ახალი მონაცემები რუსეთის და უკრაინის სამხედრო დანაკარგებზე ომში – 1 ივლისი

უკრაინის შეიარაღებული ძალების გენერალური შტაბის დღევანდელი მონაცემებით, ომის დაწყებიდან 2025 წლის 1-ელ ივლისამდე პერიოდში, რუსეთის არმიის საბრძოლო დანაკარგი არის:

  • ცოცხალი ძალა – დაახლოებით 1 020 980 ადამიანი [გასულ დღე-ღამეში +970]
  • ტანკი – 10 983 ერთეული [+3]
  • ჯავშანტექნიკა – 22 928 ერთეული [+6]
  • საარტილერიო სისტემა – 29 754 ერთეული [+36]
  • MLRS – 1 427 ერთეული [+0]
  • საზენიტო საბრძოლო სისტემა – 1 190 ერთეული [+0]
  • თვითმფრინავი – 420 ერთეული [+0]
  • ვერტმფრენი – 340 ერთეული [+0]
  • უპილოტო საფრენი აპარატის ოპერატიულ-ტაქტიკური დონე – 42 940 ერთეული [+144]
  • ფრთოსანი რაკეტა [ჩამოაგდეს] – 3 436 ერთეული [+0]
  • გემი/ნავი – 28 ერთეული [+0]
  • წყალქვეშა ნავი – 1 ერთეული [+0]
  • მანქანები და საწვავის ავზები – 53 696 ერთეული [+103]
  • სპეცტექნიკა – 3 921 ერთეული [+0]

უკრაინის გენერალური შტაბის განცხადებით, საომარი მოქმედებების მაღალი ინტენსივობის გამო მონაცემები იცვლება.

უკრაინის სამხედრო დანაკარგებზე ინფორმაცია განაახლა რუსეთმაც.

რუსეთის თავდაცვის სამინისტროს მიერ გავრცელებული მონაცემებით, ომის დაწყებიდან 2025 წლის 1-ელ ივლისამდე პერიოდში სულ განადგურებულია უკრაინის:

  • 663 თვითმფრინავი
  • 283 ვერტმფრენი
  • 66 477 უპილოტო საფრენი აპარატი
  • 612 საზენიტო სარაკეტო სისტემა
  • 24 101 ტანკი და სხვა ჯავშანტექნიკა
  • 1 573 მრავალჯერადი სარაკეტო გამშვები
  • 26 812 საველე არტილერია და ნაღმმტყორცნი
  • 37 524 სპეციალური სამხედრო მანქანა

რუსეთის თავდაცვა, ამ მონაცემებთან ერთად, უკრაინის არმიის ცოცხალი ძალის დანაკარგების შესახებ სტატისტიკას არ აქვეყნებს.

ეს ის მონაცემებია, რომელსაც უკრაინა და რუსეთი ოფიციალურად ავრცელებენ, თუმცა ომის პირობებში შეუძლებელია ზუსტად გადამოწმება, რამდენად შეესაბამება მხარეების მიერ გავრცელებული ინფორმაცია დანაკარგების შესახებ რეალურ რიცხვებს.

—

რუსეთი უკრაინაში 2022 წლის 24 თებერვალს გამთენიისას შეიჭრა და სრულმასშტაბიანი ომი დაიწყო.

 

 

 

 

მთავარი ფოტო: უკრაინის გენშტაბი/facebook

ტელეკომპანია „თრიალეთი“ აცხადებს, რომ „ოცნება“ მათ დახურვას აპირებს – კომპანიას ინკასო დაადეს

რეგიონული ტელეკომპანია „თრიალეთი“ აცხადებს, რომ შემოსავლების სამსახურმა ტელეკომპანიას ინკასო დაადო და მედიას დახურვა ემუქრება.

განცხადებას ტელეკომპანია ფეისბუქზე ავრცელებს.

„ქართული ოცნება“ თრიალეთის დახურვას აპირებს!

დღეს, 30 ივნისს, ტელეკომპანია „თრიალეთის“ ანგარიშებს, შემოსავლების სამსახურმა, 10-15 წლის წინანდელი, გაყინული დავალიანების გამო, ინკასო დაადო.

ინკასოს დადება ნიშნავს, რომ ისედაც ფინანსურ კრიზისში მყოფი ტელეკომპანია, ვეღარ გადაიხდის ელექტროენერგიის, ინტერნეტის, სიგნალის გავრცელების თანხას, ვეღარ გასცემს ხელფასებს და შედეგად, ტელევიზია და რადიო გაუქმდება.

ივნისის თვეში, ტელეკომპანია „თრიალეთის“ გადაცემებში, რამდენჯერმე გაშუქდა, საქართველოს სუსის უფროსის ანრი ოხანაშვილის მიერ, კლასელის და მეჯვარის, კოტე ბუზალაძის, გორის მერის მოვალეობის შემსრულებლად დანიშვნა. „თრიალეთის“ თოქ-შოუს სტუმარმა, კახა კუკავამ, გააკრიტიკა პრემიერ მინისტრი ირაკლი კობახიძე, თეა წულუკიანი და სხვები.

აღნიშნულის შემდეგ, შიდა ქართლის ხელისუფლების წარმომადგენლებს, სავარაუდოდ სუს-ის დავალებით, აეკრძალათ „თრიალეთის“ ეთერში სტუმრობა და ჟურნალისტებისთვის ინტერვიუს მიცემა!
ამავე დროს, შურისძიების მიზნით, სავარაუდოდ კობახიძის და ოხანაშვილის დავალებით, მოხდა „თრიალეთის“ ანგარიშებზე ინკასოს დადება!

ტელეკომპანია „თრიალეთის“ დავალიანების დაგროვების უპირველესი მიზეზი იყო, წინა ხელისუფლების ბრძოლა ტელეკომპანიის მიმართ. ზეწოლები განსაკუთრებით გააქტიურდა, როდესაც „თრიალეთი“, გარკვეული რისკების ფონზე, პირველი დაუდგა მხარში ბიძინა ივანიშვილს და „ქართულ ოცნებას“.

მიუხედავად მხარში დადგომისა, „თრიალეთის“ წინააღმდეგ ბრძოლა გააგრძელა, “ქართული ოცნების” პირველმა გუბერნატორმა შიდა ქართლში, რომელმაც ორ წელზე მეტი თანამდებობაზე ყოფნა, მხოლოდ „თრიალეთის“ წინააღმდეგ ბრძოლას შეალია.

შემდეგ წლებში, „ქართული ოცნების“ ხელისუფლებიდან, „თრიალეთს“ ებრძოდა ბევრი ის ადამიანი, „ნაციონალების“ ხელისუფლებაში „თრიალეთს“ რომ მტრობდნენ.

კომპანიის მძიმე პერიოდი იყო ციფრულ მაუწყებლობაზე გადასვლა, რამაც გამოიწვია კომპანიაში არსებული ტექნიკის მთლიანად ჩამოწერა და ციფრული აპარატურით ჩანაცვლება, რის გამოც, კომპანიას მოუწია აეღო დიდი ოდენობის ბანკის სესხი, რომლის დაფარვის პერიოდში, მოხდა ლარის კურსის დაცემა, რამაც „თრიალეთს“ შეუქმნა კიდევ უფრო დიდი ფინანსური კრიზისი.

კრიზისიდან გამომდინარე, „თრიალეთი“ გაჭირვებით იხდიდა იმ აუცილებელ გადასახადებს, რომლის გარეშეც შეუძლებელი იყო ტელევიზიის ფუნქციონირება და ხშირ შემთხვევაში, ბიუჯეტის თანხებს სრულად ვერ ფარავდა.

კომპანია თანხას ვერ იხდიდა, თუმცა არც არავინ სთხოვდა დავალიანების გადახდას, მაგრამ, ამავე დროს, დავალიანების თანხას, ყოველდღიურად არიცხავდნენ საურავს, რის გამოც, საურავის ოდენობამ, დავალიანების ძირის თანხას გადაუსწრო.

„თრიალეთმა“, წლების მანძილზე, მრავალჯერ მიმართა ხელისუფლებას, კანონის შესაბამისად, მოეხდინათ ვალის რესტრუქტურიზაცია, ან გაეფორმებინათ საგადასახადო შეთანხმება, რაც მრავალი კომპანიის მიმართ, ათეულობით მილიონიან თანხებზე ხორციელდებოდა, თუმცა, „თრიალეთს“ ყოველთვის უარით პასუხობდნენ.

„თრიალეთს“ არ უკეთებდნენ ვალის რესტრუქტურიზაციას, გადახდის ვადის გაწელვას, თუმცა, არც არავინ სთხოვდა გადახდას, მაგრამ, ყოველდღიური საურავების დარიცხვით, ზრდიდნენ დავალიანებას, სავარაუდოდ, ზუსტად ამ დროისთვის, ტელევიზიაზე ზეწოლის განსახორციელებლად!

აი, ასეთი სცენარით, ხელოვნურად, აუქმებენ იმ ტელევიზიას, რომელიც პირველი და რეგიონებიდან ერთადერთი იყო, რომელიც ბიძინა ივანიშვილს, ხელისუფლებაში მოსვლისას დაუდგა მხარში!რომელმაც, „ქართული ოცნების“ ხელისუფლებაში მოსვლას შეუწყო ხელი და დღეს, იმ ხელისუფლების მიერ იხურება, რომლის მხარდამჭერი იყო წლების განმავლობაში!

აუქმებენ საქართველოში, ყველაზე ძველ კერძო ტელევიზიას. ტელევიზიას, რომელიც 1990 წლიდან მუშაობს და ზუსტად ახლა შეუსრულდა 35 წლის იუბილე.

ტელევიზია, რომელმაც მრავალი ზეწოლები, მრავალი მთავრობა, მრავალი ომი გამოიარა და ყველაფერს გაუძლო და დღეს, „ქართული ოცნების“ მიერ იხურება!

აუქმებენ იმ ტელევიზიას, რომლის წილის 10 პროცენტსაც ბიძინა ივანიშვილის კომპანია ფლობს და სავარაუდოდ, ეს კომპანია გადაიბარებს დანარჩენ პროცენტებსაც!“ – წერია განცხადებაში.

ტელეკომპანია „თრიალეთი“ უწყვეტად მაუწყებლობს 1990 წლიდან. ტელეკომპანიის მაუწყებლობა ვრცელდება თბილისის და საქართველოს სხვადასხვა რაიონის საკაბელო ტელევიზიებში და ასევე, Silk TV-ის, “მაგთი TV “-ის, “ახალი ქსელების”, MAR-TV-ის, “Global TV”-ის ქსელში.

„თრიალეთის“ მაუწყებლობა ღია საეთერო სიხშირეზე ვრცელდება შიდა ქართლის რეგიონში, კერძოდ, გორის, ქარელის, ხაშურის, კასპის, ცხინვალის და ახალგორის რაიონებში.

„ხვალ ეთერში იქნება ბოლო საინფორმაციო გამოშვებები“ – „ჰერეთი“ გადაცემებს აჩერებს ინკასოს გამო

მედიაჰოლდინგ „ჰერეთის“ მფლობელი, რამაზ სამხარაძე ფეისბუქზე წერს, რომ „ჰერეთის“ ანგარიშებისა და ქონების დაყადაღების შემდეგ იძულებულია სამსახურიდან დაითხოვოს თანამშრომლების დიდი ნაწილი და შეაჩეროს გადაცემები და საინფორმაციო გამოშვებები.

„ჰერეთი“ აერთიანებს სამ დამოუკიდებელ რადიოსადგურს — რადიო თბილისს (FM93.5), რადიო ჰერეთს (FM102.8 – კახეთი) და რადიო ციტრუსს (FM97.3 – აჭარა).

„მეგობრებო, მიმძიმს ამ სიტყვების დაწერა, თუმცა, დღეს 27 წლის მანძილზე, პირველად, დავითხოვეთ თანამშრომელთა დიდი ნაწილი.

ცალკე მადლობა მათ პროფესიონალიზმისა და თავდადებისთვის.

ხვალიდან, 1-ელი ივლისიდან, მედიაჰოლდინგი „ჰერეთი“ შექმნილი მძიმე ფინანსური კრიზისის ფონზე დროებით აჩერებს გადაცემების და საინფორმაციო გამოშვებების სრულ მაუწყებლობას. ხვალ ეთერში იქნება ბოლო საინფორმაციო გამოშვებები.

რადიო „თბილისი“ FM93.5 კანონით განსაზღვრულ ვადაში – 20 აგვისტოს ჩათვლით – ეთერში რჩება, თუმცა მხოლოდ ტექნიკური მაუწყებლობის რეჟიმში. (ზუსტად არც ის ვიცი, რას გადაწყვეტს საბოლოოდ კომუნიკაციების კომისია, თუმცა ძალიან პასუხისმგებლობით ეკიდებიან ჩვენს თემას).

ამ ეტაპზე საინფორმაციო და გადაცემების ბადე შეჩერებულია და დიდი იმედი მაქვს, განახლდება სექტემბერში, იმ შემთხვევაში, თუ მოხერხდება კრიზისის განმუხტვა.

ჩვენი გუნდი აქტიურად იმყოფება კონსულტაციის რეჟიმში ფინანსთა სამინისტროს, შემოსავლების სამსახურსა და კომუნიკაციების ეროვნულ კომისიასთან, რათა სამაუწყებლო კომპანიისთვის შექმნილი იყოს ოპერირების ხელშესახები პირობები.

თქვენს მხარდაჭერას, თითოეულ ლარს რეალურად მივყავართ მიზნისკენ – რომელიც მოგცემს კომპანიის საბანკო ინკასოს გაუქმებას და მაუწყებლობის სრული აღდგენის შესაძლებლობას.

FM93.5, FM102.8 და FM97.3 ეთერში კვლავ 24-საათიან რეჟიმში რჩება.

სამუშაო რეჟიმში აგრძელებს ფუნქციონირებას რადიო თბილისის ფეისბუქის და ტელეგრამ გვერდი, სადაც რეგულარულად მოგაწვდით ყველა მთავარ ინფორმაციას“ – წერს რამაზ სამხარაძე ფეისბუქზე.

ამავე დროს, რამაზ სამხარაძე წერს, რომ აგრძელებენ შემოწირულების კამპანიას, რომელიც ორგანიზაციის გადარჩენას ემსახურება.

„თანხის ჩარიცხვა შეგიძლიათ ნებისმიერი ბანკიდან (ლარი, ევრო, დოლარი):

საქართველოს ბანკი
ანგარიშის ნომერი: GE18BG0000000343819702
მიმღები: სამაუწყებლო კომპანია ჰერეთი
დანიშნულება: შემოწირულობა

საზღვარგარეთ მყოფებისთვის:
PayPal: samkharadzeramaz@gmail.com

ეს არ არის მხოლოდ ერთი კომპანიის ბრძოლა — ეს არის მედიის თავისუფლების, პასუხისმგებლობის და ქვეყნის მომავლის ერთობლივი დაცვა.

იმედი გვაქვს, ყველაფერი კარგად იქნება — რადიო იწყება ჩვენით. მადლობა თითოეულ თქვენგანს გვერდში დგომისა და მხარდაჭერისთვის“ – წერს რამაზ სამხარაძე.

იმის შესახებ, რომ მედიაჰოლდინგ „ჰერეთის“ ანგარიშები და ქონება დააყადაღეს, რამაზ სამხარაძემ 25 ივნისს განაცხადა.

როგორც მან სატელევიზიო ეთერებში აღნიშნა, ბრძანება შემოსავლების სამსახურმა გასცა და ამის მიზეზად ფინანსური პრობლემების გამო დაგროვებული დავალიანება დაასახელა. აღნიშნული ფაქტი კრიტიკული მედიის დახურვისკენაა მიმართული.

ფოტოზე: რამაზ სამხარაძე

ამავე თემაზე: 

რამაზ სამხარაძის თქმით, “რადიო თბილისის” მთელი ქონება დააყადაღეს

გონიოს ყოფილი პოლიგონის გასანაღმად 1,1 მლნ დოლარის ტექნიკას უტენდეროდ იყიდიან

გონიოს ყოფილი პოლიგონის განაღმვის სამუშაოებში თავდაცვის სამინისტროსთან ერთად ცენტრი „დელტა“ ჩაერთვება. საჭირო სპეცტექნიკას კი „დელტა“ ჯამში 1 184 720 აშშ დოლარად, ტენდერის გარეშე შეისყიდის.

„ოცნების“ მთავრობა ყოფილი პოლიგონის ტერიტორიას საინვესტიციოდ არაბულ კომპანიას უმზადებს.

„საქართველოს თავდაცვის სამინისტროს მიერ განაღმვითი სამუშაოების წარმოებისთვის საჭირო შეჯავშნული საინჟინრო ტექნიკის დასამზადებლად „დელტას“ ესაჭიროება მუხლუხა ბულდოზერი, CAT D6R2 – 1 ცალი, მუხლუხა ექსკავატორი CAT 323 – 3 ცალი, ბორბლებიანი დამტვირთველი SEM 655D – 3 ცალი და გრუნტის სატკეპნი SEM 520D – 1 ცალი“ – წერს „დელტა“.

„დელტა“ ასევე წერს, რომ „ჰუმანიტარული განაღმვითი საქმიანობის განხორციელების უზრუნველყოფა, ასევე საქართველოს ტერიტორიაზე ყველა სახის ნაღმებსა და ფეთქებად საბრძოლო ნარჩენებზე ჩატარებული სამუშაოების კოორდინაცია“ მათი ერთ-ერთი მთავარი ამოცანაა.

„აღნიშნულ პროექტში მონაწილეობს ორი მხარე: საქართველოს თავდაცვის სამინისტრო და სახელმწიფო სამხედრო სამეცნიერო-ტექნიკური ცენტრი „დელტა“.

2025 წლის 26 ივნისს გამოიცა თავდაცვის მინისტრის ბრძანება „აფეთქებასაშიში საგნებისგან გაწმენდითი სამუშაოების ჩატარების შესახებ“, რომლის ფარგლებშიც გონიოს ყოფილ სამხედრო პოლიგონის ტერიტორიაზე უნდა გაგრძელდეს აფეთქებასაშიში საგნებისგან გაწმენდითი სამუშაოები. „დელტას“ დაევალა სამუშოების მხარდაჭერა და შესაბამისი ტექნიკით მომზადება/გამართვის სამუშაოების უზრუნველყოფა.

შემოთავაზებული ტექნიკის მიწოდების ვადად განსაზღვრულია 7 კალენდარული დღე, რაც კრიტიკულად მნიშვნელოვანია აღნიშნული პროექტის მოკლე ვადებში განხორციელებისთვის.

აღსანიშნავია ისიც, რომ შესყიდვა აჭარბებს სახელმწიფო შესყიდვების სფეროში მოქმედი ევროკავშირის დირექტივებით დადგენილ მონეტარულ ზღვრებს და სატენდერო განცხადებისა და სატენდერო დოკუმენტაციის გასაცნობად, აგრეთვე სატენდერო წინადადების წარსადგენად უნდა განისაზღვროს არანაკლებ 30 დღე.

აქედან გამომდინარე, შესყიდვის ელექტრონული პროცედურებით განსაზღვრული ვადები შეუძლებელს ხდის პროექტის დადგენილ ვადებში შესრულებას და საფრთხე ექმნება სახელმწიფოებრივი და საზოგადოებრივი მნიშვნელობის ღონისძიების შეზღუდულ ვადებში შეუფერხებლად ჩატარებას“ – ასე განმარტავს „დელტა“ ტექნიკის უტენდეროდ შესყიდვის აუცილებლობას.

თავდაცვის სამინისტროს ინფორმაციით კი, გონიოს ყოფილ პოლიგონზე „2016 წლიდან 2021 წლამდე შესაბამისი განაღმვითი სამუშაოები მიმდინარეობდა თავდაცვის ძალების მეთაურის ბრძანებების საფუძველზე. ამჟამად კი, სამუშაოების გასაგრძელებლად საჭირო გახდა „დელტას“ ჩართულობა…“:

საქართველოს თავდაცვის მინისტრის 2025 წლის 26 ივნისის ბრძანებიდან

გონიოს ყოფილი პოლიგონის 2 773 459 კვადრატული მეტრი ტერიტორია [მიმდებარე პლაჟის ჩათვლით] აჭარის ავტონომიური რესპუბლიკის საკუთრებაშია, საიდანაც 61 017 კვადრატული მეტრი შინაგან საქმეთა სამინისტროზეა გადაცემული სარგებლობაში [შსს-ს მომსახურების სააგენტო აქ ახალი ოფისის და საგამოცდო მოედნის მშენებლობას გეგმავს].

ყოფილი პოლიგონის ტერიტორიებზე არსებული შენობა-ნაგებობები კი, თავდაცვის სამინისტროს ინფორმაციით, მათ ბალანსზე ირიცხება.

„ოცნების“ მთავრობამ ინვესტორი გონიოს გაუნაღმავ ტერიტორიაზე 9 წლის წინაც მიიყვანა.

ამ თემაზე ნახეთ: ინვესტორი დანაღმულ ზღვისპირეთში – რა ელის გონიოს ყოფილ პოლიგონს.

მიუხედავად იმისა, რომ ტერიტორიის განვითარების რეალური გეგმა არ არსებობდა [არც დღეს არსებობს], 2021 წელს, წინასაარჩევნოდ, მაშინდელმა პრემიერმა ღარიბაშვილმა დააანონსა, რომ „გონიოში აშენდებოდა ახალი ქალაქი თავისი კაზინოებით და ბანკებით“.  რა მოუვიდა ამ დაპირებას, წაიკითხეთ ამ ბმულზე.

„ქართული ოცნების“ ახლანდელი მთავრობის განცხადებით კი, გონიოს ყოფილ პოლიგონსა და კრწანისის პარკში 6 მილიარდი დოლარის მოცულობის ინვესტიციის განხორციელებას არაბთა გაერთიანებული საამიროების დეველოპერული და საინვესტიციო კომპანია Eagle Hills გეგმავს.

ყოფილ პოლიგონზე აღნიშნული „ინვესტიციის განხორციელებას“ კი ხელს არა მარტო „აფეთქებასაშიში საგნები“, არამედ „ზურმუხტის ქსელიც“ უშლის. „ოცნება“ ამ ქსელის საზღვრების კორექტირებასაც გეგმავს.

ამ თემაზე ვრცლად:

ბობოყვათის რეზიდენცია საპატრიარქოს და დაცვის გარეშე დარჩენილი არქეოლოგიური ძეგლები

რატომ არ შეიძლება პატიმარს ჯინსი ეცვას? – „დისიდენტობასთან დაკავშირებული სიმბოლოა“

„დისიდენტობასთან არის დაკავშირებული და თავისუფლების სიმბოლოა. სხვაგვარად არ ვიცი, რატომ შეიძლება იყოს აკრძალული ჯინსი,“ – ამბობს ყოფილი ომბუდსმენი უჩა ნანუაშვილი, რომელსაც ვკითხეთ: როცა აკრძალული ნივთების ჩამონათვალში არაა, მაგალითად, ჯინსის ტანსაცმელი, მაგრამ ამას მაინც კრძალავს ციხის ადმინისტრაცია, ეს რას აჩვენებს, რასთან გვაქვს საქმე?

უჩა ნანუაშვილის დაკვირვებით, რეპრესიული რეჟიმის პირობები აისახება ციხეზეც, სადაც კანონი კი არაა გადაწყვეტილებების მიღების საფუძველი, არამედ ძალის დემონსტრირება და დაშინება.

„ციხეში პირობების გამკაცრებაც უფრო მეტად რეპრესიული რეჟიმების დროს ხდება. მაქსიმალურად იღებენ თვითნებურ გადაწყვეტილებებს: პატიმრებს ეუბნებიან, ჩვენზე ხართ დამოკიდებული, რასაც გვინდა, იმის უფლებას მოგცემთ, რა წიგნს წაიკითხავთ, ან რა ნივთს მიიღებთ, ამასაც ჩვენ განვსაზღვრავთ“, – გვიყვება უჩა ნანუაშვილი.

„ბათუმელები“ ამ თემაზე უჩა ნანუაშვილს ესაუბრა. ის ყოფილი სახალხო დამცველია და „დემოკრატიის კვლევის ინსტიტუტის“ ხელმძღვანელი.

  • ბატონო უჩა, რა დასაბუთებით არ შეუძლია პატიმარს ჯინსის ტანსაცმელი ეცვას? როგორ მუშავდება მსგავსი აკრძალვები, რა პრაქტიკა გვაქვს? 

ცალკეული დებულებებით არის განსაზღვრული აკრძალული ნივთების კონკრეტული ჩამონათვალი, რომელსაც მინისტრი გამოსცემს, პატიმრობის კოდექსში მსგავსი მითითება არ არის – რა სახის ტანსაცმელია ნებადართული.

ამ დებულებებში არანაირი ჩანაწერი არ არის, რომ მაინცადამაინც ჯინსის ტანსაცმელი არ შეიძლება. არ მახსოვს, ადრე იყო თუ არა რაიმე ჩანაწერი, მაგრამ გარკვეული პერიოდი მახსოვს, რომ ჩვეულებრივად შეიძლებოდა ჯინსის ტარება სასჯელაღსრულების დაწესებულებაში. შემდეგ ვიღაცამ ჩათვალა, რომ აღარ უნდა ყოფილიყო ჯინსი ხელმისაწვდომი. მიიჩნევა, რომ ჯინსი საბჭოთა კავშირის დროს აკრძალული ტანსაცმელია.

  • როგორც თავისუფლების სიმბოლო? 

დიახ, როგორც დისიდენტობასთან დაკავშირებული და თავისუფლების სიმბოლო. სხვაგვარად არ ვიცი, რატომ შეიძლება იყოს აკრძალული ჯინსი.

  • თუ არ არის პატიმრებისთვის აკრძალული ნივთების სიაში, რა დასაბუთებით უზღუდავენ პატიმარს ჯინსების ტარებას? 

თუ დაწესებულების ადმინისტრაცია ბრალდებულს ან მსჯავრდებულს უარს ეუბნება ჯინსის ტანსაცმელზე, ეს უარი უნდა იყოს დასაბუთებული. იქ არის მითითება უსაფრთხოების რისკებსა და იმაზე, რომ დაწესებულების ნორმალურად ფუნქციონირებას არ უნდა შეეშალოს ხელი. ადმინისტრაციამ უნდა დაასაბუთოს, როგორ ხედავს უსაფრთხოების რისკს.

წინააღმდეგ შემთხვევაში ეს შეზღუდვა არის კანონის დარღვევა, რომელიც უნდა გასაჩივრდეს შიდა მექანიზმებით. ასევე, სახალხო დამცველის ჩართვა აუცილებელია. ბევრი მექანიზმის გამოყენება შეიძლება, რომელიც ფორმალურად თუ არაფორმალურად არსებობს.

დებულებები დეტალურად განსაზღვრავს იმ ნივთებს, რომელთა შეტანაც დაწესებულებაში აკრძალულია. არსებობს გამონაკლისები, მაგალითად, როცა კონკრეტული ნივთი სჭირდება ბრალდებულს ან მსჯავრდებულს სარეაბილიტაციო პროგრამისთვის, ამ შემთხვევაშიც შესაძლებელია ადმინისტრაციამ დაუშვას ამ საჭირო ნივთის შეტანა.

როცა დეტალურადაა განსაზღვრული რის შეტანა არ შეიძლება, გაუგებარია, ეს შეზღუდვა საიდან მოდის.

უჩა ნანუაშვილი

ზოგადად, ბოლო წლებში ბევრი რამ შეიცვალა პატიმრების უფლებების ნაწილშიც, მაგალითად, 2023 წლის ცვლილებებით დაწესდა ლიმიტი ამანათებზე – მანამდე პატიმრებს ულიმიტოდ შეეძლოთ ამანათის მიღება. ასევე, პრაქტიკულად აიკრძალა საფოსტო ამანათები, არადა, ძალიან ბევრი შემთხვევა იყო, როცა პატიმრის ოჯახი სასჯელაღსრულებითი დაწესებულებიდან შორს ცხოვრობდა და საფოსტო ამანათებით სარგებლობდნენ.

წინა წლებში მსგავსი პრობლემების მოგვარებაში აქტიურად იყო ჩართული სახალხო დამცველი – ითვალისწინებდნენ კიდეც ჩვენს წერილებს და პრობლემები მეტ-ნაკლებად გვარდებოდა. მაშინ გაცილებით სხვა გარემო იყო, ვიდრე ახლა. დღეს კიდევ უფრო მეტად გამკაცრებულია პირობები. დღეს საკვები პროდუქტის გაგზავნა, ასევე, მხოლოდ სადღესასწაულო დღეებშია შესაძლებელი.

იყო შემთხვევები, როცა, მაგალითად, ლიტერატურის შეტანა შეზღუდეს – ეთნიკური უმცირესობის წარმომადგენელს არ შეატანინეს წიგნი აზერბაიჯანულ ენაზე. გასაგებია, რომ შესაძლოა ადმინისტრაცია ვერ ფლობს ენას, თუმცა ამის გარკვევაც შესაძლებელია, რას ეხება ესა თუ ის წიგნი. ადმინისტრაციამ არ უნდა უთხრას პატიმარს მხოლოდ ბლანკეტური უარი – მას უნდა ჰქონდეს დასაბუთება.

  • როცა აკრძალული ნივთების ჩამონათვალში არაა, მაგალითად, ჯინსის ტანსაცმელი, მაგრამ ამას მაინც კრძალავს ადმინისტრაცია, ეს რას აჩვენებს, რასთან გვაქვს საქმე? 

ეს მიუთითებს მართვის სტილზე: როცა მმართველობა დემოკრატიასა და ადამიანის უფლებებზეა ორიენტირებული, იქ კანონის მიხედვით იღებენ გადაწყვეტილებებს – ამ შემთხვევაში ყველა პატიმარი თანასწორია. როცა ასე არ არის, სისტემა მაქსიმალურ ჩაკეტილი ხდება და მონიტორინგიც სუსტია. რეალურად სახელმწიფო დღეს ამ სისტემას იყენებს საკუთარი მიზნებისთვის.

ციხეში პირობების გამკაცრებაც უფრო მეტად რეპრესიული რეჟიმების დროს ხდება. მაქსიმალურად იღებენ თვითნებურ გადაწყვეტილებებს: პატიმრებს ეუბნებიან, ჩვენზე ხართ დამოკიდებული, რასაც გვინდა, იმის უფლებას მოგცემთ, რა წიგნს წაიკითხავთ, ან რა ნივთს მიიღებთ, ამასაც ჩვენ განვსაზღვრავთ.

ეს აჩვენებს, რომ სხვა მეთოდებით მართავენ დაწესებულებებს. როდესაც პატიმრების უფლებების დაცვაა მნიშვნელოვანი, სტანდარტები ეფუძნება კანონებს, როცა ასე არ ხდება და შიდა სტრუქტურებს იყენებენ მართვისთვის – იერარქიებს და სუბკულტურებს, ამ დროს მართვის მეთოდი არის დაშინება, პატიმრების მაქსიმალური შეზღუდვა, რომ პატიმარს არ შეეძლოს რეაბილიტაცია. არც რესოციალიზაცია არ უნდა შეეძლოს მას – ყველაფერი დამოკიდებული უნდა იყოს ადმინისტრაციასა და სისტემაზე – მინიმალური საკითხების გადაწყვეტაც კი.

რა განტვირთავს ქალაქს საცობებისგან – ბათუმის გენგეგმის კონცეფცია

ბათუმის არჩეულმა მერმა, არჩილ ჩიქოვანმა თანამდებობა ისე დატოვა, რომ საცობების, პარკინგის ადგილებისა და დაურეგულირებელი მოძრაობის პრობლემა ბათუმში კვლავ გამოწვევად დარჩა.

იგივე შეიძლება ითქვას წინა და იმის წინა არჩეულ მერებზეც.

ამომრჩეველს დაჰპირდნენ, გეგმა შეიმუშავეს, ბევრჯერ განიხილეს, ბევრი შეხვედრა მოაწყვეს, რეკომენდაციები მიიღეს და დოკუმენტიც შექმნეს, თუმცა არანაირი შედეგი.

ბათუმში არამხოლოდ ტროტუარები და ველობილიკებია მანქანებით სავსე, არამედ უკვე ზებრა გადასასვლელზეც კი ნახავთ გაჩერებულ ავტომანქანას.

ამ ამბის დრამატული ნაწილი ისიც არის, რომ ახლა მერიის თანამშრომლებიც ვეღარ პოულობენ ქალაქში პარკინგის ადგილს მაქანის გასაჩერებლად.

ამ პრობლემის ერთ-ერთ მთავარ მიზეზად ქალაქში დაუგეგმავ და ქაოსურ მშენებლობებს ასახელებენ. ამ და კიდევ ბევრი სხვა გამოწვევის წინაშე რომ აღმოჩნდებოდა ბათუმი სწორედ ქაოსური განაშენიანების გამო, ამაზე ურბანისტები წლების განმავლობაში აქტიურად საუბრობდნენ, თუმცა მათ არავინ მოუსმინა.

სპეციალისტებს არც ახლა უსმენენ. ამის მაგალითები ბათუმის განაშენიანების გეგმის უკვე მომზადებულ კონცეფციაშია. ამჯერად „ბათუმელებმა“ შეისწავლა, როგორ ხედავენ კონცეფციის ავტორები ქალაქისთვის საცობებისა და პარკინგის ადგილების პრობლემის გადაჭრის გზებს.

კონცეფციის მიხედვით, მთავარი პრობლემა სისტემის დაურეგულირებლობაა, ან რეგულირება კერძო მხარის მიერ, როცა საქმე რეგიონულ სატრანსპორტო სქემას ეხება. ამ მხრივ კონცეფციაში ავტოსადგურების პრობლემაზეც არის გამახვილებული ყურადღება.

  • „დეგრადირებული ავტოსადგურები“

კონცეფციის მიხედვით ბათუმში, საქალაქთაშორისო 4 ავტოსადგურიდან სამი თითქმის დეგრადირებულია და არ გააჩნიათ სათანადო ინფრასტრუქტურა, გარდა „მეტროს“ ავტოსადგურისა. გარდა ამისა, ისინი ქალაქის ერთ წერტილშია კონცენტრირებული, რაც კიდევ უფრო აძლიერებს ქალაქის მონოცენტრულობის იდეას.

ამ პრობლემების მართვას ართულებს ის ფაქტი, რომ დასახლებათა შორისი საზოგადოებრივი ტრანსპორტის მართვა ხორციელდება სრულად კერძო ოპერატორის მიერ. აქედან გამომდინარე, არსებობს ორგანიზებისა და რეგულირების დეფიციტი, მონაცემთა შეგროვების და გასაჯაროების პრობლემა.

  • მუნიციპალური ტრანსპორტი

მუნიციპალური საზოგადოებრივი ტრანსპორტის განვითარებასთან დაკავშირებით, მობილობის გეგმის შემოთავაზებები მოიცავს შემდეგ საკითხებს: საზოგადოებრივი ტრანსპორტის ქსელის ოპტიმიზაციას, BRT ტიპის დერეფნების განვითარებას, სატრანსპორტო ტერმინალების მოწყობასა და ტაქსის სექტორის ორგანიზებას.

კონცეფციის მიხედვით, არსებული სატრანსპორტო ქსელი ძირითადად კონცენტრირებულია დიდი დატვირთულობის მქონე არეალებში, მაშინ როცა ქალაქის სხვა ნაწილში მათი მომსახურების სერვისები დეფიციტურია. აღსანიშნია ის, რომ ავტობუსებთან შედარებით მიკროავტობუსებს მეტი მომხმარებელი ჰყავს და მათი ოპერირება სრულიად კერძო მხარის მიერ ხდება.

საცობი ბათუმში

კონცეფციის მობილობის გეგმის მიხედვით, პრიორიტეტი მიენიჭა საზოგადოებრივი ტრანსპორტის სწრაფი სატრანზიტო დერეფნების განვითარებას. ამისთვის შეირჩა ჭავჭავაძე-აბუსერიძე-აღმაშენებლის და ბარათაშვილი-გორგილაძის მონაკვეთები, სადაც გარკვეული ინფრასტრუქტურული სამუშაოები უკვე შესრულდა.

იქიდან გამომდინარე, რომ აღნიშნული მონაკვეთები ქალაქის მჭიდრო უბნების გამჭოლი მონაკვეთებია და იკვეთებიან როგორც შიდასაქალაქო, ასევე ზელოკალურ ნაკადებთან, საზოგადოებრივი ტრანსპორტისთვის პრიორიტეტის მინიჭება ეფექტიანი სისტემის ასამუშავებლად აუცილებელი პირობაა.

  • ველო-ინფრასტრუქტურა

კონცეფციის თანახმად, ბათუმის საზღვრებში წარმოდგენილი ველო-ინფრასტრუქტურის საერთო სიგრძე დაახლოებით 30 კილომეტრს შეადგენს. ქსელის განვითარებისა და მისი მაქსიმალურად ათვისების პოტენციალი ქალაქს, განაშენიანებული ტერიტორიის რელიეფიდან გამომდინარე, თავისუფლად გააჩნია. ინფრასტრუქტურა ძირითადად საქვეითო ტროტუარებთანაა ინტეგრირებული, რომელიც ხშირ შემთხვევაში მოუხერხებელს ხდის როგორც ქვეითთა ასევე ველოსიპედისტთა გადაადგილებას.

ანალოგიური სიტუაციაა საგზაო ნაწილთან მიმართებაშიც, სადაც ველოსიპედისტთა გადაადგილებისთვის აუცილებელია მოტორიზებულ ტრანსპორტთან მიმართებაში მაქსიმალური უსაფრთხოების წესების გათვალისწინება.

მდგრადი მობილობის გეგმის ფარგლებში შემუშავდა ველო-ინფრასტრუქტურის სისტემური განვითარების ქსელის მონახაზი, რომელიც საზღვრავს 4 ძირითად საოპერაციო ქსელის ნაწილს: მთავარ ღერძებს, პირველად ადგილობრივ მონაკვეთებს, მეორად ადგილობრივ მონაკვეთებს და რეკრეაციულ მონაკვეთებს.

პარკირება ბათუმში / ფოტო „ბათუმელების“ არქივიდან
  • პარკინგი

კონცეფციაში წერენ, რომ ქალაქის მჭიდროდ განაშენიანებულ არეალებში მზარდი სატრანსპორტო ნაკადების საფუძველზე რთულდება საპარკინგე რესურსის მობილიზება. განსაკუთრებულ პრობლემას წარმოადგენს არეალები შედარებით მცირე გამტარუნარიანობის გზებითა და შეუსაბამო მოცულობის განაშენიანებით.

გზების სივიწროვიდან გამომდინარე, პრობლემას წარმოადგენს ასევე ცენტრალურ ნაწილში საპარკინგე სივრცეების ნაკლებობა.

 კონცეფციით შეთავაზებული სატრანსპორტო კვანძების და გზების რეკომენდაციები

  • მახინჯაურის კვანძი

კონცეფციის მიხედვით, პირველი კვანძი მდებარეობს ბათუმის ჩრდილოეთით მახინჯაურის რკინიგზის სადგურთან. კონცეფციის წინადადებიდან ეს არის არაორგანიზებული სივრცე, რომელიც შეესაბამება ახალ ურბანულ ცენტრს.

ძირითადი რეკომენდაციები ამ კვანძისთვის ასეთია: მთავარ გზაზე სატრანსპორტო ზოლების სიგანის შემცირება 3 მეტრამდე, ცოცხალი ქუჩებისთვის მარჯვნივ მოსახვევი ზოლის მიმატება, მახინჯაურის რკინიგზის სადგურის წინ საფეხმავლო გადასასვლელის გამოყოფა, ცოცხალი ქუჩების სიგანის შემცირება და საზოგადოებრივი და პარკინგის სივრცეების ორგანიზება.

  • ახალი ხიდი მდინარე ყოროლისწყალზე და კვანძი

მთავარი რეკომენდაცია ამ კვანძისთვის არის მოძრაობის ორგანიზება. ვინაიდან შუქნიშანი შეწყვეტს დინებას მთავარ გზაზე, შემოთავაზებულია საშუალო ზომის წრიული და საფეხმავლო გადასასვლელები [თამარ მეფის გამზირზე ხიდთან, მდინარე ყოროლისწყლის მარჯვენა მხარეს].

ახალი კვანძი ყოროლისწყლის ხიდთან / კონცეფცია

კონცეფციის მიხედვით, ასეთი რადიუსის წრიულები ფართოდ გამოიყენება ნიდერლანდებში. მათი უპირატესობა გზაჯვარედინებთან არის უფრო მაღალი საგზაო უსაფრთხოება და გამტარუნარიანობა. წრიულები 28-40 მეტრი რადიუსით საკმარისად ანელებს მოძრაობას უსაფრთხოების უზრუნველსაყოფად, ამავდროულად სატვირთო მანქანებს საშუალებას აძლევს გაიარონ ცენტრალური კუნძულის გარშემო.

ესკიზი: აქ ნაჩვენებია წრიულის კონცეფცია

ასევე, რადგან ეს ხიდი არის ერთადერთი მდინარე ყოროლისწყალზე ქალაქის საზღვრებში, შემოთავაზებულია დამატებითი მაკავშირებლების აშენება: საფეხმავლო და ველოსიპედის ხიდი სარკინიგზო ხიდის გვერდზე და სამანქანო ხიდი სამხრეთით.

  • გზაჯვარედინი „ბათუმი ცენტრალთან“

კონცეფციაში სადგურის შესასვლელთან, ჩრდილოეთიდან, შემოთავაზებულია შუქნიშნების დაყენება ავტოსადგომზე შესასვლელად და გზაზე ფეხით მოსიარულეთა გადასასვლელად. იმის გამო, რომ ავტოსადგომიდან გასასვლელი კონტროლდება ბარიერით, რეკომენდაციაა მარცხნივ მოსახვევის გადატანა შემდეგ გზაჯვარედინზე.

ამ გზაჯვარედინზე მარჯვენა ზოლი გამოიყენება საცხოვრებელ ზონამდე მოძრაობისთვის, შუა ზოლი სწორი მოძრაობისთვის და მარცხენა ზოლი მოსატრიალებლად და ქალაქის ცენტრისკენ გასასვლელად. ეს ხსნის ძაბრს ამ გზაჯვარედინზე.

საგზაო მოძრაობის კონცეფცია „ბათუმი ცენტრალთან“

თამარის დასახლებაში გზა, რკინიგზასთან ერთად, გადის ზღვის პარალელურად და ბლოკავს მასზე თავისუფალ მისასვლელს ადგილობრივებისთვის. გზაზე გამოყოფილი ზებრები და რკინიგზა არ არის უსაფრთხო.

რეკომენდებულია გადასასვლელებზე შუქნიშნების დაყენება, რომლებიც ღილაკებით იმართება. ასეთი გადაწყვეტილებები წარმატებით მუშაობს ბევრ ქვეყანაში.

იოსებ ნონეშვილისა და ოდისეი დიმიტრიადის ქუჩების კვეთაში [ბარცხანის ხიდთან] საჭიროა მოძრაობის არხების გამოყენება. მთავარ ქუჩაზე პირდაპირი მოძრაობისთვის უნდა იყოს გამოყოფილი ორი ზოლი, მათზე მოძრაობა არ საჭიროებს კორექტირებას. გარდამტეხი მოძრაობისთვის კი რეკომენდებულია დამატებითი ზოლები.

ასევე, რეკომენდებულია სატვირთო მანქანების მომსახურების ზონის გამოყოფა ბორდიურებით ან სხვა ზომებით.

კონცეფციის მიხედვით ,ჭავჭავაძე-გოგებაშვილის ქუჩების გზაჯვარედინზე [საბაგირო გზის სადგურის მიმდებარედ] შემოთავაზებულია არხირება, გზაზე ზოგიერთი ზოლის მოშორება. ასევე რეკომენდებულია შემობრუნების აკრძალვა კუნძულთან, მაგრამ დაშვება გოგებაშვილის ქუჩასთან წრიულზე. ილუსტრაცია გვიჩვენებს კონცეფციის ზოგად ხედვას:

ტრანსპორტის მოძრაობის სქემა ჭავჭავაძის, გოგებაშვილისა და ბაქოს ქუჩების კვეთაში [საბაგიროსთან]/კონცეფცია
კონცეფციაში წერენ, რომ ძაბრები წარმოიქმნება ჭავჭავაძის ქუჩის უბანში, რომელიც შემოიფარგლება ისტორიული შენობებით. ამჟამად ამ მონაკვეთზე სულ 3 ზოლია. სატელიტური გამოსახულების მონაცემებით, გზის სიგანე 11-12 მეტრია. სავარაუდოა, რომ არსებული სავალი ნაწილის სიგანე არ არის საკმარისი ოთხი 3-მეტრიანი ზოლისთვის. თუმცა, შესაძლებელია ოდნავ უფრო მცირე სიგანის ზოლების მოწყობა – 2,75 მეტრამდე.

ზოლის სიგანის შეცვლა 2,75 მეტრსა ან ნაკლებზე არ არის ტიპური გადაწყვეტა ძირითადი გზებისთვის, მაგრამ ეს შეიძლება იყოს სიცოცხლისუნარიანი გამოსავალი შეზღუდულ პირობებში გამოსაყენებლად.

შემოთავაზება არის, რომ ჭავჭავაძის ქუჩამ შეიცვალოს მოძრაობის კონცეფცია. ამდენად, აუცილებელია ორივე მიმართულებით გამოყოფილი ავტობუსის ზოლის შემოღება და ამ ქუჩაზე მანქანებისთვის ორმხრივი მოძრაობის დაბრუნება [აღსანიშნავია, რომ მერიამ ამ ქუჩაზე უკვე დააბრუნა ორმხრივი მოძრაობა].

კონცეფციის მიხედვით, ჟიული შარტავას გამზირს აქვს ფართო ბულვარული ნაწილი, რომელიც საცხოვრებელ უბნებს ზღვასთან აკავშირებს. ამავდროულად, ამ ქუჩის სავალი ნაწილი საკმარისად ფართო და სწორია, რომ მანქანებმა მიაღწიონ მაღალ სიჩქარეს. ეს პროსპექტს არაკომფორტულს ხდის სიარულისთვის.

ამიტომ, შემდეგი წინადადებები მოიცავს ზომებს გამზირზე მოძრაობის გამარტივებისა და შენელებისთვის: ყველა გზაჯვარედინზე შუქნიშნების შემოღება, ავტობუსების ზოლის შემოღება, ველობილიკის შექმნა ბულვარის ნაწილში, მწვანე ზოლის შემოღება 50 კმ/სთ სიჩქარისთვის.

კონცეფციის თანახმად, ასევე, აუცილებელია, ბულვარის სხვადასხვა ნაწილებს შორის უწყვეტი საფეხმავლო ბილიკის უზრუნველყოფა.

ამავე თემაზე:

ბათუმში მცხოვრებთა 70%-ს ახალი ბინის შეძენის საშუალება არ აქვს – გენგეგმის კონცეფცია

„აჭარის საზოგადოებრივ მაუწყებელს მოუხდა კომპენსაციის გადახდა“ – თეონა ბაკურიძე

ჟურნალისტი, ტელეწამყვანი თეონა ბაკურიძე ფეისბუქზე წერს, რომ მისი საჩივრიდან 5 წლისა და 4 თვის შემდეგ აჭარის საზოგადოებრივი მაუწყებელი იძულებული გახდა, მისთვის კომპენსაცია გადაეხადა და ეს შეუძლებელი იქნებოდა, რომ არა არასამთავრობო ორგანიზაციების დახმარება.

5 წლისა და 4 თვის თავზე აჭარის საზოგადოებრივ მაუწყებელს მოუხდა კომპენსაციის გადახდა.

მიზეზი უკანონო გათავისუფლებაა..

მაგრამ, ახლა ჩემზე არ ვწერ, ახლა არასამთავრობოებზე ვწერ:

ჩემი ინტერესების დაცვა დაიწყო სოციალური სამართლიანობის ცენტრი• Social Justice Center, დიდი მადლობა Tamta Mikeladze [თამთა მიქელაძე, სოციალური სამართლიანობის ცენტრის ერთ-ერთი დამფუძნებელი და ხელმძღვანელი]

გარკვეული პერიოდის შემდეგ გააგრძელა „საერთაშორისო გამჭვირვალობა-საქართველომ“.

სრულიად უსასყიდლოდ, დღე და ღამე იშრომა ძალიან კომპეტენტურმა ანა ბერძენიშვილმა [„გამჭვირვალობის“ იურისტი] იმისთვის, რომ პირველი ინსტანციის სასამართლოს მიკერძოებული გადაწყვეტილება ვეღარ დაეტოვებინა ძალაში მეორე და მესამე ინსტანციას, ეს უბრალოდ შეუძლებელი გამხდარიყო.

იარა საქალაქოში, სააპელაციოში, წერა-იკითხა-აგზავნა წინ და უკან დოკუმენტები. დამეხმარა ბოლომდე – აღსრულების ნაწილშიც კი.

რისთვის გააკეთა ეს? ჩემი, როგორც ჟურნალისტის უფლებების დაცვისთვის, ადამიანისთვის ვინც უკანონოდ გაათავისუფლეს, ვისაც სიცრუე დააბრალეს…

ხვალ შეიძლება თქვენ დაგჭირდეთ უფასო იურიდიული დახმარება, მაგრამ მათ ეს, შესაძლოა, უბრალოდ ვეღარ გააკეთონ.

რატომ?

მიზეზი ივანიშვილია, რომელსაც სურს დაგტოვოთ დაუცველები, უკანონობის პირისპირ.

ისე, რომ ვეღარც თქვენს ხმას გაიგებს ვინმე.

ჩემი მაგალითი ალბათ უმცირესია, იმასთან რასაც არასამთავრობოები აკეთებენ ხალხისთვის“ – წერს თეონა ბაკურიძე.

თეონა ბაკურიძე სასამართლოში ითხოვდა სამსახურიდან გათავისუფლების უკანონოდ ცნობას, დისკრიმინაციის ფაქტის დადგენას, განაცდური თანხის ანაზღაურებას და სამსახურში აღდგენას.

თეონა ბაკურიძე „აჭარის ტელევიზიის“ მთავარი საინფორმაციო გამოშვების წამყვანი იყო, როცა 2020 წელს სამსახურიდან გაუშვეს, მას შემდეგ, რაც ამ ტელევიზიის დირექტორს – ნათია კაპანაძეს იმპიჩმენტი მოუწყვეს. მაშინ, როცა ტელევიზიაში კრიტიკულად განწყობილ ჟურნალისტებს საქმიანობის უფლება წაართვეს და გაჩნდა შეფასება „პოლიტიკურ ზეწოლაზე“, სასამართლოში 9 სარჩელი შევიდა.

აჭარის ტელევიზიაში ცვლილებები 2019 წლის გაზაფხულზე დაიწყო — იმ პერიოდიდან, როდესაც დირექტორი, ნათია კაპანაძე თანამდებობიდან გადააყენეს. მაშინ ნათია კაპანაძემ აღნიშნული დაუკავშირა ხელისუფლების მიერ ტელევიზიის გაკონტროლების სურვილს.

ამავე თემაზე: 

4 წლის შემდეგ აჭარის ტელევიზიიდან გაშვებულმა ჟურნალისტმა სასამართლო დავა მოიგო

 

შემოვლით გზაზე დასაქმებულებმა კომპანიას ოფისის კარი აუჭედეს – „არჩევნების მერე ხელფასი არ აგვიღია“

დღეს, 30 ივნისს, ბათუმის შემოვლით გზაზე დასაქმებულებმა საპროტესტო აქცია ნატანებში კომპანია JV Polatyol & Mapa-ს ოფისთან გამართეს. გზის მშენებლობაზე დასაქმებულები ამბობენ, რომ ხელფასი უკვე 7 თვეა, „არჩევნების მერე“ არ აუღიათ.

შემოვლით გზაზე სამუშაოებს გზების დეპარტამენტის ტენდერში გამარჯვებული კომპანია JV Polatyol & Mapa ასრულებს. კომპანიას სამუშაოები დასასრულებელი აქვს.

დღეს, 30 ივნისს, შემოვლით გზაზე დასაქმებულები კომპანია JV Polatyol & Mapa-ის ოფისთან, ნატანებში შეიკრიბნენ და დამსაქმებელს ოფისის შესასვლელი კარი აუჭედეს.

„მივაწვდინეთ ხმა გზების დეპარტამენტს, მთავრობას, მაგრამ ბოლო არ უჩანს… მთავრობას მივმართავ, რატომ მაშავებინებ, რა გავაკეთოთ გლეხმა ხალხმა? ქართველ კაცს მაკეტინებს ქართულ გზას?“ – აცხადებდა დღეს აქციის ერთ-ერთი მონაწილე.

აქციის მონაწილეების თქმით, რამდენიმე დღეში ისინი მაგისტრალს გადაკეტავენ, თუ ხელფასს არ გადაუხდიან. 

შემოვლით გზაზე დასაქმებულებმა ნატანებში აქცია გამართეს

„კომპანიას ვალდებულება დღეს, თვის ბოლოს უნდა შეესრულებინა, თუმცა შეთანხმებული პირობები კვლავ დაუცველია, ხოლო დაპირებები – შეუსრულებელი. 700-ზე მეტი დასაქმებული თვეების განმავლობაში ელოდება კუთვნილ ხელფასს, თუმცა უშედეგოდ,

პრობლემის შესახებ ინფორმირებულია ხელისუფლებაც, მაგრამ ის ვერ ან არ იყენებს სათანადო ბერკეტებს, მაშინ როცა პროექტის დამკვეთი თავად სახელმწიფოა და შეუძლია დაიცვას საკუთარი მოქალაქეები და მოახდინოს გავლენა პროექტის განმახორციელებელ თურქულ კომპანია „პოლატზე“, – აცხადებს თამაზ ბაკურიძე, ორგანიზაცია „ჩვენი უფლებებისთვის“ ხელმძღვანელი, რომელიც დღეს აქციის მონაწილეებს შეხვდა.

„კომპანიას თვის ბოლომდე უნდა მიეღო კრედიტი, მაგრამ ეს ვერ მოხერხდა. უახლოეს 10 დღეში დაიფარება დავალიანება,“ – უთხრა „ბათუმელებს“ კომპანია JV Polatyol & Mapa-ს საზოგადოებასთან ურთიერთობის სამსახურის ხელმძღვანელმა, რომა პატარიძემ.

რომა პატარიძის თქმით, აჭედილი კარი აქციის შემდეგ გახსნეს და კომპანიამ მუშაობა განაგრძო.

როდის აამოქმედებს ან რატომ არ იყენებს გზების დეპარტამენტი კანონით და ხელშეკრულებით გათვალისწინებულ მექანიზმებს?

„კომპანიას მოცემული ჰქონდა დეპარტამენტისთვის პირობა, რომ თვის ბოლოს დაფარავდა დავალიანებას ამ ადამიანების მიმართ, თუმცა კვლავ არ ასრულებს დანაპირებს და კომპანიის მიმართ იქნება გამოყენებული ხელშეკრულებით გათვალისწინებული ყველა ზომა,“ – მოგვწერეს გზების დეპარტამენტის პრესცენტრიდან.

ამ თემაზე:

ბათუმი-სარფის ავტობანის მშენებლობის დაფინანსება – რას პასუხობს გზების დეპარტამენტი

ხვალ, პირველ ივლისს ბათუმის მერია გენგემის კონცეფციის საჯარო განხილვას გეგმავს

ხვალ, პირველ ივლისს მერია ბათუმის გენგემის კონცეფციის საჯარო განხილვას გეგმავს.

განცხადებას, რომელიც საჯარო განხილვის ჩანიშვნის შესახებ ბათუმის მერიის ვებგვერდზე გამოაქვეყნეს, მარტივად ვერ იპოვით. დოკუმენტი მერიამ არა ვებგვერდის მთავარ გვერდზე ან ფეისბუქზე, არამედ ვებგვერდის საჯარო განხილვების განცხადებების რუბრიკაში გამოაქვეყნა.

თუმცა მერიის ახალი ვებგვერდი სატესტო რეჟიმში მუშაობს და განცხადების სანახავად ძველ ვებგვერდზე მოგიწევთ გადასვლა, რუბრიკაში – „საჯარო განხილვა“.

კანონი არა მხოლოდ საჯარო განხილვის დღის ჩანიშვნას გულისხმობს, არამედ ითხოვს, რომ მუნიციპალიტეტის მერიამ დოკუმენტის იმგვარად გასაჯაროება უზრუნველყოს, რომ ის მისაწვდომი და გასაგები იყოს ნებისმიერი დაინტერესებული მოქალაქისთვის.

კანონით მოთხოვნის გათვალისწინებით, კარგი იქნებოდა ბათუმის მერიას ამბავი ფეისბუქის გვერდზე დაეწერა და იქვე გამოექვეყნებინა ბმული, ასე ბევრად მარტივი იქნებოდა, რაც მერიაშიც იციან და საკრებულოშიც, თუმცა მერია ასე არ მოქცეულა.

ინფორმაცია საჯარო განხილვის შესახებ არც მერიის ვებგვერდის მთავარ გვერდზე გამოიტანეს.

„ბათუმელებმა“ როგორც ვებგვერდზე, ისე მერიის ფეისბუქის გვერდზე მარტის თვის ჩათვლით გამოქვეყნებული სიახლეები შეისწავლა. გენგეგმის საჯარო განხილვის ჩანიშვნის შესახებ ინფორმაცია ამ სიახლეებში ვერ ვიპოვეთ.

საჯარო განხილვა ჩანიშნულია ხვალ, პირველ ივლისს დილის 10:00 საათზე. დოკუმენტი მერიას ამ ბმულზე აქვს გამოქვეყნებული. 

„ბათუმელებმა“ ეს ამბავი საკრებულოს წინა სხდომაზე გაიგო, როცა მერიის ქალაქმშენებლობისა და ურბანული პოლიტიკის სამსახურის უფროსმა გიორგი წანაწყენიშვილმა საკრებულოს წევრებს უთხრა, რომ გენგეგმის კონცეფციის განხილვა დაგეგმილია და „ამის შესახებ გამოქვეყნებულიც არის“. ამ განცხადებით გიორგი წანაწყენიშვილმა უპასუხა საკრებულოს წევრის, ვაჟა დარჩიას კრიტიკას – ისე ვასრულებთ უფლებამოსილების ვადას დაპირებული გენგეგმა ვერ დავდეთო.

„თავზე დაგვემხო ქალაქი, ქალაქს ქალაქში ვაშენებთ“ - ვაჟა დარჩია, ბათუმის საკრებულოს სხდომა

გიორგი წანაწყენიშვილმა სხდომაზე ასევე განაცხადა:

„ივლისის ბოლოსთვის ჩვენ გვექნება საშუალება დავამტკიცოთ გენგეგმის კონცეფცია და შემდეგ უკვე დაიწყება აქტიური მუშაობა გენგეგმის საბოლოო ვერსიაზე, ანუ პროექტის შეთანხმებაზე, სადაც ის რეალობა იქნება სრულად ასახული, რაც საერთო სურათს მოგვცემს და ადეკვატური იქნება იმ რეალობის, რაც ახლა გაგვაჩნია ჩვენ ბათუმში და რა მიმართულებითაც მივდივართ“.

ამ განცხადების შემდეგ, საკრებულოს წევრი ლევან ცხოიძე დაინტერესდა, სად ჩატარდებოდა საჯარო განხილვა:

რამდენი ხანია ვაჟა ითხოვს,  [გულისხმობს ვაჟა დარჩიას] ქალაქიც ელოდება და ვაჟაც დავპატიჟოთო – თქვა ლევან ცხოიძემ.

უცილებლადო – დაჰპირდა მას გიორგი წანაწყენიშვილი, თუმცა დღეს, 30 ივნისს, ვაჟა დარჩიამ „ბათუმელებს“ უთხრა, რომ ხვალინდელი საჯარო განხილვის შესახებ არაფერი იცის და მისთვის, როგორც საკრებულოს წევრისთვის, არც დოკუმენტი მიუწოდებიათ გასაცნობად.

საჯარო განხილვის შესახებ არაფერი ვიციო – გვითხრა ნოდარ დუმბაძემაც, საკრებულოში ოპოზიციური ფრაქციის თავმჯდომარემ.

ინფორმაცია არ ჰქონდა აკაკი გვიანიძესაც.

სხვათა შორის, წინა სხდომაზე საკრებულოს თავმჯდომარის მოადგილე, ნატალია ზოიძე დაინტერესდა, ცნობილია თუ არა საჯარო განხილვის შესახებ ქალაქის ურბანული პოლიტიკით დაინტერესებული პირებისთვის:

„ბაზაც აქვს მგონი მერიას ამ ხალხის და მაინტერესებს ცნობილი იქნება თუ არა მათთვის დღე, დრო და საათი. ასევე, სავარაუდოდ სოციალურ ქსელშიც გავრცელდება ალბათ, თქვენ უზრუნველყოფთ ამას “ – მიმართა მან გიორგი წანაწყენიშვილს.

„ეს დადებულია უკვე და ჩავთვალოთ, რომ დღეიდან ეს ყველასთვის იქნება საჯარო და ექნება საშუალება, რომ ეს ინფორმაცია გაიგოს“ – უპასუხა მან.

რუბრიკა „საჯარო განხილვაში“ გამოქვეყნებული ინფორმაციის თანახმად კონცეფციის შემოსვლის თაობაზე ეცნობათ დაინტერესებულ პირებს და განემარტათ, რომ მათ აქვთ შესაძლებლობა დააფიქსირონ მოსაზრებები წერილობით და ზეპირად, ხოლო საჯარო განხილვის დღის ჩანიშვნის შესახებ მათ აცნობებდნენ.

„იხილეთ https://old.batumi.gov.ge/pages/91] აღნიშნულიდან გამომდინარე გაცნობებთ, რომ მიმდინარე წლის 01 ივლისს 10:00 სთ-ზე, ქალაქ ბათუმის მუნიციპალიტეტის მერიაში [ქალაქ ბათუმის მუნიციპალიტეტის მერიის ბრიფინგიუმი-მეორე სართული] გაიმართება საჯარო განხილვა“ – ვკითხულობთ განცხადებაში.

საინტერესოა, დაინტერესებულ პირებს თუ აცნობა მერიამ კონცეფციის შესახებ, რატომ არ აცნობა მედიას და მათ შორის „ბათუმელებს“. მხოლოდ ამ საკითხზე გამოქვეყნებული მასალების რაოდენობით რომ ვიმსჯელოთ, უცნაურია, რომ „ბათუმელები“ „დაინტერესებულ პირთა ბაზაში“ ვერ მოხვდა.

ხელშეკრულება ქალაქის გენგეგმის მომზადებაზე ტენდერში გამარჯვებულ კომპანიასთან, შპს „სითი ინსტიტუტი საქართველოსთან“, 2021 წლის აპრილში გააფორმეს. დოკუმენტზე მუშაობა 2024 წლის 25 აპრილამდე პერიოდში უნდა დასრულებულიყო. ბოლო ცვლილებით, რომელიც ხელშეკრულებაში 2025 წლის აპრილში შევიდა, დასრულების ვადა 2026 წლის 20 აპრილამდე გაახანგრძლივეს, თუმცა ჯერ უცნობია, საკმარისი იქნება თუ არა ეს პერიოდი დოკუმენტის დასასრულებლად. დიდი ალბათობით ამ დროს ქალაქს უკვე ახალი მერი და საკრებულო ეყოლება.

საქართველოს ზღვისპირეთში ტოქსიკური თევზის სახეობა დაფიქსირდა – იქთიოლოგის განმარტება

შავ ზღვაში კვლავ დაფიქსირდა თევზ ფუგუს ახლო ნათესავის – ვერცხლისფერი მუცელეკლიანის (Lagocephalus sceleratus) გავრცელების ფაქტი. ინფორმაციას ამის შესახებ იქთიოლოგი არჩილ გუჩმანიძე ავრცელებს.

არჩილ გუჩმანიძის განმარტებით, ეს ტოქსიკური თევზია, რომელიც ინვაზიის შემთხვევაში რეალურ საფრთხეს შეუქმნის, როგორც ეკოსისტემას და ბიომრავალფეროვნებას, ასევე ადამიანების ჯანმრთელობას.

ეს თევზი ინდო-წყნარი ოკეანის რეგიონის მკვიდრია. ის ხმელთაშუა ზღვაში სუეცის არხის გავლით შევიდა და 2014 წლიდან შავ ზღვაშიც გამოჩნდა:

„2014 წლიდან დაიწყო მისი დაფიქსირება შავ ზღვაში, ის იდენტიფიცირებულია შავი ზღვის ყველა სანაპიროზე, მიმდინარე წელს კი, ორი შემთხვევა დაფიქსირდა საქართველოს ზღვისპირეთში” – ამბობს არჩილ გუჩმანიძე. მისივე გენმარტებით, პირველი შემთხვევა აფხაზეთის სანაპიროზე დაფიქსირდა, მეორე კი ჩაქვის სანაპიროზე, სადაც „ვერცხლისფერი მუცელეკლიანი“, მეთევზეებმა დაიჭირეს და ვერ ამოიცნეს.

თავიდან თევზი დაფიქსირდა უკრაინაში, ამჟამად რუსეთის მიერ ოკუპირებულ ყირიმში, შემდეგ ნახეს ბულგარეთში, რუმინეთში, თურქეთში, არის რუსეთის ტერიტორიულ წყლებშიც.

„ყველაზე დიდ საფრთხეს წარმოადგენს ძლიერი ნეიროტოქსიკური ნივთიერება ტეტროდოტოქსინი, რომელიც ტეტრაოდონის [ჯგუფი, რომელსაც ვერცხლისფერი მუცელეკლიანი მიეკუთვნება] სხეულშია. ამ შხამის მცირე რაოდენობამაც კი შეიძლება გამოიწვიოს ფატალური მოწამვლა, თუ მას საკვებად არასათანადოდ დამუშავებულს მოიხმარენ. ის იწვევს ნერვული სისტემის პარალიზებას.

გარდა იმისა, რომ თევზი საფრთხეს უქმნის ადამიანებს, მას აქვს უკიდურესად ძლიერი ყბები და ეკლები, რაც აზიანებს სათევზაო ბადეებს, თოკებს და დაჭერილ თევზს. იკვებება მოლუსკებით, თევზებითა და კიბოსნაირებით, რითაც ანაცვლებს ადგილობრივ სახეობებს. ხმელთაშუა ზღვაში მისმა არსებობამ მეთევზეებისთვის უკვე მნიშვნელოვანი ეკონომიკური ზარალი გამოიწვია. მისი ინვაზიის შემთხვევაში შავი ზღვაშიც ეკონომიკური ზარალი დიდი იქნება. მაგალითად, თურქეთში და კვიპროსში ეს უკვე დიდი პრობლემაა“ – განმარტავს იქთიოლოგი.

ეს თევზი მაქსიმუმ 50-70 სანტიმეტრამდე იზრდება.

სპეციალისტის განმარტებით, კლიმატის ცვლილებისა და წყლის ტემპერატურის მატების გამო, ტეტრაოდონს აქვს შავ ზღვაში აქტიური გავრცელების პოტენციალი, რამაც შეიძლება გავლენა მოახდინოს თევზჭერასა და ეკოლოგიურ ბალანსზე.

„ეს ინვაზიური სახეობაა და ნებისმიერი ინვაზია – ეკოსისტემაში ახალი ფორმის შემოსვლა, იწვევს ეკოსისტემაში გადაწყობას, რაც ყოველთვის მტკივნეულია. არ არსებობს ინვაზიის შემთხვევა, რომელმაც შეიძლება ისე ჩაიაროს, რომ არაფერი მოხდეს, გამორიცხულია… ეს ძალიან აქტიური ფორმაა – ფსკერზე კიბოს დაეძებს, ანადგურებს მოლუსკებს, თევზსაც ჭამს საკმაოდ დიდი რაოდენობით, მოკლედ, აქტიურია. მისი დამკვიდრება ჩვენს წყლებში დიდი ზიანის მომტანი იქნება“ – ამბობს იქთიოლოგი.

არჩილ გუჩმანიძე მოქალაქეებს აფრთხილებს და მოუწოდებს, რომ უცნობი თევზის აღმოჩენის შემთხვევაში გადაიღონ ფოტო ან ვიდეო, ჩაიწერონ აღმოჩენის ადგილმდებარეობა და აცნობონ სპეციალისტებს. ეს მონაცემები მეცნიერებს ინვაზიური სახეობების გავრცელების უკეთ თვალყურის დევნებაში ეხმარება.

„აქ სამუშაოა. როგორც მინიმუმ, ინფორმირება უნდა მოხდეს მოსახლეობის, შესაბამისმა სტრუქტურებმა – სახელმწიფო, არასახელმწიფო, აკადემიურმა – ამაზე უნდა ვიმსჯელოთ, უნდა განვიხილოთ, რა ხდება, რა მოლოდინები გვაქვს, უნდა მოხდეს ანალიზი და გარკვეულწილად, ღონისძიებები უნდა დავსახოთ.

რა თქმა უნდა, ჩვენ ინვაზიას ვერ გავაჩერებთ ამ ეტაპზე, მაგრამ უნდა ვიცოდეთ, რა შეიძლება მოხდეს ჩვენთან. თუ ჩვენ ეს ვიცით წინასწარ – ჩვენ გვაქვს დრო. დრო გვაძლევს საშუალებას მოვემზადოთ, დავაზღვიოთ და ა.შ. თურქეთივით არ უნდა დავიწყოთ – ეს თევზი რომ გახდება მასიური და მერე პრემიები ვარიგოთ მის დაჭერაზე. ჯობს, რომ ვიფიქროთ. ბევრი არაფრის გაკეთება არ შეგვიძლია, მაგრამ ინფორმირებულები მაინც უნდა ვიყოთ. ამ თევზს ნეიროტოქსინი აქვს და ამ თევზს მოსახლეობა და მეთევზეები არ იცნობენ.

მზად უნდა ვიყოთ, რომ ნაკლებად მტკივნეულად წარიმართოს ინვაზიის პროცესი, რა თქმა უნდა, თუ ის დაიწყება. პირველი ნიშნები არის, მაგრამ ეს არ ნიშნავს იმას, რომ ეს აუცილებლად ინვაზიაში გადაიზრდება“ – ამბობს არჩილ გუჩმანიძე.

ამავე თემაზე:

რატომ ემუქრება მიდიებს გადაშენება

აჭარის ფინანსთა მინისტრად ედნარ ნატარიძე, სოფლის მეურნეობის მინისტრად კი – დენის სალუქვაძე

აჭარის ფინანსთა და ეკონომიკის მინისტრმა, ჯაბა ფუტკარაძემ თანამდებობა დატოვა, მის ადგილს ედნარ ნატარიძე დაიკავებს. ამ დრომდე ედნარ ნატარიძე ბათუმის მერიის საფინანსო-საბიუჯეტო სამსახურის უფროსის თანამდებობაზე მუშაობდა. ეს თანამდებობა მან არჩილ ვანაძის მერიიდან წასვლის შემდეგ დაიკავა.

თანამდებობა დატოვა აჭარის სოფლის მეურნეობის მინისტრმა ზაზა შავაძემაც, ამ თანამდებობაზე აჭარის არალეგიტიმური მთავრობის თავმჯდომარემ, სულხან თამაზაშვილმა დენის სალუქვაძე დანიშნა.

მთავრობის ინფორმაციით, დენის სალუქვაძეს სამუშაო გამოცდილება აქვს გარემოს დაცვისა და აგრარული მიმართულებით. დენის სალუქვაძე 2023 წლიდან ხელმძღვანელობდა პარლამენტის გარემოს დაცვისა და ბუნებრივი რესურსების კომიტეტის აპარატს.

ჯერჯერობით თანამდებობებს ინარჩუნებენ აჭარის ჯანდაცვის მინისტრი, ნინო ნიჟარაძე და განათლების მინისტრი მაია ხაჯიშვილი, ასევე კულტურის მინისტრი, ელისო ბოლქვაძე, რომელიც ამ თანამდებობაზე ახალდანიშნულია.

სულხან თამაზაშვილის, აჭარის არალეგიტიმური მთავრობის თავმჯოდომარის თანამდებობაზე დანიშვნის შემდეგ გადადგნენ ბათუმის და ქობულეთის მერები – არჩილ ჩიქოვანი და ლევან ზოიძე.

თურქეთში, იზმირში ძლიერი ხანძარია

თურქეთში, იზმირის პროვინციაში ტყის ხანძარი მძვინვარებს.

მასშტაბური ხანძარი იზმირში 29 ივნისს ტყეში გაჩნდა და საცხოვრებელ ზონებში გავრცელდა.

თურქული მედიის ცნობით, ქალაქის ხუთი უბანი ევაკუირებულია, დაზიანდა სამი სახლი და მრავალი ავტომანქანა.

იზმირის გუბერნატორმა განაცხადა, რომ ხანძრის ჩაქრობაში 1,113 ადამიანი, 122 სახანძრო მანქანა, 74 წყლის ავზი და 84 მძიმე ტექნიკა იყო ჩართული, თუმცა ძლიერმა ქარმა საჰაერო ოპერაციები შეაფერხა.

მსხვერპლის შესახებ ინფორმაცია არ ვრცელდება.

29 ივნისს იზმირში ხანძრის გამო აეროპორტი დაიხურა და ყველა რეისი შეჩერებული იყო.

თურქული სააგენტო „ანადოლუს“ ცნობით, 29 ივნისს თურქეთში, მთელი ქვეყნის მასშტაბით, 77 ადგილას გაჩნდა ხანძარი, რომელთაგან ცხრა მასშტაბური იყო.

თურქეთის იუსტიციის მინისტრმა განაცხადა 17 ეჭვმიტანილის დაკავების შესახებ, 26-28 ივნისს ხანძრის გაჩენის გამო.

LIVE ბლოგი სასამართლოდან, სადაც 11 პირის პროცესი მიმდინარეობს

დღეს, 30 ივნისს, თბილისის საქალაქო სასამართლოში განახლდა ჯგუფურ ძალადობაში ბრალდებული 11 პირის პროცესი.

ასამართლებენ – ირაკლი ქერაშვილს, ონისე ცხადაძეს, ჯანო არჩაიას, გია ტერიშვილს, ანდრო ჭიჭინაძეს, ვაკო თეთრაშვილს, ლუკა ჯაბუას, გური მირცხულავას, სერგეი კუხარჩუკს, რუსლან სივაკოვსა და რეზო კიკნაძეს.

დღეიდან ამუშავდა ახალი რეგულაციები, რომლის შესაბამისადაც მედიას სასამართლოში მუშაობა შეეზღუდა – ჟურნალისტებს აღარ აქვთ სასამართლო პროცესის მიმდინარეობისას ფოტო და ვიდეო გადაღების უფლება.

ნეტგაზეთი/ბათუმელები პირდაპირ, წერილობითი ფორმით მოგაწვდით ინფორმაციას, სასამართლო პროცესის მიმდინარეობის შესახებ.

11:42 დარბაზში ბრალდებულები შემოიყვანეს. ამ წუთებში ადვოკატები მათთან კონსულტაციებს გადიან და წუთი-წუთზე სხდომა დაიწყება. სხდომას არ ესწრება ონისე ცხადაძე.

ონისეს მამას, რომელიც პარასკევს გარდაიცვალა, 11-პირიან საქმეზე წინა სხდომის მიმდინარეობისას, ხვალ დაკრძალავენ თერჯოლაში. ჯერ კიდევ არ ვიცით, ონისე ცხადაძეს მისცემენ თუ არა უფლებას, რომ მამას გამოეთხოვოს.

11:52 ანდრო ჭიჭინაძის ადვოკატი თორნიკე მიგინეიშვილი აკეთებს განცხადებას „ოცნების“ მიერ მიღებული ახალი რეგულაციების შესახებ, რომლითაც მედიას სასამართლოში მუშაობა შეგვეზღუდა.

ეკითხება მოსამართლეს, მიმართა თუ არა ვინმე ე.წ. „უფლებამოსილმა“ პირმა სასამართლოს, რომ უზრუნველყოფილი იქნას გადაღება. იმის ფონზე, რომ მედიასაშუალებებთან, რომელთაც განცხადებით მაინც მიმართული ჰქონდათ სასამართლოსთვის გადაღების ნებართვასთან დაკავშირებით, კავშირზე არავინ გასულა.

„აღნიშნული ცვლილების საფუძველზე, რომ მოხდეს სხდომის გადაღება და ჩაწერა, იუსტიციის უმაღლესი საბჭოს გადაწყვეტილება უნდა იყოს. სასამართლოში არ წარმოდგენილა საბჭოს არანაირი გადაწყვეტილება. განვაგრძობთ სხდომას აუდიო-ვიდეო ჩაწერის გარეშე“, — ასეთია მოსამართლე ნინო გალუსტაშვილის პოზიცია.

11:56 შუამდგომლობას აყენებს ადვოკატი გუჯა ავსაჯანიშვილი და მიმართავს მოსამართლეს.

„რადგან კანონი ახალი შესულია ძალაში. გონივრული იქნება, სასამართლოს თუ აქვს რესურსი, შეამოწმოს, ამ საკითხზე არის თუ არა ნამსჯელი [იუსტიციის უმაღლეს საბჭოში]“

11:57 ადვოკატი ნათია კოტრიკაძე ასევე მიმართავს მოსამართლეს:

„ბევრ ადვოკატს ეხსომება – 2012 წლის შემდეგ მიიღეს კანონი, რომლითაც ვამაყობდით დღემდე. წინა ხელისუფლების დროს საჯაროობა იყო დახურული. 2012 წლიდან საჯარო გახდა პროცესების გაშუქება. თქვენ არაერთხელ გითქვამთ, რომ სწრაფი მართლსაჯულება გსურთ, არ მოხდეს პროცესის გაჭიანურება და მიიღოთ ის გადაწყვეტილება, რაც უნდა მიიღოთ.

ცნობილია, რასაც მიიღებთ, მაგრამ გამომდინარე დღევანდელი მდგომარეობიდან, სამოქალაქო საზოგადოებას აინტერესებს, რა ხდება სასამართლო პროცესებზე. ბევრი ვერ ახერხებს მოსვლას და ტელევიზიით იღებს ინფორმაციას. დააგვიანდათ ე.წ. ხელისუფლებას აღნიშნული კანონის მიღება. გამომდინარე იქიდან, რომ საზოგადოებრივი ადვოკატებს წინა პროცესზე დიდი გამოხმაურება მოჰყვათ და მადლობას ვეუბნები მათი პოზიციის გამო“.

12:01 ანდრო ჭიჭინაძე: “ყველას სახელით ვამბობ, რომ მოვითხოვთ, შემოვიდეს კამერა დარბაზში. გთხოვთ, რომ ჩადოთ ძალისხმევა ამაში. მნიშვნელოვანია, რომ ინფორმაცია მივიდეს იმ ადამიანებამდე, ვისაც ეს ყველაფერი აინტერესებს. რატომ მიიღეს ეს კანონი — პროპაგანდისტულად არ გამოუვიდათ ის, რაც უნდოდათ. რასაც ჩვენ გვაბრალებენ, ის აბსურდული მუხლი და მთელი ეს საერთო აბსურდი რომ გამოსვლოდათ, ამ კანონს არ მიიღებდნენ. ვერ შეძლეს ის, რაც ჩაფიქრებული ჰქონდათ და გადაწყვიტეს, რომ ინფორმაცია უბრალოდ გაექროთ. დარწმუნებული ვარ, არ გამოვა”.

12:03 მოსამართლე ნინო გალუსტაშვილი: “სხდომა საჯაროა და დასწრება ღიაა. იუსტიციის უმაღლესი საბჭო იღებს გადაწყვეტილებას. დღევანდელი მოცემულობით გადაწყვეტილება არ მიუღიათ. ახლა ჩავატარებთ გადაღების გარეშე და თუ მათი გადაწყვეტილება იქნება სხვაგვარი, მიეცემათ ჟურნალისტებს გადაღების საშუალება”.

12:05 ადვოკატი ირაკლი ჩომახაშვილი მოსამართლეს: ვერ გავიგე პასუხი, სასამართლოს უფლებამოსილმა პირმა ხომ უნდა განახორციელოს გადაღება? რატომ არ არის აქ? გავიგეთ, რომ „ტვ პირველი“ არ არის აქ და არ იღებს.

ვინ არის სასამართლოს უფლებამოსილი პირი, სად არის ის კამერა?

სად არის პრესსამსახური? […] რაც არ უნდა მოხდეს, ინფორმაცია მაინც გავრცელდება. ხედავთ, რომ ისევე ვაგრძელებთ ბრძოლას”.

ნინო გალუსტაშვილი: „ყველაფერი კარგად დამთავრდება“.

12:12 შუამდგომლობას აყენებს რეზო აჭარაძე, ირაკლი ქერაშვილის ადვოკატი. შეგახსენებთ, რომ რეზო აჭარაძე გასულ ორ სხდომას არ დასწრებია. თუმცა ეს არყოფნა იყო საპატიო და დიდი ხნით ადრე იყო ინფორმირებული სასამართლო.

ამის მიუხედავად, მოსამართლე ნინო გალუსტაშვილმა მის არყოფნაში სხდომები მაინც ჩანიშნა და არამარტო ირაკლი ქერაშვილს, არამედ ყველა ბრალდებულისთვის იძულებით დანიშნა საზოგადოებრივი ადვოკატები.

„ეს გადაწყვეტილება კანონიდან არ გამომდინარეობდა. ირაკლი ქერაშვილის შემთხვევაშიც კი არ იყო კანონიერი. […] სისხლის სამართლის საპროცესო კოდექსის 42-ე მუხლის საფუძველზე, სავალდებულო წესით დანიშნული ადვოკატი უნდა ჩამოსცილდეს საქმის განხილვას, როცა კერძო შეთანხმებით ადვოკატი უბრუნდება განხილვას. ფორმალურად დავარქვათ ამას შეუამდგომლობა, თორემ ეს ავტომატურად უნდა ხდებოდეს. მე ვაგრძელებ ირაკლი ქერაშვილის დაცვას, თავად ირაკლი ქერაშვილს სურს, რომ მე ვიყო მისი წარმომადგენელი.“

ნინო გალუსტაშვილი თვლის, რომ ამაზე ნამსჯელი აქვს. ადვოკატები ეუბნებიან, რომ არ უმსჯელია და საკუთარი გადაწყვეტილება არ დაუსაბუთებია სამართლებრივად.

12:18 განცხადებას აკეთებს საზოგადოებრივი ადვოკატი ირაკლი ბენია, რომელმაც წინა სხდომაზე დააყენა შუამდგომლობა, პროცესის განახლება გადადებულიყო, რათა საზოგადოებრივ ადვოკატებს საქმის მასალების, გასული სხდომების ოქმების გაცნობა მოესწროთ.

მაშინ ნინო გალუსტაშვილმა თავის მიერვე იძულებით დანიშნული საზოგადოებრივი ადვოკატების პოზიცია არ გაითვალისწინა. საზოგადოებრივი ადვოკატები მას დღესაც ეუბნებიან, რომ მაქსიმალური ძალისხმების მიუხედავად, საქმის მასალებს ჯერ კიდევ არ იცნობენ.

12:22 გამოიძახეს მოწმე გრიგოლ კაჭკაჭიშვილი, რომელიც ასევე არის მოწმე გიორგი ახობაძის საქმეში.

12:23 განცხადებას აკეთებს ირაკლი ქერაშვილი და ამბობს, რომ ონისე ცხადაძის მიმართ სოლიდარობის ნიშნად, ხვალინდელი, 1-ელი ივლისის სხდომა გადაიდოს, რამდენადაც, ხვალ კრძალავენ ონისე ცხადაძის მამას თერჯოლაში.

12:25 მოწმე გრიგოლ კაჭკაჭიშვილი ამბობს, რომ „მე და ჩემს ორ თანამშრომელს, ალადაშვილს და ჟორდანიას გადმოგვეცა სასამართლოს განჩინება, რომ განგვეხორციელებინა ანდრო ჭიჭინაძის პირადი ჩხრეკა. მას ფიზიკურად არ ვიცნობდი. გვაჩვენა [გამომძიებელმა] აღნიშნული პიროვნება და ორ ჯგუფთან ერთად, ორი ავტომანქანით წავედით. სხვა თანაშრომლებთან ერთად იმყოფებოდა გიორგი ლობჟანიძე და ჩვენ მის საცხოვრებელ ბინაში განვახორციელეთ ჩხრეკა და დაკავება.“

12:29 დაიწყო ჯვარედინი დაკითხვა. მოწმეს კითხვებს უსვამს ანდრო ჭიჭინაძის ადვოკატი თორნიკე მიგინეიშვილი.

„საკმაოდ ცნობილი იყო იქ მყოფი [რუსთაველზე] მოქალაქეები რას და როგორ იქცეოდნენ. ეჭვი არ შემიტანია სასამართლოს განჩინებებში“, — ამბობს კაჭკაჭიშვილი.

12:34 მოწმე გრიგოლ კაჭკაჭიშვილი ამბობს, რომ უკანონო არაფერი ამოუღიათ ანდრო ჭიჭინაძისგან. თუმცა ირკვევა, რომ ამოღებულია ანდრო ჭიჭინაძის ტელეფონი, რომლის ადგილსამყოფელი ახლა უცნობია ანდრო ჭიჭინაძის ოჯახისთვისაც და მისი ადვოკატებისთვისაც.

12:41 მოწმე პოლიციელი კაჭკაჭიშვილი პასუხობს კითხვას, ცნობილია თუ არა მისთვის პიროვნების შესახებ, რომელიც ამბობდა, რომ მას კონკრეტული მოქმედებით ანდრო ჭიჭინაძემ მიაყენა ზიანი ან შეუქმნა მას საფრთხე.
კაჭკაჭიშვილი ამბობს, რომ ასეთი პიროვნების შესახებ მისთვის ცნობილი არ არის.

12:43 მოწმე პოლიციელი კაჭკაჭიშვილი ამბობს, რომ ჩხრეკაზე და დასაკავებლად მისულს, ბინის კარი პოლიციას თავად ანდრო ჭიჭინაძემ გაუღო, ანდრო ჭიჭინაძეს მათთვის არც შეურაცხყოფა მიუყენებია და არანაირი აგრესია არ გამოუხატავს.

12:47 მიკროფონთანაა ანდრო ჭიჭინაძე, რომელსაც მარჯვენა ფეხი ჰქონდა დაზიანებული, როცა პოლიცია მასთან გასაჩხრეკად და დასაკავებლად მივიდა.

ანდრო ჭიჭინაძე ეკითხება მოწმე კაჭკაჭიშვილს, ახსოვს თუ არა, რა უთხრა ანდრო ჭიჭინაძემ მას ფეხის დაზიანებაზე.

ანდრო ჭიჭინაძე: გითხარით იქვე, რომ არ ეწერა ოქმში, პოლიციელმა მომაყენა დაზიანება. კონკრეტულად პოლიციის მხრიდან ნასროლი სარაჯიშვილის ბოთლი რომ მომხვდა, ეგ გითხარით და არ ჩაგიწერიათ. დაიტოვეთ ლავირების საშუალება, თითქოს ვიღაც გამვლელს შეეძლო ესროლა.

მოწმე: თქვენ ისიც მითხარით, გაბრაზებულზე მოვიქნიე კეტიო.

ანდრო: რაო რა მოვიქნიეო?

მოწმე: წერია, რაც მითხარით. არ მახსოვს.

12:52 ანდრო ჭიჭინაძე: ვერ ვიგებდი, რატომ იყავით მოსულები საერთოდ და ამიტომ არ მოვაწერე ხელი ოქმსაც. […] პოლიციელების აბსოლუტური უმრავლესობა ამბობდა, რომ ეს ჯგუფი მალე დაიშლება და 2000-ლარიანი ჯარიმით გახვალთ გარეთო.

მოწმე უარყოფს, რომ მსგავს საუბარს ადგილი ჰქონდა.

ანდრო ჭიჭინაძე: ამაზე თქვენ პასუხი გქონდათ, რომ რაღაც ზედმეტად მშვიდად ხარ და მართლა რამე ხომ არ ჩაგიდენიაო?

მოწმე უარყოფს, ამბობს, რომ მსგავსი საუბარი არ ახსოვს.

12:54 ადვოკატი თორნიკე მიგინეიშვილი: ხელკეტს ახსენებთ და სადმე ასახეთ?

მოწმე: ეს არსად არ წერია, პირად საუბარში რაც მითხრა, მაგას ვყვები. ჰაერზე ნათქვამს ვერსად დავწერდი.

12:57  სასამართლო დარბაზში შემოდის მოწმე გიორგი ქაჩლიშვილი, რევაზ კიკნაძის ჩხრეკასა და დაკავებაში მონაწილე პოლიციელი.

13:00 მოწმე გიორგი ქაჩლიშვილი ჰყვება რეზო კიკნაძის დაკავების ამბავს 6 დეკემბერს ლისის ტბის მიმდებარედ: მისი „რუკზაკიდან“ ამოვიღე პირბადეები, სასტვენი, ცხვირსახოცი, ქუდი, ფულადი თანხა. მოვახდინე მისი დაკავება სასამართლოს განჩინების საფუძველზე. პირადად გაეცნო სასამართლოს განჩინებას. დავლუქე ნივთები სპეც-პაკეტებში. პაკეტებსაც მოაწერა ხელი. გაეცნო განჩინებას მისი ბრალდებულის სახით დაკავებაზე. დაკავების ოქმსაც მოაწერა ხელი და გადავიყვანეთ ჩემს სამსახურში.

13:03 მოწმე გიორგი ქაჩლიშვილი: „რეზო კიკნაძის დაკავებისაც ჩხრეკაში მონაწილეობდნენ ნიკა ბუკია და ბაჩუკი ოშხერელი.

ჩემს სამსახურში მიყვანის შემდეგ, ოქმები გადავეცი მთავარ გამომძიებელს და დავინტერესდი რეზო კიკნაძის მიმართ რა მტკიცებულებები იყო და რის საფუძველზე იყო დაკავებული. რა დროსაც გამომძიებლის კომპიუტერში ვნახე მოკლე ფრაგმენტი, რეზო კიკნაძის მოქმედებები, რასაც აკეთებდა აქციების დროს. ისროდა ნივთებს. ზუსტად ის ტანსაცმელი ეცვა, რაც დაკავებისას. ეს ტანსაცმელი რომ წაეღო კაპეზეში, შეიძლება გაენადგურებინა და მოვახდინე ტანსაცმლის ამოღება.“

13:03 მოწმე გიორგი ქაჩლიშვილი: „რეზო კიკნაძის დაკავებისაც ჩხრეკაში მონაწილეობდნენ ნიკა ბუკია და ბაჩუკი ოშხერელი.

ჩემს სამსახურში მიყვანის შემდეგ, ოქმები გადავეცი მთავარ გამომძიებელს და დავინტერესდი რეზო კიკნაძის მიმართ რა მტკიცებულებები იყო და რის საფუძველზე იყო დაკავებული. რა დროსაც გამომძიებლის კომპიუტერში ვნახე მოკლე ფრაგმენტი, რეზო კიკნაძის მოქმედებები, რასაც აკეთებდა აქციების დროს. ისროდა ნივთებს. ზუსტად ის ტანსაცმელი ეცვა, რაც დაკავებისას. ეს ტანსაცმელი რომ წაეღო კაპეზეში, შეიძლება გაენადგურებინა და მოვახდინე ტანსაცმლის ამოღება.“

13:08 რეზო კიკნაძის დამკავებელ მოწმე გიორგი ქაჩლიშვილის მისამართით კითხვებს სვამს რეზო კიკნაძის ადვოკატი გუჯა ავსაჯანიშვილი.

„რევაზ კიკნაძის მიმართ არაადამიანურ მოპყრობასთან დაკავშირებით სპეციალურ საგამოძიებო სამსახურს დაწყებული აქვს გამოძიება. დაგკითხეს თუ არა, საგამოძიებო მოქმედებებთან დაკავშირებით?“ მოწმე პასუხობს, რომ დაკითხულია.

რეზო კიკნაძის ადვოკატის, გუჯა ავსაჯანიშვილის მხრიდან კიკნაძის დამკავებელი მოწმის ჯვარედინი დაკითხვისას ირკვევა, რომ მოწმე იმყოფებოდა აღმაშენებლის ხეივანში, როცა მას მიაწოდეს ოპერატიული ინფორმაცია რეზო კიკნაძის ადგილსამყოფლის შესახებ.

ადვოკატი ეკითხება ტელეფონის ნომერს, რომლითაც რეზო კიკნაძის დაკავებისას სარგებლობდა. მოწმე წერილობით და ნომრის გაუხმოვანებლად აძლევს ადვოკატს ტელეფონს. ადვოკატი ნომერს ახმოვანებს. ნომრის ხმამაღლა გაჟღერებას აპროტესტებენ პროკურორები და ამბობენ, რომ ადვოკატის მიზანია, მოწმეს ხალხმა ურეკოს.

13:21 მოწმე ქაჩლიშვილი ჰყვება, რომ რეზო კიკნაძის დაკავების ადგილას იყო მშენებარე ობიექტები და არავინ იმყოფებოდა რეზო კიკნაძის გარდა.

13:22 ადვოკატი თორნიკე მიგინეიშვილი სთხოვს მოსამართლეს, დაუშვას ტელეჟურნალისტები დარბაზში, რომლებიც ჩართვებისთვის გავიდნენ. ტელეჟურნალისტებს დღევანდლამდე სხდომათა დარბაზებში შესვლა და გამოსვლა შეეძლოთ.

„თქვენ ნუ ნერვიულობთ, შესვენების შემდეგ შემოვლენ“, — პასუხობს მოსამართლე.

13:28 დიალოგი რეზო კიკნაძის ადვოკატსა და დამკავებელ პოლიციელს შორის:

ადვოკატი: რევაზ კიკნაძეს ტანსაცმელი რომ გახადეთ, რა ჩააცვით.

მოწმე: მისმა დედამ გამოატანა ტანსაცმელი ბინის ჩხრეკის მერე და ის ჩავაცვით.

ადვოკატი: დედასთან დარეკილი გქონდათ?

მოწმე: არა.

ადვოკატი: გადაუდებელი იყო ტანსაცმლის ამოღება?

მოწმე: დიახ. სანამ იზოლატორში წავიდოდა, მისი ტანსაცმელი უნდა ამოღებულიყო.

ადვოკატი: კიკნაძის სახლიდან რომ მოჰქონდათ ტანსაცმელი. თქვენ დარეკეთ და უთხარით წამოეღოთ?

მოწმე: დედამ გამოატანა. არავის უთქვამს გამოატანეო. რომ შეატყობინეს, რომ დაკავებულია მისი შვილი და შეიძლება 2-3 დღე იზოლატორში იყოს და ა.შ. ალბათ დედამისმა ამიტომ მიიღო გადაწყვეტილება და გამოატანა ტანსაცმელი, რომ 3-4 დღის განმავლობაში ერთი და იგივე ტანსაცმელი არ სცმოდა.

ადვოკატი: ცეკაპედეს თანამშრომლებს ასე სხვა დროსაც დაატარებთ ხოლმე ბრალდებულების ტანსაცმლით?

მოწმე: როდესაც ოჯახის წევრი სთხოვს.

13:34 რეზო კიკნაძის ადვოკატი: თქვენ გამორიცხავთ, რომ ბუკიამ და ოშხანელმა რეზო კიკნაძე მანამდე მეტროსადგურში ნახეს?

კიკნაძის დამკავებელი მოწმე ქაჩლიშვილი: ლისის ტბის შესახვევში შევხვდი ამ თანამშრომლებს და ვიცანი, რომ ჩემი თანამშრომლები იყვნენ. როცა მივედით იქ, სადაც დავაკავეთ, მანქანიდან გადმოვიდნენ მხოლოდ თანამშრომლები და იქ ვნახეთ მხოლოდ რეზო კიკნაძე.

ირაკლი დგებუაძის მეგობარი ქალის მხრიდან სავარაუდო მუქარაზე გამოძიება არ დაიწყო

შინაგან საქმეთა სამინისტროს პრესცენტრში „ბათუმელებს“ ვერ უთხრეს, დაიწყო თუ არა გამოძიება ბათუმის პოლიციის უფროსის, ირაკლი დგებუაძის მეგობარი ქალის მხრიდან სავარაუდო მუქარის ფაქტზე.

შსს-ს პრესცენტრის წარმომადგენლმა ,,ბათუმელებს”  უთხრა, რომ აღნიშნულ ამბავზე სამართლებრივი რეაგირების დაწყების შემთხვევაში ინფორმაციას მოგვაწვდის.

საუბარია შემდეგ ფაქტზე – „ბათუმელებმა“ 29 ივნისს გამოაქვეყნა მოქალაქე ნინო კაჭკაჭიშვილის მიერ გადაღებული ვიდეო – ირაკლი დგებუაძის მეგობარი ქალის, მარიამ გერლიანის ბარში ღამის ოთხის ნახევარზე ხმაურია, ამ ბარის ზემოთ მცხოვრები ნინო კაჭკაჭიშვილი კი, პოლიციას მიმართავს, თუმცა ბარიდან გამომავალ ხმაურზე პოლიციელები არ რეაგირებენ. გამოძახებული პოლიციელები „ბოჰემასთან“ მიდიან, აშკარად ესმით ხმაური, თუმცა ისე იქცევიან, თითქოს არაფერი ხდება.

ამ ვიდეოს გამოქვეყნებიდან რამდენიმე წუთში, ნინო კაჭკაჭიშვილის თქმით, ბართან ირაკლი დგებუაძე გამოჩნდა მეგობარ ქალთან ერთად.

„პირდაპირ აივნისკენ ამოიხედეს, თვალი არ მოუშორებიათ, ზუსტად დააფიქსირეს, რომ მე ვარ. კაცებს ხმა არ ამოუღიათ, მხოლოდ განმგმირავი მზერით შემოიფარგლნენ, ქალმა კი შემაგინა ხმამაღლა – „დედას მოგ…ო“, – უთხრა „ბათუმელებს“ ნინო კაჭკაჭიშვილმა.

ბარი „ბოჰემა“ ძველ ბათუმში მდებარეობს და ის ბათუმის პოლიციის უფროსის, ირაკლი დგებუაძის მეგობარი ქალის – მარიამ გერლიანის საკუთრებაა.

ძველ ბათუმში, კოსტავას ქუჩაზე მცხოვრები მოქალაქეების თქმით, კვირაში 3 ღამე ამ ბარიდან გამომავალი ხმაურის გამო, ფაქტობრივად, ძილს ვერ ახერხებენ. ისინი ყოველ ჯერზე იძახებენ მუნიციპალურ ინსპექციას, პოლიციას, თუმცა ვითარება არ იცვლება.

ფოტოზე: კადრები დგებუაძის მეგობარი ქალის ბართან გადაღებული ვიდეოდან. 

ამ თემაზე:

„მემუქრებიან“ – მოქალაქე, რომელმაც ირაკლი დგებუაძის მეგობარი ქალის ბარი გადაიღო

„არ გავცემთ ჩვენი დაცვის ქვეშ მყოფ ადამიანებზე ცნობებს“ – არასამთავრობოების გზავნილი ივანიშვილს

სააპელაციო სასამართლომ ძალაში დატოვა რაჟდენ კუპრაშვილის ბიუროს მოთხოვნა, რომელიც არასამთავრობო ორგანიზაციებიდან ბენეფიციართა შესახებ პერსონალურ ინფორმაციას ითხოვდა.

სააპელაციო სასამართლოს გადაწყვეტილება, რომელ სასამართლოსაც ბრიტანეთის და აშშ-ს მიერ სანქცირებული მიხეილ ჩინჩალაძე ხელმძღვანელობს, დღეს, 30 ივნისს გააცნეს მოქალაქეებს არასამთავრობო სექტორის წარმომადგენლებმა.

გთავაზობთ მათ მიმართვას საზოგადოებისადმი:

„ჩვენ, ქართული არასამთავრობო ორგანიზაციები, კვლავ ვაპროტესტებთ ივანიშვილი/კუპრაშვილის ანტიკორუფციული ბიუროს უკანონო მოთხოვნებს, რომელიც კლანურმა სასამართლომ მორჩილად დააკმაყოფილა.

2025 წლის ივნისში ივანიშვილ-კუპრაშვილის ბიურომ მურუსიძის სასამართლოს მეშვეობით მოგვთხოვა პერსონალური ინფორმაციის მიწოდება ჩვენი დაცვის ქვეშ მყოფი ადამიანების – წამების მსხვერპლების, ძალადობის მსხვერპლი ქალების, მოსწავლეების, სტუდენტების, მასწავლებლების, პენსიონერების, შშმ პირების, მეწარმეების, მამხილებლების, ჟურნალისტების, დამკვირვებლების, უკანონოდ გათავისუფლებული საჯარო მოხელეების შესახებ, ასევე ინფორმაცია ჩვენს საქმიანობასთან დაკავშირებით.

სააპელაციო სასამართლომ, რომლის თავმჯდომარე აშშ-სა და ბრიტანეთისგან სანქცირებული ჩინჩალაძეა, ჩვენი საჩივარი არ დააკმაყოფილა და გადაწყვეტილება სულ ცოტა 10 კანონის დარღვევით გამოიტანა.

მოთხოვნები, მათ შორის, ეწინააღმდეგება:

  •  საქართველოს კონსტიტუციას;
  •  პერსონალურ მონაცემთა დაცვის კანონმდებლობას;
  • -უფლებადამცველთა კონფიდენციალობის საერთაშორისო სტანდარტებს;
  •  ადამიანის უფლებათა ევროპულ კონვენციას და ევროპული სასამართლოს პრაქტიკას.

კიდევ ერთხელ ცალსახად ვაცხადებთ, არ ვაპირებთ ჩვენი მოქალაქეების ნდობის ღალატს. არავის მივცემთ წვდომას იმ ადამიანების კონფიდენციალურ ინფორმაციაზე, ვისაც ჩვენ დავხმარებივართ.

ჩვენ ანგარიშვალდებული ვართ მოქალაქეების და არა ივანიშვილის მიმართ.

ჩვენს საქმიანობასთან, ფინანსებთან, პროექტებთან და საერთაშორისო თანამშრომლობასთან დაკავშირებულ ინფორმაციას, რისი გასაჯაროებაც არ იკრძალება კონსტიტუციით და სხვა კანონმდებლობებით, შეუძლიათ გაეცნონ ჩვენს ვებ გვერდებსა და სოციალურ ქსელებში, ამიტომ, ჩვენ მათ დამატებით დოკუმენტებს არ გავუგზავნით.

ივანიშვილი თავისი რეპრესიული პოლიტიკის ფარგლებში ქართული სამოქალაქო საზოგადოებრივი ორგანიზაციების განადგურებას პუტინის რუსეთის მსგავსად ცდილობს. ეს ივანიშვილის ანტი-დასავლური პოლიტიკის ნაწილია, რომელიც ქვეყანაში დემოკრატიის მოშლას და საერთაშორისო პარტნიორებთან ურთიერთობების განადგურებას ემსახურება.

კიდევ ერთხელ ვაცხადებთ, რომ რუსული კანონებით ცხოვრებას არ ვაპირებთ და ვაგრძელებთ ბრძოლას ქართველი ხალხის უფლებების დასაცავად“.

 

რუსეთის და უკრაინის სამხედრო დანაკარგები ომში – 30 ივნისი

უკრაინის შეიარაღებული ძალების გენერალური შტაბის დღევანდელი მონაცემებით, ომის დაწყებიდან 2025 წლის 30 ივნისამდე პერიოდში, რუსეთის არმიის საბრძოლო დანაკარგი არის:

  • ცოცხალი ძალა – დაახლოებით 1 020 010 ადამიანი [გასულ დღე-ღამეში +1 070]
  • ტანკი – 10 980 ერთეული [+4]
  • ჯავშანტექნიკა – 22 922 ერთეული [+7]
  • საარტილერიო სისტემა – 29 718 ერთეული [+29]
  • MLRS – 1 427 ერთეული [+2]
  • საზენიტო საბრძოლო სისტემა – 1 190 ერთეული [+1]
  • თვითმფრინავი – 420 ერთეული [+0]
  • ვერტმფრენი – 340 ერთეული [+3]
  • უპილოტო საფრენი აპარატის ოპერატიულ-ტაქტიკური დონე – 42 796 ერთეული [+172]
  • ფრთოსანი რაკეტა [ჩამოაგდეს] – 3 436 ერთეული [+42]
  • გემი/ნავი – 28 ერთეული [+0]
  • წყალქვეშა ნავი – 1 ერთეული [+0]
  • მანქანები და საწვავის ავზები – 53 593 ერთეული [+85]
  • სპეცტექნიკა – 3 921 ერთეული [+0]

უკრაინის გენერალური შტაბის განცხადებით, საომარი მოქმედებების მაღალი ინტენსივობის გამო მონაცემები იცვლება.

უკრაინის სამხედრო დანაკარგებზე ინფორმაცია განაახლა რუსეთმაც.

რუსეთის თავდაცვის სამინისტროს მიერ გავრცელებული მონაცემებით, ომის დაწყებიდან 2025 წლის 30 ივნისამდე პერიოდში სულ განადგურებულია უკრაინის:

  • 663 თვითმფრინავი
  • 283 ვერტმფრენი
  • 66 304 უპილოტო საფრენი აპარატი
  • 612 საზენიტო სარაკეტო სისტემა
  • 24 094 ტანკი და სხვა ჯავშანტექნიკა
  • 1 572 მრავალჯერადი სარაკეტო გამშვები
  • 26 800 საველე არტილერია და ნაღმმტყორცნი
  • 37 481 სპეციალური სამხედრო მანქანა

რუსეთის თავდაცვა, ამ მონაცემებთან ერთად, უკრაინის არმიის ცოცხალი ძალის დანაკარგების შესახებ სტატისტიკას არ აქვეყნებს.

ეს ის მონაცემებია, რომელსაც უკრაინა და რუსეთი ოფიციალურად ავრცელებენ, თუმცა ომის პირობებში შეუძლებელია ზუსტად გადამოწმება, რამდენად შეესაბამება მხარეების მიერ გავრცელებული ინფორმაცია დანაკარგების შესახებ რეალურ რიცხვებს.

—

რუსეთი უკრაინაში 2022 წლის 24 თებერვალს გამთენიისას შეიჭრა და სრულმასშტაბიანი ომი დაიწყო.

ამავე თემაზე:

ომის დაწყების შემდეგ რუსეთმა უკრაინაზე ყველაზე მასშტაბური საჰაერო თავდასხმა განახორციელა

 

 

მთავარი ფოტო: უკრაინის გენშტაბი/facebook

„მოვითხოვთ, შეწყდეს თანამოქალაქეების პოლიტიკურად მოტივირებული დევნა“- ზალდასტანიშვილის აკადემია

გივი ზალდასტანიშვილის სახელობის ამერიკული აკადემიის თანამშრომელთა და კურსდამთავრებულთა ნაწილი ერთობლივ განცხადებას აქვეყნებს. ისინი გმობენ საქართველოში მიმდინარე რეპრესიებს, რომელსაც „ქართული ოცნება“ ატარებს.

„ბათუმელები“ განცხადებას უცვლელად გთავაზობთ:

„ჩვენ, გივი ზალდასტანიშვილის სახელობის ამერიკული აკადემიის მასწავლებლები, თანამშრომლები, კურსდამთავრებულები და სამეთვალყურეო საბჭოს წევრები შეშფოთებულები ვართ იმ რეპრესიული პოლიტიკით, რომელსაც ხელისუფლება ახორციელებს სამოქალაქო საზოგადოების მიმართ.

პოლიტიკური რეპრესიების სამიზნე გახდნენ ყველა პროფესიისა და ასაკობრივი ჯგუფის წარმომადგენლები. სხვა მოქალაქეებთან ერთად, დაპატიმრებულები არიან ჩვენი სკოლის დამფუძნებლები მამუკა ხაზარაძე და ბადრი ჯაფარიძე, ჩვენი სკოლის პედაგოგის მეუღლე ნინო დათაშვილი, ჩვენი კურსდამთავრებულის მეუღლე – გიორგი ვაშაძე.

ჩვენი სკოლა დაფუძნდა გივი ზალდასტანიშვილის რწმენით, რომ საქართველო არასდროს აღარ იქნებოდა ტოტალიტარული სახელმწიფო და ქართველი ახალგაზრდები გახდებოდნენ დემოკრატიული სამყაროს ღირსეული წევრები. სამწუხაროდ, დღეს, ორივე მიზანი ისე შორსაა, როგორც არასდროს.

მოვითხოვთ, რომ შეწყდეს ჩვენი სკოლის დამფუძნებლების, მასწავლებლებისა და კურსდამთავრებულების ოჯახის წევრებისა და ყველა ჩვენი თანამოქალაქის პოლიტიკურად მოტივირებული დევნა,“- ნათქვამია განცხადებაში.

 

„რეჟიმმა ჯერ ვერ შეძლო გათითოკაცება, რაც დიქტატურის წინაპირობაა“ – ინტერვიუ

„არგუმენტაცია – თუ ხმას არ ამოვიღებთ, რეჟიმი შესაძლოა ჩვენ არ შეგვეხოს, არის იმის მაჩვენებელი, რომ რეჟიმმა ჯერჯერობით ვერ შეძლო საქართველოს მოსახლეობის, ქართული საზოგადოების გათითოკაცება, რაც მთავარი წინაპირობაა იმის, რომ დიქტატურა დამყარდეს – არ უნდა მაინტერესებდეს ჩემს მეზობელს დაიჭერენ, დახვრეტენ, თუ გადაასახლებენ. მთავარია, მე არ შემეხონ,“ – მიიჩნევს პუბლიცისტი ზაალ ანდრონიკაშვილი. მას წინააღმდეგობაზე ვესაუბრეთ, რომელიც საქართველოში უკვე 214 დღეა გრძელდება.

ზაალ ანდრონიკაშვილს ვესაუბრეთ რუსული პროპაგანდის ერთ-ერთი არგუმენტის გააქტიურებაზე: „თუ ჩუმად ვიქნები, არ შემეხებიან“. პუბლიცისტი ასაბუთებს, რატომ არის ეს ილუზიაა.

„ბათუმელებმა“ პუბლიცისტ ზაალ ანდრონიკაშვილთან ინტერვიუ ჩაწერა:

  • ბატონო ზაალ, დღეს დაანონსებულ აქციაზე მინდა გკითხოთ: ყოველდღიურად იმართება აქციები უკვე 214 დღეა. რა გავლენა შეიძლება ჰქონდეს მასშტაბურ დემონსტრაციებს არსებული რეპრესიების პირობებში? 

ეს ძალიან მნიშვნელოვანია სხვადასხვა მიზეზის გამო. პირველ რიგში, სიმბოლური მნიშვნელობა ძალიან დიდია – აჩვენებს, რომ გრანდიოზული რეპრესიების მიუხედავად, იმის მიუხედავად, რომ ყოველდღიურ რეჟიმში კანონმდებლობა იცვლება და არალეგიტიმური პარლამენტი იღებს კანონებს, შემდგარია იმ გზაზე, რომ საქართველო ჩამოაყალიბოს უკანონო სახელმწიფოდ, დიქტატურად, სახელმწიფოდ, სადაც კანონი მოქმედებს არა სამართლიანობის დაცვისთვის, არამედ იმისთვის, რომ გაამყაროს რეჟიმი.

სხვა მიზანი არ აქვს ახალ კანონებს, რასაც იღებს ის ორგანო, რომელსაც პარლამენტი ჰქვია და აკლია ლეგიტიმაცია, როგორც ქვეყნის შიგნით, ისე გარეთ.

მნიშვნელოვანია საპროტესტო აქციები იმიტომაც, რომ უამრავი ხალხია ჩაყრილი ციხეში უსამართლოდ – რამდენიმე ათეული პოლიტპატიმარი ჰყავს საქართველოს. მინდა ვახსენო მზია ამაღლობელი, რომელიც ერთ-ერთი სიმბოლოა ამ გაუტეხელი პროტესტის.

ამ აქციებმა აჩვენა ის, რომ ივანიშვილის რეჟიმმა ვერ მოახერხა პროტესტის გატეხა. ძალიან დიდი პატივისცემა მინდა გამოვხატო იმ ადამიანების მიმართ, რომლებიც მიუხედავად ყველაფრისა, ნახევარ წელიწადზე მეტია ყოველდღიურად დგანან ქუჩაში.

ეს აჩვენებს იმას, რომ საქართველო ჯერ კიდევ იბრძვის დემოკრატიისთვის და დიქტატურის წინააღმდეგ, სუვერენიტეტისთვის, იბრძვის უცხო ქვეყნის გავლენის წინააღმდეგ – ყველაფერი, რასაც აქეთ აბრალებს ივანიშვილის რეჟიმი ხალხს, რომელიც მას წინააღმდეგობას უწევს, აკეთებს ივანიშვილის რეჟიმი: მოქმედებს უცხო ძალის ინტერესებით და მოქმედებს საქართველოს სუვერენიტეტის წინააღმდეგ.

  • რეპრესიების გარდა ისევ აქტიურად მუშაობს პროპაგანდა დემოკრატიის წინააღმდეგ. ერთ-ერთ გზავნილზე მინდა გკითხოთ, რაც გააქტიურდა საზოგადოების ნაწილში: „თუ გავჩუმდები, სისტემა არ შემეხება, საბჭოთა კავშირში ხომ ასე ვცხოვრობდით?“ 

ივანიშვილის რეჟიმი რეალურად მართლაც ცდილობს ილუზიის შექმნას, რომ ჩვენ საბჭოთა კავშირში დავბრუნდებით. ამისთვის ის მართლაც ბევრ რამეს აკეთებს, რომ საქართველო დაემსგავსოს საბჭოთა კავშირს, როგორც უსამართლო სახელმწიფო.

ტოტალიტარული შეიძლება ვერ იყოს ივანიშვილის რეჟიმი მცირე მასშტაბის გამო, მაგრამ მას სურს რეჟიმი, რომელიც მთლიანად აკონტროლებს თავისუფლებას – პირველ რიგში, მოქალაქეებს ართმევს გამოხატვის თავისუფლებას.

არგუმენტაცია, რომ თუ ხმას არ ამოვიღებთ, რეჟიმი შესაძლოა ჩვენ არ შეგვეხოს, არის იმის მაჩვენებელი, რომ რეჟიმმა საქართველოში ჯერჯერობით ვერ შეძლო საქართველოს მოსახლეობის, ქართული საზოგადოების გათითოკაცება, რაც მთავარი წინაპირობაა იმის, რომ დიქტატურა დამყარდეს.

ამისთვის საჭიროა ის, რომ ხალხი იყო გათიშული ერთმანეთისგან, არ იყოს სოლიდარული ერთმანეთის მიმართ, არ უნდა ვიცოდე და არ მაინტერესებდეს ჩემს მეზობელს დაიჭერენ, დახვრეტენ, თუ გადაასახლებენ. მთავარია, მე არ შემეხონ.

კლასიკური ნაშრომები რომ გადავიკითხოთ ტოტალიტარიზმის თეორიაში, მაგალითად, ჰანა არენდტის წიგნი ტოტალიტარიზმის შესახებ, რაც იყო პირველი მცდელობა პოლიტიკურ თეორიაში ტოტალიტარული რეჟიმების აღწერისა – გათითოკაცება არის ანი და ჰოე ტოტალიტარულ სისტემაში.

ტოტალიტარიზმს სჭირდება საზოგადოების დეფრაგმენტაცია იმდენად, რომ საზოგადოება საზოგადოება აღარ იყოს, იყოს კრებული ცალკეული ადამიანების – ასე ცალკეულად რეჟიმი ყველას გატეხს იოლად, ვიდრე ერთად მდგომ ადამიანებს.

საქართველოს გერბს აწერია „ძალა ერთობაშია“. ეს არის გზავნილი: საქართველოს საზოგადოების სოლიდარობა ერთმანეთის მიმართ წინაპირობაა იმისთვის, რომ ჩვენ შევდგეთ, როგორც დემოკრატიული, დამოუკიდებელი, სუვერენული სახელმწიფო.

ივანიშვილის რეჟიმი იბრძვის იმისთვის, რომ დეფრაგმენტაცია გამოიწვიოს, ადამიანებში გააჩინოს შეგრძნება: მე თუ ხმას ამოვიღებ, რეჟიმი მე არ შემეხება, მაგრამ ეს მცდარი აზრია: როდესაც ქვეყანაში მყარდება უკანონობა, არამხოლოდ დიქტატურა, არამედ სისტემა, სადაც არსებობენ მთავრობასთან დაკავშირებული, პრივილეგირებული ადამიანები, რეჟიმის ბობოლები და მათი ოჯახის წევრები, ძალოვანი სტრუქტურები, რეჟიმის მსხვერპლი შეიძლება აღმოჩნდეს ნებისმიერი ადამიანი.

ამ დროს არავითარი დაცვა არც საკანონმდებლო და არც საზოგადოებრივი მოქალაქეს არ აქვს.

  • თუ მოქალაქე აღმოჩნდება სისტემის სამიზნე? 

წარმოიდგინეთ, რომ გაქვთ სახლი, რომელიც რაღაცისგან გიცავს: სიცხისგან, სიცივისგან. უცებ რომ წარმოვიდგინოთ, რომ სახლი აღარ გაქვთ და ივარაუდოთ, რომ წვიმა შეიძლება არ მოვიდეს, ან ქარმა არ დაუბეროს, მაგრამ თუ გაწვიმდება, აუცილებლად დასველდები და გაცივდები. ეს არის უსამართლობის და უთანასწორობის სისტემა, რომლის მსხვერპლიც აუცილებლად აღმოჩნდებით – შეიძლება კი არა, აუცილებლად აღმოჩნდებით!

ეს შეიძლება იყოს გაჩუმებული ადამიანის შვილი, რომლის შვილიც ვერ დასაქმდება, ან არ დააწინაურებენ, რადგან ეს ადგილი პრივილეგირებული ადამიანის შვილისაა, ან მაგალითად, დღეს გაჩუმებული ადამიანის მეზობელს შეიძლება მოუნდეს მისთვის მიწის წართმევა, მას კი, ვერაფერი იცავს – საბჭოთა კავშირშიც არსებობდა ეს გამოცდილება.

ხალხს ახსოვს საბჭოთა კავშირი, ახსოვს, რომ ეს იყო არამხოლოდ სოციალური სისტემა, რომელიც მეტ-ნაკლებად იცავდა ყველა ადამიანს – ჰქონდა საბაზისო ხელფასი და შიმშილით არავინ კვდებოდა, ასევე, საქართველო იყო უზარმაზარ საბჭოთა, ჩრდილოვან ეკონომიკაში და ჩართული იყო საკმაოდ ხეირიანადაც.

მაგალითად, ვისაც ჰქონდა მანდარინის ბაღი, ან ვენახი, მას შეეძლო მშვენივრად ეცხოვრა საბჭოთა ეკონომიკიდან გამომდინარე – აგრარული პოტენციალი საქართველოს აძლევდა საშუალებას, რომ ეცხოვრა ბევრად უკეთესად, ვიდრე ცხოვრობდნენ საბჭოთა კავშირის სხვა ქვეყნებში.

მაგრამ დღეს ეს სისტემა მთლიანად მოშლილია. ილუზორულია ყველა იმ ადამიანის ეკონომიკური უზრუნველყოფა შეძლოს ივანიშვილის რეჟიმმა, რომელიც გაჩუმდება. პირიქით, გაიზრდება უმუშევრობა და სიღარიბე.

უზრუნველყოფილი იქნება ის ხალხი, რომელიც აქტიურად ჩაერთვება რეჟიმის მხარდაჭერაში: სახელმწიფო მოხელეები, ძალოვანი უწყებები და ასე შემდეგ. ამ ხალხის რაოდენობა ძალიან შეზღუდულია. სხვა დანარჩენი არის განწირულია სიღარიბისთვის. თავის დროზე თქვა კიდევაც ივანიშვილმა, ბევრი ადგილი არ არის საქართველოშიო…

ეს ნიშნავს იმას, რომ მიგრაცია კიდევ უფრო გაიზრდება და საქართველო დაპატარავდება. დაპატარავდება არამხოლოდ ადამიანების რაოდენობით, შეიძლება ტერიტორიულად. ეს არის სახელმწიფოს ჩამოშლის პროცესი.

ეს არ იქნება ძველი საბჭოთა კავშირი, საქართველოს არ ექნება საშუალება, ისარგებლოს, ასე ვთქვათ, იმ პრივილეგიებით და ხვრელებით, რაც არსებობდა საბჭოთა ეკონომიკის და განსაკუთრებით ჩრდილოვანი ეკონომიკის პირობებში, როცა შესაძლოა ვიღაცას ეთქვა, რომ პურ-მარილით ცხოვრობს, სუფრასთან დროის ტარებით.

ამის ილუზია დღეს არ უნდა ჰქონდეს არავის.

ერთადერთი, ვინც იქნება კარგად, იქნება ის წრე, რომელიც ემსახურება რეჟიმს – ყველა დანარჩენი იქნება ეკონომიკურად ცუდად, სამართლებრივად დაუცველი. ეს არის საფრთხე იმ ადამიანებისთვისაც კი, რომელიც ჩართულია რეჟიმის უშუალოდ მსახურებაში – ხედავთ, რომ ერთმანეთის მუდმივი ჭამაა, ერთმა კლანმა მეორე კლანი გააგდო, ამ შემთხვევაში ღარიბაშვილის კლანი ჩამოშორდა მთავრობას და დაიწყეს ვიღაცების დაჭერა.

რეალურად ამ სისტემაში ყველა უკიდურესად დაუცველია. საქართველოა დაუცველი, როგორც სახელმწიფო, როცა მისი სამხედრო პოტენციალი არის მიზანმიმართულად განადგურებული.

გამოდის ივანიშვილის წარმომადგენელი კობახიძე და ლაპარაკობს პატარა ქვეყანა ვართ, არ გვაქვს დიდი ამბიციაო. ასე ხდება საქართველოს დაპატარავება, რაც შეგნებული პოლიტიკის ნაწილია. დღეს ნებისმიერი საგარეო საფრთხის წინაშე საქართველო სრულიად დაუცველია, რომ აღარ ვილაპარაკოთ იმ უზარმაზარ საფრთხეზე, რომელიც ჩვენ გვყავს რუსეთის სახით.

ვინც ამბობს, რომ უნდა გავჩუმდეთ და წყნარად ვიცხოვრებთ, შემდეგი ეტაპი შეიძლება იყოს არა ის, რომ რუსული სამხედრო საფრთხის წინაშე აღმოჩნდნენ, არამედ პირდაპირ გარეკონ რუსეთის შეიარაღებულ ძალებში.

საბჭოთა კავშირის ისტორიას რომ შევხედოთ: 1921 წლის შემდეგ, 1924 წლის აჯანყების შემდეგ ერთგვარი გარიგება შედგა და მოსახლეობის დიდმა ნაწილმა არჩია სიჩუმე – შედარებით კეთილდღეობა გაცვალა დამოუკიდებლობაში, მაგრამ მაშინ შეიძლება ითქვას, რომ ბევრმა ადამიანმა ხეირი მაინც ნახა, ახლა ასეც არ არის.

ივანიშვილის რეჟიმი ხალხს არ სთავაზობს არაფერს საბჭოთა რეჟიმისგან განსხვავებით, რომელიც მათ რაღაცას სთავაზობდა თუნდაც მომავლის სახით, კომუნისტური უტოპიის სახით, რომელიც ვერ ააშენა. დღეს არანაირი შეთავაზება არ არსებობს იმის საფასურად, რომ ვიღაც გაჩუმდეს.

საბედნიეროდ ვხედავთ, რომ მოსახლეობის უმრავლესობა არანაირად არ აპირებს შეეგუოს ივანიშვილის რეჟიმს.

  • „ოცნების“ მთავრობა არა, მაგრამ ცალკეული პროპაგანდისტები საუბრობენ ახალ კავშირებზეც რუსეთთან… 

ეს პერსპექტივაც არ არსებობს იმიტომ, რომ ვხედავთ რუსეთი რა მდგომარეობაში, მისი ეკონომიკა გადახურებულია და მთლიანად გადაწყობილია ომზე. ამ დროს ვიღაცას თუ აქვს ილუზია, რომ რუსეთის ეკონომიკით საქართველოს ეკონომიკა იხეირებს, ეს არის არათუ მიამიტური წარმოდგენა, უბრალოდ მცდარი წარმოდგენაა.

ცენტრალური აზიის ქვეყნებიც კი, ცდილობენ ჩამოვიდნენ რუსეთის ორბიტიდან – ისინი ბევრად უფრო მჭიდროდ იყვნენ ინტეგრირებული რუსეთთან.

საბჭოთა კავშირის სიძლიერე არსებობდა იქამდე, სანამ არსებობდა უტოპიური მომენტი, რომ ეს არის ალტერნატიული მოდელი კაპიტალისტური სამყაროსი. იმ მომენტიდან, როდესაც გამოჩნდა, რომ კომუნიზმი არასდროს აშენდება, საბჭოთა კავშირმა დაიწყო ნგრევა. ნგრევის პროცესი გრძელდება დღესაც და არ დასრულებულა.

ეს პროცესი დაიწყო 80-იანი წლების შუაში და გრძელდება დღემდე – რაღაცნაირად უნდა გავუძლოთ. რუსეთის ერთადერთი ძალა და ინსტრუმენტი არის ძალა და ძალადობა. არანაირი ალტერნატიული მოდელი და მომავლის შეთავაზება მას არ შეუძლია არათუ საქართველოს მოსახლეობის, არამედ საკუთარი ხალხისთვის. რუსეთი საკუთარ ხალხს სთავაზობს ილუზორულ იმპერიულ დიდებას – უკვე მილიონს უახლოვდება ომში დაღუპულთა რაოდენობა.

საქართველოში თუ ვინმეს ჰგონია, რომ რუსეთის იმპერიულ დიდებას შესწიროს თავი და ეს არის ის, რასაც სთავაზობს რუსეთი საქართველოს, მისი საქმეა. მგონი, ბევრი ადამიანისთვის ეს მაინცდამაინც მიმზიდველი არ უნდა იყოს.

  • გამძლეობა ახსენეთ – კიდევ რა ფაქტორებზეა დამოკიდებული, თქვენი აზრით, დემოკრატიის გადარჩენა საქართველოში? 

ერთია სოლიდარობა, რაც ახლა ჩანს. მთელი სახელმწიფო და დემოკრატიული საზოგადოება დგას იმაზე, რომ ვიბრძოლო იმისთვის, რაც მე პირადად შეიძლება არ მეხებოდეს. ამაზე იყო დამყარებული ილიას, თერგდალეულების და სამოციანელთა ნააზრევი, რომ ჩვენი ვალია, საზოგადოებრივ საქმეს ვაყენებ პირადზე წინ, მზად ვარ, ვემსახურო ჩემს ქვეყანას; თუ საჭირო იქნება, მზად ვარ, თავი შევწირო კიდეც.

ამას აკეთებს კიდეც ის ხალხი, რომელიც დღეს ციხეშია. არაფერი არ რჯიდა ამ ადამიანებს, რომ არ გასულიყვნენ პროტესტზე, მაგრამ მათ შინაგანად აქვთ რაღაც ისეთი, რაც არ აძლევს საშუალებას, გაჩუმდნენ, გვერდზე გაიხედონ.

ასეთი ხალხის მხრებზეა დღეს საქართველო – ეს ხალხი რომ არა, დღეს ჩვენ არ გვექნებოდა სახელმწიფო. სოლიდარული კავშირი ადამიანებს შორის, როცა ადამიანი მოქმედებს პირადი ინტერესის მიღმა საზოგადოებისთვის, ქვეყნისთვის – ეს არის ჩვენი ყველაზე დიდი მონაპოვარი საბჭოთა კავშირის დაშლის შემდეგ: გაიზარდა თაობა, რომლისთვისაც აღმოჩნდა, რომ სახელმწიფო, საზოგადოება და ქვეყანა არ არის აბსტრაქტული სიტყვები, ეს არ არის სადღეგრძელოში სათქმელი სიტყვები, არამედ ეს არის ისეთი რაღაც, რომლისთვისაც მზად არიან იბრძოლონ, გასწირონ ჯანმრთელობა, თავისუფლება, სიცოცხლეც კი. პირველ რიგში, უკიდურესად მნიშვნელოვანია ის, რომ ეს ადამიანები ჩვენ გვყავს.

დანარჩენი სტრატეგიის და ტაქტიკის საკითხებია, რაც ხანგრძლივი პროცესია. გვჭირდება მოთმინება და გაუტეხლობა. არ უნდა დავკარგოთ იმედი. ეს ბრძოლა მოითხოვს დიდ ფიზიკურ და ემოციურ, მატერიალურ გამძლეობას. რეჟიმი არის ხალხის გაღარიბებასა და გაღატაკებაზე გადასული, ეს ეკონომიკური ტერორია.

ამ ყველაფერს სჭირდება ატანა, მაგრამ სიმართლე ჩვენ მხარესაა. ვიცით, რომ ვაგრძელებთ ტრადიციას – საქართველოს სახელმწიფოებრიობის ტრადიციას, ვაგრძელებთ თერგდალეულების ტრადიციას…

საქართველო დღეს არის ხალხი, რომელიც იბრძვის საქართველოსთვის. ივანიშვილის რეჟიმი კი, არის პრაქტიკულად ოკუპანტი ადმინისტრაციული სტრუქტურები, მათ საქართველოსთან საერთო არაფერი აქვთ. ეს არის ხალხი, რომელიც საქართველოს ებრძვის. ჩვენ საქართველოს სახელმწიფოს ვინარჩუნებთ, ჩვენ მხარესაა ისტორიული საქართველოს ძალა და სიმართლე.

ამიტომ, ამ ბრძოლაში აუცილებლად გავიმარჯვებთ.

„მემუქრებიან“ – მოქალაქე, რომელმაც ირაკლი დგებუაძის მეგობარი ქალის ბარი გადაიღო

„მუქარა მივიღე,“ – ამბობს ბათუმში მცხოვრები ნინო კაჭკაჭიშვილი, რომელიც ძველ ბათუმში ცხოვრობს იმ ბარის ზემოთ, რომლის მფლობელიც მარიამ გერლიანია – ბათუმის პოლიციის უფროსის, ირაკლი დგებუაძის მეგობარი ქალი.

ნინო კაჭკაჭიშვილმა კი, მობილური ტელეფონით გადაიღო პოლიციელები, რომლებიც არ რეაგირებენ ბარიდან გამომავალ ხმაურზე, ღამის ოთხის ნახევარზე.

დღეს, 29 ივნისს, „ბათუმელებზე“ ამ ვიდეოს გამოქვეყნებიდან რამდენიმე წუთში, ნინო კაჭკაჭიშვილის თქმით, ბართან ირაკლი დგებუაძე გამოჩნდა მეგობარ ქალთან ერთად.

„პირდაპირ აივნისკენ ამოიხედეს, თვალი არ მოუშორებიათ, ზუსტად დააფიქსირეს, რომ მე ვარ. კაცებს ხმა არ ამოუღიათ, მხოლოდ განმგმირავი მზერით შემოიფარგლნენ, ქალმა კი შემაგინა ხმამაღლა – „დედას მოგ…ო“, – უთხრა „ბათუმელებს“ ნინო კაჭკაჭიშვილმა.

ბარი „ბოჰემა“ ძველ ბათუმში მდებარეობს და ბათუმი პოლიციის უფროსის, ირაკლი დგებუაძის მეგობარი ქალის – მარიამ გერლიანის საკუთრებაა.

საჯარო რეესტრის მონაცემებით, დგებუაძის მეგობარი ქალი, მარიამ გერლიანი ინდივიდუალურ მეწარმედ 2023 წლის ივნისში დარეგისტრირდა.

ამონაწერით ირკვევა ისიც, რომ ამ დროს გერლიანი მოვალეთა რეესტრში იყო დარეგისტრირებული – შემოსავლების სამსახურის შეტყობინების საფუძველზე მისთვის ქონება დაუყადაღებიათ.

ვიდეოკადრებში, რომელიც დღეს, 29 ივნისს, „ბათუმელებმა“ გავრცელა, ჩანს, რომ გამოძახებული პოლიციელები „ბოჰემასთან“ მიდიან, აშკარად ესმით ხმაური, თუმცა ისე იქცევიან, თითქოს არაფერი ხდება.

ძველ ბათუმში, კოსტავას ქუჩაზე მცხოვრები მოქალაქეების თქმით, კვირაში 3 ღამე ამ ბარიდან გამომავალი ხმაურის გამო, ფაქტობრივად, ძილს ვერ ახერხებენ.

ისინი ყოველ ჯერზე იძახებენ მუნიციპალურ ინსპექციას, პოლიციას, თუმცა ვითარება არ იცვლება.

რა ხდება დგებუაძის მეგობარი ქალის ბარში - ძველი ბათუმი, ღამის 3:30 საათი

ბათუმის აეროპორტში მოსკოვის თვითმფრინავი ვერ დაჯდა

დღეს, 29 ივნისს, ბათუმის აეროპორტში თვითმფრინავი, რომელიც მოსკოვი-ბათუმის რეისს ასრულებს, ვერ დაჯდა,

ბათუმის აეროპორტის ინფორმაციით მიზეზი უამინდობაა [ნისლი და დაბალი ხილვადობა].

თვითმფრინავი ამ დროისთვის [12:07 სთ.] ზღვის თავზე მანევრირებს.

განახლება: თვითმფრინავი მეორე მცდელობისას [დაახლოებით 12:13 საათზე] დაჯდა ბათუმის აეროპორტში.

მთავარი ფოტო „ბათუმელების“ არქივიდან

ბათუმში მკვლელობის მცდელობაში ბრალდებული დააკავეს

შინაგან საქმეთა სამინისტროს ინფორმაციით, დააკავეს ბრალდებული, რომელმაც ძველ ბათუმში ცეცხლსასროლი იარაღიდან გასროლით მოქალაქე დაჭრა. კიდევ ერთ ბრალდებულს გამოძიება განსაკუთრებით მძიმე დანაშაულის შეუტყობინებლობას ედავება.

ბრალდებულები 21 და 24 წლის არიან. ორივე ბრალდებული თურქეთის მოქალაქეა.

გამოძიების ვერსიით, „მ ა.ა. – მ, მიმდინარე წლის 25 ივნისს, ბათუმში, ასევე, თურქეთის რესპუბლიკის მოქალაქე – 2000 წელს დაბადებული ე.ა. ცეცხლსასროლი იარაღიდან გასროლი დაჭრა და შემთხვევის ადგილიდან მიიმალა. დაჭრილი მამაკაცი საავადმყოფოში გადაიყვანეს, სადაც შესაბამისი სამედიცინო დახმარება ჩაუტარდა.

გამოძიებით, ასევე, დადგინდა, რომ დანაშაულს შეესწრო ა.ა. – ს თანმხლები პირი , ამჟამად ბრალდებულის სახით დაკავებული ბ.ი., თუმცა მან მომხდარის შესახებ სამართალდამცველებს არ შეატყობინა,“ – აღნიშნულია შსს-ს მიერ გავერცელებულ ინფორმაციაში.

გამოძიება სისხლის სამართლის კოდექსის 19-108-ე, 236-ე და 376-ე მუხლებით მიმდინარეობს.

როგორი ამინდი იქნება ორშაბათიდან ბათუმში

გარემოს ეროვნული სააგენტოს აჭარის რეგიონული ჰიდრომეტეოროლოგიური ობსერვატორიის ინფორმაციით, 29 ივნისის 21 საათიდან 30 ივნისის 21 საათამდე აჭარაში მოსალოდნელია უმეტესად ღრუბლიანი ამინდი, დროგამოშვებით ელჭექის ხასიათის წვიმა;

იქროლებს დასავლეთის მიმართულების ქარი 10-15 მეტრი წამში;

ჰაერის ტემპერატურა სანაპირო ზოლსა და მთიან რაიონებში:

  • დღისით: 20 – 25 გრადუსი სითბო
  • ღამით: 12 – 17 გრადუსი სითბო

მაღალმთიან ზონაში:

  • დღისით: 13 – 18 გრადუსი სითბო
  • ღამით: 7 – 12 გრადუსი სითბო

ზღვის ღელვა 3-4 ბალი იქნება, ზღვის წყლის ტემპერატურა +24 გრადუსია.

სინოპტიკოსების ცნობით, აჭარაში 1-ელ ივლისს უმეტესად უნალექო, 3 და 4 ივლისს კი, უმეტეს რაიონში წვიმაა მოსალოდნელი.

ახალი მონაცემები რუსეთის და უკრაინის სამხედრო დანაკარგებზე ომში – 29 ივნისი

უკრაინის შეიარაღებული ძალების გენერალური შტაბის დღევანდელი მონაცემებით, ომის დაწყებიდან 2025 წლის 29 ივნისამდე პერიოდში, რუსეთის არმიის საბრძოლო დანაკარგი არის:

  • ცოცხალი ძალა – დაახლოებით 1 018 940 ადამიანი [გასულ დღე-ღამეში +1 220]
  • ტანკი – 10 976 ერთეული [+6]
  • ჯავშანტექნიკა – 22 915 ერთეული [+7]
  • საარტილერიო სისტემა – 29 689 ერთეული [+24]
  • MLRS – 1 425 ერთეული [+0]
  • საზენიტო საბრძოლო სისტემა – 1 189 ერთეული [+0]
  • თვითმფრინავი – 420 ერთეული [+0]
  • ვერტმფრენი – 337 ერთეული [+0]
  • უპილოტო საფრენი აპარატის ოპერატიულ-ტაქტიკური დონე – 42 624 ერთეული [+147]
  • ფრთოსანი რაკეტა [ჩამოაგდეს] – 3 394 ერთეული [+0]
  • გემი/ნავი – 28 ერთეული [+0]
  • წყალქვეშა ნავი – 1 ერთეული [+0]
  • მანქანები და საწვავის ავზები – 53 508 ერთეული [+93]
  • სპეცტექნიკა – 3 921 ერთეული [+0]

უკრაინის გენერალური შტაბის განცხადებით, საომარი მოქმედებების მაღალი ინტენსივობის გამო მონაცემები იცვლება.

უკრაინის სამხედრო დანაკარგებზე ინფორმაცია განაახლა რუსეთმაც.

რუსეთის თავდაცვის სამინისტროს მიერ გავრცელებული მონაცემებით, ომის დაწყებიდან 2025 წლის 29 ივნისამდე პერიოდში სულ განადგურებულია უკრაინის:

  • 663 თვითმფრინავი
  • 283 ვერტმფრენი
  • 66 160 უპილოტო საფრენი აპარატი
  • 612 საზენიტო სარაკეტო სისტემა
  • 24 079 ტანკი და სხვა ჯავშანტექნიკა
  • 1 572 მრავალჯერადი სარაკეტო გამშვები
  • 26 765 საველე არტილერია და ნაღმმტყორცნი
  • 37 447 სპეციალური სამხედრო მანქანა

რუსეთის თავდაცვა, ამ მონაცემებთან ერთად, უკრაინის არმიის ცოცხალი ძალის დანაკარგების შესახებ სტატისტიკას არ აქვეყნებს.

ეს ის მონაცემებია, რომელსაც უკრაინა და რუსეთი ოფიციალურად ავრცელებენ, თუმცა ომის პირობებში შეუძლებელია ზუსტად გადამოწმება, რამდენად შეესაბამება მხარეების მიერ გავრცელებული ინფორმაცია დანაკარგების შესახებ რეალურ რიცხვებს.

—

რუსეთი უკრაინაში 2022 წლის 24 თებერვალს გამთენიისას შეიჭრა და სრულმასშტაბიანი ომი დაიწყო.

ამავე თემაზე:

ომის დაწყების შემდეგ რუსეთმა უკრაინაზე ყველაზე მასშტაბური საჰაერო თავდასხმა განახორციელა

 

 

მთავარი ფოტო: უკრაინის გენშტაბი/facebook

„ვუერთდები ელენე ხოშტარიას და მეც ვაცხადებ შიმშილობას“ – ბათუმელი მედროშე

„საზღვარგარეთიდან ვუერთდები ელენე ხოშტარიას მიერ რუსთაველის გამზირზე დაწყებულ პროტესტის უკიდურეს ფორმას და მეც ვაცხადებ შიმშილობას!“ – მოგვწერა ბათუმელმა მედროშემ, თემურ ქათამაძემ.

ელენე ხოშტარიამ  – კოალიცია ცვლილებებისთვის“ ერთ-ერთმა ლიდერმა შიმშილობა პარლამენტთან 27 ივნისს დაიწყო. მისი თქმით, „ქართული ოცნების” ხელისუფლებასთან ბრძოლის გზა ქუჩაში პროტესტი და რევოლუციაა. დღეს, 28 ივნისს, ელენე ხოშტარიასთან ერთად შიმშილობა გამოაცხადა პარტია „ახლის“ ლიდერმა გედევან ფოფხაძემ და კიდევ სამმა აქტივისტმა: ვასილ ელიავამ, გიორგი სტეპანოვმა და ბაჩო კუციამ.

„გულანთებულო მამულიშვილებო, თანამებრძოლეებო! საზღვარგარეთიდან ვუერთდები ელენე ხოშტარიას მიერ რუსთაველის გამზირზე დაწყებულ პროტესტის უკიდურეს ფორმას და მეც ვაცხადებ შიმშილობას! ყველა მოშიმშილესადმი გამოვხატავ ჩემს სრულ მხარდაჭერასა და სოლიდარობას! ჩვენი სამშობლოს გადარჩენისთვის ამ რთული ბრძოლის უკვე ბოლო ფაზაში შესული ვართ.

ჩვენი ძალა ახლა თუ ვერ ვაჩვენეთ, შესაძლებელია ხვალ და ზეგ, ამის შესაძლებლობა აღარ გვქონდეს! ამიტომაც დღეს თქვენთან ერთადერთი თხოვნა მაქვს: ხვალ ჩვენი ყოველდღიური საყოფაცხოვრებო საქმეები გადავდოთ და ყველამ გავიდეთ რუსთაველზე.

29 ივნისს ერთხელ კიდევ და საბოლოოდ ვაჩვენოთ ივანიშვილის რუსულ რეჟიმს და მსოფლიოს ის, რომ ჩვენ საქართველოსა და თავისუფლებისთვის ყველაფერს გავრისკავთ, ჩვენ ამ ისტორიულ ბრძოლაში, სადაც არ უნდა ვიყოთ: ციხეში თუ ქუჩაში, ქალაქში თუ სოფელში, ქვეყანაში თუ საზღვარგარეთ, ახალგაზრდა თუ მოხუცი, შეძლებისდაგვარად ჩვენს ბრძოლას გავაგრძელებთ ბოლომდე და გამარჯვებამდე, მშვიდობიანი პროტესტის ყველა ფორმით და საჭირო დროს ქუჩაში გასვლითა თუ შიმშილობით! ძალა ჩვენშია!

ახლა ზუსტად ის დროა, როდესაც ყველა ერთად უნდა გავიდეთ ქუჩაში და დავასრულოთ ეს დიქტატურა – კოშმარი სამუდამოდ!“ – წერს თემურ ქათამაძე.

„ბათუმელი მედროშე” თემურ ქათამაძე – სტამბოლი, თურქეთი

ქართველი მუჰაჯირების შთამომავალი – თემურ ქათამაძე [გაფფარ ილმაზი] „ოცნების“ ხელისუფლებამ საქართველოდან 11 ივნისს გააძევა. ბათუმელი მედროშე მას შემდეგ გახდა „ოცნების“ სამიზნე, როცა ის პროევროპული აქციების აქტიური მონაწილე გახდა.

თემურ ქათამაძე ამჯერად თურქეთშია, სტამბულში. მან შიმშილობა დღეს, 28 ივნისს, სტამბოლში დაიწყო. „ოცნების“ რეჟიმის უსამართლო გადაწყვეტილებებს თემურ ქათამაძე შსს-ს მიგრაციის სამსახურის დროებითი განთავსების ცენტრში 48 დღე შიმშილობით აპროტესტებდა. რეჟიმის სხვადასხვა მსხვერპლის სოლიდარობის ნიშნად, სიმბოლურად მან კიდევ რამდენიმე დღით იშიმშილა, ვიდრე საქართველოდან გააძევებდნენ.

————

თემურ ქათამაძე ქართველი მუჰაჯირების შთამომავალია და ბოლო წლებია ბათუმში ცხოვრობდა. იმის მიუხედავად, რომ თემურ ქათამაძე სრულფასოვნად საუბრობს ქართულ ენაზე, უმაღლეს ქულებზე ჩააბარა კანონით დადგენილი გამოცდები ქართულ ენასა და საქართველოს ისტორიაში, მას არც საქართველოს მოქალაქეობა მიანიჭეს, არც ბინადრობა მისცეს და ლტოლვილის სტატუსზეც უარი უთხრეს.

ALDE-ს სხდომაზე წაიკითხეს ზურაბ ჯაფარიძის წერილი ციხიდან: „და მაინც ქართველი ხალხი არ ნებდება“

ევროპის ლიბერალთა და დემოკრატთა ალიანსის (ALDE) საბჭოს სხდომაზე ზურაბ გირჩი ჯაფარიძის რუსთავის ციხიდან გაგზავნილი წერილი წაიკითხეს. ინფორმაციას პარტია „გირჩი მეტი თავისუფლება ავრცელებს“.

„ვწუხვარ, რომ წლევანდელ ALDE საბჭოზე პირადად არ ვარ, რუსთავის ციხიდან მოგმართავთ, სადაც პოლიტიკური პატიმრის სტატუსით მაკავებს რუსეთის მხარეს დამდგარი ქართული ოცნების რეჟიმი.

ჩემი „დანაშაული“? – უარი ვთქვი წავსულიყავი პარლამენტის ე.წ. საგამოძიებო კომისიაზე, რომელიც თითქოს წინა მთავრობის „დანაშაულებს“ იკვლევს — მაშინ, როდესაც მე იმ მთავრობაში არანაირი როლი არ მეკავა. ეს აბსურდი ნათლად აჩვენებს, რომ კომისია მხოლოდ ერთი მიზნისთვის შეიქმნა — პოლიტიკური დევნისთვის და განსხვავებული აზრის ჩასახშობად.

მაგრამ მარტო არ ვარ. 60-ზე მეტი აქტივისტი, ჟურნალისტი და პოლიტიკური ლიდერი იმყოფება ციხეში მტკიცებულებებისა და კანონიერი სასამართლოს გარეშე — მხოლოდ იმიტომ, რომ იცავდნენ საქართველოს კონსტიტუციას და ჩვენს ევროპულ არჩევანს. მათ შორის არიან „ლელოს“ ლიდერები მამუკა ხაზარაძე და ბადრი ჯაფარიძე, ასევე „სტრატეგია აღმაშენებლის“ ლიდერი გიორგი ვაშაძე — ALDE-ს წევრი პარტიების წარმომადგენლები.

„ქართული ოცნების“ რეჟიმმა რუსული ტიპის კანონებით სასტიკი შეტევა დაიწყო სამოქალაქო საზოგადოებაზე, დამოუკიდებელ მედიაზე, პოლიტიკურ პარტიებსა და აკადემიურ თავისუფლებაზე. სახელმწიფო ინსტიტუტები გადაიქცა რეპრესიების იარაღად. პოლიტიკურ ლიდერებს იჭერენ, მშვიდობიან დემონსტრანტებს სასტიკად უსწორდებიან, ჟურნალისტებს თავს ესხმიან და აპატიმრებენ, კრიტიკოსებს უვრცელებენ ცილისმწამებლურ კამპანიებს, ხოლო სიტყვის თავისუფლება მწვავედ იზღუდება.

და მაინც, ქართველი ხალხი არ ნებდება.

უკვე 212 დღეა, მოქალაქეები ყოველდღიურად მშვიდობიანად აპროტესტებენ ამ რეჟიმს, მიუხედავად ძალადობისა, დაკავებებისა და ადმინისტრაციული დევნისა. არასამთავრობო ორგანიზაციები და დამოუკიდებელი მედია გახდნენ რეპრესიული კანონების სამიზნე — მათ მტრებად აცხადებენ და ფინანსურ გზებს უკეტავენ. პროტესტის მონაწილეებს ყოველდღიურად აჯარიმებენ იმის გამო, რომ იმყოფებიან ქვეყნის დედაქალაქის მთავარ გამზირზე. ბევრი მათგან დააკავეს და სასამართლო დევნა დაიწყეს საჯარო განცხადებებისა და სოციალურ ქსელებში გამოხატული მათი პროტესტის გამო.

ამ დევნის მიზანია წინააღმდეგობის გატეხვა — მაგრამ დევნამ მხოლოდ გაგვაძლიერა.

ეს მხოლოდ ჩვენი ბრძოლა არ არის. ეს ბრძოლა რუსთაველის გამზირზე განსაზღვრავს არა მხოლოდ საქართველოს, არამედ სომხეთის მომავალსაც. ეს განსაზღვრავს შავი ზღვის უსაფრთხოებას, ევროპისა და ცენტრალური აზიის ეკონომიკური კავშირების მომავალს და მთლიანად ევროპის უსაფრთხოებას.

ამიტომ გვჭირდება ერთობლივი ბრძოლა. გვჭირდება ევროკავშირის მკაფიო და მტკიცე მოქმედება: ქართულ ოცნების რეჟიმის მიმართ მკაფიო პოლიტიკა და მისი ხელშემწყობების წინააღმდეგ მიზნობრივი სანქციები. ამ კრიზისს ვერ მოაგვარებს ცარიელი დიალოგი. მისი გადაჭრა მხოლოდ თავისუფალი და სამართლიანი არჩევნებით და ყველა პოლიტპატიმრის უპირობო გათავისუფლებით არის შესაძლებელი.

მადლობას ვუხდი ALDE-ს ქართული დემოკრატიისა და ლიბერალური ღირებულებების მტკიცე მხარდაჭერისთვის. განსაკუთრებით მადლობელი ვარ იულიან ბულაის, იევჰენია კრავჩუკის, მარია ბიგდაის, დან ბარნას, უილიამ თაუნსენდის, ენდრიუ ბარჯესის, ლენარტ სალემინკის, ჯეიმს მაკკლერის და ბენედიქტე როვიკის უდიდესი სოლიდარობისთვის ამ რთულ დღეებში.

იქნება ეს ციხიდან თუ ქუჩიდან — ჩვენ არ შევწყვეტთ ბრძოლას. ჩვენ გავაგრძელებთ თავისუფლებისა და დემოკრატიისთვის ბრძოლას. და ვიცით, რომ ბოლოს მაინც თავისუფლება გაიმარჯვებს“— მისწერა ზურა ჯაფარიძემ ევროპის ლიბერალთა და დემოკრატთა ალიანსს (ALDE).

ევროპის ლიბერალთა და დემოკრატთა ალიანსი (ALDE) 2025 წლის 25 ივნისს გამოეხმურა საქართველოში ოპოზიციონერი პოლიტიკური ლიდერების აპატიმრებას. ისინი ამას პოლიტიკურ რეპრესიებად აფასებენ.

ამ თემაზე:

“ეს არის ნამდვილი პოლიტიკური რეპრესიები” – ALDE ოპოზიციონერი ლიდერების დაკავებაზე

 

 

შიმშილობა დაიწყო გედევან ფოფხაძემაც და სამმა აქტივისტმა: „დღეს ეს არის ბრძოლის სწორი ფორმა“

„მეც, დღეიდან, ვიწყებ შიმშილობას. აბსოლუტურად ვეთანხმები ელენეს იმაში, რომ შეუძლებელია დღეს, ამ რეჟიმთა რაიმე ფორმის თანამშრომლობა,“ – აღნიშნა დღეს, 28 ივნისს გედევან ფოფხაძემ, პარტია „ახალის“ ერთ-ერთმა ლიდერმა და პარლამენტის ყოფილმა დეპუტატმა. მან შიმშილობა დაიწყო.

გუშინ, 27 ივნისს შიმშილობა დაიწყო „კოალიცია ცვლილებებისთვის“ ერთ-ერთმა ლიდერმა, ელენე ხოშტარიამ. მისი თქმით, „ქართული ოცნების” ხელისუფლებასთან ბრძოლის გზა ქუჩაში პროტესტი და რევოლუციაა.

ელენე ხოშტარიასა და გედევან ფოფხაძესთან ერთად შიმშილობას იწყებენ აქტივისტები – ვასილ ელიავა, გიორგი სტეპანოვი და ბაჩო კუცია.

„ფაქტობრივად, შექმნილია უკანონო, რეპრესიული სისტემა ადამიანების დევნის, არის არალეგიტიმური სახელმწიფო სისტემა, რომელიც, უბრალოდ, ემსახურება ერთი ადამიანის კერძო ინტერესს და ამ ფონზე, თუ არ დავუპირისპირდით ჩვენ ჩვენი თავგანწირვით, ჩვენი პრინციპული პოზიციით და რაიმე ელემენტი დავტოვეთ მათთან შესაძლო თანამშრომლობის ჩვენ ამით ვღალატობთ იმ ხალხსაც, ვინც ციხეში უკანონოდ ზის, იმ საზოგადოებასაც, რომელსაც კიდევ აქვს იმედი საქართველოს დემოკრატიული, სამართლებრივი, ევროპული მომავლის.

ამიტომ, მგონია, რომ ეს არის სწორი ფორმა დღეს ბრძოლის. შიმშილობით და ბევრი ისეთი ფორმით, რა ფორმითაც უნდა გაპროტესტდეს დღეს ეს რეჟიმი, ჩვენ უნდა ვაგრძნობინოთ საზოგადოებას, რომ გვჯერა ჩვენი პოზიციის და მზად ვართ, თავი გავწიროთ ამ პოზიციისათვის”, – განაცხადა გედევან ფოფხაძემ.

საქართველოში ოპოზიციური ლიდერების და აქტივისტების დაკავებას ეხმაურებიან ნიდერლანდების, ლიეტუვას და დანიის საგარეო საქმეთა სამინისტროები.

———-

“ქართული ოცნების” ერთპარტიულ პარლამენტში შექმნილ საგამოძიებო კომისიაზე გამოუცხადებლობის საფუძლით 8 ოპოზიციონერი ლიდერია დაკავებული. პროკურატურა მათ ედავება სისხლის სამართლის კოდექსის 349-ე მუხლის დარღვევას, რაც პარლამენტის დროებითი საგამოძიებო კომისიის მოთხოვნის შეუსრულებლობას გულისხმობს. ოპოზიცინერი ლიდერები აცხადებენ, რომ არ ცნობენ პარლამენტის ლეგიტიმურობას. შესაბამისად, არ მივიდნენ იქ შექმნილ საგამოძიებო კომისიაზე.

ამ დროისთვის დაკავებულია:

  • “გირჩი – მეტი თავისუფლების” ლიდერი, ზურაბ ჯაფარიძე – მოსამართლე ჯვებე ნაჭყებიამ 23 ივნისს მიუსაჯა 7-თვიანი პატიმრობა;
  • “ძლიერი საქართველოს” ლიდერი მამუკა ხაზარაძე – მოსამართლე ზვიად შარაძემ 23 ივნისს მიუსაჯა 8-თვიანი პატიმრობა;
  • “ძლიერი საქართველოს” ლიდერი ბადრი ჯაფარიძე – მოსამართლე ზვიად შარაძემ 23 ივნისს მიუსაჯა 8-თვიანი პატიმრობა;
  • “სტრატეგია აღმაშენებლის” ლიდერი, გიორგი ვაშაძე – მოსამართლე ნინო გალუსტაშილმა 24 ივნისს მიუსაჯა 7-თვიანი პატიმრობა;
  • “კოლაიცია ცვლილებებისთვის” ლიდერი ნიკა მელია – მოსამართლე ნინო გალუსტაშილმა 27 ივნისს მიუსაჯა 8-თვიანი პატიმრობა;
  • “ნაციონალური მოძრაობის” ყოფილი ლიდერი, გივი თარგამაძე – მოსამართლე ნინო გალუსტაშილმა 27 ივნისს მიუსაჯა 7-თვიანი პატიმრობა;

ამავე მუხლით დაკავებულია კიდევ ორი ოპოზიცინერი პოლიტიკოსი – “კოალიცია ცვლილებებისთვის” ლიდერი ნიკა გვარამია და ყოფილი თავდაცვის მინისტრი, ირაკლი ოქრუაშვილი. მათ საქმეზე განაჩენი უახლოეს მომავალში გამოცხადდება.

ნიდერლანდები საგარეო: ოპოზიციის ლიდერების დაკავება ქვეყნის დემოკრატიას უდიდეს დარტყმას აყენებს

ნიდერლანდების საგარეო საქმეთა სამინისტრო ეხმაურება საქართველოში აქტივისტებისა და პოლიტიკოსების დაკავებებს.

„ქართული ოცნების” ხელისუფლების მიერ ოპოზიციის ლიდერების დაკავება და გასამართლება, სამოქალაქო საზოგადოების დევნა ქვეყნის დემოკრატიას უდიდეს დარტყმას აყენებს. საქართველოს ხელისუფლებას მოვუწოდებ, შეასრულოს დემოკრატიული პრინციპებისა და კანონის უზენაესობის მიმართ ქვეყნის მიერ აღებული საერთაშორისო ვალდებულებები,“ – აღნიშნულია ნიდერლანდების საგარეო საქმეთა მინისტრის კასპარ ველდკამპის მიერ დღეს, 28 ივნისს გავრცელებულ განცხადებაში.

საქართველოში ოპოზიციური ლიდერების და აქტივისტების დაკავებას ასევე ეხმაურებიან ლიეტუვას და დანიის საგარეო საქმეთა სამინისტროები.

27 ივნისის მდგომარეობით, წულუკიანის კომისიაზე არმისვლის გამო დაპატიმრებულია 8 პოლიტიკოსი – ნიკა მელია, ირაკლი ოქრუაშვილი, ზურაბ გირჩი ჯაფარიძე, მამუკა ხაზარაძე, გივი თარგამაძე, ნიკა გვარამია, ბადრი ჯაფარიძე და გიორგი ვაშაძე.

——————
2025 წლის 5 თებერვალს „ქართული ოცნების“ თვითგამოცხადებულ პარლამენტში შეიქმნა „2003–2012 წლებში მოქმედი რეჟიმის, ამ რეჟიმის პოლიტიკური თანამდებობის პირებისა და პოლიტიკურ პარტიებში გაერთიანებული მოქმედი და ყოფილი თანამდებობის პირების 2003 წლიდან დღემდე საქმიანობის შემსწავლელი საქართველოს პარლამენტის დროებითი საგამოძიებო კომისია“. მოგვიანებით, კომისიას გაეზარდა უფლებამოსილება და რამდენჯერმე გაეზარდა მუშაობის ვადა.

დღეს მოქმედი კანონმდებლობით, პარლამენტის საგამოძიებო კომისიის მოთხოვნის შეუსრულებლობისთვის სანქცია გათვალისწინებულია, როგორც ადმინისტრაციულ სამართალდარღვევათა კოდექსში, ისე სისხლის სამართლის კოდექსში.

კერძოდ,  საქართველოს ადმინისტრაციულ სამართალდარღვევათა კოდექსის 1733-ე მუხლის მიხედვით – „საქართველოს პარლამენტის დროებითი საგამოძიებო კომისიის კანონიერი მოთხოვნის შეუსრულებლობა, – გამოიწვევს დაჯარიმებას შრომის ანაზღაურების ორმოცდაათი მინიმალური ოდენობით“.

ანალოგიური შინაარსის მატარებელია საქართველოს სისხლის სამართლის კოდექსის 349-ე მუხლიც, რომელიც სასჯელის სახედ და ზომად ითვალისწინებს ჯარიმას ან თავისუფლების აღკვეთას ვადით ერთ წლამდე, თანამდებობის დაკავების ან საქმიანობის უფლების ჩამორთმევას ვადით სამ წლამდე.

ახალგაზრდა იურისტთა ასოციაციის განმარტებით, აღნიშნული მიუთითებს იმაზე, რომ, ერთი და იგივე ქმედება შეიძლება შეფასდეს, როგორც სამართალდარღვევად, ისე დანაშაულად.

იმის გათვალისწინებით, რომ კანონმდებელი არ განსაზღვრავს, თანაბარი იურიდიული ძალის მქონე ნორმატიულ აქტებში იდენტური ჩანაწერების არსებობის შემთხვევაში რომელს ენიჭება უპირატესობა, მნიშვნელოვანია საკითხის შეფასება მოხდეს საქართველოს კონსტიტუციის და საერთაშორისო სტანდარტების შესაბამისად და დარღვევის შემთხვევაში გამოყენებული იქნეს ის ნორმა, რომელიც ნაკლებად ზღუდავს პიროვნების თავისუფლებას [In dubio pro libertate].

საქალაქო ავტობუსები ღამის 12 საათამდე იმუშავებს – ბათუმის ავტოტრანსპორტი

პირველი ივლისიდან ბათუმში მუნიციპალური ტრანსპორტი დილის 7 საათიდან ღამის 12 საათამდე იმოძრავებს.

ბათუმის მერიის შპს „ბათუმის ავტოტრანსპორტის“ ინფორმაციით, გრაფიკის ცვლილება [სამუშაო დროის გაზრდა] ზაფხულის სეზონს უკავშირდება:

„1-ლი ივლისიდან, ზაფხულის სეზონთან დაკავშირებით, იზრდება მუნიციპალური ტრანსპორტის სამუშაო დრო – საზოგადოებრივი ტრანსპორტი მოქალაქეებს ყოველდღიურად 07:00 საათიდან 00:00 საათამდე მოემსახურება.“

გასული, 2024 წლის ზაფხულში, ბათუმში მუნიციპალური ავტობუსების სამუშაო დრო 17 ივნისიდან გაიზარდა.

 

 

რუსეთის და უკრაინის სამხედრო დანაკარგები ომში – 28 ივნისი

უკრაინის შეიარაღებული ძალების გენერალური შტაბის დღევანდელი მონაცემებით, ომის დაწყებიდან 2025 წლის 28 ივნისამდე პერიოდში, რუსეთის არმიის საბრძოლო დანაკარგი არის:

უკრაინის გენერალური შტაბის განცხადებით, საომარი მოქმედებების მაღალი ინტენსივობის გამო მონაცემები იცვლება.

უკრაინის სამხედრო დანაკარგებზე ინფორმაცია განაახლა რუსეთმაც.

რუსეთის თავდაცვის სამინისტროს მიერ გავრცელებული მონაცემებით, ომის დაწყებიდან 2025 წლის 28 ივნისამდე პერიოდში სულ განადგურებულია უკრაინის:

რუსეთის თავდაცვა, ამ მონაცემებთან ერთად, უკრაინის არმიის ცოცხალი ძალის დანაკარგების შესახებ სტატისტიკას არ აქვეყნებს.

ეს ის მონაცემებია, რომელსაც უკრაინა და რუსეთი ოფიციალურად ავრცელებენ, თუმცა ომის პირობებში შეუძლებელია ზუსტად გადამოწმება, რამდენად შეესაბამება მხარეების მიერ გავრცელებული ინფორმაცია დანაკარგების შესახებ რეალურ რიცხვებს.

—

რუსეთი უკრაინაში 2022 წლის 24 თებერვალს გამთენიისას შეიჭრა და სრულმასშტაბიანი ომი დაიწყო.

ამავე თემაზე:

 

 

 

მთავარი ფოტო: უკრაინის გენშტაბი/facebook

ბიზნესმენი გალიფ ოზთურქი პატიმრობიდან გაათავისუფლეს

ბიზნესმენი გალიფ ოზთურქი პატიმრობიდან გაათავისუფლეს. ინფოფმაციას “ბათუმელებს” ოზთურქის ერთ-ერთი ადვოკატი უდასტურებს.

გალიფ ოზთურქი საპროცესო შეთანხმების საფუძველზე გაათავისუფლეს.

გალიფ ოზთურქი ნარკოდანაშაულისთვის გაასამართლეს. მას 2023 წელს ბათუმის საქალაქი სასამართლომ 8 წლით თავისუფლების აღკვეფა შეუფარდა.

გალიფ ოზთურქი თურქეთის და საქართველოს მოქალაქეა.

ამ თემაზე:

ოზთურქის ბინიდან „კოკაინი“ ხელთათმანების გარეშე ამოიღეს – რა თქვა ექსპერტმა 

 

 

„გორკის იქეთ ქართულად ვერ დაილაპარაკებ, უცხოეთია“ – გამოკითხვა ბათუმში მოსახლეობის ზრდაზე

„გორკის იქეთ საერთოდ უცხოეთია, ქართულად ვერ დაილაპარაკებ“ - გამოკითხვა ბათუმში მოსახლეობის ზრდაზე

 

“რევოლუცია და გარეთ, ქუჩაში ამათი დამხობა არის ერთადერთი გზა” – ელენე ხოშტარიამ შიმშილობა დაიწყო

„ახლა, როდესაც რეჟიმი ახალ შეტევაზე გადმოვიდა და პრაქტიკულად, ყველა პოლიტიკოსი დაიჭირა, მე მინდა ბრძოლის ახალი ფორმა გამოვაცხადო. ეს არ არის ემოციური ფორმა. ეს გამარჯვებაზე ორიენტირებული პროტესტია, მე ვიწყებ შიმშილობას აქ, არ მოვიცვლი ფეხს რუსთაველიდან. ეს შიმშილობა არ არის თავგანწირული, სასოწარკვეთილი ნაბიჯი, ძალიან მტკიცე გადაწყვეტილებაა,“ – ეს განცხადება „კოალიცია ცვლილებისთვის“
ერთ-ერთმა ლიდერმა ელენე ხოშტარიამ დღეს, 27 ივნისს გააკეთა და რუსთაველზე შიმშილობა დაიწყო.

ელენე ხოშტარია ამბობს, რომ შიმშილობის დაწყება არა სასოწარკვეთილი ნაბიჯი, არამედ მისი მხრიდან აბსოლუტურად გააზრებული გადაწყვეტილებაა.

„რუსთაველზე გადავწყვიტე მოსვლა, რადგან ეს არის ადგილი, სადაც ჩვენი ქვეყნის მთავარი ბრძოლა იმართება. ეს ბრძოლა რუსეთთან ბრძოლაა. ეს არ არის „ქართულ ოცნებასთან“ და პატარა პარტიებთან ბრძოლა – რუსეთთან ბრძოლაა. ამ ბრძოლაში ჩვენ ბევრი ეტაპი გავიარეთ. იყო ეტაპი, როდესაც ვამაყობდით, რომ 300 000 ადამიანი იყო გარეთ და ვართ ძლიერები… მძიმე და საამაყო ეტაპები გავიარეთ. გავიარეთ ეტაპი, როდესაც პოლიტიკოსებს იჭერენ, როდესაც პოლიტპატიმრებს დედები და მამები უკვდებათ და ამ დროს ისინი ციხეში არიან…

თუ თქვენ ვერ ხედავთ სიცოცხლის ფასს, ვერ ხედავთ თავისუფლების ფასს, თუ თქვენთვის გიორგი ახობაძის დედის სიკვდილი, ონისე ცხადაძის მამის გარდაცვალება არაფერს ნიშნავს, აგერ არის ჩემი სიცოცხლეც, ჩემი თავისუფლებაც და მაინც ვერ მოგვერევით. ეს არის ჩემი განაცხადი „ქართული ოცნებისთვის“.

ხალხისთვის ვამბობ – რევოლუცია და გარეთ, ქუჩაში ამათი დამხობა არის ერთადერთი გზა. მე ვერავის ვასწავლი, როდის გამოვიდეს ქუჩაში. ვერავის მოვუწოდებ, რომ ან იშიმშილოს, ან ციხეში ჩაჯდეს. საკუთარ მაგალითზე ვამბობ, ვარ მზად, თავი შევწირო ამ რეჟიმს და შევწირავ,“ – თქვა ელენე ხოშტარიამ.

ხალხი რომ არ შეიჭრას, თვეში 27 ათას ლარს ხარჯავენ – უმაღლესი საბჭოს ყოფილ შენობას იარაღით იცავენ

ჩაქვში, უმაღლესი საბჭოს ყოფილი შენობის მოსახლეობის შეჭრისგან დასაცავად აჭარის ბიუჯეტიდან მომდევნო ოთხ თვეში, ჯამში, 111 ათასი ლარი დაიხარჯება.

აჭარის ფინანსთა და ეკონომიკის სამინისტრომ [ვინაიდან ქონება აჭარის ავტონომიური რესპუბლიკის საკუთრებაშია] სახელმწიფო შესყიდვების სააგენტოს უკვე მიმართა, რათა შენობის და მიწის ნაკვეთის დასაცავად ხელშეკრულება გააფორმოს შს სამინისტროს დაცვის პოლიციის დეპარტამენტთან.

„დასახელებული ქონების მოქალაქეების მიერ მასიურად თვითნებურად დაკავების საშიშროების არსებობიდან გამომდინარე საჭიროა დაცვის მომსახურების შესყიდვა“, – წერენ აჭარის სამინისტროდან სააგენტოს.

აღსანიშნავია, რომ დაცვის სამსახურმა 24 საათის განმავლობაში უნდა დაიცვას ობიექტები [მიწის ნაკვეთი, შენობა] კანონსაწინააღმდეგო ქმედებისაგან. „დაცვა“ პასუხისმგებელია საზოგადოებრივი წესრიგის დაცვაზე, არ უნდა დაუშვას უცხო პირების შესვლა, რის გამოც მიზანშეწონილია ობიექტების სათანადო დაცვა ცეცხლსასროლი იარაღის გამოყენებით.

დაცვის მომსახურების ღირებულება ერთი თვის განმავლობაში შეადგენს 27 756 ლარს თვეში“, – აღნიშნულია აჭარის სამინისტროდან შესყიდვების სააგენტოში გაგზავნილ წერილში.

აჭარის უმაღლესი საბჭოს ჩაქვიდან ბათუმში 2020 წელს გადაიტანეს. საბჭო ბათუმში იმ შენობაში განთავსდა, სადაც მანამდე ბათუმის ხელოვნების სასწავლო უნივერსიტეტი, მანამდე კი – ქალაქის N1 საავადმყოფო იყო. ეს შენობა კულტურული მემკვიდრეობის ძეგლია.

2019 წელს აჭარის ფინანსთა და ეკონომიკის მინისტრი ჯაბა ფუტკარაძე აცხადებდა, რომ განიხილებოდა „ჩაქვის შენობის“ გასხვისებაც და გრძელვადიანი იჯარაც. თუმცა, მეხუთე წელია სამინისტრო ამ შენობას მხოლოდ „მოქალაქეების მიერ მასიურად თვითნებურად დაკავების საშიშროებისგან“ იცავს.

ამ თემაზე:

განიხილება გასხვისებაც და იჯარაც – ჯაბა ფუტკარაძე უმაღლესი საბჭოს შენობაზე ჩაქვში

„ბოლო აღწერის სტატისტიკა გაყალბებულია“ – ეკონომისტი

„ქვეყნის მოსახლეობა 200 ათასი კაცით რომ გაზრდილიყო, საიდანღაც უნდა შემოსულიყო 449 ათასი უცხო ქვეყნის მოქალაქე, რომელიც აქ დარჩებოდა საცხოვრებლად ემიგრანტის სტატუსით. ეს თუ მართლაც ასეა, ძალიან საგანგაშოა, თუმცა სტატისტიკურად ეს არ დასტურდება,“ – სებ-ის ყოფილი პრეზიდენტი, ეკონომისტი რომან გოცირიძე საქართველოში 2024 წელს ჩატარებული მოსახლეობის აღწერის შედეგებს ეხმაურება.

ეკონომისტის თქმით, მონაცემთა ანალიზი მიუთითებს, რომ „ბოლო  აღწერის სტატისტიკა გაყალბებულია“.

„საქართველოში 2024 წელს ჩატარებული მოსახლეობის აღწერის შედეგები ან ძალიან არაზუსტია ან კატასტროფულია.

შესაძლოა 2014 წლის აღწერაც ცუდად იყო ჩატარებული და ამიტომაც არის ბოლო აღწერის შედეგები ასეთი უცნაური. ფაქტია, საოცარ დემოგრაფიულ სურათთან გვაქვს საქმე,“ – ამბობს რომან გოცირიძე.

ეკონომისტი მონაცემს, რომლის მიხედვითაც, აღწერიდან აღწერამდე ათწლიან პერიოდში, 2014-2024 წლებში საქართველოს მოსახლეობა თურმე 200 ათასით გაზრდილა, ეჭვქვეშ აყენებს.

„ეს შეუძლებელია შემდეგ გარემოებათა გამო:

ეკონომისტი ეყრდნობა ოფიციალურ სტატისტიკას. ამ სტატისტიკის მიხედვით, ბოლო ათი წლის განმავლობაში საქართველოში შემოსული და აქ ემიგრანტის სტატუსით დარჩენილი უცხო ქვეყნების მოქალაქეების რაოდენობამ შეადგინა 230 ათასი კაცი.

„გამოდის, რომ მიუხედავად საქართველოს მოქალაქეების რაოდენობის კლებისა – მიგრაციისა და ბუნებრივი კლების გამო და უცხოეთის მოქალაქეების რაოდენობის ზრდისა, ქვეყნის მოსახლეობა ვერ გაიზრდებდა ორასი ათასი კაცით. აცდენა რეალურ მონაცემებსა და აღწერის შედეგებს შორის არის 219 ათასი კაცი.

შეიძლება დავასკვნათ, რომ საქართველოში მოსახლეობის ბოლო აღწერის სტატისტიკა გაყალბებულია. ზოგადად, სტატისტიკის სახელმწიფო სამსახურის ინფორმაცია არასანდოა და ხშირ შემთხვევაში მანიპულირებული. ეს ეხება სხვა სტატისტიკურ მაჩვენებლებსაც,“ – განმარტავს რომან გოცირიძე.

2012-2024 წლების მიგრაციის ოფიციალურ სტატისტიკა

„ამ ცხრილში მოცემულია 2012-2024 წლების მიგრაციის ოფიციალური სტატისტიკა, გაანგარიშებული საქართველოს მოქალაქეებისა და უცხო ქვეყნის მოქალაქეების მიხედვით. იგი აჩვენებს, თუ რამდენად არაზუსტია აღწერის შედეგები.

საქსტატის მონაცემებით, გამოდის 449 ათასი უცხოეთის მოქალაქე ცხოვრობს საქართველოში ემიგრანტის სტატუსით [12 თვეზე მეტი ხნით]. მიგრაციის ოფიციალურ სტატისტიკის ცხრილში კი სულ სხვა რამ წერია.

აღწერის შედეგები ან მცდარია ან კატასტროფული. თითქმის ნახევარი მილიონი უცხოელი აქ თუ დასახლდა ამ ათ წელიწადში, ეს რას ნიშნავს, კარგად ვიცით ყველამ,“ – ამბობს რომან გოცირიძე.

ამავე თემაზე:

რატომ მიდიან ქართველები ქვეყნიდან და რატომ მოდიან რუსები საქართველოში – ეს სახიფათოა?

„ადრე თუ გვიან შეიძლება დაგიჭირონ, თუ გაქვს ღირსება“ – ზვიად რატიანის დაკავებაზე

პოეტი ზვიად რატიანი, რომელიც არაერთხელ გახდა სისტემის მხრიდან ფიზიკური თუ სხვა ტიპის ძალადობის მსხვერპლი, შესაძლოა 7 წლით ჩასვან ციხეში. მას პოლიციელზე თავდასხმას ედავებიან.

რატომ გაარტყა პოეტმა სილა პოლიციელს? – ამ თემაზე „ბათუმელები“ სცენარისტ ქეთი დევდარიანს და პოეტ პაატა შამუგიას ესაუბრა.

ქეთი დევდარიანი მიიჩნევს, რომ ზვიად რატიანის დაკავება ნიშნავს ადამიანის გასამართლებას ღირსებისთვის.

ზვიად რატიანი

„მე ვფიქრობ, ეს სილაც ზვიადის მხრიდან იყო საპროტესტო აქტი.

უბრალოდ, ისეთი რეალობა დადგა საქართველოში, რომ ზვიადისნაირი ადამიანები და, ზოგადად, პატრიოტი ადამიანები თავს გარეთ ვერ გრძნობენ კომფორტულად: თუ რაღაცას აკეთებ ამ ქვეყნისთვის, რუსეთს ებრძვი, სისტემას ან ამ მდგომარეობას, ავტომატურად ნიშნავს, რომ უნდა იყო ციხეში, დევნილი, რეპრესირებული და დასჯილი ხელისუფლებისგან. ალბათ ეს აქტი იყო, ჩემი აზრით.

მისი პირადი გადაწყვეტილება იყო, რომ უნდა იჯდეს – ის ციხეშიც თავისუფალი იქნება, ასე თვლის, ალბათ, თავად.

რეჟიმთან შეწინააღმდეგების ფორმები ძალიან ბევრია მაგრამ მთავარია, როგორია რეჟიმის მოწინააღმდეგეების სტრატეგიული შეთანხმება. ეს არის ერთიანობა, ერთმანეთის მიმართ სოლიდარობა, ერთმანეთის გატანა და, ზოგადად, სიმყარე საკუთარ გადაწყვეტილებებში, რომ არ ვეგუებით რუსულ რეჟიმს.

რაშიც დღეს ვართ, ეს დიქტატურაა და წყალი არ გაუვა. ეს არ არის გადაჭარბება და თუკი ამაში შარშან, შარშანწინ ვინმეს ეჭვი ეპარებოდა, მიუხედავად იმისა, რომ ყველანაირი ნიშნები სახეზე იყო, ახლა შეგვიძლია ვთქვათ, რომ ვცხოვრობთ სრულფასოვან რუსულ დიქტატურაში.

ამიტომ, თუ გაქვს ღირსება, ეს ნიშნავს, რომ ადრე თუ გვიან შეიძლება დაგიჭირონ“, – ამბობს ქეთი დევდარიანი.

მისი აზრით, ცხადია, ყველას ვერ დაიჭერენ და ყველა ციხეში ვერ წავა, თუმცა რეჟიმი შეეცდება, სინდისის პატიმრებისთვის ციხეში ადგილები გამოათავისუფლოს.

„თუკი ვინმეს შიში აქვს რაღაცის, ეს შიშიც ბუნებრივია. გასაგებია, რომ კრიმინალებს გარეთ უშვებენ და ათავისუფლებენ ადგილებს და ვის იწყალებენ – ვის იჭერენ, უკვე ამის გარკვევაც კი შეუძლებელია. ვინც მკვლელობაზეა დაჭერილი, გამოუშვებენ და ვინც გარუსების წინააღმდეგაა, დაიჭერენ. მაგრამ მთელ საქართველოს მაინც ვერ დაიჭერენ.

ის, რომ ჩვენთან ჩამოყალიბებული დიქტატურაა, მაინც არ ნიშნავს იმას, რომ ეს უნდა გავუფორმოთ ჩვენი შიშით ან ჩვენი დათრგუნვით ან ხელების ჩამოყრით, რადგან ჩვენი ეს ბრძოლა არ არის დასრულებული.

კი, ყველა მათი ქმედება მიმართულია იქითკენ, რომ საბოლოო ჯამში გავრუსდეთ, დავმშვიდდეთ და ვიცხოვროთ ამაში, მაგრამ ჩვენ ვხედავთ, რომ ეს ბრძოლა დასრულებული არ არის და ქართველებისგან ვერ ვხედავთ ჩვენ ამ ამბავთან შეგუებას.

ზვიად რატიანი სასამართლო პროცესზე.

ციხეში ახლა ხალხია – მზია ამაღლობელი, ნინო დათაშვილი, ჩვენი ახალგაზრდა ბიჭები, რომლებიც აქციების დროს დაიჭირეს, პოლიტიკოსები, ზვიადი – ყველა, ამათ ციხეში ყოფნასთან შეგუება შეუძლებელია, რადგან ყველა ეს ადამიანი არის დიქტატურის მძევალი.

და ჩვენი, როგორც მოქალაქეების ვალია, მათი მძევლობიდან დახსნა. საქართველოსი და პოლიტპატიმრების ტყვეობიდან გათავისუფლება.

ამიტომ, უბრალოდ არ გვაქვს უფლება ვთქვათ – „რა ვქნათ, დიქტატურაა“ და მორჩა“, – ამბობს ქეთი დევდარიანი.

მისი თქმით, ზოგადად, არ ახსოვს კაცობრიობის ისტორიას ის, რომ დიქტატურაში სიჩუმეს ვინმე გადაერჩინოს.

„დიქტატურის, ავტოკრატიის ლოგიკაა ეს. გაჩუმება არის ფაზა და გაჩუმება არ შველის.

არათუ გაჩუმება, მათ მხარეზე ყოფნაც კი არ შველის ხშირად. რეპრესიის ბუნება ისეთია, რომ ის, რაღაც დროს ავტოკრატიიდან ტოტალიტარიზმში გადასვლის პერიოდში ივიწყებს ვინ არის ჩუმად.

შეიძლება ჩუმად იყო, მაგრამ მოეჩვენოს, რომ გამომეტყველება გაქვს ოპოზიციური. ან თავისი ბიძაშვილის ჩანაცვლება მოუნდეს გაჩუმებული მასწავლებლის ადგილას და მაინც რეპრესიებში მოჰყვე. გაჩუმება არაფრისგან გიცავს და ამის უამრავი მაგალითი გვაქვს მსოფლიოში, რომ გაჩუმება ადამიანს არ იცავს საფრთხისგან. იმიტომ, რომ ეს არის მტაცებელი ცხოველი, მაინც შეგჭამს, რაც არ უნდა უღიმო და უთხრა „ბაბაია“. ამას რომელი საზოგადოებაც ვერ მიხვდა, ყველა შეჭამა ამ მტაცებელმა.

ამ შემთხვევაში რეჟიმმა, ოკუპაციურმა რუსეთმა, დიქტატურამ, ავტოკრატიამ.

ტოტალიტარულ სისტემაში გაჩუმებულსაც მიადგებიან და ეტყვიან, „გაჩუმებული კი ნუ ხარ, დაწერე ჩემი საქებარი სიტყვები“ და ეს ყველაფერი, ყოველდღე უფრო და უფრო აუტანელი ხდება.

ჩვენ ეს უნდა ჩაგვეხშო, როცა საწყისი ნიშნები გამოჩნდა. მაგრამ შეგვეშალა. როგორც ერთხელ შეგვეშალა, რომ რუსული ხელისუფლება არ უნდა მოგვეყვანა. ახლაც შეგვეშალა, რადგან როცა სუსტები იყვნენ და დაიწყეს ეს პროცესი – ქვეყნის დიქტატურიზაციის, მაშინ უნდა გამოგვეჩინა ალბათ სხვა ტიპის წინააღმდეგობა.

არის შეცდომები, რომელიც ხდება საბედისწერო.

გვაქვს თუ არა გამოსწორების შანსი? – შანსი ყოველთვის გაქვს. როგორც კი დავიჯერებთ, რომ შანსი არ გვაქვს, აი, მანდ მოიგებს დიქტატურა.

დილით გავიღვიძებთ თუ არა, ყოველთვის უნდა გვახსოვდეს, რომ ჩვენი საზოგადოების საუკეთესო ნაწილი დღეს დატყვევებულია. ვისაც ეს ქვეყანა უნდა ექცია დემოკრატიულ, განვითარებულ ქვეყნად, ყველა პროფესიის, ყველა ასაკის პატრიოტი ადამიანი, დღეს არის ციხეში, ესენი არიან ჩვენი მუდმივი სადარდებელი და საზრუნავი, რომ მართლა 7-7 წელი არ ჩარჩნენ იქ“, – ამბობს ქეთი.

„ზვიადი ყოველთვის წუხდა იმის გამო, რომ ამდენი ადამიანი იყო ციხეში, თვითონ კი ვერაფერს ახერხებდა ციხის გარეთ. შეიძლება ესეც ყოფილიყო ერთ-ერთი მოტივაცია ამ სილის“, – ამბობს პოეტი პაატა შამუგია.

მისი თქმით, პოეტი, რომელიც წლების განმავლობაში განიცდიდა სისტემის მხრიდან ძალადობას, ამ სისტემაზე უბრალო რეაქციის გამო, შესაძლოა 7 წელი გამოკეტონ ციხეში.

„მე მაინც მგონია, რომ ზვიადი, რომელსაც წლების განმავლობაში მართლა ტანჯავდა ეს სისტემა და დაინახა ადამიანი, რომელიც ამ სისტემას წარმოადგენდა, დიდი შანსია, რომ მას ძველი ტრავმები გაღვიძებოდა და სწორედ ამის გამო ჰქონოდა ტრავმული რეაქცია ამ ყველაფერზე.

მე ასე წარმომიდგენია, თუმცა ზვიადმა იცის ყველაზე კარგად, რას გრძნობდა იმ წუთას.

ფაქტია, რომ ადამიანს, რომელსაც წლების განმავლობაში სცემდა, აწამებდა, ოჯახში უვარდებოდა სისტემა, ამ სისტემაზე ერთი პატარა რეაქციაც კი აი, ასე ძვირად უჯდება.

პრაქტიკულად წარმოუდგენელია, რომ სილის გარტყმის გამო 7 წლით უშვებ ადამიანს. ეს სად წერია, როგორ წერია და რაში წერია საერთოდ.

ზვიადი ყოველთვის წუხდა იმის გამო, რომ ამდენი ადამიანი იყო ციხეში და თვითონ ვერაფერს ახერხებდა ციხის გარეთ. შეიძლება ესეც ყოფილიყო ერთ-ერთი მოტივაცია ამ სილის გარტყმის.

ყოველ შემთხვევაში, მას მუდმივად ჰქონდა სინდისის ქენჯნა ამის გამო, რომ ახალგაზრდები იყვნენ ციხეში და ის პრაქტიკულად ვერაფერს აკეთებდა მათი მდგომარეობის შესამსუბუქებლად.

ხვალ შესაძლოა ყველა აღმოვჩნდეთ ციხეში. ვინც წესიერი ადამიანია, ვინც პროფესიონალია და მალე ალბათ ციხეში საუკეთესო კულტურული გარემო იქნება. მაგრამ ამის არავის ეშინია და ეს დროებითია, რაც მთავარია. ეს არ იქნება დიდხანს, უბრალოდ ვერ გაგრძელდება ასე, რადგან ბუნების კანონებს ეწინააღმდეგება. ასე, რომ ახდება – „ცეცხლი ოლიგარქიას!“

გვიზღუდავენ სიტყვის თავისუფლებას, მაგრამ ეს შეზღუდვები გაიძულებს დაწერო კიდევ უფრო რადიკალურად. არავინ აპირებს, მათ კანონებს დაემორჩილოს. ყოველ შემთხვევაში, მწერლებთან, ვისთანაც ვილაპარაკე, ამ აზრზე არიან, რომ არცერთი ჩვენგანი არ ვაპირებთ ოდნავ მაინც შევარბილოთ ტონი. სულ პირიქით“, – ამბობს პაატა შამუგია.

ნიკა მელიას 8 თვიანი პატიმრობა მიუსაჯეს და 25 ათასი ლარის ჯარიმის გადახდა დააკისრეს

ნიკა მელიას მოსამართლე ნინო გალუსტაშვილმა წულუკიანის კომისიაზე არგამოცხადების გამო 8 თვიანი პატიმრობა მიუსაჯა.

მოსამართლემ გადაწყვეტილება დღეს, 27 ივნისს გამოაცხადა.

მსგავსად სხვა პოლიტიკოსებისა, „კოალიცია ცვლილებებისათვის“ ერთ-ერთ ლიდერს აეკრძალა 2 წლით თანამდებობის დაკავება.

გარდა ამისა, მოსამართლე ნინო გალუსტაშვილის გაგადწყვეტილებით, ნიკა მელიას დაეკისრა ჯარიმა – 25 ათასი ლარის გადახდა.

საქმე ეხება 2019 წლის განაჩენს, როდესაც ნიკა მელია სამსახურეობრივი უფლებამოსილების ბოროტად გამოყენებაში იყო ბრლადებული და დამნაშავედ სცნეს.

ნიკა მელიას პროცესამდე მოსამართლე ნინო გალუსტაშვილმა 7 თვიანი პატიმრობა შეუფარდა გივი თარგამაძესაც.

27 ივნისის მდგომარეობით, წულუკიანის კომისიაზე არმისვლის გამო დაპატიმრებულია 8 პოლიტიკოსი – ნიკა მელია, ირაკლი ოქრუაშვილი, ზურაბ გირჩი ჯაფარიძე, მამუკა ხაზარაძე, გივი თარგამაძე, ნიკა გვარამია, ბადრი ჯაფარიძე და გიორგი ვაშაძე.

ნიკა მელია დაბარებული იყო „ქართული ოცნების“ პარლამენტში შექმნილ დროებით საგამოძიებო კომისიაზე.

2025 წლის 5 თებერვალს „ქართული ოცნების“ თვითგამოცხადებულ პარლამენტში შეიქმნა „2003–2012 წლებში მოქმედი რეჟიმის, ამ რეჟიმის პოლიტიკური თანამდებობის პირებისა და პოლიტიკურ პარტიებში გაერთიანებული მოქმედი და ყოფილი თანამდებობის პირების 2003 წლიდან დღემდე საქმიანობის შემსწავლელი საქართველოს პარლამენტის დროებითი საგამოძიებო კომისია“. მოგვიანებით, კომისიას გაეზარდა უფლებამოსილება და რამდენჯერმე გაეზარდა მუშაობის ვადა.

დღეს მოქმედი კანონმდებლობით, პარლამენტის საგამოძიებო კომისიის მოთხოვნის შეუსრულებლობისთვის სანქცია გათვალისწინებულია, როგორც ადმინისტრაციულ სამართალდარღვევათა კოდექსში, ისე სისხლის სამართლის კოდექსში.

კერძოდ,  საქართველოს ადმინისტრაციულ სამართალდარღვევათა კოდექსის 1733-ე მუხლის მიხედვით – „საქართველოს პარლამენტის დროებითი საგამოძიებო კომისიის კანონიერი მოთხოვნის შეუსრულებლობა, – გამოიწვევს დაჯარიმებას შრომის ანაზღაურების ორმოცდაათი მინიმალური ოდენობით“.

ანალოგიური შინაარსის მატარებელია საქართველოს სისხლის სამართლის კოდექსის 349-ე მუხლიც, რომელიც სასჯელის სახედ და ზომად ითვალისწინებს ჯარიმას ან თავისუფლების აღკვეთას ვადით ერთ წლამდე, თანამდებობის დაკავების ან საქმიანობის უფლების ჩამორთმევას ვადით სამ წლამდე.

ახალგაზრდა იურისტთა ასოციაციის განმარტებით, აღნიშნული მიუთითებს იმაზე, რომ, ერთი და იგივე ქმედება შეიძლება შეფასდეს, როგორც სამართალდარღვევად, ისე დანაშაულად.

იმის გათვალისწინებით, რომ კანონმდებელი არ განსაზღვრავს, თანაბარი იურიდიული ძალის მქონე ნორმატიულ აქტებში იდენტური ჩანაწერების არსებობის შემთხვევაში რომელს ენიჭება უპირატესობა, მნიშვნელოვანია საკითხის შეფასება მოხდეს საქართველოს კონსტიტუციის და საერთაშორისო სტანდარტების შესაბამისად და დარღვევის შემთხვევაში გამოყენებული იქნეს ის ნორმა, რომელიც ნაკლებად ზღუდავს პიროვნების თავისუფლებას [In dubio pro libertate].

 

Exit mobile version