Batumelebi

რა საერთო შეიძლება ჰქონდეთ საქართველოს ყოფილ პრემიერ-მინისტრს, ირაკლი ღარიბაშვილს და ახალქალაქის მუნიციპალიტეტის მერის წარმომადგენელს სოფელ დილისკიში? – ორივე მათგანი კორუფციაშია ეჭვმიტანილი.

კორუფციის მკვლევარი გოჩა მჟავანაძე „ბათუმელებთან“ საუბრობს, რას ნიშნავს ქვეყნისთვის, როცა კორუფციაში ერთვება როგორც უმაღლესი თანამდებობის პირი, ასევე ყველაზე დაბალი რანგის საჯარო მოხელე.

• ბატონო გოჩა, რას ნიშნავს, როცა კორუფციის ბრალდებით იჭერენ დაბალი რგოლის საჯარო მოხელეებს, მაგალითად ხულოს მერიის თანამშრომელს, ხაშურის საკრებულოს წევრს, ან გორის საკრებულოს დეპუტატს?

ეს ნიშნავს, რომ კორუფცია სრულად მოდებულია საჯარო სისტემაში. მასშტაბების მიხედვითაა – მაღალი თანამდებობის პირები, მაღალი დონით კორუფციაში არიან გარეულები, მხილებულები, ბრალდებულები და მსჯავრდებულები.

შედარებით დაბალი თანამდებობის პირები – სპეციალისტები, განყოფილების უფროსები, სამსახურის უფროსები, შესაბამისად, დაბალი კატეგორიის კორუფციულ ფაქტებში არიან მხილებული.

ნებისმიერი კორუფციული გარიგებით დაინტერესებული პირის უკან, ეს იქნება დაწესებულების ხელმძღვანელი, სამსახურის უფროსი, განყოფილების უფროსი თუ  ნებისმიერი სხვა, დგანან ის სპეციალისტები, რომლებიც მუშაობენ შესყიდვების მიმართულებით, ასევე საფინანსო მიმართულებით, მაგალითად სატენდერო კომისიის წევრები, რომლებიც იღებენ კონკრეტულ გადაწყვეტილებებს.

დგანან ის პირები, რომლებიც აწესებენ საკვალიფიკაციო მოთხოვნებს, მოთხოვნებს სამუშაო გამოცდილების ან გარკვეული ფინანსური ბრუნვის შესახებ, რომლებიც უნდა დააკმაყოფილოს პოტენციურმა მიმწოდებელმა.

ნებისმიერი დაწესებულების ხელმძღვანელი, როცა გეგმავს კორუფციულ გარიგებაში შევიდეს მიმწოდებელთან და ამისთვის ამუშავებს კორუფციულ სქემას, ამ პროცესში დოკუმენტურად შემსრულებლები არიან ის სპეციალისტები, რომლებიც სატენდერო კომისიის წევრები არიან.

სატენდერო კომისიის წევრი მინიმუმ უნდა იყოს 3 ადამიანი. თუ ერთ კონკრეტულ საჯარო დაწესებულებაში ხელმძღვანელი იქნება მხილებული კორუფციაში, იმ დაწესებულების სატენდერო კომისიის წევრებიც არიან პასუხისმგებლები.

შეიძლება პირდაპირი ინტერესი არ ჰქონდეთ გარკვეული გადაწყვეტილების მიღებისას, მაგრამ მინიმუმ ირიბი ინტერესები ექნებათ – უმოქმედობა, გულგრილი დამოკიდებულება, აუცილებლად გამოიკვეთება.

ხულოს მერიის შემთხვევა რომ ავიღოთ: ფინანსთა სამინისტროს საგამოძიებო სამსახურმა ქრთამის აღების ფაქტზე დააკავა ხულოს მერიის თანამშრომელი. გავრცელებული ინფორმაციით, დაკავებული გახლდათ შესყიდვების სამსახურის უფროსი.

ეს რას ნიშნავს? – რა თქმა უნდა, ამ თანამშრომლის დონეზე არ გადაწყდებოდა, რა სახის შესყიდვა უნდა განხორციელებულიყო. ამ სახის გადაწყვეტილებებს იღებენ მუნიციპალიტეტის ხელმძღვანელი თანამდებობის პირები: მერი, ვიცე-მერი და ასე შემდეგ.

ბრალდება ამბობს, რომ ამ კაცმა, სახელმწიფო ტენდერში მონაწილე კომპანიისგან ნაკლები საქონელი ჩაიბარა, მაგრამ გააფორმა დოკუმენტურად ისე, რომ თითქოს სრულად ჩაიბარა.

რა არის კანონით გაწერილი, როდესაც ტენდერი ტარდება, ვინ მონაწილეობენ ამ კანონის აღსრულებაში? სატენდერო კომისიის წევრები.

მაგალითად, დაწესებულების ხელმძღვანელი შეიძლება იღებდეს გადაწყვეტილებას, შეიძლება პირადი ინტერესი ჰქონდეს, მაგრამ ამ პროცედურებს, დოკუმენტურ გაფორმებას, დასაბუთებას, ყველაფერს აკეთებს ის სპეციალისტი, ვინც უშუალოდ არის პასუხისმგებელი ამ შესყიდვაზე.

შესაბამისად, აქ უფლებამოსილების გამიჯვნა ცოტა რთულია, ანუ ვის რა წილი პასუხისმგებლობა დაეკისრება, რა თქმა უნდა, გამოსაკვლევია კომპეტენტური ორგანოების მიერ… ზოგადად კი, მოქალაქის თვალით დანახული კორუფცია ასე წარმომიდგენია – ამ შემთხვევაში პასუხისმგებელია როგორც ხელმძღვანელი, ასევე ის სპეციალისტი, რიგითი თანამშრომელი, რომელიც ხელმძღვანელს ხელს უწყობს ან ნებით, ან უნებლიეთ კორუფციული გარიგებისა და მიზნების მიღწევა-რეალიზებაში.

• წლებია მედია, არასამთავრობო სექტორი საუბრობდა კორუფციაზე. ახლა კი სახელმწიფო საგამოძიებო სამსახურები ამბობენ, რომ კონკრეტული საჯარო პირები იყვნენ ჩართული კორუფციაში. ჩვენ ვხედავთ დაკავებულ წვრილ ჩინოვნიკებს და არავინ პასუხობს კითხვას – ეს ხალხი მარტო როგორ ახერხებდა ამხელა კორუფციული სქემების აშენებას. თქვენი აზრით, მათი ხელმძღვანელები მინიმუმ უნდა დაიკითხონ?

აუცილებლად უნდა დაიკითხონ, როგორც ხელმძღვანელი პირები, ასევე საინტერესოა გამოიკვეთოს შიდა აუდიტის სამსახურის ფუნქციები და უმოქმედობა. რიგ შემთხვევებში არაკომპეტენტურობაც ან უგულო დამოკიდებულება.

ნებისმიერ საჯარო დაწესებულებას ჰყავს შიდა აუდიტის სამსახური, რომელმაც აღნიშნული ფაქტები უნდა შეისწავლოს, გამოიკვლიოს და შესაბამისი ზომები მიიღოს.

მუნიციპალიტეტების შემთხვევაში, მნიშვნელოვანია საკრებულოს მაკონტროლებელი ფუნქცია. შეიძლება უშუალოდ კორუფციული გარიგების შესახებ ინფორმაცია კონკრეტულ მომენტამდე არ ჰქონდათ, მაგრამ რას აკეთებს საკრებულო იმ შემთხვევაში, როცა აღნიშნული დადასტურდა მათივე ხელისუფლების მიერ და იმ გუნდის მიერ, რომელსაც წარმოადგენენ?

მინიმუმ უნდა ჩატარდეს სამსახურებრივი მოკვლევა, დაბარებული უნდა იქნას შესაბამისი პირები, უნდა დაისვას კითხვები და მოითხოვონ ამომწურავი პასუხები.

მე არ მახსენდება პრაქტიკაში მსგავსი რამე მომხდარიყოს.

ასევე მნიშვნელოვანია, რას აკეთებდნენ მიღება-ჩაბარებაზე პასუხისმგებელი პირები. მსხვილ შემსყიდველ ორგანიზაციებში იქმნება მიღება-ჩაბარების კომისიები და ინსპექტირების ჯგუფები, რაც ერთ-ერთი მნიშვნელოვანი რგოლია.

• ყოველდღე გვესმის, რომ „ოცნების“ ყოფილ თუ მოქმედ ჩინოვნიკებს იჭერენ კორუფციის ბრალდებით. თქვენი აზრით, რა პროცესს ვუყურებთ ახლა, მართლა ებრძვის „ოცნება“ თავის რიგებში კორუფციას თუ ეს პოლიტიკურად სჭირდება?

კორუფციის წინააღმდეგ ჩანაწერებს სისხლის სამართლის კოდექსში, „ოცნება“ პოლიტიკური მიზნებისთვის იყენებს.

ერთი ჯგუფი, რომელიც დაწინაურებულია ოლიგარქის ხელისუფლებაში, კორუფციის შესახებ კანონს იყენებს სხვა კონკურენტი ჯგუფების ჩასაძირად, როგორც პოტენციურ კონკურენტებს ოლიგარქიულ სისტემაში. იმისათვის, რომ ძალაუფლება არ დაკარგოს ამ ჯგუფმა. ამასთან, საზოგადოების თვალში ამ ყველაფერს ფუთავენ, როგორც კორუფციის წინააღმდეგ ბრძოლას.

მე არ მჯერა ამის. კორუფციასთან ბრძოლა ნიღაბია, რომელიც მოირგეს, თუმცა ვფიქრობ, მოქალაქეები ნათლად ხედავენ რეალურ მიზნებს.

ბათუმის მაგალითზე შემიძლია გესაუბროთ. იცით როდის დავრწმუნდები, რომ „ოცნება“ კორუფციას ნამდვილად ებრძვის? როდესაც ყველა უკანონო მშენებლობას, ყველა უკანონო ბიზნესს მიაკითხავენ.

მაგალითად, ბათუმის ახალი ბულვარის მიმდებარედ ორ წელზე მეტია ავტოდრომია უკანონოდ მოწყობილი. ამ ბიზნესის მფლობელს სამართლებრივი ურთიერთობა არ ჰქონდა მუნიციპალიტეტთან, არ იხდიდა იჯარის ქირას და როგორც ვიცი, დღემდე სარგებლობს. ამის პარალელურად, ამ კომპანიის ხელმძღვანელი, „ქართულ ოცნებას“ და მათ მხარდაჭერილ კანდიდატებს წინასაარჩევნოდ ურიცხავს თანხას.

მეორე მაგალითი შემიძლია მოვიყვანო: ბათუმის საკრებულოს თავმჯდომარის მოადგილის, ლევან დავითაძის ბოტანიკური ბაღში მუშაობის პერიოდთან დაკავშირებით არის კითხვები. აუდიტის დასკვნა დევს, რომ ძალიან დიდი ოდენობით მიუღებელი შემოსავლები აღურიცხავია. ამაზე წერდა მედია, ამაზე დაწერეს დასკვნები კორუფციის წინააღმდეგ მებრძოლმა ორგანიზაციებმა, მაგრამ რეაგირება არ მომხდარა. ეს კაცი დღეს ირაკლი კობახიძის გუნდს წარმოადგენს და საკრებულოს თავმჯდომარის მოადგილეა ამხელა რეგიონის მთავარ ადმინისტრაციულ ცენტრის მმართველ ორგანოში, ბათუმის საკრებულოში.

როცაა კონკრეტული ფაქტები არ არის გამოძიებული, რა თქმა უნდა, ეს ადასტურებს, რომ კორუფციას ებრძვიან შერჩევით.

რეალურად, კორუფციას კი არ ებრძვიან, ებრძვიან კონკრეტულ პიროვნებებს კორუფციის ნიღბით.

ხულოს მერიის თანამშრომლის დაკავება ამის ნათელი მაგალითია. დაკავებული პირი არის თორნიკე რიჟვაძის ოჯახთან დაახლოებული. მისი დაკავების შემდეგ გაჩნდა გონივრული ეჭვი საზოგადოებაში, რომ ეს არის ბრძოლა თორნიკე რიჟვაძის და მისი გუნდის წინააღმდეგ, ანუ დაბალ დონეზე. ერთგვარი სიგნალია, რომ ვიღაცების მიმართაც შეიძლება დაისვას შემდგომში კითხვითი ნიშნები.

• როდესაც კორუფციის ბრალდებით აკავებენ კონკრეტული სამსახურის ხელმძღვანელს ან ათავისუფლებენ სამსახურიდან და მის მოვალეობას მოადგილე ასრულებს ან რომელიმე სხვა თანამშრომელი, ეს რას ნიშნავს? როგორია მუნიციპალური მოწყობა, შეიძლება ისე მოიპაროს ფული სამსახურის ხელმძღვანელმა, რომ მასში სხვა თანამშრომლები ჩართულები არ იყვნენ?

გამორიცხულია. სახელმწიფო შესყიდვების შესახებ საქართველოს კანონით, საბიუჯეტო ორგანიზაციაში მინიმუმ სამი წევრი უნდა იყოს სატენდერო კომისიაში. გამორიცხულია, ერთმა პიროვნებამ – მოადგილის, სამსახურის ხელმძღვანელის, სპეციალისტის დახმარების და მათი მონაწილეობის გარეშე მოახერხოს კორუფციული სქემის დატრიალება.

ვერ გააკეთებ და ამ სქემით ვერ იშოვის ფულს, ასევე ზემდგომის გარეშე, ვისთანაც ხარ ანგარიშვალდებული. როგორც აღვნიშნე, შიდა აუდიტის სამსახურის, მაკონტროლებლების და საკრებულოს გარეშე, რომელიც ვალდებულია ნებისმიერი პროექტი გააკონტროლოს და დასვას კითხვები, რომელსაც არ სვამენ, ამას ვერ გააკეთებ.

გამორიცხულია, რომ ერთმა პირმა, დამოუკიდებლად, სხვების ხელშეწყობის გარეშე, რაიმე კორუფციულ სქემა დაალაგოს და უკანონო შემოსავალი მიიღოს.

• მაგრამ უმეტეს შემთხვევაში სახელმწიფო საგამოძიებო უწყებები ამბობენ, რომ ბრალდებულები მარტო იყვნენ ჩართული კორუფციაში…

წარმოუდგენელია. სწორედ ამიტომ ვამბობ, რომ კორუფციას კი არ ებრძვიან, არამედ კორუფციას იყენებენ კონკრეტული პირების, ჯგუფების დასასჯელად.

ერთის დაკავებით სხვებს უგზავნიან სიგნალს – შემდეგი თქვენ იქნებით.

თუ დირექტორი კორუფციულ გარიგებებშია მხილებული, წარმოუდგენელია, რომ მისი მოადგილის ან სამსახურის უფროსების მიმართ არ გაჩნდეს კითხვები.

• როგორც მოქალაქე, როგორ აღიქვამთ, რა დონის კორუფცია გვაქვს ახლა ქვეყანაში?

არ ვარ იმ ასაკის, რომ შევარდნაძის პერიოდი კარგად მახსოვდეს, მაგრამ რაღაც მონაკვეთი მაინც მახსოვს. მაგალითად, ძალიან კარგად მახსოვს, როცა ოჯახის წევრთან ერთად ვმგზავრობდი ავტომობილით, გზებზე საგზაო ინსპექტორები იდგნენ და ქრთამის სახით 1-2 ლარს თუ არ მისცემდი, ვერ გაივლიდი.

აქამდე ჯერ არ დავსულვართ, მაგრამ თუ განვლილი დღეების ქრონიკას გადახედავთ – რომელი ორგანიზაციების, მუნიციპალიტეტების თანამშრომლები დააკავეს, დაინახავთ, რომ რეალურად, ყველა დონეზეა კორუფცია. რიგითი სპეციალისტების დონეზეც კი, რომლებიც ცნობებს გასცემენ ან საპროექტო დოკუმენტაციების დამუშავებისას ხარვეზს ადგენენ.

ელიტური კორუფციის ნათელი მაგალითები გვაქვს – თავდაცვის მინისტრი, ეკონომიკის მინისტრის მოადგილე ციხეშია, ყოფილი პრემიერი კი გირაოთია გარეთ.

ერთი მაგალითი მახსენდება – სულ ცოტა ხნის წინ დააკავეს ახალქალაქის მუნიციპალიტეტის მერის წარმომადგენელი, რომელმაც გასცა ცნობა, რომ კონკრეტული ფერმერის მიერ მოყვანილი კარტოფილი იყო ვითომ ის კარტოფილი, რომელიც არ იყო რეალურად მისი მოყვანილი.

ანუ სოფლებშია კორუფცია ჩასული მერის წარმომადგენლების დონეზეა.

მერის წარმომადგენელი არის ყველაზე დაბალი რანგის საჯარო მოხელე, რომელიც მუნიციპალიტეტში წარმოადგენს ხელისუფლებას და იმის დონეზეც კი არის კორუფცია.

• როგორ ფიქრობთ, რა უნდა გააკეთოს ახლა „ქართული ოცნების“ ხელისუფლებამ იმისთვის, რომ კორუფცია მოისპოს?

ხელისუფლება არაფერს გააკეთებს – მათი შექმნილია და შემუშავებულია ეგ კორუფციული სქემები. შესაბამისად, ჩვენ, მოქალაქეებმა უნდა გავაკეთოთ ყველაფერი, რომ ხელისუფლება შევცვალოთ და ისეთი სისტემა ჩამოვაყალიბოთ, რომ კორუფციული გარიგებების საშუალებები და ნიადაგი აღარ არსებობდეს.

თორემ ამ მმართველი ჯგუფიდან არაფრის მოლოდინი მაქვს, რომ ესენი რამე სასიკეთოს შეცვლიან. აუცილებელია, რომ შეიცვალოს ხელისუფლება, რომელიც არის კორუფციის და სხვა ბევრი უკანონობის ნათელი გამოხატულება.

• რას უქადის ქვეყანას მსგავსი მასშტაბის და სიღრმის კორუფცია?

სიღარიბეს, ლუკმა-პურის არ ქონას. სიღატაკისკენ წავა ეს ქვეყანა. რამდენიმე ადამიანი ან ადამიანთა ჯგუფი იქნება მდიდარი, უზრუნველყოფილი, მათი შვილები, ოჯახის წევრები… და იქნება მეორე კატეგორია, რომელსაც ლუკმა-პურის ექნება მხოლოდ. თავის გატანისთვის იქნება მისი ყოველდღიური ცხოვრება და ბრძოლა. საშუალო ფენა, რომელიც დღესაც ძლივს არსებობს, გაქრება.

ეროვნული, საჯარო სიმდიდრე, რომელიც უნდა შეიქმნას და გადანაწილდეს თანაბრად, ვერ გადანაწილდება, რადგან ბიუჯეტს მიღმა, ანუ საჯარო სივრცის მიღმა იქნება აღებული თანხმობა და ეგ ბიუჯეტში არ აისახება, როგორც შემოსავალი. შესაბამისად, ამ შემოსავალს დაკარგავს თითოეული ოჯახი.

მდიდრები უფრო მეტად გამდიდრდებიან და უფრო მეტ დოვლათს შექმნიან საკუთარი ოჯახებისთვისმ ხოლო ღარიბები უფრო ნაკლებს მიიღებენ და უფრო მეტი სოციალური პრობლემის წინაშე დადგებიან.

მდიდრებს უფრო მეტი საშუალება ექნებათ, რომ ღარიბების მოსყიდვა სცადონ და უფრო მეტად გაიძლიერონ საკუთარი ყოფა და ძალაუფლება.

ეგ იქნება მოცემულობა.

______________

ფოტოზე: ბიძინა ივანიშვილი და ირაკლი ღარიბაშვილი – ფოტოკოლაჟი.

დღეს, 13 ნოემბერს, ბათუმში, შარტავას ქუჩაზე ავარია მოხდა.

დაღუპულია ახალგაზრდა ქალი, რომელიც, „ბათუმელების“ ინფორმაციით უცხო ქვეყნის მოქალაქეა.

შსს-ს ინფორმაციით, მომხდარ ფაქტზე გამოძიება სისხლის სამართლის კოდექსის 276-ე მუხლით მიმდინარეობს.

ეს მუხლი ტრანსპორტის მოძრაობისას უსაფრთხოების წესების დარღვევას გულისხმობს, რამაც ადამიანის სიცოცხლის მოსპობა გამოიწვია.

14 ნოემბერს, დღის 14:00 საათზე,  ქუთაისის სააპელაციო სასამართლოში განახლდება მზია ამაღლობელის საქმის განხილვა.

მზია ამაღლობელის ადვოკატები ასაჩივრებენ 6 აგვისტოს ბათუმის საქალაქო სასამართლოში ნინო სახელაშვილის მიერ გამოტანილ განაჩენს, რომლითაც მზია ამაღლობელს 2 წლით პატიმრობა მიესაჯა. ისინი გამამართლებელი განაჩენის გამოტანას მოითხოვენ.

თავის მხრივ, ბათუმის საქალაქო სასამართლოს განაჩენს ასაჩივრებს პროკურატურაც და მოითხოვს, მზია ამაღლობელს ბრალი და სასჯელი დაუმძიმდეს. პროკურატურა მზია ამაღლობელისათვის ისევ 4-დან 7 წლამდე პატიმრობის შეფარდებას ითხოვს.

საქმეს ქუთაისის სააპელაციო სასამართლოში მოსამართლეთა კოლეგია განიხილავს. მომხსენებელი მოსამართლეა ნიკოლოზ მარგველაშვილი. კოლეგიაში შედიან მოსამართლეები  მარინა სირაძე და ნანა ჯოხაძე.

14 ნოემბრის სხდომაზე პროკურორები დასკვნით სიტყვას წარმოთქვამენ.

ამავე თემაზე:

პროკურატურის ინფორმაციით, არასრულწლოვანის გაუპატიურებასა და გარყვნილ ქმედებაში ბრალდებულს უვადო თავისუფლების აღკვეთა მიესაჯა.

„ფოთის საქალაქო სასამართლომ სრულად გაიზიარა პროკურატურის მიერ წარდგენილი მტკიცებულებები და არასრულწლოვანის გაუპატიურებასა და გარყვნილ ქმედებაში ბრალდებული დამნაშავედ ცნო.

სასამართლო პროცესზე გამოკვლეული მტკიცებულებებით დადასტურდა, რომ ბრალდებულმა ძალადობით 12 წლის გერი გააუპატიურა. ასევე დაზარალებულის მიმართ გარყვნილი ქმედება განახორციელა“.

სამართალდამცავებმა ბრალდებული 2025 წლის 24 ივლისს დააკავეს.

მას ბრალდება წარუდგინეს საქართველოს სისხლის სამართლის კოდექსის 11 პრიმა 137-ე მუხლის მე-3 ნაწილის „ე“ ქვეპუნქტით, ამავე მუხლის მე-4 ნაწილის „გ“ ქვეპუნქტით (გაუპატიურება, ჩადენილი ძალადობით, წინასწარი შეცნობით არასრულწლოვანი ოჯახის წევრის მიმართ) და 11 პრიმა 141-ე მუხლის მე-2 ნაწილის „ვ“ ქვეპუნქტით (გარყვნილი ქმედება დამნაშავისთვის წინასწარი შეცნობით თოთხმეტი წლის ასაკს მიუღწეველი ოჯახის წევრის მიმართ).

ფოთის საქალაქო სასამართლომ ბრალდებული დამნაშავედ ცნო წარდგენილ ბრალდებაში და სასჯელის სახედ და ზომად უვადო თავისუფლების აღკვეთა განუსაზღვრა.

ნორვეგიის ჰელსინკის კომიტეტი ეხმაურება „ნეტგაზეთისა“ და „ბათუმელების“ დამფუძნებლის დაჯილდოებას თავისუფალი მედიის ჯილდოთი  და აცხადებს, რომ მზია ამაღლობელის საქმე არის სიმბოლო დამოუკიდებელი, კრიტიკული ხმების წინააღმდეგ მიმართული შევიწროების, დაშინებისა და რეპრესიების ფართო კამპანიის, როგორიც საქართველოში საბჭოთა ოკუპაციის შემდეგ არ ყოფილა.

„1991 წელს დამოუკიდებლობის მოპოვების შემდეგ, ქვეყანაში პირველად იზრდება პოლიტპატიმრების რიცხვი. სტუდენტები, ჟურნალისტები, ექიმები, ხელოვანები და პოლიტიკოსები – ყველა, ვინც აპროტესტებს, ერთი და იმავე, ყალბი მიზეზებით ხვდება ციხეში.

რეპრესიები არავის ინდობს: ცოტა ხნის წინ აფხაზეთიდან დევნილი ,71 წლის პირი საპროტესტო აქციაში მონაწილეობისთვის დააკავეს,“ – ნათქვამია ჰელსინკის კომიტეტის განცხადებაში.

მედიისა და ინფორმაციული უსაფრთხოების ცენტრის (CMIS) მონაცემებით, გასული წლის განმავლობაში საქართველოში ჟურნალისტებისა და მედიასაშუალებების მიმართ შევიწროების სულ მცირე 434 შემთხვევა დაფიქსირდა, მათ შორის ფიზიკური ძალადობის მინიმუმ 122 ფაქტი.

2024 წლის ოქტომბრის საპარლამენტო არჩევნების შემდეგ, რომელიც ნორვეგიის ჰელსინკის კომიტეტის შეფასებით, გაყალბებით, დაშინებითა და ძალადობით გამოირჩეოდა, რეპრესიების ეს ტალღა წარმოადგენს „ქართული ოცნების“ სასოწარკვეთილ მცდელობას, ჩაახშოს პროტესტი, რომელიც უკვე 349 დღეა უწყვეტად გრძელდება.

ჰელსინკის კომიტეტი წერს, რომ აქციები თითქმის ერთი წლის წინ დაიწყო, მას შემდეგ, რაც მმართველმა პარტიამ, „ქართულმა ოცნებამ“,  შეაჩერა მოლაპარაკებები საქართველოს ევროკავშირში გაწევრიანების შესახებ – ქვეყანაში, სადაც მოსახლეობის 80%-ზე მეტი ევროკავშირის წევრობას უჭერს მხარს.

„ქართულმა ოცნებამ“ მიიღო არაერთი კანონი პროტესტის შეზღუდვისა და კრიმინალიზაციის მიზნით, მათ შორისაა 2025 წლის 16 ოქტომბერს დაჩქარებული წესით მიღებული კანონმდებლობა, რომელიც ითვალისწინებს ადმინისტრაციულ პატიმრობას ისეთი ქმედებებისთვის, როგორიცაა დემონსტრაციებში მონაწილეობა ან სახის დაფარვა.

ვითარების შემდგომი ესკალაციისთვის, პარტიამ ასევე მიმართა საკონსტიტუციო სასამართლოს ქვეყნის სამი ძირითადი ოპოზიციური ძალის აკრძალვის მოთხოვნით. ამავდროულად, რვა მთავარი ოპოზიციური ლიდერის წინააღმდეგ სისხლისსამართლებრივი დევნა დაიწყო.

„ამ კანონების მიზანი ნათელია – ისინი მიმართულია რიგითი მოქალაქეების წინააღმდეგ და ძირს უთხრის ადამიანის ფუნდამენტურ უფლებებს. მათ უნდა გააუქმონ კანონები, რომლებიც ზღუდავს ფუნდამენტურ თავისუფლებებს, გაათავისუფლონ ყველა პირი, ვინც გამოხატვისა და მშვიდობიანი შეკრების თავისუფლების უფლების გამოყენებისთვის დააკავეს, და უზრუნველყონ მშვიდობიანი მომიტინგეების დაშინებასა და შეურაცხყოფაზე პასუხისმგებელი პირების პასუხისგებაში მიცემა“, – ამბობს გენერალური ნორვეგიის ჰელსინკის კომიტეტის მდივანი ბერიტ ლინდემანი.

ნორვეგიის ჰელსინკის კომიტეტის შეფასებით, მზარდი რეპრესიების ფონზე, იმედი ჯერ კიდევ არსებობს – სამოქალაქო წინააღმდეგობა გრძელდება და ხალხი, განსაკუთრებით ახალგაზრდა თაობა, დანებებას არ აპირებს.

ტელეკომპანია „ფორმულას“ ჟურნალისტი და ტელეწამყვანი ვახო სანაია საუბრობს მზია ამაღლობელის დამსახურებასა და როლზე, როგორც მოქალაქეზე და როგორც ჟურნალისტზე.

„ბათუმელები“ ვახო სანაიას სტატუსს უცვლელად გთავაზობთ:

„ვფიქრობ, ჩვენს საზოგადოებაში ბოლომდე მაინც არ არის გააზრებული მზია ამაღლობელის მნიშვნელობა. ყოველ შემთხვევაში არის ხალხი, ვისაც არ ესმის, რა მოვლენასთან გვაქვს საქმე.

რეჟიმის პრიმიტიული გზავნილია – პოლიციელს (არ დაგვავიწყდეს – სინამდვილეში ფორმიან მოძალადეს) შეეხო და უნდა დაისაჯოსო. ზოგიერთი ამას არგუმენტად იღებს; ზოგიც იჯერებს, რომ ასეც უნდა იყოს; ზოგიც თავს იტყუებს, რადგან ასე აწყობს; ზოგიც სხვას ატყუებს.

სხვები ამბობენ:  კარგი, ვთქვათ, არ უნდა იჯდეს საპატიმროში მზია, მაგრამ რა დამსახურებისთვის ანიჭებენ მას ამდენ ჯილდოს? რა არის შესაქები და საამაყო სილის გაწვნაში ?

აი, აქაა ძაღლის თავი დამარხული. მთავარი ვერ გაუგიათ და ვეცდები, ამ სტატუსით გავაგებინო.

მართლაც დავსვათ ეს შეკითხვები. რატომ ჯილდოვდება მზია, როგორც ჟურნალისტი?

რომ არ დაეჭირათ, ხომ არ მიანიჭებდნენ?

კი ბატონო, სილის გაწვნის საბაბითაა  დაპატიმრებული და ალბათ არ უნდა იჯდეს, მაგრამ თუნდაც ასე იყოს, შეიძლება, ჯილდო გადასცე?

რა არის ამ ყველაფერში ასეთი განსაკუთრებული ?

სწორედ ამ შეკითხვებს მინდა ვუპასუხო, რადგან მიმაჩნია, რომ აქაა პასუხი იმაზე, რაშიც საზოგადოების ნაწილი ჯერ კიდევ ვერ გაერკვა. მიზეზი კი ისაა, რომ ფოკუსი სულ სხვაგანაა გადატანილი.

• რატომ აჯილდოებენ მზიას, როგორც ჟურნალისტს ?

ჟურნალისტის პროფესიული საქმიანობა მხილებას გულისხმობს. პრობლემის ასახვას, მის გამოძიებას, საზოგადოებისთვის მიწოდებას.

შეგიძლიათ, დამისახელოთ ჟურნალისტი, რომელმაც ეს მზიაზე უკეთესად შეძლო?

მე ვერ დაგისახელებთ.

მან შექმნა ამ პროფესიაში საუკეთესო ჟურნალისტური ნაშრომი. ბრწყინვალე საგამოძიებო მასალა. ის თავისი ჟურნალისტური კვლევის პერსონაჟი, გმირი თავადვე გახდა. მან საკუთარ თავზე გადაიტანა ის, რაც თითოეულ მოქალაქეს შეიძლება დაატყდეს თავს.

აჰა, ესაა სისტემა, სადაც ვცხოვრობთ – დაუნდობელი, სასტიკი, რუსული, გვითხრა მან. ამასთან, გვაჩვენა, როგორ შეიძლება რეჟიმის დამარცხება.

გვაჩვენა გამოსავალი, მოგვცა პასუხი – მხოლოდ ბრძოლითა და შეუპოვრობით. მან, პატიმარმა, მოამზადა ისეთი რეპორტაჟი, რომელიც ამ ქვეყანაში ჩვენს პროფესიას არ ახსოვს.

ამასთან, ეს არ არის ერთი ქვეყნის ამბავი. ეს ზოგადსაკაცობრიო პრობლემაა. ესაა ამბავი დიქტატურაზე და ამიტომ იპყრობს ამხელა ყურადღებას საქართველოს ფარგლებს გარეთ.

ერთდროულად ამხილა პოლიცია, პროკურატურა, სასამართლო, პოლიტიკური ხელმძღვანელობა, ამ ქვეყნის მმართველი. აღწერა მთელი სისტემა, გააშიშვლა ბოლომდე. მან, ციხეში მყოფმა, რეჟიმი იქამდე მიიყვანა, მოახსნევინა და გააქრობინა სისტემიდან პოლიციის უფროსი.

ეს მარცხის აღიარება იყო.

შეგიძლიათ, მითხრათ სხვა ჟურნალისტური ნაშრომი, რომელმაც თავიდან ბოლომდე ასე განძარცვა რეჟიმი? და ეს შეძლო პატიმრობაში მყოფმა ჟურნალისტმა.

ამიტომ აჯილდობენ მზია ამაღლობელს, უპირველეს ყოვლისა, როგორც ჟურნალისტს. მისი ჟურნალისტური საქმიანობის გამო. მან პატიმრობა პროფესიულ მივლინებად აქცია.

აქვე აუცილებლად უნდა ითქვას, რომ მას არა მხოლოდ პატიმრობის პერიოდის, არამედ ბოლო 25-წლიანი საქმიანობისთვისაც აჯილდოებენ. უბრალოდ, პატიმრობამ ახლა დაგვანახა და მოგვცა შესაძლებლობა, შეგვეფასებინა ის დამსახურება და წვლილი, რასაც იქამდე სათანადოდ ვერ ვხედავდით.

• კიდევ რატომ აჯილდოებენ მზიას?

იმიტომ, რომ სინდისის პატიმარია. ის დღემდე ციხეში ზის რეჟიმის პოლიტიკური მოტივაციით. ის მოძალადე პოლიციელისთვის სილის გაწვნის გამო გაასამართლეს სისხლის სამართლის კოდექსით, რაც სრული აბსურდია.

• კიდევ?

იმიტომ, რომ საოცრად მამაცი და უკომპრომისოა. სხვა ისეთი თვისებებიც გამოავლინა, რაც აღფრთოვანებას იწვევს. კიდევ იმიტომ, რომ რეჟიმმა მთავარ მტრად მიიჩნია, მაგრამ მის ბიოგრაფიას ვერაფრით მიაყენა ჩრდილი. აღმოჩნდა, რომ მის პროფესიულ საქმიანობაში მხოლოდ საამაყო საქმეები ყოფილა.

• კიდევ ?

იმიტომ, რომ ქალია. ძალიან მნიშვნელოვანია, რომ ქალი ანგრევს სისტემას.

P.S. ქვეყანამ დიდი ადამიანი აღმოაჩინა. მას კიდევ ბევრი და მაღალი აღიარება ელოდება.

რაც უფრო შორს გადის მზიას სახელი, მით უფრო მეტი იგებს მსოფლიოში ქართველი ხალხის ბრძოლაზე. სამწუხაროა, რომ ეს მისი ფიზიკური თავისუფლებისა და ჯანმრთელობის ხარჯზე ხდება,“ – წერს ვახო სანაია.

მზია ამაღლობელის საქმის განხილვა ქუთაისის სააპელაციო სასამართლოში გრძელდება. მორიგი პროცესი ხვალ, 14 ნოემბერს, დღის 2 საათზეა ჩანიშნული.

Amnesty International-მა ადამიანის უფლებათა ევროპულ სასამართლოში რუსული კანონის საქმეზე მესამე მხარედ ჩართვა მოითხოვა.

ინფორმაციას ამის შესახებ ახალგაზრდა იურისტთა ასოციაცია ავრცელებს.

„სამოქალაქო საზოგადოების გაერთიანების უფლება გულისხმობს, რომ სამოქალაქო საზოგადოება იძიებს, იღებს და იყენებს რესურსებს, რითაც არა მხოლოდ ინარჩუნებს სამოქალაქო სექტორის მრავალფეროვნებას, არამედ დამოუკიდებელია კონტროლისგან, რომლის ქვეშაც შესაძლოა აღმოჩნდეს სახელმწიფო დაფინანსების პირობებში,“ – ნათქვამია Amnesty International-ის წერილობით მოსაზრებაში.

ორგანიზაცია ყურადღებას ამახვილებს, რომ ნებისმიერი შეზღუდვა უნდა იყოს მიმართული ადამიანის უფლებათა ევროპული კონვენციით აღიარებული ერთი ან რამდენიმე ლეგიტიმური მიზნის მკაცრი დაცვისკენ.

სახელმწიფო კი  ვერ ამტკიცებს რეალური საფრთხის არსებობას და წინასწარ ყველა არასამთავრობო ორგანიზაციისადმი უნდობლობას გამოხატავს, რითაც იქმნება რისკი, რომ სამოქალაქო საზოგადოების ორგანიზაციებს  შეეზღუდებათ თავისუფლად და უსაფრთხოდ საქმიანობა.  

„იმისათვის, რათა ხელისუფლებამ არ შეზღუდოს არასამთავრობო ორგანიზაციებისა და სამოქალაქო საზოგადოების გაერთიანების თავისუფლება, ადამიანის უფლებათა დაცვის მექანიზმებმა ხელი უნდა შეუწყონ ამ შეზღუდვების ბოროტად გამოყენების წინააღმდეგ მკაცრი კრიტერიუმების ჩამოყალიბებას.

აღნიშნული საკითხი განსაკუთრებით მნიშვნელოვანია მაშინ, როდესაც, თითქოსდა გამჭვირვალობისა და ანგარიშვალდებულების გასაუმჯობესებლად მიღებული კანონები არსებითად ზღუდავენ არასამთავრობო ორგანიზაციების წვდომას დაფინანსების წყაროებზე.

სამოქალაქო საზოგადოების გაერთიანების უფლება გულისხმობს, რომ სამოქალაქო საზოგადოება იძიებს, იღებს და იყენებს რესურსებს, რითაც არა მხოლოდ ინარჩუნებს სამოქალაქო სექტორის მრავალფეროვნებას, არამედ დამოუკიდებელია იმ კონტროლისგან, რომლის ქვეშაც შესაძლოა აღმოჩნდეს სახელმწიფო დაფინანსების პირობებში, შეუძლია განახორციელოს თავისი მიზნები შეუფერხებლად, განსაკუთრებით მაშინ, როდესაც საქმიანობა უკავშირდება სახელმწიფოს კრიტიკას, განსხვავებული მოსაზრებების გამოხატვას ან ადამიანის უფლებების დარღვევის დაგმობას.

კანონები, რომლებიც ზღუდავენ არასამთავრობო ორგანიზაციების წვდომას უცხოურ დაფინანსებაზე, არ უნდა ეფუძნებოდეს თვითნებურ, ბუნდოვან და მასტიგმატიზებელ ტერმინებს, რომლებიც არღვევენ კანონიერების პრინციპს, არ უნდა ქმნიდნენ გაურკვევლობასა და მძიმე ტვირთს ორგანიზაციებისთვის.

ასევე, განსაკუთრებული ყურადღება უნდა მიექცეს იმ მიზნის ლეგიტიმურობას, რომელსაც ასეთი შეზღუდვები ემსახურება, რათა აღიკვეთოს ავტორიტარული პრაქტიკის ტენდენცია, რომელიც მიზნად ისახავს არასამთავრობო ორგანიზაციების შეზღუდვას.

ნებისმიერი შეზღუდვა უნდა იყოს მიმართული ადამიანის უფლებათა ევროპული კონვენციით აღიარებული ერთ ან რამდენიმე ლეგიტიმური მიზნის მკაცრი დაცვისკენ. ამ შემთხვევაში სახელმწიფო აწესებს შეზღუდვებს იმ არგუმენტით, რომ უცხოური დაფინანსების გამჭვირვალობა და ანგარიშვალდებულება დაიცავს ეროვნულ უსაფრთხოებას ან საზოგადოებრივ წესრიგს. თუმცა,  სახელმწიფო ვერ ამტკიცებს რეალური საფრთხის არსებობას და წინასწარ, ყველა არასამთავრობო ორგანიზაციისადმი უნდობლობას გამოხატავს, რითაც იქმნება რისკი, რომ სამოქალაქო საზოგადოების ორგანიზაციებს  შეეზღუდებათ თავისუფლად და უსაფრთხოდ საქმიანობა,“ – ნათქვამია Amnesty International-ის ამიკუსში, რომელსაც საია ავრცელებს.

ამავე თემაზე:

სპეციალური პენიტენციური სამსახური  საქართველოს მესამე პრეზიდენტის, მიხეილ სააკაშვილის ციხეში გადაყვანაზე განცხადებას ავრცელებს და წერს, რომ მისი ჯანმრთელობის მდგომარეობა დამაკმაყოფილებელია, ამიტომაც ის N12 პენიტენციურ დაწესებულებაში გადაიყვანეს, სადაც საერთო წესით გააგრძელებს სასჯელის მოხდას.

„როგორც საზოგადოებისთვის ცნობილია, მსჯავრდებული მიხეილ სააკაშვილი, სტაციონარული სამედიცინო მომსახურების მიღების მიზნით, 2022 წლის 12 მაისს გადაყვანილ იქნა კლინიკა ,ვივამედში. სადაც  ის ამ დრომდე იმყოფებოდა და მიეწოდებოდა შესაბამისი სამედიცინო მომსახურება.

საქართველოს კანონმდებლობის შესაბამისად, სამოქალაქო სექტორის საავადმყოფოდან პაციენტის პენიტენციურ დაწესებულებაში დაბრუნება ხორციელდება მისი ჯანმრთელობის მდგომარეობის გათვალისწინებით მკურნალი ექიმის გადაწყვეტილების საფუძველზე.

ვინაიდან, მსჯავრდებულ მიხეილ სააკაშვილის ჯანმრთელობის მდგომარეობა არის დამაკმაყოფილებელი და მას აღარ ესაჭიროება სტაციონარული მკურნალობა, ის გამოწერილ იქნა სამოქალაქო სექტორის კლინიკიდან და დაბრუნდა N12 პენიტენციურ დაწესებულებაში, სადაც საერთო წესით გააგრძელებს სასჯელის მოხდას“ – ნათქვამია პენიტენციური სასახურის განცხადებაში.

ამ თემაზე:

პროკურატურა ითხოვს ჩემს დაკითხვას 4 ოქტომბრის საქმეზე – სააკაშვილი

აქტივისტებმა ანაკლიის პორტის პროექტის ტერიტორიასთან, მინდორზე, მასშტაბური წარწერა – Megobari act [მეგობარი აქტი] გამოსახეს.

380 მეტრი სიგრძის გეოგლიფის [გამოსახულება მიწაზე] მიზანია შეახსენოს ადგილობრივ და საერთაშორისო საზოგადოებას საქართველოსთვის „მეგობარი აქტის“ მნიშვნელობა, რომელიც სენატში კენჭისყრას ელოდება.

კანონპროექტი კონგრესმენ ჯო უილსონის მიერაა მომზადებული. 

თითოეული სიმბოლოს სიმაღლე დაახლოებით 50 მეტრია, ხოლო მთლიანი გამოსახულების შექმნაზე აქტივისტებმა დაახლოებით 15 დღე იმუშავეს.

„მეგობარი აქტის მნიშვნელობის ხაზგასასმელად გადავწყვიტეთ, რომ ასეთი მასშტაბური ყოფილიყო გეოგლიფიც“ – ამბობს როსტო ზარანდია, აქტივისტი და არტისტი ზუგდიდიდან. 

„მთავარი მიზანი იყო, გვეჩვენებინა, რომ ამ ბინძურ საინფორმაციო კამპანიაში, სადაც ანტიდასავლური რიტორიკა ჭარბობს, არ იკარგება ხალხის რეალური განწყობები, ჩანდეს ჩვენი რეალური სიმართლე და თანაც გვინდოდა ეს გაგვეკეთებინა ისე, რომ ყოფილიყო მასშტაბური და კარგად დასანახი”  – განმარტავს აქტივისტი ნოდო სიხარულიძე.

როსტო ზარანდია განმარტავს, რომ წარწერა ანაკლიის სანაპიროდან დაახლოებით 13 კილომეტრში, ანაკლიის პორტის პროექტის ტერიტორიასთან ახლოს მდებარეობს. ავტორების თქმით, ეს ადგილი მისი სიმბოლური მნიშვნელობის გამო შეირჩა. 

„ადგილს რაც შეეხება, ესეც გარკვეულად სიმბოლურია, იმიტომ, რომ ქართულ-ამერიკული ამბიციები და კარგი გეგმები ჩაიშალა ანაკლიაში და ამ დამთხვევით, კიდევ ერთხელ ვუსვამთ ხაზს იმას, რომ ჩვენი მიზანია ძველებურზე უფრო კარგი ურთიერთობისა და პარტნიორობის დამყარება აშშ-სთან“ – ამბობს ნოდო სიხარულიძე.

გამოსახულება საძოვარზე გაკეთდა.

„ეს არის აგროარტი. არავისთვის ზიანი არ მიგვიყენებია, აქ ვთესავთ თეთრ სამყურას, რომელიც ძროხებისთვისაც ძალიან სასარგებლოა, აქტიურად ყვავილობს და მრავალწლოვანი მცენარეა“ – ამბობს როსტო. 

„მეგობარი აქტი“ „ქართული ოცნების“ ოფიციალური პირებისთვის სანქციების დაწესებას ითვალისწინებს, ამავდროულად მხარს უჭერს ხალხთა შორის კავშირების გაძლიერებას და თავდაცვის სფეროში თანამშრომლობას, როდესაც საქართველო საკუთარ კონსტიტუციურ მოთხოვნებს დააკმაყოფილებს.

აქტის სახელი MEGOBARI სიმბოლურია და ითარგმნება, როგორც ანგარიშვალდებულების, მდგრადობისა და დამოუკიდებლობის ასამაღლებლად, საქართველოს შესაძლებლობების მობილიზება და გაძლიერების აქტი (Mobilizing and Enhancing Georgia’s Options for Building Accountability, Resilience, and Independence Act).

ანაკლიაში შექმნილი Megobari act-ის წარწერა, როგორც ავტორები ამბობენ, ერთგვარი გზავნილია ქვეყნის გარეთ, რომ მიუხედავად ქვეყანაში მიმდინარე ანტიდასავლური პროპაგანდისა, ქართველებს სურთ ურთიერთობის შენარჩუნება დასავლელ პარტნიორებთან და ელოდებიან საერთაშორისო მხარდაჭერას.

გამოცემა „სამხრეთის კარიბჭე“ წერს, რომ დღეს, 12 ნოემბერს, ახალციხეში პოლიციელზე თავდასხმაში ბრალდებულები დარბაზიდან გაათავისუფლეს.

გამოცემის ცნობით,  ახალციხის რაიონული სასამართლოს მოსამართლემ, მარიკა ჩიტაშვილმა სასტუმრო „ლომსიასთან“ მომხდარი ჩხუბის დროს, პოლიციელზე თავდასხმაში ბრალდებულები, პ.გ. და  ბ.ხ. სასამართლო დარბაზიდან გაათავისუფლა და ორივე მათგანს წარდგენილი ბრალდება გადაუკვალიფიცირდა.

„პ.გ–ს სსკ-ს 353¹ მუხლის მეორე ნაწილით ჰქონდა წარდგენილი, რაც 7-დან 11-წალამდე პატიმრობას ითვალისწინებდა, მოსამართლემ სსკ-ს 120-ე მუხლის პირველი ნაწილით [ ჯანმრთელობის განზრახ მსუბუქი დაზიანება] გადააკვალიფიცირა და 15 000 ლარის გადახდა დააკისრა. რადგან პ.გ.  ოთხი თვის განმავლობაში პატიმრობაში იმყოფებოდა, მას მხოლოდ 5 000 ლარის გადახდა მოუწევს.

ბ.ხ-ს ბრალი  სსკ-ს 353¹ მუხლის პირველი ნაწილით ჰქონდა წარდგენილი რაც 4-დან 7 წლამდე პატიმრობას ითვალისწინებდა. მოსამართლის გადაწყვეტილებით, ბრალი გადაკვალიფიცირდა სსკ-ს 126-ე მუხლად [ძალადობა] და დაეკისრა 15 000 ლარის გადახდა. ამ შემთხვევაშიც რადგან ბ.ხ–ც პატიმრობაში იმყოფებოდა, თანხის გადახდა 4 000 ლარამდე შეუმცირდა“ – წერს „სამხრეთის კარიბჭე“.

„სამხრეთის კარიბჭე“ დეტალურად აშუქებდა ამ საქმეს. გამოცემის ცნობით,  აღნიშნული შემთხვევა ახალციხეში 4 აგვისტოს სასტუმრო „ლომსიას“ მიმდებარედ მოხდა, სადაც 50 ადამიანი ჩხუბობდა. მოწმე პოლიციელების ცნობით, ჩხუბის დროს პოლიციის ჩარევისას ერთ-ერთ პოლიციელს ხელკეტი დაარტყეს და ფეხი მუცლის არეში ჩაარტყეს, პოლიციელი  კლინიკაში გადაიყვანეს.

შეგახსენებთ, რომ მზია ამაღლობელი ათი თვეა პატიმრობაში იმყოფება ბათუმის პოლიციის უფროსზე სილის გაწვნის გამო. მზია ამაღლობელი გაასამართლეს სისხლის სამართლის 353 მუხლის პირველი ნაწილით [პოლიციის მიმართ წინააღმდეგობა… მისი საქმიანობის შეწყვეტის ან შეცვლის მიზნით] და 2 წლით პატიმრობა მიუსაჯეს.

____________

ფოტო: გამოცემა „სამხრეთის კარიბჭე“ 

პარტია „გახარია-საქართველოსთვის“ წარმომადგენლის, ჯემალ ანანიძის ჯანმრთელობის მდგომარეობა სტაბილურად მძიმეა.

როგორც ჯემალ ანანიძის მეუღლემ, მზია იაკობაძემ „ბათუმელებს“ უთხრა, ჯემალ ანანიძე ხელოვნურ სუნთქვაზე აღარ იმყოფება, თუმცა მდგომარეობა თითქმის უცვლელია.

„ხელოვნურ სუნთქვაზე აღარ არის, თუმცა ჯერ წინსვლა არ გვაქვს, მდგომარეობა არის სტაბილურად მძიმე, ჯერჯერობით. ინსულტის ნიშნებია, რადგან მარჯვენა ხელი და ფეხი გაჩერებული აქვს“ – ამბობს ჯემალ ანანიძის მეუღლე.

ჯემალ ანანიძე რამდენიმე დღის წინ გადაიყვანეს კლინიკაში, მძიმე მდგომარეობაში, სადაც მას ოპერაცია ჩაუტარდა.

ამავე თემაზე: 

ყოფილი პრემიერ-მინისტრის, გიორგი გახარიას წინააღმდეგ სისხლის სამართლებრივი დევნა დაიწყო 20 ივნისის და ჩორჩანას საქმეებზე.

ამის შესახებ გენერალურმა პროკურორმა გიორგი გვარაკიძემ დღეს, 12 ნოემბერს, გამართულ ბრიფინგზე განაცხადა.

„საქმე ეხება საზოგადოებისათვის კარგად ცნობილ 2019 წლის 20-21 ივნისის და ჩორჩანას ეპიზოდებს, კერძოდ, პარლამენტის სასახლის მიმდებარე ტერიტორიაზე გამართული საპროტესტო აქციის მიმდინარეობისას, ორზე მეტი პირის მიმართ ჯანმრთელობის განზრახ მძიმე დაზიანების ორგანიზების და სახელმწიფო პოლიტიკური თანამდებობის მქონე პირის მიერ სამსახურებრივი უფლებამოსილების გადამეტების ფაქტებს“ – განაცხადა გიორგი გვარაკიძემ.

გვარაკიძის განცხადებით:

„საზოგადოებას შევახსენებთ, რომ ე. წ. 20 ივნისის საქმეზე ადამიანის უფლებათა ევროპულმა სასამართლომ 2024 წლის 7 მაისს მიიღო გადაწყვეტილება, რომლის მიხედვით, 2019 წლის 20-21 ივნისს, თბილისში, პარლამენტის სასახლესთან განვითარებულ მოვლენებთან დაკავშირებით, დაადგინა ადამიანის უფლებათა ევროპული კონვენციის მე-3 მუხლის პროცედურული დარღვევა და სახელმწიფოს დაევალა გარკვეული საგამოძიებო მოქმედებების ჩატარება, ასევე მიეცა რეკომენდაცია შეეფასებინა ღონისძიების დაგეგმვასა და შესრულებაზე პასუხისმგებელი პირების ქმედებები.

შესაბამისად, ჩატარდა არაერთი საგამოძიებო მოქმედება, მათ შორის საგამოძიებო ექსპერიმენტები დაზარალებულთა მონაწილეობით, დამატებით გამოიკითხა ასეულობით მოწმე, ჩატარდა ასზე მეტი სხვადასხვა სახის ექსპერტიზა. ჩატარებული საგამოძიებო მოქმედებების შედეგად გამოიკვეთა კონკრეტული პირის – გიორგი გახარიას ბრალეულობა, რაც მდგომარეობს შემდეგში:

2019 წლის 20 ივნისს, საღამოს საათებში, თბილისში, რუსთაველის გამზირზე მიმდინარე, თავდაპირველად მშვიდობიანი დემონსტრაცია ძალადობრივ აქტივობებში გადაიზარდა. მომიტინგეთა ნაწილმა ძალადობის გზით სცადა პარლამენტის შენობაში შეღწევა. მათ დაიწყეს პარლამენტის შენობის წინ განთავსებული სამართალდამცავების მიმართ ძალადობა, სხვადასხვა ნივთების გამოყენებით მათზე თავდასხმა, მათი ნივთების დაზიანება და განადგურება.

მაშინდელმა შინაგან საქმეთა მინისტრმა გიორგი გახარიამ განსაკუთრებულ დავალებათა დეპარტამენტის თანამშრომლებს ინსტრუქციისა და კანონმდებლობის უგულებელყოფით დაავალა სპეციალურ საშუალებათა ერთობლივად, პარალელურ რეჟიმში გამოყენება, ყოველგვარი გაფრთხილებისა და აქციის მშვიდობიანი მონაწილეებისათვის ტერიტორიის დატოვების შესაძლებლობის მიცემის გარეშე, რითაც ორგანიზება გაუწია მოქალაქეთათვის ჯანმრთელობის განზრახ დაზიანებას.

შედეგად, სპეციალური საშუალებების, მათ შორის რეზინის ტყვიების ერთობლივად გამოყენებით ათეულობით მოქალაქემ მიიღო სხვადასხვა ხარისხის დაზიანება, მათ შორის ორმა მოქალაქემ დაკარგა თვალი, ხოლო ხუთმა მოქალაქემ მიიღო ჯანმრთელობის მძიმე დაზიანება“.

რაც შეეხება ბრალდებას ჩორჩანას საქმეზე. გენერალური პროკურორის განცხადების თანახმად, „გამოძიებით დადგენილია, რომ 2019 წლის 24 აგვისტოს, იმჟამინდელმა შინაგან საქმეთა მინისტრმა გიორგი გახარიამ, რომელიც ამავდროულად ეროვნული უსაფრთხოების საბჭოს მდივანი და მუდმივი წევრი იყო, ეროვნული უსაფრთხოების საბჭოს უფლებამოსილების იგნორირებით და საქართველოს პრემიერ-მინისტრთან შეუთანხმებლად, ასევე საქართველოს სახელმწიფო უსაფრთხოების სამსახურთან კოორდინაციის და ევროკავშირის სადამკვირვებლო მისიის ინფორმირების გარეშე, ერთპიროვნულად მიიღო გადაწყვეტილება საოკუპაციო ხაზის გასწვრივ სოფელ ჩორჩანასთან დამატებითი საპოლიციო საგუშაგოს აღმართვის შესახებ“.

„აღნიშნული ფაქტი გიორგი გახარიას ინიციატივითა და მონაწილეობით ფართოდ გაშუქდა მედიაშიც. როგორც მოსალოდნელი იყო, აღნიშნული ქმედებები საოკუპაციო რეჟიმის წარმომადგენლებმა საქართველოს ტერიტორიული მთლიანობის წინააღმდეგ მიმართული მოქმედებების საბაბად გამოიყენეს. კერძოდ, 2019 წლის 5 სექტემბერს, ცხინვალის დე-ფაქტო რეჟიმის უკანონო შეიარაღებულმა ფორმირებებმა სიმაღლეები დაიკავეს საქართველოს ხელისუფლების მიერ კონტროლირებად ტერიტორიაზე.

საოკუპაციო ძალების კონტროლქვეშ აღმოჩნდა დაახლოებით ასი ჰექტარი ტყის მასივი. ადგილი ჰქონდა სხვადასხვა უკანონო აქტივობებს, მძიმე სამხედრო ტექნიკის გადაადგილებას დასახლებული პუნქტებისკენ, რამაც მხარეებს შორის შექმნა შეიარაღებული სამხედრო კონფლიქტის რეალური საფრთხე. ოკუპირებულ ტერიტორიაზე დამატებით მოექცა ხაშურის მუნიციპალიტეტის სოფლების ყობისა და წნელისის მკვიდრთა საცხოვრებელი სახლები.

აღნიშნული ქმედებით გიორგი გახარიამ განზრახ გადაამეტა მისი სამსახურებრივი უფლებამოსილების ფარგლებს, რამაც საზოგადოების და სახელმწიფოს კანონიერი ინტერესის არსებითი დარღვევა გამოიწვია“ – განაცხადა მან.

მთავარი პროკურორის ცნობით, გიორგი გახარიას ბრალდება საქართველოს სისხლის სამართლის კოდექსის 25, 117-ე მუხლის მე-3 ნაწილის „მ“ ქვეპუნქტით და 333-ე მუხლის მე-2 ნაწილით წარედგინება, რაც სასჯელის სახედ და ზომად 13 წლამდე თავისუფლების აღკვეთას ითვალისწინებს.

„პროკურატურა ბრალდებულის მიმართ აღკვეთის ღონისძიების სახით პატიმრობის შეფარდების შუამდგომლობით თბილისის საქალაქო სასამართლოს კანონით დადგენილ ვადაში მიმართავს“ – განაცხადა გვარაკიძემ.

გიორგი გახარია ამჟამად საქართველოში არ იმყოფება. მან ქვეყანა 2025 წლის ზაფხულში დატოვა და ამჟამად გერმანიაშია, სადაც, მისივე თქმით, ხანგრძლივი ვიზა მიიღო. 

2024 წლის საპარლამენტო არჩევნების ოფიციალური შედეგების მიხედვით, გახარიას პარტიამ პარლამენტში 12 მანდატი მოიპოვა. ბოლო დრომდე პარტია ოპოზიციური პარტიების ბოიკოტს უერთდებოდა და პარლამენტში არ შედიოდა, თუმცა 2025 წლის 28 ნოემბერს პარტია „გახარია — საქართველოსთვის“ წევრები სადეპუტატო უფლებამოსილების შესრულებას შეუდგნენ. 

გიორგი გახარიას პოლიტიკური კარიერა „ოცნებაში“ 2013 წელს დაიწყო საქართველოს ბიზნესომბუდსმენის პოსტზე. 2016-2017  წლებში ის იკავებდა საქართველოს ეკონომიკისა და მდგრადი განვითარების მინისტრის თანამდებობას, ხოლო 2017 -2019 წლებში იყო შინაგან საქმეთა მინისტრი, და, ასევე – საქართველოს ვიცე-პრემიერი.

2019 წლის სექტემბრიდან 2021 წლის თებერვლამდე გახარია ქვეყნის პრემიერ-მინისტრი იყო. იგი თანამდებობიდან გადადგა და რამდენიმე თვეში პოლიტიკური პარტია – „გახარია-საქართველოსთვის“ დააარსა.

საქართველოს საავტომობილო გზების დეპარტამენტის ინფორმაციით, 13 ნოემბრიდან 15 ნოემბრის ჩათვლით ხაჯალია-სუფსის ავტომაგისტრალზე [ახალ ავტობანზე] ყველა სახის ავტოტრანსპორტის მოძრაობა აიკრძალება.

ამ პერიოდში ავტოტრანსპორტის მოძრაობა აღნიშნულ მონაკვეთში გადაერთვება, ასე ვთქვათ, ძველ [სამტრედია-ლანჩხუთი-გრიგოლეთის] გზაზე.

დღეს, 12 ნოემბერს კი, საღამოს 8 საათამდე მისაბმელიანი და ნახევრადმისაბმელიანი ავტოტრანსპორტის მოძრაობა აკრძალულია სამტრედია[დაფნარი]- სოფ. სუფსას [გრიგოლეთის] მონაკვეთში და აღნიშნული ტიპის ტრანსპორტი სამტრდია-გრიგოლეთის მონაკვეთში არა სუფსა-ლანჩხუთის, არამედ სენაკი-ფოთის გავლით იმოძრავებს [ორთავე მიმართულებით].

დეპარტამენტის ინფორმაციით, ამ შეზღუდვების მიზეზი გზაზე მიმდინარე სამუშაოებია.

დღეს, 11 ნოემბერს, მზია ამაღლობელის პირველი სასამართლო პროცესი ქუთაისის სააპელაციოში დაახლოებით 18:00 საათზე დასრულდა.

მზია ამაღლობელის ადვოკატები ასაჩივრებენ 6 აგვისტოს ბათუმის საქალაქო სასამართლოში ნინო სახელაშვილის მიერ გამოტანილ განაჩენს, რომლითაც მზია ამაღლობელს 2 წლით პატიმრობა მიესაჯა. ისინი გამამართლებელი განაჩენის გამოტანას მოითხოვენ.

თავის მხრივ, ბათუმის საქალაქო სასამართლოს განაჩენს ასაჩივრებს პროკურატურაც და მოითხოვს, მზია ამაღლობელს 4-დან 7 წლამდე პატიმრობა შეეფარდოს.

სასამართლო სხდომაზე სიტყვა მოითხოვა მზია ამაღლობელმა. მან თქვა, რომ „დღეს თუ ხვალ, მის საქმეს აუცილებლად ჩამოშორდება სისხლის სამართლის დატვირთვა“ და თუ აქ, საქართველოში ვერ მიაღწევს ამას, თავის სიმართლეს დაამტკიცებს ევროპულ სასამართლოში.

მზია ამაღლობელის საჩივრის განხილვა ქუთაისის სააპელაციო სასამართლოში განახლდება 2025 წლის 14 ნოემბერს, პარასკევს, 14:00 საათზე და სამშაბათს, 18 ნოემბერს, 13:00 საათზე.

დღევანდელი სასამართლო სხდომა 24-ადგილიან მცირე დარბაზში ჩატარდა, რის გამოც სასამართლო პროცესზე მისული ადამიანების უმეტესობა გარეთ დარჩა.

პოლიციამ ჩაკეტა სასამართლოს ჭიშკარი და არც ჟურნალისტებს და არც სხვა პირებს სასამართლო ეზოშიც კი არ მისცა შესვლის საშუალება.

ამ თემაზე:

დღეს, 11 ნოემბერს, ქუთაისის სააპელაციო სასამართლოში მზია ამაღლობელის საქმის განხილვა დაიწყო. სხდომაზე სიტყვა ითხოვა მზია ამაღლობელმა, რომელიც უკვე 10 თვე უკანონო პატიმრობაშია.

„მინდა გამძლეობა და გამარჯვება ვუსურვო წინააღმდეგობაში მყოფ საზოგადოებას, დარბაზში მყოფ აუდიტორიას და დარბაზს გარეთ მყოფ თანამოაზრეებსაც მადლობა მინდა ვუთხრა და ოჯახს, რომ მარტო არ მტოვებენ ამ დარბაზში.

სამწუხაროდ, ისევ შუშის საკნიდან მიწევს საუბარი სასამართლოს ახალ შემადგენლობასთან. თუმცა, ბრალდებულის კი არა და უკვე მსჯავრდებულის სტატუსით და სიმართლე გითხრათ, ვერ ვეგუები  დღემდე, მიუღებლობა მაქვს ამ სტატუსის – მსჯავრდებულის“, – თქვა მზია ამაღლობელმა.

ამ დროს მზია ამაღლობელი მოსამართლე მარგველაშვილმა შეაჩერა და მას შესთავაზა შემინული სივრციდან გამოსვლა. მოსამართლემ ბადრაგის სამსახურს მიმართა, რომ თუ პროტოკოლით დაშვებულია, ის აძლევს მზია ამაღლობელს უფლებას გამოვიდეს შემინული სივრციდან. ამის შემდეგ მზია ამაღლობელმა საუბარი ადვოკატის გვერდით მყოფმა გააგრძელა.

„…პირველმა ინსტანციამ  სისხლის სამართლის დამნაშავედ მცნო. სილის გაწვნა არც თავდასხმაა და არც წინააღმდეგობა. მოსამართლე ნინო სახელაშვილმა საპატიმრო სასჯელი მომცა – ორი წლით გამიშვა ციხეში. არსებობს, ალბათ, ადამიანების ჯგუფი, რომელიც თვლის, რომ მადლიერი უნდა ვიყო ამ სასჯელის. იმიტომ, რომ ალბათ, ეს ადამიანები ადარებენ ბატონი პროკურორის ბრალდების სასჯელს, რომელიც 4-დან 7 წლამდე ითვალისწინებს. იმედი მაქვს, რომ ასე ვინც ფიქრობს, ასეთი ადამიანების რაოდენობა მცირეა. მათ მინდა ვუთხრა, რომ ამ საქმეს არანაირი კავშირი არ აქვს სამართალთან და სამართლიანობასთან. არც ბატონი პროკურორის ბრალდების კვალიფიკაციას და არც სახელაშვილის განაჩენს.

ჩემი პატიმრობა არის რეჟიმის პოლიტიკური გადაწყვეტილება.

ვისაც ეჭვი ეპარება, მინდა შევახსენო – 10 თვეა პატიმრობაში ვარ და იშვიათად ყოფილა კვირა, როდესაც ძალაუფლებაში მყოფი პოლიტიკური პირები, მმართველი პარტიის ლიდერები, სხვადასხვა სატელევიზიო ეთერიდან, პროპაგანდისტული ეთერებიდან თავს არ დამსხმოდნენ. დიდი არაფერი, მაგრამ ყველა უპასუხისმგებლობა დანაშაულსა თუ ცრუ ბრალდების შემცველ განცხადებასა და კომენტარზე სამართლებრივი რეაგირება მაქვს ჩემს ადვოკატებთან ერთად და მექნება მომავალშიც, თუ, რა თქმა უნდა, ასე გააგრძელებენ.

სიმართლე გითხრათ, უსამართლო სასამართლოზე დიდი ბოროტება არაფერი მგონია, ამიტომ, არ უნდა შევეგუოთ და ნორმად არ უნდა მივიღოთ არცერთი უკანონო გადაწყვეტილება. მე ასეთად მიმაჩნია ეს განაჩენი და დღეს, ამ დარბაზში, ზუსტად იმიტომ ვარ, რომ ვასაჩივრებ ბათუმის საქალაქო სასამართლოს განაჩენს და სააპელაციო სასამართლოსგან მოვითხოვ სამართლიან გადაწყვეტილებას.

ჩემზე უკეთ მოგეხსენებათ, მაგრამ მეც ვფიქრობ, რომ სასამართლო საზოგადოების ნებას უნდა გამოხატავდეს.

სწორედ ამ მოსაზრებიდან გამომდინარე, როდესაც ვფიქრობ იმ ქმედებაზე, რის გამოც აქ ვარ, ამასთან დაკავშირებით რაზეც შეიძლება მიმითითოს საზოგადოებამ და განმსაჯოს, არის ის, რომ საკუთარ თავში ვერ აღმოვაჩინე, რომ როცა იმ კაცს სილა გავაწანი, ამის გამო სინანულში ჩავვარდნილიყავი, იმიტომ, რომ მან მაგინა, მაფურთხა, არაადამიანურად და უღირსად მომექცა…

მორალური დილემა რომ არ გამჩენია, ვფიქრობ, ამაში გარკვეულწილად პროკურატურა და გამოძიებაც არის დამნაშავე, რადგან დღემდე დაზარალებულადაც არ ვარ აღიარებული და ფორმალურად, განცხადებაც არ გაკეთებულა, რომ მაგალითად ე.წ. დაზარალებულმა დგებუაძემ სამსახურებრივ უფლებამოსილებას გადაამეტა ან გადაცდომები ჰქონდა. არ გააკეთა გამოძიებამ არაფერი, ვფიქრობ იმიტომ, რომ რეჟიმს მოძალადეები სჭირდება. ამ მოძალადეებს შემდეგ აჯილდოებს და მფარველობს, რომ შემდეგ პოლიტიკური და უკანონო დავალებები შეასრულებინოს.

ამ მოცემულობაში არ ვიცი, რამდენად გამოუვა სასამართლოს, რომ ჩემგან კრიმინალი შექმნას, თან საშიში კრიმინალი. არა მგონია ეს გამოუვიდეს. იმიტომ, რომ ქმედება, რომელსაც ეს ბრალდება ეფუძნება, არის ადამიანის თანდაყოლილი თვისება, ბუნება – როცა გაქვს ემოცია შეურაცხყოფაზე და დამცირებაზე. ამიტომ, ვფიქრობ, რომ 2 წელი ვიქნები ციხეში თუ 7 წელი, სასჯელის ეს სახე, რომელსაც მოსამართლე სახელაშვილი თავისი განაჩენის გადაწყვეტილებაში წერს, ვერ გახდება პრევენცია. ვერ ექნება ამ პატიმრობას და ამ სასჯელს საგანმანათლებლო და ჭკუის სასწავლებელი დატვირთვა ვერც ჩემთვის და ვერც საქართველოს სხვა მოქალაქეებისთვის.

ვფიქრობ, ამაზე უნდა იფიქროთ და იმსჯელოთ ბატონო მოსამართლეები.

ყოველ შემთხვევაში მე მჯერა, რომ დღეს თუ არა ხვალ, ჩემ საქმეს სისხლის სამართლის დატვირთვა ჩამოშორდება და მჯერა იმისაც, რომ აქ, ჩემს სამშობლოში თუ არა, ჩვენს დიდ ოჯახში, ევროპულ ოჯახში – იქ, სადაც მოსამართლეები პატივს სცემენ კანონის უზენაესობას, ადამიანის უფლებებს, თვითგამოხატვას (დიდი სურვილი მაქვს ჩვენთანაც ასე იყოს), არა მხოლოდ ჩემ საქმეზე არამედ ყველა პოლიტიკური პატიმრის საქმეზე დადგება გამამართლებელი განაჩენი, თუ მოსამართლეები იქნებიან სამართლიანები.

სინათლე არ უნდა ჩაქრეს! ბოლომდე, გამარჯვებამდე“, – განაცხადა მზია ამაღლობელმა სასამართლო სხდომაზე.

შეგახსენებთ, რომ სლოგანი – „სინათლე არ უნდა ჩაქრეს“ უკავშირდება საქართველოში დამოუკიდებელი მედიის გადარჩენას „ოცნების“ რეპრესიული პოლიტიკის პირობებში. კამპანია „სინათლე არ უნდა ჩაქრეს“ აერთიანებს 22 დამოუკიდებელ ონლაინმედიას, რომლებიც დამოუკიდებელი სიტყვისა და დემოკრატიის გადარჩენისთვის იბრძვიან.

ქუთაისის სააპელაციო სასამართლოში მზია ამაღლობელის ადვოკატები ასაჩივრებენ 6 აგვისტოს, ბათუმის საქალაქო სასამართლოში, ნინო სახელაშვილის გამოტანილ განაჩენს, რომლითაც მზია ამაღლობელს 2 წლით პატიმრობა მიესაჯა. ისინი გამამართლებელი განაჩენის გამოტანას მოითხოვენ. სააპელაციო სასამართლოში მზია ამაღლობელის საქმის მომხსენებელი მოსამართლეა ნიკოლოზ მარგველაშვილი. კოლეგიაში შედიან მოსამართლეები – მარინა სირაძე და ნანა ჯოხაძე.

მზია ამაღლობელის შემდეგი სხდომა ქუთაისის სააპელაციო სასამართლოში 14 ნოემბერს ჩაინიშნა.

ამავე თემაზე: 

„ბათუმის საქალაქო სასამართლომ განაჩენში დამალა და არ მიუთითა დაცვის მხარის მიერ სასამართლოზე გამოკვლეული მთელი რიგი დოკუმენტური მტკიცებულებები. წარმოუდგენელი მიკერძოების მხოლოდ 1 მაგალითს მოვიტან ამ ეტაპზე – ეს არის მზია ამაღლობელის ფორმა 100“ – თქვა მაია მწარიაშვილმა დღეს, ქუთაისში, მზია ამაღლობელის სააპელაციო საჩივრის განხილვისას.

მაია მწარიაშვილის თქმით, ბათუმის საქალაქო სასამართლომ, მზია ამაღლობელის ჯანმრთელობის მდგომარეობის შესახებ საუბრისას, განაჩენში მიუთითა მხოლოდ ერთი ფორმა  100 სადაც ხაზი გაუსვა მხოლოდ იმას, რომ ამ დოკუმენტის მიხედვით მზია ამაღლობელს 8 წლის წინ გადატანილი ჰქონდა თვალის კერატოკონუსი.

„სინამდვილეში კი სასამართლომ დამალა ამ დოკუმენტის ის ნაწილები, რაზეც ჩვენ მივუთითეთ სასამართლოში და საგანგებოდ მივაქცევინეთ ყურადღება.

კერძოდ: ამ ფორმა 100-ში მითითებულია, რომ სასჯელაღსრულების დაწესებულებაში მოთავსებამდე მზია ამაღლობელის მარცხენა თვალის მხედველობა იყო მხოლოდ 0.02 (დაახლოებით 2%), მარჯვენა თვალის კი 0,3 (დაახლოებით 30%), რაც სათვალის გამოყენებით შესაძლოა გაუმჯობესებულიყო 90%-დე. ამავე დასკვნით მას მარჯვენა თვალზე არ ჰქონდა კერატოკონუსი, არამედ ჰქონდა მხოლოდ მარცხენა თვალზე.

ამ ფორმა 100-ის მიხედვით სწორედ ეს გარემოებები იყო მნიშვნელოვანი და არა ის, რომ 8 წლის წინ მზია ამაღლობელმა გადაიტანა თვალის დაავადება – კერატოკონუსი, რაც არასწორია.

ამავე დოკუმენტში წერია, რომ 8 წლის წინ მას ჰქონდა ჩატარებული თვალის ოპერაცია, ხოლო კერატოკონუსი მზია ამაღლობელს ჰქონდა ამ ფორმა 100-ის გაცემის მომენტისთვის და არა 8 წლის წინ,“ – თქვა მაია მწარიაშვილმა

მზია ამაღლობელის ადვოკატმა ქუთაისის სააპელაციო სასამართლოში დეტალურად ისაუბრა იმის შესახებ, თუ რა დამალა მზია ამაღლობელის ჯანმრთელობის შესახებ ბათუმის საქალაქო სასამართლომ.

ადვოკატის თქმით, სასამართლომ მზია ამაღლობელის ჯანმრთელობასთან დაკავშირებით ზერელედ მიუთითა მხოლოდ ერთი ფორმა 100, რომელიც აღწერდა მისი თვალის მდგომარეობას სასჯელაღსრულების დაწესებულებაში მოთავსებამდე, მაგრამ არ მიუთითა იმ დოკუმენტებზე, რომლებიც ადასტურებდნენ, რომ მისი მხედველობა დრამატულად გაუარესდა მისი სასჯელაღსრულების დაწესებულებაში მოთავსების შემდეგ.

მაია მწარიაშვილის თქმით, ბათუმის საქალაქო სასამართლოში, სხდომაზე გამოიკვლიეს შემდეგი დოკუმენტები:  კლინიკა „ვივამედში“ ჩატარებული 2 კვლევა თვალზე.

“2025 წლის 4 თებერვალს „ვივამედში“ ჩატარებული კვლევით, მისი შედარებით უკეთესი მარჯვენა თვალის მხედველობის კორექცია/გაუმჯობესება შესაძლებელი იყო მხოლოდ 60%-დე. ხოლო ამავე კლინიკაში 6 თებერვალს ჩატარებული კვლევით, მისი ამავე თვალის მხედველობა იყო დრამატულად გაუარესებული და შემცირებული 0,1-დე (დაახლოებით 10%-დე), რომლის სათვალით გაუმჯობესება შესაძლებელი იყო მხოლოდ 40%-დე. ამ ორივე დასკვნით, მას მხოლოდ მარცხენა თვალზე ჰქონდა კერატოკონუსი.

ამავე სხდომაზე გამოვიკვლიეთ და სასამართლოს ყურადღება მივაქციეთ სახალხო დამცველის მიერ მოწვეული კომისიის 14 თებერვლის დასკვნას, რომლის მიხედვით მზია ამაღლობელს უკვე აქვს მე-3 ხარისხის კერატოკონუსი ორივე თვალზე. ეს დასკვნა სასამართლომ მიუთითა განაჩენის 3.53 პუნქტში, თუმცა არ მიუთითა, თუ რა წერია ამ დასკვნაში და რატომაა მნიშვნელოვანი და ყურადსაღები ეს დასკვნა.

სასამართლომ განაჩენში ასევე არ მიუთითა ჩვენს მიერ ცნობის სახით წარდგენილი, 2025 წლის 22 ივლისით დათარიღებული ფორმა 100, რომლის მიხედვით მზია ამაღლობელს მარცხენა თვალზე უკვე აქვს მე-4 ხარისხის კერატოკონუსი და ამ თვალში მხედველობა არის მხოლოდ 0,01 (ფაქტობრივად არა აქვს), ასევე კიდევ უფრო გაუარესებულია მარჯვენა თვალის მხედველობითი უნარი და ამავე დასკვნით მზია ამაღლობელს დადასტურებულად ორივე თვალზე აქვს კერატოკონუსი, რაც მას არ ჰქონდა სასჯელაღსრულების დაწესებულებაში მოთავსებამდე,“ – თქვა მაია მწარიაშვილმა.

ნახეთ რეპორტაჟი სააპელაციო სასამართლოში მიმდინარე მზია ამაღლობელის სასამართლო პროცესიდან: 

დღეს, 11 ნოემბერს, ქუთაისის სააპელაციო სასამართლოში მზია ამაღლობელის საქმის განხილვა მიმდინარეობს. მზია ამაღლობელის ადვოკატები სააპელაციო საჩივრით ითხოვენ ნინო სახელაშვილის მიერ გამოტანილი განაჩენის გაუქმებას და მის ნაცვლად გამამართლებელი განაჩენის დადგენას.

ამავე დროს, პროკურატურა მზია ამაღლობელის მიმართ ბათუმის საქალაქო სასამართლოს მიერ გამოტანილ გადაწყვეტილებას ასაჩივრებს და მისთვის ისევ სისხლის სამართლის კოდექსის 353-ე პრიმა მუხლის პირველი ნაწილით გათვალისწინებულ სასჯელს მოითხოვს, რაც 4-დან 7 წლამდე თავისუფლების აღკვეთას გულისხმობს.

სასამართლო პროცესს ესწრება მზია ამაღლობელი. საქმეს მოსამართლეთა კოლეგია განიხილავს – მომხსენებელი მოსამართლე ნიკოლოზ მარგველაშვილი, კოლეგიის წევრები კი ნანა ჯოხაძე და მარინა სირაძე არიან.

,,ბათუმელები”/,,ნეტგაზეთის” დამფუძნებელსა და მედიამენეჯერს მზია ამაღლობელს ბათუმის საქალაქო სასამართლოს მოსამართლე, ნინო სახელაშვილმა განაჩენი 6 აგვისტოს გამოუცხადა.

მოსამართლემ გადააკვალიფიცირა სისხლის სამართლის კოდექსის 353-ე პრიმა მუხლის პირველი ნაწილით წარდგენილი ბრალდება, რომლითაც მზია ამაღლობელს პროკურატურა პოლიციელზე თავდასხმაში სდებდა ბრალს, სისხლის სამართლის კოდექსის 353-ე მუხლის პირველ ნაწილზე.

„მზია ამაღლობელი ცნობილ იქნას დამნაშავედ საქართველოს სისხლის სამართლის კოდექსის 353-ე მუხლის პირველი ნაწილით გათვალისწინებული დანაშაულის ჩადენისათვის და სასჯელის სახედ და ზომად განესაზღვროს თავისუფლების აღკვეთა 2 წლის ვადით,“- თქვა მოსამართლე ნინო სახელაშვილმა.

ამავე თემაზე:

შს სამინისტროს ინფორმაციით, კახეთში სამი პირი დააკავეს, რომლებიც ერთმანეთს ფიზიკურად დაუპირისპირდნენ.

„გამოძიებით დადგინდა, რომ  მიმდინარე წლის 8 ნოემბერს, ყვარელში,  ყოფით საკითხზე დაწყებული  კონფლიქტისას,  ნიკა ზაუტაშვილი, მისი ძმა  – გივი ზაუტაშვილი და ლევან გელაძე ერთმანეთს  ჯერ სიტყვიერად, შემდგომ კი ფიზიკურად დაუპირისპირდნენ, ამავე დაპირისპირებისას ნიკა ზაუტაშვილმა ლევან გელაძეს ბლაგვი საგნის გამოყენებით სახის არეში დაზიანება მიაყენა.

პოლიციამ სამივე მათგანი ბრალდებულის სახით დააკავა“- წერს შსს.

მათივე ინფორმაციით, ძალადობის ფაქტზე გამოძიება სისხლის სამართლის კოდექსის 126-ე მუხლით მიმდინარეობს.

„TV პირველის“ ინფორმაციით, დაკავებული პირები, „ქართული ოცნების“ წარმომადგენლები არიან.

კერძოდ, ლევან გელაძე ყვარლის მერის მოადგილეა, გივი ზაუტაშვილი – საკრებულოს თავმჯდომარე, ნიკა ზაუტაშვილი კი მისი ძმაა.