ჯანდაცვის მსოფლიო ორგანიზაციის (WHO) ხელმძღვანელმა, ჯანმოს ბოლო ბრიფინგზე მსოფლიო ლიდერები გააფრთხილა, რომ კორონავირუსის პანდემია „შორს არის დასრულებისგან“.
„ომიკრონი აგრძელებს მსოფლიოს დაპყრობას. გასულ კვირას 18 მილიონზე მეტი შემთხვევა დაფიქსირდა. არ შეცდეთ, ომიკრონი იწვევს ჰოსპიტალიზაციას და სიკვდილს. ასევე, ნაკლებად მძიმე შემთხვევებიც ტვირთავს სამედიცინო დაწესებულებებს.
ევროპის რამდენიმე ქვეყანაში ახალი შემთხვევების რეკორდული მაჩვენებლები დაფიქსირდა.
სამშაბათს საფრანგეთმა დააფიქსირა თითქმის ნახევარი მილიონი ახალი შემთხვევა ერთ დღეში,“ – თქვა ტედროს გებრეისუსმა.
მან გააფრთხილა მსოფლიო ლიდერები, რომ „ომიკრონის დაუჯერებელ გლობალურ ზრდასთან ერთად, სავარაუდოდ გამოჩნდება ახალი ვარიანტები, ამიტომ პროცესის მეთვალყურეობა და შეფასება კრიტიკულად მნიშვნელოვანი რჩება“.
„მსოფლიოს მასშტაბით, ათასობით მეცნიერისა და ექსპერტის ძალისხმევის წყალობით, ჩვენ შევძელით თვალყური გვედევნებინა ახალი ვარიანტებისთვის, როგორიცაა ომიკრონი და ამ ვირუსის ევოლუცია რეალურ დროში“.
„7 მილიონზე მეტი მთლიანი გენომის თანმიმდევრობა 180 ქვეყნიდან უკვე წარდგენილია GISAID-ში, რომელიც თავდაპირველად შეიქმნა გრიპის თვალყურის დევნებისთვის“ – განმარტა ჯანმოს ხელმძღვანელმა.
მან აღნიშნა, რომ მუშავდება და ფასდება ვაქცინების ახალი ფორმულები ომიკრონისა და სხვა შტამების წინააღმდეგ ეფექტურობაზე.
„მე კვლავ ვშფოთავ იმ ქვეყნებზე, რომლებსაც ვაქცინაციის დაბალი მაჩვენებლები აქვთ, რადგან ადამიანები, რომლებიც არ არიან ვაქცინირებულნი, უფრო მეტად არიან მძიმე ავადმყოფობისა და სიკვდილის რისკის ქვეშ,“ – დასძინა მან.
ომიკრონის გამოჩენის შემდეგ კორონავირუსით ინფიცირების ახალი შემთხვევები რეკორდულად მატულობს ევროპის მთელ კონტინენტზე.
დანიაში 18 იანვარს, სამშაბათს, დაფიქსირდა Covid19-ით დღიური ინფიცირების რეკორდულად მაღალი მაჩვენებელი – 33 493; იტალიამ ამავე დღეს 228 179 ახალი შემთხვევა დააფიქსირა, წინა დღეს ეს მაჩვენებელი ქვეყანაში 83 403 იყო.
