Batumelebi

არასამთავრობო ორგანიზაციამ „პარტნიორობა ადამიანის უფლებებისთვის“ [PHR] სასამართლო დავა მოუგო ფსიქიატრიულ დაწესებულებას, რომელმაც ქალი უკანონოდ განათავსა კლინიკაში.

PHR-ის ცნობით, სასამართლომ კლინიკას მორალური ზიანის ანაზღაურების სახით 5000 ლარი დააკისრა.

„2019 წლის 31 აგვისტოს ნინო საკვები პროდუქტის შესაძენად გავიდა სახლიდან. დაბრუნებიდან რამდენიმე საათში კარზე კაკუნის ხმა გაისმა. ნინომ კარი გააღო. მასთან საპატრულო პოლიციის ეკიპაჟი და სასწრაფო სამედიცინო დახმარების ბრიგადა იყო მისული.

ადგილზე არ მომხდარა არანაირი კონფლიქტი ან დაძაბულობა. პოლიციის ეკიპაჟმა სამედიცინო შემოწმებისთვის ნინოს კლინიკაში გადაყვანა მოითხოვა.

ქალი დაიბნა, ვერ მიხვდა იმ მომენტში რა შეეძლო გაეკეთებინა და ნებაყოფლობით გაჰყვა კლინიკაში. გზად ნინომ გაიგო, რომ პოლიციისთვის მის დას დაურეკია.

მან უთხრა პოლიციელებს, რომ თავად იყო ოჯახის წევრის მხრიდან ფიზიკური ძალადობის მსხვერპლი და მის დასაცავად შემაკავებელი ორდერიც იყო გამოცემული რამდენიმე დღის წინ. ამ ინფორმაციაზე პოლიციას რეაგირება არ მოუხდენია და ნინო ფსიქიატრიულ კლინიკაში მიიყვანა, საიდანაც ის აღარ გამოუშვეს,“ – წერს PHR-ი.

ორგანიზაციის ინფორმაციით, ნინოს ფსიქიატრიულ კლინიკაში გადაყვანის და განთავსების დროს  არ უწარმოებიათ ფაქტების სრული და ობიექტური შესწავლა.

„კერძოდ, პოლიციამ და ფსიქიატრიული დაწესებულების ექიმ-ფსიქიატრებმა გადაწყვეტილების მიღებისას მხედველობაში არ მიიღეს ქალის მონაყოლი, რაც ფაქტებით იყო დადასტურებული [დის მხრიდან ნინოზე ფიზიკური ძალადობა, რის გამოც გამოსცეს შემაკავებელი ორდერი, პოლიციისა და სასწრაფო დახმარების ეკიპაჟი გამოიძახა მოძალადე დამ მაშინ, როცა თავად ნინო იყო ძალადობის მსხვერპლი და დასაცავი დის მხრიდან].

საქალაქო სასამართლომ მხოლოდ ექიმ-ფსიქიატრების მოსაზრებას მოუსმინა და ნინო 6 თვით ფსიქიატრიულში, მისი ნების საწინააღმდეგოდ დატოვა.

PHR-ის დახმარებით ნინომ საქალაქო სასამართლოს გადაწყვეტილება გაასაჩივრა. სააპელაციო სასამართლომ ის გაათავისუფლა ფსიქიატრიულ დაწესებულებაში კანონის დარღვევით მოთავსების გამო“.

PHR-ის ინფორმაციით, ნინომ მათთან ერთად დაიწყო სამოქალაქო დავა კლინიკის წინააღმდეგ და თავისუფლების უკანონო შეზღუდვის გამო, „რამაც მას ტკივილი და ტანჯვა განაცდევინა, მისთვის მორალური ზიანის  ანაზღაურება მოითხოვა“.

სასამართლოს ორმა ინსტანციამ დააკმაყოფილა ნინოს მოთხოვნა და კლინიკას მორალური ზიანის გადახდა დააკისრა.

ვიქტორ მოისენკო ჟიტომირის ივან ფრანკოს სახელობის სახელმწიფო უნივერსიტეტის პროფესორი იყო უკრაინული ენის კათედრაზე.

ფართომასშტაბიანი ომის დაწყებისთანავე პროფესორმა სწავლის პროცესი მიატოვა და უკრაინის შეიარაღებულ ძალებში ჩაეწერა. უკრაინის თავდაცვის სამინისტროს საინფორმაციო სააგენტოსთან მოისენკო ამბობს, რომ არც დაფიქრებულა უნდა წასულიყო თუ არა საომრად, რადგან „სასწორზე უკრაინის არსებობის საკითხი დგას. 24-25 თებერვალს, როცა პირველი ბომბები დაუშინეს უკრაინას, ბევრი პროფესორი, ექიმი, მასწავლებელი თუ სხვა პროფესიის ადამიანი წავიდა საბრძოლველად, რადგან ეს ნამდვილად უკანასკნელი ბრძოლაა, რომელშიც უკრაინა არ უნდა დამარცხდეს“, – ამბობს ახლა უკვე უმცროსი სერჟანტი ვიქტორ მოისენკო.

АрміяINFORM-ი წერს, რომ ომის დაწყებამდე მოისენკო 30 წელი ეწეოდა საგანმანათლებლო საქმიანობას.

გამოცემასთან მისი კოლეგები ამბობენ, რომ ის ახალგაზრდობიდანვე უკრაინას იცავდა.

„მაშინ მისი ბრძოლის იარაღი იყო ენა, ენის ისტორია და დიალექტოლოგია – ყველაფერი, რასაც ჩვენი ენა, გენეტიკური კოდი ეფუძნება. კაბინეტის მეცნიერისგან ის უკრაინის მცველად იქცა“, – ამბობს გამოცემასთან მისი კოლეგა.

ახლა უკვე უკრაინის შეიარაღებული ძალების 57 წლის წევრი საკუთარ არჩევანს ასე ხსნის:

„დაპირისპირება უკრაინასა და რუსეთს შორის უნდა მომხდარიყო. ყველაფერი ამისკენ მიდიოდა, ეს ორი ქვეყანა ერთმანეთს რთულად ეგუება და ამაში ბრალი უკრაინას არ მიუძღვის. უკრაინას არასდროს არავის მიმართ ჰქონია პრეტენზია, მაგრამ რაც დრო გადის, მით მეტი პრეტენზია აქვს ჩრდილოელ მეზობელს ჩვენს მიმართ.

უკრაინელებმა ხმამაღლა თქვეს, რომ უკრაინელები არიან, რომ ისინი არ ეხებიან სხვის ისტორიას – პოლონეთის, თურქეთის, თუ რუსეთის ისტორიას, მაგრამ აქვთ საკუთარი ისტორია. არც თურქები, არც მადიარები და არც რუმინელები, თავს არასდროს დაგვსხმიან.

ერთადერთი, ვინც ამას აკეთებდა ყოველთვის, არის ნახევრად ველური ერი, რომელსაც არ ასწავლიან საკუთარ ისტორიას და ხელყოფენ სხვისას“, – ამბობს მებრძოლი პროფესორი.

მეცნიერი ამბობს, რომ უკრაინამ უკვე დაიმკვიდრა საკუთარი ადგილი მსოფლიოში, რადგან ქვეყანა ირჩევს თავისუფლებას ან სიკვდილს.

„ჩვენ არ გვჭირდება ომში წასვლა, რომ მოვკვდეთ. ომში წასვლა გვჭირდება იმისთვის, რომ გადავრჩეთ, გავიმარჯვოთ და ავაშენოთ უკრაინა“, – ამბობს პროფესორი.

უკრაინის თავდაცვის სამინისტრო საინფორმაციო სააგენტოს ცნობით, ვიქტორ მოისენკოს მსგავსად უკრაინის თავისუფლებისა და დამოუკიდებლობისთვის იბრძვის ივან ფრანკოს ჟიტომირის სახელმწიფო უნივერსიტეტის 50 მასწავლებელი და სტუდენტი.

მთავარი ფოტო: უკრაინის თავდაცვის სამინისტროს საინფორმაციო სააგენტოდან: АрміяINFORM

„ბათუმის საჯარო ბიბლიოთეკის შენობის ამჟამინდელი ტექნიკური მდგომარეობა არადამაკმაყოფილებელია, ხოლო ცალკეული ზონები  მწვავედ ავარიული და საფრთხის შემცველია. არსებული სახით შენობის ექსპლუატაცია დაუშვებელია“, – ნათქვამია სამხარაულის ექსპერტიზის ბიუროს დასკვნაში, რომელიც საჯარო ბიბლიოთეკის დირექტორმა ჯონი საბაშვილმა, დღეს, 23 მაისს, მიიღო.

სამხარაულის ექსპერტიზის ბიურომ თავის დასკვნაში მკაცრად განსაზღვრა, ასევე, უსაფრთხოების ზომების შესახებ, რომლის მიხედვითაც უნდა დაიწყოს შენობის, განსაკუთრებით კი წიგნთსაცავის, დაცლა.

„პირველი რიგში საჭიროა მოხდეს მწვავედ ავარიული უბნების განტვირთვა [წიგნთსაცავის დაცლა] შესაბამისი კვალიფიციური სპეციალისტების მიერ უსაფრთხოების წესების დაცვით, სათანადო თანმიმდევრობით, წინასწარ დამზღვევი კონსტრუქციების დამონტაჟების შემდეგ, [საჭიროა ყველა სართულზე ტელესკოპური დგარებისა და კოჭების მონტაჟი], ხოლო შემდგომ შენობას ჩაუტარდეს საფუძვლიანი სარეაბილიტაციო სამუშაოები, შესაბამისი კონსტრუქციული პროექტის მიხედვით“.

ბიბლიოთეკის დირექტორი ჯონი საბაშვილი პირად საუბრებში აცხადებს, რომ შენობას რეაბილიტაციას ჩაუტარებენ და სხვა რაიმე სახის ეჭვები უსაფუძვლოა: „ამის გარანტიას გაძლევთ.“

დოკუმენტების მიხედვით, ბათუმის საჯარო ბიბლიოთეკამ სამხარაულის ექსპერტიზის ბიუროს  ექსპერტიზა „ბიბლიოთეკის შენობის ტექნიკური მდგომარეობის დასადგენად“ 17 მაისს დაუკვეთა.

ჯონი საბაშვილის ინფორმაციით, ბათუმის საჯარო ბიბლიოთეკა დროებით სხვა შენობაში გადავა, თუმცა ამ დროისთვის არ ვიცით, სად: „შენობას ვეძებთ.“

მას შემდეგ, რაც საზოგადოებრივი მაუწყებლის აჭარის ტელევიზიაში ჟურნალისტების დევნის საქმის გამოძიებაზე პროკურატურამ უარი თქვა, ხოლო სასამართლომ ჟურნალისტების და რედაქტორების საქმის განსახილველად ვერ მოიცალა, დირექტორი უკვე მილიონამდე ლარის სატელევიზიო პროდუქციას უკონკურსოდ, პირდაპირი წესით ყიდულობს. ამისთვის მან დებულება უკვე შეცვალა, რაზეც ბორდმა უსიტყვოდ მოუწერა ხელი.

„არ ვყიდულობთ ტენდერით მექანიკურ პროდუქციას, პირდაპირ ვყიდულობთ… რაოდენ საოცარიც არ უნდა იყოს, საოცარი რამეა, იმ წესით რომ მივდივარ, უფრო ძვირი გამოდის,“ – განაცხადა აჭარის ტელევიზიის დირექტორმა, გიორგი კოხრეიძემ მრჩეველთა საბჭოს 22 თებერვლის სხდომაზე, სადაც ერთ-ერთ საკითხად განიხილეს, დირექტორისთვის მიეცათ თუ არა ნება, კონკურსის გარეშე შეეძინა მილიონამდე ლარის ღირებულების სატელევიზიო პროდუქტი.

განიხილეს რა – ძირითადად გია ქარცივაძემ დასვა კითხვები სხდომაზე, რომელიც რამდენიმე საათს გაგრძელდა და ეს ბორდის მეორე წევრმა, თამილა დოლიძემ გააპროტესტა. „ამდენი ადამიანი ვსხედვართ და ვისმენთ მხოლოდ თქვენს პაექრობას ამდენი საათია. თუ ასე პირადად გაქვთ რაღაცები სალაპარაკო, გაბრძანდით ოთახში და ილაპარაკეთ. დავიღალეთ რა…“ – განაცხადა თამილა დოლიძემ.

„უფრო ძვირი გამოდის,“ – უთხრა გია ქარცივაძეს გიორგი კოხრეიძემ კონკურსით წესით შესყიდვის წესის ცვლილებაზე და კონკრეტიკის გარეშე სცადა დასაბუთება: რატომ სჯობია დემოკრატიის ფუნდამენტურ წესს – საჯაროობას, ტენდერს და კონკურსს პირდაპირი შესყიდვის მსგავსი შესყიდვა, როცა საქმე მილიონამდე ლარის ხარჯვას ეხება.

საუბარია მხატვრული, დოკუმენტური, ანიმაციური ფილმების, ასევე სერიალების შესყიდვაზე, რაშიც წელს „საზოგადოებრივი მაუწყებლის აჭარის ტელევიზია და რადიო“ 899 099 ლარს დახარჯავს. იმის მიუხედავად, რომ იგივე მექანიკური პროდუქციისთვის 2021 წელს, კონკურსის გზით ჩატარებული შესყიდვის შედეგად, აჭარის ტელევიზიამ 702 769 ლარი დახარჯა, აჭარის ტელევიზიის დირექტორი, გიორგი კოხრეიძე ამბობს, რომ მან „80 ათასი ლარი დაუზოგა ტელევიზიას“.

ბორდის სხდომაზე გიორგი კოხრეიძემ გია ქარცივაძეს ჰკითხა: რატომ იყენებდნენ კონკურსის წესს [წინა დირექტორის, ნათია კაპანაძის ხელმძღვანელობის დროს გია ქარცივაძე ადამიანური რესურსების მართვის სამსახურს ხელმძღვანელობდა], როცა მის გარეშე შეიძლებოდა მექანიკური პროდუქციის შეძენა კანონით და თან კოხრეიძის მტკიცებით, თანხაც დაზოგეს.

„საიდან მოვიდა ეს 80 ათასი?… გარდა იმისა, რომ უარს ვამბობთ საჯაროობაზე, ეს აჩენს კორუფციის რისკს,“ – თქვა მრჩეველთა საბჭოს 22 თებერვლის სხდომაზე გია ქარცივაძემ, რომელიც ერთადერთი აღმოჩნდა ბორდის წევრებს შორის, ვინც გიორგი კოხრეიძეს მხარი არ დაუჭირა.

გიორგი კოხრეიძემ მრჩეველთა საბჭოს იმავე სხდომაზე აღნიშნა, რომ „52 საათამდე მეტი პროდუქცია შეიძინა“. თუმცა როცა გია ქარცივაძემ მეტი კონკრეტიკა ითხოვა და სხდომას ინგა გოგოლიშვილი შემოუერთდა, სატელევიზიო მაუწყებლობის განვითარების სამსახურის უფროსი, მან თქვა, რომ „ვადებში ვიჭედებოდით“. მისივე თქმით, ამ შემთხვევაში ტელევიზია სამ კომპანიას დაუკავშირდა, ბაზარი მოიკვლია, ვის შეეძლო ლიცენზირებული „მექანიკური პროდუქციის“ მოწოდება და ისე მიიღეს გადაწყვეტილება.

ბორდის სხდომაზე გაირკვა, რომ ტელევიზიის დირექტორს წესი ბორდის სხდომამდეც უკვე შეუცვლია დებულებაში და მას აღარ სჭირდება მექანიკური პროდუქციის კონკურსის წესით შესყიდვა. ტელევიზიაში კომისია იქმნება, რომელიც მოიკვლევს ბაზარს იმ სატელევიზიო პროდუქტის შესახებ, რის შეძენაც სურთ და შემდეგ რომელიმე კონკრეტულ კომპანიას გაუფორმებენ ხელშეკრულებას.

„ყოველივე ზემოაღნიშნულიდან გამომდინარე, პრაქტიკამ ცხადყო, რომ არ არის მიზანშეწონილი კონკურსის გამოცხადება, შესაბამისად შესყიდვის გამართლებულ მეთოდად ამ მომენტისათვის უნდა იქნეს მიჩნეული შესყიდვა ბაზრის კვლევის საფუძველზე და გამონაკლის შემთხვევებში პირდაპირი ფორმით შესყიდვა,“ – ჩაუწერია დებულებაში გიორგი კოხრეიძე.

„ეს არის ფარული ხარჯვა, შეძენა. ეს პირდაპირი შესყიდვაც არაა, რასაც სახელმწიფო აკეთებს, დაახლოებით ისეთია, მაგრამ ეს სრულიად დახურულია,“ – განმარტავს გია ქარცივაძე „ბათუმელებთან“. ის პროფესიით იურისტია და სხდომაზეც იკითხა: „ვისაც თქვენ იცნობდით, მარტო იმას დაუკავშირდით? იქნებ მეც მინდოდა მოწოდება, ვინ დამიკავშირდა? სად იყო გამოქვეყნებული ინფორმაცია ამის შესახებ?“ – თქვა ბორდის სხდომაზე გია ქარცივაძემ, რომელიც ასევე უპასუხოდ დარჩა.

ბორდის სხდომაზე ინგა გოგოლიშვილმა ისაუბრა თანხის დაზოგვაზეც: „მაგალითად, 2 ათასი ლარი იყო BBC-ის დოკუმენტური ფილმი, ახლა „ენ რეკორდსი“ გვაძლევს 1850 ლარად,“ – თქვა მან, თუმცა არ დაუკონკრეტებია, ჯამურად რატომ იხდის ტელევიზია ახლა უფრო მეტს წინა წელთან შედარებით. „ბათუმელებს“ მრჩეველთა საბჭოს წევრმა, გია ქარცივაძემ გააცნო აჭარის ტელევიზიიდან გამოთხოვილი ოფიციალური დოკუმენტაცია, რომლის მიხედვითაც აჭარის ტელევიზიამ 2021 წელს, როცა კონკურსი ჩატარდა, მექანიკური პროდუქციის შეძენაზე 702 496 ლარი დახარჯა.

„კი, დაახლოებით 700 ათასი დავხარჯეთ,“ – პასუხობს ინგა გოგოლიშვილი გია ქარცივაძეს ბორდის სხდომაზეც. წელს კი, „ენ რეკორდსთან“ გაფორმებული ხელშეკრულებით, აჭარის ტელევიზია მექანიკურ პროდუქციაში 899 099 ლარს გადაიხდის.

„მინიმუმ საზოგადოების ფინანსების მიმართ გულგრილი დამოკიდებულების მწვერვალია,“ – ამბობს „ბათუმელებთან“ გია ქარცივაძე და განმარტავს, რომ კანონი პირდაპირ არ დარღვეულა და ამის საკანონმდებლო დაშვება 2018 წლიდან არსებობს:

„მაგრამ არსებობს წესრიგი, ჩამოყალიბებული პრაქტიკა და ორგანიზაციული ტრადიცია, რომლის ძირითად მიზანს წარმოადგენდა საზოგადოების ფინანსების გამჭვირვალე, საჯარო ხარჯვა. მიუხედავად იმისა, რომ 2018 წლის მარტიდან კანონმდებელმა გაათავისუფლა მაუწყებელი მექანიკური პროდუქციის შესაძენად საჯარო/ღია ტენდერი ჩაეტარებინა.

მაუწყებლის იმ დროინდელმა ადმინისტრაციამ გადაწყვიტა, რომ საჯარო/საზოგადოების ფინანსების ხარჯვაში, რომელიც რამდენიმე ასეულობით ათასი ლარია, მინიმალური გამჭვირვალობის სტანდარტი მაინც ყოფილიყო დაცული. მიუხედავად იმისა, რომ გასულ წლებში, მიმდინარე წელთან შედარებით, ბევრად ნაკლები თანხა იხარჯებოდა [ღია კონკურსის წესით] მექანიკური პროდუქციის შესაძენად, მიმდინარე წელს, როდესაც თანხა საკმაოდ მოცულობითი გახდა [თითქმის 900 000 ლარი], ამ შეძენის წინ გააუქმა დირექტორმა აღნიშნული კონკურსის წესი. ჩემთვის გაუგებარია ობიექტურ დამკვირვებელს როგორ არ უნდა გაუჩნდეს კითხვები: მაშინ როდესაც თანხა ნაკლები იყო ტარდებოდა კონკურსი  და ახერხებდა მაუწყებელი შეძენას, ხოლო როდესაც თანხა გაიზარდა, უარი ვთქვით კონკურსზე,“ – განმარტავს გია ქარცივაძე.

„იმისთვის გაკეთდა ეს, რომ არ გაესაჩივრებინა ვინმეს შემდეგ ეს გადაწყვეტილება და არ დაჩენილიყო მექანიკური პროდუქციის გარეშე ტელევიზია. ეს ჰქონდათ მიზნად, გეუბნებით,“ – უპასუხა გია ქარცივაძეს გიორგი კოხრეიძემ, აჭარის ტელევიზიის დირექტორმა.

წელს აჭარის ტელევიზიას მექანიკურ პროდუქცია კომპანია „ენ რეკორდსი“ მიაწვდის. მრჩეველთა საბჭოს სხდომაზე ინგა გოგოლიშვილმა, სატელევიზიო მაუწყებლობის განვითარების უფროსმა, აღნიშნა, რომ ეს იგივე კომპანია „ბრავოა,“ ვისთანაც წინა წლებშიც თანამშრომლობდა აჭარის ტელევიზია. „გადაირქვა სახელი, არ ვიცი, რა მოხდა, მაგრამ ადამიანები იგივე არიან,“ – დასძინა ინგა გოგოლიშვილმა.

კორუფციული რისკების შემცირებაზე დასვა კითხვა მრჩეველთა საბჭოს თავმჯდომარე გიგა ჩხარტიშვილმა და იქვე აღნიშნა, რომ „ფილმების შესყიდვა ტენდერით მართლაც ძალიან რთულია“. გიორგი კოხრეიძეს არ უპასუხია კონკრეტულად, როგორ შეამცირებს კორუფციის რისკს ახალი წესი, როცა კონკურსი აღარ ტარდება და ისე ყიდულობს ტელევიზია მილიონამდე ლარის პროდუქციას, რომ საჯაროდ ამის შესახებ არავინ არაფერი იცის.

კითხვა თამილა დოლიძემაც დასვა მას შემდეგ, რაც ახალი ფილმების და სერიალების ჩამონათვალს გაეცნო:

„ძველი ფილმებია ძირითადად“, – თქვა მან და ხაზი გაუსვა, რომ 2014 წლამდე წარმოებაში გაშვებულ ფილმებს ნახავს აჭარის ტელევიზიის მაყურებელი.

„აბა, ახალი, საპრემიერო ფილმები ოთუზბირი ღირს,“ – გადახედა თამილა დოლიძეს გიორგი კოხრეიძემ. დემოკრატიის დამასუსტებელი ახალი წესის შემოღებაში ოპოზიციის კვოტით ბორდში არჩეულმა თამარ წილოსანმაც აუწია მას ხელი.

სად დაიზოგა კონკრეტულად 80 ათასი ლარი, რაზეც გიორგი კოხრეიძე საუბრობდა და რატომ არჩია აჭარის ტელევიზიამ დახურული წესი ღია კონკურსს? – „ბათუმელები“ დაუკავშირდა აჭარის ტელევიზიის დირექტორს, გიორგი კოხრეიძეს. „თუ რამე გაინტერესებთ, მომწერეთ ოფიციალურად და მიიღე პასუხს ოფიციალურად,“ – მოგვწერა მან.

___

მთავარი ფოტო: სქრინი აჭარის ტელევიზიის მრჩეველთა საბჭოს 22 თებერვლის სხდომიდან

ბათუმის საჯარო ბიბლიოთეკის თანამშრომლები გაურკვეველი ვადით დაითხოვეს, მას შემდეგ, რაც ოფიციალურად ითქვა, რომ შენობა არა სანიტარული სამუშაოების გამო, არამედ მისი შესაძლო ავარიულობის მიზეზით არის დაკეტილი.

ამ თემაზე „ბათუმელების“ კითხვების შემდეგ ბიბლიოთეკის ადმინისტრაციამ ფეისბუქის საკუთარ გვერდზე გამოაქვეყნა განცხადება, სადაც დაადასტურა, რომ მკითხველის მომსახურება არა სანიტარულ-ჰიგიენური პროცედურების ჩატარების გამო, არამედ სხვა მიზეზით შეაჩერეს:

ინფორმაციის გაჟღერების შემდეგ ბიბლიოთეკის ადმინისტრაციამ შესასვლელში გამოკრული განცხადებაც შეცვალა:

როდის მომზადდება დასკვნა? – ბიბლიოთეკის დირექტორმა ჯონი საბაშვილმა პირად საუბარში გვითხრა, რომ დასკვნას 23 მაისს ელოდება.

ბიბლიოთეკის რამდენიმე თანამშრომელი, ვისთანაც „ბათუმელებმა“ გასაუბრება შეძლო, დარწმუნებულია, რომ შენობა ავარიულია და აქ მუშაობა საშიშია: „ჩამოგვენგრევა თავზე“. ზოგიერთი კი ფიქრობს, რომ ამ შიშის გაჩენაზე „მიზანმიმართულად იმუშავეს“.

ყველა მათგანი სახელისა და გვარის დასახელებით საუბარს ერიდება.

არსებობს კიდევ ერთი ვერსია, რომ შენობის კედლები მას შემდეგ დაიბზარა, როცა სარდაფში რამდენიმე სივრცე მოაწყვეს. არის თუ არა ეს ასე, ალბათ ექსპერტიზის დასკვნის გასაჯაროების შემდეგ გახდება ცნობილი.

ბიბლიოთეკის დირექტორი, ჯონი საბაშვილი აცხადებს, რომ შშმ პირებისთვის ბიბლიოთეკის სრული სერვისის მისაწვდომობის მიზნით ლიფტი უნდა მოაწყონ, ამიტომაც დასჭირდათ შენობის მდგრადობის შესწავლა.

ბიბლიოთეკასთან დაკავშირებით გავრცელებულ ამ ახალ ამბავს საეჭვოდ მიიჩნევენ ძეგლების დამცველები.

„იმდენად სახასიათო და საინტერესო შენობაა, წარმოუდგენელია, მაგას რაიმე დაემუქროს. თუმცა უნდობლობის ფაქტორია ძალიან მაღალი. საზოგადოებისგან ფარულად ხდება ხოლმე სხვადასხვა მნიშვნელოვანი გადაწყვეტილების მიღება, რაც მთავრდება ღირებული შენობების დაზიანებით, ან საერთოდ დემონტაჟით. ამიტომ არ არის გასაკვირი, რომ საზოგადოებაში გაჩნდა ეჭვი, რომ რაღაც ცუდი ხდება შენობის თავს, რაღაც ცუდი აქვთ ჩაფიქრებული. სასურველია, რომ თავიდანვე ყველაფერი იყოს ღია და გამჭვირვალე“, – ამბობს არქიტექტორი გია რამიშვილი.

მიუხედავად შენობის ისტორიული ღირებულებისა, მას ძეგლის სტატუსი არ აქვს. ბიბლიოთეკის თანამშრომლებმა გვითხრეს ისიც, რომ სტატუსის მინიჭებისთვის ყოფილმა დირექტორმა, გენო მახარაძემ, საქართველოს კულტურული მემკვიდრეობის ეროვნულ სააგენტოს 2018 წლამდე მიმართა, თუმცა შენობას სტატუსი არ მიანიჭეს.

სააგენტოს ინფორმაციით, მსგავსი განაცხადი მათთან არ შესულა, შესაბამისად ის არ განუხილავთ.

არქიტექტორი გია რამიშვილი აცხადებს, რომ შენობას გარდა ისტორიულისა, არქიტექტურული ღირებულებაც აქვს და მას სტატუსი უნდა მიენიჭოს. იმსახურებს თუ არა შენობა სტატუსს, თუნდაც მხოლოდ მისი ისტორიული ღირებულებიდან გამომდინარე და ხომ არ არის დაგეგმილი შესაბამისი განაცხადის ეროვნულ სააგენტოში გაგზავნა, ამაზე აჭარის კულტურული მემკვიდრეობის სააგენტოს ვკითხეთ. პასუხი არ მიგვიღია.

ბიბლიოთეკის გამგეობის შემადგენლობაში შედიოდნენ: ივ. ანდრონიკაშვილი (ქალაქის თავი), გრ. ვოლსკი, ვ. ლორტინი, ე. ტურკინი და კ. ჩხეიძე. ქალაქის მმართველობამ ბიბლიოთეკის საჭიროებისათვის გამოყო 1500 მანეთი. ახლად დაფუძნებული საჯარო ბიბლიოთეკის წიგნადი ფონდი უმთავრესად შეწირული წიგნებით იზრდებოდა.

დღეს, 22 მაისს ბათუმში,ხიმშიაშვილის #15-ში, 9-სართულიანი სახლის და მის გვერდით მდებარე კორპუსების მცხოვრებლები საპროტესტო აქციას მართავენ. ისინი კომპანია „ორბის“ უკანონო მშენებლობის შეჩერებასთან ერთად, უკვე აგებული კონსტრუქციის დემონტაჟს ითხოვენ.

აქციის მონაწილეების თქმით, ბათუმის მუნიციპალურმა ინსპექციამ მხოლოდ მშენებლობის შეჩერება მოითხოვა და არა დემონტაჟი, რამაც მოსახლეობის პროტესტი გამოიწვია. აქციაზე შეკრებილები აცხადებენ, რომ თუ არ დაანგრევენ უკანონოდ აშენებულ ნაგებობას, სამართლებრივ დავას დაიწყებენ.

მშენებლობის შესახებ ინფორმაციის გასაჯაროების შემდეგ მუნიციპალურმა ინსპექციამ „ორბი ჯგუფი“ თავდაპირველად გააფრთხილა. კომპანიამ მშენებლობა მაინც გააგრძელა. შემდეგ ინსპექციამ „ორბი ჯგუფი“ 5 000 ლარით დააჯარიმა და მშენებლობა გააჩერა.

_____

ამავე თემაზე წაიკითხეთ: 

ხულოში, სოფელ ბოძაურში, სახლი დაიწვა. ხულოს სახანძრო-სამაშველო სამსახურის ხელმძღვანელის ინფორმაციით, დაიწვა ერთსართულიანი ხის სახლი.

ხანძრის გაჩენის დროს სახლში ორი პირი იმყოფებოდა, მათ შორის ერთი ეტლით მოსარგებლე, მისი გამოყვანა ადგილობრივებმა შეძლეს, თუმცა 72 წლის ქალის გამოყვანა ვეღარ მოხერხდა. ის დაიღუპა.

სახანძრო სამსახურის ხელმძღვანელის ინფორმაციით, ადგილზე იმყოფებოდნენ მერიისა და საკრებულოს წარმომადგენლები: „ისინი მიიღებენ გადაწყვეტილებას ოჯახის წევრებისთვის თავშესაფრის გამოყოფაზე. ჩვენ ამის შესახებ  ვერაფერს გეტყვით.“

მერის წარმომადგენელი რიყეთის ადმინისტრაციულ ერთეულში – გოჩა შანთაძე ამბობს, რომ დაზარალებულ ოჯახს მეზობელთან გადაიყვანენ და ქირის თანხას მერია აანაზღაურებს.

ოჯახი, რომელსაც სახლი დაეწვა, 7-სულიანი იყო.

დღეს, 22 მაისს ორგანიზაციები: საქართველოს შემეცნებითი ცენტრი და ქალთა ასოციაცია „გვირილა“ საქართველოს სამ ქალაქში აქცია- პერფორმანსს მართავენ. ორგანიზაციების განმარტებით აქცია ქალთა სიცოცხლის ფუნდამენტური და ხელშეუვალი უფლების დასაცავად დაიგეგმა.

„21 მაისს, საზოგადოებრივ ტრანსპორტში, შვილების თვალწინ ქმარმა ცოლს სიცოცხლე მოუსპო. ჩვენ, ამ ტრაგიკული ფაქტით უკიდურესად შეძრწუნებული ადამიანები, ქალთა მკვლელობების სასტიკი სერიების წინააღმდეგ გამოვდივართ და ვიკრიბებით საქართველოს სამ სხვადასხვა ქალაქში: თბილისში, ბათუმსა და ზუგდიდში.“ – ნათქვამია განცხადებაში, რომელსაც აქციის ორგანიზატორები ფეისბუქის საკუთარ გვერდზე ავრცელებენ.

აქციის მთავარი გზავნილებია: „არ დახუჭო თვალი“, „შენი სიჩუმე კლავს“, „შეძლება შენ იყო შემდეგი“, „გამოდი სიცოცხლის უფლებისთვის“.

აქცია ბათუმში ცენტრალური პარკის მთავარ შესასვლელთან 18:00 საათზე დაიწყება.  აქცია ზუგდიდში 15:00 საათზე სკეიტპარკის ტერიტორიაზე, თბილისში კი ფილარმონიის წინ 18: 00 საათზე დაიწყება.

29 წლის რუსუდან ღორჯომელაძე წალკაში ცხოვრობს. ის ეკომიგრანტია ხულოს სოფელ ღურტიდან.

რუსუდანი პროფესიით ეკონომისტია, თუმცა მას წალკაში ყველა იცნობს, როგორც კონდიტერს.

„ყოველთვის ვფიქრობდი, რომ ტორტის გამოცხობა რთული იყო და ვერ შევძლებდი. ვერ წარმომედგინა, რომ ზრდასრულ ასაკში კონდიტერი შეიძლება გავმხდარიყავი.

ბავშვობაში მიფიქრია კონდიტერობაზე. მახსოვს, მე-10 კლასში ვიყავი, როცა სკოლაში მცირე ბიზნესგეგმის მოდელის შექმნა დაგვავალეს. ჩემი ბიზნეს გეგმა საკონდიტროზე იყო“, – იხსენებს რუსუდანი.

მან რამდენიმე წლის წინ აქტიურად დაიწყო ტორტების გამოცხობა და დღეს უკვე საკუთარი საკონდიტრო აქვს.

რუსუდანი ბანკში მუშაობდა, როცა მეორე შვილი შეეძინა და შვებულება აიღო. გვიყვება, რომ უფროს შვილთან ერთად მულტფილმს უყურებდა, როცა შემთხვევით ტორტის მომზადების ვიდეო ჩაირთო.

„ვიდეოს ნახვის შემდეგ ვიფიქრე, რომ ტორტის გამოცხობას შევძლებდი და გადავწყვიტე მეცადა. პირველ ჯერზე არ გამომივიდა, მაგრამ არ დავნებდი და რამდენიმე მცდელობის შემდეგ საკმაოდ კარგი ტორტი გამოვაცხვე. 2 თვეში ვიყიდე ყველაფერი, რაც შეიძლებოდა დამჭირვებოდა სახლში ტორტების ცხობისთვის და აქტიურად დავიწყე ტორტების ცხობა.

პირველი სამი თვე ჩემს გამომცხვარ ტორტებს მეზობლებს ვასინჯებდი. მას შემდეგ, რაც ჩემმა ტორტებმა ჩემი მეზობლების მოწონება დაიმსახურა, ფეისბუქგვერდის გაკეთება და შეკვეთების მიღება გადავწყვიტე“, – გვიყვება რუსუდანი.

რუსუდანის თქმით, წალკის მუნიციპალიტეტის მცხოვრებლებს ტორტების დიდი არჩევანი არასდროს ჰქონიათ. მან გვერდის გაკეთებიდან მალევე მიიღო პირველი შეკვეთაც – „ჩემს მომხმარებლებს შეეძლოთ დიზაინის მიხედვით აერჩიათ ტორტი. ეს მათთვის ძალიან დიდი სიახლე იყო“.

კონდიტერის თქმით, დაახლოებით 6 თვის შემდეგ შეკვეთებს ყოველდღიურად იღებდა. იგი ამ პერიოდისთვის უკვე სამსახურშიც დაბრუნდა და ტკბილეულს ძირითადად ღამით აცხობდა – „გვიან ღამემდე ვიდექი ფეხზე. მაშინ ერთი ტორტის გაკეთებისთვის 6-8 საათი მაინც მჭირდებოდა“.

რუსუდანი ამბობს, რომ საკმაოდ დიდი დრო დასჭირდა, ტორტის გამოცხობის დრო რომ შეემცირებინა. იხსენებს, რომ შეკვეთების რაოდენობის გაზრდის შემდეგ ხშირად წინასწარ ამზადებდა ტორტისთვის საჭირო დეტალებს, კრემს და მაცივარში ტოვებდა, რომ სამსახურიდან დაბრუნებულს საქმე გამარტივებოდა.

ტორტის შეკვეთების მიღების 2 წლისთავზე რუსუდანმა „აწარმოე საქართველოს“ თანადაფინანსება მოიპოვა.  დაახლოებით 10 თვეა, რაც საკონდიტრო გახსნა.

რუსუდანი სამი შვილის დედაა. მან საკონდიტროს „ტკბილი ფორთოხალი“ დაარქვა, რადგან ასე ხშირად მიმართავს ხოლმე შვილებს.

რუსუდან ღორჯომელაძემ საკონდიტროს გახსნის შემდეგ 2 ადამიანი დაასაქმა და ტკბილეულის ასორტიმენტიც გაზარდა. გვიყვება, რომ „ტკბილ ფორთოხალში“ ახლა მზადდება ბაქლავა და სხვა სადღესასწაულო ტკბილეული, ასევე, აჭარული და იმერული ხაჭაპურიც. საკონდიტროში მიტანის სერვისიც აქვთ. კონდიტრის თქმით, ყველაზე დიდი მოთხოვნა ყოველთვის ტორტებზეა.

რუსუდანის გვიყვება, რომ მისი ქმარი და ოჯახის სხვა წევრები ყოველთვის მხარს უჭერდნენ და ეხმარებოდნენ – „ნამდვილად არ არის მარტივი გქონდეს სამსახური, გყავდეს მცირეწლოვანი შვილები და ამასთან იყო კონდიტერი“.

მისი შეფასებით, ყველაზე რთული საკონდიტრო საქმეში დროის სწორად განაწილებაა. იხსენებს, რომ დროის მენეჯმენტი საქმის დაწყებისას ძალიან უჭირდა და ახლაც უჭირს, როცა ბევრი შეკვეთა აქვს.

რუსუდანი სამომავლოდ საკონდიტროს ასორტიმენტის კიდევ უფრო გაზრდას და დახვეწას გეგმავს.

„როცა დავიწყე ტორტების გამოცხობა, მხოლოდ იმაზე ვფიქრობდი, რომ ისეთი საკონდიტრო უნდა მქონოდა, როგორიც ახლა მაქვს“, – ამბობს რუსუდანი.

დღეს, 21 მაისს, საქართველოს მთავრობის ფეისბუკის გვერდზე გამოაქვეყნეს ვიდეოები, რომლებიც საქართველოს პრემიერ-მინისტრის, ირაკლი ღარიბაშვილის რეგიონებში ვიზიტს ასახავს. ამ ვიდეო თანახმად, ირაკლი ღარიბაშვილმა კასპში, შიდა ქართლსა და ხაშურში ინფრასტრუქტურული ობიექტები დაათვალიერა.

ის კადრებში ძირითადად საჯარო მოხელეების გარემოცვაშია, თუმცა ქალაქის კადრებში მას აქა-იქ მოქალაქეებიც ხვდებიან ან საგანგებოდ ახვედრებენ.

პრემიერის და მოქალაქეების საუბარში განსაკუთრებით თვალშისაცემია ფრაზა – „მადლობა მშვიდობისთვის“, „მადლობა, რომ მშვიდობა გვაქვს და არა ომი“ და ასე შემდეგ.

რუსეთის მიერ უკრაინაში დაწყებული სრულმასშტაბიანი ომის შემდეგ „მშვიდობის“ თემა „ქართული ოცნების“ ძირითადი მესიჯ-ბოქსია.

მაგალითად, შიდა ქართლში ირაკლი ღარიბაშვილს „მშვიდობისთვის“ მადლობა გადაუხადა ქალმა, რომელიც მას სკოლის მასწავლებლად გაეცნო.

„მადლობა აღმშენებლობისთვის, თქვენი პატრიოტიზმისთვის, მართლმადიდებლობისთვის, მადლობა სიმშვიდისთვის და მადლობა უფალს, რომ ეხლა აღმოჩნდით იმ ადგილზე, სადაც ხართ. ჩვენც რომ ომის ალში არ გაგვახვიეს, ღმერთმა დაგვიფარა თქვენი პრემიერად დანიშვნით“, – აი ამ ფორმით გადაუხადა მადლობა 21 წლის სტაჟის მქონე მასწავლებელმა ირაკლი ღარიბაშვილს.

კიდევ ერთი მასწავლებელი, რომელიც ღარიბაშვილს ხაშურში დაახვედრეს, ასევე „მშვიდობისთვის“ უხდის მადლობას.

„მადლობა მშვიდობისთვის“ ფრაზით იწყებს ღარიბაშვილთან  საუბარს ხაშურში კიდევ ერთი მოქალაქეც.

„მინდა მადლობა გადაგიხადოთ მშვიდობისთვის, რომ ჩვენი ქალები ძაძებით არ არიან შემოსილები და რომ ომი არ გვაქვს“, – ეუბნება ის ღარიბაშვილს.

„მადლობა რომ არა ვართ ომში, მიუხედავად ამდენი მცდელობისა“- ეუბნება ღარიბაშვილს კიდევ ერთი მოქალაქე.

ირაკლი ღარიბაშვილმა ფრაზა – „აბა ომი გინდათ?“, მას შემდეგ გამოიყენა, როცა მას ჟურნალისტებმა არაერთხელ ჰკითხეს, რატომ არ შეუერთდა საქართველო უკრაინაში წარმოებული ომის გამო რუსეთისთვის დაწესებულ სანქციებს.

ღარიბაშვილის თქმით, ოპოზიციის აქტიურობა უკრაინის საკითხზე არის „პროვოკაცია“ და „2008 წლის უბედურების გამეორების მცდელობა“.

როგორც პრემიერ-მინისტრი, ისე მმართველი პარტია – „ქართული ოცნება“ ყველა კრიტიკას, რომელსაც უკრაინის მიმართ ნაკლებ სოლიდარობის თუ ანტიდასავლური განცხადებების გამო ისმენს, „მშვიდობის“ თემით ამართლებს.

დღეს 21 მაისს, ბათუმში, ლუკაშენკოს რეჟიმს გამოქცეულმა ბელარუსებმა რეჟიმი გააპროტესტეს. აქციაზე მათ იმ ადამიანების ფოტოები გამოფინეს, რომლებიც ლუკაშენკოს რეჟიმმა იმსხვერპლა.

„ეს ადამიანები ლუკაშენკოს რეჟიმის მსხვერპლები არიან. ზოგი პოლიტპატიმარი ბელარუსიის ციხეში გარდაიცვალა, ზოგი ისევ ციხეშია. ადამიანები, რომლებიც თავისუფლებისთვის იბრძვიან, იდევნებიან. ათასზე მეტი ადამიანია დაკავებული პოლიტიკური ნიშნით. მათ შორის არასრულწლოვნები“-ამბობს ოლგა ბიგელი.

ვიდეო საპროტესტო აქციიდან:

უკრაინაში მებრძოლი ათი ქართველი მებრძოლი 7 მაისს, საავადმყოფოში მოწამვლის სიმპტომებით მოხვდა.

ერთ-ერთი მათგანი, ავთო ქაჯაია „ბათუმელებთან“ საუბარში ამბობდა, რომ რუსმა სამხედროებმა ამ დღეს მათ წინააღმდეგ აკრძალული იარაღი გამოიყენეს.

20 მაისს გაცემული სამედიცინო დასკვნით დასტურდება, რომ მებრძოლები ნამდვილად ფოსფორის შემცველი ნივთიერებით მოიწამლნენ.

„შხამიანი ფოსფორის შემცველი ნივთიერებით მოწამვლა“, – ასე წერია ავთანდილ ქაჯაიას დიაგნოზში. მებრძოლები ქალაქ დნიპროს ჰოსპიტალში მკურნალობდნენ.

როგორც ავთო ქაჯაია ამბობს, ამჟამად ათივე მებრძოლი თავს კარგად გრძნობს და მალე საბრძოლო მოქმედებებშიც ჩაერთვებიან.

ქიმიური იარაღით მოწამვლაზე ჰოსტომელში ბრძოლების დროსაც ითქვა, თუმცა უცნობია, ეს სამედიცინო ექსპერტიზით დადასტურდა თუ არა.

37 წლის იურისტი შენგელი ტოხოსაშვილი პანკისის ხეობის სოფელ ომალოში ცხოვრობს. მან დაახლოებით ერთი თვეა, რაც ომალოში კალმახა სოკოს წარმოება დაიწყო.

შენგელი გვიამბობს, რომ კალმახა სოკოს შესახებ არაფერი იცოდა, სანამ გასული წლის შემოდგომაზე შემთხვევით სოკოს სათბურში არ მოხვდა.

„ძალიან დამაინტერესა სათბურში სოკოს წარმოებამ. მსგავს სათბურში მოხვედრის შემდეგ ამ სათბურზე ვეკითხებოდი ყველას და მალევე გავარკვიე როგორ იწარმოება სოკო სათბურში. პანკისის გრილი ჰაერი და ტენიანობა სოკოსთვის მისაღებია.

საბოლოოდ, როცა დავრწმუნდი, რომ საკმაო ცოდნა დავაგროვე და არ გამიჭირდებოდა თავად მეწარმოებინა სათბურის სოკო, მაშინვე საქმეს შევუდექი“, – გვიყვება შენგელი.

შენგელიმ კალმახა სოკოს წარმოებაზე იმიტომ შეაჩერა არჩევანი, რომ მისი შეფასებით, პანკისის პირობები სხვა სოკოებთან შედარებით უფრო კალმახა სოკოსთვისაა მისაღები.

ახალგაზრდა მეწარმე მშობლებთან ერთად ცხოვრობს. გვიყვება, რომ თავისი იდეის შესახებ პირველად მშობლებს უთხრა. მისი თქმით, თავიდან ისინი ცოტა დაბნეულები იყვნენ, რადგან ვერ წარმოედგინათ სოკოს წარმოება ხელოვნურად, მაგრამ როცა მათ შენგელიმ სათბურში წარმოებული სოკოს ფოტოები და ვიდეოები აჩვენა, მისი იდეა მოიწონეს და მხარი დაუჭირეს.

ბოლო 4-5 თვე შენგელი მამასთან ერთად ყოველდღე მუშაობდა, რათა ეზოში უფუნქციო, ძველი საქონლის სადგომი სოკოს საწარმოდ გადაეკეთებინა.

იგი ამბობს, რომ ყველაზე რთული კალმახა სოკოს წარმოების პროცესში მისი ზრდისთვის საჭირო პირობების შექმნა და შენარჩუნებაა, ამიტომაც, სოკოს სათბურში თბოსაიზოლაციო, სავენტილაციო სისტემებისა და სანიაღვრე არხების გაკეთება მოუწია.

„კალმახა სოკოს სათბური დაახლოებით ერთი თვეა, რაც გავხსენით. პირველი ეტაპისთვის უკვე ინკუბირებული სოკოს 100 ტომარა შევიძინე. 1 ტომარა 16 ლარი ღირდა. სოკო წელიწადში სულ სამჯერ იძლევა მოსავალს. დაახლოებით 2-დან 3 ტონამდე სოკოს მოსავალს ველოდები წლის განმავლობაში.

სოკოს პირველი მოსავალი 4 დღის წინ ავიღე, დაახლოებით 150 კილოგრამი და ბაზარზეც გავიტანეთ, დასაწყისისთვის პანკისის მაღაზიებში. სოკო ეტაპობრივად იძლევა მოსავალს. 1 კილოგრამი სოკოს ღირებულება 8 ლარია“, – ამბობს შენგელი.

შენგელის თქმით, კალმახა სოკოს დათესვიდან 2-3 კვირამდე სჭირდება ინკუბაციისთვის, პირველ მოსავალს კი მომდევნო 2 კვირის განმავლობაში იძლევა.

მისი თქმით, ინკუბაციისთვის სოკოს ცალკე სივრცე სჭირდება, რაც ამ ეტაპზე შენგელის არ აქვს. ის გეგმავს, რომ საჭირო დამატებითი სივრცეც მოაწყოს, რათა  თავად შეძლოს სოკოს დათესვა, ინკუბაცია.

შენგელის ვარაუდით, ზაფხულში კალმახა სოკო მოსავალს ვერ მისცემს, რადგან სოკოს სიცხე არ უყვარს, მაგრამ დანარჩენ სამ სეზონზე შეძლებს კალმახა სოკოს რეალიზებას.

შენგელი ტოხოსაშვილი კალმახა სოკოს გარდა უკვე სამი წელია უალკოჰოლო ლუდს აწარმოებს ასკილისა და შავი კუნელის ნახარშისგან. გვიყვება, რომ ეს ქისტების ტრადიციული სასმელია, რომელსაც ძირითადად სხვადასხვა დღესასწაულზე ამზადებდნენ.

შენგელს უნდოდა, რომ უალკოჰოლო ქისტური ლუდის დამზადების ტექნიკა შეენარჩუნებინა და რამდენიმე წლის წინ უალკოჰოლო ლუდის დამამზადებელი საწარმო გახსნა.

„საქართველოში არ დარჩენილა ლუდის საწარმო, სადაც არ ვყოფილვარ. ძალიან დიდი შრომა დამჭირდა. უამრავ ადამიანთან გავიარე კონსულტაცია. ბოლოს დაფინანსება მოვიპოვე ლუდის დამამზადებელი დანადგარების შესაძენად. დღეს უკვე ჩემი ლუდი პანკისში, კახეთსა და თბილისის 10-მდე ობიექტში იყიდება“, – გვიყვება შენგელი.

შენგელის უნდა, რომ მათი ტრადიციული სასმელი საქართველოს ყველა კუთხეში გასინჯონ, მათ შორის აჭარაშიც. დარწმუნებულია, რომ მისი დამზადებული უალკოჰოლო ლუდი აჭარაშიც დიდ მოწონებას დაიმსახურებს.

როგორც შენგელი ამბობს, კალმახა სოკოს სათბური უალკოჰოლო ლუდისგან მიღებული მცირე შემოსავლით, მშობლების მხარდაჭერით და სესხად აღებული თანხით მოაწყო.

ახალგაზრდა მეწარმეს ახარებს, რომ ადამიანები, რომლებიც აქამდე მისგან უალკოჰოლო ლუდს ყიდულობდნენ, ახლა მზად არიან მისი წარმოებული კალმახა სოკოც შეიძინონ.

შენგელი კახეთის რეგიონული განვითარების ფონდში მუშაობს ტრენერად. როგორც ამბობს, მისი მსმენელები ძირითადად ახალგაზრდები არიან, რომელთაც ტრენინგებს სამოქალაქო განათლების მიმართულებით უტარებს:

„ძალიან მიყვარს ადამიანებთან ურთიერთობა. ჩემი მსმენელებისგან თავადაც ბევრ რამეს ვსწავლობ. მათ ხშირად ვუზიარებ ჩემი, როგორც მეწარმის გამოცდილებასაც“.

შენგელის თქმით, პანკისელებში კალმახა სოკოს სათბურმა დიდი მოწონება დაიმსახურა. მისი ინფორმაციით, უკვე რამდენიმე ადგილობრივი ოჯახი გეგმავს თავადაც მოაწყონ სოკოს სათბური.

დღეს, 21 მაისს, ბათუმის საქალაქო სასამართლომ 500 ლარით დააჯარიმა რუსეთის მოქალაქე, რომელმაც 19 მაისს, ბათუმში, თარჯიმანთა ბიუროს თანამშრომელს ხელი დაარტყა. საქმეს მოსამართლე ხათუნა ბოლქვაძე განიხილავდა.

როგორც ამ ამბის ერთ-ერთი თვითმხილველი და ამავე ბიუროს თანამშრომელი ელენე ხაჯიშვილი „ბათუმელებს“ ეუბნება, მოსამართლემ რუსეთის მოქალაქეს ქვეყნის პატივისცემისკენაც მოუწოდა. „როცა საქართველოში ხართ, პატივი უნდა სცეთ საქართველოსო, უთხრა“ – ამბობს ელენე ხაჯიშვილი.

რუსეთის მოქალაქემ თარჯიმანთან ბიუროში გაკრული უკრაინის დროშა ჩამოხია. ორი ქალი და ორი კაცი გააღიზიანა წარწერამ – „რუსკი კარაბლ იდი…“

ბიუროს თანამშრომელმა ნანა წაქაძემ რუსეთის მოქალაქეებს მიუთითა, რომ ისინი იმყოფებოდნენ კერძო საკუთრებაში და სხვის ქონებას აზიანებდნენ. როცა ნანა წაქაძე ვიდეოგადაღება დაიწყო, სწორედ ამ დროს დაარტყა მას რუსეთის მოქალაქემ, რის შემდეგაც თანამშრომლებმა პოლიცია გამოიძახეს.

შემთხვევის დროს სათარჯიმნო ბიუროში მხოლოდ ორი ქალი თანამშრომელი იმყოფებოდა.

დღეს 21 მაისს, ბათუმში, ლერმონტოვის ქუჩაზე ავტომანქანა გატეხეს. დამსხვრეულია ავტომანქანის მინა. სავარაუდოდ წაღებულია ფული და გარკვეული ნივთები.

ამავე ქუჩაზე ასევე მცდელობა იყო მეორე მანქანის გატეხვისაც. ავტომანქანას დაზიანებული აქვს მინა.