რუსეთის ფედერაციის დაღესტნის რესპუბლიკის ქალაქ იზბერბაშში სკოლის მოსწავლემ ბოლო ზარზე ომი გააპროტესტა.
„არა ომს, თავისუფლება უკრაინას! პუტინი ეშმაკია!“ – განაცხადა მიკროფონში გოგომ სკოლის დასრულების დღეს, ბოლო ზარის ღონისძიებაზე. ამ შეძახილების ამსახველი 12-წამიანი ვიდეო სოციალურ ქსელებში სწრაფად გავრცელდა. ვიდეოჩანაწერში ისმის ტაშის ხმაც.
მოგვიანებით გოგომ ბოდიში მოიხადა განცხადებისთვის. ვიდეო, რომლითაც ის ბოდიშს იხდის, ასევე სოციალურ ქსელებში გავრცელდა. მოკლე ვიდეოში გოგო ამბობს, რომ მას ზუხრა ალბეკოვა ჰქვია, ბოდიშს იხდის და ამბობს, რომ ნანობს თავის საქციელს. მისი თქმით, მას ყურადღების მიქცევა სურდა.
„ამ ბოლო დროს გამოცდებზე ვნერვიულობდი, დედაჩემს ვეჩხუბე, ვაღიარებ ჩემს შეცდომას და ბოდიშს ვიხდი, რომ დღესასწაული ყველას გავუფუჭე”, – ამბობს ზუხრა ალბეკოვა.
გავრცელდა გოგოს დედის ვიდეოც, სადაც ქალი ბოდიშს იხდის მისი შვილის „ემოციური, დაუფიქრებელი საქციელისთვის“. ქალი ამბობს, რომ მის შვილს გამოცდებზე ძლიერი სტრესი ჰქონდა და ამიტომ გამოვიდა ომის საწინააღმდეგო ლოზუნგებით. იგი ვიდეოში ამბობს, რომ მხარს უჭერს პუტინის პოლიტიკურ კურსს და „სპეცოპერაციას უკრაინაში“. „რაღაც გამომეპარა შვილის აღზრდაში, გპირდებით, რომ ასეთი რამ აღარასდროს განმეორდება“ – ამბობს ქალი.
Кавказ.Реалии-ს ცნობით, დედა-შვილს ადგილობრივმა ოფიციალურმა პირებმა აიძულეს საჯაროდ ბოდიშის მოხდა. გამოცემა წყაროზე დაყრდნობით წერს, რომ დაღესტნის მმართველმა, სერგეი მელიკოვმა, პირადად დაურეკა ქალაქის მერს მოთხოვნით, გაერკვია ეს საკითხი.
Кавказ.Реалии-ს ცნობით, დაღესტნის პროსამთავრობო ტელეგრამის არხები იუწყებიან, რომ კურსდამთავრებულის წინააღმდეგ შედგენილია ადმინისტრაციული ოქმი ადმინისტრაციულ სამართალდარღვევათა კოდექსის 20.3.3 მუხლის მიხედვით [რუსეთის შეიარაღებული ძალების დისკრედიტაცია] , ხოლო დედის წინააღმდეგ – 5.35-ე მუხლით [მშობლების ან კანონიერი წარმომადგენლების მიერ არასრულწლოვანთა ვალდებულებების შეუსრულებლობა არასრულწლოვანთა მოვლა-პატრონობასა და აღზრდაში].
