მთავარი,სიახლეები

აჭარის პოლიციის შენობის ადგილას ცათამბჯენები აშენდება? – დეპარტამენტი ბარცხანაში გადადის

24.05.2021 • 4059
აჭარის პოლიციის შენობის ადგილას ცათამბჯენები აშენდება? – დეპარტამენტი ბარცხანაში გადადის

შინაგან საქმეთა სამინისტრო ბათუმში, ზღვასთან ახლოს, ბარცხანის ხიდთან, ოდისეი დიმიტრიადის #11-ში, 11 300 კვ.მ. მიწის ნაკვეთს საკუთარი სტრუქტურული ერთეულისთვის შენობის ასაშენებლად ითხოვს. მშენებლობის შემდეგ კი სამმართველოს ამჟამინდელი 21 026 კვ.მეტრი ტერიტორია აბუსერიძის ქუჩაზე, თავისი შენობების ჩათვლით, ბათუმის მუნიციპალიტეტს გადაეცემა საკუთრებაში.

მონიშნულია ადგილი, სადაც შინაგან საქმეთა სამინისტრო აჭარის პოლიციის დეპარტამენტისთვის შენობის აშენებას გეგმავს

როგორც განკარგულების პროექტის განმარტებით ბარათში წერია, მერია მზადაა მიწის ნაკვეთი გადასცეს „პოზიტიური პირობით“. ჯერ არ ვიცით, არის თუ არა ეს პირობა მომავალში პოლიციის მთავარი სამმართველოს ტერიტორიის საინვესტიციოდ გასხვისება. ამ კითხვაზე მერიაში არ გვიპასუხეს: „პოზიტიური პირობა ნიშნავს, რომ ტერიტორია და შენობები აბუსერიძის ქუჩაზე მერიის საკუთრებაში გადმოვა“.

საგულისხმოა, რომ პოლიციის სამმართველოს მარცხნივ, მთელი კვარტალი ზღვამდე, სამშენებლო კომპანიებმა აითვისეს, აქ თაუერები აშენდა ან შენდება. ერთი ნაკვეთი კი ამ კვარტალში, იუსტიციის სახლთან ახლოს, მშენებლობის პირობით გასულ კვირას აუქციონის წესით გაიყიდა.

ვინ გადაიხადა 30 მილიონი მიწის ნაკვეთში – კიდევ ერთი თაუერი ბათუმის სანაპიროზე

ადრე არსებული შეთანხმების მიხედვით, შინაგან საქმეთა სამინისტრო ოფისისთვის შენობის მშენებლობას სწორედ აქ [ფიროსმანის #12-ში] გეგმავდა. თუმცა ინვესტორი ამ ადგილსაც გამოუჩნდა.

საქართველოს ქონების ეროვნული სააგენტოს მიერ ბათუმის მერიაში გაგზავნილი წერილის მიხედვით [2021 წლის 31 მარტი], შინაგან საქმეთა სამინისტრომ შესაბამისი მოთხოვნით სააგენტოს 24 მარტს მიმართა.

აბუსერიძის ქუჩა – ამ დროისთვის აქ პოლიციის მთავარი სამმართველოს შენობაა განთავსებული. ამ ნაკვეთის მომიჯნავედ განთავსებულია საბალეტო სკოლის შენობა, რომელსაც კულტურული მემკვიდრეობის ძეგლის სტატუსი აქვს.

ეროვნული სააგენტო ბათუმის მერიას განუმარტავს, რომ მოთხოვნილი მიწის ნაკვეთის შს სამინისტროსთვის გადაცემის შემდეგ, მუნიციპალიტეტის საკუთრებაში გადავა ტბელ აბუსერიძის #11 -ში მდებარე ნაკვეთი და შენობა-ნაგებობები.

გადაბეჭდვის წესი


ასევე: