თურქეთის დედაქალაქ ანკარაში დააკავეს კაცი, რომელსაც ხიდის მოპარვა ედება ბრალად – ამის შესახებ თურქული მედია წერს.
500 მეტრის სიგრძის ხიდი, რომლის მოპარვაშიც კაცს ადანაშაულებენ, 1936 წელს იყო აშენებული და უკვე 40 წელია არ გამოიყენებოდა, ახალი ხიდის აშენების გამო.
დაახლოებით 10 დღის წინ ძველ ხიდთან მუშების ჯგუფი გამოჩნდა და მისი დაშლა დაიწყეს. ახლომახლო მცხოვრებმა მოსახლეობამ მიიჩნია, რომ ხიდს ქალაქის ადმინისტრაცია შლიდა.
ადგილზე ბულდოზერები მუშაობდნენ. 4 დღის განმავლობაში ჯგუფმა დაახლოებით 70 ტონა რკინა მოხსნა და ხიდიდან მხოლოდ საძირკველი დარჩა. 4 დღის შემდეგ ჟანდარმერიამ, რომელიც ამ ადგილის იშვიათი სტუმარია, შენიშნა, რომ ხიდს იპარავდნენ და ეჭვმიტანილი დააკავა.
თურქული მედია წერს, რომ დაკავებულმა ხიდის მოპარვამდე მიმართა შესაბამის ორგანოებს ხიდის მოხსნის შესახებ, თუმცა უარი მიიღო.
მოხსნილი ხიდის ღირებულება ჯართის სახით 36 000 დოლარია.
____________
ფოტოზე: მოპარული ხიდის საძირკველი. ფოტო: ntv.com.tr
