შინაგან საქმეთა სამინისტროს მომსახურების სააგენტო გონიოში ახალი ოფისის მშენებლობას გეგმავს. ყოფილი პოლიგონის ტერიტორიის მიმდებარედ სააგენტოსთვის სარგებლობის უფლებით გადაცემულია აჭარის საკუთრებაში არსებული 6 ჰექტარი ტერიტორია.
სააგენტოს ბათუმის სამსახური ამჯერად სულხან-საბა ორბელიანის N2-ში ფუნქციონირებს. ამ მისამართზე 11 843 კვადრატული მეტრი ტერიტორია ქალაქ ბათუმის საკუთრებაშია და ის სააგენტოსთვის უზუფრუქტითაა გადაცემული.
გონიოში ახალი ოფისის დაპროექტება-მშენებლობასთან დაკავშირებით მომსახურების სააგენტო ბაზარს იკვლევს.
ამ ეტაპზე უცნობია ბათუმიდან ყველა მომსახურებას გადაიტანენ გონიოში თუ არა. თუმცა შესყიდვების პორტალის დოკუმენტების მიხედვით, შენობებთან ერთად გონიოში მოეწყობა საგამოცდო მოედნები და ტექდათვალიერების ცენტრი [ავტომობილების განბაჟებისთვის].
მომსახურების სააგენტოს ოფისის გენგეგმა გონიოში
ადმინისტრაციული შენობისთვის საერთო ფართობი გათვლილია 5 300 კვ.მ, რომელშიც სხვადასხვა სივრცესთან ერთად უნდა განთავსდეს:
- სანომრე ნიშნების დასაბეჭდად განკუთვნილი სივრცე, სანომრე ნიშნების დამზადებისთვის განკუთვნილი მასალის შესანახი ოთხი
- ბალისტიკის ოთახი ავზით; IT თანამშრომლების სამუშაო ადგილი; სარეგისტრაციო სივრცე
- მართვის უფლების მისაღები თეორიული გამოცდის ორი ოთახი; მართვის მოწმობებთან დაკავშირებული სივრცე
- სამოქალაქო ცეცხლსასროლი და პნევმატური იარაღის რეგისტრაციისათვის განკუთვნილი სივრცე
- დამზადებული მოწმობებისა და სანომრე ნიშნების გაცემისთვის განკუთვნილი სივრცე
- ბანკის ოპერატორებისთვის განკუთვნილი სივრცე
- ხელმძღვანელების ოთახები (უფროსი, მოადგილე] და სხვა.
ბაზრის კვლევის დავალება მოიცავს „საპროექტო დოკუმენტაციის შედგენის მომსახურებას, რომლის თანახმადაც მიმწოდებელი ვალდებულია, სააგენტოს მიერ გადაცემული ტექნიკური დავალების საფუძველზე მოამზადოს დეტალური სამშენებლო პროექტი და მის საფუძველზე განახორციელოს მშენებლობა“.
საპროექტო დოკუმენტაციით გათვალისწინებული უნდა იყოს შეზღუდული შესაძლებლობების მქონე პირთათვის შენობის ადაპტაციის ღონისძიებები.
სააგენტო მიმწოდებელს გადასცემს მის ხელთ არსებულ ყველა მასალას, რომელიც შესაძლოა საჭირო გახდეს ტექნიკური და ფინანსური წინადადების მოსამზადებლად.
„ერთი ხელშეკრულების ფარგლებში (Design-Build მეთოდით) აჭარაში, გონიოში [ნაკვეთის საერთო ფართობი 61 017 კვ.მ, განაშენიანების ფართობი 39 100 კვ.მ] მომსახურების სააგენტოს შენობების მშენებლობისა და ტერიტორიის/საგამოცდო მოედნების მოწყობისათვის დეტალური საპროექტო-სახარჯთაღრიცხვო დოკუმენტაციის მომზადებისა და მის საფუძველზე სამშენებლო სამუშაოების შესრულების ტექნიკურ დავალებასთან“ დაკავშირებით, დაინტერესებულ პირებს შეუძლიათ განფასება, ასევე თავიანთი წინადადებები და შენიშვნები სააგენტოს 2023 წლის 16 დეკემბრამდე წარუდგინონ.
