Batumelebi

ტურიზმის ეროვნული ადმინისტრაცია „საქართველოში ტურიზმის სექტორის განვითარებისა და ხელშეწყობის მიზნით“ 2022 წელს სხვადასხვა აქტივობას გეგმავს, რაშიც 12 მილიონამდე ლარს, ტენდერის გარეშე დახარჯავს.

ადმინისტრაციის განცხადებით, ძირითადი პრიორიტეტი საერთაშორისო ბაზრებსა და შიდა ბაზრებზე ქვეყნის ტურისტული პოტენციალის წარმოჩენა იქნება.

„ადმინისტრაცია გეგმავს საერთაშორისო გამოფენა-ბაზრობებზე მონაწილეობის მიღებას, საქართველოს კომპლექსური სარეკლამო კამპანიების წარმოებას, მიზნობრივ ქვეყნებში წარმომადგენლობითი ოფისების გახსნას, პრეზენტაციების გამართვასა და, ზოგადად, სხვადახვა სახის საპრომოციო/საინფორმაციო აქტივობების განხორციელებას; ყოველივე ზემოაღნიშნული მოითხოვს სხვადასხვა საქონლისა და მომსახურების შეძენას, კერძოდ:

• საერთაშორისო გამოფენები – 800 000 ლარი
• სატრენინგო მომსახურება – 300 000 ლარი
• ახალი ამბების სააგენტოების მომსახურება – 16 000 ლარი
• მომსახურებები კვლევისა და ექსპერიმენტული განვითარების სფეროში – 34 000 ლარი
• სხვადასხვა კომერციული მომსახურება და მასთან დაკავშირებული მომსახურებები – 375 000 ლარი
• სასტუმროში შეხვედრებისა და კონფერენციების ორგანიზების მომსახურება – 100 000 ლარი
• საქართველოს საპრომოციო სარეკლამო/მარკეტინგული კამპანიების ორგანიზება მიზნობრივ ბაზრებზე სხვადასხვა ტრადიციული და არატრადიციული საკომუნიკაციო არხების მეშვეობით (ინტერნეტ რეკლამა, რადიო, კინოთეატრები, ბეჭდვითი რეკლამა, გარე რეკლამა და სხვა) – 4 880 000 ლარი;
• ქართული ღვინის შესყიდვა და ადგილზე მიწოდება – 5 000 ლარი
• სახელოვნებო მომსახურებები მიზნობრივ ბაზრებზე – 57 200 ლარი
• სარეკლამო კლიპების გადაღება – 300 000 ლარი;
• მარკეტინგულ და პიარ მენეჯმენტთან დაკავშირებული საკონსულტაციო მომსახურებები – 5 000 000 ლარი;
• ტვირთის გადაზიდვა – 50 000 ლარი
• სასერვერო მომსახურების შეძენა/ინტერნეტ დამხმარე პროდუქტების ან სერვისების შეძენა, CDN ინფორმაციის მიწოდების ქსელის მომსახურება – 20 000 ლარი
• ადმინისტრაციული მომსახურების შესყიდვა – 50 000 ლარი“.

ზემოთ აღნიშნულ მომსახურებებს, რომლის სავარაუდო ჯამური ღირებულება 11 987 200 ლარია, ტენდერის გარეშე შეისყიდიან, ვინაიდან, როგორც ტურიზმის ადმინისტრაცია აცხადებს:

• „მსოფლიში ახალი კორონავირუსის გავრცელების გამო დინამიკურად ცვალებადი ეპიდვითარების პირობებში, საქართველოს შესახებ კომპლექსური სარეკლამო და მარკეტინგული კამპანიების და კვლევის განხორციელებისათვის აუცილებელი საქონელისა და მომსახურებების სახელმწიფო შესყიდვების ვადები და მოცულობა წინასწარ გაუთვალისწინებელ ხასიათს ატარებს;
• აღსანიშნავია ის ფაქტიც, რომ საერთაშორისო კომპანიებს, საკუთარი, ერთმანეთისაგან განსხვავებული და მკაცრად გაწერილი რეგულაციები გააჩნიათ და ისინი ძირითად შემთხვევაში თავად განსაზღვრავენ რეკლამის/პრომოციის დროს, ტექნიკურ თუ ვიზუალურ მოთხოვნებს, მათ შორის ანგარიშსწორების პირობებსა და ვადებს, რაც ხშირ შემთხვევაში ადმინისტრაციისათვის ცნობილი ხდება უშუალოდ ზემოხსენებული სარეკლამო და მარკეტინგული კაპანიების დაწყებამდე მცირე ხნით ადრე.
• ასევე, გასათვალისწინებელია, რომ საქართველოს სახელმწიფო შესყიდვების მოთხოვნების ფარგლებში, უცხოური კომპანიებისთვის გართულებულია ტენდერში მონაწილეობა.
• ამასთანავე, ბევრ ბარიერსა და სირთულეს უკავშირდება იმ სახის მომსახურებების შესყიდვაზე ტენდერის გამოცხადება, რომლებიც მოიცავს კრეატიულ და ინტელექტუალურ კონტრიბუციას.
• ასევე, რიგ შემთხვევებში, მიმწოდებელები, მათ შორის უცხოური მიმწოდებელი კომპანიები და ფიზიკური პირები წინასწარ ითხოვენ მომსახურების საფასურის ჩარიცხვას, მათი მხრიდან კი საბანკო გარანტიის წარდგენა გრძელვადიან პროცედურასთან არის დაკავშირებული“.

მიუხედავად ამისა „გამარტივებული შესყიდვის კონკურენტული წესით განხორციელების მიზნით ადმინისტრაცია უზრუნველყოფს, სპეციალური კომისიის შექმნას, რომელიც 100 000 ლარის და მის ზემოთ ღირებულების სახელმწიფო შესყიდვების განხორციელებისას, მიმწოდებლის არჩევისას თავის გადაწყვეტილებას საფუძვლად დაუდებს ისეთ მონაცემებს როგორიცაა დაბალი ფასი, მიმწოდებლის რეპუტაცია, ხარისხი, იდეა, ინოვაცია, გამოცდილება და ა.შ.“- აცხადებს ადმინისტრაცია.

—

საქართველოს ტურიზმის ეროვნული ადმინისტრაცია 2022 წლის მანძილზე კონკრეტულად სოციალურ ქსელ Facebook-ზე განთავსებული პოსტების რეკლამირებისთვის [დასპონსორებაში] 300 ათასი ლარის დახარჯვას გეგმავს:

ტურიზმის ადმინისტრაცია Facebook-ზე რეკლამაში წელს 300 ათას ლარს დახარჯავს

See more

აჭარაში ბოლო 24 საათის განმავლობაში კორონავირუსის 903 ახალი შემთხვევა დადასტურდა, გარდაიცვალა 6 ადამიანი.

stopcov.ge-ის ინფორმაციით, 20 იანვრის მდგომარეობით, აჭარაში კოვიდკლინიკებში მკურნალობს 612 პაციენტი, მათ შორის, 133 მძიმეა, ხოლო ხელოვნური სუნთქვის აპარატზეა 48 პაციენტი.

აჭარაში კლინიკურ სასტუმროებში მოთავსებულია 554 პაციენტი, საკარანტინე სივრცეშია 6 ადამიანი.

 

მთავარი ფოტო: ბათუმი/20.01.2022

ბოლო 24 საათის განმავლობაში კორონავირუსის 6351 ახალი შემთხვევა დადასტურდა, გარდაიცვალა 27 პაციენტი

stopcov.ge-ზე გამოქვეყნებული ინფორმაციის მიხედვით, დღეს ქვეყანაში გამოვლენილი ინფიცირების 6 351 ახალი შემთხვევიდან:
თბილისში გამოვლენილია 3 742 შემთხვევა, აჭარაში – 903, იმერეთში – 510, ქვემო ქართლში – 196, შიდა ქართლში – 238, გურიაში – 92, სამეგრელო – ზემო სვანეთში – 211, კახეთში -187, მცხეთა-მთიანეთში – 130, სამცხე-ჯავახეთში – 134, რაჭა-ლეჩხუმსა და ქვემო სვანეთში -8.

დავით საგანელიძე ერთ-ერთი ყველაზე მაღალანაზღაურებადი თანამდებობის პირია საქართველოში. ის სააქციო საზოგადოება [სს] საპარტნიორო ფონდს ხელმძღვანელობს. ქონებრივი დეკლარაციების მიხედვით, დავით საგანელიძე გამორჩეული მაღალანაზღაურებადი თანამდებობის პირია იმ მხრივაც, რომ მისი მაღალი ხელფასი ბოლო წლებში კლებადიც არის.

კლება კი დაიწყო მას შემდეგ, რაც საგანელიძის ხელფასზე თითქმის ყველა მედიამ დაწერა. მოგვიანებით მან ამაზე კომენტარიც გააკეთა და თქვა, რომ ყოველთვიური ხელფასის სახით 16 000 ლარზე მეტს არ იღებს.

საპარტნიორო ფონდის ხელმძღვანელის მიერ შევსებული ბოლო ქონებრივი დეკლარაციის მიხედვით, რომელიც 2020 წლის მონაცემებს ასახავს, საგანელიძის  ყოველთვიური ანაზღაურება 17 678 ლარია. 2020 წელს შევსებული დეკლარაციით კი, 2019 წელს მისი ყოველთვიური შემოსავალი 19 000 ლარი იყო. უფრო ადრე, 2018 წელს კი, ანაზღაურების სახით საგანელიძე თვეში 20 000 ლარს იღებდა.

2021 წელს შევსებული დეკლარაციის მიხედვით, საგანელიძეს 2020 წელს, 12 თვეში, ხელფასის სახით 212 143 ლარი მიუღია. 2020 წელს შევსებული დეკლარაციით, მისი წლიური სახელფასო შემოსავალი 237 231 ლარი იყო. 2019 წლის დეკლარაციით, საგანელიძემ 2018 წელს 294 000 ლარი გამოიმუშავა. 2018 წლის დეკლარაციით, საპარტნიორო ფონდის ხელმძღვანელს 2017 წელს 336 000 ლარი მიუღია.

ზემოთ მოცემული მონაცემების მიხედვით, საპარტნიორო ფონდის ხელმძღვანელს 2017 -2020 წლებში, ხელფასი სახით, მილიონზე მეტი ლარი აქვს მიღებული.

დავით საგანელიძე საპარტნიორო ფონდს 2015 წლიდან ხელმძღვანელობს.  მისივე ქონებრივი დეკლარაციების მიხედვით, საგანელიძეს მნიშვნელოვანი უძრავი ქონებაც დაუგროვებია, მათ შორისაა 65 კვ.მ ბინა თურქეთის საკურორტო ქალაქ კარჩიჯაკში, ხმელთაშუა ზღვის სანაპიროზე. ამ ბინაში მას 82 00 ევრო გადაუხდია.

ისევე, როგორც შემოსავლები, მაღალია მისი ხარჯებიც, დავით საგანელიძემ 2020 წელს 50 000 ლარი მხოლოდ სარემონტო სამუშაოებში დახარჯა, 60 000 ლარი კი მის მეუღლეს, რომელსაც საგანელიძის დეკლარაციების მიხედვით საკუთარი შემოსავალი არ აქვს, საქველმოქმედო მიზნებისთვის დაუხარჯავს.

მაღალხელფასიანებს შორისაა საქართველოს რკინიგზის დირექტორიც – დავით ფერაძის სახელფასო შემოსავალი ერთ წელში 219 141 ლარია. ეს იმას ნიშნავს, რომ საქართველოს რკინიგზის დირექტორი ხელფასის სახით ყოველთვიურად 18 000 ლარზე მეტს იღებს.

მისივე ქონებრივი დეკლარაციის მიხედვით, რომელიც 2020 წლის მონაცემებს ასახავს, დავით ფერაძე სამი სახის ხელფასს იღებს – ერიცხება როგორც რკინიგზის დირექტორის ხელფასი, ასევე ანაზღაურება ორი კომპანიის სამეთვალყურეო საბჭოს წევრობისთვის. ამ კომპანიების წილებს, ასივე პროცენტით,  საქართველოს რკინიგზა ფლობს.

დავით ფერაძე საქართველოს რკინიგზის დირექტორის თანამდებობაზე  2017 წლიდან მუშაობს. მანამდე ის  საქართველოს თანაინვესტირების ფონდში მუშაობდა, შპს „მტკვარი ჰესის“ დირექტორის პოზიციაზე. უფრო ადრე – 2007-2011 წლებში კი, ის „ქართუ ჯგუფის“ თანამშრომელი იყო.

დავით ფერაძეს ბოლო წლებში შეუძენია ხეხილის სანერგე მეურნეობა, ფლობს რამდენიმე მიწის ნაკვეთს და სხვა უძრავ ქონებას, რომელიც უფრო ადრე 2008-2017 წლებში აქვს შეძენილი. მისი მეუღლე შპს „ზიპლაინ კაუკასუსის“ 40 პროცენტის მფლობელია. თუმცა ბოლო დეკლარაციების მიხედვით, მას კომპანიიდან შემოსავლები არ აქვს. აქვს იპოთეკური სესხიც და მის დასაფარად ყოველწლიურად 30 000-ზე მეტ აშშ დოლარს იხდის.

12 910 ლარია სემეკის თავმჯდომარის დავით ნარმანიას თვიური ხელფასი. გარდა ამისა, მან ქონებრივ დეკლარაციაში, რომელიც 2020 წლის მონაცემებს ასახავს,  საგანმანათლებლო საქმიანობით გამომუშავებული თანხა, ჯამში, 27 000 ლარი შეიტანა, ასევე ასახა სასოფლო-სამეურნეო პროდუქციის რეალიზაციით მიღებული შემოსავალი – 16 000 ლარი.

საერთო ჯამში, 2020 წელს ნარმანიას ხელფასის სახით 182 252 ლარი მიუღია. ამას ემატება სოფლის მეურნეობის პროდუქტის რეალიზაციით გამომუშავებული თანხა.

ბოლო წლებში სემეკის თავმჯდომარემ  ძვირადღირებული ქონება შეიძინა – 2020 წელს იყიდა მიწის ნაკვეთი და მშენებარე სახლი თბილისში, გოდერძი ჩოხელის ქუჩაზე: ნაკვეთში 180 000 აშშ დოლარი, ხოლო მშენებარე სახლში 249 000 ლარი გადაიხადა.

უჩა უჩანეიშვილი სს „საქართველოს სახელმწიფო ელექტროსისტემის“ გენერალურ დირექტორად 2021 წელს დაინიშნა, მანამდე ის ამავე სამსახურის  მმართველთა საბჭოს თავმჯდომარე იყო. 2021 წელს შევსებული ქონებრივი დეკლარაციის მიხედვით, მას 2020 წელს სახელფასო შემოსავლის სახით 182 240 ლარი მიუღია.

უჩა უჩანეიშვილი სს ,,საქართველოს სახელმწიფო ელექტროსისტემის“ გენერალურ დირექტორად 2021 წელს დაინიშნა. დეკლარაციის მიხედვით, მას 2020 წელს ხელფასის სახით 182 240 ლარი მიუღია, რაც თვეში 15 186 ლარია.

მაღალანაზღაურებადია საქართველოს კომუნიკაციების ეროვნული კომისიის თავმჯდომარის თანამდებობაც, რომელსაც 2017 წლიდან კახა ბექაური ხელმძღვანელობს. 2020 წელს მან ამ თანამდებობაზე 188 585 ლარი გამოიმუშავა, რაც თვეში 15 715 ლარია. ეს თანხა ბექაურის 2019 წლის შემოსავლებთან შედარებით ნაკლებია, 2019 წელს ბექაურის 202 764 ლარი გამოუმუშავებია – თვეში 16 897 ლარი.

თუმცა ეს თანხა არაფერია იმ შემოსავალთან შედარებით, რომელიც 2020 წელს ბექაურმა შემოსავლის სახით შპს „ორი ნაბიჯიდან“ მიიღო –  ეს თანხა 4 მილიონ 299 570  ლარია. 2019 წელს ამ საწარმოდან ბექაურს 600 000 მეტი ლარი აქვს შემოსავლის სახით მიღებული.

სახელფასო შემოსავლის სახით 2020 წელს გაცილებით მეტი მიუღია კახა ბექაურის მეუღლეს, ეკატერინე ბერიძეს – მისმა შემოსავალმა 287 027 ლარი შეადგინა, რაც თვეში 23 918 ლარია. ეკატერინე ბერიძე „ჯორჯიან უოთერ ენდ ფაუერის“ კომუნიკაციების დირექტორია. გარდა ამისა, ის იმავე თანამდებობაზე შპს „რუსთავის წყალსა“  და „მცხეთის წყალში“ მუშაობს.

მაღალანაზღაურებად თანამდებობაზე მუშაობს ეროვნული ბანკის პრეზიდენტი კობა გვენეტაძეც, იგივე შეიძლება ითქვას ვიცე-პრეზიდენტ არჩილ მესტვირიშვილზე.

კობა გვენეტაძის, როგორც ეროვნული ბანკის პრეზიდენტისა და საბჭოს წევრის წლიური შემოსავალი 2020 წელს 210 155 ლარი იყო, რაც თვეში 17 512 ლარია.

ეროვნული ბანკის ვიცე-პრეზიდენტის არჩილ მესტვირიშვილის შემოსავალი კი, შარშან 2010 067 ლარი იყო, რაც თვეში 17 505 ლარია.

თითქმის იდენტურია საბჭოს კიდევ ერთი წევრისა და ვიცე-პრეზიდენტის, პაპუნა ლეჟავას შემოსავალი.

სოლიდური ანაზღაურება დაენიშნა საპენსიო სააგენტოს დირექტორსაც, გიორგი დანელიას ხელფასი თვეში 12 500 ლარია.

საპენსიო სააგენტოს დირექტორად  გიორგი დანელია 2020 წლის 15 დეკემბრიდან მუშაობს, მანამდე ის საპარტნიორო ფონდის აღმასრულებელი დირექტორის მოადგილე იყო.

„როგორ და რის საფუძველზე გაიაფდება მედიკამენტები? თურქეთი, რომელიც ახლაც გვაწვდის მედიკამენტების 25 %-ს, უცებ გადაწყვეტს, რომ უნდა მოგვაწოდოს უფრო იაფად? ვინ გადაუხდის კომპანიებს ამ სხვაობას? წარმოიდგინეთ, ვარ კომპანია, რაღაც მედიკამენტს ვაწარმოებ, რომელსაც საქართველოში ვყიდი 20 დოლარად. უცებ მეუბნებიან ათ დოლარად უნდა გაყიდო. რატომ უნდა გავყიდო ათ დოლარად? ვინ იქნება დისტრიბუტორი ამ მედიკამენტების?“ – ეს და სხვა მრავალი კითხვა საქართველოს მთავრობასთან აქვს ჯანდაცვის მენეჯმენტის ექსპერტს, პარტია „ლელოს წევრ“ ვატო სურგულაძეს.

რამდენად რეალურია წამლების გაიაფება და რა მექანიზმები აქვს შემუშავებული ამისათვის სახელმწიფოს, „ბათუმელები“ ამ თემაზე ვატო სურგულაძეს ესაუბრა.

• ბატონო ვატო, პრემიერმა თქვა, რომ „თურქეთის ბაზარი გაიხსნება და წამლები გაიაფდება“. ფარმაცევტული კომპანიების წარმომადგენელთა ასოციაციის ინფორმაციით კი, საქართველოში იმპორტირებული მედიკამენტების დაახლოებით მესამედი ისედაც თურქეთზე მოდის. აქედან გამომდინარე მინდა გკითხოთ, რა იგულისხმება ბაზრის გახსნაში და რამდენად რეალურია წამლების გაიაფება?

ნამდვილად ვეცადე გამეგო, რას ნიშნავს თურქული ბაზრის გახსნა, მაგრამ ვერ გავიგე პრემიერ-მინისტრის სიტყვა – უნდა გავხსნათ თურქეთთან ბაზარი. [წამლების] მესამედი თუ არა, დაახლოებით 20-25 % მაინცაა თურქული წარმოების. საქართველოში ქართული წარმოების მედიკამენტი სულ 13-14 % -ია. დარჩენილიდან მეოთხედი უჭირავს თურქულ ბაზარს. მეორეც – რატომ უნდა გააიაფოს ამან მედიკამენტები, მაშინ, როდესაც ისედაც შემოდის თურქეთიდან [წამალი].

მედიკამენტი ყველგან ძვირდება, მით უმეტეს თურქეთში, რომელსაც წელს ეკონომიკურად პრობლემური წელი ჰქონდა, 18 %-მდე აქვს ინფლაცია. მაგრამ იქ სახელმწიფო უკეთებს ე.წ. თანადაფინანსებას, ამიტომაც არ იზრდება მომხმარებლისთვის აფთიაქში წამლის ფასი – სუბსიდირება ხდება სახელმწიფოს მხრიდან.

ათ მილიარდამდე დოლარი ტრიალებს თურქულ ბაზარზე წამლის წარმოებაში, შექმნეს ძლიერი გიგანტები, რამაც ევროპელები და ამერიკელები, შეიძლება ვთქვათ, აიძულა, რომ მიეცათ საშუალება თურქეთში ეწარმოებინათ საკუთარი ლიცენზიით ეს მედიკამენტები.

ეს არის განცხადება – გავხსენით ბაზარი. მე მართლა ძალიან ვეცადე მომეპოვებინა რამე პრეზენტაციის სახით მაინც, რა მექანიზმი გააიაფებს. თუ აქამდე შემოდიოდა თურქული წამალი და ძვირი ღირდა, როგორ შემოვა ახლა იაფად? ვერც ვერავინ ამიხსნა, ვისაც მივმართე, ვერც ვერანაირი მექანიზმი, როგორ და რის საფუძველზე გაიაფდება, ვერ ვნახე.

როდესაც იწყებოდა „ქართული ოცნების“ ეპოქა, შეიქმნა ასეთი კომპანია – „ჰუმანიტი“, სადაც საპარტნიორო ფონდმა 30 მილიონი გადარიცხა, იაფი წამლების შემოტა-წარმოებისთვის. კომპანია გაქრა, დაიკარგა.

არ გამოვრიცხავ, რომ ახლაც მოხდება იგივე. რისკებს ხომ ვითვლით? ვინ გადაუხდის იმ სხვაობას თურქულ კომპანიებს? ვინ შემოიტანს ამ მედიკამენტებს? რომელ აფთიაქებში დაიდება?

ეს ძალიან გაუმჭვირვალე საკითხია და მიმაჩნია, რომ აქ არის უფრო პოლიტიკური პოპულიზმი, ვიდრე რეალური საქმე. პირადად მე მოხარული ვიქნები, თუკი მედიკამენტი გაიაფდება.

მეორე მომენტიც არსებობს, რა ხარისხის მედიკამენტი შემოვა. მაგალითად, ავიღოთ ცეფტრიაქსონი. ერთი ღირს ხუთი ლარი, მეორე – 19 ლარი, მესამე – 29 ლარი. ერთი და იმავე დანიშნულების მედიკამენტია, ერთნაირი გრამაჟით, ყველაფერი ერთნაირია, მაგრამ ფასებია სხვადასხვა. ის 5-ლარიანი რეალურად ძალიან დაბალი ხარისხის მედიკამენტია და თერაპევტულ ეფექტს არ იძლევა.

• თურქეთის სახელმწიფო ასუფსიდირებს მედიკამენტებს და ამის გამოა იქ წამალი იაფი მოქალაქეებისთვის, მაგრამ სუფსიდირება, წესით, იმპორტზე არ გავრცელდება. ეს მოცემულობა რა გავლენას იქონიებს თურქეთიდან საქართველოში შემოტანილი მედიკამენტების ფასზე?

წარმოიდგინეთ, მე ვარ თურქეთის სახელმწიფო, სერიოზული ეკონომიკური პრობლემები მაქვს ქვეყანაში, ამ დროს რატომ უნდა დავუსუბსიდირო საქართველოს მედიკამენტები?

სახელმწიფო გადაუხდის ამ თანხას? მაგრამ ბიუჯეტში მე ვერ ვნახე ასეთი ჩანაწერი, სადაც იქნებოდა ამაზე საუბარი.

მექანიზმი არსად ჩანს. მე რომ თურქეთი ვარ, რატომ უნდა მივცე საქართველოს იაფად და რატომ უნდა ვუხადო მისი მოქალაქის სუბსიდირება – ხომ ლოგიკური შეკითხვაა არა. გვაჩვენონ ეს მექანიზმი, რის საფუძველზე გაიაფდება მედიკამენტები. მე მომხრე ვარ, თუ ასეთი რამ მოხდება საქართველოში.

საქართველოში სამი დიდი კომპანია არსებობს – „ავერსი“, „პსპ“ და „გეფა“. 82% უკავიათ ბაზრის, პრაქტიკულად ოლიგოპოლია აქვთ შექმნილი. ასეთ რთულ სიტუაციაში, როდესაც კარტერული გარიგება აქვთ ერთმანეთში, არავითარი კონკურენტები არ არიან ერთმანეთის, იცით რა მოხდება? თუ ყველა რისკი კარგად არ გაითვალა, შეიძლება გაქრეს ხარისხიანი მედიკამენტები ბაზრიდან, რომელიც შემოდის შვეიცარიიდან, დიდი ბრიტანეთიდან და სხვა ქვეყნებიდან. ეს საკმაოდ დიდი დარტყმა იქნება მოსახლეობისთვის.

• თქვენ ახსენეთ საფრთხე, რომ შეიძლება აქ შემოსული მედიკამენტები იყოს დაბალი ხარისხის. როგორც ვიცით, თურქეთი ძალიან მკაცრად აკონტროლებს თავის ქვეყანაში წამლის ხარისხს.

ახლახან ჩემი მეგობარი გაფრინდა გერმანიაში. იცით, რა დავაბარე? ასპირინი. აქაც იყიდება, მაგრამ არავითარი ეფექტი იმ ასპირინს არ აქვს. მეტი არაფერი არ გინდაო? მეთქი – არა, გერმანიაში მიყიდე ასპირინი.

ზუსტად იმავე ყუთშია, მაგრამ გერმანიიდან  ჩამოტანილს და აქ ნაყიდს აბსოლუტურად სხვადასხვა მოქმედება აქვს.

ამიტომ მნიშვნელოვანი იქნება ხარისხის შემოწმება. ჩვენ არ გვაქვს ჯერჯერობით ლაბორატორია, რომ შევამოწმოთ. მუდმივი კონტროლი უნდა იყოს – რა პარტია შემოვიდა და როგორ შემოვიდა. თურქული წამლები მაღალი ხარისხის რომ იყოს, ევროპაშიც გავიდოდა, მაგრამ ევროპაში რატომღაც არ არის გასული.

რა თქმა უნდა, არსებობს მაღალი დონის თურქული მედიკამენტებიც, მაგრამ ასევე არსებობს დაბალი ხარისხის მედიკამენტებიც.

• როგორ უნდა შემოწმდეს ხარისხი?

ძვირია. ამას სჭირდება რეფერალური ლაბორატორია, რომელიც ჯანდაცვის ყოფილმა მინისტრმა, ეკატერინე ტიკარაძემ დაანონსა, რომ შემოდგომაზე გვექნება. ეს ლაბორატორია ახლა არ გვაქვს. როცა რაღაც გვჭირდება, სამხარაულის ცენტრში მიდიან, მაგრამ იქ ყველა მედიკამენტს ვერ ამოწმებენ, ამიტომ გვიწევს გადაგზავნა ლიტვაში, ლატვიაში, შვეიცარიაში. ერთი მედიკამენტის ქიმიური პარტიის შემოწმება 25 ათას ევრომდე ჯდება. არც ისე იაფი სიამოვნებაა. თუ გააკეთეს ლაბორატორია, მაშინ ეს კარგი იქნება.

ჩვენთან ბაზარი არის გაჯერებული უხარისხო მედიკამენტებით – ინდოეთი ავიღოთ, უკრაინა, რუსეთი, ეგვიპტე, უამრავი უხარისხო მედიკამენტია. ამას ვერ ვაკონტროლებთ და იმას როგორ გადავაკონტროლებთ, ცოტა რთული საკითხია.

მოქალაქეების ჯანდაცვის ხარჯებიდან 40 %-მდეა მედიკამენტების ფული. ეს უზარმაზარი რიცხვია და ნორმალურ ქვეყანაში 12%-ს არ სცილდება.

იგივე თურქეთში ძალიან პატარაა ჯიბიდან მედიკამენტებზე გადახდილი თანხა. ამასთან, თუ წამალი ღირს 5 დოლარი, 2 დოლარი ადევს ფასი და იმ 3 დოლარს მწარმოებელს უხდის სახელმწიფო ბიუჯეტი. ანუ სუბსიდირებული სისტემაა.

• უხარისხო მედიკამენტების შემოტანის რისკები რომ მოიხსნას, რა უნდა გაკეთდეს?  

პირველი – როცა შემოდის მედიკამენტი, უნდა შემოწმდეს ძალიან კარგად, დოკუმენტაცია სრულყოფილი უნდა იყოს. ამასთან, პირველ ჯერზე შეიძლება მედიკამენტი შემოიტანონ ხარისხიანი, მაგრამ შემდეგ პარტიებში რა მედიკამენტი შემოვა, ესეც გასაკონტროლებელია.

შემთხვევითობის პრინციპით ამოვიღებთ, შევამოწმებთ, ამოვიღებთ – შევამოწმებთ, მუდმივად უნდა იყოს იმის შიში, კარგი გაგებით, რომ შემოტანილი წამლები გაკონტროლდეს, რომ არ იყოს დამოკიდებულება – „შევიტან საქართველოში, მაინც ყველაფერს დალევენ“.

ჩვენთან, გარდა იმისა, რომ ხდება ქაღალდების და დოკუმენტაციის რეგისტრაცია, იმის იქით ბაზარი არ კონტროლდება. ჩვენთან ხარისხის კონტროლი პრაქტიკულად არ არსებობს.

მით უმეტეს ადამიანების შემოსავლიდან გამომდინარე, ძალიან ბევრი ყიდულობს იაფ მედიკამენტს, რომელიც ძალიან ხშირად არ არის ეფექტური.

• სააფთიქო ქსელების მფლობელები, მედიკამენტების მწარმოებლები და სამედიცინო დაწესებულებები ძირითადად რამდენიმე გავლენიან ჯგუფს ეკუთვნის საქართველოში. სავარაუდოდ თურქეთიდან წამლებსაც ისინი შემოიტანენ. რა აიძულებს მათ, რომ იმაზე იაფად გაყიდონ წამალი, ვიდრე ახლა ყიდიან?

რეგულაცია უნდა ჰქონდეთ შემოტანისას, როგორც ბრიტანეთში ხდება – რეფერენტული სისტემა არსებობს, ანუ მე ვსწავლობ ბაზარს, ირგვლივ რა ხდება და ვამბობ – ეს მედიკამენტი ამაზე მეტად არ გაიყიდება. აქ უკვე ლიმიტები და შეზღუდვები შემოვა, რასაც აქვს თავის საშიშროება, რომ წავა ჩემოდნებით შემოტანა. რუსებმა და აზერბაიჯანელებმა შემოიღეს ლიმიტი, აი, ამაზე მეტი არ შეიძლება ღირდესო – შედეგად ბაზრიდან გაქრა ხარისხიანი მედიკამენტი, არ უღირდათ იმის შეტანა.

ეს ბაზრის შეზღუდვაა და ფარმაცევტული ბაზარი არის უძლიერესი – ის ყოველთვის იპოვის შეზღუდვებიდან გამოსავალს.

[დავით] სერგეენკოს დროს მოხდა ასეთი რამ – შემოტანილი მედიკამენტის მარჟა 15%-ზე მეტი არ უნდა ყოფილიყო. თუ ყიდულობდა უცხოეთში 100 ლარად, 115 ლარზე მეტად ვერ გაყიდდა. იცით, რა ქნეს კომპანიებმა? იქ ჩასვეს თავის წარმომადგენლები, ვთქვათ, ჩეხეთში ან სლოვენიაში. ის წარმომადგენელი ყიდულობდა ქარხნიდან და მერე თავისავე კომპანიას აძლევდა უფრო მაღალ ფასში. იმის ნაცვლად, რომ ფასები შემცირებულიყო, ფასები გაიზარდა. ძალიან ბევრი რისკია ამასთან დაკავშირებული. რამდენად წამოვა ამაზე ეს სამი გიგანტი (ავერსი, პსპ, გეფა)? – პრაქტიკულად ჩვენ ვეუბნებით, რომ სხვა მედიკამენტები აღარ გაიყიდება და მისი მოგების მარჟა დაიკლებს. ფარმაცევტული ბიზნესი მსოფლიოში მეორეა შემოსავლით იარაღით ვაჭრობის შემდეგ, ზოგჯერ ძალიან ბინძურადაც იქცევა.

გერმანიაში ძალიან საინტერესო კანონია – მწარმოებელ ქარხანას უფლება არ აქვს, ჰქონდეს თავისი სადისტრიბუციო კომპანია. სადისტრიბუციო კომპანიას არ აქვს უფლება, ჰქონდეს თავისი აფთიაქი. აქ კომპანია შემომტანიც არის, მწარმოებელიც, დისტრიბუტორიც, ამავე დროს საბითუმო ვაჭრობის ბაზაც აქვს და საცალო ვაჭრობის აფთიაქებიც.

თურქეთიდან წამალს შემოვიტან და ამიტომ წამალი გაიაფდება, ძალიან გულუბრყვილო იმედებია. ეს ჩემი აზრია და ღმერთმა ქნას, რომ რეალურად გაიაფდეს მედიკამენტი.

• ეს ხომ არ გააჩენს ახალ დისტრიბუტორებს?

მე მაქვს მაგალითები, როგორ ჩაყლაპოს პატარა კომპანიები და წაიყვანოს წაგებაზე. ასეთი მექანიზმებიც არსებობს.  მედიკამენტები ძვირია და მოდი, ახლა გავაიაფებ, ასე არ ხდება. ამას საკმაოდ სერიოზული მუშაობა და რისკების გათვლა უნდა, როცა გაქვს ასეთი ოლიგოპოლია მედიკამენტებში.

• მაგალითი ხომ არ შეგიძლიათ გვითხრათ, როგორ შეუძლიათ დიდ კომპანიებს დააზიანონ პატარა აფთიაქები?

დიდი ყიდულობს აბსოლუტურად ყველაფერს და იმას შემდეგი პარტია რომ შემოაქვს, იმაზე დემპინგურ ფასს აკეთებს. შენი წამალი აღარ იყიდება. მაგალითად, ყიდი 2 ლარად წამალს. მოდის დიდი ფარმაცევტული ფირმა და ყიდულობს ყველაფერს, რაც გაქვს შემოტანილი. შენ მიდიხარ, თავიდან შემოგაქვს 2 ლარად, იმან კიდევ თავის აფთიაქში 1.90-ად დადო. შენი კომპანია ხვდება პრესში.

ოლიგოპოლიური ბაზარი, როგორც წესი, არ უშვებს სხვა მოთამაშეებს. სხვადასხვა მეთოდი არსებობს, როგორ არ შემოუშვა ახალი მოთამაშე. აი, აქ არის საჭირო ზუსტად სახელმწიფოს ანტიმონოპოლიური სააგენტო, ფასების რეგულირების სააგენტოს აქტიურობა. ის სინამდვილეში არაფერს აკეთებს ამისთვის.

თურქეთში ძალიან საინტერესო მომენტია. ვთქვათ, რომელიმე ფარმაცევტულ კომპანიას თუ გააქვს თავისი მედიკამენტი გამოფენაზე, პირობითად, 1000 ევრო თუ ღირს ამ გამოფენაზე გატანა, 800 ევროს გადაუხდის სახელმწიფო. მაქსიმალურად ცდილობენ ბიზნესის წახალისებას, ბიზნესზე მუშაობას და არა ისე, როგორც საქართველოში.

საქართველოში ხელი უნდა შევუწყოთ წარმოებას, რაც შეიძლება მეტი, ოღონდ ხარისხიანი მედიკამენტი უნდა ვაწარმოოთ. მით უმეტეს, ის მედიკამენტები, რომლებიც ყველაზე მოხამარებადია. გასაგებია, რომ არის მედიკამენტი, რომელსაც ჩვენ ვერ გამოვუშვებთ, ამის გამოცდილებაც არ გვეყოფა, თავისიო ტექნოლოგიები აქვს, პატენტი ძვირი ღირს. თურქეთს იმიტომ აქვს იაფი მედიკამენტი, რომ აქვს ადგილობრივი წარმოება, რომელსაც ასუბსიდირებს.

ხულოდან კურორტ გოდერძამდე გზა ისევ მოუწყობელია და ისევ მაღალი გამავლობის მანქანებით შეიძლება გადაადგილება. ხელისუფლების მიერ წლების განმავლობაში არაერთხელ გაცემული დაპირება, რომ ხულო-ზარზმის გზას გააკეთებდნენ, ამ დრომდე არ შესრულებულა. როგორც ირკვევა, პირობა ვერც ახლა სრულდება.

საავტომობილო გზების დეპარტამენტის პრესცენტრის ინფორმაციით, გზა კურორტ გოდერძიმდე 2023 წელს იქნება. ამ უწყების ოფიციალური გვერდის ინფორმაციით კი, სამუშაოები 2022 წელს ანუ მომავალი ზამთრის დადგომამდე უნდა დასრულებულიყო.

აქ გზის რეაბილიტაციაზე 2020 წლამდე კომპანია „ტოდინი“ მუშაობდა, თუმცა ამ კომპანიამ ვალდებულება არ შეასრულა. „სინოჰიდროც,“ რომელმაც მორიგი ტენდერი მოიგო და მასთან ხელშეკრულება 2020 წელს გაფორმდა, ასევე ვერ ასრულებს ვალდებულებას – სახელმწიფო აუდიტის ანგარიშის მიხედვით, ხულო-ზარზმის გზის მშენებლობისთვის 2021 წლის 6 თვეში 4,5 მილიონი ლარის სამუშაოები უნდა შესრულებულიყო. 5 თვის მონაცემებით მხოლოდ 199 ათასი ლარის სამუშაო შესრულდა, ეს კი გეგმის მხოლოდ 4.4 პროცენტია.

ბათუმი-ახალციხის საავტომობილო გზის ხულო-ზარზმის 42-კილომეტრიანი მონაკვეთის სარეკონსტრუქციო სამუშაოებს კომპანია „სინოჰიდრო“ ასრულებს. პროექტის ჯამური ღირებულება 95 689 302 ლარია.

რა ეტაპზეა გზის რეაბილიტაცია ამჟამად?

„ამჟამად დიდთოვლობის გამო ხულო-ზარზმის პროექტის სამუშაოები დროებით შეჩერებულია, ხელსაყრელი კლიმატური პირობების დადგომისთანავე სამუშაოები განახლდება. თავად პროექტის დასრულება ხელშეკრულების მიხედვით, დაგეგმილია 2023 წელს,“ – მოგვწერეს გზების დეპარტამენტის პრესცენტრიდან.

რატომ გადაიწია ეს ვადა 2023 წლამდე? – პრესცენტრში გვითხრეს, რომ ინფორმაცია ოფიციალურ გვერდზე გასაახლებელია.

გზების დეპარტამენტში ასევე გვითხრეს, რომ კომპანია „ტოდინს“, რომელსაც 2020 წლამდე უნდა გაეკეთებინა ბათუმი-ახალციხის გზა, საბანკო გარანტიით გათვალისწინებული 11 მილიონი ლარის გადახდა დაეკისრა.

„ტოდინს იმდენი თანხა ჰქონდა ჩარიცხული, რამდენის სამუშაოებიც ჰქონდა შესრულებული,“ – მოგვწერეს გზების დეპარტამენტიდან.

რატომ ვერ შეასრულა ვალდებულებები „ტოდინმა“ და რა უშლის ხელს დღეს „სინოჰიდროს“ გზის გაკეთებაში? – გზების დეპარტამენტის პრესცენტრში გვითხრეს, რომ კითხვებზე პასუხის მისაღებად საჯარო ინფორმაცია უნდა გამოვითხოვოთ.

ამ ეტაპზე ხულოდან კურორტ გოდერძიზე ძირითადად მაღალი გამავლობის მანქანებით ადიან. მოძრაობს მიკროავტობუსიც, თუმცა ძირითადად იმ შემთხვევაში, როცა გზა თოვლისგან კარგადაა გაწმენდილი.

შესაძლებელია ხულოს ცენტრიდან ტაქსის დაქირავებაც. ფასი შეთანხმებაზეა დამოკიდებული. მაგალითად, მგზავრობა „ვილისით“, რომლითაც კურორტ გოდერძიზე ასვლა შედარებით მარტივად და უსაფრთხოდ არის შესაძლებელი, 150 ლარი ღირს.

___

ვრცლად:

როცა გარეთ 2 მეტრი თოვლია – ამბები გოდერძიდან და დანისპარაულიდან | ფოტო/ვიდეო

See more

19 იანვრის მონაცემებით, საქართველოში ბოლო 24 საათში დადასტურდა კორონავირუსის 8728 ახალი შემთხვევა.

ამავე პერიოდში გარდაიცვალა 43 ადამიანი.

დღეს ქვეყანაში გამოვლენილი ინფიცირების 8 728 ახალი შემთხვევიდან თბილისში გამოვლენილია 4 797 შემთხვევა, აჭარაში – 1 184, იმერეთში – 859, ქვემო ქართლში – 302, შიდა ქართლში – 429, გურიაში – 186, სამეგრელო – ზემო სვანეთში – 289, კახეთში – 339, მცხეთა-მთიანეთში – 176, სამცხე-ჯავახეთში – 138, რაჭა-ლეჩხუმსა და ქვემო სვანეთი – 29.

18 იანვრის მდგომარეობით, დადებითობის დღიური მაჩვენებელი არის 13.72%, ბოლო 14 დღის მანძილზე – 10.44%, ხოლო 7 დღის მანძილზე – 10.93%.

19 იანვრის მონაცემებით, გასულ 24 საათში აჭარაში კორონავირუსის 1184 ახალი შემთხვევა დადასტურდა.

დღეის მონაცემებით, აჭარის კოვიდკლინიკებშია 596 პაციენტი, კოვიდსასტუმროში იმყოფება 562 ინფიცირებული.

ამ ეტაპზე აჭარაში 131 მძიმე პაციენტია, მათგან 45 ხელოვნური სუნთქვის აპარატზე იმყოფება.

„კურორტი რომ არა, ნამდვილი ციხე იყო და იქნებოდა კიდევ აქაურობა,“ – ამბობს ეთერ პაპიძე და შეშის ღუმლის პატარა სარქველიდან ცეცხლის ალს აყოლებს თვალს.

ღუმელზე ეთერს სტუმრებისთვის ყავა ჭიქებით შემოუდგამს. გარეთ თოვლის სიმაღლე უკვე 2 მეტრია, ქარბუქია, თოვს შეუჩერებლად, თუმცა მასპინძელს მზერაშიც ეტყობა, რომ ეს არ ანაღვლებს, სურსათიც აქვს და სანოვაგეც.

არც პირველი ზამთარია ასეთი, როცა ადამიანებმა სახელდახელოდ გაკვალულ გვირაბებში დაიწყეს მიმოსვლა და შეშის ღუმელთან ძველი ამბების გახსენება და შიგადაშიგ მიმდინარე პოლიტიკის შეფასებაც.

ხულოში, გოდერძის უღელტეხილთან ყველაზე ახლოს მდებარე სოფელ დანისპარაულში, წელს დაახლოებით 2 მეტრი სიმაღლის თოვლი მოვიდა. ამ სტატიაში მოგიყვებით, რა ხდება წელს კურორტ გოდერძიზე და კურორტთან ყველაზე ახლოს მდებარე სოფელში, სადაც უმრავლესობას საოჯახო სასტუმრო აქვს მოწყობილი.

„მთავრობა რომ ახერხებდეს გზის მოწესრიგებას, ხალხიც ბევრი მოვიდოდა, სულ გაივსებოდა აქაურობა, ყველა ბედნიერი ვიქნებოდით. ასე, რომ მთავარი პრობლემა გზაა.

ხომ ხედავთ, დამწყვდეული ვართ ახლა, სად წახვალ? ვერსად.“ – ამბობს ეთერი ნიშნისმოგებით და მეზობლებს შეჰყურებს. ისინიც თავის დაკვრით და ღიმილით ემოწმებიან მასპინძელს.

„ბზუ-ბზუ – ასე ჰქვია ამ თამაშს,“ – ყავის დალევის შედეგ ფეხზე დგება ეთერის ქმარი, ამირან პაპიძე. ის სოფლის იმამია, თუმცა ამ დილით მეჩეთამდე კი არა, საშეშემდე გზის გასაყვანად რამდენიმე საათი დასჭირდა გათენებიდან. თოვლში კვალი ამირანს საკუთარი ხელით დამზადებული თხილამურებით გაჰყავს.

ამირანი ბავშვებთან ერთად თამაშში დიდებსაც რთავს.

„ზურგით დადექი და მხარზე ხელს ვინმე შემოგკრავს. უნდა მიხვდე, ვინ დაგარტყა ხელი, ჩვენ კი, ვიყვირებთ: ბზუ-ბზუუუუ, რომ ვერ გამოიცნო, ვინ დაგარტყა ხელი… თუ ვერ გამოიცნობ, იდგები ასე დიდხანს,“ – მეზობლის კაცს მიმართავს ღიმილით ამირანი.

„ბზუ-ბზუუუ“ – ხმამაღლა ყვირიან ბავშვებთან ერთად დიდებიც. თოვლი თითქმის ფარავს სახლებს და აივნებს. გზაზე აღარავინ ჩანს. გაჩერებულია თხილამურების ტრასაზე ასასვლელი საბაგიროც.

ამ დროს სოფელში ინტერნეტი ჭედავს, ტელევიზორიც ჩუმდება და ზოგჯერ შუქიც მიდის.

„ფურთს ვთამაშობთ, მაგრამ რამდენი ხელი უნდა ითამაშო?“ – იცინიან ქალები.

ამირან პაპიძე ხელნაკეთ თხილამურებსაც გვაჩვენებს და იხსენებს, წლების წინ, უგზოობის და უტრანსპორტობის დროს, დაბამდე თხილამურებით რომ ჩასრიალდა.

„მაშინ მასწავლებლად ვმუშაობდი სკოლაში, ასლან აბაშიძის დრო იყო, საახალწლოდ „ბანბანერკები“ რიგდებოდა, ამოსატანად წავედი…“, – გვიყვება ამირან პაპიძე.

• „პრობლემები მაშინ მოგვარდება, როცა ჩვენ თავად ავირჩევთ“ – რა აწუხებთ დანისპარაულში? 

გზა, რომელიც წლებია ვერ კეთდება, შეშა და ელექტროენერგია – ძირითადად ამ პრობლემებს ასახელებენ დანისპარაულელები, რომლებსაც სოფლის მეჩეთის ეზოში ვესაუბრე, ჯუმადღის ლოცვის შემდეგ.

„როგორც გვითხრეს, გზა ორ წელში უნდა გაკეთდეს. ხალხი ვერ მოდის, ტურისტები თავს იკავებენ, გზის ეშინიათ, აქ ჩარჩენის… შუქიც ითიშება ხშირად ქარში. აქ უმრავლესობას საოჯახო სასტუმრო გვაქვს, შესაბამისი პირობები სჭირდება სტუმარს,“ – გვიყვება ბადრი პაქსაძე.

სოფელ დანისპარაულში სულ 102 ოჯახია. მათ უმრავლესობას საოჯახო სასტუმრო აქვს. ერთი ღამის გათევა საშუალოდ 30 ლარად შეიძლება, კვებით – 50 ლარია. საოჯახო სასტუმროებში სტუმრებს ძირითადად აჭარული სამზარეულოს კერძებით უმასპინძლდებიან. გათბობა შეშის ღუმელია.

იმ სახლებში, სადაც სტუმრებისთვის საძინებლებში ცალკე შეშის ღუმელი ან ბუხარი აქვთ, უფრო მეტის გადახდა მოგიწევთ.

დანისპარაულის საოჯახო სასტუმროების დიდ ნაწილს აქვს სატრანსპორტო მომსახურებაც – სოფლიდან გოდერძის სათხილამურო ტრასამდე, ტყისპირას დაახლოებით 3 კილომეტრია გასავლელი. თუკი ამ გზის ფეხით ავლა და მერე ჩამოვლა გეზარებათ, ტრანსპორტით მომსახურება ორივე მიმართულებით დღეში 30 ლარია.

სოფელში ყველა ერთ აზრზეა – რომ არა კურორტის მოწყობა, დანისპარაული თითქმის დაიცლებოდა, რადგან აქ ცხოვრება განსაკუთრებით რთულია. ახლა კი, ქალაქში გადაბარგებულებიც უკან დაბრუნებულან. ეს უკვე ის ადგილია, სადაც უმუშევრობა აღარავის აწუხებს. დანისპარაულელების დიდი ნაწილი კურორტ გოდერძიზე მუშაობს – სასტუმროში, რესტორანში, საბაგიროზე, საოჯახო სასტუმროში ან იმ გზაზე, რომელიც წლებია კეთდება გოდერძისკენ და ვერ გაკეთდა.

„პრობლემაა შეშაც,“ – ამატებს ქემალ შამანაძე, „- „შეშის ბილეთს გვაძლევენ ოქტომბერში, მანამდე – არა. ოქტომბერში კი, აქ შეიძლება გათოვდეს. უნდა იჩქარო, დამატებით ფული გადაიხადო, ტყიდან შეშის გამოტანა რომ მოასწრო. ოქტომბერში თუ შეიძლება ბილეთის გამოწერა, მაისში რატომ არ უნდა შეიძლებოდეს?“ – კითხულობს ქემალი.

„პრობლემები მაშინ მოგვარდება, როცა ჩვენ თავად ავირჩევთ,“ – ხალხს უერთდება მეჩეთიდან გამოსული იმამი, ამირან პაპიძეც. „როცა ჩვენ ავირჩევთ ჩვენს დეპუტატს საკრებულოში თუ პარლამენტში, როცა ჩვენ ავირჩევთ მერს, პრეზიდენტს, პარტიას…“ – უკმაყოფილება ეტყობა იმამს. ხალხი დუმილით ხვდება იმამის ნათქვამს.

დანისპარაულელები საინტერესო ამბავსაც იხსენებენ – იმამი 2017 წლის ადგილობრივი თვითმმართველობის არჩევნებში დეპუტატობის კანდიდატი იყო „ევროპული საქართველოდან“. მას რამდენიმე ხმით მმართველი პოლიტიკური პარტიის კანდიდატმა აჯობა.

მაშინ, არჩევნებამდე რამდენიმე დღით ადრე, იმამი სამუფთო სამმართველომ თანამდებობიდან გაათავისუფლა პოლიტიკური საქმიანობის დაწყების გამო. არჩევნების წინა დღეს სოფელში მოსული ახალი იმამი მრევლმა მეჩეთში არ შეუშვა. არჩევნებზე კი, პოლიტიკაში წასულმა იმამმა წარმატებას მაინც ვერ მიაღწია.

დანისპარაულელების თქმით, სოფელში 100-დან 100 მუსლიმია და სასულიერო ლიდერი უპირობო ნდობით სარგებლობს.

რატომ ვერ გაიმარჯვა მაშინ იმამმა? – ვეკითხები შეკრებილებს.

„ხომ გაგიგიათ, ძალა აღმართს ხნავსო. ყველა სადღაც მუშაობს, გლეხს ვინ ეკითხება, ხვალ რა დღეა?… „ოცნებიდან“ ყოფილიყო, გავიდოდა,“ – ამბობს ერთი კაცი პაუზის შემდეგ.

„ჩვენ გვინდოდა იმამი შეგვენარჩუნებინა,“ – უხერხული პაუზიდან გამოსავალს პოულობს კაცი, რომელიც გაღიმებას ცდილობს და გასასვლელისკენ მიდის.

მეჩეთიდან ისევ ცენტრალურ გზაზე ავდივართ, რომელიც კურორტ გოდერძისკენ მიდის. გზად ქალები გვხვდებიან  – ვიდრე კაცები ლოცულობდნენ, ქალებს გზის გასუფთავება დაუწყიათ.

„გზა გაგვიკეთონ, გზა. ეს გადაეცით პატივცემულ მთავრობას, მეტი კომენტარი არ იქნება,“ – მოკლე პასუხით მიშორებენ დანისპარაულელი ქალები.

„ვინც შრომობს, მას ლუკმა-პურიც არ აკლია. პოლიტიკა ჩემი საქმე არ არის. აქ სტუმრები ზაფხულშიც ამოდიან… გზა თუ გაკეთდება, შაბათ-კვირასაც ამოვა ხალხი… სამი საათია უკვე ამ გზის გაწმენდას ვცდილობ,“ – რამინ პაპიძე ხელით გვაჩვენებს რამდენად მოკლე მანძილის გაკვალვა შეძლო ნიჩბით სამეზობლოსკენ ამ დროში.

ორშაბათს, 17 იანვარს, დანისპარაულში სკოლაში სწავლა ვერ დაიწყო. სკოლა „ბათუმელებს“ გამოკეტილი დახვდა. ბავშვებმა გვითხრეს, რომ სკოლაში წასასვლელად ემზადებოდნენ, მაგრამ ისევ გათოვდა. შიდა სასოფლო გზები აქ გვიან ან საერთოდ არ იწმინდება.

• რა ფასებია კურორტ „გოდერძიზე“ – რა ღირს სასტუმრო, კვება, თხილამურები, საბაგირო 

სულ სხვა ამბავია და განსაკუთრებულად შთამბეჭდავი, როცა გოდერძის მთებიდან თხილამურით ეშვები. შეუძლებელია ბუნების განსაკუთრებულ სილამაზეს აარიდო თვალი, რამდენჯერაც არ უნდა დაეშვა მთის ფერდობებზე. ჩანს იალაღებიც, ზამთრობით თოვლს რომ გამოუკეტავს და ზაფხულს ელიან.

საგრძნობია მშრალი თოვლის ხარისხი და თავად სათხილამურო ტრასებიც.

გოდერძის საბაგირო გზის სიგრძე დაახლოებით 8 კილომეტრია და იგი ზღვის დონიდან 2027 მეტრზე მდებარეობს.

„კიდევ უფრო მაღლაა ჭანჭახი, იქიდან ის ეშვება, ვინც ყველაზე კარგად ცურავს,“ – მეუბნება საბაგირო კაბინაში დამგზავრებული დანისპარაულელი ბიჭი. მერე ღიმილით დასძენს, აჭარის მთაში თხილამურებით სრიალს „ცურვას“ ვეძახითო.

გოდერძიზე სულ ორი საბაგირო გზაა. მეორე, ანუ ჭანჭახისკენ მიმავალ საბაგიროზე შეგიძლია შემდეგ გადაჯდე, როცა პირველი საბაგირო გზა დასრულდება და საბაგიროს კაბინიდან დატკბები ნაძვების კენწეროების თვალიერებით, ასევე ტყის სიჩუმის, უფრო ზუსტად კი, ტყის ხმის მოსმენით.

თითოეულ საბაგიროზე ერთხელ ასვლის საფასური 5 ლარია, თუმცა არის ულიმიტო პაკეტიც – დღეში 25 ლარი.

თხილამურების დაქირავების საფასური დღიურად 20 ლარიდან იწყება, თუმცა გააჩნია ხარისხს. ერთი საათით თხილამურის ქირაობას 5-10 ლარად შეძლებთ.

აქვეა კვების ობიექტები და სურსათის რამდენიმე მაღაზიაც. არჩევანი დიდია. მაგალითად, ყავა შეიძლება 2 ლარადაც იყიდო და  8 ლარიც დაგიჯდეს, თუკი სათხილამურო ტრასასთან სადმე ახლოს, ტერასაზე ჩამოჯდები.

სათხილამურო ტრასასთან ახლოს დასახლებული პუნქტი არ არის, თუმცა უკვე აშენდა რამდენიმე სასტუმრო. სასტუმროებს შორის ყველაზე დაბალი ფასი – 160 ლარი გვითხრეს ორადგილიანი ოთახი, კვების გარეშე.

სათხილამურო ტრასასთან ახლოს დაწყებულია ახალი ობიექტების მშენებლობაც.

• გზების დეპარტამენტი: გზა 2023 წელს იქნება

საავტომობილო გზების დეპარტამენტის პრესცენტრის ინფორმაციით, გზა კურორტ გოდერძიმდე 2023 წელს იქნება. ამ უწყების ოფიციალური გვერდის ინფორმაციით კი, სამუშაოები 2022 წელს ანუ მომავალი ზამთრის დადგომამდე უნდა დასრულებულიყო.

აქ გზის რეაბილიტაციაზე 2020 წლამდე კომპანია „ტოდინი“ მუშაობდა, თუმცა ამ კომპანიამ ვალდებულება არ შეასრულა. „სინოჰიდროც,“ რომელმაც მორიგი ტენდერი მოიგო და მასთან ხელშეკრულება 2020 წელს გაფორმდა, ასევე ვერ ასრულებს ვალდებულებას – სახელმწიფო აუდიტის ანგარიშის მიხედვით, ხულო-ზარზმის გზის მშენებლობისთვის 2021 წლის 6 თვეში 4,5 მილიონი ლარის სამუშაოები უნდა შესრულებულიყო. 5 თვის მონაცემებით მხოლოდ 199 ათასი ლარის სამუშაო შესრულდა, ეს კი გეგმის მხოლოდ 4.4 პროცენტია.

ბათუმი-ახალციხის საავტომობილო გზის ხულო-ზარზმის 42-კილომეტრიანი მონაკვეთის სარეკონსტრუქციო სამუშაოებს კომპანია „სინოჰიდრო“ ასრულებს. პროექტის ჯამური ღირებულება 95 689 302 ლარია.

რა ეტაპზეა გზის რეაბილიტაცია ამჟამად

„ამჟამად დიდთოვლობის გამო ხულო-ზარზმის პროექტის სამუშაოები დროებით შეჩერებულია, ხელსაყრელი კლიმატური პირობების დადგომისთანავე სამუშაოები განახლდება. თავად პროექტის დასრულება ხელშეკრულების მიხედვით, დაგეგმილია 2023 წელს,“ – მოგვწერეს გზების დეპარტამენტის პრესცენტრიდან.

რატომ გადაიწია ეს ვადა 2023 წლამდე? – პრესცენტრში გვითხრეს, რომ ინფორმაცია ოფიციალურ გვერდზე გასაახლებელია.

გზების დეპარტამენტში ასევე გვითხრეს, რომ კომპანია „ტოდინს“, რომელსაც 2020 წლამდე უნდა გაეკეთებინა ბათუმი-ახალციხის გზა, საბანკო გარანტიით გათვალისწინებული 11 მილიონი ლარის გადახდა დაეკისრა.

„ტოდინს იმდენი თანხა ჰქონდა ჩარიცხული, რამდენის სამუშაოებიც ჰქონდა შესრულებული,“ – მოგვწერეს გზების დეპარტამენტიდან.

ამ ეტაპზე ხულოდან კურორტ გოდერძიზე ძირითადად მაღალი გამავლობის მანქანებით ადიან. მოძრაობს მიკროავტობუსიც, თუმცა ძირითადად იმ შემთხვევაში, როცა გზა თოვლისგან კარგადაა გაწმენდილი.

შესაძლებელია ხულოს ცენტრიდან ტაქსის დაქირავებაც. ფასი შეთანხმებაზეა დამოკიდებული. მაგალითად, მგზავრობა „ვილისით“, რომლითაც კურორტ გოდერძიზე ასვლა შედარებით მარტივად და უსაფრთხოდ არის შესაძლებელი, 150 ლარი ღირს.

ყაზახეთის ყოფილი პრეზიდენტი, ნურსულთან ნაზარბაევი, ქვეყანაში საპროტესტო აქციების დაწყების შემდეგ საზოგადოებაში დღეს პირველად გამოჩნდა – მან საზოგადოებას ვიდეოთი მიმართა. ნაზარბაევის თქმით, ელიტაში არავითარი კონფლიქტი არ არსებობს. თავად კი „დამსახურებულად ისვენებს“ ყაზახეთის დედაქალაქში.

ახალი წლის დღეებში ყაზახეთს საპროტესტო ტალღამ გადაუარა – დაიღუპა 160 ადამიანი, დაკავებულია 5 135-ზე მეტი ადამიანი.

ნურსულთან ნაზარბაევი ყაზახეთს პრეზიდენტის რანგში 28 წლის განმავლობაში მართავდა. მანამდე, საბჭოთა პერიოდშიც, თავად იყო ამ ქვეყნის პირველი პირი – ცეკას პირველი მდივანი. 2010 წელს კი მას მიენიჭა „ერის მამის“ წოდება. ამ ეტაპზე 82 წლის ნაზარბაევი ქვეყნის უშიშროების საბჭოს თავმჯდომარეა. ყოფილი პრეზიდენტი ხელმძღვანელობს მმართველ პარტიასაც.

ნაზარბაევები ერთ-ერთი ყველაზე გავლენიანი ოჯახია შუა აზიის ამ ქვეყანაში. დასავლური მედიის ცნობით, ნაზარბაევის მემკვიდრეები ასეულობით მილიონი დოლარის უძრავ ქონებას ფლობენ არა მხოლოდ ქვეყნის ტერიტორიაზე, არამედ ამერიკასა და ევროპაში.

მაგალითად, ჟურნალ Forbes-ის მიხედვით, ნაზარბაევის უფროსი ქალიშვილი – დარიგა ნაზარბაევა და მისი ვაჟი, ნურალი ალიევი დიდ ბირტანეთში უძრავი ქონების ფასიან ქაღალდებს ფლობენ, რომელიც The Times-ის მიერ შეფასებულია 140 მილიონ ფუნტად.

ბრიტანული მედიის ცნობით, სავარაუდოდ, მათვე ეკუთვნით უძრავი ქონება ბეიკერ სტრიტზე, რომელიც გამოგონილი პერსონაჟის – შერლოკ ჰოლმსის სახელზეა რეგისტრირებული.

ყაზახეთის უმდიდრეს ადამიანთა შორის მოიხსენიება დინარა კულიბაევა, ნაზარბაევის მეორე ქალიშვილი. ის და მისი ქმარი, ტიმურ კულიბაევი Halyk Bank-ის აქციონერები არიან. მათი აქციების საბაზრო ღირებულება დაახლოებით 2,8 მილიარდი დოლარია.  

ნაზარბაევის გარდაცვლილი შვილიშვილის – აისულტანის სიმამრს, კაირატ ბორანბაევს, აქვს წილი კომერციულ უძრავ ქონებაში, ფლობს „მაკდონალდსის“ ფრენჩაიზს ყაზახეთსა და ბელარუსში და ასევე, წილებს ბევრ სხვა სექტორში.

ნაზარბაევები პერიოდულად ეხვევიან სკანდალებშიც. მაგალითად, დიდი ბრიტანეთის კრიმინალთან ბრძოლის ნაციონალური სააგენტო 2020 წლიდან ცდილობს დარიგა ნაზარბაევას სამი სახლის კონფისკაციას, რომელთა ჯამური ღირებულება 80 მილიონ დოლარს აღწევს.

დარიგა ნაზარბაევა ამტკიცებდა, რომ ეს სიმდიდრე მან შეიძინა, როგორც წარმატებულმა ბიზნესლედიმ.

დარიგა ნაზარბაევა ასევე ფლობს სასახლეს Bishops Avenue 33-ში, ბრიტანეთის ერთ-ერთ ყველაზე ძვირადღირებულ ქუჩაზე. ეს სასახლე მართლაც გრანდიოზულია 10 საძინებლით, მიწისქვეშა აუზით, წვიმის საშხაპეებით, შუშის გუმბათოვანი ფანჯრებით, გამოყოფილი კინოთეატრითა და პერსონალისთვის განკუთვნილი ცალკე გამოყოფილი სივრცით. ცხადია, სასახლე დაცულია  უსაფრთხოების მაღალი სტანდარტებით.

დარიგა მდიდრულ მეგაბინას ფლობს ჩელსიში Manresa Road 21-ში. ქონებას იცავს გაძლიერებული კერძო დაცვა. დარიგას სასახლე აქვს ჰაიგეითშიც – მის ქონებას დენვუდის 32-შიც კერძო დაცვა იცავს.

___

მთავარი ფოტო: დინარა კულიბაევას სასახლე ჟენევაში, ჟენევის ტბასთან

ანა ფრანკის ოჯახის სამალავის გაცემის ექვსწლიანმა გამოძიებამ გამოავლინა მოულოდნელი ეჭვმიტანილი  საქმეში, თუ როგორ იპოვეს ნაცისტებმა ცნობილი დღიურის ავტორის, მისი ოჯახისა და მეგობრების სამალავი 1944 წელს.

ამსტერდამელი ებრაელი გოგონას, ანა ფრანკის ისტორია მთელ მსოფლიოში ცნობილია მისი შემთხვევით შემონახული დღიურის წყალობით. ანას, მისი ოჯახის წევრებსა და ოჯახის მეგობრებს, სულ შვიდ  ადამიანს, ნაცისტებმა 1944 წლის 4 აგვისტოს მიაგნეს საიდუმლო თავშესაფარში, სადაც ისინი თითქმის ორი წლის განმავლობაში იმალებოდნენ. ყველა მათგანი საკონცენტრაციო ბანაკებში გადაასახლეს.

ანა გარდაიცვალა ბერგენ-ბელზენის საკონცენტრაციო ბანაკში, 15 წლის ასაკში, ბანაკის გათავისუფლებამდე 2 კვირით ადრე. ბანაკში დაიღუპა დედამისი და მისი უფროსი და, მარგო. გადარჩა მხოლოდ ანა ფრანკის მამა, ოტო ფრანკი.

ათწლეულების განმავლობაში უცნობი იყო, ვინ უღალატა ფრანკების ოჯახს, ვინ შეატყობინა გესტაპოს მათი სამალავის შესახებ.

ამ საკითხის გარშემო არაერთი მოსაზრება და თეორია არსებობს. ახლა ცნობილი გახდა კიდევ ერთი ეჭვმიტანილის შესახებ.

საგამოძიებო ჯგუფმა, რომელშიც შედიოდნენ აშშ-ს  FBI-ს პენსიაზე გასული აგენტი ვინსენტ პანკოკე და დაახლოებით 20 ისტორიკოსი, კრიმინოლოგი და მონაცემთა სპეციალისტი, გამოავლინა საიდუმლო თავშესაფრის ადგილსამყოფლის გამხელაში მთავარი ეჭვმიტანილი, ებრაელი ნოტარიუსი არნოლდ ვან დენ ბერგი.

საგამოძიებო ჯგუფის წევრმა პიტერ ვან ტვისკმა თქვა, რომ ახალი მტკიცებულების მნიშვნელოვანი ნაწილი იყო ანას მამის, ოტო ფრანკისთვის მიწერილი ხელმოუწერელი წერილი/ჩანაწერი,  რომელიც ნაპოვნი იქნა ომის შემდგომი გამოძიების ძველ საქმეში/დოსიეში. ჩანაწერი კონკრეტულად ასახელებდა ვან დენ ბერგს და ამტკიცებდა, რომ ეს ინფორმაცია სწორედ მან გადასცა გესტაპოს.

ჩანაწერში ნათქვამია, რომ ვან დენ ბერგს, როგორც ომის დროს ამსტერდამის ებრაული საბჭოს წევრს, ჰქონდა წვდომა მისამართებზე, სადაც ებრაელები იმალებოდნენ და ასეთი მისამართების სიები მან ნაცისტებს საკუთარი ოჯახის გადასარჩენად გადასცა.

მკვლევრები ამბობენ, რომ სწორედ ამ ინფორმაციის გაცემის შედეგად მოახერხა ვან დენ ბერგმა ნიდერლანდებში დარჩენა მაშინ, როცა ებრაული საბჭოს სხვა წევრები 1943 წელს გადაასახლეს. იგი 1950 წელს გარდაიცვალა.

ტვისკმა თქვა, რომ მოკვლევის შემდეგ საწყისი 32 სახელიდან მხოლოდ ოთხი დარჩა – ვან დენ ბერგი მთავარი ეჭვმიტანილი იყო.

გამომძიებლები მიიჩნევენ, რომ ოტო ფრანკმა იცოდა ამ წერილის შესახებ, მაგრამ არჩია მასზე არასოდეს ეთქვა საჯაროდ.

ახალი დეტალების გამოსავლენად, კვლევის თანამედროვე ტექნიკების გამოყენებით, შედგენილი იქნა მონაცემთა ძირითადი ბაზა – ჰოლანდიელი თანამშრომლების, ინფორმატორების, ისტორიული დოკუმენტების, პოლიციის ჩანაწერების და წინა კვლევების გამოყენებით.

ზოგიერთმა სხვა ექსპერტმა ხაზგასმით აღნიშნა, რომ ვან დენ ბერგის წინააღმდეგ მტკიცებულებები არ იყო დამაჯერებელი.

ახალი კვლევის დასკვნები გამოქვეყნდება კანადელი ავტორის, როზმარი სალივანის წიგნში „ანა ფრანკის ღალატი“, რომელიც დღეს, 18 იანვარს, გამოვიდა.

 

ეს ფოტოები კურორტ ბახმაროში ნაკუ გამყრელიძემ გადაიღო.

ერთი შეხედვით, შესაძლოა მოგეჩვენოთ, რომ ფოტოები დღისითაა გადაღებული, თუმცა მალევე მიხვდებით ეს მთვარით, ვარსკვლავებით მოჭედილი ცითა და თოვლით განათებული ზამთრის ღამეა ბახმაროში.

საქართველოში იზოლაციის და კარანტინის ვადები ვაქცინირებული, არავაქცინირებული და კოვიდგადატანილი ადამიანებისთვის შეიცვალა.

ასიმპტომური და მსუბუქი პაციენტებისთვის კარანტინის ვადა განისაზღვრა 8 დღით.

• სიმპტომების ალაგებიდან გასული უნდა იყოს 24 საათი
• იზოლაციის დასრულებიდან მომდევნო 5 დღე მკაცრად არის რეკომენდებული ნიღბის ტარება

საშუალო და მძიმედ მიმდინარე შემთხვევებისთვის კარანტინის ვადა განისაზღვრა 10 დღით, თუმცა:

• სახეზე უნდა იყოს მკვეთრად გაუმჯობესებული დინამიკა ბოლო 24 საათის განმავლობაში
• იზოლაციის დასრულებიდან მომდევნო 5 დღე მკაცრად რეკომენდებულია ნიღბის ტარება

იზოლაციის დასრულების შესახებ გადაწყვეტილებას, პაციენტის ჯანმრთელობის მდგომარეობიდან გამომდინარე, იღებს მისი ოჯახის ექიმი.

კარანტინის ვადები მცირდება კორონავირუსით დაავადებულთან კონტაქტირებული პირებისთვისაც.

კარანტინს არ ექვემდებარებიან, თუმცა ეძლევათ ნიღბის მოხმარების მკაცრი რეკომენდაცია კონტაქტის შეწყვეტიდან მომდევნო 10 დღე:

• ბუსტერ დოზით ვაქცინირებული პირები
• ვაქცინაციის მე-2 დოზის მიღებიდან 14-90 დღის განმავლობაში
• კოვიდის ინფექციის გადატანიდან 60 დღის განმავლობაში

8 დღე ექვემდებარებიან კარანტინს და ეძლევათ ნიღბის მოხმარების მკაცრი რეკომენდაცია მომდევნო 9-12 დღის განმავლობაში არავაქცინირებულ და არასრულად ვაქცინირებულ პირებს:

• ვაქცინაციის მე-2 დოზის მიღებიდან 1-14 დღის განმავლობაში
• ვაქცინის მე-2 დოზის მიღებიდან 90 დღეზე მეტი ხანგრძლივობის და ბუსტერ დოზის არმქონე პირებს
• პირებს კოვიდის ინფექციის გადატანიდან 60 დღის შემდგომ პერიოდში

იზოლაციის და კარანტინის ვადები 17 იანვრიდან შეიცვალა საქართველოში.

_______________

FFP2 სამედიცინო ნიღაბი. ფოტო: ევროპის პრესფოტო სააგენტო. EPA/FRIEDEMANN VOGEL

რუსეთის დროშის ქვეშ მცურავი გემი, რომელიც ბათუმის სანაპიროსთან ახლოს, ზღვაში გადახლართული ღუზებით იდგა, „ღუზების ტყვეობისგან გათავისუფლებულია“. ამის შესახებ საზღვაო ტრანსპორტის სააგენტო იტყობინება.

საზღვაო ტრანსპორტის სააგენტოს ინფორმაციით, ბათუმის ნავსადგურის სახელმწიფო ზედამხედველობისა და კონტროლის სამსახურმა გემის ეკიპაჟთან ერთად ღუზები წყლიდან ამოიღო და გადახლართული ჯაჭვები ჩაჭრა.

რუსეთის დროშის ქვეშ მცურავ გემ SGV-Flot -ს საფრთხე 15 იანვარს შეექმნა. გემმა, რომელიც ბათუმის ნავსადგურის აკვატორიაში იმყოფებოდა, ძლიერი შტორმის გამო მანევრირების უნარი დაკარგა და ნაპირისკენ გამოირიყა. ზღვაზე ძებნა გადარჩენისა და გემების მოძრაობის მონიტორინგის სამსახურის დახმარებით, მშრალტვირთმზიდი SGV-Flot 16 იანვარს, დაახლოებით ღამის 3:00 საათზე, ზღვაში დაბრუნდა.

საზღვაო ტრანსპორტის სააგენტოს მიერ მოწოდებული ინფორმაციის თანახმად, საბოლოოდ გემი 16 იანვარს 09:55 საათზე უსაფრთხოდ დადგა საღუზე წერტილში. თუმცა მოგვიანებით სააგენტოში SGV-Flot-ის კაპიტნისგან შეტყობინება მიიღეს, რომ ღუზები გადაიხლართა და ეკიპაჟი ვერ ახერხებდა მათ სრულ ამოღებას წყლიდან.

„ღუზების ზღვიდან ამოღების პროცესში ტალღის და დინების შედეგად გემის თვითნებური გადაადგილების თავიდან აცილებისა და გემის იმავე პოზიციაზე გამაგრების უზრუნველსაყოფად, 2022 წლის 18 იანვარს, 08:00 სთ-ზე, ბათუმის ნავსადგურიდან გავიდა ბუქსირი TAMARA-1 რეიდზე მდგომი მშრალტვირთმზიდის (SGV FLOT) მიმართულებით.

ავარიული სამუშაოები წარმატებით დასრულდა. გემი ბუქსირის თანხლებით შემოვიდა ბათუმის ნავსადგურში, სადაც გაგრძელდება დანარჩენი სამუშაოები და პარალელურ რეჟიმში დაიწყება დატვირთვა,“ – ნათქვამია სააგენტოს მიერ გავრცელებულ რელიზში.

ოპერაციის მართვაში ჩართული იყო და კოორდინირებულად მუშაობდა რამდენიმე სამსახური: საზღვაო ტრანსპორტის სააგენტოს ბათუმის ნავსადგურის სახელმწიფო ზედამხედველობისა და კონტროლის სამსახური, ზღვაზე ძებნა გადარჩენისა და გემების მოძრაობის მონიტორინგის დეპარტამენტი და სამაშველო ჯგუფი, შსს სასაზღვრო პოლიციის სანაპირო დაცვის დეპარტამენტი, მობილიზებული იყო საგანგებო სიტუაციების მართვის სამსახური და საპატრულო პოლიცია.

____

ამავე თემაზე:

ტალღის სიმაღლის გამო ბუქსირი ვერ გადის დასახმარებლად – სააგენტო გამორიყული გემის შესახებ

See more

 

სოციალურად დაუცველი ოჯახების მონაცემთა ბაზაში რეგისტრირებული ოჯახების სოციალურ-ეკონომიკური მდგომარეობის ხელახალი გადამოწმება 2022 წლის 1-ელ აპრილამდე შეჩერდა.

გადაწყვეტილება, არსებული ეპიდემიოლოგიური მდგომარეობის გათვალისწინებით, მთავრობის სხდომაზე მიიღეს დღეს, 18 იანვარს.

„იზოლაციისა და კარანტინის წესების დამტკიცების შესახებ” საქართველოს მთავრობის 2020 წლის 23 მაისის N322 დადგენილებით დამტკიცებული წესით სოციალური დაცვის მიმართულებით შემოღებული იყო სოციალური დახმარებების ადმინისტრირების დროებითი ღონისძიებები, რომლის ფარგლებში არ ხორციელდებოდა მონაცემთა ბაზაში რეგისტრირებული ოჯახების სოციალურ-ეკონომიკური მდგომარეობის ხელახალი გადამოწმება. მიუხედავად სარეიტინგო ქულის ოდენობისა, საარსებო შემწეობის მიმღებ ოჯახებს უწყვეტად უგრძელდებოდათ დახმარების გაცემა.

ცვლილების შესაბამისად, საარსებო შემწეობის მიმღები ოჯახების სოციალურ-ეკონომიკური მდგომარეობის გადამოწმება კვლავ არ განხორციელდება, გარდა იმ შემთხვევებისა, როდესაც აღნიშნული მოთხოვნილია უშუალოდ ოჯახის მიერ,“ – აღნიშნულია სოციალური მომსახურების სააგენტოს განცხადებაში.