Batumelebi

დღეს, 22 მაისს, ბათუმის პორტში, ზღვაში მყოფ კატარღაზე ხანძარი გაჩნდა.

როგორც თვითმხილველებმა უთხრეს „ბათუმელებს“, კატარღაზე მყოფი ადამიანები ხანძრის გაჩენის შემდეგ ზღვაში გადახტნენ. კატარღაზე 2 ტურისტი, ინდოეთის მოქალაქეები და მესაჭე იყვნენ.

ისინი უსაფრთხოდ გამოვიდნენ ნაპირზე.

ამ დროისთვის ადგილზე იმყოფება სამაშველო ჯგუფი და სამაშველო კატარღა, რომელიც ხანძარს აქრობს.

საზღვაო ტრანსპორტის სააგენტოს ახალი უფროსი ჰყავს. ალექსი ახვლედიანი ამ პოსტზე ეკონომიკისა და მდგრადი განვითარების სამინისტროს მიერ გამოცხადებული კონკურსის შედეგად შეირჩა.

სამინისტროს მიერ გავრცელებული ოფიციალური ბიოგრაფიის თანახმად, „ალექსი ახვლედიანს დამთავრებული აქვს თბილისის პოლიტექნიკური ინსტიტუტი, ივანე ჯავახიშვილის სახელობის თბილისის სახელმწიფო უნივერსიტეტის სამშენებლო-ეკონომიკური ფაკულტეტი და თბილისის ჰუმანიტარული უნივერსიტეტის ეკონომიკური ფაკულტეტი. მისი შრომითი გამოცდილება საკმაოდ მრავალმხრივია – სხვადასხვა წლებში მუშაობდა ხელმძღვანელ პოზიციებზე როგორც კერძო, ისე საჯარო სექტორში.

საზღვაო ტრანსპორტის სააგენტოს ახალი დირექტორი არის საქართველოს დავით აღმაშენებლის სახელობის უნივერსიტეტის საპატიო დოქტორი“.

ეკონომიკის სამინისტროს არ გაუვრცელებია ინფორმაცია, სად მუშაობდა ალექსი ახვლედიანი და რა კარიერული გზა გაიარა, სანამ ქვეყნის ერთ-ერთი მნიშვნელოვანი უწყების ხელმძღვანელი გახდებოდა.

ისევე როგორც ამ დრომდე არ გაუვრცელებია ალექსი ახვლედიანის ფოტო.

ალექსი ახვლედიანს, როგორც ააიპ – „ევროპის ახალგაზრდული ოლიმპიური ფესტივალის თბილისი 2015-ის საორგანიზაციო კომიტეტის“ ყოფილ თავმჯდომარეს, ბოლო დეკლარაცია 2016 წელს აქვს შევსებული.

ამ დეკლარაციის მიხედვით, ის ფლობდა მიწის ნაკვეთებს და ბინებს საქართველოში, ჩეხეთის რესპუბლიკასა და უკრაინაში.

დეკლარაციის თანახმად, ალექსი ახვლედიანი 2016 წლისთვის ფლობდა წილებს რამდენიმე ბიზნეს კომპანიაში, როგორც უკრაინაში, ისე საქართველოში.

ამასთან, ალექსი ახვლედიანის სახელი უკავშირდება „რუსთავი 2“-ის და იმჟამინდელი დირექტორის, ნიკა გვარამიას საქმეს.

კერძოდ, 2015 წელს, მაშინ, როდესაც ნიკა გვარამია ტელეკომპანია „რუსთავი 2“-ის ხელმძღვანელი იყო და ხელისუფლება ტელევიზიისგან მის ჩამოშორებას ცდილობდა, გვარამიამ ღიად განაცხადა, რომ მას ხელისუფლება პირადი ცხოვრების კადრების გასაჯაროებით დაემუქრა.

2015 წლის 21 ოქტომბერს, „რუსთავი 2“-ის საგანგებო ეთერში, ნიკა გვარამია გამოვიდა და თქვა, რომ „2015 წლის 21 ოქტომბერს ტელეკომპანია რუსთავი 2“-ის შენობაში მასთან შეხვედრისა და ხელისუფლების მოთხოვნის გადასაცემად მივიდა მისი მეგობარი, ევროპის ახალგაზრდული ოლიმპიური ფესტივალი „თბილისი – 2015“-ის საორგანიზაციო კომიტეტის თავმჯდომარე ალექსი ახვლედიანი.

ხელისუფლების გზავნილი შეიცავდა მოთხოვნას, რომ სასამართლოში მიმდინარე პროცესებისთვის ამ უკანასკნელს არ შეეშალა ხელი, წინააღმდეგ შემთხვევაში გაასაჯაროებდნენ მისი პირადი ცხოვრების ამსახველ ვიდეოჩანაწერებს, სხვადასხვა სატელეფონო საუბრებს, მათ შორის ტელეკომპანიის მართვასთან დაკავშირებით მიხეილ სააკაშვილთან გამართულ სატელეფონო საუბრებს“.

მოგვიანებით, ნიკა გვარამიამ ჩვენება მისცა პროკურატურას. გვარამიას ჩვენების საფუძველზე კი ალექსი ახვლედიანი დაიკითხა როგორც მოწმე. ცნობისათვის, მან დაადასტურა გვარამიასთან შეხვედრა, თუმცა უარყო, რომ მას რაიმე სახის გზავნილი გადასცა.

2015 წლის 23 ოქტომბერს პროკურატურამ ამ საქმეზე განცხადება გაავრცელა, სადაც ეწერა, რომ „ალექსი ახვლედიანმა დაადასტურა ნიკა გვარამიასთან ახლო მეგობრული ურთიერთობა, ამ ურთიერთობის ფარგლებში მათი სხვადასხვა ვითარებაში ხშირი შეხვედრები და  მათ შორის ტელეკომპანია „რუსთავი 2“-ის შენობაში 2015 წლის 21 ოქტომბერს შემდგარი შეხვედრის ფაქტი, თუმცა კატეგორიულად უარყო რაიმე სახის სახელისუფლებო გზავნილების გადაცემის, მათ შორის სასამართლოში მიმდინარე პროცესებისათვის ხელის შეშლის შემთხვევაში პირადი ცხოვრების ამსახველი ვიდეოების ანდა სატელეფონო საუბრების მასალების გასაჯაროებასთან დაკავშირებით ხელისუფლების მოთხოვნის გადაცემის ფაქტი“.

ოფიციალური ინფორმაციით, 2016 წლის შემდეგ ალექსი ახვლედიანს საჯარო სამსახურში აღარ უმუშავია.

• აუდიტი უწყებაზე, რომელსაც ახვლედიანი ხელმძღვანელობა

2017 წელს აუდიტის სამსახურმა გამოაქვეყნა ააიპ „ევროპის ახალგაზრდული ოლიმპიური ფესტივალის თბილისი 2015-ს საორგანიზაციო კომიტეტის“ აუდიტი – კომიტეტს ალექსი ახვლედიანი ხელმძღვანელობდა.

აუდიტის ანგარიშის თანახმად, კომიტეტის საქმიანობაში მნიშვნელოვანი დარღვევები გამოვლინდა.

კერძოდ, ვერ იქნა წარმოდგენილი საორგანიზაციო კომიტეტის 2011-2015 წლების შესაბამისი პერიოდების ფინანსური ანგარიშგება, ბალანსები და მასთან დაკავშირებული სხვა ანგარიშები;

„ადგილი ჰქონდა „სახელმწიფო შესყიდვების შესახებ“ საქართველოს კანონის მოთხოვნათა დაუცველად ხელშეკრულებების გაფორმებას საორგანიზაციო კომიტეტის თანამშრომლებთან, რომლებიც საქართველოს საგადასახადო კოდექსის თანახმად წარმოადგენდნენ ურთიერთდამოკიდებულ პირებს.

ქვეყნის ფარგლებს გარეთ მივლინებისას, უმეტეს შემთხვევაში, ადგილი ჰქონდა ბინის დაქირავების ხარჯების ანაზღაურების ნორმების დარღვევის ფაქტებს. მივლინების ბრძანებებში არ იყო ინფორმაცია, თუ რამდენი დღის მიხედვით ხდებოდა სასტუმროს ხარჯის ანაზღაურება. ზოგიერთ შემთხვევაში ბრძანებით არ იკვეთება მივლინების მიზანი და ის ზოგადი ხასიათისაა. ვერ იქნა წარმოდგენილი ღონისძიებებზე ოფიციალური მოწვევები და ინფორმაცია მივლინებით მიღწეულ შედეგებზე,“ – ვკითხულობთ 2017 წელს გამოქვეყნებულ აუდიტის დასკვნაში.

საზღვაო ტრანსპორტის სააგენტოს წინა ხელმძღვანელმა, თამარ იოსელიანმა სააგენტო 1-ელ მაისს დატოვა.

თამარ იოსელიანი საზღვაო ტრანსპორტის სააგენტოს ტოვებს

See more

ჭადრაკის საერთაშორისო ორგანიზაციისა [„ფიდე“] და საქართველოს ჭადრაკის ფედერაციის ორგანიზებით, ბათუმში  უკრაინელი და ქართველი ცნობილი მოჭადრაკეების შეხვედრა გაიმართება.

„ფიდეს“ ცნობით, 5-11 ივნისს სასტუმრო „ლეგენდაში“, ბათუმში სოლიდარობის მატჩს გამართავენ მარია და ანა მუზიჩუკები [უკრაინა] და ნინო ბაციაშვილი და მერი არაბიძე [საქართველო].

დები ანა და მარია მუზიჩუკები  ლვოვის ოლქში მდებარე სოფლიდან არიან. სწორედ იქ დაიწყო საჭადრაკო კარიერა უფროსმა დამ, ანა მუზიჩუკმა, რომელსაც ახლა დიდოსტატის წოდება აქვს, მსოფლიოს სამგზის ჩემპიონია ჭადრაკში და უამრავი ჯილდო აქვს მიღებული. ქალთა შორის დიდოსტატის წოდება და ბევრი ჯილდო აქვს მის დას, მარია მუზიჩიკსაც.

ქართველი მოჭადრაკე ქალებიდან უკრაინელებს ნინო ბაციაშვილი და მერი არაბიძე შეხვდებიან. ბაციაშვილი გროსმაისტერია, იგი საქართველოს ოთხგზის ჩემპიონია. მერი არაბიძე ევროპის მოქმედი ჩემპიონია, „ფიდე“ წერს, რომ „თავისი ამჟამინდელი ძალითა და ამბიციური თამაშით, ის არის ერთ-ერთი საუკეთესო ქალი მოთამაშე და უახლოეს მომავალში დიდოსტატის ტიტულის მოპოვების შანსი აქვს“.

საზღვაო ტრანსპორტის სააგენტო ეხმიანება მედიაში გავრცელებულ ინფორმაციას ბათუმსა და რუსეთის ქალაქ ნოვოროსიისკს შორის მიმდინარე წლის აპრილიდან რეგულარული საზღვაო გადაზიდვების დაწყების შესახებ

„ინტერპრეტირებულია და სინამდვილეს არ შეესაბამება“ – აცხადებს საქართველოს საზღვაო ტრანსპორტის სააგენტო.

ინფორმაცია იმის შესახებ, რომ ბათუმსა და ნოვოროსიისკს შორის რეგულარული საზღვაო გადაზიდვები დაიწყო, დღეს გავრცელდა სომხურ მედიაში.

„რაც შეეხება ცნობას კონკრეტული გადაზიდვების შესახებ, აპრილში პალაუს დროშის ქვეშ მცურავმა გემმა Haci Musa Ucak- (IMO 9128544) ნამდვილად შეასრულა ორი კომერციული რეისი ნოვოროსისკსა და ბათუმს შორის.

ხაზგასასმელია ის ფაქტი, რომ ეს არ არის რეგულარული რეისი და სრულად არის კომერციული ხასიათის, რომელიც სისტემატურად ხორციელდება. აღნიშნული გემის მფლობელი კომპანია, რომელიც არ იძებნება სანქცირებულთა სიაში, კვლავ გეგმავს კომერციული რეისების შესრულებას. რაც შეეხება ტვირთს, ის სრულად ტრანზიტულია და განკუთვნილია სომხეთის რესპუბლიკისთვის.

საქართველოს საზღვაო ტრანსპორტის სააგენტო, ფინანსთა სამინისტროს შემოსავლების სამსახურთან კოორდინაციით, მუდმივ რეჟიმში ახორციელებს როგორც გემების, ასევე გემთმფლობელების შემოწმებას საერთაშორისო სანქციებთან მიმართებით. შეაბამისად, თუკი გემი ან გემის მფლობელი არის სანქციების სიაში, მას არ ეძლევა საქართველოს ნავსადგურებში შემოსვლისა და შესაბამისი პროცედურების განხორციელების უფლება“ – ვკითხულობთ სააგენტოს განცხადებაში.

„ქართველი მეზღვაურები, რომლებიც მეკობრეებმა გაბონში გემიდან გაიტაცეს, თავისუფალნი არიან.

ტყვეობიდან გამოხსნილი მეზღვაურები ნიგერიაში სამედიცინო შემოწმებას გადიან. პირველადი მონაცემებით, ორივე მეზღვაური თავს კარგად გრძნობს და რამდენიმე დღეში სამშობლოში დაბრუნდებიან,“ – ინფორმაციას ამის შესახებ საზღვაო ტრანსპორტის სააგენტოს ავრცელებს.

ინფორმაცია მეზღვაურების გატაცების შესახებ 2 მაისს გახდა ცნობილი. სამხრეთ აფრიკაში საქართველოს საკონსულო იტყობინებოდა, რომ ღამის საათებში გემიდან, რომელიც გაბონის ტერიტორიულ წყლებში ღუზაზე იდგა,  გაიტაცეს სამი მეზღვაური, მათ შორის, ორი საქართველოს მოქალაქე.

საზღვაო ტრანსპორტის სააგენტოს ცნობით მეზღვაურთა გათავისუფლებაში ჩართულნი იყვნენ:    საქართველოს საგარეო საქმეთა სამინისტრო, სამხრეთ აფრიკაში, ეთიოპიაში, ნიუ-იორკის შტატსა და სინგაპურში არსებული საქართველოს გენერალური საკონსულოები და გემთმფლობელი კომპანია.

2 ქართველი მეზღვაური გაიტაცეს გემიდან გაბონის ტერიტორიულ წყლებში

See more

ყოველი წლის გაზაფხულზე, აპრილის ბოლოს თუში მეცხვარეები ზამთრის საძოვრებიდან ცხვარს თუშეთში მიერეკებიან. გზა შირაქ-სამუხის ველიდან თუშეთის საზაფხულო საძოვრებამდე გრძელია და თითქმის ორი კვირა სჭირდება ცხვრის გადარეკვას.

მეცხვარეებს რთული, სახიფათო და გრძელი გზის გავლა უწევთ, სანამ სამშვიდობოს გააღწევენ და ცხვარს დააბინავებენ.

რამაზ ომაიძეს მცირე ცხვრის ფარა ჰყავს. ამიტომ ის ყოველ წელს მეგობარ მეცხვარეებს ატანს ხოლმე საკუთარ ცხვარს მთაში. თან რთულ გზაზე აცილებს და აბანოს უღელტეხილის გადალახვაში ეხმარება.

რამაზ ომაიძემ 4-18 მაისის განმავლობაში სამი ცხვრის ფარა გადააცილა შირაქის ველიდან თუშეთის ზაფხულის იალაღებამდე.

„ცხვრის გადარეკვა 25 აპრილიდან იწყება. შირაქ-სამუხის ველიდან, მივდივართ თუშეთში. ორკვირიანი პროცესია გაზაფხულზე ეს მგზავრობა. ჯერ ცხვარი ალვანში აგვყავს, ალვანის ველებზე, სადაც თუშები ცხოვრობენ. მერე აქედან გადადის თუშეთის საზაფხულო საძოვრებზე. ოქტომბრის შუა რიცხვამდე რჩება თუშეთში ცხვარი. ოქტომბრის 15 რიცხვიდან კი ისევ გადმოდის შირაქზე.

მე მანქანით მივყვები ხოლმე. მერე 8-10 კილომეტრი ზემოთ უღელტეხილზე ფეხითაც ავდივარ. როგორც წესი აბანოს უღელტეხილზე, 39-ე კილომეტრამდე ვაცილებ ხოლმე. იქიდან კიდევ 70 კილომეტრი აქვთ მწყემსებს გასავლელი თუშეთის ზაფხულის საძოვრებამდე,”- უყვება რამაზ ომაიძე „ბათუმელებს“.

ამინდში არ გაუმართლათ მაისის შუა რიცხვებში წასულ მწყემსებს. რამაზ ომაიძის თქმით, 500 სული ცხვარი მიჰყავდათ, უღელტეხილზე ასულებს კი თოვა დახვდათ.

„თოვლი და წვიმა გვქონდა. ორი დღე ვერ გადავედით აბანოს უღელტეხილზე. ორი დღე მთის ძირში ვიდექით, მთა არ გვიშვებდა, თოვდა მაღლა.

სირთულე ეგაა, რომ ქარსა და წვიმაში გარეთ ნაბადში გძინავს. ცხვარს მომწყემსვა უნდა. დღე და ღამ არ გვეძინა. ვმორიგეობდით ორ-ორი კაცი. ცუდი ამინდი რომაა ცხვარი იშლება, არ გაჩერდება ერთ ადგილზე. თუ არ მომწყემსავ დაიფანტება და მერე ნადირი წაიღებს.

ნადირმაც მოგვპარა ერთი სული. დათვი მოვიდა ერთი ცხვარი წაიყვანა. ასეთი მგზავრობა გვქონდა,“ – ამბობს რამაზ ომაიძე.

თუშეთის საძოვრებიც დაყოფილია სოფლების და ხეობების მიხედვით. ოთხი სათემო გვაქვს – პირიქითი, გომეწარი, წოვათა და სასაჩაღმო. მე ვარ პირიქითის თემის უფროსი და ჩემი ცხვარი პირიქითის ხეობაში მიმყავს.

პირიქითის ხეობაში ძოვს მარტო პირიქითის ცხვარი. გომეწრის ხეობა არის გომეწრის სოფლებში მცხოვრები მეცხვარეების და ასეა დაყოფილი. მწყემსები სხვა ხეობაში არ გადადიან. განა ვინმე რამეს ეტყვის, მაგრამ დაუწერელი კანონია ასეთი. წინაპრებიდან ასე იყო ყველა თავის ხეობაში აძოვებდა და აძოვებს თავის საქონელს – ცხვარს ან ძროხას,“ – უყვება რამაზ ომაიძე „ბათუმელებს“.

 

ბათუმის ხანდაზმულთა დღის ცენტრში 200-მდე ადამიანია რეგისტრირებული. ხანდაზმულები ხშირად იკრიბებიან აქ, რადგან ფიქრობენ, რომ მათთვის სოციალიზაცია სასიცოცხლოდ მნიშვნელოვანია. „ცხოვრება ისედაც ხანმოკლეა და გვინდა, რომ ხანდახან საკუთარ თავზეც ვიფიქროთ. მოვდივართ, ხან ნარდს ვთამაშობთ, ხან ყვავილებს ვრგავთ, დავდივართ ექსკურსიებზეც“, – ამბობენ ხანდაზმულები „ბათუმელებთან“.

ბათუმს შემოერთებულ ტერიტორიაზე, კონკრეტულად კი ფრიდონ ხალვაშის ქუჩაზე მდებარე ამ ცენტრს წითელი ჯვარი აფინანსებს.

დავით თურმანიძე 65 წლისაა და ცენტრს ძალიან ხშირად სტუმრობს. „მომწონს, რომ ვიღაც ფიქრობს ჩვენზე და ეს ძალიან კარგია“, – გვეუბნება ის.

77 წლის ოთარიც დიდი ხანია, რაც ცენტრშია გაწევრიანებული და ამბობს, რომ ბევრი ახალი მეგობარიც შეიძინა აქ.

„ჩვენი პენსია ძალიან დაბალია. არ იძლევა იმის საშუალებას, რომ წელიწადში ერთხელ მაინც სადმე წახვიდე. ცენტრი საშუალებას გვაძლევს ეს დანაკლისი ცოტათი მაინც ავინაზღაუროთ. ახლახან თეატრშიც ვიყავით, დაგეგმილი გვაქვს ბაკურიანში წასვლაც.

ცხოვრება ისედაც ხანმოკლეა, ამიტომ პატარა დრო შენს თავსაც ხომ უნდა დაუთმო“, – გვეუბნება ოთარ აბუსერიძე.

მერი მიქელაძე ახალგაზრდობაში სოკოს ქარხანაში მუშაობდა. იყო დიასახლისიც. თუმცა როგორც გვეუბნება, პენსია, რომელსაც დღეს სახელმწიფო აძლევს, ძალიან მიზერულია.

„რაში უნდა ვიკმაროთ? – წამალი ძვირია, საკვები ძვირი, პენსია კი ცოტა.

ძალიან მინდა ამ ქვეყანაში არავის შიოდეს, არ იყვნენ გაჭირვებულები, მაგრამ, სამწუხაროდ, არაფერი იცვლება“.

მერი ამბობს, რომ ბოლო იმედსაც კარგავს, რადგან „მთავრობა ქვეყანას რუსეთისკენ მიათრევს და ევროკავშირში ქვეყნის გაწევრიანების იმედი ეწურება“.

„ჩვენი მთავრობის შემყურე უკვე ყველაფერი მეეჭვება. ჩინოვნიკები ფულს აკეთებენ, ჩვენ კი გაუსაძლისი ყოფა გვაქვს. ადამიანებს უნდა ჰქონდეთ შესაძლებლობა, რომ წავიდნენ ევროპაში და ცხოვრება შეიცვალონ“, – გვეუბნება ის.

ჟუჟუნა თურმანიძეც ცხოვრების გაუმჯობესების იმედს საქართველოს ევროინტეგრაციაში ხედავს. „მკერავი ვარ, რამდენი წელი ვიმუშავე და ასეთი დაბალი პენსია გვაქვს.

მე და ჩემი მეუღლე დავბერდით, გვიჭირს სიარული და პატარა ავტომანქანა ვიყიდეთ კრედიტით, რომ წავიდ-წამოვიდეთ, მაგრამ ძალიან მაღალი პროცენტი გვაქვს გადასახდელი. ორი ადამიანის პენსია ამაზე მიდის.

გვჭირდება წამლებიც, ამიტომ, რა თქმა უნდა, პენსია საკმარისი არ არის ჩვენთვის“, – გვეუბნება ის.

ჟუჟუნას ძმისშვილი და მაზლიშვილი ევროპასა და ამერიკაში ცხოვრობენ. ამბობს, რომ მათი ცხოვრება მას შემდეგ შეიცვალა, როცა ისინი აქედან წავიდნენ.

„ევროკავშირი ცხოვრება კარგი იქნება აბა რა. სწავლა-განათლებაც უკეთესი გახდება და სოციალური ყოფაც.

ჩემი ძმისშვილი ამერიკაში სწავლობს, ცხოვრობს, დაოჯახდა კიდეც იქ და ვხედავ რა კარგადაა. იტალიაში მყავს მაზლიშვილები. აქ გაჭირვებით ცხოვრობდნენ, ნაქირავებში იყვნენ, ახლა მილანში არიან და ბინაც იყიდეს. ძალიან კარგად არიან. მე ვისაც ვუყურებ ჩემიანებს, ევროპაში უკეთ არიან.

პუტინის მე ძალიან მეშინია, ის თავის ხალხს არ იცავს და ჩვენ რას უნდა ველოდეთ მისგან.

ძალიან საშიშია უვიზო რეჟიმი რომ გვაქვს რუსეთთან. ამდენი რუსი შემოვიდა, ბინები გაძვირდა, ჩვენი სტუდენტები ბინას ვეღარ ქირაობენ. ეს ძალიან ცუდია“, – გვეუბნება ის.

გუგული დევაძეც საქართველოს ევროინტეგრაციის მომხრეა. ბრაზობს, რომ გუშინ საქართველოს აეროპორტში რუსული თვითმფრინავი დაფრინდა, ამის გაპროტესტების გამო კი ისევ საქართველოს მოქალაქეები დააკავეს.

„მე ჩემდათავად ევროპა მინდა. ჩამოფრინდა რუსული თვითმფრინავი და იქ რომ ამბავი იყო, აღარ ვიცი… 5 კაცი დაიჭირეს უკვე და რისთვის? – სიმართლისთვის.

კაცმა თქვა, რუსეთი არ მინდაო და ამისთვის როგორ უნდა დაიჭირო, ესაა სამართალი?“ – გვეუბნება გუგული.

ამბობს, რომ მთავრობის ხსენებაც არ სურს, რადგან ქვეყანა რუსეთისკენ მიჰყავთ.

„არ დამელაპარაკო მთავრობაზე, ისინი მთლიანად რუსეთს უჭერენ მხარს. ჩვენ არ გვინდა რუსეთი, მაგრამ ესმის ვინმეს? 90 პროცენტი ეუბნება, რომ ევროპა უნდა და მაინც არ ესმით“.

გუგულის აზრით, გამოსავალი საზოგადოების ერთიანობაშია. „უნდა დავაძალოთ მთავრობას, რომ ის გადაწყვეტილება მიიღოს, რაც ხალხს უნდა. სხვა გზა არ არის. შევიკრიბოთ, დავდგეთ ერთად, თორემ მათ ოჯახების ევროპაში ჰყავთ გადამალული, ჩვენ ვიკითხოთ“, – გვეუბნება ის.

გუგულის არც რუსული პროპაგანდის სჯერა. მისი აზრით, დიდი სიცრუეა თუკი ვინმეს სჯერა, რომ რუსეთი აფხაზეთს დაგვიბრუნებს ამ ყველაფრის გამო.

„აფხაზეთს დაგვიბრუნებსო, ასე ამბობენ და რისი იმედი უნდა გვქონდეს? აგერ უკრაინას საკუთარ ტერიტორიებს ართმევს, ანადგურებს, ბავშვებს კლავს და ესენი დააბრუნებენ აფხაზეთს? რუსეთთან ლაპარაკი უშედეგოა, რადგან რასაც ამბობს, არასდროს ასრულებს“, – მიიჩნევს გუგული.

საუბარში მერი მიქელაძე გვერთვება, რომელიც ამბობს, რომ ასეთ დროს, კარგი მეგობრებია საჭირო. „უკრაინას მეგობარი რომ არ ჰყოლოდა, ხომ ვერ მოაღწევდა აქამდე. მეგობარი საჭიროა რა თქმა უნდა“, – ამბობს ის.

თქვენ ვინ მიგაჩნიათ საქართველოს მეგობრად? – ვეკითხებით მას. – „ნატო-ს იმედი გვაქვს, თუ არა და არავინ“, – გვპასუხობს ის.

ნაზიკო მორთულაძე ცვლილებებს არჩევნებზე ელის. „უნდა შეიცვალოს მთავრობა“, – გვეუბნება ის.

„ექიმთან ვერ მიხვალ, ყველაფერი ძვირია, წამალი ცარცს ჰგავს, თურქეთში თუ არ ვიყიდე, არ მშველის. მთავრობაც ამ წამალს ჰგავს, ცარცივითაა.

იმედია, არჩევნებზე ეს ხელისუფლება შეიცვლება და ჩვენი ცხოვრებაც გაუმჯობესდება“, – გვეუბნება ის.

ფატი უშარიძე ხანდაზმულთა ცენტრში აქტიურად დადის. ამბობს, რომ პანდემიის დროს, კორონამ ჯანმრთელობა შეურყია და შორს მგზავრობა აღარ შეუძლია. ამიტომ დღის ცენტრი მისთვის ადგილია, სადაც მარტოობას ნაკლებად გრძნობს.

„77 წელი ფეხმოუდრეკელი ვიშრომე, მაგრამ ახლა ძალა აღარ მაქვს. ამ ცენტრში მოსვლა და ადამიანებთან ურთიერთობა ჩემთვის ძალიან მნიშვნელოვანია.

წლების განმავლობაში თამბაქოს ფაბრიკაში ვიმუშავე, მეუღლე ადრე გარდამეცვალა, მაგრამ არასდროს სხვისგან დახმარება არ მიმიღია, ისე აღვზარდე შვილები.

ჯანმრთელობის გამო ვერ დავყვები ამათ ექსკურსიებზე და ეს ძალიან ცუდია. ექიმთან რომ მივდივარ, ზოგიერთი მეუბნება „ასაკობრივია ბებო“ და ეს მაღიზიანებს. ასეთთან აღარც მივდივარ, რადგან ხანდაზმული ვარ, ყველაფერს ასაკობრივს მიაწერენ“, – გვეუბნება ფატი.

მაყვალა ქოქოლაძე ექთანი იყო. წლების განმავლობაში 200 ლარზე იმუშავა, თუმცა გული მაინც დაწყდა, როცა სამსახურიდან საპენსიო ასაკის გამო გამოუშვეს.

„სახლიდან რომ გამოვდიოდი და სამსახური მქონდა, ეს კარგი იყო ჩემთვის, მაგრამ დამაკარგვინეს. აქაც რომ არ მოვდიოდე, ალბათ გავგიჟდებოდი“, – გვეუბნება ის.

ფატი ვარშანიძე დაწყებითის მასწავლებელია და ცენტრს ხშირად სტუმრობს. რეფორმების უკმაყოფილო არ არის, თუმცა მასწავლებლის ხელფასი არ აკმაყოფილებს.

„თურქეთში, მუჰაჯირობის დროს გადასახლებული ნათესავები მყავს და იქ დავდივარ ხოლმე. ერთმა მკითხა, რამდენი გაქვს ხელფასიო. მაშინ 300 ლარიც არ მქონდა. ეს ხომ ერთი კვირის ხელფასიაო, ის 5 ათას ლირას იღებდა. მაშინ ლირა ასეთი სუსტი არ იყო“, – ამბობს ფატი.

ნათელა ზოიძეც ხშირად სტუმრობს ხანდაზმულთა ცენტრს. მოსწონს, როცა ერთად იკრიბებიან მოხუცები. კარტს თამაშობენ, ყვავილებს რგავენ ეზოში, თეატრში და პარკში დადიან. „ეს ჩემთვის ძალიან ბევრს ნიშნავსო“, – გვეუბნება ნათელა.

თურქეთის გარდა სხვა უცხო ქვეყანაში არასდროს უმოგზაურია. ინდოეთში ვიმოგზაურებდიო, ამბობს. თუმცა, მისთვის ეს შორეული ოცნებაა და ფიქრობს, რომ ქართველი პენსიონერის პენსიით, ამ ოცნების ასრულება შეუძლებელია.

ხანდაზმულების აზრით, ბევრად უკეთესი იქნებოდა საქართველოში ცხოვრება, კორუფცია რომ ასეთი მაღალი არ იყოს.

„ქვეყანა იმიტომაა ღარიბი, რომ კორუფციაა. აამუშაონ ქარხნები, დაასაქმონ ხალხი, მაგრამ მათ ცოლ-შვილს არ ჰყოფნის არაფერი.

ხალხის ძალა ერთობაშია, მაგრამ ეს ერთობაც რომ აღარ არის? ხახვზე და კარტოფილზე გაყიდეს ადამიანებმა ხმები“, – წუხან ხანდაზმულები. თუმცა არიან ოპტიმისტებიც, ვინც ფიქრობს, რომ მიზნისთვის ბრძოლა საჭიროა. „თორემ უბრძოლველად, არავინ არაფერს არ აკეთებს“.

„ელექტრონული არჩევნებით „ოცნებამ“ მიაღწია მთავარს, რომ აი, კონტროლდება ყველაფერი. დაზღვევის მექანიზმი რა გვაქვს, რომ არჩევნების მიმართ ნდობა აღდგა?“ – იკითხა დისკუსიის დროს გია აბულაძემ, აჭარის უმაღლესი საბჭოს დეპუტატმა ენმ-დან.

19 მაისს ბათუმის დემოკრატიული ჩართულობის ცენტრში „სამართლიანი არჩევნების და დემოკრატიის საერთაშორისო საზოგადოებამ“ საარჩევნო გარემოზე შეხვედრა მოაწყო. სხვადასხვა პრობლემასთან ერთად გაჟღერდა ელექტრონული ტექნოლოგიების გამოყენებით არჩევნების ჩატარებაც.

გია აბულაძემ საკუთარი გამოცდილება გაიხსენა წინა – 2021 წლის არჩევნებზე, როცა ელექტრონულად ჩატარდა არჩევნები რამდენიმე უბანზე, მათ შორის, ბათუმში.

„ადგილზე იყო ცესკოს წარმომადგენელი, რომელიც რეალურად სუსის წარმომადგენელია, ის წყვეტდა საკითხებს… უბნის თავმჯდომარეს ვთხოვდი, შენი უფლებამოსილება განახორციელე-მეთქი… გაიჭედებოდა აპარატი, გამოიძახებდნენ სპეციალისტს, გადატვირთავდნენ, გადმოტვირთავდნენ“, – თქვა გია აბულაძემ და განმარტა, რომ მისი აზრით, ელექტრონული არჩევნების შემოღებამ შესაძლოა გამჭვირვალობის ნაცვლად განცდა გააჩინოს, რომ ამომრჩეველს აკონტროლებენ.

„თანაც, ფლომასტერით უნდა იყოს შემოხაზული ბიულეტენზე შესაბამისი ნომერი, ეს მეორე მხარეს შესამჩნევია,“ – დასძინა უშანგი მიქელაძემ, ენმ-ს წარმომადგენელმა ბათუმის საოლქო საარჩევნო კომისიაში.

„ჩვენი რეკომენდაციაა, ვერიფიკაცია მოხდეს თითის ანაბეჭდით,“ – შეხვედრის მონაწილეებს მიმართა ნინო დოლიძემ, „სამართლიანი არჩევნების“ ხელმძღვანელმა.

„აპარატი არ გამორიცხავს, ვინმე სხვისი პირადობით შევიდეს საარჩევნო უბანზეც, თუ კომისიის წევრი არ ეტყვის, რომ ეს თქვენ არ ხართ,“- დასძინა ნინო დოლიძემ და საარჩევნო ადმინისტრაციების დაკომპლექტების წესზე ისაუბრა.

„სულ ვსაუბრობთ პროფესიული წევრების არჩევის შესახებ, რომ უნდა იყოს მაღალი სტანდარტი,“ – თქვა ნინო დოლიძემ და ხაზი გაუსვა იმას, რომ ბოლო პერიოდში ხელისუფლება საარჩევნო რეფორმას ამ სფეროში მომუშავე სამოქალაქო ორგანიზაციების ჩართულობის გარეშე ცვლიან.

„2007 წლიდან ვაკვირდები არჩევნებს და ასეთი რამ არ მინახავს. სამუშაო ჯგუფშიც არ დამნიშნეს, არანაირი დისკუსია არ ყოფილა,“ – აღნიშნა ნინო დოლიძემ.

„რატომ აძლევთ ლეგიტიმაციას ასეთ გადაწყვეტილებებს?“ – იკითხა ირმა ზოიძემ, ჟურნალისტმა და სამოქალაქო აქტივისტმა. მისი აზრით, თანმიმდევრულობა და შესაბამისი ფორმით პროტესტის გამოხატვაა საჭირო, რომ სამოქალაქო საზოგადოება ხელისუფლებისთვის ანგარიშგასაწევი გახდეს.

„თუ ერთი და იგივე წრეზე ვტრიალებთ და არაფერი გამოდის, რაღაც შესაცვლელია. საარჩევნო რეფორმის პროცესში თუ თქვენ არ ჩაგრთეს, საერთოდ ლეგიტიმაციის საკითხი უნდა დადგეს, რომ არ ვცნობთ ამ დოკუმენტს. სულ ვლაპარაკობთ, რომ რაღაც არ მოგვწონს, მაგრამ არაფერს ვცვლით,“ – აღნიშნა ირმა ზოიძემ.

ნინო დოლიძის თქმით, ახლა უკვე სხვა ეტაპზეა პროცესი და ხელისუფლება „საერთაშორისო და ადგილობრივი ორგანიზაციების რეკომენდაციებს აღარ ითვალისწინებს“.

„გეთანხმებით, რომ კამპანიის ხასიათი უნდა ჰქონდეს ამას და უფრო ეფექტურად შევძლოთ ადვოკატირება,“ – თქვა ნინო დოლიძემ და ყურადღება გაამახვილა იმაზე, რომ საარჩევნო ადმინისტრაციების დამოუკიდებლობის ნება ისევ არ არსებობს.

„პარტიებსაც ეკისრება ძალიან დიდი პასუხისმგებლობა,“ – აღნიშნა გია აბულაძემ. – „ფიქრობენ, რომ მაინც არის „ნაცმოძრაობის“ წარმომადგენელი და ის დაიცავს მთელ უბანს, რაც ძალიან დიდი აბსურდია. პარტიებმა უნდა გადახედონ ამ მიდგომას“.

„რამდენი პარტიის რამდენი წარმომადგენელია უბნებზე და ამ დროს განსხვავებული მოსაზრება წინა არჩევნებზე იყო სულ სამი,“ – დისკუსიაში ჩაერთო ლელა ხათრიძე, „სამართლიანი არჩევნების“ წარმომადგენელი. მან ის შემთხვევებიც გაიხსენა, როცა ამ ორგანიზაციის დამკვირვებლებმა ამა თუ იმ უბანზე დარღვევა დააფიქსირეს, პოლიტიკური პარტიის წარმომადგენლებმა კი, შესაბამისი პოზიციები არ დააფიქსირეს.

„ერთიანი დოკუმენტი უნდა არსებობდეს, კონკრეტულ მუხლში რა ცვლილებაა შესატანი. მაგალითად, არ მოგვწონს საარჩევნო ადმინისტრაციის დაკომპლექტების წესი – ჩვენ რას ვთავაზობთ?“ – იკითხა გია აბულაძემ.

„ჯერ პრინციპების დონეზე უნდა მოხდეს შეთანხმება, ეს არის ტექნიკური საკითხი. თუ არ ვთანხმდებით იმაზე, რომ კომისია უნდა იყოს მიუკერძოებელი, რა უნდა ჩავწეროთ მუხლში? ნება უნდა არსებობდეს,“ – მიმართა გია აბულაძეს ლევან ნატროშვილმა, „სამართლიანი არჩევნების“ დირექტორის მოადგილემ.

შეხვედრაზე ისაუბრეს 5%-იან ბარიერზეც, რაზეც ამ ეტაპზე შეთანხმება არ არსებობს.

„ევროპის ზოგიერთ ქვეყანაში არის ეს ბარიერი და არ რის პრობლემა, მაგრამ იქ არის ძალიან ძლიერი პარტიული სისტემები. მაგალითად, შვედეთში ყველაზე ახალგაზრდა პარტია იყო 30 წლის. როცა ჩამოყალიბებულია პარტიული სისტემები, შესაძლებელია ბუნებრივი იყოს ბარიერი.

საარჩევნო კოდექსი ნამდვილად თავიდან ბოლომდე გადასაწერია,“ – თქვა ნინო დოლიძემ, „სამართლიანი არჩევნების“ ხელმძღვანელმა.

რატომ ვერ აშენდა ცხოველთა თავშესაფარი? – ამ კითხვით ბათუმის საკრებულოს სხდომაზე, მერს, არჩილ ჩიქოვანს მიმართეს. საკრებულოს წევრმა ნატალია ძიძიგურმა სხდომაზე წაიკითხა რესპუბლიკური საავადმყოფოდან მიღებული მონაცემები, რომლის მიხედვითაც, ბოლო ერთი წლის განმავლობაში ძაღლის დაკბენის შედეგად დაზარალებულმა 4607-მა ადამიანმა მიმართა ექიმს.

„ეს არის კატასტროფა, ქალაქი არის ოსკარის მფლობელი, მზარდი ტურიზმით. სიცოცხლისა და ჯანმრთელობის უფლება არის უპირატესი, ჩვენ უნდა გავუფრთხილდეთ ჯანმრთელობას. ველოსიპედით საერთოდ ვეღარ გადაადგილდებიან ქალაში, ბავშვები ვეღარ გადაადგილდებიან. როდის გვექნება თავშესაფარი?“ – მიმართა მან მერს, არჩილ ჩიქოვანს, რომელიც სხდომას ესწრებოდა.

ბათუმში, ძაღლსაშენისა და იპოდრომის მოწყობა ქალაქის მერიამ რამდენიმე წლის წინ დააანონსა, 2021 წელს კი, კერძო კომპანიასთან 12 788 480 ლარზე ხელშეკრულებაც გააფორმა – დაპროექტებასა და მშენებლობაზე; თუმცა, ეს ხელშეკრულება შეწყვიტა და ხელახალი ტენდერი უკვე, მხოლოდ პროექტირებაზე გამოაცხადა.

მერიის სამმართველომ შერჩევა-შეფასების ეტაპზე პროექტირების ტენდერიც შეწყვიტა, რომელიც 700 ათასი ლარით იყო გამოცხადებული [ერთ-ერთი პრეტენდენტი მერიას პროექტისა და ხარჯთაღრიცხვის მომზადებას 490 ათას ლარად სთავაზობდა].

ხელახალი ტენდერი სამმართველომ ისევ 700 ათასი ლარით გამოაცხადა [ხოლო ხელშეკრულება ამჯერად შპს „აჭარკაპმშენთან“ 587 ათას ლარზე გააფორმა].

მერმა სხდომაზე განაცხადა, რომ იმედი აქვს უახლოეს მომავალში პროექტი მზად იქნება, შემდეგი სხდომისთვის კი მერია ბიუჯეტში კორექტირების თხოვნით მიმართავს საკრებულოს, სადაც თავშესაფრის მშენებლობისთვის განკუთვნილ თანხას ასახავენ ბიუჯეტში.

„თქვენ იცით, რომ მერიას ტენდერიც ჰქონდა გამოცხადებული მშენებლობაზე, შესაბამისმა კომპანიამ ვერ უზრუნველყო პროექტის წარმატებით განხორციელება და მასთან ხელშეკრულება შეწყდა. ჩვენ გადავწყვიტეთ, რომ არსებულ ტერიტორიაზე გვეყიდა პროექტი, რომელიც ალბათ უახლოეს პერიოდში იქნება და იმედს ვიტოვებ, რომ მომდევნო სხდომებზე, სადაც ჩვენ ბიუჯეტის კორექტირება გვექნება, ცხოველთა თავშესაფრის მშენებლობის ნაწილში გვექნება კონკრეტული განფასება და პროექტიც, ავსახავთ საბიუჯეტო ასიგნებებში აღნიშნულ პროექტს.“

მერმა სხდომაზე თქვა ისიც, რომ მხოლოდ თავშესაფრის აშენება პრობლემას ვერ მოაგვარებს და ამის მაგალითად დედაქალაქი დაასახელა:

„თავშესაფარი აშენდა თბილისში, მაგრამ პრობლემა ისევ არის. თქვენ იცით, რომ როგორც ჩვენს ქალაში, ასევე მეზობელ მუნიციპალიტეტებში არის გამოწვევა ამ მიმართულებით ისევ და ისევ ჩვენი თანამოქალაქეების დაუდევრობისა და არაჰუმანური მოპყრობის გამო. ხდება მიტოვება მათ შორის ჩვენ ქალაში, განსაკუთრებით ისეთ ადგილებში, სადაც კომერციული ობიექტებია.“

ბიუჯეტის კორექტირების შემდეგ მერიამ თავშესაფრის მშენებლობისთვის ტენდერი უნდა გამოაცხადოს. ყველაფერი კარგადაც რომ წავიდეს, ეს პროცედურები მოითხოვს გარკვეულ დროს. შესაბამისად, ნაკლებად სავარაუდოა, რომ მერიამ ცხოველთა თავშესაფრის მშენებლობის დაწყება წელს მოახერხოს.

საქართველოს საავტომობილო გზების დეპარტამენტის ინფორმაციით, გრიგოლეთთან, მდინარე სუფსაზე არსებულ ხიდზე მიმდინარე სამუშაოები, რომელიც 12 მაისს უნდა დასრულებულიყო, 15 ივნისამდე გაგრძელდება. შესაბამისად, ამ პერიოდში ხიდზე ავტოტრანსპორტის მოძრაობის სპეციალური რეჟიმი გაგრძელდება.

„დეპარტამენტთან გაფორმებული ხელშეკრულების საფუძველზე შპს „როსტვერკი“, საერთაშორისო მნიშვნელობის  სენაკი-ფოთი (ასაქცევი) – სარფის საავტომობილო გზის 50-ე კმ-ზე მდინარე სუფსაზე არსებულ სახიდე გადასასვლელზე აწარმოებს სარემონტო სამუშაოებს.

სამუშაოების წარმოების პერიოდში სავალი ნაწილი დროებით შევიწროებულია ჯერ ერთ, შემდეგ მეორე სამოძრაო ზოლზე.

აღნიშნული სამუშაოების წარმოების ვადა განსაზღვრული იყო 2023 წლის 12 მაისის ჩათვლით, თუმცა უამინდობის გამო საჭირო გახდა ვადის გაგრძელება 2023 წლის 15 ივნისამდე“ – აღნიშნულია დეპარტამენტის მიერ გავრცელებულ ინფორმაციაში.

სუფსის ხიდთან არსებული გზის ზემოთ გაივლის ახალი, ჩქაროსნული გრიგოლეთი-ქობულეთის გზაც, რომლის მხოლოდ 5-კილომეტრიანი მონაკვეთი გახსნეს გასული წლის ბოლოს. გრიგოლეთი-ქობულეთის გზის გაგრძელება კი ქობულეთის შემოვლითი გზაა, რომლის 4-ზოლიან მაგისტრალად გადაკეთება იგეგმება.

ამავე თემაზე: 

მკვლელი შემოვლითი გზა – რას შეცვლის ხელისუფლება 15 წლის ლიკას დაღუპვის შემდეგ

See more

ავარიული სახლების პროგრამაში მონაწილეობა აქციეს შესაძლებლობად, არამხოლოდ ავარიული სახლის ადგილზე, არამედ სხვა მისამართზე დაგეგმილ მშენებლობაზეც მაქსიმალურ სიმაღლეზე თანხმობის მისაღებად. ბათუმში ეს უკვე მეორე შემთხვევაა, როცა კომპანია ერთ მისამართზე ავარიული სახლის ათვისების სანაცვლოდ, მერიას სხვა ადგილზე განაშენიანების კოეფიციენტის [კ2] მაქსიმალურად გაზრდას სთხოვს.

მერია კი თანახმაა. უარზეც, რომ იყოს, ეს დროის საკითხია, თანხმობა მიიღწევა.

ბათუმში, პუშკინისა და მელიქიშვილის ქუჩების კვეთასთან ავარიული სახლის სანაცვლოდ კომპანია იქვე ახლოს, ყოფილი სავაჭრო ცენტრ „უნივერსამის“ ადგილზე, უკვე მიმდინარე სამშენებლო პროექტისთვის განაშენიანების მაქსიმალურ კოეფიციენტს, 17.0-ს ითხოვს. 2014 წელს ამ კომპანიაში აცხადებდნენ, რომ „უნივერსამის“ ადგილას დაახლოებით 16-17-სართულიანი შენობის აშენებას გეგმავდნენ. კოეფიციენტის მომატების შემდეგ კი, აქ აშენდება 32-32-სართულიანი ორი კორპუსი და ერთიც – 25-სართულიანი. 

ეს იმას ნიშნავს, რომ მშენებელს აქ მაქსიმალურად მაღალი შენობის, უფრო სწორად, წარდგენილი ესკიზის მიხედვით, შენობების აშენება სურს.

მერიაში განმარტეს, რომ პრობლემა არ არის. ცოტა ადრე კი იმავე ტერიტორიის მიმდებარედ არსებულის დემონტაჟსა და ახლის მშენებლობის პროექტზე მერმა კომპანიას უარი უთხრა.

არჩილ ჩიქოვანი წინააღმდეგი იყო და ეს ხელმოწერითაც დაადასტურა. მაშინ მერიაში განმარტეს, რომ ერჩივნათ ქალაქის გენგეგმას დალოდებოდნენ, მოგვიანებით კი ეს ამბავი მოგვარდა, გადაიფიქრეს და დემონტაჟის ნებართვაც მისცეს.

უარი მაშინ ანუ 2022 წელს არჩილ ჩიქოვანმა ასე დაასაბუთა:

„მუნიციპალიტეტის მერიის ქალაქგანვითარებისა და ურბანული პოლიტიკის სამსახურმა იმსჯელა თქვენი მოთხოვნის განხილვაზე, საქმის გარემოებების შესწავლისა და ანალიზის შედეგად მიიჩნევს, რომ ამ ეტაპზე საპროექტო ტერიტორიაზე მშენებლობის ნებართვის გაცემა მიზანშეუწონელია, ვინაიდან დაგეგმილმა მშენებლობამ შესაძლოა გავლენა მოახდინოს ბათუმის სივრცითი განვითარებისა და განაშენიანების მართვის დოკუმენტის ეფექტურ განხორციელებაზე, ქალაქგეგმარებით პროცესზე.

ქალაქის ამ ტერიტორიაზე მშენებლობის ნებართვის გაცემამ ასევე შესაძლოა გავლენა მოახდინოს კვლევით ნაწილზე, რაც შესაძლოა წინააღმდეგობაში მოვიდეს მისაღებ დოკუმენტთან და ხელი შეუშალოს სივრცითი დაგეგმარების ჯგუფს დადგენილი ვალდებულების შესრულებაში“.

ქალაქს გენგეგმა ჯერ ისევ არ აქვს. ამჯერად კომპანიამ საკუთარი ნაკვეთის მიმდებარედ, სადაც მშენებლობა უკვე დაწყებული აქვს, ავარიული სახლი იპოვა [მელიქიშვილის #42], სამხარაულის ექსპერტიზის ბიუროს მისი მდგრადობის შესახებ დასკვნაც მოამზადებინა  და ამ სახლის ხარჯზე კოეფიციენტის გაზრდა მოითხოვა მისამართზე – პუშკინის N132ბ/132გ/132დ.

ავარიული სახლის მიმდებარედ კომპანია 4161 კვ. მეტრ ტერიტორიას ფლობს საკუთრებაში. ეს არის ადგილი, სადაც ყოფილი „უნივერსამი“ ფუნქციონირებდა წლების განმავლობაში. კომპანიას აქ მშენებლობა  დაწყებული აქვს, ეს მერიაში წარდგენილი ესკიზებიდანაც ჩანს.

ესკიზის მიხედვით, რომელიც კომპანიამ მერიას წარუდგინა, პროექტი სამი ბლოკისგან შედგება. A და B ბლოკები 32-32- სართულიანი იქნება და მათი სიმაღლე 125 მეტრს მიაღწევს. C ბლოკი 100 მეტრი სიმაღლის უნდა იყოს და 25-სართულიანი.

შპს „უნივერსამი“ ამჯერად ბათუმის მერიას პუშკინისა და მელიქიშვილის ქუჩების კვეთასთან [მელიქიშვილის 42] ავარიული სახლის ათვისებას სთავაზობს და სანაცვლოდ იმავე ადგილზე მრავალბინიანი კორპუსის ასაშენებლად მაქსიმალურ კოეფიციენტს სთხოვს.

ბათუმის მერიის განმარტებით, არსებული ქალაქმშენებლობითი პირობებიდან გამომდინარე,  ინტენსივობის კოეფიციენტის გადამეტება შესაძლებელია.

მერიის განმარტებით, ამ „პროექტის განხორციელებით მიიღწევა რამდენიმე მიზანი“:

• მელიქიშვილის ქ. N42-ში მოხდება „ბარაკული ტიპის“ ავარიული მრავალბინიანი საცხოვრებელი სახლის ათვისება და ამ სახლში მცხოვრები ადამიანების დაკმაყოფილება.
• ბათუმში, პუშკინის ქ. N132ბ/132გ/132დ-ში  და მელიქიშვილის ქ. N42-ში, სადაც არსებული ქალაქმშენებლობითი პირობებიდან გამომ­დინარე შესაძლებელია ინტენსივობის კოეფიციენტის გადამეტება, კოეფიციენტი გაიზრდება 17,0-მდე. აღნიშნულის სანაცვლოდ ქალაქ ბათუმის მუნიციპალიტეტის მერიას მშენებლობის ნებართვის აღების პარალელურად საკუთრებაში გადაეცემა შენობა-ნაგებობის გაზრდილი ფართობის არანაკლებ 10%-ისა სასარგებლო ფართობის სახით, რომელიც გამოყენებულ უნდა იყოს სოციალური მიზნით, ავარიული ბარაკული ტიპის საცხოვრებელი სახლების ჩანაცვლებისთვის, მათ შორის, მუზეუმის მიმდებარედ.

მელიქიშვილის #42-ში, სადაც კომპანიამ ავარიული სახლი უნდა აითვისოს, 1802 კვ. მეტრია მიწის ფართობი. კომპანიას კოეფიციენტის გაზრდა აქაც დასჭირდება. მერია თავისივე განმარტებით ბარათში წერს, რომ კოეფიციენტის გაზრდა პრობლემა არც აქ არის: „ქალაქმშენებლობითი პირობებიდან გამომდინარე.“

ამ საკითხთან დაკავშირებით მერიამ დოკუმენტები საკრებულოში უკვე გადააგზავნა, საკრებულომ ის უკვე განიხილა და მის კენჭისყრას დღეს, 19 მაისს, სხდომაზე გეგმავს. შესაბამისი განკარგულების პროექტი უკვე მზად არის.