შუახევში მოსახლეობამ პაციენტი დაახლოებით 3 კილომეტრის მანძილზე ატარა საკაცით თოვლისგან გაწმენდილ გზაზე ჩამოსაყვანად.
შემთხვევა დღეს, 18 იანვარს, მოხდა შუახევის მუნიციპალიტეტის სოფელ ხაბელაშვილებში. შუადღისას ხანდაზმულმა კაცმა დაცემის შედეგად სავარაუდოდ, მოტეხილობები მიიღო და სასწრაფო სამედიცინო დახმარება დასჭირდა, თუმცა სასწრაფოს მანქანა თოვლისგან გაუწმენდავი გზის გამო სოფელში ვერ ავიდა.
როგორც სოფელში გვითხრეს, გზას ორი ტრაქტორი წმენდდა თოვლისგან, თუმცა ერთი გაფუჭდა, მეორე ტრაქტორმა კი საღამოს მუშაობა შეაჩერა, სავარაუდოდ, ზვავსაშიშროების გამო.
„სოფლის ხალხი დაგვეხმარა და ჩამოიყვანეს სამი კილომეტრი ფეხით, საკაცეზე მყოფი პაციენტი. ახლა მიჰყავთ ბათუმში“ – უთხრა „ბათუმელებს“ ოჯახის ახლობელმა. მისივე თქმით, სოფელში კიდევ ერთ ადამიანს სჭირდება საავადმყოფოში გადაყვანა.
„ბათუმელები“ ესაუბრა შუახევის მუნიციპალიტეტის საკრებულოს აპარატის იურიდიული განყოფილების უფროსს, ზორბეგ ქარცივაძეს, რომელიც ამჟამად სოფელ ხაბელაშვილებში იმყოფება. მან შემთხვევა დაგვიდასტურა და გვითხრა, რომ ამჟამად ადგილზე იმყოფებიან შუახევის მუნიციპალიტეტის საკრებულოს თავმჯდომარე როსტომ ლორთქიფანიძე და შუახევის მერის მოადგილე გურამ ზოიძე.
„ამ ეტაპისთვის გზა გახსნილია. გვაქვს ინფორმაცია, რომ კიდევ ერთ პაციენტს სჭირდება დახმარება და ვარკვევთ, როგორ შეიძლება დაკავშირება იმიტომ, რომ ტელეფონი არ იჭერს ყველგან. ტექნიკა მუშაობს, მაგრამ მოდის ზვავები და ამასთან გამკლავება გვიჭირს,“ – გვითხრა ზორბეგ ქარცივაძემ.
ხაბელაშვილებში თოვლის საფარის სიმაღლე დაახლოებით 1.5 მეტრია.
_____________
ფოტო „ბათუმელების“ არქივიდან
