„მოთხოვნა გაიზარდა“ – ბათუმის მერიამ ურეხის სტადიონი აჭარის ფეხბურთის ფედერაციას გადასცა

ბათუმში, ურეხის დასახლებაში მდებარე სპორტული მოედანი და მასთან დაკავშირებული შენობები ბათუმის მერიამ „აჭარის ფეხბურთის ფედერაციას“ 10 წლის ვადით, უზურფრუქტის წესით გადასცა.

შეთანხმების მიხედვით ფედერაციამ აქ UEFA-ს სტანდარტების  შესაბამისი ინფრასტრუქტურის მოწყობა უნდა უზრუნველყოს, სასყიდლის სახით კი ბათუმის ბიუჯეტში ყოველწლიურად 500 ლარს შეიტანს.

რა ვადაში უნდა შეძლოს ფედერაციამ საკრებულოს განკარგულების პროექტით განსაზღვრული პირობა, ამის შესახებ არც ამ  განკარგულებაში ჩაუწერიათ და არც განმარტებით ბარათში. როგორც მერიის ქონების მართვის სამსახურის უფროსმა საკრებულოს სხდომაზე განმარტა, ვადების შესახებ უზურფრუქტის ხელშეკრულებაში ჩაიწერება.

ქონების გასხვისების ეს ფორმა, სწორედ იმ მიზეზით, რომ პირობები დაზუსტებული არ არის საკრებულოს „ერთიანი ნაციონალური მოძრაობის“ ფრაქციის თავმჯდომარემ დაიწუნა.  მან პრეტენზია დააფიქსირა იმის გამოც, რომ ფედერაციის წარმომადგენელი სხდომაზე არ იმყოფებოდა:

„მე ვფიქრობ უნდა ამოვიღოთ ეს საკითხი დღის წესრიგიდან.  მესმის, რომ მნიშვნელოვანია, მაგრამ სამწუხაროდ ყველა სხდომაზე გვიწევს რაღაცის მოთმენა, იმიტომ რომ მნიშვნელოვანია. კეთილი ინებონ და პატივი სცენ საკრებულოს. ინსტიტუტის მიმართ პატივისცემა გამოიჩინონ. მივიდნენ და ივარჯიშონ, მივცეთ ნებართვა. ამას არ სჭირდება ქონების გადაცემა.“ – განაცხადა ნოდარ დუმბაძემ სხდომაზე.

მერიის განმარტებით, ქონების გადაცემის მოთხოვნით ფედერაციამ მიმართა, იმ მოტივით, რომ სპორტის ამ სახეობის მიმართ ინტერესი და შესაბამისად მიმართვიანობა გაიზარდა, გამართული ინფრასტრუტურა კი იმისთვის, რომ ბავშვებმა სრულფასოვნად ვარჯიში შეძლონ ქალაქს არ აქვს.

„ელემენტარული სავარჯიშო პირობები არ აქვთ, გასახდელი არ აქვთ, მოედანი არ აქვთ და ეზოს მოედნებზე ვარჯიშობენ. აქედან გამომდინარე ეს საშუალებას მოგვეცემს საქართველოს ფეხბურთის ფედერაციასთან ერთად მოვაწესრიგოთ ურეხის სტადიონი.“ – განმარტა ფედერაციის წარმომადგენელმა, რომელიც სხდომაზე მოგვიანებით მივიდა.

ფედერაციის წარმომადგენლის ინფორმაციით ამ დროისთვის ბათუმში 12 საბავშვო-საფეხბურთო კლუბია ოფიციალურად დარეგისტრირებული, მათ შორის ზოგი ფასიანია. სკოლებში კი 3500 – ზე მეტი ბავშვი ვარჯიშობს და მოთხოვნა ყოველდღიურად იზრდება.

ურეხის სტადიონის ფართობი 8675 კვ.მეტრია. ამ ქონებასთან ერთად ფედერაციას გადაეცა ორი შენობა და მცირე ზომის მიწის ნაკვეთი მიმდებარედ.