აჭარის საზოგადოებრივი ჯანდაცვის ცენტრის ინფორმაციით, კოვიდი დაუდასტურდა ქობულეთის მე-3 საჯარო სკოლის სპორტის მასწავლებელს. სკოლაში სასწავლო პროცესი გრძელდება.
როგორც აჭარის განათლების სამინისტროში „ბათუმელებს“ უთხრეს, მასწავლებლის სკოლაში გადაადგილება და კონტაქტები ვიდეოთვალის მეშვეობით არის გადამოწმებული.
„ეპიდემიოლოგები იყვნენ სკოლაში და დეტალურად შეისწავლეს სიტუაცია. მასწავლებელი სკოლის შენობაში ატარებდა პირბადეს და იცავდა დისტანციას, ასე რომ სკოლა სასწავლო პროცესს შენობაში აგრძელებს“, – გვითხრეს სამინისტროში.
აჭარაში სწავლის განახლების შემდეგ კორონავირუსის 10 შემთხვევა გამოვლინდა სკოლებში, აქედან 7 შემთხვევაში მოსწავლეს დაუდასტურდა კოვიდი, 3 შემთხვევაში კი – მასწავლებელს.
სწავლა აჭარის სკოლებში 2021 წლის პირველ თებერვალს განახლდა. როგორც განათლების სამინისტროში აცხადებენ, მასწავლებლებს ყოველ ორ კვირაში უტარდებათ ტესტირება კოვიდზე.
