მთავარი,სიახლეები

შუახევიდან პაციენტის გამოყვანა 24 საათი ვერ შეძლეს – ის ახლა გადაჰყავთ კლინიკაში

19.01.2022 • 2104
შუახევიდან პაციენტის გამოყვანა 24 საათი ვერ შეძლეს  – ის ახლა გადაჰყავთ კლინიკაში

შუახევში, სოფელ ხაბელაშვილებში, მხოლოდ ერთი დღე-ღამის შემდეგ შეძლო სასწრაფო დახმარების სამსახურმა პაციენტამდე მისვლა. დაახლოებით 62 წლის ქალს ხაბელაშვილებში გუშინ ღამითაც სჭირდებოდა ექიმების გადაუდებელი დახმარება, თუმცა დიდთოვლობის შედეგად ჩაკეტილი გზების გამო სოფლიდან მისი გამოყვანა ვერ მოხერხდა.

სასწრაფო სამედიცინო სამსახური დღეს, დაახლოებით 17 საათზე, ავიდა სოფელში და პაციენტი კლინიკაში გადმოჰყავთ – ინფორმაცია „ბათუმელებს“ წყალსაყრის ადმინისტრაციულ ერთეულში მერის წარმომადგენელმა, მიხეილ ტაკიძემ დაუდასტურა.

რატომ ვერ მოხერხდა ამდენი ხნის განმავლობაში პაციენტის გამოყვანა სოფლიდან? – მიხეილ ტაკიძემ გვითხრა, რომ გზაზე ჩამოწოლილი ზვავის გამო ვერ გადმოიყვანეს პაციენტი. მისივე თქმით, ადგილზე ტექნიკა მუშაობს, რომელიც გზას წმენდს თოვლისგან. სოფელში თოვლის საფარის სიმაღლე 2 მეტრს აღწევს.

წუხელ, 18 იანვარს, სოფელ ხაბელაშვილებიდან კიდევ ერთი პაციენტის გამოყვანა გაჭირდა. მას მოტეხილობები აღენიშნებოდა, თუმცა სასწრაფოს მანქანა თოვლისგან გაუწმენდავი გზის გამო სოფელში ვერ ავიდა და მოსახლეობამ იგი დაახლოებით 3 კილომეტრის მანძილზე ატარა საკაცით თოვლისგან გაწმენდილ გზაზე ჩამოსაყვანად.

გადაბეჭდვის წესი


ასევე: