პოლკ „აზოვის“ მეთაურის, დენის პროკოპენკოს [რედისის] მეუღლემ, ეკატერინა პროკოპენკომ, რომელმაც „აზოვსტალის“ მცველების ტყვეობის პერიოდში „აზოვსტალის“ მცველთა ოჯახების ასოციაცია დააფუძნა, განაცხადა, რომ პოლკ „აზოვის“ მეთაურები თურქეთში ცხოვრობენ დახურული ტიპის დაწესებულებაში, მაგრამ აქვთ ინფორმაციაზე წვდომა.
მან ამის შესახებ Ukrinform-თან ინტერვიუში ისაუბრა.
„ისინი უსაფრთხო ადგილას არიან, ამიტომ, საბედნიეროდ, მიწისძვრა მათ არ შეხებია“, განაცხადა ეკატერინა პროკოპენკომ.
რედისის მეუღლის თქმით, ახლა ის ცხოვრობს ისეთ სიტუაციაში, როცა რუსეთის ტყვეობაში დარჩენილი მებრძოლების ქალებს შეუძლიათ „უბრალოდ მომწერონ, დამემუქრონ კიდეც და მითხრან: „შენი ქმარი კურორტზეა“. ეს არ არის სიმართლე. ისინი დახურულ ტიპის დაწესებულებაში იმყოფებიან. არც კი ვიცით კონკრეტულად სად. ისინი კურორტზე არ არიან და არც ზღვაზე.
მათ აქვთ გარკვეული რეჟიმი, რეგლამენტირებული ზარები, განრიგი. მათ არ აწამებენ, როგორც რუსეთში, მაგრამ ამის მიუხედავად არ არიან სრულიად თავისუფლები.
ჩვენ ყველას გვესმის, იმ პირობებში უფრო მეტ ხანს რომ დარჩენილიყვნენ ტყვეობაში, მაშინ მათ მდგომარეობა შეუქცევადი იქნებოდა“.
ეკატერინე პროკოპენკოს განცხადებით, „აზოვის“ პოლკის მეთაურებს, რომლებიც რუსეთმა იმ პირობით გაათავისუფლა ტყვეობიდან, რომ ისინი თურქეთში დარჩებოდნენ, აქვთ წვდომა ინფორმაციაზე და მათ იციან ყველაფერი, რაც უკრაინაში ხდება.
ამავე დროს, ეკატერინა პროკოპენკომ თქვა, რომ „აზოვის“ მეთაურებმა უარი თქვეს, მოინახულონ ახლობლებმა და ამას უწოდებენ „კაცურ სამხედრო სოლიდარობას“ – მათ სურთ თავიანთ ხელქვეითებთან მიმართებაში მორალურად თანაბარ პირობებში იყვნენ.
____
2022 წლის 21 სექტემბერს ტყვეების გაცვლის ფარგლებში უკრაინამ მოახერხა 215 მებრძოლის გათავისუფლება რუსეთის ტყვეობიდან.
მაშინ რუსეთმა გაათავისუფლა მესაზღვრეები, პოლიციელები, მეზღვაურები, ტერიტორიული თავდაცვის წარმომადგენლები, ასევე მებაჟეები და მოქალაქეები. მათ შორის იყვნენ პოლკ „აზოვის“ მეთაურები – დენის პროპოპენკო [რედისი] სერგი ვოლინსკი [ვოლინა], სვიატოსლავ პალარმა, დენის შლეგა, ოლეგ ხომენკო.
გათავისუფლებულ „აზოველებს“ შორის იყვნენ ნიკოლაი კუში [ფროსტი] და კონსტანტინ ნიკიტენკო [ფოკსი]. რუსეთი მათ დასჯას აპირებდა.
სანაცვლოდ უკრაინამ რუსეთს გადასცა უკრაინელი მილიარდერი ვიქტორ მედვედჩუკი, იგივე „პუტინის ნათლია“ და 55 რუსი სამხედრო.
„აზოვის“ 5 მეთაური დღემდე თურქეთში იმყოფება პრეზიდენტ ერდოღანის მიერ გაცემული პირობით, რომ მათ სიცოცხლეს საფრთხე არ დაემუქრება.
___
ფოტო უკრაინის შსს: აზოვის მეთაურები, დაღუპული შს მინისტრი, დენის მონასტრისკი, დაზვერვის ხელმძღვანელი კირილო ბუდანოვი თურქეთში 2022 წლის ბოლოს
