ბათუმის მერია უსახლკაროდ რეგისტრაციის წესს აზუსტებს, შესაბამისი განკარგულების პროექტი მერიის შესაბამისმა სამსახურმა დასამტკიცებლად საკრებულოს უკვე გადაუგზავნა.
პროექტის განმარტებითი ბარათის მიხედვით, უნდა დაზუსტდეს იმ ქონების ჩამონათვალი, რომლის საკუთრებაში ქონა არ ჩაითვლება დამაბრკოლებელ გარემოებად უსახლკაროდ დასარეგისტრირებლად. გარდა ამისა, მერია საზღვრის კვეთასთან დაკავშირებულ ჩანაწერზე დეტალებს აზუსტებს.
განკარგულების პროექტის განმარტებითი ბარათის მიხედვით, დამაბრკოლებელ გარემოებად აღარ ჩაითვლება სარდაფთან და სამეურნეო სათავსოსთან ერთად სხვა ფართობის ქონა, რომელიც გამოუსადეგარია საცხოვრებლად და არ გამოიყენება კომერციული მიზნებისათვის.
ასევე, გარდა 10 კვ.მეტრზე ნაკლები საცხოვრებელი ფართობისა, მხედველობაში არ მიიღება სარდაფის, სამეურნეო სათავსოს და სხვა ფართობი, რომელიც გამოუსადეგარია საცხოვრებლად და არ გამოიყენება კომერციული მიზნებისათვის. ასევე, დამაბრკოლებელი არ იქნება 10 კვ.მეტრზე ნაკლები ფართობის მართლზომიერი ფლობა ან უსასყიდლოდ სარგებლობა.
დამაბრკოლებელ გარემოებად არ ჩაითვლება კომისიის მიერ სტატუსის მაძიებელი პირის შესახებ ინფორმაციის მოძიებამდე ბოლო ერთი წლის განმავლობაში სტატუსის მაძიებლის
მიერ არაუმეტეს 10 კვ.მ. კომერციული, საცხოვრებლად ვარგისი სხვა ფართობის ქირის [იჯარის] უწყვეტად გადახდის ფაქტი.
დაზუსტდა ავტომანქანის მონაცემები, რომელთა საკუთრებაში ქონა არ წარმოადგენს უსახლკარო სტატუსის მინიჭებისათვის გამომრიცხავ გარემოებას. კერძოდ, კომისიის მხრიდან გადაწყვეტილება მიიღება ავტოსატრანსპორტო საშუალების მარკის, გამოშვების წლისა და მოდელის, მისი შეძენის დროისა და ღირებულების გათვალისწინებით, რომელიც არ უნდა აღემატებოდეს 6000 ლარს.
უსახლკაროდ დასარეგისტრირებლად შემოსავლის დასაშვები საარსებო მინიმუმის ორმაგი ოდენობა იზრდება და ხდება სამმაგი, ხოლო ოჯახის შემთხვევაში თუ ერთი პირია დასაქმებული, დასაშვები საარსებო მინიმუმი შეადგენს სამმაგ ოდენობას, ოჯახის რამდენიმე წევრის დასაქმების შემთხვევაში თითოეულის შემოსავალი არ უნდა აღემატებოდეს საარსებო მინიმუმის ორმაგ ოდენობას.
საზღვრის კვეთის 24 საათზე ნაკლები დროის შემთხვევაში კონკრეტულ პირს ან ოჯახის წევრს დამატებით ეძლევა დასაშვები კვეთის ოდენობა არაუმეტეს სამოცისა.
დადგენილებას ასევე ემატება გარემოებები, რომელთა შემთხვევაშიც ოჯახს ან სტატუსის მაძიებელ პირს რიგითობის განსაზღვრის მიზნით ენიჭება ქულები.
კერძოდ, ოჯახი, რომლის სარეიტინგო ქულა სოციალურად დაუცველი ოჯახების შეფასების სისტემის საფუძველზე არის 65 001-მდე – შეფასდება 1 ქულით, ოჯახის ერთი წევრის რეგისტრაცია ბათუმში 10 და მეტი წლის განმავლობაში – ასევე, 1 ქულით.
ბათუმში უსახლკაროდ რეგისტრაციის წესი მერიამ 2022 წელს შეიმუშავა, შემდეგ კი საკრებულომ დაამტკიცა. უსახლკაროთა რეგისტრაციის მოქმედი წესის მიხედვით, ბათუმში უსახლკაროს სტატუსით შეიძლება დარეგისტრირდეს პირი ან ოჯახი, რომელიც უწყვეტად ბოლო ორი წლის განმავლობაში არის საქართველოს მოქალაქე და რეგისტრირებულია ბათუმის მუნიციპალიტეტის ტერიტორიაზე.
მერიამ უსახლკაროთა რეგისტრაციის წესში ცვლილება გასულ წელსაც შეიტანა. მაშინ შეცვალეს ჩანაწერი ქირით ცხოვრების ვადის თაობაზე. მანამდე განმცხადებელს ბათუმში ქირით მინიმუმ 6 თვით უწყვეტად ცხოვრების ცნობა უნდა წარედგინა კომისიისთვის და ეს ვადა ერთ წლამდე გაზარდეს. ასევე, მოთხოვნებიდან ამოიღეს ჩანაწერი „ოჯახური დასაბუთება“. მერიაში მიიჩნიეს, რომ ეს სუბიექტური და არარელევანტური იყო.
განაცხადებს ბათუმში უსახლკარო პირად რეგისტრაციასთან დაკავშირებით, განიხილავს კომისია და რეკომენდაციას გაუწევს ან არ გაუწევს განმცხადებლის უსახლკარო პირად რეგისტრაციის თაობაზე. კომისიის რეკომენდაციის საფუძველზე გადაწყვეტილებას იღებს ბათუმის მერი.
უსახლკაროთა რეგისტრაციის ამ დრომდე მოქმედ წესს იწუნებდნენ როგორც უსახლკაროები, რომლებმაც თავშესაფრის მოთხოვნით მერიასთან არაერთი აქცია გამართეს, ასევე საკრებულოს ოპოზიციაც. სხდომებზე ოპოზიციის ფრაქციის თავმჯდომარემ, ნოდარ დუმბაძემ, არაერთხელ დააფიქსირა, რომ იმ წესით, რაც მერიამ წარუდგინა საკრებულოს და „ოცნების“ უმრავლესობამ ის 2022 წელს დაამტკიცა, ბევრი მოქალაქე ვერ შეძლებდა სარგებლობას.
გასულ წელს კი ერთ-ერთ სხდომაზე, როცა უსახლკაროთა რეგისტრაციის წესში ცვლილება შეიტანეს, ეს დადასტურდა კიდეც – მიუხედავად იმისა, რომ ქალაქში თავშესაფრის მოთხოვნით აქციებს 3000 – მდე პირი მართავს, დარეგისტრირება მათგან მხოლოდ 14-მა შეძლო.
