7 წლის პატიმრობა სასამართლომ მიუსაჯა, მაგალითად, კაცს, რომელმაც ქორწინების რამეს ცოლს რამდენჯერმე სასტიკად, გონების დაკარგვამდე სცემა, სექსუალურად იძალადა და ფსიქოლოგიური ტერორი მოუწყო.
ამ საქმეში ნახავთ, რეალურად რა შემთხვევებში გამოიყენება ისეთი მკაცრი სასჯელი, როგორიცაა 7 წლამდე თავისუფლების აღკვეთა – რაც მზია ამაღლობელს ელოდება, სილის ერთჯერადი გაწვნისთვის და რასაც ექსპერტიზის დასკვნით არავითარი ზიანი არ მოჰყოლია.
სასტიკი ძალადობის ამბავი, როცა გოგოს გონების დაკარგვამდე არაერთხელ სცემეს, მასზე სექსუალურად იძალადეს, დაამცირეს, აგინეს… ამ შემთხვევაში სასამართლომ დამნაშავე კაცი 7 წლით დააპატიმრა.
7 წლით თავისუფლების აღკვეთა შეუფარდა დავით ჟ.-ს ზუგდიდის სასამართლომ. მას გამოძიება ედავებოდა ოჯახის წევრზე სექსუალურ ძალადობას – სექსუალურ კონტაქტს გაუკუღმართებული ფორმით, ასევე ცემას და სხვაგვარ ძალადობას, რამაც დაზარალებულის ფიზიკური ან ფსიქიკური ტანჯვა გამოიწვია.
ამ საქმეში დაზარალებული ქალის ჩვენების გარდა ექსპერტიზის დასკვნაა, რომლის მიხედვითაც მარიამს „ქალა ტვინის დახურული ტრავმა აღენიშნება, თავის ტვინის შერყევა, სახის მიდამოს რბილი ქსოვილების დაჟეჟილობა, მარცხენა თვალის სუბკონიუქტივალური სისხლჩაქცევა, ცხვირის ძვლების ტრავმა დაცილების გარეშე.“
ამბავი მაშინ დაიწყო, როდესაც მარიამ ხ. დავითზე დაქორწინდა [სახელები შეცვლილია].
ძალადობის ამსახველ ამონარიდს საქმის მასალებიდან გთავაზობთ დეტალურად, რათა გავიაზროთ სასჯელის პროპორციულობა, რითაც მზია ამაღლობელს უპირებენ დასჯას სილის გაწნისთვის.
„…21 თებერვალს, ღამით, დავით ჟ-ს ვარაუდით, მარიამ ხ. არ აღმოჩნდა ქალიშვილი, რის გამოც დავით ჟ. გაბრაზდა და რამდენჯერმე დაარტყა ხელი მარიამ ხ-ს თავისა და სახის არეში, ასევე მიარტყმევინა თავი ლოგინის თავზე, რითაც მიაყენა ძლიერი ფიზიკური ტკივილი, ამავე დროს ლანძღავდა უწმაწური სიტყვებით და ამცირებდა მას, ყელში უჭერდა ხელს და ეუბნებოდა ეთქვა, ვისთან დაკარგა ქალიშვილობა, რის გამოც შეშინებულმა მარიამ ხ-მ, რადგან გრძნობდა, რომ იხრჩობოდა, დავით ჟ-ს ძალადობის შეწყვეტის მიზნით უთხრა ტყუილი, თითქოს ბავშვობაში „რაღაც მოუვიდა“, რის შემდეგაც დავით ჟ.-მ გაუშვა ხელი და მოგვიანებით აიძულა, არ დაწოლილიყო მის გვერდით საწოლში და მდგარიყო კუთხეში, რაზეც შეშინებული მარიამ ხ-ა დაემორჩილა და დილამდე იდგა ფეხზე. მას არ დაუძინია, ხოლო დავით ჟ-მ დაიძინა,“ – აღნიშნულია განჩინებაში.
კაცს ძალადობა მეორე დღესაც გაუგრძელებია. მეორე დღეს დავით ქალზე სექსუალურადაც უძალადია:
„…დილით, დავით ჟ-მ გააგრძელა მარიამ ხ-ს ცემა, რა დროსაც დაარტყა ხელი სახეში და მიარტყმევინა თავი ლოგინზე, თან აგინებდა და ლანძღავდა. ფიზიკური ძალადობის და დამცირების შემდეგ დავით ჟ-მ მოსთხოვა მარიამ ხ-ს მუხლებზე დადგომა, დაუკავა ორივე ხელი, რის შემდეგაც, მიუხედავად მ. ხ-ს წინააღმდეგობისა დააწვინა იგი მუცელზე და მისი თხოვნის და წინააღმდეგობის მიუხედავად, იძულებით, გაუკუღმართებული ფორმით უკანა ტანიდან დაამყარა მასთან სექსუალური კონტაქტი, რა დროსაც მარიამ ხ-მ განიცადა ძლიერი ფიზიკური ტკივილი.
დავით ჟ-ი აგრძელებდა მარიამ ხ-ს ცემას, დაარტყა მას ხელი სახეში, მიუხედავად იმისა, რომ მარიამ ხ-ს მისთვის წინააღმდეგობის გაწევა აღარ შეეძლო და სთხოვდა შეეწყვიტა ძალადობა და არ ეცემა. დავით ჟ-მ მოსთხოვა მარიამ ხ-ს მუხლებზე დამდგარიყო, რაც ვერ შეძლო და წაიქცა, რა დროსაც დავით ჟ-მ დაარტყა თავში, რითაც მარიამ ხ-მ განიცადა ფიზიკური ტკივილი, რის შემდეგაც ჩვეულებრივი გზით, მარიამ ხ-ს სურვილის წინააღმდეგ, დაამყარა მასთან სქესობრივი კავშირი,“ – აღნიშნულია განჩინებაში.
ამ სისასტიკის შემდეგ დავითს მარიამისთვის მოუთხოვია, დაზიანებების დასაფარად მაკიაჟი გაეკეთებინა – მეზობლები მოვიდნენ და სუფრა უნდა გაიშალოსო. როცა სტუმრები ქეიფობდნენ, დავითმა ისევ გაიყვანა სახლის უკან მარიამი და სახეში დაარტყა ხელი. ქალს ცხვირიდან სისხლის წამოუვიდა. სტუმრების წასვლის შემდეგ კი, მარიამს ქმარმა თავში ჩაარტყა.
ქალმა გონება დაკარგა და იატაკზე დაეცა. ამ დროს ჩნდება ბიჭის დედა და სხვა პირები. დავითმა მოსულიერებული ქალის ცემა განაგრძო. მარიამი თავის დას და დეიდას გადაუყვანიათ საავადმყოფოში.
საქმის მასალებით ირკვევა, რომ მარიამს თავდაპირველად სიმართლის თქმა გასჭირვებია, იმ დღეს ექსპერტიზაც ვერ ჩატარდა, მაგრამ 3 დღის შემდეგ ქალმა გადაწყვიტა, რომ ყველაფერი უნდა ეთქვა.
„…რცხვენოდა, რომ ხალხის დასაცინი გახდებოდა… რამდენიმე დღე შეუძლოდ გრძნობდა თავს, ჰქონდა ტვინის შერყევა და მისი ჯანმრთელობის მდგომარეობიდან გამომდინარე, იმ დღესვე ვერ შეძლო ექსპერტიზის ჩატარება. როგორც კი ცოტა გამოკეთდა, კერძოდ, 3 დღის შემდეგ იგი წაიყვანეს ექსპერტიზის ჩასატარებლად ქუთაისში, სადაც ჩაუტარდა ექსპერტიზა. შემდეგ მარიამმა მიმართა ადვოკატს, ასევე მივიდა ფსიქოლოგთან, რის შედეგადაც გადაწყვიტა, რომ გამომძიებლისათვის ყველაფერი უნდა გაემხილა,“ – ვკითხულობთ განჩინებაში [საქმე №487აპ-16].
სასტიკ დანაშაულში ბრალდებულ დავით ხ-ს უზენაესმა სასამართლომ სსკ-ის 138-ე მუხლის 1-ლი ნაწილით [სექსუალური ხასიათის სხვაგვარი ქმედება, რომელიც არ შეიცავს ამ კოდექსის 137-ე მუხლით – გაუპატიურება – გათვალისწინებული დანაშაულის ნიშნებს, ჩადენილი ძალადობით, ძალადობის მუქარით ან დაზარალებულის უმწეობის გამოყენებით] 7 წლით თავისუფლების აღკვეთა მიუსაჯა. 4-დან 7 წლამდე თავისუფლების აღკვეთას უპირებენ მზია ამაღლობელს, რომელმაც პოლიციელ დგებუაძეს სილა გააწნა.
