Batumelebi

„ენერგო-პრო ჯორჯიას“ ინფორმაციით, ელექტროგადამცემი ხაზის „ერგე 1“-ის რეაბილიტაციის სამუშაოები 2019 წლის ოქტომბრის ბოლოს დასრულდება. აღნიშნული ხაზის ექსპლუატაციაში გაშვება, როგორც კომპანიაში აცხადებენ, მნიშვნელოვნად დააკმაყოფილებს აჭარაში ელექტროენერგიის მკვეთრად გაზრდილი მოხმარების მოთხოვნას. „ენერგო პროში“ არ აკონკრეტებენ, ბოლო 2 წლის განმავლობაში რამდენმა კომპანიამ მიმართა მათ ქსელზე დაერთების მოთხოვნით და რამდენის მოთხოვნა დაკმაყოფილდა.

ენერგოდეფიციტის გამო, ძირითადად, ვერ ხერხდება მსხვილი ობიექტების ქსელზე დაერთება. მაგალითად, კომპანია „სახლი ხეივანში“, რომელიც ბათუმში, ჟიული შარტავას გამზირზე მრავალფუნქციურ კომპლექსს აშენებს, აჭარის მთავრობას სამუშაოების დასრულებისთვის დამატებით ვადას სთხოვდა და შენობის ექსპლუატაციაში დროულად ვერგაშვების რამდენიმე მიზეზს ასახელებდა. მათ შორის ენერგოდეფიციტს, რის გამოც ენერგოკომპანიამ ობიექტს მოთხოვნილი სიმძლავრე  ვერ მიაწოდა.

ელექტროგადამცემი ხაზი „ერგე-1“-ის რეაბილიტაციაზე შეთანხმება „ენერგო-პრო ჯორჯიასა“ და იმ მოსახლეობას შორის, ვის საკუთრებაშიც ეს ხაზი გადის, მიღწეული ვერ იქნა, რამაც რეაბილიტაციის პროცესის დაწყება გააჭიანურა.

„საბოლოოდ, მოსახლეობის საკუთრებაში არსებულ ნაკვეთებს, რომლებშიც გადამცემი ხაზი გადიოდა, გვერდი აუარეს“, – გვითხრა იურისტმა მალხაზ აბულაძემ, რომელიც მოსახლეობის ინტერესებს იცავდა.

მიუხედავად „ერგე 1“-ის რეაბილიტაციისა, როგორც „ენერგო-პრო ჯორჯიაში“ აცხადებენ, სამომავლოდ მოსალოდნელია მოხმარების კიდევ უფრო ზრდა და მხოლოდ „ერგე-1“-ის რეაბილიტაცია საკმარისი არ არის ბათუმის ენერგომომარაგებისთვის.

„კომპანიამ დაიწყო ალტერნატიული წყაროების მოძიება. ამ ეტაპზე მიმდინარეობს ახალი, მაღალი ძაბვის ელექტროგადამცემი ხაზის – „ჭარნალი110“-ის პროექტირების სამუშაოები. ხაზის მშენებლობას უშუალოდ სამუშაოების დაწყებიდან დაახლოებით წელიწად-ნახევარი დასჭირდება. აღნიშნული ხაზის მშენებლობისთვის და ბათუმში გამანაწილებელი ქსელის გამართვის სამუშაოებისთვის საჭირო იქნება, სავარაუდოდ, 25 000 000 ლარის ინვესტიციის განხორციელება“, – აცხადებს „ენერგო-პრო ჯორჯია“.

რა თანხას ხარჯავს ენერგოკომპანია „ერგე1“-ის რეაბილიტაციაში და კომპანიის მიერ ბათუმის საიმედო ენერგომომარაგებისთვის მთლიანად ჩადებული ინვესტიცია აისახება თუ არა სამომხმარებლო ტარიფზე? ასევე, გაივლის თუ არა ახალი ხაზი კერძო ნაკვეთებში?

„ერგე 1“ ელექტროგადამცემი ხაზის სარეაბილიტაციო სამუშაოები ამ ეტაპზეც აქტიურად გრძელდება, ამიტომ სანამ რეაბილიტაცია/რეკონსტრუქციის სამუშაოები არ დასრულდება, ზუსტი ციფრის თქმა არ შეგვიძლია. რაც შეეხება ალტერნატიულ ახალ ხაზს „ჭარნალი110“-ს, ის ხელვაჩაურიდან შემოვა ბათუმში, გამოყვება მდინარე ჭოროხს, ისე, რომ ხაზი კერძო საკუთრებაში არ გაივლის და მხოლოდ სახელმწიფო საკუთრებაში არსებულ მიწის ნაკვეთებს გაივლის. ზოგადად „ენერგო-პრო ჯორჯიას“ ნებისმიერი ინვესტიცია, რომელსაც ის ახორციელებს ყოველწლიურად, ყოველთვის წარედგინება სემეკს. რაც შეეხება ტარიფს, ამაზე ჩვენი კომპანია კომენტარს ვერ გააკეთებს, რადგან ეს სემეკის კომპეტენციაა“, – გვითხრეს „ენერგო-პრო ჯორჯიაში“.

საქართველოს ენერგეტიკისა და წყალმომარაგების მარეგულირებელ ეროვნულ კომისიაში [სემეკში] „ბათუმელებს“ უთხრეს, რომ დღეს არსებული სამომხმარებლო ტარიფი ელექტროენერგიაზე 2021 წლის 1-ელ იანვრამდე არ შეიცვლება.

„ჩვენ ვადგენთ სამწლიან ტარიფებს და მაშინ, როცა მოქმედი ტარიფი დამტკიცდა 2018-19-20 წლებისთვის, გათვალისწინებული იყო მიმწოდებელი ენერგოკომპანიების მიერ განხორციელებული თუ დაგეგმილი ინვესტიციები. ამიტომ, სემეკი კომპანიების საქმიანობას, მათ მიერ განხორციელებულ თუ დაგეგმილ ინვესტიციებს, განიხილავს 2021-22-23 წლების ტარიფების დადგენისას და მხოლოდ მაშინ მიიღებს შესაბამის გადაწყვეტილებას. რაც შეეხება კომპანიების მიერ 2019-2020 წლებში განხორციელებულ ნებისმიერ ინვესტიციას, ის მოქმედ ტარიფზე, 2021 წლამდე ვერ მოახდენს გავლენას“, – გვითხრეს სემეკში.

მთავარი ფოტო: „ერგე 1“ გადამცემი ხაზი რეაბილიტაციის დაწყებამდე. ფოტო „ბათუმელების“ არქივიდან.

ჟიარ ბოლსონარომ ბრიჯიტ მაკრონის შეურაცხმყოფელი ფეისბუქკომენტარი წაშალა მას შემდეგ, რაც მსოფლიო მედიის ყურადღების ცენტრში მოექცა ბრაზილიის პრეზიდენტის სიტყვები საფრანგეთის პირველი ლედის მიმართ.

ჟაირ ბოლსონარომ საკუთარ ფეისბუქგვერდზე ბრიჯიტ მაკრონის შეურაცხმყოფელი პოსტი 27 აგვისტოს გამოაქვეყნა. მან საკუთარი ცოლის, ბრაზილიის პირველი ლედის, 37 წლის მიშელ ბოლსონაროსა და საფრანგეთის 66 წლის პირველი ლედის, ბრიჯიტ მაკრონის სურათები გამოაქვეყნა შემდეგი ტექსტით – „ახლა გესმით, რატომაც გადაეკიდა მაკრონი ბოლსონაროს?” პოსტს ბრაზილიის პრეზიდენტი კომენტარსაც ურთავს პორტუგალიურად: „ნუღარ დავამცირებთ მას (მაკრონს)… ჰა, ჰა”.

ამ დროისთვის ჟიარ ბოლსონაროს ოფიციალურ ფეისბუქგვერდზე ეს პოსტი კომენტარითურთ აღარ იძებნება.

მაკრონმა ბრაზილიის პრეზიდენტის ფეისბუქპოსტი უხეშ და სამწუხარო ჟესტად შეაფასა.

ამაზონის ხანძრების მიზეზით დაწყებული დიპლომატიური კამათი საფრანგეთსა და ბრაზილიას შორის ვერბალურად გრძელდება.

ყველაფერი კი იმით დაიწყო, რომ ბრაზილიის პრეზიდენტმა საფრანგეთის პრეზიდენტის რიტორიკას კოლონიური უწოდა მას შემდეგ, რაც  მაკრონმა  ამაზონის ხანძრები საერთაშორისო კრიზისად შეაფასა და დიდი შვიდეულის ქვეყნებს მოუწოდა, თემა აგვისტოს სამიტის პროირიტეტად ექციათ.

ბოლსონაროს მთავრობა თავდაპირველად უარს აცხადებდა დიდი შვიდეულის მიერ ხანძრების ჩასაქრობად გამოყოფილ 22 მილიონ დოლარზე, თუმცა 28 აგვისტოს ბრაზილიის პრეზიდენტის სპიკერმა განაცხადა, რომ ამ დახმარებას ბრაზილია მიიღებს მხოლოდ იმ შემთხვევაში, თუ ფინანსურ რესურსს ბრაზილიის მხარე განკარგავს.

ჟიარ ბოლსონარო ასევე დასძენს, რომ გარდა ზემოაღნიშნული პირობისა, იმისთვის, რომ ბრაზილიამ ფინანსური დახმარება მიიღოს, ამისთვის მას ემანუელ მაკრონმა ბოდიში უნდა მოუხადოს შეურაცხმყოფელი სიტყვებისთვის. ბოლსონარო მიიჩნევს, რომ მაკრონის განცხადებები საფრთხეს უქმნის ბრაზილიის სუვერენიტეტს.

წყარო: Le Figaro

დღეს, 29 აგვისტოს, აჭარის მთავრობა ქობულეთში, ბიზნესმენ თემურ ჭყონიას სასტუმროში [„ჯორჯია პალასი“] სხდომას გამართავს. დღის წესრიგში ოთხი საკითხია და რამდენიმე საინვესტიციო პროექტის ხელშეწყობის ღონისძიებების დამტკიცებას გულისხმობს. გარდა ამისა, როგორც მთავრობის პრესსამსახურში გვითხრეს, აჭარის მთავრობის თავმჯდომარე, თორნიკე რიჟვაძე, რამდენიმე მნიშვნელოვან განცხადებას გააკეთებს.

სავარაუდოდ, ამ განცხადებებს მოვისმენთ, შემდეგ კი სხდომა ჟურნალისტებისთვის დაიხურება და მთავრობის თავმჯდომარე ოთხ მინისტრთან და სხვა თანამდებობის პირებთან ერთად, რომლებიც სხდომას დაესწრებიან, მარტო დარჩება. სხდომის შემდეგ, შესაძლოა სხდომის მსვლელობისას, ჟურნალისტებს კომენტარების ჩაწერის საშუალება ჰქონდეთ. სხდომები სრულიად ღია იყო ჟურნალისტებისთვის წინა მთავრობის თავმჯდომარეების მუშაობის პერიოდში.

თავის დროზე გასვლითი სხდომები კონკრეტულ მუნიციპალიტეტებში მთავრობამ სწორედ ღიაობის პრინციპისა და მოქალაქეთა ჩართულობის გასააქტიურებლად დანერგა [მაშინ გადაწყვეტილება ასე ახსნეს]. ამ შემთხვევაში კი მთავრობა, როგორც სხვა გასვლითი სხდომების შემთხვევაში, მოსახლეობას შესაძლოა სხდომის შემდეგ შეხვდეს.

დღის წესრიგის მიხედვით, პირველი საკითხი, რასაც დღეს მთავრობა სხდომაზე განიხილავს, შპს „კორაქსესისთვის“ საინვესტიციო პროექტის განხორციელებისთვის საჭირო ღონისძიებების ხელშეწყობაა. სავარაუდოდ, კომპანიას ნაკისრი ვალდებულებების შესრულების ვადებს შეუცვლიან.

შპს „კორაქსესს“ ბათუმში, გამსახურდიას 12-ში მდებარე მოდერნის სტილის შენობაზე მანსარდის მოწყობის ნებართვა უკვე მიღებული აქვს, კომპანია აჭარის მთავრობასთან დადებულ ხელშეკრულებაში ცვლილებას ითხოვდა. კერძოდ, ამ შენობის მიმდებარედ, კოსტავას ქუჩა 20ა-ში, შპს „კორაქსესი“ საზოგადოებრივი სკვერის მოწყობას აპირებს, მაგრამ არა იქ არსებულ 485 კვ/მ-ზე, არამედ მხოლოდ 100-120 კვ/მ-ზე. კომპანია აცხადებდა, რომ  დანარჩენი ფართობის სკვერს, მთავრობის მიერ სხვაგან გამოყოფილ მიწის ნაკვეთზე მოაწყობდა…

გარდა ამისა, აჭარის განათლების მინისტრს,  საქართველოს ევროპული კულტურული მემკვიდრეობის დაცვის კავშირმა მიმართა წერილით,  გადაარჩინოს ავთენტურობის დაკარგვას კულტურული მემკვიდრეობის ძეგლი ბათუმში, ზვიად გამსახურდიას ქუჩის #12-ში მდებარე მოდერნის სტილის შენობა.

სპეციალისტები მიიჩნევენ, რომ ბათუმში, ზ. გამსახურდიას 12-ში, მდებარე შენობაზე სახურავის ამაღლება მანსარდის მოსაწყობად კულტურული მემკვიდრეობის ძეგლის ავთენტურობის დაკარგვის მიზეზი გახდება. ეს დაუშვებელია, რადგან შენობა მოდერნის სტილის საუკეთესო ნიმუშია საქართველოში და შედის საქართველოს მოდერნის მემკვიდრეობის კულტურულ მარშრუტში.

ამ თემაზე დეტალურად წაიკითხეთ აქ: კიდევ რა სურს კომპანიას, რომელსაც ძეგლზე მანსარდის დაშენების ნებართვა აქვს

მეორე საკითხი შპს „გულების“ საინვესტიციო პროექტის განხორციელების ხელშეწყობას ეხება. კომპანიამ აჭარის მთავრობასთან შეთანხმებით ბათუმის ბულვარში, ანბანის კოშკის მიმდებარე ტერიტორიაზე, რესტორანი გახსნა. თავის დროზე საზოგადოების უკმაყოფილება გამოიწვია რესტორნის ინფრასტრუქტურამ, განსაკუთრებით კი თონემ, რომელიც პლაჟზე ფუნქციონირებდა. პლაჟზე განთავსებული რამდენიმე რესტორნის ინფრასტრუქტურა რომ არ იმსახურებდა მოწონებას, ამაზე თავად თორნიკე რიჟვაძემაც გააკეთა განცხადება. მან თქვა, რომ „პლაჟი სახაშეებისგან უნდა გაიწმინდოს“, თუმცა უცნობია გულისხმობდა თუ არა მათ შორის შპს „გულების“ რესტორანს.

ამ თემაზე დეტალურად წაიკითხეთ აქ: ახალი რესტორანი სოფლისთვის დამახასიათებელი ინფრასტრუქტურით ბათუმის პლაჟზე

მესამე საკითხი კი ბიძინა ივანიშვილის „ბანკი ქართუს“ საინვესტიციო საქმიანობის ხელშეწყობას ისახავს მიზნად.

ბოლო საკითხზე აჭარის განათლების მინისტრი მაია ხაჯიშვილი ისაუბრებს. მთავრობა განათლების სამინისტროს სსიპ-ის საარქივო სამმართველოსა და მისი ტერიტორიული ორგანოების მომსახურების საფასურის განსაზღვრას გეგმავს.

ავტორი: მარიამ მუთიძე

ჰანა არენდტი ებრაული წარმოშობის გერმანელ-ამერიკელი ფილოსოფოსი და მწერალი იყო, რომელიც ნაცისტურ გერმანიას გაექცა ამერიკაში და შექმნა უძლიერესი პოლიტიკური ფილოსოფიის სკოლა. ჰანამ ჩამოაყალიბა ტოტალიტარიზმის თეორიაც. 

მარტინ ჰაიდეგერი კი, ნაცისტების მხარდამჭერი ფილოსოფოსი იყო. 1925 წელს მარბურგის უნივერსიტეტში შეხვდა ჰანას, ჰაიდეგერი მაშინ ლექტორი იყო, 36 წლის, უკვე დაქორწინებული კაცი, ჰანა კი მისი სტუდენტი.

ჰანას გონებამახვილობამ, ინტელექტმა და მშვენიერებამ მოხიბლა ჰაიდეგერი და მათ შორის 50-წლიანი რომანიც დაიწყო.

მათი მიმოწერა კრებულად 2003 წელს გამოიცა. ისინი უდავოდ დიდი ფიგურები იყვნენ მეოცე საუკუნის ფილოსოფიაში. მათი იდუმალი სასიყვარულო ისტორია კი ბევრისთვის დღემდე შთამბეჭდავია.

მეორე მხრივ, ეს ებრაელი ქალისა და ნაცისტი კაცის სიყვარულის ამბავიცაა.

2018 წელს გერმანიის ქალაქ რეგენსბურგში დადგეს ოპერა  “სიყვარულის ბანალურობა” – რომლის ცენტრალური ფიგურები ჰანა და მარტინი იყვნენ.

80 წლის ჰაიდეგერმა ყოფილ სტუდენტებს, მათ შორის ჰანასაც, სთხოვა მასზე დაეწერათ. ჰანამ დაწერა, რომ ჰაიდეგერმა მთელი ცხოვრება სპილოს ძვლის კოშკში მჯდომმა გაატარა და ყოველდღიურობაზე წარმოდგენა არ ჰქონდა. ამით მან თითქოს დაიცვა ის და გაათავისუფლა კრიტიკისგან, რომელსაც იმსახურებდა, როგორც ნაცისტურ გერმანიაში დარჩენილი ფილოსოფოსი.

1925 წლის თებერვალში მარტინ ჰაიდეგერი ჰანა არენდტს წერდა:

„ძვირფასო მის არენდტ

ამ საღამოს აუცილებლად მინდა გნახოთ და ვისაუბრო თქვენს გულთან.

ყველაფერი უნდა იყოს უბრალო, ცხადი და ნათელი ჩვენ შორის. მხოლოდ ამის შემდეგ მექნება უფლება გთხოვოთ შეხვედრა. თქვენ ჩემი მოსწავლე ხართ, მე კი – მასწავლებელი. ეს იქნება ერთადერთი მიმართება ჩვენს ურთიერთობაში.

მე არასდროს დაგიძახებთ „ჩემს“, მაგრამ ამიერიდან მთელი ჩემი ცხოვრება თქვენ გეკუთვნით და ის გაიზრდება თქვენთან ერთად.

ვერასდროს გავიგებთ, ჩვენი არსებობა სხვებისთვის რად იქცევა. 

შენი ახალგაზრდობის გზა ნელ-ნელა გაფერმკრთალდება, ჩვენ ამასთან შეგუება მოგვიწევს. მე კი მთელი ეს დრო ერთგულად შეგახსენებთ სიმართლეს თქვენს შესახებ.

იყავით ბედნიერი – ამჟამად ესაა ჩემი სურვილი.

მაშინ, როცა ბედნიერი იქნებით, გახდებით ქალი, რომელსაც შეეძლება ბედნიერების გაცემა და რომლის ირგვლივაც იქნება ბედნიერება, უსაფრთხოება, მშვიდობა, პატივისცემა და მადლიერების განცდა ცხოვრებისადმი.

ასე შეძლებთ მოემზადოთ იმ ცოდნისა და გამოცდილების მისაღებად, რასაც ჩვენი უნივერსიტეტი აპირებს, რომ მოგცეთ.

ჩვენ უნდა შევხვდეთ ერთმანეთს და მივიღოთ ეს როგორც საჩუქარი და არ დავამახინჯოთ ის დროთა განმავლობაში. არ უნდა ვიფიქროთ ერთმანეთზე, როგორც სულისმიერ მეგობრებზე, არის რაღაცები, რასაც ვერასდროს გამოცდი. ჩვენი მეგობრობა მოგვცემს საშუალებას, ერთად გავიზარდოთ.

მაგრამ მინდა მხოლოდ ერთხელ გაკოცოთ მშვენიერ წარბებზე და პატივი მივაგო თქვენს დამსახურებებს ჩემს ნაშრომებში.”

11 დღის შემდეგ ჰაიდეგერი კვლავ წერს ჰანას:

„ძვირფასო ჰანა,

რატომ არის სიყვარული ყველა შესაძლო ადამიანურ გამოცდილებაზე მდიდარი და ტკბილი ტვირთი მათთვის, ვინც მასზეა ჩაჭიდებული? იმიტომ, რომ ჩვენ ის ვხდებით, რაც გვიყვარს და ასე ვინარჩუნებთ საკუთარ თავს. შემდეგ, გვინდება, მადლობა გადავუხადოთ საყვარელ ადამიანს, მაგრამ ადეკვატურს ვერაფერს ვპოულობთ.

მხოლოდ საკუთარ თავს შეგვიძლია გადავუხადოთ მადლობა.

სიყვარული ტრანსფორმირდება საკუთარი თავის მიმართ ერთგულებასა და სხვისადმი უპირობო რწმენად.

ასე ამძაფრებს სიყვარული თავის იდუმალებას.

ადამიანი საკუთარ ბედს სხვას უკავშირებს, ჭეშმარიტი სიყვარულის მოვალეობა კი, არის შეინარჩუნოს ყველაფერი ისეთი სახით, როგორც ეს პირველ დღეებში იყო.“ 

რომანტიკული ურთიერთობის ერთი წლის თავზე ჰანამ შეწყვიტა ურთიერთობა ჰაიდეგერთან, ძირითადად იმ მიზეზით, რომ სურდა უფრო მეტი დრო დაეთმო აკადემიური საქმიანობისთვის.

ჰაიდეგერი მაშინ წერდა:

“…მესმის, მაგრამ ეს ჩემს მდგომარეობას ვერ ამარტივებს.

ფილოსოფოსობა სწორედ ასეთი გადაწყვეტილებების მიღებაა, ალბათ.”

ჰანას წერილი არ შემოუნახავს ისტორიას, მაგრამ ნათელია, რომ ის მოითხოვდა რომანტიკისგან დისტანცირებას და საქმეზე ორიენტირებას. მიუხედავად იმისა, რომ ჰაიდეგერი ჰანას მომავალ ცხოვრებაში წარმატებებს უსურვებდა, მაინც გამოთქვამდა სურვილს, გაეგრძელებინათ ურთიერთობა.

1928 წელს ჰანა წერდა ჰაიდეგერს, მადლობას უხდიდა მოთმინებისა და გაგებისთვის:

„ისე მიყვარხარ, როგორც პირველ დღეს – და ეს ორივემ ვიცით. ცხოვრების გზა, რომელიც შენ დამანახე, იმაზე გრძელი და რთული აღმოჩნდა, როგორსაც მე მოველოდი.

მარტოობა ამგვარი ცხოვრებისთვის ჩემი არჩევანია და ერთადერთი გზაა, რომელიც ცხოვრებამ შემომთავაზა. მხოლოდ ასე შევძელი ამ გზაზე დგომა. მხოლოდ შენ გაქვს უფლება ეს იცოდე, რადგან ამას ისეც ხვდებოდი. 

ახლა ვიცი, რომ მაშინაც კი, როცა ჩუმად ვიქნები, მე არ მომიწევს ტყუილით ცხოვრება. ყოველთვის იმაზე მეტს ვაძლევდი ადამიანებს, ვიდრე ისინი ჩემგან ელოდნენ, ეს გზა კი არაფერია, თუ არა ვალდებულებების გაცნობიერება, სწორედ ჩვენმა სიყვარულმა გამხადა პასუხისმგებლიანი.

მე სიცოცხლის უფლებას დავკარგავ შენს სიყვარულთან ერთად, მაგრამ ასევე დავკარგავ სიყვარულსაც, თუ უარს ვიტყვი იმ პასუხისმგებლობაზე, რაც ჩემი ცხოვრების წარმმართავია.”

მომდევნო წელს ჰაიდეგერის სემინარზე ჰანა შეხვდა გერმანელ ჟურნალისტსა და ფილოსოფოსს გიუნტერ შტერნს. იმავე შემოდგომაზე მათ იქორწინეს. ქორწილის დღეს არენდტმა ბოლო რომანტიკული წერილი გამოუგზავნა ჰაიდეგერს:

„არ დამივიწყო. არც ის დაივიწყო, რომ  ჩვენი სიყვარული იქცა კურთხევად მთელი ჩემი ცხოვრებისა. ეს ფაქტი ურყევი იქნება მუდამ, დღესაც კი, როცა ჩემი მღელვარე ცხოვრების გზაზე ვიპოვე სახლი და განცდა, რომ ვეკუთვნი ვიღაცას, ვისაც ვიცი, რომ აუცილებლად გაუგებდი.

გკოცნი თვალებზე,

შენი ჰანა”

მომდევნო ნახევარი საუკუნის განმავლობაში, როცა ორ ფილოსოფოსს მთელი ატლანტიკის ოკეანე და პოლიტიკური იდეოლოგიების ქარცეცხლი ყოფდა, არ შეუწყვეტიათ მიმოწერა, სანამ 1975 წელს ჰანა არ გარდაიცვალა. 

წყარო: brainpickings.org, haaretz.com

საქართველოს ეროვნულმა ბანკმა 5 ლარის ნომინალის ოქროსა და ვერცხლის საკოლექციო მონეტები გამოუშვა, რომლებიც 2019 წლის შემოდგომაზე იაპონიაში რაგბის რიგით მე-9 მსოფლიო თასის გათამაშებას უკავშირდება, სადაც საქართველოს მორაგბეთა ეროვნული ნაკრებიც მიიღებს მონაწილეობას.

„საკოლექციო მონეტები ოვალურია და იმეორებს  რაგბის ბურთის ფორმას, რაც სიახლეა საქართველოს ეროვნული ბანკის მიერ აქამდე გამოშვებული  მონეტების დიზაინის თვალსაზრისით.  მონეტები ლიეტუვას ზარაფხანაში მოიჭრა და მათი დიზაინი იდენტურია, იმ განსხვავებით, რომ ვერცხლის მონეტაზე გამოყენებულია ფერი.

მონეტის ავერსის მთავარ კომპოზიციას წარმოადგენს მორაგბე ბურთით ხელში, ბორჯღალი – საქართველოს რაგბის კავშირის ლოგო;  რაგბის მსოფლიო თასის აღმნიშვნელი წარწერა ინგლისურ და იაპონურ ენებზე,  “2019”  და  “5 ლარი”.

რევერსზე გამოსახულია უძველესი ქართული ტრადიციული თამაშის – ლელობურთის  საწყისი მომენტი – ჰაერში აგდებული ბურთი და მის დასაუფლებლად აღმართული ხელები; წარწერები “ლელო”, “LELO”, “Georgia”, “საქართველო”.

მონეტების შეძენა შესაძლებელი იქნება 29 აგვისტოდან“ – აცხადებს ეროვნული ბანკი

ოთხსულიან ოჯახში მარტო თვითონ მუშაობს. ამბობს, რომ ცხოვრების ყველაზე რთული პერიოდის დაძლევა ორი საკერავი მანქანით და ერთი უთოთი შეძლო. კერავდა ყველაფერს, რასაც შეუკვეთდნენ. ასე გაუმკლავდა შვილის ექვსწლიან პატიმრობას. ამ დროს მეორე შვილი სტუდენტი ჰყავდა და მასაც უამრავი რამ სჭირდებოდა. ციცო ბოლქვაძე 40 წლისაა და ახლა საკუთარი, მცირე სამკერვალო აქვს. თუმცა მანამდე დიდ სამკერვალო კომპანიაში იყო დასაქმებული, სადაც, როგორც თავად ამბობს, ზეგანაკვეთურად მუშაობდა ანაზღაურების გარეშე, ვერც შვებულებით სარგებლობდა  და ვერც ოჯახის წევრებს უთმობდა დროს.

ციცო მიხვდა, რომ საკუთარი საქმე მალევე უნდა დაეწყო. მამამ ორი საკერავი მანქანა აჩუქა, შეკვეთების მიღება დაიწყო და ახლა დამოუკიდებლად მუშაობს.

„ბევრი საქმე მაქვს, კაბის შეკერვა 2 საათში შემიძლია, მომხმარებლებს დიდხანს არ ვალოდინებ და ბევრი მოდის ჩემთან. ვთანამშრომლობ უნივერსიტეტებთან, ცეკვის ანსამბლებთან, შევკერე ასევე ჭადრაკის მსოფლიო ოლიმპიადის მონაწილეების კოსტიუმები. დამოუკიდებლად მუშაობა ბევრად მეტ შემოსავალსაც ნიშნავს და თავისუფლებასაც,“ – ამბობს ყოფილი პატიმრის დედა.

ბევრს მუშაობს და ამბობს, რომ მისთვის დიდი შეღავათი იქნებოდა, მისი ოჯახის  სხვა წევრებსაც რომ ჰქონდეთ სამსახური. ციცოს 24 წლის შვილი, რომელიც ციხიდან 2019 წლის აპრილში გათავისუფლდა, სამსახურს ვერ პოულობს, რაც მისთვის დიდი პრობლემაა. იმუშავა მშენებლობაზე და შეუსაბამო შრომითი პირობების გამო მალევე დატოვა სამსახური.

„შვილის ციხეში მოხვედრის შემდეგ პატიმრების პრობლემები სხვაგვარად დავინახე. სახელმწიფოსგან არ გვიგრძვნია არანაირი დახმარება დასაქმების პროცესში, ჩვენი ოჯახისთვის სასიცოცხლოდ მნიშვნელოვანია ჩემი შვილის დასაქმება. მიუხედავად იმისა, რომ შრომისუნარიანი ვარ, მაქვს ჯანმრთელობის პრობლემები. მუდმივად მჯდომარე და მოხრილი ვმუშაობ, შეიძლება ერთ დღეს ვეღარაფერი  გავაკეთო და მთელი ოჯახი უსახსროდ დავრჩეთ,“ – ამბობს ციცო ბოლქვაძე.

ახლობლებმა ურჩიეს, რომ სამკერვალოს გაფართოების მიზნით  შეეძლო ,,დემოკრატიის ინსტიტუტისთვის“ მიემართა „ყოფილი პატიმრების გაძლიერების პროექტში“ ჩასართავად. ,,დემოკრატიის ინსტიტუტი“ პროექტს დასავლეთ საქართველოს ოთხ რეგიონში ახორციელებს პარტნიორ ორგანიზაციებთან ერთად. როგორც ციცო გვიყვება, არ სჯეროდა, რომ ვინმე რამით დაეხმარებოდა პატიმრის ოჯახს და აქამდე არც მსგავსი პროგრამის შესახებ გაეგო, მაგრამ მას შემდეგ, რაც პროგრამაში ჩაერთო, მისი სამკერვალო დაათვალიერეს, აღწერეს და საჭირო დამატებითი ხელსაწყო-დანადგარები შეუძინეს.

ყოფილი პატიმრების გაძლიერების პროგრამა პატიმართა ოჯახის წევრების ჯანმრთელობის, დასაქმების ხელშეწყობასაც გულისხმობს.

,,არის ბევრი სამედიცინო აქციაც უფასოდ, ყოფილი პატიმრების, მათი ოჯახის წევრებისა და პრობაციონერებისთვის, ყოველთვის მირეკავენ. ამ გამოკვლევებით რომ ვისარგებლო, ეს დიდი შეღავათია“, – ამბობს ციცო ბოლქვაძე.

მასალა მომზადებულია პროექტის – „ყოფილი პატიმრების, პატიმართა ოჯახებისა და პრობაციონერების მხარდაჭერის პროგრამა“  ფარგლებში.
პროექტს ახორციელებს ა(ა)იპ „დემოკრატიის ინსტიტუტი“ და დაფინანსებულია ევროკავშირის მიერ.
მასალაში გამოთქმული მოსაზრებები ავტორისეულია და შესაძლოა არ გამოხატავდეს დონორი ორგანიზაციის თვალსაზრისს.

პროექტი მიზნად ისახავს:

• ყოფილ პატიმართა ჯანმრთელობის მდგომარეობის გაუმჯობესების ხელშეწყობას; 
  • იურიდიულ დახმარებას;
• ბენეფიციართა გადამისამართებას შესაბამისი პროფილის სამედიცინო დაწესებულებაში;
  • ბენეფიციართა დახმარებას (ადვოკატირებას), რომ ისარგებლონ კუთვნილი სამედიცინო შეღავათებით და შესაბამისი სახელმწიფო პროგრამებით.
• ყოფილი პატიმრების, პრობაციონერებისა და მათი ოჯახის წევრების მცირე სამეწარმეო ინიციატივების წახალისებას.
• სამიზნე ჯგუფების დასაქმების ხელშეწყობას.

ზემოთჩამოთვლილი სერვისებით სარგებლობა შეუძლიათ ყოფილ პატიმრებს, პატიმართა ოჯახის წევრებს და პრობაციონერებს. ამისთვის მათ უნდა მიმართონ:

აჭარაში – დემოკრატიის ინსტიტუტს – ქ.ბათუმი ჭავჭავაძის ქ. №107, ტელ: (0422) 27 57 44

იმერეთში – აფხაზინტერკონტს / ქ.ქუთაისი ნინოშვილის ქ. №27, ტელ: (0431) 26 48 61

გურიაში – გურიის ახალგაზრდულ რესურსცენტრს /ოზურგეთი რუსთაველის ქ. №4, ტელ: (0496) 27 41 26

თანაზიარი – რუსთაველის ქ. №88 /ტელ: (0415) 22 10 78

აჭარაში წლის ნებისმიერ დროს სასიამოვნოდ და საინტერესოდ გაატარებთ, გამონაკლისი არც შემოდგომაა, ერთ-ერთი საუკეთესო პერიოდი, როცა  ჰაერს ნელ-ნელა სიგრილე, ცას კი ღრუბლები ეპარება. ამ დროს არაფერი სჯობს ზღვის სანაპიროდან თუ მთის მწვერვალებიდან გადამფრენი ფრინველების თვალთვალს, ბინოკლით, ტელესკოპით, რითაც გნებავთ.

ბათუმში 15 აგვისტოდან ოქტომბრის შუა რიცხვებამდე თუ ცას ხშირად ახედავთ, დაინახავთ ფრინველთა უჩვეულოდ მომრავლებულ გუნდებს, რომლებიც ქალაქს გადაუფრენენ. ეს სწორედ ის პერიოდია, როცა ფრინველები ზამთრისთვის ემზადებიან, ტოვებენ ევრაზიის ქვეყნებს და ბათუმის სამიგრაციო დერეფნით აფრიკისკენ მიფრინავენ.

ბათუმის ცას ყოველწლიურად 32 სხვადასხვა სახეობის მილიონზე მეტი მტაცებელი ფრინველი გადაუფრენს, მათ შორის, ველის, მდელოს, ჭაობის ძელქორები, ჩია, მცირე და გველიჭამია არწივები, კრაზანაჭამიები და სხვა.

გადამფრენ ფრინველებზე დაკვირვება ევროპასა და ამერიკაში ზოგისთვის პროფესიაა, ზოგისთვის – ჰობი და დასვენების ერთგვარი ფორმა.

აჭარაში გადამფრენ ფრინველებზე დაკვირვების სეზონი უკვე ოფიციალურად გაიხსნა და მტაცებელი ფრინველების მიგრაციას აჭარის მაღალი წერტილებიდან უცხოელი დამკვირვებლები, მეცნიერები და ეკოტურისტები რამდენიმე სადამკვირვებლო პლატფორმიდან 15 ოქტომბრამდე დააკვირდებიან,  2-8 სექტემბერს კი აჭარაში ფრინველებზე დაკვირვების საერთაშორისო ფესტივალი გაიმართება და ყველას შეეძლება დატკბეს სანახაობით. 

ფრინველთა მიგრაცია განსაკუთრებით შთამბეჭდავად სადამკვირვებლო პლატფორმებიდან ჩანს. ჩაინიშნეთ ეს ადგილები:  

• ჭოროხის დელტა
• სოფელი ჩაისუბანი
• სოფელი სახალვაშო
• ბათუმის ზღვისპირა პარკი
• ნავსადგური
• კოლხეთის ეროვნული პარკი 
• 

2-8 სექტემბერს ფრინველებზე დაკვირვების საერთაშორისო ფესტივალის ფარგლებში მოეწყობა შემეცნებით-გასართობი ექსკურსიები ფრინველებზე დაკვირვებისთვის მნიშვნელოვან ტერიტორიებზე, საღამოობით კი სასტუმრო „ოაზისში“ მოწვეული სპეციალისტები ჩაატარებენ ლექციებსა და პრეზენტაციებს. ფესტივალში ჩართვა, გასვლით ტურებში მონაწილეობა და ლექციებზე დასწრება ნებისმიერ მსურველს შეეძლება.

ეკოტურიზმის ერთ-ერთ პოპულარულ მიმართულებად ქცეული ფრინველებზე დაკვირვების ტურიზმი აჭარაში უდიდეს პოტენციალს ფლობს. ბათუმის ათკილომეტრიანი „სამიგრაციო ძაბრი“  მსოფლიოში მესამე ადგილზეა მექსიკისა და ისრაელის შემდეგ გადამფრენ ფრინველთა რაოდენობის მიხედვით. ფესტივალი ყოველწლიურად სულ უფრო მეტ ტურისტსა და ამ დარგით დაინტერესებულ მეცნიერს იზიდავს მსოფლიოს სხვადასხვა კუთხიდან.

დევიდ ერტერიუსს ფრინველებზე დამკვირვებელთა ტურსააგენტო აქვს შვედეთში და ბუნების დამცველების, ორნითოლოგებისა თუ ეკოტურიზმის მოყვარულებისთვის გეგმავს ტურებს ფრინველებზე დაკვირვებისთვის მნიშვნელოვან ადგილებში. წელს მის რუკაზე ბათუმიც მოინიშნა. საქართველოში პირველადაა და 20 აგვისტოდან 20 ოქტომბრამდე დააკვირდება ჯგუფთან ერთად მტაცებელ ფრინველთა მიგრაციას.

„აფრიკა, ეთიოპია, ინდოეთი, შრი ლანკა, მონღოლეთი და ა.შ. – ბევრგან დავდივართ. ბათუმში წელს პირველად ვარ და ეს საოცარი ადგილია ფრინველებზე დასაკვირვებლად. უჩვეულოდ გაგვიმართლა, ხშირად კარგი ხილვადობაა და ძალიან ახლოსაც ვხედავთ შეუიარაღებელი თვალით ფრინველებს. მათ ტყეების თავზე ფრენა არ მოსწონთ და ზღვის გავლით არჩევენ მიგრაციას.

შავ ზღვას და ბათუმს გაუმართლა – ეს ადგილი ერთ-ერთი ყველაზე დიდი სამიგრაციო დერეფანია ფრინველებისთვის, რაც აჭარის დიდ სამომავლო ტურისტულ პოტენციალზე მეტყველებს.

ვრჩებით აქვე, სახალვაშოს საოჯახო სასტუმროში, სადაც ძალიან კარგად მიგვიღეს და საუცხოო ქართული კერძებითაც გვიმასპინძლდებიან“, – ამბობს დევიდი.

ფრინველებზე დაკვირვების საერთაშორისო ფესტივალი აჭარაში ტურიზმისა და კურორტების დეპარტამენტმა პირველად 2012 წელს ჩაატარა. მაშინ ტურიზმის ეს მიმართულება აჭარაში ახალი იყო, ახლა კი დეპარტამენტს ამ მიმართულებით უკვე დიდი გამოცდილება აქვს.

როგორც Birding Caucasus-ის ხელმძღვანელი ალექსანდრე რუხაია ამბობს, ყოველ წელს იზრდება ფრინველებზე დაკვირვების პუნქტების რაოდენობა.

„აგვისტოს შუა რიცხვებიდან ოქტომბრის შუა რიცხვებამდე არამხოლოდ აკვირდებიან, აღრიცხავენ კიდეც მიგრირებულ ფრინველთა რაოდენობას, სახეობათა მრავალფეროვნებას.

ბათუმის პარალელურად ახლა პანამაში, გიბრალტარსა და მსოფლიოს სხვადასხვა წერტილში აკვირდებიან ფრინველებს. სახეობათა მრავალფეროვნება, ფრინველთა რაოდენობა – ყველა ეს სამეცნიერო ინფორმაცია იკრიბება და თავს ერთიან ბაზაში იყრის, რაც მნიშვნელოვან ინფორმაციას იძლევა საერთო სურათის წარმოსადგენად“, – ამბობს ალექსანდრე რუხაია.

ფრინველებზე დაკვირვების საერთაშორისო ფესტივალი 2 სექტემბერს დაიწყება და მასში მონაწილეობა ყველა მსურველს შეუძლია, თუმცა ფესტივალის შემდეგაც, ოქტომბრის შუა რიცხვებამდე შეგიძლიათ დააკვირდეთ არაჩვეულებრივ სანახაობას – ათასობით, ათიათასობით მტაცებელ ფრინველს, რომლებიც ბათუმის გავლით აფრიკის კონტინენტისკენ მიფრინავენ.

ფესტივალის ფარგლებში გასვლით ტურებში მონაწილეობის მსურველებს რეგისტრაციის გავლა შეუძლიათ საინფორმაციო-ტურისტულ ცენტრებში რეგისტრაციით, ან დარეკვით შემდეგ ნომერზე: 577 90 90 93 

დღეს, 27 აგვისტოს, აჭარის უმაღლესმა საბჭომ აჭარის ტელევიზიისა და რადიოს მრჩეველთა საბჭოს 4 წევრის შესარჩევად კონკურსი გამოაცხადა.

საქმიანობის უფლებამოსილების ვადა ეწურებათ და საბჭოს დატოვებენ: ნატა იმედაიშვილი, ირაკლი დარცმელიძე, ბეჟან გობაძე და გიორგი ირემაძე. საბჭოში დარჩება მხოლოდ ერთი წევრი, გიგა ჩხარტიშვილი, რომელიც ერთი წლის წინ აირჩიეს მრჩეველთა საბჭოს წევრად.

ამჟამად აჭარის ტელევიზიის მრჩეველთა საბჭოს გამოცხადებული აქვს კონკურსი აჭარის ტელევიზიისა და რადიოს დირექტორის შესარჩევად. საბჭო აპრილის შემდეგ უკვე მეოთხედ ცდილობს ტელევიზიის დირექტორის არჩევას, წინა სამ ჯერზე კონკურსი ჩაიშალა, რადგან ვერც ერთმა კანდიდატმა ვერ შეძლო გამარჯვებისთვის საჭირო, 3 ხმის მიღება.

მრჩეველთა საბჭოს ამჟამინდელ შემადგენლობა აჭარის უმაღლესმა საბჭომ 2013 წლის 17 ოქტომბერს დაამტკიცა, შესაბამისად, საბჭოს ამა წლის 17 ოქტომბრამდე აქვს მუშაობის ვადა.

აჭარის ტელევიზიისა და რადიოს დირექტორის კონკურსზე განაცხადები 24 სექტემბრის ჩათვლით მიიღება, შემდეგ მოხდება საბუთების შერჩევა და გაიმართება გასაუბრება კანდიდატებთან. აქამდე არსებული პრაქტიკით, მრჩეველთა საბჭო საშუალოდ 3 დღეს ანდომებს კანდიდატებთან გასაუბრებას და გასაუბრების დასრულებისთანავე მართავს კენჭისყრას. ასე რომ, მრჩეველთა საბჭოს ამჟამინდელ შემადგენლობას შეუძლია მეოთხე ცდაზე აირჩიოს აჭარის ტელევიზიისა და რადიოს დირექტორი.

დღეს, 27 აგვისტოს, აჭარის უმაღლესმა საბჭომ საზოგადოებრივი მაუწყებლის აჭარის ტელევიზიისა და რადიოს მრჩეველთა საბჭოს 4 წევრის შესარჩევად ღია კონკურსი გამოაცხადა.

აჭარის ტელევიზიისა და რადიოს მრჩეველთა საბჭოს 4 წევრს: ნატა იმედაიშვილს, ირაკლი დარცმელიძეს, გიორგი ირემაძეს და ბეჟან გობაძეს უფლებამოსილების ვადა ოქტომბერში ეწურებათ, საბჭოში რჩება ერთი წევრი – გიგა ჩხარტიშვილი, რომელიც 2018 წლის პირველ ნოემბერს აირჩია უმაღლესმა საბჭომ აჭარის ტელევიზიისა და რადიოს მრჩეველთა საბჭოს წევრად.

მრჩევლობის კანდიდატი უნდა იყოს საქართველოს მოქალაქე, საზოგადოებრივი აღიარებისა და ნდობის მქონე პირი, უნდა ჰქონდეს მაგისტრის ან მასთან გათანაბრებული აკადემიერი ხარისხი და არანაკლებ 10-წლიანი მუშაობის გამოცდილება, მათ შორის 5 წელი ჟურნალისტიკის, ადამიანის უფლებათა დაცვის, საფინანსო, ელექტრონული კომუნიკაციების, სახელოვნებო, სამწერლო ან/და სამეცნიერო-პედაგოგიურ სფეროში.

მრჩევლობის კანდიდატთა განაცხადები მიიღება აჭარის უმაღლეს საბჭოში 2019 წლის 26 სექტემბრის ჩათვლით.

მრჩეველთა საბჭოს თავმჯდომარის ანაზღაურება 2 900 ლარია, მოადგილის – 2 700 ლარი, წევრის კი – 2 625 ლარი. აჭარის უმაღლესი საბჭო ტელევიზიისა და რადიოს მრჩეველთა საბჭოს წევრს 6 წლის ვადით ირჩევს.

კანონის თანახმად, მრჩეველთა კანდიდატურების წარდგენის ვადის ამოწურვიდან 5 კალენდარული დღის ვადაში იქმნება 5 წევრისაგან შემდგარი საკონკურსო კომისია. საკონკურსო კომისიის შემადგენლობაში უნდა შედიოდნენ სამოქალაქო საზოგადოების წარმომადგენლები.

მრჩეველთა საბჭოს წევრობის მსურველი ვალდებულია, აჭარის ავტონომიური რესპუბლიკის უმაღლეს საბჭოს წარუდგინოს საზოგადოებრივი მაუწყებლის აჭარის ტელევიზიისა და რადიოს განვითარების კონცეფცია, რომელიც საჯაროდ უნდა გამოქვეყნდეს, ასევე, კანდიდატმა მონაწილეობა უნდა მიიღოს დებატებში, რომელიც გაიმართება აჭარის ავტონომიური რესპუბლიკის უმაღლესი საბჭოს მიერ მრჩეველთა არჩევამდე.

გურიაში, კურორტ გომის მთაზე, სახლებზე მეტი ახალი საძირკვლის ბოძები დაგხვდებათ. პატარა და ძველი სახლების შუაში დარჩენილი სივრცე თუ ნებისმიერი თავისუფალი ადგილი თითქმის ყველგან მონიშნულია. ასობით მიმდინარე უნებართვო მშენებლობას ხელს ამ ეტაპზე არავინ უშლის: აშენებს ის, ვისაც ამ მთაზე სახლი სურს და მისი აშენების ფინანსური საშუალება აქვს. აშენებენ ორ და სამსართულიან სახლებსაც, მათ შორის, ქვით.

კურორტ გომის მთაზე მიწის ნაკვეთი ან საცხოვრებელი სახლი სამართლებრივად რეგისტრირებული ამ ეტაპზე არავის აქვს. ადამიანები, რომლებმაც სახლები აქ ათეული წლების წინ ააშენეს, გეტყვიან, რომ საჯარო რეესტრს ბოლო წლებია მიმართავენ, რადგან კურორტის მიმართ ინტერესი გააქტიურებულია, მაგრამ რეესტრი საკუთრებას არც არეგისტრირებს და არც უარს ამბობს.

ამ ადამიანებმა რეესტრს ოზურგეთის არქივის შესაბამისი ჩანაწერების საფუძველზე მიმართეს, სადაც ჯერ კიდევ შემონახულია ინფორმაცია საბჭოთა წარსულში „გომის მთის“ მოსახლეების შესახებ. „სხვა კურორტებზე მსგავსი დოკუმენტით მოხდა საკუთრების რეგისტრაცია. გომის მთაზე რატომაა პრობლემა, არ ვიცით,“ – ამბობენ ისინი.

ოზურგეთის მუნიციპალიტეტის მერიაში გვითხრეს, რომ გომის მთაზე ამ ეტაპზე ადამიანები საკუთრების რეგისტრაციას ვერ შეძლებენ.

„ჯერ უნდა მიენიჭოს „გომის მთას“ დასახლებული პუნქტის სტატუსი, რომ იქ ადამიანებმა საკუთრების რეგისტრაცია შეძლონ. გომის მთას ამ ეტაპზე სამართლებრივად არ აქვს არანაირი სტატუსი. ჩვენ მივმართეთ საქართველოს მთავრობას, რომ გომის მთა სოფელ შემოქმედის ადმინისტრაციულ საზღვრებში მოექცეს“, – გვითხრა ოზურგეთის მერის მოადგილემ, ოსიკო თოთიბაძემ.

ოზურგეთის მერიას მთავრობისთვის ამ ინიციატივით 2019 წლის 4 აპრილს მიუმართავს. ამ დრომდე მთავრობას ოზურგეთის ინიციატივა არ განუხილავს.

„არ ვიცი, რატომ არ განიხილეს… ამას სჭირდება შეთანხმება, მუშაობა, მსჯელობა,“ – დასძინა ჩვენთან საუბრის დროს ოსიკო თოთიბაძემ.

ამ დრომდე ოზურგეთის მუნიციპალიტეტს არც „გომის მთის“ განაშენიანების გეგმა აქვს. ოზურგეთის მერის მოადგილე ამბობს, რომ „მონახაზი უკვე არსებობს“, თუმცა არ არსებობს დოკუმენტი, რაც კურორტზე მშენებლობის პროცესს დაარეგულირებს.

ოსიკო თოთიბაძე მიიჩნევს, რომ გომის მთაზე მიმდინარე მშენებლობები უკანონოა, თუმცა ვერ ამბობს კონკრეტულ მიზეზს, რის გამოც ოზურგეთის ადგილობრივი მთავრობა უკანონო მშენებლობების შეჩერებას ვერ ახერხებს.

„ჩვენ შევაჩერეთ რამდენიმე მშენებლობა… დაახლოებით 20 ნაკვეთი იყო, სადაც ზედამხედველობის სამსახურმა ბოძები ამოიღო და შეჩერდა… გავაკარით საინფორმაციო დაფაც, რომ ეს სამართალდარღვევაა. ზედამხედველობის სამსახური მუშაობს ამ კუთხით, კონკრეტული მონაცემი ახლა არ მაქვს“, – აღნიშნა ოზურგეთის მერის მოადგილემ, ოსიკო თოთიბაძემ „ბათუმელებთან“.

ოზურგეთის მერიაში ამ დრომდე არ იციან, კონკრეტულად რამდენი ახალი მშენებლობა მიმდინარეობს გომის მთაზე ან რამდენია ძველი სახლი.

„ახლა მიმდინარეობს აღწერა, ეს მიმდინარე პროცესია. დაახლოებით 430 სახლია სულ აღწერილი, როგორც ვიცი, ანუ ახალი და ძველიც,“ – გვიპასუხა ოსიკო თოთიბაძემ.

საჯარო რეესტრის პრესცენტრში გამორიცხეს არგუმენტი, რომელიც ოზურგეთის მერიაში დაგვისახელეს. საჯარო რეესტრში განმარტეს, რომ გომის მთის სტატუსი ვერ იქნება მიწის ნაკვეთის რეგისტრაციაზე უარის თქმის საფუძველი და თითოეული შემთხვევა ცალ-ცალკეა განსახილველი.

საჯარო რეესტრის ოფიციალური გვერდის მონაცემებით, რეესტრს არც ერთი მოქალაქისთვის არ უთქვამს უარი მიწის რეგისტრაციაზე. მიწის რეგისტრაციის პროცესი ამჯერად 9 განაცხადზე მიმდინარეობს, თუმცა ზოგიერთ მათგანზე სარეგისტრაციო წარმოებას თითქმის ერთი წელია გრძელდება. საჯარო რეესტრის თანხმობა ან უარი არ მიუღია, მაგალითად, სოსო კომახიძეს, რომელსაც გასული წლის 9 სექტემბერს მიუმართავს რეესტრისთვის.

„გომის მთაზე“ მოისმენთ სხვა ამბებსაც, რომ კურორტზე ინტერესი უშუალოდ ბიძინა ივანიშვილს აქვს, რომ საბაგიროს მოწყობას გეგმავს და დაგეგმილია სათხილამურო ტრასების მოწყობა და ასე შემდეგ. რეალურად კი, ამ ეტაპზე კურორტს ელექტროენერგია არ მიეწოდება. თუმცა ელექტროგადამცემი ბოძები მთაზე უკვე დამონტაჟებულია. გომის მთაზე გაიყვანეს წყლის სისტემა, თუმცა ის ყველა სახლში  შეყვანილი არ არის.

ბრაზილიის პრეზიდენტმა, ჟაირ ბოლსონარომ, საკუთარ ფეისბუქგვერდზე ბრიჯიტ მაკრონის შეურაცხმყოფელი პოსტი გამოაქვეყნა. მან საფრანგეთის პირველი ლედისა და საკუთარი ცოლის, ბრაზილიის პირველი ლედის 37 წლის მიშელ ბოლსონაროსა და საფრანგეთის 66 წლის პირველი ლედის, ბრიჯიტ მაკრონის სურათები გამოაქვეყნა ფეისბუქზე პოსტით: „ახლა გესმით რატომაც გადაეკიდა მაკრონი ბოლსონაროს?” პოსტს ბრაზილიის პრეზიდენტი კომენტარსაც ურთავს პორტუგალიურად: „ნუღარ დავამცირებთ მას (მაკრონს)… ჰა, ჰა”.

ამ დროისთვის ჟიარ ბოლსონაროს ოფიციალურ ფეისბუქ გვერდზე ეს პოსტი კომენტარითურთ აღარ იძებნება.

მაკრონმა ბრაზილიის პრეზიდენტის ფეისბუქპოსტი უხეშ და სამწუხარო ჟესტად შეაფასა.

„შეურაცხმყოფელად დაწერა ჩემს ცოლზე, მე გაცილებით მეტ პატივისცემას ვგრძნობ ბრაზილიელი ხალხის მიმართ და იმედს ვიტოვებ, ამ ქვეყანას მალე ეყოლება ღირსეული და საქმეზე ორიენტირებული  პრეზიდენტი,“ – განაცხადა ემანუელ მაკრონმა ორშაბათს, 26 აგვისტოს, დიდი შვიდეულის კონფერენციაზე ბიარიცში.

მაკრონისა და ბოლსონაროს კამათი ამით არ დაწყებულა. ბრაზილიის პრეზიდენტმა საფრანგეთის პრეზიდენტის  რიტორიკას კოლონიური უწოდა მას შემდეგ, რაც  მაკრონმა  ამაზონის ხანძრები საერთაშორისო კრიზისად შეაფასა და დიდი შვიდეულის ქვეყნებს მოუწოდა, თემა აგვისტოს სამიტის პროირიტეტად ექციათ.

ბრაზილიის პრეზიდენტისგან ეს არ არის ქალის შეურაცხყოფის პირველი შემთხვევა. ცნობილია მისი დამამცირებელი კომენტარები შავკანიანებისა და უმცირესობის წარმომადგენელ ქალებზე.

2014 წელს ცხარე საპარლამენტო დებატების დროს ბოლსონარომ მემარცხენე კონგრესმენ მარია დე როსარიოს უთხრა, რომ ის მასზე ძალადობას არც კი შეეცდებოდა, რადგან როსარიო ამას არ იმსახურებდა.

2017 წელს ასევე დიდი გამოხმაურება მოჰყვა საჯარო შეხვედრისას მის ნათქვამს: „5 შვილი მყავს, 4 ბიჭი, მეხუთეზე კი მოვსუსტდი და გოგო გაჩნდა“.

________________

წყარო: BBC

ფოტო: standard.co.uk