაბილიტაციო სამუშაოები დაიწყო.
„ალბათ ვერ ასწრებენ გაკეთებას, არ არის ტექნიკა… ზედამხედველობა ყურადღებას არ აქცევს სამუშაოებს, მერიის პასუხისმგებლობის საკითხია,“ – თავის მოსაზრებას გვიზიარებს მოქალაქე და დამშვიდობებამდე დასძენს: „მერია ზრუნავს ხალხისთვის, მარა – ვითომ“.
ქეთევან წამებულის ქუჩა, ბათუმი. 2026 წლის 20 აპრილი
„ფაქტი სახეზეა, რა პრობლემაცაა, მე რა უნდა გითხრათ?“ – შეკითხვაც აღიზიანებს მზევინარ აბაშიძეს. მოქალაქე პარკით ხელში გუბეებზე შემოვლას ცდილობს, მერე გუბეებს შორის ჩერდება და იწყებს:
„საერთოდ არ ზრუნავს მთავრობა ხალხზე… არც მერია ზრუნავს და არც „ოცნება“. „ოცნება“ ზრუნავს თავის ჯიბეებზე. ნუ მალაპარაკებ, თორე მერე მომადგებიან“, – ასრულებს მზევინარ აბაშიძე და გზას განაგრძობს.
„ვისი ბრალია ეს?“ – ვეკითხებით მოქალაქეს.
„ნამეტარი კაი მთავრობა რომ გვყავს, იმის,“ – გაღიმებას ცდილობს მზევინარ აბაშიძე.
მზევინარ აბაშიძე
მოქალაქეს ირაკლი კობახიძის განცხადებასაც ვახსენებთ: ეკონომიკა 10%-ით გაიზარდაო.
„ჩვენს სახელმწიფოს ხალხი არ ახსოვს საერთოდ, ადამიანს ადამიანად არ თვლის,“ – გვითხრა მოქალაქემ.
ქეთევან წამებულის ქუჩაქეთევან წამებულის ქუჩა
„ტაქსი არასდროს არ შემოდის ჩვენს ქუჩაზე. როცა ვიძახებ ტაქსის, სულ მეუბნებიან, რომ წამებულზე ტაქსი ვერ შემოვა.
ტრასაზე როცა გავდივართ [გენერალ ასლან აბაშიძის ქუჩა], მერე ვიძახებთ ტაქსის,“ – ეს წამებულის ქუჩაზე მცხოვრებმა ნატალია ჩენიავსკაიამ გვითხრა.
ნატალია ჩენიასვკაია
„2 წელია აქ ვცხოვრობ და 2 წელია პრობლემაა აქ გადაადგილება, ბავშვები ეზოში ვერ თამაშობენ, ეტლში მყოფი ადამიანი აქ როგორ უნდა გაატარო… ახლა იმედია გააკეთებენ ამ გზებს,“ – ავტომანქანით ჩაგვიარა და ჩვენთან გასაუბრება გადაწყვიტა კიდევ ერთმა მოქალაქემ, გოგიტა პაქსაძემ.
„რაღაც მილია დარჩენილი, ჩამოსხმა დასჭირდა და ამიტომ შეჩერდა სამუშაო, მაგრამ მაისის ბოლომდე უნდა დასრულდეს, ასე ვიცით ჩვენ… აქ არ იყო საერთოდ სანიაღვრე სისტემა, კანალიზაციაც არ იყო მოწესრიგებული და ახალი მილები გაიყვანეს,“ – გვითხრა გოგიტა პაქსაძემ.
გოგიტა პაქსაძე
როდის დასრულდება სარეაბილიტაციო სამუშაოები ქეთევან წამებულის ქუჩაზე? რატომ შეჩერდა სამუშაოები? რატომ გართულდა ქუჩების მდგომარეობა ამ დასახლებაში? – კითხვებით ბათუმის მერიის პრესცენტრს მივმართეთ. პასუხის მიღების შემთხვევაში ინფორმაცია განახლდება.
განახლებული ინფორმაცია:
მასალის გამოქვეყნების შემდეგ ბათუმის მერიიდან მოგვწერეს, რომ ქეთევან წამებულის ქუჩაზე პროექტის ფარგლებში სამუშაოების ძირითადი ნაწილი დასრულებულია.
„უახლოეს პერიოდში დაიწყება ასფალტის საფარის დაგება. სამუშაოები მოცულობითია, მოიცავს 4 მთავარი და 15 მეორეხარისხოვანი გზის რეაბილიტაციას, მათ შორის სანიაღვრე სისტემის სრულად განახლებას. პროექტის განხორციელება ტურისტული სეზონის დაწყებამდე დასრულდება.
რაც შეეხება გადაადგილებისას გამოწვეულ დისკომფორტს, რეაბილიტაციის პროცესის თანმდევია და სამუშაოების დასრულების შემდგომ სრულად აღმოიფხვრება“ – აცხადებენ მერიაში.
„ვეგანობის ნიშნით გაგვრიცხეს სამი პირი „აისის“ მმართველმა პირებმა უსაფუძვლოდ, ასევე გენდერული და პირადი, რეპროდუქციული შეხედულებების მიზეზით,“ – ამბობს მოქალაქე ნინი ტურიაშვილი.
იგი ამბობს, რომ საზოგადოებრივი ორგანიზაციიდან მას შემდეგ გაუშვეს, როცა გააპროტესტა ნანადირევის ხორცის და ტყავის დამუშავების სწავლება მოზარდებისთვის.
ნანადირევის დამუშავებას მოსწავლეებს „გარისა“ ასწავლის. ეს საზოგადოებრივი ორგანიზაციაა, რომლის მიზანია ახალგაზრდებს, მათ შორის, მოსწავლეებს ასწავლოს თვითგადარჩენა და ექსტრემალურ პირობებში ბრძოლა. ამ ორგანიზაციასთან მეგობრობს და, მათ შორის, ცხოველის ხორცის დამუშავების სწავლებას ეთანხმება, „აისიც“, რომლის წევრიც იყო ნინი ტურიაშვილი.
„აისი“ საზოგადოებრივი ორგანიზაციაა, რომლის მიზანიც არის საქართველოს სამოქალაქო თავდაცვისუნარიანობის ამაღლება. ეს ორგანიზაცია 2008 წლის რუსეთ-საქართველოს ომის შემდეგ შეიქმნა და მოხალისეობრივად მუშაობს, მართავს სასწავლო კურსებს, ახორციელებს სხვადასხვა აქტივობას.
„ჩემთვის „აისი“ სოლიდარობასთან, თანასწორობასთან და სამართლიან თავდაცვასთან ასოცირდებოდა,“ – გვიყვება ნინი ტურიაშვილი, რომელმაც ვეგანური შეხედულებების გამო „აისიდან“ გარიცხვის გამო უკვე მიმართა სახალხო დამცველს დისკრიმინაციის დადგენის მოთხოვნით.
„უმკაცრესი დისციპლინა, ტალახში ცურვა, კურსელების საკაცით ტარება, დაცემამდე ვარჯიში, ღამის მარშირება და დიდგორზე მოპოვებული ბეიჯი ჩემთვის მაღალი მნიშვნელობის იყო, თუმცა, საკუთარ ღირსებასა და პრინციპებზე მაღალი არაფერია…
მე „აისის“ კურსდამთავრებული ვარ, თუმცა კურსის დასრულების შემდეგ ჩართული ვართ კონკრეტულ აქტივობებში, მაგალითად, კლდეზე ცოცვა, ლაშქრობა.
თებერვალში ორგანიზაცია „გარისას“ გვერდზე გამოქვეყნდა ფოტოები, სადაც ასახულია, როგორ ასწავლიან მოზარდებს ცხოველებზე ძალადობას, ცხოველების მკვლელობას და გატყავებას… მე ეს გავაპროტესტე „აისის“ ჯგუფის წევრებთან, მათაც მოვუწოდე ეს გვერდი დაერეპორტებინათ. ზუსტად აქ დაიწყო კონფლიქტი,“ – გვითხრა ნინი ტურიაშვილმა.
„ადამიანმა დაარეპორტა ისეთი რაც, რაც ჩვენც გაგვიკეთებია და სამომავლოდ შეიძლება გავაკეთოთ ისევ. თუ ამბობ, რომ ისინი ცუდი ხალხი არიან იმიტომ, რომ თვითგადარჩენის კურსს აწყობენ, ჩვენთან რაღა გინდა მაშინ?! ვუთხარი, რომ აცდენილი ვართ იდეოლოგიურად და ამიტომაც, სამომავლო თანამშრომლობა გაგვიჭირდებოდა,“ – უთხრა „ბათუმელებს“ გიორგი ნაზღაიძემ, ორგანიზაცია „აისის“ გამგეობის წევრმა.
რამდენად საჭიროა თვითგადარჩენის უნარების სწავლების დროს მოზარდებმა, ბავშვებმა ისწავლონ ნანადირევი ხორცის, ან ტყავის დამუშავება? – ჰკითხა მას „ბათუმელებმა“.
„ეს არის თვითგადარჩენის ისეთივე განუყოფელი ნაწილი, როგორც, მაგალითად, წყლის გაფილტვრა, ან ცეცხლის დანთება.
ეს არის სხვა ქვეყნების პრაქტიკაც, რომ ვნახოთ, როგორ ცხოვრობენ ადამიანები შეერთებულ შტატებში თუ სხვაგან, არაურბანულ გარემოში როგორ ნადირობენ, ვინ არის ამაში ჩართული და როგორ ამუშავებენ ნანადირევს. ეს ჩვეულებრივი თემაა.
ვინმემ თუ იცის საქართველოში თვითგადარჩენის თემა და ამას ასწავლის, ერთ-ერთი მე ვარ. ვერ დამისახელებთ ვერცერთ უცხოურ საიტს: ბრიტანელებიდან დაწყებული, ამერიკელების და სკანდინავიელების ჩათვლით, რომლებსაც ყველაზე მეტი ლიტერატურა აქვთ ამ თემაზე, სადაც თვითგადარჩენის სწავლება არ მოიცავს ცხოველური საკვების მოპოვებას, ხაფანგებს, ტყავის, ხორცის დამუშავებას და ასე შემდეგ,“ – ამბობს გიორგი ნაზღაიძე. მისივე თქმით, საჭირო დაფინანსების შემთხვევაში, თვითონაც მოაწყობს იგივე სწავლებას „აისში“.
„მოვუწოდე აისელებს, დაერეპორტებინათ ეს გვერდი, სადაც გამოქვეყნებული იყო მოზარდების ფოტოები გატყავებულ კურდღელთან, გიორგი ნაზღაიძემ გამოაქვეყნა მკვდარი ბაყაყების ფოტოები…
განსაკუთრებით აქტუალურია დღევანდელ საქართველოში ცხოველთა უფლებების უგულებელყოფის პირობებში. ახალი რეგულაციით ხდება ათასობით ცხოველის ქუჩიდან გაქრობა სასტიკი მეთოდებით. ცხოველთა მოძულეობა პირდაპირ ასაზრდოებს ამ სასტიკ პრაქტიკას და მისდამი საზოგადოების დამოკიდებულებას.
წევრების, ანუ ჩვენი გარიცხვის შემდეგ რამდენიმე წუთში გამოაქვეყნეს წესდება, რომელიც წევრობის უფლებას უზღუდავს ადამიანს, რომელიც არის „ანტინატალისტური იდეოლოგიის“ [ხედვა, რომელიც უარყოფითად აფასებს რეპროდუქციას] და „ემიჯნება ყოველგვარ ძალადობას“ .
ეს იყო კონსტიტუციით დაცული ჩემი აზრის თავისუფლებაში ჩარევა,“ – მიიჩნევს ნინი ტურიაშვილი. იგი სამოქალაქო ორგანიზაციის „ვეგან ჯორჯიას“ დამფუძნებელია.
დავუშვათ, აუცილებელია თვითგადარჩენის სწავლების დროს, მათ შორის მოზარდებისთვის ნანადირევის დამუშავების სწავლება, მაგრამ რამდენად სწორია განსხვავებული მოსაზრების გამო დაატოვებინო წევრს საზოგადოებრივი ორგანიზაცია? – ვკითხეთ „აისის“ წარმომადგენელს.
„ჩვენთან კონტრაქტი არ ფორმდება, დაახლოებით კლუბური სისტემაა… მას [ნინი ტურიაშვილს] აღარ აქვს წვდომა ფეისბუქჯგუფზე, სულ ესაა.
ჩემი განმარტება ეს არის:
„გარისამ“ სწავლება ჩაუტარა ახალგაზრდებს, რა თქმა უნდა, მშობლების თანხმობით, როგორ უნდა დაამუშაო კურდღლის ტყავი, ეს აუხსნეს და აჩვენეს მოსწავლეებს… მას [ნინი ტურიაშვილი] შეიძლება რაღაც არ მოეწონა და ეს ღიად დააფიქსირა, მაგრამ ყველა მეთოდით დაიწყო ამ ორგანიზაციის, „გარისას“ გაშავება, დარეპორტება. ეს რა გამოდის?!“ – უთხრა გიორგი ნაზღაიძემ „ბათუმელებს“.
ნინი ტურიაშვილი ამბობს, რომ „აისი“ სოლიდარობის ნიშნად 10-მდე წევრმა საკუთარი სურვილით დატოვა. იგი „აისთან“ უთანხმოების სხვა მიზეზებზეც საუბრობს:
„ჩემს პირად მიმოწერაში გიორგი ნაზღაიძესთან იყო არაპირდაპირი, განმეორებადი ზეწოლა და პასუხის მოთხოვნა კითხვაზე, თუ რა დამოკიდებულება მქონდა შვილის ყოლაზე. კონსტიტუციით და ევროპული კონვენციით, დაცულია ქალის რეპროდუქციული უფლებები, პირადი ფილოსოფიური შეხედულებების გამჟღავნების იძულება აკრძალულია.
იდეოლოგიურად ვეწინააღმდეგები ძლიერის მხრიდან სუსტის ჩაგვრას. მჯერა, რომ რუსეთი ოკუპანტია, საქართველოს კურსი ევროპულია, მოქალაქეებს კი, თავდაცვის უნარის გაუმჯობესება გვმართებს. ამასთან, მაქვს კონსტიტუციითა და ევროპული კონვენციით დაცული ეთიკური მოსაზრება – მჯერა, რომ ცხოველთა ჩაგვრა არასწორია, ქალს კი საკუთარ სხეულზე ავტონომია გააჩნია,“ – ამბობს ნინი ტურიაშვილი. ის ასევე დასძენს, რომ „აისის“ კურსზე ლექციებზეც ისმოდა საჯარო მოწოდებები გამრავლებაზე.
რა გვითხრა ამავე საკითხზე გიორგი ნაზღაიძემ:
„ცნობილი პრობლემაა ჩვენს ქვეყანაში მიგრაცია და დაბალი შობადობა. ვუხსნით ჩვენს კურსდამთავრებულებს, წევრებს, რომ ოჯახური ღირებულება, ოჯახი, ბავშვი და ასე შემდეგ ჩვენთვის მნიშვნელოვანი საკითხია. როდესაც ეს საკითხი დავაყენე პრეზენტაციაზე, ამ გოგონამ თქვა, რომ ანტინატალისტია და არაა გამართლებული მორალურად ბავშვების ყოლაზე საუბარიო.
ეს არის იდეოლოგიური აცდენა და ეს ვუთხარით ამ ადამიანს, თუ ასეთ საკითხებზე ვერ ვთანხმდებით, რაც არის ჩვენი ღირებულება, ვერ ვითანამშრომლებთ-მეთქი,“ – თქვა „ბათუმელებთან“ გიორგი ნაზღაიძემ.
ნინი ტურიაშვილის თქმით, მისი საქმის შესწავლა უკვე დაიწყო სახალხო დამცველმა.
ბათუმის მერია საქართველოს საპატრიარქოს უსასყიდლოდ 3 300 კვადრატულ მეტრ ქვაფენილს გადასცემს მუდმივ სარგებლობაში. ქონების გადაცემის საკითხს ქალაქის საკრებულო 2026 წლის 22 აპრილს სხდომაზე განიხილავს.
საკრებულოს განკარგულების პროექტი და განმარტებითი ბარათი მერიამ მოამზადა. პროექტის მიხედვით საპატრიარქოს „მეორადი ქვაფენილი“ მუდმივ სარგებლობაში გადაეცემა აჭარაში მდებარე ეკლესია-მონასტრების ეზოების კეთილმოსაწყობად. კონკრეტულად:
800 კვ.მ. – სოფელ ზემო აგარის (მტირალას მთის) ჯვართამაღლების სახელობის ტაძრისა და მონასტრისათვის;
250 კვ.მ. – სოფელ ქობულეთის წმინდა სვიმეონ კანანელის სახელობის ტაძრისათვის;
800 კვ.მ. – სოფელ აჭყვისთავის აწყურის ღვთისმშობლის სახელობის ტაძრისათვის;
1200 კვ.მ. – ბათუმის წმინდა მეფე ვახტანგ გორგასალის სახელობის ტაძრისათვის;
250 კვ.მ. – განთიადის მთავარანგელოზთა სახელობის ტაძრისათვის.
განმარტებითი ბარათის მიხედვით, ეკლესია/მონასტრების ეზოებისთვის მეორადი ქვაფენილის გადაცემაზე ბათუმისა და ლაზეთის მიტროპოლიტის მდივნის წერილი ბათუმის მერიაში 2026 წლის 10 მარტს შევიდა.
„მოქმედი კანონმდებლობით ქალაქ ბათუმის მუნიციპალიტეტი უფლებამოსილი არაა მუნიციპალიტეტის ქონება სარგებლობაში გადასცეს უშუალოდ ეკლესია/მონასტრებსა და გიმნაზიას.
ამასთან, ქალაქ ბათუმის მუნიციპალიტეტის მერია უფლებამოსილია მუნიციპალიტეტის საკუთრებაში არსებული ქონება, შესაბამისი მომართვის შემთხვევაში მუდმივ სარგებლობაში გადასცეს სსიპ „საქართველოს საპატრიარქოს“…
შესაბამისად, ქალაქ ბათუმის მუნიციპალიტეტის მერიას მიზანშეწონილად მიაჩნია, რომ მოთხოვნილი მეორადი ქვაფენილები [3300,00 კვ.მ.] ეკლესია/მონატრების ეზოების კეთილმოწყობის მიზნით მუდმივ სარგებლობაში უსასყიდლოდ გადაეცეს სსიპ „საქართველოს საპატრიარქოს“. – წერია განმარტებით ბარათში.
განმარტებით ბარათში არ არის მითითებული, თუ რა ღირებულებისაა საპატრიარქოსთვის მუდმივ სარგებლობაში გადასაცემი ქონება. თუმცა, 3 წლის წინანდელი ფასი რომ ავიღოთ, ამ ქონების ღირებულება მინიმუმ 132 ათასი ლარია. საქმე იმაშია, რომ სამი წლის წინ მერიას 1 კვადრატული მეტრი მეორადი ქვაფენილი 40 ლარად ჰქონდა შეფასებული.
უცნობია, მერია საპატრიარქოს ქვაფენილს საკრებულოს მიერ საკითხის განხილვის შემდეგ გადასცემს, თუ უკვე გადასცა, რადგან, მაგალითად, ბათუმში, მემედ აბაშიძის გამზირზე მერიამ ქვაფენილი ჯერ აყარა და შემდეგ შეუთანხმა ეს საკითხი საკრებულოს.
თამარ კოხოძე ორი შვილის დედაა. ამჟამად მესამე შვილს ელოდება. ფეხმძიმე ქალი ქუთაისიდან უკვე ყოველდღე დადის თბილისში იმისთვის, რომ მისი 7 წლის შვილის, გაბრიელის სიცოცხლე გადაარჩინოს.
7 წლის გაბრიელს დიუშენის კუნთოვანი დისტროფია აქვს. მისი მკურნალობისთვის საჭიროა მედიკამენტი, რომელიც საქართველოში არ იყიდება. ასამდე მშობელი ორ წელზე მეტია სახელმწიფოს სთხოვს შემოიტანონ წამალი, რადგან მედიკამენტი ძვირადღირებულია და ოჯახები მის შეძენას ვერ ახერხებენ.
ჯანდაცვის სამინისტრო კი არ რეაგირებს. დუმს „ქართული ოცნების“ ხელისუფლებაც. უფრო მეტიც, მშობლებს, რომლებიც თავიანთი შვილების სიცოცხლის გადასარჩენ წამალს ითხოვენ, პროტესტს უზღუდავენ. „ხმა არ ამოიღოთო, გვითხრა მინისტრმა“ – ამბობს თამარ კოხოძე.
მშობლები, რომლებიც 24-საათიანი პროტესტის რეჟიმზე გადავიდნენ, არ აძლევენ მთავრობის კანცელარიასთან კარვების დადგმის უფლებას. „ტურისტები შეწუხდებიან და ვერ დადგამთო. სკამზე დავჯდები და ისე გავათენებ ღამეებს ჩემს შვილისთვის“ – ამბობს თამარ კოხოძე.
თამარ კოხოძე
თამარი ოჯახთან ერთად 2023 წელს საფრანგეთში წავიდა, რომ შვილისთვის ემკურნალა. თუმცა, როგორც „ბათუმელებთან“ საუბარში ამბობს, უკან დაბრუნება მოუხდათ, რადგან საფრანგეთში წამლის დაფინანსება უარი უთხრეს.
„ნეკერის კლინიკაში ვიყავით, სადაც იშვიათ დაავადებებზე მუშაობენ. 8 თვის შემდეგ ექიმმა გვითხრა, რომ სამწუხაროდ ვერ მოგცემთ ამ მედიკამენტს, რადგან ძალიან ძვირია და ის მხოლოდ საფრანგეთის მოქალაქეებისთვის გვაქვსო.
წადით, მოთხოვეთ თქვენს ქვეყანას, რადგან გადავხედეთ თქვენი ქვეყნის მონაცემებს და აქვს თქვენს ქვეყანას რესურსი, რომ აიღოთ ეს მედიკამენტიო. დავბრუნდით და უკვე წელიწადნახევარია ბრძოლის რეჟიმში ვართ, მაგრამ სამწუხაროდ, არანაირი გამოხმაურება არ არის მთავრობის მხრიდან.
ძალიან უხეშად გვექცევიან. ახლა პაპუაშვილი გამოვიდა და თქვა, დაფიქრდნენ მშობლები რა წამალს ითხოვენო, თითქოს ჩვენ არ გვქონდეს გააზრებული რას ვითხოვთ და არ ვიცოდეთ, რომ ეს წამალი უკეთეს მდგომარეობას მოუტანს ჩვენს შვილებს.
1%-ი უკუჩვენება ნებისმიერ წამალს აქვს. სიცხის დამწევსაც აქვს უკუჩვენება. კოვიდი რომ იყო, იმ ვაქცინას არ ჰქონდა უკუჩვენება? ხომ შემოიტანეს.
დღეს რასაც იღებენ ჩვენი შვილები, თუნდაც იმ ჰორმონს, გაცილებით მეტი აქვს უკუჩვენება, ვიდრე იმ მედიკამენტს, რომლის შემოტანასაც ვითხოვთ.
ან საერთოდ რა მოსატანია უკუჩვენება, როცა ბავშვების სიცოცხლეზეა საუბარი. საქართველოს მოქალაქეები იღებენ ამ მედიკამენტებს საზღვარგარეთ და აქვთ ძალიან კარგი შედეგი. მაგალითად, ბავშვი, რომელიც ამერიკაში წაიყვანეს მშობელმა, ახლა დამოუკიდებლად დადის. ფულის დახარჯვა და ჩვენი შვილების გადარჩენა ან სიცოცხლის გახანგრძლივება არ უნდათ, ეს არის უბრალოდ მიზეზი“ – ამბობს თამარ კოხოძე.
მისი თქმით, თუ ბავშვებს ადრეულ ეტაპზე დაეხმარებიან, მათი მდგომარეობა ბევრად უმჯობესდება. დაავადება არ პროგრესირებს, ეტლში მყოფ ადამიანებს კი სიცოცხლეს უხანგრძლივებს ეს წამალი.
„ხომ იძახიან ევროპას ვუსწრებთ ეკონომიკით, ვვითარდებითო, მაშინ მოგვხედონ და შემოიტანონ წამალი ჩვენი შვილებისთვის.
გაბრიელს უკვე უჭირს გადაადგილება, ფეხების ტკივილი აქვს. თანატოლმა რომ ხელი ჰკრას, შეიძლება დიდი ტრავმა მიიღოს. ამის გამო სკოლაში ვერ დაგვყავს, საზოგადოებაში ვერ გაგვყავს, ვერ ადაპტირდება.
სახელმწიფო ვალდებულია მიხედოს ნებისმიერ მოქალაქეს, ჯანდაცვის მინისტრმა კი ის გვითხრა, თქვენ რომ დაგეხმაროთ, სხვაც მოითხოვს მერე წამალსო. ემპათიისგან და ადამიანობისგან რომ საერთოდ შორსაა ეს მთავრობა ვხედავთ, მაგრამ ისიც კი გვითხრეს, არც კი გაბედოთ ხმის ამოღება, ჩუმად იყავით მშობლები, ნუ ხმაურობთო. ჩვენ, განწირულ დედებს არ გვაინტერესებს წამალი ძვირია თუ არა“-ამბობს თამარ კოხოძე.
მისი თქმით, სამინისტროს არც წამლის შემოტანა უნდა ბავშვებისთვის და არც იმ გეგმიური კვლევების დაფინანსება, რომელიც აუცილებელია დიუშენის კუნთოვანი დისტროფიის მქონე ბავშვებისთვის.
„მულტიდისციპლინური გუნდიც კი არ ჩამოუყალიბებიათ ამ ბავშვებისთვის. წელიწადში ორჯერ კვლევები სჭირდებათ, პათოლოგიები, რომ არ გამოგვეპაროს. კუნთი ყოველდღე იცვლება და იშლება, ამიტომ აუცილებელია ეს კვლევები. თითო ჩამოსვლა თბილისში 2000 ლარი მიჯდება, ყველას ხომ არ აქვს ამის საშუალება?
ამასაც კი არ გვპირდებიან, რომ გაგვიკეთებენ. არანაირი ქმედითი ნაბიჯები არ არის გადადგმული სახელმწიფოს მხრიდან. თან უნდა გაჩუმდე თურმე“ – ამბობს თამარ კოხოძე.
მშობლების საპროტესტო აქცია მთავრობის კანცელარიასთან ერთი კვირაა მიმდინარეობს და გრძელდება დღესაც, 20 აპრილს.
„პოლიციის კორდონი გვიდგას წინ და იცავენ მთავრობას, ჩვენ არ გვიცავენ. ძალიან სამარცხვინოა ეს ყველაფერი“- ამბობს თამარ კოხოძე.
საქართველოში დიუშენის კუნთოვანი დისტროფიის მქონე ასამდე ბავშვი და მოზარდია. ბოლო დრომდე არ არსებობდა მედიკამენტი, რომელიც ამ დაავადების პროგრესს შეაჩერებდა, ახლა კი საერთაშორისო ბაზარზე არსებობს მედიკამენტი, რომელიც ხელს უშლის დაავადების განვითარებას და დაავადების საწყის ეტაპზე მკურნალობის დაწყების შემთხვევაში, ბავშვის ჯანმრთელობის მდგომარეობას აუმჯობესებს.
მშობლები ამბობენ, სანამ მათი შვილები არ მიიღებენ წამალს, პროტესტი არ შეწყდება.
შეხვედრის მოდერატორია თამარ რუხაძე, მონაწილეები: ნანა კვაჭაძე [„ბათუმელები“/ნეტგაზეთი], ზურა ვარდიაშვილი და ლიკა ზაკაშვილი [„პუბლიკა“].
„მზია ამაღლობელის საქმე ცხადად აჩვენებს, როგორ ექცევა სისტემა თავისუფალ მედიას, ჟურნალისტებს და კრიტიკულად მოაზროვნე მოქალაქეებს. მზიას საქმე ასევე ააშკარავებს, თუ როგორ ეშინია სისტემას წესიერების, სიმამაცის და თავისუფლების იდეისადმი ერთგულების.
მზია ამაღლობელის დაკავება და პატიმრობა გარდამტეხ მომენტად იქცა დამოუკიდებელი ქართული მედიისთვისაც. მის მრავალშრიან გავლენას ერთ-ერთი მედიაკვლევის ავტორებმა „მზიას ეფექტი“ უწოდეს: მზიას პიროვნებამ, მისმა შეუდრეკელმა სიმტკიცემ გატეხა შიში, გამოიწვია უპრეცედენტო სოლიდარობა და შექმნა დამოუკიდებელი მედიის წინააღმდეგობის ერთიანი ფრონტი მზარდი ავტორიტარიზმის პირობებში.
ვსაუბრობთ იმაზე, თუ როგორ შეიქმნა ეს ერთიანი წინააღმდეგობა, როგორც ცალკეულ ჟურნალისტებზე, რედაქტორებზე, მედიამენეჯერებზე მზიას საქმის, მისი მაგალითის გავლენის გაერთიანებული შედეგი; როგორ გარდაქმნა მზია ამაღლობელმა გამიზნული „მსუსხავი ეფექტი“ მედიის პროფესიულ და მორალურ ვალდებულად – „იბრძოლო, სანამ გვიანი არ არის“ – ნათქვამია პრესრელიზში.
მზია ამაღლობელი გამოცემების – „ბათუმელების“ და „ნეტგაზეთის“ დამფუძნებელი და თანადირექტორია. ის უკვე 15 თვე რჩება უკანონო პატიმრობაში.
2025 წლის 16 დეკემბერს პატიმრობაში მყოფ ჟურნალისტსა და მედიამენეჯერს, მზია ამაღლობელს, სტრასბურგში, ევროპარლამენტში, ევროკავშირის ადამიანის უფლებათა უმაღლესი ჯილდო, სახაროვის პრემია გადასცეს.
შავ ზღვაში 7 აპრილს ჩაღვრილი ნავთობი შესაძლოა საქართველოს სანაპიროზეც მოხვდეს.
„თუ აღმოსავლეთიდან შავი ზღვის ტიპიური დინება არ ფორმირდა და არ გაძლიერდა (ბოლო პერიოდში ის პირიქით მოძრაობდა), ლაქა საქართველოს სანაპიროს აფხაზეთის მონაკვეთს მიაღწევს.
ლაქის დრეიფის სიჩქარეა 3-3.5 მ/წამში, პერიოდულად – 5 მეტრი წამში, ანუ დაახლოებით 10-12 კილომეტრი საათში.
საქართველომდე მოღწევას (დისტანცია 105 კილომეტრია) ამ მოცემულობით ხვალისთვის უნდა ველოდოთ,“ – ამბობს ბიოლოგიის დოქტორი, იქთიოლოგი არჩილ გუჩმანიძე.
ნავთობპროდუქტები შავ ზღვაში მიმდინარე წლის 7 აპრილს ჩაიღვარა რუსეთის ქალაქ ანაპასთან. ნავთობით ზღვის დაბინძურების სავარაუდო გამომწვევია ე.წ. ჩრდილოვანი ფლოტის ნავთობტანკერი „სოფია“.
სპეციალისტები ვარაუდობენ, რომ დაახლოებით 350 ტონამდე ნედლი ნავთობი მოხვდა შავ ზღვაში.
„ეს ძალიან დიდი, კატასტროფული ოდენობაა, ამხელა ნავთობის ზღვაში მოხვედრა. თანამგზავრული გამოსახულებებით დადგინდა, რომ ანაპის აკვატორიაში მოხდა ჩაღვრა. პირველსავე დღეებში ლაქის ფართობმა მიაღწია 200 კვადრატულ კილომეტრამდე, რაც ძალიან დიდი ფართობია.
შემდგომ დაიწყო ნავთობის ლაქამ გავრცელება. ერთი ნაწილი უტრიშის ნაპირებთან (ანაპის რაიონი) გაირიყა, სადაც ძალიან მძიმე ვითარებაა.
უტრიში არის ნაკრძალი, დაცული ტერიტორია. გამოირჩევა თავისი უნიკალური მრავალფეროვნებით, მათ შორის ეს ადგილი მნიშვნელოვანია თევზების ბიომრავალფეროვნების და ზღვის ძუძუმწოვრებისთვის. მოკლედ, შავ ზღვაში ერთ-ერთი გამორჩეული ცხელი წერტილია ბიომრავალფეროვნების კუთხით.
იქ ამხელა ოდენობის ნავთობის ჩაღვრა არის ძალიან მძიმე შავი ზღვის ეკოსისტემისთვის.
ანაპის შემდეგ ნავთობის ლაქამ დაიწყო დრეიფი შავი ზღვის აღმოსავლეთით, ანუ ჩვენი მიმართულებით.
ეს გარკვეულწილად უჩვეულოა, რადგან ყველას კარგად მოეხსენება შავ ზღვაში გაბატონებული დინება როგორია.
ჩვენთან დინება მოძრაობს აღმოსავლეთ ნახევარში, საათის ისრის საწინააღმდეგო მიმართულებით. მაგრამ ბოლო პერიოდში დავინახე, რომ დინება უკუღმა იყო შემობრუნებული შავ ზღვაში. ეს ძალიან კარგად ჩანდა ბათუმიდანაც, ბინძური ზღვა მდინარესავით მიედინებოდა უკუმიმართულებით. როგორც ჩანს, ამან გავლენა იქონია,“ – ამბობს არჩილ გუჩმანიძე „ბათუმელებთან“
19 აპრილის მონაცემებით, ჩაღვრილი ნავთობის ერთი ნაწილი, დაახლოებით 7 კილომეტრი სიგრძით და 1.5 კილომეტრი სიგანით, ტუაფსეს [ქალაქი რუსეთში, კრასნოდარის მხარეში] სანაპიროს მიუახლოვდა.
„დინების და ქარის მეშვეობით მოიწევს აღმოსავლეთით. უნდა ვიცოდეთ, რომ ჩაღვრის ადგილიდან ტუაფსემდე 200 კილომეტრზე მეტია.
წარმოიდგინეთ, რომ 200 კილომეტრი ამ ლაქამ აღმოსავლეთით, ანუ ჩვენი მიმართულებით უკვე გამოიარა და დარჩა გამოსავლელი კიდევ 100-105 კილომეტრი, რომ მოაღწიოს ჩვენს ნაპირებთან. მე ვგულისხმობ საქართველოს შავი ზღვის სანაპიროს, აფხაზეთის უბანს.
ღმერთმა დაგვიფაროს, მაგრამ თუ იქამდე მოაღწევს, ეს იქნება კატასტროფა მთელი ჩვენი ზღვისპირეთისთვის. სატელიტური ფოტოებით რაც გავთვალეთ, ნავთობის ლაქას ჩვენს სანაპირომდე მოსაღწევად დაახლოებით 10 საათი დასჭირდება, რა თქმა უნდა, თუ ამ მიმართულებით იდრეიფა,“ – ამბობს არჩილ გუჩმანიძე.
არჩილ გუჩმანიძე
ის იმედოვნებს, რომ შავ ზღვაში აღმოსავლეთის დინება ფორმირდება, შედეგად ნავთობის ლაქის ბლოკირება მოხდება და მანამ გაირიყება ნაპირზე, სანამ საქართველოს ტერიტორიას მოაღწევს.
„სავარაუდოდ, გარიყვის ადგილი იქნება სოჭის რაიონი. ყველაფერი ისე რომ დამთავრდეს, რომ ჩვენს ნაპირებს არ შეეხოს, გავლენა შავი ზღვის ეკოსისტემაზე მაინც ძალიან დიდი იქნება, რადგან მნიშვნელოვანი სანაპირო უბანია, გამორჩეული თავისი ბიოლოგიური მრავალფეროვნებით. ეს სანაპირო უბანი დიდ როლს ასრულებს თევზების მარაგების, მაგალითად, ქაფშიის მარაგის ფორმირებაში.
ეს არის ქაფშიის სამიგრაციო გზა, ზუსტად იმ გზით მოდის ჩვენთან ქაფშია, რა გზაც ნავთობის ლაქამ გამოიარა.
თუმცა ამ გავლენას შესწავლა და სამეცნიერო კვლევები სჭირდება,“ – ამბობს არჩილ გუჩმანიძე.
რა მოხდება იმ შემთხვევაში, თუკი საქართველოს სანაპიროს მოაღწევს ნავთობის ლაქა? – ვკითხეთ არჩილ გუჩმანიძეს.
„ჩვენი სანაპიროს აფხაზეთის უბანი დაახლოებით 200 კილომეტრია. ამის შემდგომ არის უშუალოდ ის უბანი, რომელსაც დღეს საქართველო აკონტროლებს. თუ აქეთ წამოიღო, პირველ რიგში შეეხება ანაკლიას. მოგეხსენებათ, ანაკლიიდან 2-3 კილომეტრში სამხრეთით გვაქვს კოლხეთის ეროვნული პარკის საზღვაო სექტორი, დაცული ტერიტორია. რომელიც არის ძალიან მნიშვნელოვანი უბანი ჩვენი ბიომრავალფეროვნებისთვის, განსაკუთრებით ზუთხისებრი თევზებისთვის, რომლის ყველა სახეობა საქართველოს წითელ ნუსხაშია შეტანილი, ასევე შეტანილია მსოფლიო წითელ ნუსხაში.
გარდა ანაკლიის უბნისა, მნიშვნელოვანია ოჩამჩირის და გუდაუთის უბნები, როგორც ზუთხისებრი თევზებისთვის, ისე ზოგადად შავი ზღვის ბიოლოგიური მრავალფეროვნებისთვის,“ – ამბობს არჩილ გუჩმანიძე.
მისი თქმით, ხვალ, 21 აპრილს, უფრო ნათელი გახდება, მოაღწევს ნავთობის ლაქა საქართველოს ტერიტორიამდე თუ ვერა.
ეს არ არის პირველი შემთხვევა, როდესაც შავი ზღვა ნავთობპროდუქტებით ბინძურდება.
__________________________
მთავარი ფოტო: ნავთობპროდუქტებით დაბინძურებული ანაპის პლაჟის დასუფთავება
20 პირი დააჯარიმეს ბათუმის ბულვარში ავტომანქანითა და მიკროავტობუსით გადაადგილების გამო.
ინფორმაცია „ბათუმელებს“ შინაგან საქმეთა სამინისტროში დაუდასტურეს.
შსს-ს ინფორმაციით, დაჯარიმებულები ბულვარში დაფიქსირებული ავტომანქანების მძღოლები არიან.
მძღოლები დაჯარიმდნენ ადმინისტრაციულ სამართალდაღვევათა კოდექსის 125-ე მუხლის მე-13 და 6/2 ნაწილით.
კერძოდ, ასკ-ს 125-ე მუხლის მე-13 ნაწილი გულისხმობს ველოსიპედის ბილიკზე ან ველოსიპედის მოძრაობის ზოლზე ველოსიპედის გარდა სხვა სახის სატრანსპორტო საშუალების (გარდა საქართველოს კანონმდებლობით დაშვებული გამონაკლისებისა) მოძრაობა, გაჩერება ან დგომის დარღვევას, რაც იწვევს ჯარიმას 100 ლარის ოდენობით.
ხოლო 125-ე მუხლის 6/2 ნაწილი, გულისხმობს გზის სავალ ნაწილზე სატრანსპორტო საშუალებათა განლაგების, მოძრაობის დაწყების ან/და მანევრირების წესების დარღვევას. ამ დარღვევისთვის გათვალისწინებულია ჯარიმა 50 ლარის ოდენობით.
ვიდეო, სადაც ჩანს როგორ გადაადგილდებიან მიკროავტობუსი და მსუბუქი ავტომობილები ბათუმის ბულვარში 19 აპრილს, დაახლოებით 2:00 საათზე გადაიღო მოქალაქემ.
ვიდეოში ასევე ჩანს, როგორ მოძრაობენ ეს ავტომანქანები საპატრულო პოლიციის თვალწინ – საპატრულოს მანქანა იქვე, ბულვარის ერთ-ერთ შესასვლელთანაა გაჩერებული.
რამდენიმე ავტომანქანას აქვს სასტუმროს და კაზინო „ბილიონერის“ ლოგო.
დღეს, 20 აპრილს, განცხადება გაავრცელა „ბათუმის ბულვარმაც“.
„ბათუმის ბულვარის ტერიტორიაზე ავტომობილების გადაადგილების ფაქტთან დაკავშირებით განვმარტავთ, რომ შესაბამისი სამსახურის მიერ მოხდა სამართალდარღვევის დაფიქსირება.
სამართალდარღვევის შესახებ ინფორმაცია საქართველოს შინაგან საქმეთა სამინისტროს შესაბამის სტრუქტურულ ერთეულს გადაეგზავნა.
შინაგან საქმეთა სამინისტროს მიერ იდენტიფიცირებულ იქნა აღნიშნული ავტომობილები და დამრღვევი პირების მიმართ გატარდა კანონით გათვალისწინებული ღონისძიებები – ყველა პირი ადმინისტრაციულად დაჯარიმდა,“ – განმარტა ბათუმის ბულვარმა.
დღეს, 20 აპრილს, ბათუმში, ფრიდონ ხალვაშის ქუჩაზე ავტოსაგზაო შემთხვევის შედეგად 1 ადამიანი დაიღუპა.
„ბათუმელების“ ინფორმაციით, დაღუპული პირი დაახლოებით 70 წლის იყო. ის ქვეითად გადაადგილდებოდა.
შსს-ს ინფორმაციით, გამოძიება სისხლის სამართლის კოდექსის 276-ე მუხლის მე-6 ნაწილით დაიწყო, რაც ტრანსპორტის ექსპლუატაციისა და მოძრაობის უსაფრთხოების წესების დარღვევას გულისხმობს, რამაც გამოიწვია ადამიანის სიცოცხლის მოსპობა.
საქართველოში ავარიების შედეგად დაღუპულთა რიცხვი საგანგაშოდ მაღალია. მაგალითად, გასულ წელს, მარტო 6 თვეში, საქართველოში 216 ადამიანი დაიღუპა ავტოავარიის შედეგად.
ამავე პერიოდში ავტოავარიაში დაშავდა 3816 ადამიანი.
საქართველოს სტატისტიკის ეროვნული სამსახურის მონაცემებით 2026 წლის პირველ კვარტალში [იანვარ-მარტში] საქართველოში საქონლით საგარეო სავაჭრო ბრუნვამ [არადეკლარირებული ვაჭრობის გარეშე] 5,8 მილიარდი აშშ დოლარი შეადგინა, რაც წინა წლის შესაბამის პერიოდთან შედარებით 0.2 პროცენტით მეტია. აქედან, ექსპორტი 1,7 მილიარდ აშშ დოლარს შეადგენს, ხოლო იმპორტი – 4,1 მილიარდ აშშ დოლარს.
2026 წლის იანვარ-მარტში ყველაზე მეტი პროდუქცია საქართველოდან გატანილია:
ჩინეთში – 203.2 მლნ. აშშ დოლარი;
ყირგიზეთში – 190.9 მლნ. აშშ დოლარი;
რუსეთში – 145.5 მლნ. აშშ დოლარი.
აღნიშნულ პერიოდში სასაქონლო ჯგუფებიდან საექსპორტო ათეულში პირველი ადგილი მსუბუქმა ავტომობილებმა დაიკავა 364.5 მლნ. აშშ დოლარით, მეორე ადგილს იკავებს ნავთობი და ნავთობპროდუქტები – 208.1 მლნ. აშშ დოლარით, ხოლო მესამე ადგილზეა ძვირფასი ლითონების მადნები და კონცენტრატები – 169.9 მლნ. აშშ დოლარით.
რაც შეეხება იმპორტს, 2026 წლის იანვარ-მარტში საქართველოში ყველაზე მეტი პროდუქცია შემოტანილია:
თურქეთიდან – 657.3 მლნ. აშშ დოლარი;
რუსეთიდან – 592.5 მლნ. აშშ დოლარი;
ჩინეთიდან – 487.6 მლნ. აშშ დოლარი.
უმსხვილესი საიმპორტო სასაქონლო ჯგუფი 2026 წლის იანვარ-მარტში წარმოდგენილი იყო მსუბუქი ავტომობილების სახით, რომლის იმპორტმა 632.2 მლნ. აშშ დოლარი და მთელი იმპორტის 15.3 პროცენტი შეადგინა.
მეორე ადგილს იკავებს ნავთობი და ნავთობპროდუქტები 338.6 მლნ. აშშ დოლარით [მთელი იმპორტის 8.2 პროცენტი], ხოლო მესამე ადგილზეა ნავთობის აირები და სხვა აირისებრი ნახშირწყალბადები 204.1 მლნ. აშშ დოლარით [მთელი იმპორტის 4.9 პროცენტი].
საქსტატის მონაცემებით, 2026 წლის პირველ კვარტალში საქართველოდან რუსეთში გატანილ პროდუქციას შორის ყველაზე მეტი იყო ღვინო, სპირტიანი სასმელები და წყალი [მინერალური და მტკნარი], ხოლო რუსეთიდან საქართველოში იმავე პერიოდში შემოტანილი პროდუქციიდან ყველაზე მეტი იყო ნავთობპროდუქტები და ხორბალი:
წყარო: საქსტატი
საქსტატი ცალკე აქვეყნებს მონაცემებს ადგილობრივი ექსპორტის შესახებ [ეს არის ადგილობრივი პროდუქციის ექსპორტი, ანუ ექსპორტი რეექსპორტის გარეშე].
ამ შემთხვევაში გამოქვეყნებულია მიმდინარე წლის მხოლოდ 2 თვის, ანუ 2026 წლის იანვარ-თებერვლის მონაცემები.
ამ მონაცემებით კი, აღნიშნულ ორ თვეში საქართველოდან ადგილობრივი ექსპორტის მოცულობამ [არადეკლარირებული ექსპორტის გარეშე] 1 მილიარდ 26 მილიონი აშშ დოლარი შეადგინა, რაც 22.9 პროცენტით მეტია გასული წლის იანვარ-თებერვლის მაჩვენებელზე.
ადგილობრივი ექსპორტის კუთხით, 2026 წლის იანვარ-თებერვალში უმსხვილესი საექსპორტო პარტნიორებია: ჩინეთი [143.9 მლნ. აშშ დოლარი], რუსეთი [84.9 მლნ. აშშ დოლარი] და თურქეთი [76.1 მლნ. აშშ დოლარი].
საქსტატის ამავე მონაცემებით მიმდინარე წლის 2 თვის ადგილობრივ ექსპორტში პირველ ადგილზე ძვირფასი ლითონის მადნები და კონცენტრატები არის წარმოდგენილი 125.6 მლნ. აშშ დოლარით.
მეორე ადგილზეა ნავთობი და ნავთობპროდუქტები, 88.1 მლნ. აშშ დოლარით; ხოლო მესამე ადგილს იკავებს თხილი და სხვა კაკალი 34.2 მლნ. აშშ დოლარით.
____________________
ფოტოზე: რუსეთ-საქართველოს საზღვარი, ლარსი. ფოტო: ევროპის პრესფოტო სააგენტო. EPA//ZURAB KURTSIKIDZE
სახელმწიფო უსაფრთხოების სამსახურის ცნობით, ბათუმში დააკავეს ორი პირი, რომელთაც ბრალად ედებათ ტერორისტულ ორგანიზაციასთან, ე.წ. „ისლამურ სახელმწიფოსთან“ კავშირი.
დაკავებულთაგან ერთი საქართველოს მოქალაქეა, მეორე კი – უცხო ქვეყნის.
„გამოძიებით დადგენილია, რომ აღნიშნული პირები გაწევრიანდნენ ტერორისტულ ორგანიზაცია „ისლამური სახელმწიფოს“ რიგებში და დადეს ერთგულების ფიცი, ეგრეთ წოდებული „ბაიათი“, რაც ასახეს ვიდეოფაილის სახით და გადაუგზავნეს ორგანიზაციის ლიდერებს. რითაც უპირობო მორჩილება გამოუცხადეს მათ. ისინი მზად იყვნენ „ისლამური სახელმწიფოს“ ლიდერების ნებისმიერი სახის დავალების შესასრულებლად.
გამოძიებით ასევე დგინდება, რომ დაკავებულები საქართველოდან მიემგზავრებოდნენ სხვა ქვეყანაში, სადაც უნდა შეერთებოდნენ „ისლამური სახელმწიფოს“ მებრძოლებს”, – აცხადებენ სუს-ში.
უწყების თანახმად, საგამოძიებო მოქმედებების შედეგად ამოღებულია ელექტრონული ინფორმაციის მატარებელი მოწყობილობები, დაურეგისტრირებელი სიმ-ბარათები, მობილური ტელეფონები, ტერორისტული ორგანიზაცია „ისლამური სახელმწიფოს“ სიმბოლიკის ამსახველი ნივთები, ნიღბები, პირადი დოკუმენტაცია და საქმისთვის მნიშვნელობის მქონე სხვა მტკიცებულებები.
სუს-ის ცნობით, გამოძიება სისხლის სამართლის კოდექსის 328-ე მუხლით მიმდინარეობს, რაც უცხო ქვეყნის ტერორისტულ ორგანიზაციაში გაერთიანებას და ტერორისტულ საქმიანობაში დახმარებას გულისხმობს. დანაშაული, ბრალის დამტკიცების შემთხვევაში, 10-დან 17 წლამდე პატიმრობას ითვალისწინებს.
დღეს, 20 აპრილს, ბათუმში ტაქსის მძღოლებმა საპროტესტო აქცია გამართეს. ისინი ახალი ბულვარის ტერიტორიაზე შეიკრიბნენ და სამგზავრო ტარიფების გაზრდა და საკომისიოების შემცირება მოითხოვეს. აქციაში სხვადასხვა კომპანიაში დასაქმებული ტაქსის მძღოლები მონაწილეობდნენ.
„ჩვენი ძირითადი მოთხოვნაა ტარიფების გადახედვა. საწვავი გაძვირდა, მგზავრობის ტარიფი იგივე დარჩა. ერთი მგზავრობის საფასური ერთი ლიტრი საწვავის საფასურს მაინც უნდა გვიტოვებდეს.
აქ არიან ადამიანები, რომლებიც „ბოლტზეც“ მუშაობენ, „მაქსიმზეც“ და „იანდექსზეც“. თუ ადრე, ვთქვათ, 30 ლარის საწვავი გჭირდებოდა დღეში, ახლა 40-45 ლარის საწვავი გვჭირდება.
2.60 ლარია ერთი მგზავრობა, ამიტომ, ტარიფები ისე უნდა დადგინდეს, რომ ხალხიც კმაყოფილი იყოს და კომპანიაც. საწვავი გარბის და რაღაც მისაღებ ტარიფზე უნდა შევჯერდეთ. თუ არა, მაშინ გავჩერდებით“ – უთხრა „ბათუმელებს“ ბადრი ფეიზიშვილმა.
ტაქსის მძღოლების აქცია ბათუმში.
„ბათუმელების“ კითხვაზე, მიმართეს თუ არა კომპანიების წარმომადგენლებს, ტაქსის მძღოლები ამბობენ, რომ კომპანიებს ადგილზე არ აქვთ ოფისები, თუმცა ელექტრონული კომუნიკაციისას დამსაქმებლებისგან პასუხს ვერ იღებენ.
„სმს-ზე პასუხს 24 საათი სჭირდება ხშირ შემთხვევაში. ყველა აპლიკაციას რობოტ-ჩატი აქვს დაყენებული და ეს რობოტი გვწერს. 3-4 კილომეტრზე 2.60 ლარს წერს და აქედან 23,4% მიაქვს კომპანიას და ხშირ შემთხვევაში, ისეთი საკომისიო აქვს, რომ ჩვენც ვერ ვთვლით.
ბათუმის აეროპორტიდან რომ კოპიტნარის აეროპორტში ჩავიდეთ, 30 ლარი გვრჩება. აქ, ძალიან ბევრს, ავტომანქანები სესხით აქვთ ნაყიდი და ზოგიერთი ერთი შემომტანია ოჯახში. 44 შეკვეთაში 180 ლარს რომ აკეთებს, აქედანაც 30% „ბოლტს“ მიაქვს და 100 ლარის საწვავი სჭირდება.
გასაგებია, რომ საწვავი ყველგან გაძვირდა, რადგან მსოფლიოში ომია, მაგრამ ჩვენც არ უნდა დავზარალდეთ“ – ამბობს ბექა ცინცაძე.
ტაქსის მძღოლების თქმით, რადგან კომპანიებთან კომუნიკაციის სხვა ფორმა არ არსებობს, ამიტომ გამართეს აქცია. მათი თქმით, ქვეყანაში ყველაფრის ტარიფი გაიზარდა, ამიტომ ტაქსის მომსახურების ტარიფიც უნდა გაიზარდოს.
_________________
ფოტოზე: კადრები მძღოლების აქციიდან, 2026 წლის 20 აპრილი
