სამი ცათამჯენის მშენებლობის ნებართვას თამარის დასახლებაში, სანაპიროზე მედეა ბოჭორიშვილის კომპანია ისევ ითხოვს. მანამდე, 2024 წელს, მას იმავე ნაკვეთის გვერდით სხვა სამი ცათამბჯენის განაშენიანების დეტალური გეგმა დაუმტკიცეს, რის შემდეგაც კომპანიის წილებიც გაასხვისა და მთავრობისგან შესყიდული მიწის ნაკვეთის ნახევარიც.
ბათუმში, თამარის დასახლებაში, ზღვის სანაპიროზე, მდინარე ყოროლისწყლისა და ზღვის შესართავთან „ოცნების“ ორი დეპუტატის ცათამბჯენების პროექტზე „ბათუმელები“ ადრეც წერდა.
ამ ტერიტორიაზე, თამარის დასახლებაში, #15ა – ში, ყოროლისწყლის ხიდთან, სამი 12-სართულიანი კორპუსის უკან, ზღვის მხარეს არსებულ ჰექტარ-ნახევარ ფართობზე შპს „სიტი გაიდმა“ განაშენიანების დეტალური გეგმის დამტკიცების შემდეგ კომპანიის წილები გაასხვისა. „სიტი გაიდის“ თანამესაკუთრეები გახდნენ „ოცნების“ დეპუტატის, გოჩა ენუქიძის „იბერლი კომპანი“ და კიდევ ერთი დეპუტატის, გოდერძი ჩანქსელიანის შვილი ბუბა ჩანქსელიანი. ორივე პარლამენტარი რუსული კანონის მხარდამჭერია.
ახლა ამ მიწის ნაკვეთის გაგრძელებაზე კიდევ სამი ცათამბჯენის მშენებლობის ნებართვას შპს „სიფერლი“ ითხოვს. ეს კომპანიაც მედეა ბოჭორიშვილმა დააფუძნა. ის „ალიანს ჯგუფის“ დამფუძნებლის, გია ბიწაძის მეუღლეა. თავად დამფუძნებელი გია ბიწაძე და „ალიანს ჯგუფთან“ დაკავშირებული სხვადასხვა კომპანიის დირექტორებიც „ოცნების“ მხარდამჭერები და შემწირველები არიან.
I ილუსტრაცია – შპს „სიფერლის“ სამი 60-სართულიანი ცათამბჯენი. II ილუსტრაცია – „სიტი გაიდის“ ორი მშენებარე ცათამბჯენი.
კომპანიის წილების გაყოფის შემდეგ შპს „სიტი გაიდმა“ საინვესტიციო მიწის ნაკვეთი ორად გაყო და ნაწილი „ალპეკა ბათუმს“ მიჰყიდა, „სიტი გაიდის“ წილებიდან კი კიდევ 9. 83 % გაასხვისეს – ამ გადანაწილებებსა და გავლენების გაყოფაზე დეტალურად წაიკითხეთ აქ:
რაც შეეხება შპს „სიფერლის“ და მის პროექტს, ეს კომპანიაც 2025 წლის თებერვალში მედეა ბოჭორიშვილმა დააფუძნა და ის კომპანიის ასივე პროცენტს ერთპიროვნულად ფლობს. გეგმავს თუ არა ბოჭორიშვილი წილების გასხვისებას პროექტის დამტკიცების შემდეგ, ამაზე ჯერ არ ვიცით.
კომპანია მშენებლობას ორსართულიანი სახლების ათვისების ხარჯზე გეგმავს, ქონების ნაწილი შპს „სიფერლის“ უკვე გამოსყიდული აქვს, თუმცა რადგან განაშენიანების დეტალური გეგმის დასამტკიცებლად კომპანიამ მერიას უკვე მიმართა, შეგვიძლია ჩავთვალოთ, რომ მოლაპარაკებები ქონების დათმობაზე ახალი პროექტის სასარგებლოდ მესაკუთრეებთან, დიდი ალბათობით, დადებითად არის გადაწყვეტილი.
განაშენიანების გეგმის კონცეფციის მიხედვით, რომელიც მერიაში უკვე წარდგენილია, გეგმარებითი ერთეული 7300 კვ.მეტრია და აერთიანებს 13 მიწის ნაკვეთს, 14 ინდივიდუალური საცხოვრებელი სახლით.
რუკაზე მონიშნულია მიწის ნაკვეთი, სადაც შპს „სიფერლი“ სამი 60-სართულიანი ცათამბჯენის მშენებლობას გეგმავს
მარჯვნივ მონიშნულია შპს „სიტი გაიდის“ და „ალპეკა ბათუმის“ მიწის ნაკვეთები, სადაც კომპანიები უკვე დამტკიცებული დოკუმენტების მიხედვით, სამი ცათამბჯენის მშენებლობას გეგმავენ. მარცხნივ კი მონიშნულია მიწის ნაკვეთები, სადაც ორსართულიანი განაშენიანების დემონტაჟის ხარჯზე შპს „სიფერლი“ კიდევ სამი ცათამბჯენის მშენებლობას გეგმავს.
როცა პროექტი ქალაქის კონკრეტულ ზონაში დადგენილი პარამეტრების გადაჭარბებაზე თანხმობას მოითხოვს და საქმე არ გვაქვს ავარიული სახლების პროგრამასთან, რომელიც გარკვეულ შეღავათებს ითვალისწინებს ნებართვის გაცემისას, აუცილებელია გაიცეს გეგმარებითი დავალება სამშენებლო მიწის ნაკვეთის განაშენიანების კონცეფციის და შემდეგ დეტალური გეგმის მომზადებაზე, რომელსაც საკრებულოს თანხმობით ამტკიცებენ. დამტკიცებული განაშენიანების დეტალური გეგმა მშენებლობის ნებართვის გაცემის საფუძველია.
ბათუმის მერის მოვალეობის შემსრულებელმა, გიორგი მურვანიძემ შპს „სიფერლის“ მიმართვის საფუძველზე 2025 წლის 30 მაისს გამოსცა ბრძანება თამარის დასახლებაში #1-27 ნაკვეთებზე განაშენიანების დეტალური გეგმის კონცეფციის მომზადებაზე.
კონცეფციის მიხედვით, რომელიც მერიას უკვე წარუდგინეს, გეგმარებით ერთეულში მოქცეული მიწის ნაკვეთების სამშენებლოდ განვითარებისთვის დაგეგმილია ქალაქმშენებლობის პარამეტრების ცვლილება, მათ შორის განაშენიანების ინტენსივობის კ2-კოეფიციენტის გაზრდა დადგენილი 2,5-დან 17,0-მდე. კონცეფციაში წერენ ასევე, რომ უნდა განისაზღვროს მაქსიმალური სიმაღლეები და სხვა პირობები.
გეგმარებითი დავალების შესახებ ბრძანებაში, რომელსაც ხელი მოაწერა მერის მოვალეობის შემსრულებელმა, კომპანიას სანაპიროზე 60-სართულიანი შენობების მშენებლობა სურს.
შპს „სიფერლის“ რენდერი კონცეფციიდან.
ფოტოზე მონიშნულია ტერიტორია, სადაც „სიტი გაიდი“ და „ალპეკა ბათუმი“ სამი ცათამბჯენის მშენებლობას გეგმავენ, მარცხნივ კი ჩანს 2-სართულიანი სახლები, რომელთა დანგრევას და კიდევ 3 ცათამბჯენის მშენებლობას შპს „სიფერლი“ გეგმავს.
ექვსი ცათამბჯენის მშენებლობის შემდეგ, როგორ წარმოუდგენიათ საჯარო სივრცეების განაწილება პროექტის ავტორებს, რა გზებით იმოძრავებს სამშენებლო ტექნიკა, სად და როგორ მოაწყობენ ავტოპარკინგს, როგორ შეიცვლება უკვე არსებულ 4 კორპუსში მცხოვრებთა საცხოვრებელი გარემო, რომლებიც სიმჭიდროვეზე საუბრობენ, ეს ცალკე კვლევის საგანია – ამ საკითხზე „ბათუმელები“ დეტალურად მოამზადებს მასალას.
ადგილი სხვადასხვა მხრიდან, სადაც შპს „სიფერლი“ მშენებლობას გეგმავს.
წარდგენილ დოკუმენტებში კონცეფციის ავტორები წერენ, რომ მოქალაქეთა ღირსეულ საცხოვრებელ და სოციალური პირობების გაუმჯობესებას უნდა შეუწყონ ხელი:
„პროექტის განხორციელება ხელს შეუწყობს ტერიტორიის ურბანულ განვითარებას, ტერიტორიის სივრცით რეორგანიზაციას, მიწის ნაკვეთების გასულ საუკუნეში აშენებული შენობა-ნაგებობებისაგან გამოთავისუფლების ტენდენციას, მათი თანამედროვე არქიტექტურული ღირებულების მქონე შენობებით ჩანაცვლებას, შესაბამისად კაპიტალური ფონდის განახლებას, საცხოვრებელი ფონდის გაზრდას, მოქალაქეთა ღირსეული საცხოვრებელი და სოციალური პირობების გაუმჯობესებას, სუსტი ინფრასტრუქტურის მქონე ერთეულის მდგრად ფუნქციურ ერთეულად ჩამოყალიბებას, ეკონომიკის დარგების, მათ შორის სამშენებლო სექტორის განვითარებას.
განვითარების შედეგად გათვალისწინებული იქნება ქალაქგეგმარებითი მოთხოვნები, მათ შორის: შიდა გზები, გამწვანებული ადგილები, ავტოსადგომები და სხვა აუცილებელი ინფრასტრუქტურა. მიწის ნაკვეთი მოშენდება თანამედროვე სტანდარტების მქონე საცხოვრებელი სახლით, გაზრდილი მოთხოვნების ფონზე შეიქმნება დამატებითი ინფრასტრუქტურა, მათ შორის მომსახურების, რაც დადებით გავლენას მოახდენს სოციალურ ინფრასტრუქტურაზე“.
კონცეფციაში ასევე ვკითხულობთ, რომ შპს „სიფერლის“ პროექტის ძლიერი მხარეები შავი ზღვის სანაპიროსთან, მნიშვნელოვან მაგისტრალთან და სატრანსპორტო ინფრასტრუქტურასთან სიახლოვე და ასათვისებელი მიწის რესურსია. სუსტი მხარეები კი მიმდებარე ტერიტორიებზე არასაკმარისი სოციალური და სხვა ინფრასტრუქტურის არსებობა, ქალაქის ამ ნაწილისათვის შეუსაბამო, გასულ საუკუნეში აგებული შენობებით განაშენიანებული მიწის ნაკვეთები ყოფილა.
კონცეფციის ავტორები წერენ, რომ შესაძლებელია ურბანული სივრცის რეორგანიზაცია და განვითარება, მიწის ნაკვეთების ათვისებით თანამედროვე არქიტექტურული ღირებულების მქონე შენობების განთავსება, კაპიტალური ფონდისა და ინფრასტრუქტურის განახლება.
- როგორ გაინაწილეს მიწის ნაკვეთი სანაპიროზე
„ბათუმელებისთვის“ თავიდანვე ცნობილი იყო, რომ დიდი ფართობის მიწის ნაკვეთზე თამარის დასახლების #1-5გ-ში, ზღვის სანაპიროზე რამდენიმე გავლენიან პირს ჰქონდა პრეტენზია. საბოლოოდ აჭარის მთავრობამ მიიღო გადაწყვეტილება და ის აუქციონზე გაიტანა. ქონების საწყისი ფასი 10 მილიონ 500 000 ლარი იყო და კონკურენციის პირობებში 6 მილიონით გაიზარდა.
გამარჯვება „სიტი გაიდს“ დარჩა. კომპანიამ შესყიდულ ნაკვეთზე 15 მილიონი ლარის ღირებულების ინვესტიციის განხორციელების ვალდებულებაც აიღო. მედეა ბოჭორიშვილი იყო კომპანიის ასივე პროცენტის მფლობელი, როცა „სიტი გაიდმა“ ზღვასთან ახლოს 1.2 ჰექტარი [12 447 კვ.მეტრი] მიწის ნაკვეთი იყიდა, თუმცა, როგორც ჩანს, კონკურენტებმა ხელი მაინც არ ჩაიქნიეს. ქონების შეძენიდან მალევე მედეა ბოჭორიშვილმა კომპანიის წილები სიმბოლურ ფასად, 1 ლარად გაასხვისა.
სიტი გაიდის“ წილები ასე გადანაწილდა: 33.33% დარჩა კომპანიის დამფუძნებელ მედეა ბოჭორიშვილს, 47 პროცენტის მფლობელია პარლამენტარ გოჩა ენუქიძის კომპანია შპს „იბერკომპანი“, 19.67 პროცენტი კი პარლამენტარ გოდერძი ჩანქსელიანის შვილს, ბუბა ჩანქსელიანს გადაუფორმეს. პარტნიორებს შორის ცალკე გაფორმდა წილის ნასყიდობის ხელშეკრულება, რომელშიც პარტნიორთა შორის უფლება-მოვალეობები გაწერეს.
გოჩა ენუქიძე, გოდერძი ჩანქსელიანი
2024 წლის დეკემბერში მედეა ბოჭორიშვილმა წილები ისევ გაასხვისა და 9.83 პროცენტი დაირეგისტრირა „კაპიტალ მენეჯმენტმა“. ამ კომპანიის ასი პროცენტის მფლობელი ზურა ნასყიდაშვილია. ზურა ნასყიდაშვილი „ოცნების“ მხარდამჭერი და შემწირველია. 2024 წლის აგვისტოში მან „ოცნებას“ 60 000 ლარი შესწირა.
ასეთი გადანაწილების პარალელურად შპს „სიტი გაიდმა“ სახელმწიფოსგან შესყიდული მიწის ნაკვეთების ერთი ნაწილი 5554 კვ.მეტრი „ალპეკა ბათუმს“ მიჰყიდა, უცნობია – რა ფასად. მშენებლობა ქონების გასხვისების ერთ-ერთი პირობა იყო.
ეს „სიტი გაიდის“ რენდერია, რომელიც უკვე დამტკიცებულ გდგ-ში იყო მოცემული. ამ სამიდან ერთ ცათამბჯენს „ალპეკა ბათუმი“ ააშენებს, რომლის მფლობელიც „ოცნების“ აქტიური მხარდამჭერის, ხათუნა ხოფერიას შვილი ბექა ხოფერიაა
ეს „ალპეკა ბათუმის“პროექტის რენდერია
კიდევ ერთი საინტერესო დეტალი ის არის, რომ შპს „სიტი გაიდის“ და „ალპეკა ბათუმის“ სამშენებლო ნაკვეთების წინ 3 ჰექტარი ზღვა არასასოფლო სამეურნეო ნაკვეთად არის დარეგისტრირებული და ამ დროისთვის სახელმწიფოს საკუთრებაშია.
სამშენებლო ნაკვეთის წინ 3 ჰექტარი ზღვა არასასოფლო სამეურნეო ნაკვეთად არის დარეგისტრირებული და ამ დროისთვის სახელმწიფოს საკუთრებაშია
