Batumelebi

ქობულეთის მერიაში ბავშვთა ზრუნვისა და მხარდაჭერის განყოფილება 2020 წლის სექტემბერში შეიქმნა. განყოფილება მერიის ჯანდაცვისა და სოციალური უზრუნველყოფის სამსახურის ნაწილია, რომლის წლიური დაფინანსება 151 250 ლარია. განყოფილებაში, რომელმაც ბავშვზე ძალადობის თუ სხვა უფლებების დარღვევის შემთხვევები უნდა შეისწავლოს, 5 ადამიანი მუშაობს. მათ შორის 3 სოციალური მუშაკი და 1 ინსპექტორი. რას აკეთებს და როგორ ესმით განყოფილებაში ბავშვზე ზრუნვა, ამ თემით „ბათუმელები“ მას შემდეგ დაინტერესდა, რაც ქობულეთში 14 წლის მოზარდმა, ნინი ცეცხლაძემ სიცოცხლე თვითმკვლელობით დაასრულა.

„ბათუმელების“ კითხვებს განყოფილების უფროსს ლიკა ინაიშვილი პასუხობს.

• ქალბატონო ლიკა, დაარსებიდან ხუთი თვის განმავლობაში თუ შემოვიდა შეტყობინება თქვენს სამსახურში ბავშვზე ძალადობის შესახებ?

14 შეტყობინებაა შემოსული ჩვენს სამსახურში სულ, აქედან ორი მიმდინარეა, დანარჩენი კი შევისწავლეთ. ძალადობაზე იყო ერთი შემთხვევა, თვითონ მოზარდმა მოგვმართა, ოჯახური კონფლიქტი იყო, ფსიქოლოგიური პრობლემები ჰქონდა ამ კონფლიქტის ნიადაგზე, რადგან ბებია ასხვისებდა სახლს და იმ სახლიდან უნდა გასულიყო ეს ბავშვი.

რაც შეეხება სხვა შემთხვევებს, უფრო სოციალური იყო.

• რას ითხოვდნენ ეს ოჯახები და რითი ეხმარებით?

ჩვენ შეგვიძლია შევთავაზოთ უფასო სასადილო, თუ საკვები არ აქვთ ოჯახში, შეშაზე შეუძლიათ დაწერონ განცხადება, გაზიფიცირებაზე, მედიკამენტებზე გვაქვს ახალი პროგრამა, ერთ წლამდე ბავშვებისთვის მოვლის საშუალებებზე ვაუჩერი და ასევე ახალი პროგრამა გვაქვს მარტოხელა დედებისთვის, რომელიც თვეში 100 ლარის დახმარებას ითვალისწინებს. ოთხმა მარტოხელა დედამ უკვე მოგვმართა.

• როგორ იღებთ ინფორმაციას, იციან თქვენი სამსახურის შესახებ მოზარდებმა?

არსებობს ცხელი ხაზი, სადაც შეუძლიათ დაგვიკავშირდნენ, ნდობის ტელეფონი, მერიის გვერდზე დევს…

• თქვენ ფიქრობთ, რომ ბავშვები ან მოზარდები მერიის ვებგვერდზე მოძებნიან თქვენს ტელეფონს?

პედაგოგებმა იციან, პანდემიიდან გამომდინარე არ გვქონდა სკოლებთან შეხება, მაგრამ აბსოლუტურად ყველა დირექტორი, პედაგოგი, სოფლის წარმომადგენელი, ექიმი თუ ექთანი გაფრთხილებული გვყავს – ვესაუბრეთ ტელეფონით როგორც კი შეიქმნა სამსახური, რომ თუკი რაიმე მსგავსი ინფორმაცია ექნებათ, ან უბრალოდ ეჭვი შეეპარებათ ბავშვის უფლების დარღვევაში, მაშინვე მოგვმართონ. ნებისმიერი ინფორმაციის შემთხვევაში, 5-6 წლის ბავშვმაც რომ მოგვაკითხოს, რეაგირება გვექნება.

• იმ სკოლაში თუ იციან ამის შესახებ, სადაც ნინი სწავლობდა?

თავისთავად. ყველა დირექტორზე იყო გადაცემული ინფორმაცია, რომ მერიის სამსახურში არსებობდა ეს განყოფილება.

• ამ ბავშვის შესახებ არავინ დაგკავშირებიათ?

არავინ. როგორც ყველამ, ჩვენც მედიით გავიგეთ.

• როგორ ფიქრობთ, რატომ არ დაგიკავშირდათ არავინ. როგორც გამოძიების მასალებით ირკვევა, ბევრს ჰქონდა ძალადობაზე ინფორმაცია, მათ შორის სკოლას?  

სტიგმის გამო.

• რას აკეთებთ იმისთვის, რომ ეს სტიგმა დაძლიონ ადამიანებმა და ნდობა გაუჩნდეთ თქვენი სამსახურის მიმართ?

ეს ყველას ვალდებულებაა, საზოგადოებისაც, მედიისაც, რომ ბავშვებზე ძალადობის შემთხვევები დამალული არ იყოს და დროულად  გამოვლინდეს. შეხვედრებია საჭირო, გასაუბრებები, მაგრამ ჩვენ მხოლოდ მოპოვებულ ინფორმაციებზე გავდივარ. თუ არანაირი ინფორმაცია არ შემოვიდა ოჯახებიდან, სოფლიდან, ნებისმიერი ადამიანისგან, ასეთ შემთხვევაში არაფერი შეგვიძლია.

• 3 სოციალური მუშაკი გყავთ, 1 ინსპექტორი, როგორ მუშაობენ ისინი, რა პრინციპით?

სოცმუშაკი მაშინ გადის, როცა ინფორმაცია შემოდის. ანონიმურიც რომ იყოს, მაინც მაშინვე გავდივართ და ხდება ოჯახის გადამოწმება.

• ინსპექტორი რაზე მუშაობს?

მავნე ზეგავლენის ქვეშ რომ არ იყვნენ ბავშვები, სკოლებში, მაღაზიებში, საზოგადოებრივი თავშეყრის ადგილებში. არ მიყიდონ ბავშვს ალკოჰოლი ან სიგარეტი. თუმცა, მსგავსი შემთხვევა ჯერ არ გამოგვივლენია. ახლა პანდემიაა და ნაკლებად გამოდიან ბავშვები ღია სივრცეებში.

ინფორმაციის ან მომართვის საფუძველზე ვსწავლობთ ოჯახებს, ბავშვების მდგომარეობას თუ ჩვენს კომპეტენციაში შემოდის საკითხი და შეგვიძლია დახმარება სოციალური პროგრამების ნაწილში, ვეხმარებით, თუ არ შეგვიძლია, მაშინ ბავშვთა ზრუნვისა და ტრეფიკინგის სამსახურში ვამისამართებთ თბილისში.

რეგიონული განვითარებისა და ინფრასტრუქტურის მინისტრი, პირველი ვიცე-პრემიერი, მაია ცქიტიშვილი თანამდებობას ტოვებს. ამის შესახებ „ქართულ ოცნებაში“ გამართულ ბრიფინგზე თავად განაცხადა:

„ბოროტად ვისარგებლე იმით, რომ ბატონ ირაკლის 15 წელია ვიცნობ, ძალიან ბევრი ერთობლივად გაკეთებული საქმე გვაკავშირებს ჯერ კიდევ საერთაშორისო ფონდ ქართუში, მაშინ, როდესაც ბატონი ირაკლი იყო მთავრობის მეთაური, მოგეხსენებათ, რომ მე მას ვეხმარებოდი, როგორც მთავრობის ადმინისტრაციის ხელმძღვანელი.

გულწრფელად ვთხოვე, რომ მომცეს საშუალება მე დავუბრუნდე ჩემს ოჯახს, გამოვიდე აქტიური პოლიტიკური ცხოვრებიდან და, შესაბამისად, ის ცხრაწლიანი პერიოდი ჩემი ცხოვრების ძალიან საინტერესო და ძალიან დატვირთული დავასრულო ამით და მივცე საშუალება ჩემს გუნდს, ბატონ ირაკლი ქარსელაძეს – უკვე, როგორც ითქვა, არის ჩემი პირველი მოადგილე სამი წლის განმავლობაში, ირაკლისთან ერთად ძალიან ბევრი მნიშვნელოვანი საქმე გავაკეთე, ბევრი მნიშვნელოვანი საქმე წამოვიწყეთ…

მინდა დღევანდელი ტრიბუნა გამოვიყენო და მადლობა ვუთხრა ბატონ გიორგი გახარიას, იმ პრემიერს, რომელთანაც ერთად ბოლო წელიწად-ნახევრის განმავლობაში ვიყავი ვიცე-პრემიერის პოზიციაზე, ასევე ძალიან საინტერესო და დატვირთული პერიოდი იყო, სამწუხაროდ, დაგვემთხვა კოვიდის პანდემია, რა დროსაც, ვფიქრობ, რომ მთავრობის მთელი შემადგენლობა, მთელი გუნდი, ძალიან წარმატებულად მართავდნენ ამ პროცესს. მინდა ყველას წარმატება ვუსურვო, მიხარია, რომ იგივე გუნდი აგრძელებს მუშაობას სრული შემადგენლობით,“ – განაცხადა ცქიტიშვილმა.

ცქიტიშვილმა ამის შემდეგ მადლობა გადაუხადა ბიძინა ივანიშვილსაც, რომელთან ერთადაც ის პოლიტიკაში მოვიდა – „მთელი ეს პერიოდი ვიზიარებდი „ქართული ოცნების“ სულისკვეთებას და ვრჩები მის მხარდამჭერად“

„მინდა ასევე მადლობა გადაგიხადოთ თქვენ, მედიას. ვისარგებლო შემთხვევით და ასევე, მედიასაც, როგორც აქტიური პოლიტიკიდან გასული ადამიანი, ამ ფუფუნებით ვისარგებლო და აღარ ვიყო უკვე თქვენი რესპონდენტი, დიდი მადლობა ყველას,“ – თქვა ცქიტიშვილმა.

საქართველოს პრემიერ-მინისტრობის კანდიდატმა, ირაკლი ღარიბაშვილმა მინისტრობის ორი ახალი კანდიდატი წარადგინა.

საქართველოს რეგიონული განვითარების და ინფრასტრუქტურის მინისტრის პოსტს პირველი მოადგილე, ირაკლი ქარსელაძე დაიკავებს.

თავდაცვის მინისტრის პოსტზე კი ღარიბაშვილმა ჯუანშერ ბურჭულაძე, მისი ყოფილი მოადგილე წარადგინა.

ღარიბაშვილის განცხადებით, სხვა მინისტრები პოსტს შეინარჩუნებენ.

პრემიერ-მინისტრი და მთავრობის ახალი შემადგენლობა საქართველოს პარლამენტმა უნდა დაამტკიცოს.

საქართველოს პრემიერმინისტრობის კანდიდატმა ირაკლი ღარიბაშვილმა მინისტრობის ორი ახალი კანდიდატი წარადგინა.

საქართველოს რეგიონული განვითარების და ინფრასტრუქტურის მინისტრის პოსტი დატოვა მაია ცქიტიშვილმა, მის ადგილს მინისტრის პირველი მოადგილე, ირაკლი ქარსელაძე დაიკავებს.

თავდაცვის მინისტრის პოსტზე კი ღარიბაშვილმა ჯუანშერ ბურჭულაძე, მისი ყოფილი მოადგილე წარადგინა.

ღარიბაშვილის განცხადებით, სხვა მინისტრები პოსტს შეინარჩუნებენ.

პრემიერ-მინისტრი და მთავრობის ახალი შემადგენლობა საქართველოს პარლამენტმა უნდა დაამტკიცოს.

18 თებერვალს საქართველოს უკვე ყოფილმა პრემიერ-მინისტრმა გიორგი გახარიამ განაცხადა, რომ ტოვებს თანამდებობას. იგი პირველი პრემიერ-მინისტრია ბოლო წლების განმავლობაში, რომელმაც ღიად დაასახელა თანამდებობის დატოვების მიზეზი – შეუთანხმებლობა გუნდთან ოპოზიციის ლიდერის, ნიკა მელიას დაკავების საკითხზე. გახარიას განცხადებით, მელიას დაკავება პოლიტიკური ესკალაციის რისკს გაზრდის.

თქვენი აზრით, როგორ აისახება გიორგი გახარიას გადადგომა „ქართულ ოცნებაზე“?

როგორ აისახება გახარიას გადადგომა „ქართულ ოცნებაზე“?

გამოკითხვა ანონიმურია. ერთ მომხმარებელს შეუძლია ხმა მისცეს ერთხელ.

გამოკითხვა არ არის რეპრეზენტატული.

ბათუმში, ჭავჭავაძის და ლერმონტოვის ქუჩების კვეთაში წყალმა ამოხეთქა. ამ დროისთვის უცნობია დაზიანების მიზეზი.

„ბათუმის წყლის“ ინფორმაციით, ეს ავარიული დაზიანებაა და სპეციალისტები მალე მივლენ შემთხვევის ადგილზე.

„ბათუმის წყლის“ პრესსამსახურში ასევე გვითხრეს, რომ სასმელი წყლის მიწოდება რამდენიმე ქუჩას შეუწყდება და ამის შესახებ ინფორმაციას მალე გაავრცელებენ.

„საქართველო: პოლიტიკური კრიზისი რუსული სურნელით“ – ამ სათაურით აქვეყნებს სტატიას ფრანგული გამოცემა Le Figaro, რომელიც პრემიერ-მინისტრ გიორგი გახარიას გადადგომას შეეხება.

Figaro წერს, რომ ეს არის ახალი ეპიზოდი საქართველოში პოლიტიკური კრიზისისა, რომელშიც 2019 წლიდან რუსეთიცაა გარეული.

,,რუსეთმა დიდი ხანია დაკარგა ადგილი 3,7 მილიონი ქართველის გულში“, – წერს გამოცემა და აღნიშნავს, რომ 2021 წლის პოლიტიკური კრიზისი გაგრძელებაა იმ მოვლენებისა, რაც საქართველოში 2019 წლის 20 ივნისს დაიწყო რუსი კომუნისტი დეპუტატის, გავრილოვის ჩამოსვლით.

„გავრილოვს მართლმადიდებლობის საპარლამენტთაშორისო ასამბლეის სხდომა უნდა გაეხსნა და მან ბუნებრივად დაიკავა საქართველოს პარლამენტის თავმჯდომარის სავარძელი. ამან საქართველოში დიდი პროტესტი გამოიწვია, რადგან აქ მიიჩნევენ, რომ ქვეყნის 20% რუსეთს აქვს ოკუპირებული და ის მხარს უჭერს სეპარატისტულ აფხაზეთსა და სამხრეთ ოსეთს“, – წერს Figaro.

გამოცემისავე შეფასებით, „16 თებერვალს, ოლიგარქ ბიძინა ივანიშვილის პარტია ,,ქართული ოცნების“ მიერ გაკონტროლებულმა პარლამენტმა ნიკა მელიას სადეპუტატო ხელშეუხებლობა მოუხსნა. ივანიშვილმა კარიერა 1990-იანი წლებში, რუსეთში შეიქმნა.

პარლამენტის გადაწყვეტილებამ მოამზადა ნიადაგი, რომ თბილისის საქალაქო სასამართლოს ოპოზიციის ლიდერ ნიკა მელიასთვის პატიმრობა შეეფარდებინა”.

ასე აფასებს გამოცემა საქართველოში ბოლო დღეებში განვითარებულ მოვლენებს.

როგორც Figaro წერს, ბოლო დღეების განმავლობაში გავრილოვმა ,,ცეცხლს ნავთი დაასხა“ და საქართველოს მმართველი პარტია შეაქო, რომელმაც, მისი თქმით, ყველაფერი გააკეთა გადატრიალება, რეპრესიები და დიქტატურა რომ აერიდებინა ქვეყნისთვის.

„ბოლო წლების განმავლობაში ქართული მართლმსაჯულება ძალიან ხშირად პოლიტიზებულია“, – წერს გამოცემა.

სტატიაში აღნიშნულია, რომ ეს ახალი პოლიტიკური კრიზისი გავლენას მოახდენს სამხრეთ კავკასიაში მიმდინარე პროცესებზე, სადაც რუსეთმა გაიმყარა საკუთარი პოზიციები ,,ისე, როგორც არასდროს“, – გასულ წელს მთიანი ყარაბაღის ომით.

Figaro ერდოღანს სამხრეთ კავკასიის კიდევ ერთ ავტორიტარულ მმართველს უწოდებს, რომელსაც ასევე მისცა საშუალება ყარაბაღის კონფლიქტმა რეგიონში პოზიციების გასამყარებლად.

„ამის ფონზე კი 31 ოქტომბრის საპარლამენტო არჩევნებმა კრიზისამდე მიიყვანა საქართველო. ,,ქართული ოცნების“ გამარჯვება იმდენად სადავო აღმოჩნდა, რომ არც ერთი ოპოზიციური პარტია არ დათანხმდა შესულიყო პარლამენტში.

,,ქართულმა ოცნებამ“ პრემიერ-მინისტრად ირაკლი ღარიბაშვილი წარადგინა, ამ 38 წლის ფრანკოფონ კაცს უკვე ეკავა ეს პოსტი 2013-2015 წლებში და ცუდი კვალი დატოვა“, – წერია სტატიაში.

გაერთიანებული ერების ორგანიზაციამ გამოაქვეყნა მოხსენება სახელწოდებით – „შერიგება ბუნებასთან“.

მოხსენებაში ნათქვამია, რომ ჰაერის საშუალო ტემპერატურა პლანეტაზე ამ ასწლეულში შესაძლოა 3 გრადუსით გაიზარდოს, რაც კატასტროფა იქნება კაცობრიობისთვის იმ პირობებში, როცა ცხოველებისა და მცენარეების მილიონზე მეტი სახეობა გაქრობის პირასაა.

გაერო წერს, რომ ჰაერის დაბინძურების შედეგად გამოწვეული ავადმყოფობები ყოველწლიურად იწვევს 6,5 მილიონი ადამიანის ნაადრევ სიკვდილს, ხოლო 1,8 მილიონი ბავშვი ყოველწლიურად იღუპება წყლის დაბინძურების შედეგად.

„2021 წელი გადამწყვეტია პლანეტისთვის. ჯერ კიდევ არ არის გვიან ყველაფრის შეცვლა, მაგრამ ჩვენ უკვე უნდა ვიყოთ დარწმუნებული, რომ შევძლებთ არა მხოლოდ გამონაბოლქვის მკვეთრად შემცირებას უახლოეს ათწლეულში, არამედ შევქმნით ახალ გარემოს ბიომრავალფეროვნების შესანარჩუნებლად და, ასევე, მივიღებთ სერიოზულ ზომებს დაბინძურების შესამცირებლად. ეს ნამდვილად გადამწყვეტი წელია,“ – განაცხადა ანტონიო გუტერეშმა, გაეროს გენერალურმა მდივანმა. 

გაეროს ცნობით, მოხსენებაში „შერიგება ბუნებასთან“ მოცემულია პრობლემების გადაწყვეტის გზები.

გაერო მიიჩნევს, რომ პირველ რიგში ზომები უნდა მიიღონ მთავრობებმა და უნდა მიიღონ სათბური გაზების ემისიის გადასახადი, შეწყვიტონ საწვავის მოპოვებისა და სოფლის მეურნეობის სუბსიდირება, რაც ბუნებას ზიანს აყენებს და მწვანე ეკონომიკის განვითარებაში ჩადონ ფული.

აშშ-ის სახელმწიფო დეპარტამენტი საქართველოში ბოლო დროს განვითარებულ პოლიტიკურ მოვლენებთან დაკავშირებით განცხადებას ავრცელებს.

„მოვუწოდებთ ყველა მხარეს თავშეკავებისკენ და თავიდან აიცილონ ნებისმიერი ქმედება ან რიტორიკა, რამაც შესაძლოა, დაძაბულობის ესკალაცია ან ძალადობა გამოიწვიოს.

მოვუწოდებთ საქართველოს მთავრობას, იმოქმედოს ევროატლანტიკური მისწრაფებების შესაბამისად და განამტკიცოს თავისი ერთგულება დემოკრატიის პრინციპების, პირადი თავისუფლებისა და კანონის უზენაესობის წინაშე იმის უზრუნველყოფით, რომ მისი სასამართლო სისტემა და პროკურატურა თავისუფალი იყოს პოლიტიკური მიკერძოებისგან.

აშშ მხარს უჭერს დემოკრატიულ, უსაფრთხო და წარმატებულ საქართველოს. ჩვენ გავაგრძელებთ მუშაობას საქართველოსთან, ჩვენს სტრატეგიულ პარტნიორთან, კანონის უზენაესობისა და ანგარიშვალდებული ინსტიტუტების მხარდასაჭერად“, – ნათქვამია სახელმწიფო დეპარტამენტის განცხადებაში.

რამდენიმე დღეა ქვეყანაში შექმნილი პოლიტიკური დაძაბულობა მწვავდება: 17 თებერვალს თბილისის საქალაქო სასამართლომ „ნაციონალური მოძრაობის“ ლიდერს, ნიკა მელიას წინასწარი პატიმრობა შეუფარდა.

იმავე საღამოს ნიკა მელია და ოპოზიციის ლიდერები ენმ-ის სათავო ოფისში შეიკრიბნენ. ოპოზიციაში ამბობდნენ, რომ პოლიციას ნიკა მელიას დაპატიმრების საშუალებას არ მისცემდნენ.

18 თებერვალს პრემიერ-მინისტრი გიორგი გახარია გადადგა. როგორც გახარიამ აღნიშნა, ის არ ეთანხმება მელიას დაპატიმრებას, თუ ეს დესტაბილიზაციის საფრთხეს ქმნის ქვეყანაში.

გახარიას გადადგომის შემდეგ შსს-მ განაცხადა, რომ პრემიერ-მინისტრის გადადგომის გამო მელიას დაკავების ღონისძიება დროებით გადაიდო.

„ქართულმა ოცნებამ“ პრემიერობის კანდიდატად ყოფილი პრემიერი, მოქმედი თავდაცვის მინისტრი, ირაკლი ღარიბაშვილი დაასახელა.

საკუთარი გარეგნობით უკმაყოფილება გარდატეხის ასაკში მყოფთათვის ერთ-ერთი ყველაზე რთული პრობლემაა. როგორც ბავშვთა და მოზარდთა ფსიქოლოგი ქეთი დევაძე ამბობს, მოზარდების 40-60%-ს არ მოსწონს საკუთარი თავი: ჰორმონალური პროცესების შედეგად იწყება სქესობრივი მომწიფება, მოზარდებს ეცვლებათ ხმა, სხეული. ხშირად სხეულის სხვადასხვა ნაწილები არაპროპორციულად იზრდება: კიდურები, ცხვირი და ა.შ.

ფსიქოლოგი ამბობს, რომ ეს ცვლილებები მოზარდებს აბნევთ და ძაბავთ. მშობლებსაც უჭირთ გაერკვნენ, როგორ მოექცნენ მათ: როგორც დიდს თუ როგორც ბავშვს. პრობლემურია მოზარდის ურთიერთობებიც თანატოლებთან, ისინი ხშირად ხდებიან გარეგნული ცვლილებების გამო ბულინგის მსხვერპლი.

„გარდატეხის ასაკში მოზარდები თვითკრიტიკულები არიან, ჰყავთ წარმოსახვითი აუდიტორია და თავსაც წარმოსახვით სცენაზე წარმოიდგენენ ხოლმე, ჰგონიათ, რომ ყველა მათ უყურებს და აკონტროლებენ. ფიქრობენ, რომ შემჩნეულია მათი ყველა ნაკლი, შეცდომა და რომ აუცილებლად გახდებიან კრიტიკის ობიექტები.

გარდატეხის ასაკში ბავშვები ეძებენ საკუთარ თავს, ცდილობენ იყვნენ გამორჩეულები გარეგნულად, ჩაცმის სტილით და ხშირად სწორედ ამიტომ ამ ასაკს თან ახლავს თვითშეფასების პრობლემები. როცა ამას ერთვის უკმაყოფილება საკუთარი გარეგნობით, შესაძლოა ბავშვის თვითშეფასება კიდევ უფრო დაბალ ნიშნულზე დავიდეს. არ არის გამორიცხული სამომავლოდ გარეგნობით უკმაყოფილება კომპლექსადაც იქცეს, თუ დროულად არ დავეხმარებით მოზარდს რეალობის გაანალიზებაში,“ – ამბობს ქეთი დევაძე.

რა ქნას მშობელმა, რით დაეხმაროს საკუთარი გარეგნობით უკმაყოფილო მოზარდს?

გარდატეხის ასაკში მშობლის აზრი ხშირად ბავშვს უკვე აღარ აინტერესებს. მიუხედავად ამისა, ქეთი დევაძე მიიჩნევს, რომ მშობელი მაინც ხშირად უნდა უსვამდეს ხაზს:

• ბავშვის დადებით მხარეებს. მათ შორის გარეგნობის დადებით მხარეებსაც;
• აუცილებელია მოზარდს ვეუბნებოდეთ რეალურ კომპლიმენტებს, დეტალურად;
• მშობლები ყურადღებას უნდა ამახვილებდნენ არამხოლოდ მოზარდის გარეგნულ მხარეზე, ასევე მის დადებით პიროვნულ თვისებებზე;
• მნიშვნელოვანია, მშობელი დაეხმაროს შვილს იმის გაცნობიერებაში, რომ ის უნიკალურია თავისი გარეგნობით, პიროვნული თვისებებით, რომ ყველა ადამიანი ერთადერთი და განუმეორებელია;
• არც ერთ შემთხვევაში არ შეიძლება „შევაჯიბროთ“ ბავშვები მეგობრებს, და-ძმებს, არ არის საჭირო, მაგალითად, მოზარდს მოვუყვანოთ თანატოლები.

ფსიქოლოგი აღნიშნავს, რომ მშობლებს დიდი მოთმინება და ძალისხმევა მართებთ შვილების მოზარდობის პერიოდთან გასამკლავებლად. მნიშვნელოვანია მშობელმა მას მისცეს გარკვეულწილად დამოუკიდებლობა, მაგრამ თან აგრძნობინოს, რომ საჭიროების შემთხვევაში გვერდითაა და ყოველთვის მზადაა კომუნიკაციისთვის.

საკუთარი გარეგნობით უკმაყოფილო მოზარდებს შესაძლოა აგრესია ჰქონდეთ მშობლებზეც. მეტიც – შესაძლოა მშობლებს ეგონოთ, რომ მოზარდებს ისინი „ეზიზღებათ“ კიდეც, მაგრამ უნდა გვახსოვდეს, რომ ეს დამოკიდებულება, აგრესია, ფიზიოლოგიური პროცესების და ჭარბი ემოციების შედეგია და არა მოზარდების ნამდვილი „ზიზღი“.

გელათის სამონასტრო კომპლექსში შემავალი წმინდა გიორგის ტაძარი ისევ დროებითი გადახურვის გარეშეა.

ტაძრის დროებითი გადახურვა 18 თებერვალს უნდა დასრულებულიყო, თუმცა ამ ეტაპზე მხოლოდ ორი კალთაა გადახურული, წმინდა გიორგის ტაძარი კი თოვლის საფარველქვეშაა.

არასამთავრობო ორგანიზაცია „ევროპა ჩემი სახლიას“ ხელმძღვანელი თორნიკე ბარათაშვილი დეტალურად აღწერს, რა სიტუაციაშია ახლა წმინდა გიორგის ტაძარი.

„მხოლოდ ორი კალთაა გადახურული – დაბალი რეგისტრის კალთები,“ –  უთხრა მან „ბათუმელებს“ და ამის ამსახველი ფოტოებიც მოგვაწოდა.

მისივე თქმით, გელათის წმინდა გიორგის ტაძრის მხატვრობა საფრთხის ქვეშაა. რაც ხილულად ჩანს, არის ის, რომ მხატვრობიდან მუდმივად ცვივა ფრაგმენტები.

სამუშაოების შემსრულებელი კომპანიის „ბაგინეთი +“-ის წარმომადგენელმა არჩილ ყიფიანმა „ბათუმელებს“ უთხრა, რომ დროებითი გადახურვა უამინდობის გამო გაჭიანურდა.

„[სახურავის] შეფიცრვა თითქმის დავამთავრეთ. ორი ფერდის გადახურვა მოვასწარით მარტო და გაგვითოვდა. მანამდე წვიმდა. კარგ ამინდში მხოლოდ ამ სამუშაოს გაკეთება მოვასწარით. დაახლოებით ოთხი დღე არის კარგი ამინდი საჭირო, რომ მთლიანად დაიხუროს წმინდა გიორგის ტაძარი. 18 თებერვლამდე აუცილებლად მოესწრებოდა ეგ სამუშაოები, მაგრამ აი, გეუბნებით, ამინდმა შეგვიშალა  ხელი. თოვლიან ამინდში უბრალოდ ფიზიკურად ვერ იმუშავებს ხელოსანი,“ – უთხრა „ბათუმელებს“ კომპანია „ბაგინეთი +“-ის წარმომადგენელმა არჩილ ყიფიანმა.

მისივე თქმით, ამჟამად წმინდა გიორგის ტაძრის სამხრეთის  და ჩრდილოეთის ფერდი არის დახურული.

საქართველოს კულტურული მემკვიდრეობის სააგენტოში აცხადებენ, რომ წმინდა გიორგის ტაძრის გადახურვა პრევენციული ხასიათისაა.

„რისკი იმისა, რომ ტაძარში წყლის ჩადინება მოხდეს, ნამდვილად არ არის. ამ გამოცდის ქვეშ წმინდა გიორგის ტაძარი არაერთხელ ყოფილა, მათ შორის, გადახურვის დაწყებამდე ინტენსიური წვიმის ზემოქმედების ქვეშ იყო. არაერთხელ შევამოწმეთ ჩვენ უშუალო სიახლოვიდან არსებული ხარაჩოს  დახმარებით არეალები, გადამოწმდა ვიზუალურად, დატენიანების კვალი იქ არ არსებობს, მაგრამ საპარლამენტო კომიტეტის გადაწყვეტილების შესაბამისად ჩვენ ვქმნით დროებით, ახალ მექანიზმს დამატებითი დაცვისათვის“, – უთხრა „ბათუმელებს“ საქართველოს კულტურული მემკვიდრეობის სააგენტოს საზოგადოებასთან ურთიერთობის სამსახურის უფროსმა ბექა ბარამიძემ.

საქართველოს კულტურული მემკვიდრეობის დაცვის სააგენტომ 11 თებერვალს გაავრცელა ინფორმაცია,  საიდანაც პირველად გახდა ცნობილი, რომ სააგენტო წმინდა გიორგის ტაძარსაც გადახურავდა. მანამდე სააგენტო ამტკიცებდა, რომ წმინდა გიორგის ტაძარს დროებითი გადახურვა არ სჭირდებოდა. ამის საწინააღმდეგოდ, დარგის სპეციალისტები ითხოვდნენ სააგენტოს წმინდა გიორგის ეკლესია სასწრაფოდ გადაეხურა. საბოლოოდ, საპარლამენტო კომიტეტმა სააგენტოს რეკომენდაცია მისცა ტაძრის დროებითი სახურავის ქვეშ მოსაქცევად.

არსებული ინფორმაციით, დროებითი გადახურვის კონსტრუქციაზე დამონტაჟდება წყალგადამყვანი სისტემა, რომლის საშუალებით ნალექი მიწის ნიშნულზე მოწყობილ სანიაღვრე არხში გადავა.

სამონასტრო კომპლექსის 2 ტაძარზე მოწყობილი დროებითი სახურავის ფენილები არქიტექტურულ ძეგლებზე კომპლექსური კვლევის პროცესის დაწყებამდე შენარჩუნდება.

მთავარ  ფოტოზე: გელათის სამონასტრო კომპლექსში შემავალი წმინდა გიორგის ტაძარი 17/02/2021. თორნიკე ბარათაშვილის ფოტო

ამავე თემაზე:

ბავშვთა უფლებების დაცვის საერთაშორისო ორგანიზაცია Save the Children-ი აცხადებს, რომ სექსუალური ძალადობა ათეულობით მილიონ ბავშვს ემუქრება იმ ქვეყნებში, სადაც შეიარაღებული კონფლიქტი მიმდინარეობს.

ორგანიზაციის ცნობით, შეიარაღებული მებრძოლების მხრიდან სექსუალური ძალადობის მსხვერპლი შეიძლება გახდეს ყოველი მეექვსე ბავშვი კონფლიქტის ზონებში. საუბარია 426 მილიონიდან 72 მილიონ ბავშვზე, ბიჭებსა და გოგოებზე, რომელთაც საფრთხე ემუქრებათ.

ამავე დროს, ორგანიზაციის ცნობით, ბოლო 30 წელიწადში რისკის ჯგუფში მყოფი ბავშვების რაოდენობა თითქმის ათჯერ გაიზარდა. 1990 წელს სექსუალური ძალადობის რისკის ქვეშ 8.5 მილიონი ბავშვი იყო – ნათქვამია ანგარიშში, რომელიც 19 თებერვალს გამოქვეყნდება, მანამდე კი ორგანიზაციამ მონაცემები მიუნხენში წარადგინა კონფერენციაზე.

ექსპერტები განმარტავენ, რომ სექსუალურ ძალადობაში იგულისხმება გაუპატიურება, სექსუალური მონობა, იძულებითი პროსტიტუცია, იძულებითი სტერილიზაცია და გენიტალიების მოკვეთა.

ორგანიზაცია მიიჩნევს, რომ განსაკუთრებით მძიმე მდგომარეობაა ერაყში, იემენში, კოლუმბიაში, სომალიში, სამხრეთ სუდანსა და სირიაში.

Save the Children-ის დასახელებული რიცხვებისგან განსხვავდება გაეროს მონაცემები. გაერომ 2006 წელს მსოფლიოში ბავშვებზე სექსუალური ძალადობის 22 ათასზე მეტი შემთხვევა დაასახელა, თუმცა Save the Children-ის  ხელმძღვანელის, სუზან კრუგერის განცხადებით, ოფიციალური მონაცემები მხოლოდ აისბერგის წვერია.

„ბავშვებზე სექსუალური ძალადობა ძალიან იშვიათად აღირიცხება მშვიდობიან დროსაც კი, ხოლო შეიარაღებული კონფლიქტებისას – კიდევ უფრო იშვიათად. გაუპატიურება და სექსუალური ძალადობის სხვა ფორმები სულ უფრო ხშირად გამოიყენება ომში“, – განაცხადა მან.

ეკომიგრანტი, 63 წლის ნოდარ ჭაღალიძე 2006 წლიდან დღემდე თავისი ხელით აშენებულ ქოხში ცხოვრობს ბათუმში, კახაბრის ქუჩაზე, ყოფილი ნარკოლოგიურის მახლობლად. ნოდარ ჭაღალიძის ძირითადი შემოსავალი სახელმწიფო შემწეობაა – 140-ლარი პენსია სამხედრო ტრავმისთვის და 50 ლარი სოციალური დახმარება. საკვები ძირითადად სოციალური სასადილოდან მოაქვს. “ჩაცმა გინდა თუ წამალი, სხვა ყველაფერი შეზღუდულია. არაფერს არ უთავდება ეს ფული, ძალიან გაჭირვებული დრო მოვიდა, განსაკუთრებით ჩვენისთანა ხალხისთვის”, – ამბობს ის.

ნოდარ ჭაღალიძის ქოხი ნახევარი ქვის, ნახევარი ხის მასალისგანაა ნაშენი, სახურავი ზემოდან ძველი კრამიტითაა დახურული, შიგნიდან კი მუყაო აქვს აკრული. ეზოში ცივი წყალი მოდის, შუქის შეყვანაზე კი წლებია უარს ეუბნებიან. “ამ შემოსაზღვრულში ორი მოსახლე ვართ და ორივეს მეზობლისგან გვაქვს თითო ხაზი, 5 ლარზე მეტს ვერ ვწვავთ, ტელევიზორს და ერთ ნათურას ვანთებ … მთლად უშუქოდაც ძნელი დარჩა”, – ამბობს ის.

ნოდარ ჭაღალიძე შუახევის  მუნიციპალიტეტის სოფელ გომარდულიდან 2004 წელს მეწყრის გამო წამოვიდა და სხვა დაზარალებულებთან ერთად მწვანე კონცხზე ე.წ. “სასადილოს” შენობაში შესახლდა.  მწვანე კონცხზე შესახლებულებს მთავრობა სამი წლის განმავლობაში კომპენსაციას ჰპირდებოდა, მაგრამ 2006 წელს ისინი შენობიდან იძულებით გამოასახლეს. “ერთ მშვენიერ დღეს მოვიდნენ, დაგვარბიეს, დუბინკებით გამოგვყარეს, რამდენიმე მოსახლე ვიყავით შესული იმ შენობაში. დაგვყარეს ეზოში და 10-15 დღე იქ ვიყავით  დაყრილები, ხან “დრანგალეტზე” დავწექით, ხან რაღაც ხეებზე… მერე შეხედეს, ვისაც საბუთები გვქონდა და ვიყავით დაზარალებულები, მოგვხიკეს და 10-15 დღის შემდეგ წამოგვიყვანეს ხელვაჩაურში”.

ნოდარ ჭაღალიძე ჰყვება, რომ მას კახაბერში, ყოფილი ნარკოლოგიურის შენობაში ერთი ოთახი გამოუყვეს, რომელსაც ფანჯრები შეუჭედა, მაგრამ საცხოვრებლად მაინც არ ვარგოდა. ამიტომ ეზოსთან ახლოს პატარა “ბუტკის” გაკეთება გადაწყვიტა, სადაც თავს უფრო ადვილად გაიტანდა:

“არც კარი ჰქონდა იმ ოთახს, არც ფანჯარა, ქვევით დახვრეტილი იყო და ტარაკნები ამოდიოდნენ, კოღოები გვესეოდა… იქ არ გაიჩერებოდა და ვერ გავარემონტებდი ნორმალურად. აქ პატარა ბუტკა გავიკეთე, თავს გავიტან-მეთქი. ამ პერიოდში ჩემი ყოფილი ცოლი და შვილები უსახლკაროები იყვნენ, დღემდე ნაქირავებში არიან. ისინი ამ დროს ურეხში, „საშოფრო სკოლაში“ იყვნენ შესახლებულები, ისინიც გამოყარეს და დარჩნენ გარეთ, ჩემთანაც ცუდი ურთიერთობა ჰქონდათ. მთავრობას მათ დაკმაყოფილებასაც ვთხოვდი, მაგრამ მითხრეს, იმ ოთახზე ეგ გეყოფაო”.

ნოდარ ჭაღალიძეს  აქვს ცნობა, რომ იგი ცალკე კომლად მიიჩნევა, თუმცა საბოლოოდ ისე აღმოჩნდა, რომ მისთვის გამოყოფილი ოთახი მის ვაჟზე გააფორმეს, რომელთანაც მას ურთიერთობა დღემდე არ აქვს:

“ნებისმიერ მეზობელს ჰკითხეთ, რომელიმე თუ იტყვის, ამდენი წელია ეგერ მის სახლთან მე კიბეზე თუ ამიდგამს ფეხი”.

“2006-ში მოვიდა ჩემთან ჩემი ერთ-ერთი ვაჟი, რომელიც ასევე ქუჩაში იყო და დარჩა, მანაც თავისი მოითხოვა, მეც რაღაც მინდაო… საქმე ის არის, რომ ჩვენ აზრებს ვერ ვათანხმებთ, ესეც გაჭირვებამ გვიქნა, მაგრამ ამ დაღვრილ წყალს მე თავს ვეღარ მოვუყრი, რაც მოხდა მოხდა, ავადმყოფი კაცი ვარ… შევეცადე მეორე ოთახის დაკავება, მაგრამ იქ სხვა შეასახლეს, შვილს ვერ ვუთხარი წადი-მეთქი, მან განცხადებაც დაწერა და ისე მომიწყვეს, რომ ეს ყველაფერი ჩემს შვილზე გააფორმეს, მთავრობამ კი მითხრა, ჩვენ მოგეცით და შენ შვილს დაუთმეო. გამოგეძახა პოლიციაო…  ანუ შვილთან უნდა მებრძოლა… ჩვენ ურთიერთობა არ გვაქვს, თორემ შვილია მაინც, გულიდან ვერ მოიგლეჯ. დავრჩი ასე ჩემდაუნებურად დამჯდარი ქოხში”.

“დანაშაულში ნუ ჩამითვლით ამ საქციელს, აქ ასე ხდებოდა მაშინ, მთელი სამი კორპუსი შემოსახლებულები არიან, სხვა წასასვლელი რომ მქონდეს, ჩემითაც წავიდოდი, 17 წელი ცოტა ხომ არ არის ასეთი წვალებით ცხოვრებისთვის”.

ჯარიმა 3000 ლარი მარტოხელა მეზობლის დახმარებისთვის

დაახლოებით 16 წლის წინ ამავე ტერიტორიაზე კიდევ ერთი უსახლკარო ადამიანი, გულნარა კიკნაძე დასახლდა. მარტოხელა დედა მცირეწლოვან ბავშვთან ერთად 2006 წლიდან თავშესაფარს ეძებდა და არსად გაეჩერებოდა – ნოდარ ჭაღალიძის მეზობლად, აქვე მცხოვრები ადამიანების დახმარებით, სხვების საშეშე თუ მშენებლობის ნარჩენებიდან მოგროვებული მასალებით, გულნარამ ხის ქოხი აიშენა. ქოხის მშენებლობის ბოლო ეტაპზე, სახურავთან დაკავშირებით, დახმარება ნოდარ ჭაღალიძეს სთხოვა, რომელსაც სწორედ ამ დროს სურათი გადაუღეს და ის ზედამხედველობის სამსახურმა 3000 ლარით დააჯარიმა.

ნოდარ ჭაღალიძე მიწის დაკანონებისა და ჯარიმის მოხსნის თხოვნით აჭარის მთავრობის სახლთან მივიდა, მაგრამ, როგორც თავად ამბობს, იქ არავინ მოუსმინა”.

„ერთი თვე იქ ვიარე და არ მიმიღო კაცმა. მერე ჯორკო წავიღე და იქ დავჯექი და დამცინეს, მათხოვრად ჩამთვალეს. საერთოდ გამიფუჭდა ნერვები, ტრასაზე დავწექი, თავი უნდა მოვიკლა-მეთქი, ისეთ პირობებში ვიყავი, აღარ მინდოდა სიცოცხლე… წამიყვანეს პოლიციაში გარიდების მიზნით”, – ჰყვება ნოდარ ჭაღალიძე. პოლიციაში უთხრეს, რომ ჯობდა განცხადება დაეწერა და გამგეობაში დაეტოვებინა, გამგეობამ საკუთრების რეგისტრაციისთვის იუსტიციის სახლში გადაამისამართა, მაგრამ განაცხადის გაკეთება აქაც არ მოხერხდა, “ჩამიკეტეს იქ ეს მომსახურება, ასე ჩაკეტილ წრეს ქმნიან, არსად გასაქანი არ არის, შემზღუდეს ყველანაირად”, – ამბობს ის.

ნოდარ ჭაღალიძე, რომლის ვალიც სახელმწიფოს წინაშე უკვე 3 210 ლარია, აღსრულების ბიურომ მოვალეთა რეესტრში დაარეგისტრირა. მართალია, მოვალეთა რეესტრში რეგისტრაცია მას ქონების რეგისტრაციაზე განაცხადის გაკეთებას არ უზღუდავს, მაგრამ აზრს უკარგავს, რადგან მოვალის ქონებაზე (დარეგისტრირების შემთხვევაში) ყადაღა დარეგისტრირდება.

გულნარა კიკნაძე  2007 წლიდან სოციალურად დაუცველია. ამბობს, რომ მას მთავრობამ დახმარების სახით სარეცხი მანქანა გადასცა, რომელიც ჯერ კიდევ ყუთში დევს, რადგან ვერსად აერთებს. “რად მინდა სარეცხი მანქანა, თუ შუქი არ მაქვს. სოციალურად დაუცველი ვარ, 13 000 ქულა მაქვს, ჯანმრთელობა არ მივარგა, გასათბობად მხოლოდ გაზის ბალონი მაქვს, რომელშიც 5 ლარის გაზს ვასხამ… შეშა რომ ვითხოვე, მოდი და წაიღეო. რით წამოვიღო, საჭმელი უფასო სასადილოდან მომაქვს, გვერდი მიჩერდება რეცხვის დროს”, – ამბობს ის.

გულნარა კიკნაძე: არჩევნების დროს რომ ვახსენდებით მხოლოდ, თვითონ ასეთ პირობებში გაათევენ ღამეს? შვილებს ასე აცხოვრებენ? ცოდვა არ ვართ ჩვენ?

გულნარა კიკნაძემ ეკონომიკის სამინისტროს დენის გამოყვანისა და ინდივიდუალური მრიცხველის დაყენების თხოვნით გასული წლის თებერვალში,

სხვისი სახლის ძველი კარი, რომელიც ამ ქოხის ჭერად გამოიყენესპანდემიის დაწყებამდე მიმართა. მთავრობის აპარატიდან საპასუხო წერილი მან 2020 წლის სექტემბერში მიიღო, სადაც მის თხოვნაზე უარს თან ერთვოდა მოთხოვნა, რომ გამოეთავისუფლებინა აჭარის ა/რ საკუთრებად რეგისტრირებული მიწის ნაკვეთი.

გულნარა კიკნაძე: “დენის გამოყვანის თხოვნით რომ მივედი სამინისტროში, მითხრეს, წყალი ვინ მოგცათ, იმასაც ჩაგიჭრითო”.

ნოდარ ჭაღალიძე ამბობს, რომ მას შემდეგ, რაც თბილისის მერმა აფრიკის დასახლებაში ბულდოზერებით დაუნგრია ხალხს სახლები, ბოლო იმედიც გადაეწურა. “აღარ ვიცი, თუ შეიძლება ისევ იმედი მქონდეს, ეს რომ დამინგრიონ, სად წავიდე”, – ამბობს ის.

საქართველოს პრემიერ-მინისტრის გიორგი გახარიას გადადგომასთან დაკავშირებით პირველი კომენტარი გაკეთდა პარტია “ქართული ოცნების” ოფისში. პარტიის თავმჯდომარე, ირაკლი კობახიძე ადასტურებს, რომ ნიკა მელიას დაკავებასთან დაკავშირებით გუნდში ნამდვილად იყო  აზრთა სხვადასხვაობა, თუმცა გიორგი გახარიამ გუნდს არგუმენტები ვერ წარუდგინა.

“გახარია იყო ჩვენი პოლიტიკური გუნდის წევრი. სამწუხაროა, რომ მან მიიღო ასეთი გადაწყვეტილება. ჩვენს პოლიტიკურ გუნდში ნამდვილად იყო დისკუსია ნიკა მელიას მიმართ სასამართლოს გადაწყვეტილების ვადებთან დაკავშირებით. გიორგი გახარიას ჰქონდა  გუნდის სხვა წევრებისგან განსხვავებული პოზიცია ამ საკითხზე.

თუმცა, სამწუხაროდ, არგუმენტები, რომელიც გაამყარებდა მის პოზიციას, ჩვენ ვერ მოვისმინეთ.

წყალგამყოფი იყო საკითხი, სახელმწიფომ უნდა აჩვენოს მყარად თავისი სახე, როგორც სახელმწიფომ, თუ არა. გუნდის დანარჩენი წევრებისთვის ამ კითხვაზე პასუხი იყო ერთმნიშვნელოვანი. ქვეყანა, სადაც არ არის უზრუნველყოფილი კანონის აღსრულება, მით უმეტეს იმ პირობებში, როდესაც დამნაშავეები მას ასეთი უხეში გამოწვევის წინაშე აყენებენ, ვერ შედგება როგორც სახელმწიფო. უფრო მეტიც, სწორედ კანონის სათანადოდ არ აღსრულებაა ის, რაც ხელს შეუწყობს პოლიტიკურ რადიკალიზაციასა და პოლარიზაციას ქვეყანაში. ჩვენი, როგორც ხელისუფლების ვალდებულებაა მყარად და მკაცრად დავიცვათ სახელმწიფოს ღირსება,” – თქვა ირაკლი კობახიძემ.

კობახიძის თქმით, პრემიერ-მინისტრის გადადგომის ფონზე, შს მინისტრმა მიიღო სრულიად ლოგიკური გადაწყვეტილება ნიკა მელიას დაკავების პროცესის დროებით გადადების შესახებ.

“ახლა ჩვენი პოლიტიკური გუნდის ყურადღება მთლიანად იქნება კონცენტრირებული ახალი მთავრობის ფორმირებაზე. მოვუწოდებთ ნიკა მელიას დაემორჩილოს კანონს, წინააღმდეგ შემთხვევაში ხელისუფლება უზრუნველყოფს კანონის აღსრულებას და მის დაპატიმრებას. მთავრობის ფორმირება დაიწყება და დასრულდება კანონით გათვალისწინებულ უმოკლეს ვადებში,” – განაცხადა ირაკლი კობახიძემ.

___

დღეს, 18 თებერვალს, პრემიერმა გიორგი გახარიამ განაცხადა, რომ ის თანამდებობას ტოვებს. გახარიამ თქვა,  არ ეთანხმება მელიას დაპატიმრებას, რადგან ეს დესტაბილიზაციის საფრთხეს ქმნის ქვეყანაში.

„ქართული ოცნების“ ხელმძღვანელის ირაკლი კობახიძის განცხადებით, ახალი მთავრობის ფორმირება დაიწყება ხვალ, 19 თებერვალს და დასრულდება კანონით გათვალისწინებულ უმოკლეს ვადებში.

„სავარაუდოდ, ხვალვე შეიკრიბება პოლიტსაბჭო და დასახელდება პრემიერ-მინისტრობის კანდიდატი“-განაცხადა ირაკლი კობახიძემ დღეს, 18 თებერვალს, სპეციალურ ბრიფინგზე.

საქართველოს პრემიერ-მინისტრმა გიორგი გახარიამ თანამდებობის დატოვების შესახებ განცხადება დღეს, დაახლოებით 11:00 საათზე გააკეთა.

გახარიამ თანამდებობიდან წასვლის მიზეზად  „ნაციონალური მოძრაობის“ ლიდერის, ნიკა მელიას დაპატიმრების საკითხზე გუნდთან შეუთანხმებლობა დაასახელა. „ვერ მივაღწიე ერთობლივ აზრს ამ საკითხთან დაკავშირებით, მივიღე გადაწყვეტილება გადავდგე დაკავებული თანამდებობიდან“,- განაცხადა მან.