საქართველოს პრემიერმინისტრობის კანდიდატად “ქართულმა ოცნებამ” ირაკლი ღარიბაშვილი დაასახელა. გადაწყვეტილების შესახებ პარტიის პოლიტსაბჭოს შემდეგ გახდა ცნობილი.
“დღეს გაიმართა პარტიის პოლიტიკური საბჭოს სხდომა, სადაც მიღებული იქნა გადაწყვეტილება, პრემიერ-მინისტრობის კანდიდატის შესახებ. ჩემი, როგორც პარტიის თავმჯდომარის წარდგინების საფუძველზე, პარტიის პოლიტსაბჭომ ერთხმად მიიღო გადაწყვეტილება, პრემიერმინისტრობის კანდიდატად ირაკლი ღარიბაშვილის დასახელების თაობაზე,” – განაცხადა საგანგებო ბრიფინგზე პარტია “ქართული ოცნების” თავმჯდომარემ ირაკლი კობახიძემ.
პრემიერმინისტრობის კანდიდატად დასახელების შემდეგ, პირველი განცხადება გააკეთა ირაკლი ღარიბაშვილმაც. მან მადლობა გადაუხადა პარტიას.
„ჩვენთვის ყველასთვის ემოციური დღე არის, მიუხედავად ამისა, ჩვენმა გუნდმა სწრაფად მიიღო გადაწყვეტილება. ეს არის უდიდესი პასუხისმგებლობა და რა თქმა უნდა, ეს არის უდიდესი პატივი, რომ დამტკიცების შემთხვევაში, მეორედ გავხდე ამ ქვეყნის პრემიერ-მინისტრი. ჩვენი ქვეყნის წინაშე არსებობს უამრავი გამოწვევა. პირველ რიგში, ეს არის კოვიდპანდემია, ეს არის უმუშევრობა, ეკონომიკური სიდუხჭირე და მოსახლეობის მძიმე მდგომარეობა, რაც ბუნებრივია საჭიროებს სწრაფ გადაწყვეტილებებს და ამისთვის ჩვენ ყველანი ვართ მოწოდებული, რომ სწრაფად მოვუგვაროთ ჩვენს მოსახლეობას პრობლემები.
ბუნებრივია, ჩვენ ძალიან მალე აღვადგენთ წესრიგს და იმ წონასწორობას, რომელიც აუცილებელია ქვეყანაში იმისთვის, რომ ქვეყანამ გააგრძელოს ნორმალურად კონსტიტუციის ფარგლებში ფუნქციონირება,“ – თქვა ირაკლი ღარიბაშვილმა პრემიერმინისტრობის კანდიდატად წარდგენის შემდეგ.
ირაკლი ღარიბაშვილი მოქმედი თავდაცვის მინისტრია, ის ამ თანამდებობას 2019 წლიდან იკავებს. ირაკლი ღარიბაშვილი 2013-2015 წლებში, ერთხელ უკვე იკავებდა საქართველოს პრემიერ-მინისტრის პოსტს.
საქართველოს პრემიერ-მინისტრის პოსტი დღეს, 18 თებერვალს, გახდა ვაკანტური, მას შემდეგ, რაც მოქმედი პრემიერი გიორგი გახარია თანამდებობიდან გადადგა.
